ბათუმსა და ხელვაჩაურს შორის ადმინისტრაციული საზღვრის შეცვლაზე ბათუმის საკრებულოში შექმნილი სამუშაო ჯგუფი უფლებამოსილების ვადის ერთი თვით გაგრძელებას ითხოვს.
აღნიშნულ ჯგუფს საზღვრების შეცვლაზე შუამდგომლობა სამი თვის ვადაში, ოქტომბრამდე უნდა მოემზადებინა, თუმცა ეს ვადა ერთი თვით კიდევ გაგრძელდება. სამუშაო ჯგუფის ხელმძღვანელი საკრებულოს თავმჯდომარე ივანე მაისურაძეა.
ვადის გაგრძელებაზე გადაწყვეტილება კი ბათუმის საკრებულომ 2026 წლის 30 სექტემბრის სხდომაზე უნდა მიიღოს. შესაბამისი განკარგულების პროექტი მზადაა და საკითხი საკრებულოს მომავალი სხდომის დღის წესრიგშია შეტანილი.
რა ხდება
ხელვაჩაურის მუნიციპალიტეტი ბათუმისგან 145,4 ჰექტარი [1,45 მილიონი კვადრატული მეტრი] ტერიტორიის უკან დაბრუნებას ითხოვს. ადმინისტრაციული საზღვრების ცვლილებას ხელვაჩაურისა და ბათუმის საკრებულოებში შექმნილი სამუშაო ჯგუფები განიხილავენ.
საუბარია თავის დროზე ბათუმის ადმინისტრაციულ საზღვრებში მოქცეული [ქალაქს შემოერთებული] ტერიტორიის იმ ნაწილზე, სადაც მდებარეობს ხელვაჩაურის მერიის/საკრებულოს და სხვა ადმინისტრაციული შენობები. მათ შორის ხელვაჩაურის სასამართლო, პოლიციის განყოფილება, კულტურის სახლი, საბავშვო ბაღი და სხვა.
ბათუმის საკრებულოში შექმნილმა ჯგუფმა ქალაქის ადმინისტრაციული საზღვრების შეცვლის შესახებ შუამდგომლობა უნდა მოამზადოს. ეს შუამდგომლობა კი შემდეგ პარლამენტში გადაიგზავნება.
ამ თემაზე ვრცლად: ხელვაჩაური ბათუმს 145 ჰექტარს სთხოვს – საკრებულოები „საზღვრების დემარკაციაზე“ მუშაობენ
ადმინისტრაციული საზღვრების შეცვლის შესახებ შუამდგომლობის მომზადების ორგანიზებისთვის დროებითი სამუშაო ჯგუფი ბათუმის საკრებულოში 2026 წლის 30 ივნისის განკარგულებით შეიქმნა.
„ადმინისტრაციული საზღვრების შეცვლის საკითხის სათანადოდ შესწავლა საჭიროებს საკითხთან დაკავშირებული ფაქტობრივი და სამართლებრივი გარემოებების გამოკვლევას, შესაბამისი ინფორმაციისა და დოკუმენტაციის მოძიებას, დამუშავებასა და ანალიზს, აგრეთვე მიღებული მონაცემების ურთიერთშეჯერებასა და შეფასებას.
შესასწავლ გარემოებათა მოცულობისა და სამუშაო ჯგუფის მიერ საკითხის სრულყოფილად შესწავლის აუცილებლობის გათვალისწინებით, საჭიროა დამატებითი დრო მოძიებული მასალების დამუშავების, შესაბამისი გარემოებების შეფასებისა და სამუშაო ჯგუფის საქმიანობის შეჯამებისათვის.
აღნიშნულიდან გამომდინარე, მიზანშეწონილია დროებითი სამუშაო ჯგუფის უფლებამოსილების ვადის გაგრძელება 1 თვით.“ – აღნიშნულია იმ პროექტის განმარტებით ბარათში, რომელიც საკრებულომ 30 სექტემბერს უნდა განიხილოს.
ვადის გაგრძელების შემთხვევაში კი – თუ კიდევ რამე არ შეცვალეს – საზღვრის შეცვლაზე შუამდგომლობა 2026 წლის ნოემბრამდე უნდა იყოს მზად.
არადა საკრებულო დარწმუნებული იყო, რომ 3 თვის ვადაში ჩაეტეოდნენ.
„განისაზღვრა დროებითი სამუშაო ჯგუფის ფუნქციონირების სამთვიანი ვადა, რაც წარმოადგენს გონივრულ ვადას საჭირო ფაქტობრივი გარემოებების შესასწავლად, კარტოგრაფიული მასალების დასამუშავებლად, მოსახლეობასთან კონსულტაციების ასახვისა და შესაბამისი შუამდგომლობის პროექტის სრულყოფილად ჩამოსაყალიბებლად.“ – წერდა ბათუმის საკრებულო 2026 წლის 30 ივნისს.
30 ივნისიდან დღემდე, აღნიშნული ჯგუფის მუშაოების შესახებ ინფორმაცია ქალაქის საკრებულომ მხოლოდ ერთხელ, 11 სექტემბერს გაავრცელა. ამ ინფორმაციით კი, ჯგუფის წევრებმა სამუშაო მიმართულებები გადაინაწილეს და მოსახლეობასთან შეხვედრების ორგანიზების საკითხი განიხილეს.
„…დღესვე სხდომაზე სამუშაო მიმართულებები გადანაწილდა. ასევე, განიხილეს მოსახლეობასთან საინფორმაციო და საკონსულტაციო შეხვედრების ორგანიზების საკითხი. დროებითი სამუშაო ჯგუფი ადმინისტრაციული საზღვრების ცვლილების საკითხზე მუშაობას და შესაბამისი შუამდგომლობის მომზადების პროცესს განაგრძობს.“ – წერდა 11 სექტემბერს საკრებულო, თუმცა, მოსახლეობასთან დაგეგმილი შეხვედრ[ებ]ის შესახებ ინფორმაცია ამ დრომდე არ გაუვრცელებია.
ბათუმსა და ხელვაჩაურს შორის ადმინისტრაციული საზღვრის შეცვლა-არშეცვლაზე წერია ბათუმის გენგეგმის პროექტშიც, თუმცა გენგეგმის დამტკიცების საკითხიც დროში საკმაოდ გაწელეს.
ამ თემაზე ვრცლად:
სად გაივლის საზღვარი ბათუმსა და ხელვაჩაურს შორის? – გენგეგმის პროექტი და საკრებულოების ვერსია
