19,4 მილიონი ლარი ფრიდონ ხალვაშის გამზირის სარეაბილიტაციოდ – გამარჯვებული გამოვლენილია

ბათუმში, ფრიდონ ხალვაშის გამზირის 4-კილომეტრიანი მონაკვეთის სარეაბილიტაციოდ გამოცხადებულ ტენდერში გამარჯვებული გამოვლენილია. შპს „ერ ტე დე“ საქართველოს საავტომობილო გზების დეპარტამენტს მომსახურებას 19 მილიონ 400 ათას ლარად სთავაზობს. დეპარტამენტს ტენდერი 22 206 512 ლარით ჰქონდა გამოცხადებული.

შესყიდვების პორტალის მიხედვით გამარჯვებულთან ხელშეკრულება ჯერ გაფორმებული არ არის. „ერ ტე დე“ 2013 წელს, თბილისში რეგისტრირებული კომპანიაა, რომლის 100% წილის მფლობელი და დირექტორია ლუხუმ ქართლოსიშვილი. ჯერ უცნობია მონაწილეობდა თუ არა ტენდერში სხვა პრეტენდენტები.

აღნიშნული ტენდერის ფარგლებში რეაბილიტაცია ჩაუტარდება ფრიდონ ხალვაშის გამზირის დაახლოებით 4,1 კილომეტრი სიგრძის მონაკვეთს – ანგისიდან [აეროპორტის გზატკეცილიდან] დაბა ხელვაჩაურამდე. ქუჩის ეს მონაკვეთი ბათუმი-ახალციხის ავტომაგისტრალის ნაწილია და მოძრაობა გადატვირთულია.

გზის უვარგისი სავალი ნაწილის გარდა, ამ მონაკვეთში მთავარი პრობლემაა გადასასვლელი ზებრების, შუქნიშნებისა და ტროტუარების არარსებობა.

ტექნიკურ დოკუმენტაციაში კი აღნიშნულია, რომ „ტროტუარები დაპროექტებულია არსებული სიტუაციის ოპტიმალურად გამოყენების პრინციპით; ტროტუარებზე ასასვლელებში შშმ პირთათვის მოეწყობა პანდუსები; დამონტაჟდება 6 შუქნიშანი; მოეწყობა უსაფრთხოების კუნძულები“.

პირობის მიხედვით, „მიმწოდებელი ვალდებულია, ტენდერით გათვალისწინებული სამუშაოების დასრულება უზრუნველყოს სამუშაოების დაწყების შესახებ შემსყიდველის წერილობითი დავალების გაცემიდან 7 თვეში.

ფრიდონ ხალვაშის გამზირი / მაისი, 2022

გზის სარეაბილიტაციო სამუშაოების შესყიდვაზე ტენდერი საქართველოს საავტომობილო გზების დეპარტამენტმა 2022 წლის 14 აპრილს გამოაცხადა. წინადადებების მიღება კი 2022 წლის 12 მაისს დაიწყო და 17 მაისს დასრულდა.

განახლება: ხელშეკრულება კერძო კომპანიასთან 19 399 999 ლარზე უკვე გაფორმებულია. ფრიდონ ხალვაშის გამზირის რეაბილიტაცია 2023 წლის თებერვლამდე უნდა დასრულდეს. 22 ივლისის მდგომარეობით კი, კომპანიისთვის ბიუჯეტიდან 3 879 999 ლარია გადარიცხული ავანსად.

ამავე თემაზე:

https://batumelebi.netgazeti.ge/news/403858/