Batumelebi

21 ივნისის მონაცემებით, საქართველოში კორონავირუსის 260 ახალი შემთხვევა დადასტურდა. ბოლო 24 საათში ქვეყნის მასშტაბით ჩატარდა 11 059 კვლევა ტესტით.

გასულ დღე-ღამეში საქართველოში 15 ადამიანი გარდაიცვალა კოვიდით.

დღეს, 21 ივნისის მონაცემებით,  აჭარაში კორონავირუსის 18 ახალი შემთხვევა დადასტურდა.

Stopcov.ge-ის მონაცემებით, დღეისათვის აჭარის კოვიდკლინიკებში 206 პაციენტი მკურნალობს, მათგან 11 მართვით სუნთქვაზეა.

აჭარის კოვიდსასტუმროებში, ბოლო მონაცემებით, იმყოფება 222 ინფიცირებული.

„ლელოს“ ლიდერს, რომელიც პოლიტიკაში მოსვლამდე გავლენიანი ბიზნესმენი იყო, ბათუმის განაშენიანებაზე ვკითხეთ. დეპუტატის პროგნოზი ბათუმის მცხოვრებთა პერსპექტივაზე არ არის სახარბიელო. ნახეთ რას ფიქრობს მამუკა ხაზარაძე მილიონერი ბიზნესმენის ახირებაზე, რომელიც ბათუმის ძველ ბულვარში 17-სართულიან შენობას აშენებს. როგორ უნდა შეაჩერონ ქალაქებმა გავლენიანი პირების ახირებები და თუ ამას ვერ მოახერხებენ, მაშინ რა ელით ამ ქალაქებში მცხოვრებთ. „ბათუმელების“ კითხვებს მამუკა ხაზარაძე პასუხობს.

•  ბატონო მამუკა, თქვენ დაწერეთ ფეისბუქის პირად გვერდზე ფრაზა – როცა “ავაშენოთ” მიტინგები აჯობებს “არ ავაშენოთ” მიტინგებს, მაშინ ქვეყანა დაიწყებს აღორძინებას. დღეს ჩვენს ქვეყანაში „არ ავაშენოთ“ მიტინგები სჭარბობს. თქვენთვის ეს რაზე მიუთითებს?

როცა ადამიანებს აქვთ პროტესტი „არ ავაშენოთ“, ამას აქვს თავისი მიზეზი  – ცუდად აშენებას ჯობია არ ააშენო. მე მესმის ამ ადამიანების. ბევრი მიზეზის გამო, კორუფციის, სიხარბის, ბევრი კვადრატული მეტრის გამო, საზოგადოებრივი სივრცეების მოპარვის ხარჯზე და ასე შემდეგ ჩვენ ვერ, არ დავამკვიდრეთ თანამედროვე მიდგომებით მშენებლობის სტანდარტი, სადაც დაცულია ადამიანების უფლებები. არ აქვს მნიშვნელობა ეს მშენებლობა იქნება ჰიდრო თუ უბრალოდ საცხოვრებელი სახლი ან კომპლექსი.

ჩემს სტატუსში მიწერია ისიც, როგორ უნდა აშენდეს, ამიტომ მნიშვნელოვანია მთელი კონტექსტი ვნახოთ. ავაშენოთ უმაღლესი სტანდარტით, რადგან მეორეჯერ ვერ დავუბრუნდებით მშენებლობებს. იმდენად შეიძლება გაფუჭდეს ყველაფერი, რომ მისი გამოსწორება შეუძლებელი იქნება, კორპუსებს ხომ ვეღარ დავანგრევთ.

• ბათუმში „არ ავაშენოთ“ აქციები ხშირად იმართება, ბოლო პერიოდში უმეტად ეს უკავშირდება „ამბასადორის“ მშენებლობას ბულვარში.

რა გავაკეთოთ იმისათვის, რომ ასე არ მოხდეს: ამას სჭირდება პოლიტიკური ნება, რომელიც უარს იტყვის ამ დანაშაულებრივ მიდგომაზე, რაც თუნდაც ბათუმში ხდება ბოლო წლებში. ვერავინ შემაცვლევინებს აზრს, რომ ისე როგორც შენდება, კარგია ბათუმის მომავლისთვის, როგორც მიდის ბულვარის თემა, ბეტონის კედლის შენება ზღვის მიმართულებით, რომელსაც ძალიან ბევრი პრობლემა ექნება მომავალში.

პრობლემა იქნება უძრავი ქონების ფასთან მიმართებაშიც, რაც პირდაპირ იმოქმედებს მცხოვრებლებზე, ვისაც რაიმე ქონება გააჩნია. უძრავი ქონების განვითარება ისე უნდა მოხდეს, რომ მისი ღირებულება გაიზარდოს და არ დაეცეს წლების განმავლობაში.

განაშენიანება როგორც მიდის, ევროპული გამოცდილების გარეშე, ზღვის სპეციფიკის გათვალისწინების გარეშე, ეს დიდ დაღს ასვამს და მომავალშიც დაასვამს ბათუმს. ეს აღარ იქნება საინტერესო ადგილი, სადაც შეიძლება მოიზიდო ტურისტები, რომლებიც აქ ფულს დახარჯავენ.

შენობა, რომელსაც არ აქვს პარკინგი, გამწვანების ზონა, რომელიც ეფარება სხვა ინვესტორს, რომელმაც რამდენიმე წლის წინ იმ იმედით ააშენა დაბალსართულიანი, რომ ჰქონდა გარანტია, წინ არავინ არაფერს ჩაუდგამდა… ფაქტია, რომ ამ მთავრობამ და წინა მთავრობამაც ამით ხელი მოითბო, ამას „აპრავებდნენ“ – ვაშენებთ, ხომ არ ვანგრევთო. უნდა ვაშენოთ, მაგრამ ხარისხიანად და სტანდარტებით, ეს არის პირველი ამოცანა.

• გადაწყვეტილების მიმღებნი ამ კრიტიკაზე აცხადებენ, რომ ისინი კანონის მიხედვით მოქმედებენ. 

თბილისი და ბათუმი კარგი მაგალითია და შეიძლება ძალიან ბევრი მსგავსების ნახვა – ორი ქალაქია, სადაც ინტენსიურად მიდის მშენებლობა და ძირითადად იგივე კომპანიები მოქმედებენ ორივე ქალაქში. საკანონმდებლო ორგანოში შემოსულია პროექტი სამშენებლო ამნისტიასთან დაკავშირებით თბილისში, რომელიც მე სერიოზულად გავაპროტესტე.

თუ ამნისტია შეეხება რიგით მოქალაქეს, რომელმაც ლოჯი მიაშენა რამდენიმე წლის წინა – კი ბატონო, შეიძლება პატიება, მაგრამ კომპანიები, რომლებმაც მიიტაცეს საზოგადოებრივი მიწა, სახელმწიფოს სკვერი, სარეკრეაციო ზონა, რვა სართულის ნაცვლად 15 სართული ააშენეს და დღეს ითხოვენ ამნისტირებას…

მოვითხოვე ასი კომპანიის სია და ინფორმაცია – რა დაარღვიეს, რა ჯარიმა დაეკისრათ, რა უნდა ვაპატიოთ, არიან თუ არა იმ კომპანიების სიაში, ვისაც სახელმწიფო  პანდემიის დროს დაეხმარა. გარდა ამისა, სად არის ჩამკეტი მექანიზმი, რომ მომავალში მსგავსი რამ არ მოხდება, 12 000 შემთხვევაზე გვაქვს საუბარი, მე მხოლოდ 100 ყველაზე მსხვილი მაგალითი მოვითხოვე, როდესაც ამ სიას ნახავთ, მიხვდებით, რომ სერიოზულ კორუფციასთან გვაქვს საქმე.

• თქვენი აზრით, მაგ სიაში კონკრეტული სახელები და გვარები გამოიკვეთება?

რა თქმა უნდა და თუ გამოიკვეთება, რომ ინტენსიური დარღვევები გვაქვს ბოლო 2 წლის განმავლობაში… ეს საკმაოდ დიდი კორუფციული სქემაა, როცა იცი, რომ მმართველი პარტიის მიერ ინიცირებული იქნება ეს [ამნისტიის] პროექტი. აი, ეს არის პრობლემა. მე მაქვს საფუძვლიანი ეჭვი, რომ თბილისზე როცა გაიტანენ, შემდეგ შეიძლება მთელ ქვეყანაზე გაავრცელონ ეს ყველაფერი.

• რა შეიძლება გააკეთოს პარლამენტმა, რომ საზოგადოებრივი სივრცეები ვეღარ მიიტაცონ, ვეღარ ააშენონ უკანონოდ და ქაოსურად?

ცხადია, მარტო მიტინგი და ბულვარი გადავარჩინოთ არ არის საკმარისი, ამას სისტემური მიდგომა სჭირდება, ასევე პარლამენტში ლობირება, კანონმდებლობა, პრესკონფერენციები, პრობლემების შექმნა. იმ ხალხის იდენტიფიკაციაა საჭირო, ვინც ამას ხელს აწერს, ეს ჩვენი ცხოვრების ნებისმიერ სფეროს ეხება. ამას ემატება უზარმაზარი კორუფცია და შედეგად ვიღებთ დამახინჯებულ ქალაქებს, ჯანმრთელობის გაუარესებას, ქალაქი, სადაც არ ხდება განიავება, სატრანსპორტო მოძრაობის ისე აწყობა, რომ გამონაბოლქვი არ იყოს.

• ამბობთ, რომ ნების არარსებობასთან გვაქვს საქმე და საკანონმდებლო ცვლილებებით ამას ვერ მოვაგვარებთ?

ჩვენ ვიხდით ფულს ისეთი სამსახურისთვის, როგორიც არის ზედამხედველობა. როგორ შეიძლება სართულები დააშენოს ვიღაცამ, თუ მერიის სამსახური არის თავის დონეზე. გამორიცხულია, ფანჯარა შეცვალო ბათუმის ისტორიულ ნაწილში, იმ წუთშივე მოვარდება ზედამხედველობა, გაიძულებთ, რომ ეს ფანჯარა მოხსნათ, მაგრამ არ ეხებიან კომპანიებს. ჩვენ პირიქით გავაკეთეთ, თუ შეგვეძლო აგვეშენებინა 1 ჰექტარზე, ავაშენეთ მის 20 პროცენტზე, ვთქვით, რომ 80 პროცენტს ვაჩუქებთ ქალაქს. ჩვენ ამით შევქმენით პრეცედენტი. აი, ამ პროექტმა აიღო ლონდონში საუკეთესო დეველოპმენტის ჯილდო. როგორც ბიზნესმენებმა ძალიან ბევრი წავაგეთ, დათვლა ჩვენც ვიცით. სამაგიეროდ შევქმენით პრეცედენტი, რომ ადამიანს, რომელმაც იყიდა იქ ბინა, მთელი ცხოვრების განმავლობაში ექნება ის ხედი.

• როგორც კანონმდებელმა მითხარით, როგორ შეიძლება ეს გამოცდილება კანონმდებლობაში განვავრცოთ ისე, რომ არც ინვესტორი დაზარალდეს და არც ქალაქი?

ბულვარის შემთხვევაში, ბულვარი ვისია? – თქვენია, ჩემია, არ აქვს მნიშვნელობა, ამ ქვეყნის მოქალაქე ვარ და ბულვარი ისევე მიყვარს, როგორც თქვენ, ხომ არ შევეჯიბრებით. ჩვენი ამოცანა თუ არის  ბულვარის გადარჩენა, მაშინ ჩემი და თქვენი ხელმოწერის გარეშე იქ არაფერი არ უნდა შეიცვალოს – ეს არის კულტურული მემკვიდრეობა და გვეკუთვნის ჩვენ, საზოგადოებას. თუ ვინმე კანონს არღვევს ჩვენი არჩეული ან სხვისი არჩეული, ის უნდა გამოვააშკარაოთ, არავის რომ არ მოუვიდეს აზრად კულტურულ მემკვიდრეობას შეეხოს ისე, რომელიც ჩვენ ზიანს მოგვაყენებს.

• ისევ საზოგადოების აქტიურობასთან მივედით?

საზოგადოების აქტიურობა ერთია და მეორე დაცვა იურიდიულად, უამრავი მექანიზმი არსებობს, რომ დაიცვა შენი უფლებები. ბრძოლას ყოველთვის აქვს აზრი, თუ ეს არ გააკეთე და ერთ პრეცედენტზე არ ჩაკეტე, ხვალ ბულვარი აღარ გვექნება – სხვა ნებისმიერი იტყვის, ამას თუ ააშენებინეთ, მეც მაქვს იქ მიწა, კაფე მქონდა და ახლა მინდა, რომ მეც ავაშენო 16 სართულიო.

არც ერთ ზღვისპირა ქალაქში არ კეთდება ისე, რომ წინა რიგებში არის მაღალსართულიანი და უკანა რიგებში – დაბალსართულიანი [კორპუსები]. იმიტომ ხარ ხელისუფალი, რომ უნდა უთხრა – ამ სივრცეში თუ მოგეცი 50-სართულიანის აშენების უფლება, შენ პრაქტიკულად ზღვას კეტავ. რა ქნას იმან, ვინც ერთ კილომეტრში ცხოვრობს ზღვიდან.

თუ დღეს აშენებ 50-სართულიანს და ბინას ყიდი 25 000 დოლარად, დაბალი რომ აგეშენებინა, იმავე ბინას გაყიდდი 100 000  დოლარად. ვისაც უნდა ზღვის ხედი, მან უნდა გადაიხადოს ძვირი. მიწოდება უნდა იყოს ლიმიტირებული, თუ არ მაქვს ამდენი ფული, მეორე ზოლში ვიყიდი. ჩვენ იმიტომ ვიგონებთ ყველაფერს საწინააღმდეგოს, რომ მენტალურად კორუმპირებული მთავრობა გვყავს. ადამიანზე არ ფიქრობს, თავის თავზეც არ ფიქრობს. აქ ფულს რომ აკეთებს, ოჯახი მიყავს და ნიცაში ასვენებს, მერე აქ ჩამოდის და გვიკითხავს მორალს, რომ ამას არაფერი არ ეშველება.

შს სამინისტროს პრესცენტრის ინფორმაციით, დღეს, 20 ივნისს, ბათუმში, აჭარის მთავრობასთან მიმდინარე აქციაზე, პოლიციამ 7 პირი დააკავა ადმინისტრაციული წესით. დაკავებულები არიან ბრალდებული ძმების – წულუკიძეების, ჭელიძეებისა და ელდარ ანთაძის ახლობლები. დაკავებულებს შორისაა ენმ-ს ერთ-ერთი ლიდერი ქობულეთში, ბონდო თედორაძე.

დღევანდელ აქციაზე პოლიციასა და დემონსტრანტებს შორის ვითარება მას შემდეგ დაიძაბა, რაც აქციის მონაწილეებმა აჭარის მთავრობის სახლის წინ კარვების გაშლა სცადეს. პოლიციამ მათ უთხრა, რომ ამის უფლება არ ჰქონდათ. დღევანდელი აქციის მონაწილეები მათი ოჯახის წევრების, 14 აპრილს დაკავებული 7 პირის, ძმების – წულუკიძეების, ჭელიძეების და ელდარ ანთაძის გათავისუფლებას ითხოვენ.

14 აპრილს დაკავებული რეზო წულუკიძის მეუღლე, ნარი ფუტკარაძე აცხადებს, რომ დღეს აქციაზე დაპირისპირებისას მის დაზე პოლიციელმა იძალადა – ნეკნები ჩაუმტვრია… ახალგაზრდა ქალი სასწრაფო სამედიცინო ჯგუფმა სამედიცინო დაწესებულებაში გადაიყვანა [ქალის ჯანმრთელობის მდგომარეობის შესახებ დაზუსტებულ ინფორმაციას აქვე მოგაწვდით].

____

ბრალდებული ძმები – წულუკიძეები, ჭელიძეები და ელდარ ანთაძე რიონის ხეობის დასაცავად გამართულ აქციაში 12 აპრილს მონაწილეობდნენ. მათ სწორედ იმ დღეს მომხდარი ინციდენტის გამო წაუყენეს ბრალი ჯგუფური ძალადობის მუხლით.

ყველაზე საინტერესო მონაკვეთი, რაც „წულუკიძეების და ჭელიძეების საქმეზე“ მოწმეთა და დაზარალებულთა ჩვენებებში შეიძლება იპოვოთ ისაა, როცა „უძლიერეს მამაკაცთა ფედერაციის“ ხელმძღვანელი აღწერს, როგორ სცემეს ის და მისი კოლეგები რიონის ხეობაში მყოფმა ძმებმა. სწორედ ამ ჩვენების საფუძველზე დააკავეს შვიდივე პირი.  16 აპრილს ქუთაისი სასამართლომ ისინი წინასწარ პატიმრობაში დატოვა.

14 აპრილს დაკავებულები ამტკიცებენ, რომ პოლიციამ რიონის ხეობაში პროვოკაცია მოუწყო და პოლიტიკური ნიშნით გაუსწორდნენ, რადგან ისინი ნაციონალური მოძრაობის მხარდამჭერები არიან.

____

ვრცლად ამავე თემაზე:

ბათუმში, აჭარის მთავრობასთან მიმდინარე აქციაზე, პოლიციელებსა და აქციის მონაწილეებს შორის დაპირისპირებაა. მიზეზი აქციის მონაწილეების გადაწყვეტილება გახდა – ისინი აჭარის მთავრობის წინ კარვების გაშლას აპირებდნენ. აქციას ბრალდებული ძმების – წულუკიძეების, ჭელიძეებისა და ელდარ ანთაძის ახლობლები მართავენ. პოლიციამ მათ კარვების გაშლის საშუალება არ მისცა.

ბრალდებულ ძმებს ჯგუფურ ძალადობას ედავებიან, დაკავებულები კი ამბობენ, რომ მათ პოლიტიკური ნიშნით გაუსწორდნენ, რადგან ისინი ნაციონალური მოძრაობის მხარდამჭერები არიან.

დღევანდელ აქციაზე ბათუმში მინიმუმ 4 პირია დაკავებული, ერთ-ერთ მონაწილეს კი სასწრაფო სამედიცინო ჯგუფის დახმარება დასჭირდა. ცუდად გახდა ახალგაზრდა ქალი, რომლის დის განცხადებით, მას შემდეგ, რაც ქალი შეუძლოდ გახდა და წაიქცა, მას პოლიციელებმა ფეხებით სცემეს.

აქციის მონაწილეები დაკავებული ძმების – ჭელიძეების, წულუკიძეების და ანთაძის გათავისუფლებას ითხოვენ. აქციის მონაწილეებმა ჯერ ავტომანქანებით მოაწყვეს მსვლელობა ბათუმის ქუჩებში, შემდეგ კი აჭარის მთავრობის სახლთან შეიკრიბნენ.

აქციის მონაწილეებმა განაცხადეს, რომ ისინი აჭარის მთავრობის სახლის წინ კარვების გაშლას გეგმავენ. შსს-ს წარმომადგენლის თქმით, აქციის მონაწილეებს კარვების გაშლის უფლებას არ მისცემენ.

აქციაზე არიან უმაღლესი საბჭოს დეპუტატები „ერთიანი ნაციონალური მოძრაობიდან“.

ძმები წულუკიძეების, ჭელიძეების და ელდარ ანთაძის ახლობლები დღეს, 20 ივნისს, საპროტესტო აქციას მართავენ. ისინი ძმები წულუკიძეების, ჭელიძეების და ელდარ ანთაძის გათავისუფლებას ითხოვენ. აქციის მონაწილეებმა ჯერ ავტომანქანებით მოაწყვეს მსვლელობა ბათუმის ქუჩებში, შემდეგ კი, აჭარის მთავრობის სახლთან შეიკრიბნენ.

აქციის მონაწილეების თქმით, ისინი აჭარის მთავრობის სახლის წინ კარვების გაშლას გეგმავენ. ადგილზე მობილიზებულია პოლიცია. შსს-ს წარმომადგენლის თქმით, აქციის მონაწილეებს კარვების გაშლის უფლებას არ მისცემენ.

შვიდივე ბრალდებული რიონის ხეობის დაცვის აქციაში მონაწილეობის შემდეგ 14 აპრილს დააკავეს, ისინი წინასწარ პატიმრობაში არიან. ბრალდებულებს გამოძიება ჯგუფური ძალადობის ჩადენას ედავება. დაზარალებულები კი, „უძლიერესი მამაკაცების ფედერაციის“ ხელმძღვანელი პირია და კიდევ რამდენიმე საჯარო მოხელე.

ამ საქმეში რამდენიმე გარემოებაა, რაც პოლიტიკურ ინტერესზე აჩენს კითხვებს. დაკავებულები „ერთიანი ნაციონალური მოძრაობის“ აქტიური მხარდამჭერები არიან და ყველა საპროტესტო აქციაში მონაწილეობდნენ.

ბრალდებულებს შორისაა ევროპის ჩემპიონი ჭიდაობაში ფირუზ წულუკიძე. მან 2020 წლის 15 ივნისს თქვა, რომ აჭარის მთავრობის თავმჯდომარის – თორნიკე რიჟვაძის მამა მას პოლიციის დეპარტამენტის მაშინდელ უფროსთან – კოტე ანანიაშვილთან ერთად შეხვდა და წინასაარჩევნოდ სპორტსმენების მონაწილეობით ე.წ. ზონდერჯგუფის შექმნა შესთავაზა. ამ დროს ფირუზ წულუკიძის ძმა რეზო წულუკიძე და მისი მეგობარი – ელდარ ანთაძე სხვა საქმეზე იყვნენ ბრალდებულები. წულუკიძეების თქმით, შეთანხმება მთავრობასთან არ შედგა. რამდენიმე თვის შემდეგ კი, წინასაარჩევნოდ თორნიკე რიჟვაძე, როგორც „ქართული ოცნების“ კანდიდატი, წულუკიძეებმა სოფელ დიდაჭარაში არ შეუშვეს.

დღეს თორნიკე რიჟვაძე ყველა კითხვას, რაც ამ საქმის ირგვლივ ჩნდება, იცილებს და აქცენტი სასამართლოზე გადააქვს – „მართლმსაჯულების განხორციელებაში მე ვერ ჩავერევი“. თორნიკე რიჟვაძემ უპასუხოდ დატოვა ჯემალ ჭელიძეც, რომელიც დაკავებული ძმები ჭელიძეების მამაა. ის ეტლსაა მიჯაჭვული და ეტლი მან საჯაროდ აჭარის მთავრობის სახლის წინ მას შემდეგ დატოვა, როცა აჭარის მთავრობაში მისი სოციალური გასაჭირის მოსმენის სურვილიც კი არავინ გამოთქვა. რამდენიმე დღის შემდეგ ჯემალ ჭელიძეს მთავრობის წარმომადგენლები შეხვდნენ და ეტლი დაუბრუნეს.

ამ თემაზე:

ცენტრალური საარჩევნო კომისია ადმინისტრაციული შენობების გარემონტებისთვის ჯამში 1 674 500 ლარის დახარჯვას გამარტივებული წესით, ტენდერის გარეშე გეგმავს. თანხმობისთვის ცესკომ შესყიდვების სააგენტოს უკვე მიმართა. სარემონტო-სარეკონსტრუქციო სამუშაოები თვენახევარში უნდა დასრულდეს.

ცესკოს განცხადებით, სარემონტო სამუშაოების ჩატარება აუცილებელია „2021 წლის ადგილობრივი თვითმმართველობის ორგანოთა არჩევნების სათანადო დონეზე ორგანიზებისთვის“.

„საარჩევნო კანონმდებლობაში დაგეგმილი ცვლილებების თანახმად, 2021 წლის ოქტომბერში გასამართი ადგილობრივი თვითმმართველობის ორგანოთა არჩევნებისათვის, საარჩევნო ადმინისტრაციაში [ცესკოში, საოლქო საარჩევნო კომისიებში] კომისიის წევრთა რაოდენობა იზრდება 17 ერთეულამდე, რაც მოითხოვს საარჩევნო ადმინისტრაციის შენობების ინფრასტრუქტურის მორგებას ახალ რეალობასთან. დაგეგმილი საკანონმდებლო ცვლილებების მიხედვით, ცესკოსა და საოლქო კომისიების დონეზე ადმინისტრაციას ემატება 370, ხოლო საუბნო კომისიების დონეზე – 19 000 ახალი თანამშრომელი.

20 ივნისის მდგომარეობით, Stopcov.ge-ზე გამოქვეყნებული ინფორმაციის თანახმად, ინტენსიური ტესტირების ფარგლებში, ბოლო 24 საათში ქვეყნის მასშტაბით ჩატარდა 18 737 კვლევა ტესტით, მათ შორის 9 329 კვლევა ანტიგენის ტესტით და 9 408 PCR ტესტით.

ჩატარებული ტესტირების შედეგად, საქართველოში ბოლო 24 საათში გამოვლინდა ვირუსით ინფიცირების 521 ახალი დადასტურებული შემთხვევა. ქვეყანაში კოვიდ19-ის პანდემიის გავრცელებიდან დღემდე გამოვლენილი დადასტურებული შემთხვევების საერთო რაოდენობა შეადგენს  358 881-ს.

რაც შეეხება დადებითობის მაჩვენებელს, 19 ივნისის მდგომარეობით, დადებითობის დღიური მაჩვენებელი არის 2.78 %, ბოლო 14 დღის მანძილზე – 2.46%, ხოლო 7 დღის მანძილზე – 2.66%.

ბოლო 24 საათში ვირუსისგან გამოჯანმრთელდა 911 პირი, ხოლო ჯამში გამოჯანმრთელებულთა რაოდენობა გაიზარდა 344 748-მდე.

ბოლო 24 საათში  კორონავირუსით გარდაცვალების 12 ახალი შემთხვევა დაფიქსირდა. პანდემიის გავრცელებიდან დღემდე ვირუსით ჯამში 5 160 პირი გარდაიცვალა.

დღეს ქვეყანაში გამოვლენილი ინფიცირების 521 ახალი შემთხვევიდან თბილისში გამოვლენილია 283 შემთხვევა, აჭარაში – 36, იმერეთში – 52, ქვემო ქართლში – 51, შიდა ქართლში – 23, გურიაში – 2, სამეგრელო – ზემო სვანეთში – 22, კახეთში – 31, მცხეთა-მთიანეთში – 8, სამცხე-ჯავახეთში – 9, რაჭა-ლეჩხუმსა და ქვემო სვანეთში – 4.

ამ ეტაპზე ინფიცირების მიმდინარე აქტიური შემთხვევა არის 8 947, მათგან 2 762 ადამიანი მკურნალობს საავადმყოფოში, მათ შორის, თბილისის საავადმყოფოებში –  1 476, აჭარაში – 211, იმერეთში – 387.

20 ივნისის დილის მონაცემებით, ქვეყანაში მძიმე პაციენტია 668, მათ შორის, თბილისში – 302, აჭარაში – 59, იმერეთში -137.

ხელოვნური სუნთქვის აპარატზე იმყოფება 183 პირი, მათგან თბილისში – 115, აჭარაში – 12, იმერეთში – 12.

589 ადამიანი მოთავსებულია კლინიკურ სასტუმროებში, მათ შორის, 344 – თბილისში, 217- აჭარაში.

5 596 პირი ვირუსის მკურნალობის კურსს გადის საცხოვრებელ ბინაზე.

საკარანტინე სივრცეებში მოთავსებულია 44 ადამიანი, მათ შორის, თბილისში – 40, ხოლო აჭარაში – 4.

ამ ეტაპისთვის თვითიზოლაციაში იმყოფება 9 556 ადამიანი, მათ შორის თბილისში – 3403, პირი, აჭარაში – 1 131, იმერეთში – 1 059.

რა დრო დასჭირდება სასამართლო განხილვას და მერე გადაწყვეტილების აღსრულებას, როცა ბინა გააქირავე და უკან ვეღარ იბრუნებ? – „ბათუმელები“ 2021 წლის 17 ივნისს წერდა შემთხვევის შესახებ, როცა მოქალაქემ ბინა 4 წლის წინ გააქირავა, ხოლო დამქირავებელი ქირას აღარ იხდის და არც ბინის დაცლას აპირებს.

რა უნდა გაითვალისწინო, ვიდრე ბინას აქირავებ? – კითხვებს „ახალგაზრდა იურისტთა ასოციაციის“ აჭარის ფილიალის ხელმძღვანელი, პაატა დიასამიძე პასუხობს.

• პაატა, რა დაიცავდა ამ შემთხვევაში მესაკუთრეს, რომელმაც 4 წლის წინ გააქირავა ბინა და უკან ვეღარ იბრუნებს? მას არც ქირის ფულს უხდიან.

ქირავნობის ხელშეკრულება შესაძლოა გაფორმდეს, როგორც ზეპირად, ასევე წერილობით. ამ შემთხვევაში მხარეები ზეპირად შეთანხმდნენ. ზოგადად, უმჯობესია ხელშეკრულების წერილობით გაფორმება, თუმცა ესეც არ ნიშნავს იმას, რომ თუ პირი არ გადაიხდის ქირას, ავტომატურად გამოასახლებ [ბინიდან].

გამოსახლების შესახებ კანონში შევიდა ცვლილება, რომლის საფუძველზეც პოლიცია ასახლებს ადამიანს მხოლოდ იმ შემთხვევაში, როცა დანაშაულებრივ ქმედებასთან გვაქვს საქმე და გამოძიებაა დაწყებული, ანუ, მაგალითად, ადამიანი შეიჭრა ბინაში. თუ გამოძიება არაა დაწყებული და ჩვეულებრივი სახელშეკრულებო ურთიერთობის საფუძველზეა პირი ბინაში, ან ბინათსარგებლობის სხვა ხელშეკრულებაა, იპოთეკა და ასე შემდეგ, ამ შემთხვევაში, მესაკუთრემ უნდა მიმართოს სასამართლოს გამოსახლების მოთხოვნით.

• თუკი მესაკუთრე შევა თავის ბინაში, რომელიც გაქირავებული აქვს და ამ დროს მიმართავდა პოლიციას, როგორ უნდა იმოქმედონ სამართალდამცველებმა? 

პოლიცია ადამიანს ვერ გაასახლებს და ამ გადაწყვეტილებას პოლიციელი ვერ მიიღებს. ასეთი ვითარება, რაც დაასახელეთ, ბინაში შეჭრად ვერ შეფასდება, რადგან მას წინ უსწრებს ზეპირი, ან წერილობითი ხელშეკრულება, რომელიც მხარეებს შორის დაიდო.

• შეიძლება არსებობდეს სამართლებრივი საფუძველი, რის გამოც შეიძლება პირს მიენიჭოს ნაქირავებ ბინაში გაჩერების უფლება? 

ქირავნობის ხელშეკრულება დამქირავებელს ანიჭებს ცხოვრების უფლებას, ის არ წარმოშობს საკუთრების უფლებას. შესაბამისად, ხელშეკრულებას როცა უმთავრდება ვადა, სრულდება ეს ურთიერთობებიც.

ხელშეკრულება წყდება იმ შემთხვევაში, როცა ადამიანი არ იხდის ქირის ფულს. ხელშეკრულება დამქირავებელსაც იცავს, როცა ის კეთილსინდისიერად იხდის ქირის ფულს და არ არღვევს შეთანხმების პირობებს. ხელშეკრულებაში შეიძლება იყოს გათვალისწინებული სანქციები, რა უნდა ხდებოდეს მსგავს ვითარებაში, როცა დამქირავებელი ასრულებს თავის ვალდებულებებს და მოულოდნელად გამქირავებელი ითხოვს ხელშეკრულების შეწყვეტას. ამ დროს შესაძლოა მას უბრუნდებოდეს, მაგალითად, ბოლო თვის ქირის ფული.

ზეპირი ხელშეკრულებაც ხელშეკრულებაა, ის არაა კანონმდებლობის გარეთ. უბრალოდ, ასეთ შემთხვევაში შესაძლოა გართულდეს იმის მტკიცება, თუ რა იყო შეთანხმება. გამქირავებელს ასევე აქვს წინასწარი შეტყობინების ვალდებულება დამქირავებელთან, როცა ის ვადაზე ადრე წყვეტს ხელშეკრულებას.

• თუკი საკუთრებას ადასტურებს საჯარო რეესტრის ამონაწერი და მესაკუთრის სარჩელი დაკმაყოფილდება სასამართლოში, რა არის სასამართლო დავის საგანი, რას არკვევს ამ დროს მოსამართლე? 

დავის საგანი არის გამოსახლება, რომ მესაკუთრეს თავისუფალ მდგომარეობაში ჩაჰბარდეს ბინა. მსგავსი სასარჩელო მოთხოვნები უმეტეს შემთხვევაში კმაყოფილდება, რადგანაც მესაკუთრეს მიაქვს ამონაწერი საჯარო რეესტრიდან, ხელშეკრულება შეწყვეტილია და ძირითადად ესაა.

ამ დროს ყველა შემთხვევაში დაკმაყოფილდება სასარჩელო მოთხოვნა, თუმცა დავის საგანი შეიძლება იყოს ის, რომ მხარეები ვერ თანხმდებიან გადახდილ ქირაზე, ან მაგალითად, ვალუტის კურსი შეიცვალა და ეს გახდა დავის საგანი. მსგავსი გარემოებები უნდა შეაფასოს სასამართლომ.

• რა დრო სჭირდება ამ ტიპის საქმის განხილვას და შესაძლებელია თუ არა მისი გასაჩივრება?  

ეს დამოკიდებულია იმაზე, თუ რამდენად გადატვირთულია სასამართლო. ჩვენს მოცემულობაში ცნობილია, რომ სასამართლო ხშირად გადატვირთულია და ირღვევა საქმის განხილვის ვადები. თითქმის ყველა საქმეზე ჩვენ გვაქვს ვადების დარღვევა.

ბუნებრივია, ამ გადაწყვეტილების გასაჩივრებაც შეიძლება ზემდგომ ინსტანციაში, რაც დავის დასრულებას კიდევ უფრო ახანგრძლივებს.

• რა  ხდება აღსრულების ეტაპზე? როცა სასამართლოში საქმის განხილვა დასრულდება, მესაკუთრეს რა დრო დასჭირდება ბინის დასაბრუნებლად?

სასამართლოს საბოლოო გადაწყვეტილება უნდა ჩაჰბარდეს აღსრულების ეროვნულ ბიუროს, ამის შემდეგ აღმასრულებელმა ნებაყოფლობით შესრულებაზე უნდა გაუგზავნოს წინადადება დამქირავებელს, რომ დაცალოს ბინა. ამას აქვს თავისი პროცედურა – უნდა განუსაზღვროს დრო და ასე შემდეგ.

თუ დამქირავებელი ნებაყოფლობით არ დაცლის ბინას, შემდეგ ხდება უკვე იძულებით გამოსახლება.

მსგავსი საქმეების სასამართლო განხილვის დროს მესაკუთრე იხდის ბაჟის, ასევე ფარავს ადვოკატის ხარჯებს. შეუძლია მას ამ თანხის დაბრუნებაც მოსთხოვოს დამქირავებელს? 

კი, რა თქმა უნდა. ამას არეგულირებს კანონმდებლობა და იმ მხარის ხარჯებს, ვისი სასარჩელო მოთხოვნებიც დაკმაყოფილდა, იღებს მეორე მხარე იმის პროპორციულად, რა პროპორციულობითაც მოთხოვნა დაკმაყოფილდება.

• შეიძლება მესაკუთრემ მოითხოვოს ზიანის ანაზღაურებაც?

კი, მას შეუძლია მოითხოვოს იმ თანხის გადახდაც, რის აღებაც შეეძლო ამ სასამართლო განხილვის დროს. სასამართლო დავის საგანი შეიძლება იყოს ასევე ნივთების დაზიანება, თუკი ასეთს აქვს ადგილი.

• როგორ შეიძლება ამ ყველაფრისგან თავი დაიზღვიოს მესაკუთრემ, რომელიც ბინას აქირავებს? 

ერთადერთი, რაც შეიძლება გააკეთოს, არის ის, რომ წერილობით გააფორმოს ხელშეკრულება და გარკვეული ტიპის სანქციები გაიწეროს ხელშეკრულებაში. სხვა მექანიზმი, რომ სასამართლოს გარეშე მოხდება გამოსახლება, არ არსებობს.

წერილობითი ხელშეკრულების არსებობა ამარტივებს მტკიცების ტვირთს. ეს გულისხმობს იმას, რომ თუკი სადავოა, მაგალითად, რა იყო ქირის ოდენობა, რა ვადით გაფორმდა ხელშეკრულება და ასე შემდეგ. ეს არის საქმის ფაქტობრივი გარემოებები და სამტკიცებელია სასამართლოში. წერილობითი ხელშეკრულების პირობებში კი, იოლია ფაქტობრივი გარემოებების დადასტურება.

ბათუმში, აღმაშენებლის 16 ნომერში, იქ სადაც მე-10 საბავშვო ბაღი მდებარეობს, ასე გამოიყურება ბაღის მიმდებარე ტერიტორია. სწორედ აქ თამაშობენ და გადაადგილდებიან  სხვა ბავშვებიც, რადგან ტერიტორიაზე პატარა ატრაქციონიცაა დამონტაჯებული.

ტერიტორიაზე განთავსებული სკამები დაზიანებულია, იქვე ყრია მეტალის და საყოფაცხოვრებო თუ სხვა ნარჩენები. ფოტოები „ბათუმელებს“ მკითხველმა მიაწოდა.

„ბათუმელები“ დაუკავშირდა ბათუმის სანდასუფთავების სამსახურს და ჰკითხა, არის თუ არა, აღნიშნული სამსახურის მოვალეობა, ბაღის მიმდებარე ტერიტორიის დასუფთავება?

აღნიშნულ სამსახურში გვეუბნებიან, რომ დაზიანებულ სკამებს მერიის მუნიციპალური სერვისების სააგენტო გაიტანს. რაც შეეხება დასუფთავებას, აღნიშნულ სამსახურში გვეუბნებიან რომ ტერიტორია შიდა ეზოა, „ შიდა ეზოები კი კვირაში ერთხელ ლაგდება, ამიტომ ეს ტერიტორიაც მომდევნო კვირაში დალაგდება“-გვეუბნებიან „სანდასუფთავებაში“.

პოლიციის ინფორმაციით, აჭარაში დააკავეს ერთი ადამიანი, რომელსაც დიდი ოდენობის ნარკოტიკული საშუალებებისა და ცეცხლსასროლი იარაღის შეძენა-შენახვა ედება ბრალად.

„დაკავებულია 1966 წელს დაბადებული, წარსულში ნასამართლევი გ.შ. მას ბრალი ედება განსაკუთრებით დიდი ოდენობით ნარკოტიკული საშუალების უკანონო შეძენა-შენახვაში, ასევე, ცეცხლსასროლი იარაღისა და საბრძოლო მასალის მართლსაწინააღმდეგო შეძენა-შენახვაში“.

დანაშაულები 20 წლამდე ან უვადო თავისუფლების აღკვეთას ითვალისწინებს.

„სამართალდამცველებმა, ბრალდებულის პირადი და დროებითი საცხოვრებელი ბინის ჩხრეკის შედეგად, ნივთმტკიცების სახით ამოიღეს „ბუპრენორფინის“ შემცველი ნარკოტიკული საშუალება „სუბოქსინის“ 147 აბი და 5 შეკვრად დაფასოებული „ჰეროინის“ შემცველი ნარკოტიკი. გ.შ.-ის დროებითი საცხოვრებელი ბინის ჩხრეკის შედეგად, ასევე ნივთმტკიცების სახით ამოღებულია ტოკარევის კონსტრუქციის პისტოლეტი, „ნაგანის“ სისტემის რევოლვერი და 18 საბრძოლო ვაზნა“-აცხადებს პოლიცია.

საერთო სივრცის განაწილება სამსახურში არცთუ მარტივი ამბავია. სხვადასხვა ადამიანი სხვადასხვა ტემპერატურის პირობებში გრძნობს თავს კარგად. ერთს რომ სცივა, სხვას ცხელა, ვინც კართან ზის, იმას ფანჯარასთან ჯდომა ურჩევნია, ფანჯარასთან მყოფისთვის ყრუ კედლებში მუშაობაა საოცნებო სამუშაო გარემო და ა.შ.

მოკლედ რთულია ეს ყველაფერი, მაგრამ საერთო წესებზე შეთანხმება ყოველთვის შეიძლება.

შეავსეთ ტესტი და შეამოწმეთ რამდენად კომფორტული თანამშრომელი ხარ?

„ლელოს“ ლიდერი მამუკა ხაზარაძე მიიჩნევს, რომ ოპოზიცია ბათუმის მერობის ერთიან კანდიდატზე უნდა შეთანხმდეს. ოპოზიციონერი დეპუტატის აზრით, ეს კანდიდატი უნდა იყოს უპარტიო და ყველასთვის მისაღები. ამ და არჩევნებთან დაკავშირებულ სხვა საკითხებზე მან „ბათუმელების“ კითხვებს უპასუხა.

• ბატონო მამუკა, განიხილავთ ოპოზიცია მერობის ერთიანი კანდიდატის დასახელებას, მაგალითად ბათუმში?

თბილისში ჩვენ ვმუშაობთ ამაზე და დიდი სურვილი მაქვს, რომ ბათუმშიც მივაღწიოთ ამას. ჩვენ უნდა ვიპოვოთ უპარტიო ადამიანი, რომელიც ამ თემებზე არამარტო იმსჯელებს, არამედ იბრძოლებს. შეიძლება ჩვენ აქამდე არ ვუყურებდით ამ ადამიანს, როგორც პოლიტიკურ ადამიანს, მაგრამ ვუყურებთ როგორც პრინციპულს.

ეს მისი ცხოვრების წესი უნდა იყოს, უნდა შევთანხმდეთ, რომ ამ კაცის გამოცდილება და ცხოვრების წესი მას სხვა საშუალებას არ მისცემს და ჩამკეტი მექანიზმი ამისა, რომ სხვა რამეს არ გააკეთებს ისიც არის, რომ ოპოზიციური პოლიტიკური პარტიები უნდა შეთანხმდნენ გეგმაზე, სტრატეგიაზე, ყველაფერზე, რასაც ეს კოალიცია ბათუმს მოუტანს, თუ ბათუმზე ვსაუბრობთ, ან თბილისს მოუტანს. სხვანაირად აზრს კარგავს პროპორციული არჩევნების თემა, კოალიციური მთავრობა.

ჩვენ უნდა ვისწავლოთ, რომ ვილაპარაკოთ ადამიანის პრობლემაზე, თქვენ სხვა პარტიაში ხართ მე სხვა პარტიაში, მაგრამ რატომ ვართ? – ჩვენ ჩვენი გეგმები გვაქვს, ათიდან ხუთ საკითხში ვნახავთ თანხვედრას, უნდა ვნახოთ… იმიტომ. რომ სხვა შემთხვევაში დაზარალდება პარტია.

ამავე დროს ეს პრაქტიკულად პროპორციული არჩევნებია, ჩვენ მაჟორიტარების არჩევის მახინჯი სისტემა უნდა დავამთავროთ, ამის დამთავრების ყველაზე კარგი საშუალება არის შარლ მიშელის დოკუმენტი, რომელმაც 43-პროცენტიანი ჩამკეტი შემოიტანა. მოქალაქე, რომელიც მოვა არჩევნებზე, არამარტო ადგილობრივ არჩევნებს უნდა მისცეს ხმა, არამედ იმის საშუალება მისცეს ქვეყანას, რომ მომავალ წელს ჩატარდეს სრულად პროპორციული არჩევნები. ეს მოგვცემს განვითარების სწრაფ ბერკეტს, რადგან იძულებულები იქნებიან პოლიტიკური პარტიები ნახონ პარტნიორები.

ეს ურტყამს კორუფციას – რთული იქნება შეთანხმდნენ მინისტრები „ხელი ხელს დაბანს“ პრინციპით, რადგან ბევრი ბარიერი ჩნდება. ბიზნესისთვისაც ნათელი ხდება, რომ რომელიმე პარტიასთან კი არ უნდა დაალაგოს [ურთიერთობები], რადგან ის არ იქნება ერთპიროვნული მმართველი, არამედ უნდა დაალაგოს კანონთან. აქ უნდა მივიდეთ. ეს არის ძალიან მნიშვნელოვანი, ასევე უნდა მოხდეს შეთანხმება მაჟორიტარებზე.

• სხვა პარტიები თანახმა არიან, რომ თვითმმართველობის არჩევნებში ოპოზიციას არჩევნებში ჰყავდეს მერის საერთო და უპარტიო კანდიდატი?

დიახ, მე ვესაუბრე პოლიტიკურ პარტიებს, ყველას არა, მაგრამ ვესაუბრე ბევრს, მათ ლიდერებს. სხვა შემთხვევაში ჩვენ ხმამაღლა გვაქვს ნათქვამი, რომ ჩვენ ვერ დავუჭერთ მხარს „ნაციონალური მოძრაობის“ კანდიდატს, ეს არის სხვა პარტია. თქვენ რა გგონიათ, „ლელოს“ არ ჰყავს თბილისის მერობის კანდიდატი? – არაერთი, მაგრამ ჩვენთვის დღეს თბილისის პრობლემის გადაჭრაა მნიშვნელოვანი და არა ჩვენი მონაწილეობა. ამის დრო არ არის ახლა.

ბათუმის ბულვარის ადმინისტრაცია იმ აკრძალვების ნუსხას აქვეყნებს, რომელთა დარღვევის შემთხვევაში პირს ფულადი ჯარიმები დაეკისრება. კერძოდ, ბულვარის ტერიტორიაზე აკრძალულია ნაგვის დაყრა, სატრანსპორტო საშუალებით მოძრაობა ქვეითებისთვის განკუთვნილ გზაზე და ქვეითების მოძრაობა ველო ბილიკზე.

ბულვარის ადმინისტრაციის თანახმად:

[checklist]

• 2კგ-მდე მუნიციპალური ნარჩენით ბულვარის ტერიტორიის დანაგვიანება იწვევს პირის დაჯარიმებას 80 ლარის ოდენობით
• მოტოციკლით, კვადროციკლით, ველოსიპედით ან სხვა მსგავსი მოძრავი საშუალებებით გადაადგილება ველობილიკის მიღმა გამოიწვევს პირის გაფრთხილებას ან დაჯარიმებას 20 ლარით, განმეორებით შემთხვევაში 50 ლარი.
• ველობილიკზე ქვეითთა მოძრაობა აკრძალულია
• ელექტრომობილით, მოტოციკლითა და კვადროციკლით (ელექტროტრანსპორტით) გადაადგილება აკრძალულია (დასაშვებია დელფინარიუმის მიმდებარე ტერიტორიიდან ახალი ბულვარის მიმართულებით)
• ძაღლის ალიკაპის გარეშე ყოლა გამოიწვევს მფლობელის გაფრთხილებას ან დაჯარიმებას 20 ლარის ოდენობით

[/checklist]

იმ სატრანსპორტო საშუალებების ჩამონათვალში, რომლებსაც ქვეითებისთვის განკუთვნილ ბილიკზე გადასვლა ეკრძალებათ, არ შედის სქროლი, რომელიც ასევე ელექტროა.

სამაშველო სამსახურის ინფორმაციით, მაშველება დღეს 18 ივნისს, ურეკსა და ბათუმში ორი ადამიანი გადაარჩინეს. პირველი შემთხვევა ურეკში დაფიქსირდა, სადაც  არასრულწლოვანი იმყოფებოდა ზღვაში, ნაპირიდან 15 მეტრის დაშორებით და გამოსვლას ვერ ახერხებდა. მეორე შემთხვევაც დღეს მოხდა, 112-ში ზარი ქობულეთიდან შევიდა.

„მოქალაქე შევიდა ზღვაში და მისი თანმხლები პირები ვეღარ პოულობდნენ, ითხოვდნენ მაშველების დახმარებას. მაშველები წყალში გასაბერი ნავით შევიდნენ და მოქალაქე ნაპირიდან  დაახლოებით 500 მეტრის მოშორებით აღმოაჩინეს.

მამაკაცი წყლიდან უკვე გამოყვანილია უვნებლად. მის სიცოცხლეს და ჯანმრთელობას საფრთხე არ ემუქრება“-აცხადებს საგანგებო სამსახური.

ამავე წყაროს ცნობით, დღეს 18 ივნისს საქართველოში, შავი ზღვის მთელ სანაპირო ზოლზე ფიქსირდება შტორმი.

„უამინდობის გამო, მოსალოდნელია შტორმის გაძლიერება. მოსახლეობას ვაფრთხილებთ რომ არ შევიდნენ ზღვაში.

კატეგორიულად აკრძალულია მცირეწლოვანი ბავშვების უმეთვალყურეოდ დატოვება სანაპირო ზოლზე. სანაპირო ზოლზე აღმართულია წითელი ალმები, რაც ზღვაში შესვლის აკრძალვის დროებითი მანიშნებელია.

ასევე, მობილიზებულია წყალზე მაშველებთა დამატებითი ჯგუფები, ისინი პატრულირებენ სანაპირო ზოლზე და ხმის გამაძლიერებლებით მოსახლეობას რამდენიმე ენაზე მოუწოდებენ დაიცვან უსაფრთხოების ნორმები, მოსალოდნელი საფრთხის თავიდან ასარიდებლად“-აცხადებს საგანგებო სამსახური.

შტორმის ჩადგომის შემდეგ, როდესაც წყალში შესვლა ნებადართული იქნება, სანაპირო ზოლზე აღიმართება თეთრი ალმები.

ყირგიზეთის რესპუბლიკის დაბალბიუჯეტიანი ავიაკომპანია Air Manas-ი ბიშკეკიდან ბათუმის მიმართულებით იწყებს ოპერირებას.

ავიაკომპანია ბიშკეკი – ბათუმი – ბიშკეკის მიმართულებით მრავალჯერად ჩარტერულ რეისებს 18 ივლისიდან იწყებს.

ავიაციის სააგენტოში წარმოდგენილი განაცხადის შესაბამისად, ავიაკომპანია მრავალჯერადი ჩარტერული რეისების განხორციელებას მიმდინარე წლის 1 ნოემბრამდე, კვირაში 1 სიხშირით (კვირა) გეგმავს.

18 ივნისის მონაცემებით, საქართველოში კორონავირუსის 671 ახალი შემთხვევა დადასტურდა. ბოლო 24 საათში ქვეყნის მასშტაბით ჩატარდა 28 593 კვლევა ტესტით.

გასულ დღე-ღამეში საქართველოში 17 ადამიანი გარდაიცვალა კოვიდით.

18 ივნისის მონაცემებით, აჭარაში კორონავირუსის 36 ახალი შემთხვევა დაფიქსირდა.

აჭარის საზოგადოებრივი ჯანდაცვის ცენტრის ინფორმაციით, დღეის მონაცემებით, მართვით სუნთქვაზეა 9 პაციენტი, გამოჯანმრთელდა – 65 ადამიანი.

18 ივნისის მდგომარეობით, კლინიკაში მკურნალობს 191 პაციენტი.

საგამოძიებო სამსახურის ინფორმაციით, განსაკუთრებით დიდი ოდენობით საქონლის გადაადგილებასთან დაკავშირებული წესის დარღვევის ფაქტზე სომხეთის რესპუბლიკის ორი მოქალაქე დააკავეს.

„გამოძიებით დადგინდა, რომ ბრალდებულებმა, „სარფი“-ს საბაჟო-გამშვები პუნქტის  გავლით, სპეციალურად მოწყობილი სამალავების გამოყენებით, საქართველოში მალულად შემოიტანეს განსაკუთრებით დიდი ოდენობით არადეკლარირებული ძვირფასი ლითონის ნაკეთობები.

საგამოძიებო მოქმედებების შედეგად ამოღებულია 508.66 გრამი ოქროს ნაკეთობები, რომელთა საბაჟო ღირებულება  56 253 ლარს აღემატება“-ნათქვამია საგამოძიებო სამსახურის მიერ.

გამოძიება მიმდინარეობს საქართველოს სისხლის სამართლის კოდექსის 214-ე მუხლის მე-5 ნაწილის „დ“ პუნქტით, რაც სასჯელის სახით ითვალისწინებს თავისუფლების აღკვეთას 8-დან 11 წლამდე ვადით.

ავტოავარია მოხდა ბათუმში დღეს, 17 ივნისს, გიორგი ბრწყინვალისა და 26 მაისის ქუჩების კვეთაში.

თვითმხილველის თქმით, ერთმანეთს 4 მსუბუქი ავტომაქანა შეეჯახა. სასწრაფო სამედიცინო სამსახურის ცნობით, დაშავებულია ერთი ადამიანი.

ადგილზე მუშაობს პოლიცია.

„ბათუმელები“ ინფორმაციას აზუსტებს.