შემოსავლების სამსახურის ინფორმაციით, გადასახადის გადამხდელებისთვის, რომლებიც მომსახურების გაწევის მოთხოვნით სამსახურს განცხადებას [ავტორიზებული მომხმარებლის გვერდიდან] ელექტრონული ფორმით წარუდგენენ, ახალი შეღავათები 2021 წლის 25 სექტემბრიდან ამოქმედდება.
შეღავათები გულისხმობს მომსახურების გაწევისთვის დადგენილი საფასურის გადახდის ახალ პირობებს, მათ შორის, რიგ შემთხვევებში საფასურის გადახდისგან სრულად გათავისუფლებას ან განახევრებას.
„ცვლილება ემსახურება შემოსავლების სამსახურში განცხადებების ელექტრონული ფორმით მომართვიანობის წახალისებას და დისტანციური სერვისებით სარგებლობას, რისი მნიშვნელობაც განსაკუთრებით თვალნათლივ წარმოჩინდა გლობალური პანდემიის პირობებში. ამასთან განცხადების წარდგენა შესაძლებელია დისტანციურ რეჟიმში, ნებისმიერ დროს.“ – აცხადებს შემოსავლების სამსახური.
განცხადებების ჩამონათვალი, რომელთა ავტორიზებული მომხმარებლის გვერდიდან რეგისტრაციის შემთხვევაშიც პირი თავისუფლდება მომსახურების საფასურის გადახდისგან:
• საბანკო ანგარიშების შესახებ ცნობის გაცემის თაობაზე;
• საგადასახადო დავალიანების შესახებ ცნობის გაცემის თაობაზე;
• გადასახადის გადამხდელის მოწმობის აღდგენის შესახებ;
• მიკრო ბიზნესის სტატუსის მინიჭება;
• მცირე ბიზნესის სტატუსის მინიჭება;
• ფიზიკური პირის შემოსავლების შესახებ ინფორმაციის მოთხოვნა;
• გადახდის წყაროდან მიღებულ შემოსავლებზე შეღავათის გამოყენების უფლების შესახებ (დაქირავებული პირის მომართვის შემთხვევაში);
• ნავთობპროდუქტების მიწოდების აღრიცხვის ელექტრონული ჟურნალის რეგისტრაცია.
საფასურები განახევრდება ავტორიზებული მომხმარებლის გვერდიდან რეგისტრაციის შემთხვევაში შემდეგ განცხადებებზე:
• საგადასახადო ორგანოსთან შედარების აქტის გაფორმების შესახებ;
• შვიდნიშნა კოდის რეგისტრაცია სტაციონარული ობიექტებისათვის-ნავთობპროდუქტების რეალიზატორებისათვის;
• მოსარგებლედ რეგისტრაცია ან ვადის გაგრძელება-ნავთობპროდუქტების რეალიზატორებისათვის.
საფასურის გადახდის ახალი პირობით სარგებლობა მიმდინარე წლის 25 სექტემბრიდან იქნება შესაძლებელი.
ფინანსთა სამინისტროს შემოსავლების სამსახური გადასახადის გადამხდელებს მიმართავს თხოვნით, „საქართველოში კორონავირუსის გავრცელების პრევენციისა და საზოგადოებრივი ჯანმრთელობის უსაფრთხოების უზრუნველყოფის მიზნით, ასევე, ჯანდაცვის სამინისტროს რეკომენდაციების გათვალისწინებით, მაქსიმალურად გამოიყენონ ელექტრონული და დისტანციური მომსახურებები“.
