მასწავლებლები, პოლიციელები – აუცრელობის შემთხვევაში კიდევ ვისთვის იქნება ტესტირება ფასიანი [ინიციატივა]

დაავადებათა კონტროლის ცენტრის ხელმძღვანელის, ამირან გამყრელიძის თქმით, ისინი მუშაობენ რეგულაციაზე, რომლის მიხედვითაც შეიძლება სახელმწიფომ თავისი ხარჯით აღარ გატესტოს სხვადასხვა ჯგუფი. საუბარია საქართველოს მთავრობის #975 განკარგულებით განსაზღვრულ ჯგუფებზე, რომლებიც პერიოდულად იტესტებიან კორონავირუსზე.

„ტესტირება გახლავთ ერთ-ერთი მთავარი მეთოდი პანდემიის მართვის და საკმაოდ დიდ ფულს ხარჯავს სახელმწიფო ტესტირებებში.

ბოლო ერთი თვის განმავლობაში საშუალო მაჩვენებელი გვაქვს 38 ათასი ყოველდღიური ტესტი. ამიტომ სადღაც 15 სექტემბრიდან ვფიქრობთ, რომ ის ესენციური ჯგუფები, რომლებიც აუცილებლად იტესტებიან სახელმწიფოს მიერ, აღარ გაიტესტებიან სახელმწიფოს დაფინანსებით.

ამავდროულად, მათ ექნებათ ვალდებულება. ტესტი ჩაიტარონ. თუ ორჯერ ვაქცინირებულები იქნებიან, ისევ სახელმწიფო დააფინანსებს ამას [ტესტირებას]. მაგრამ თუ არ იქნებიან ვაქცინირებულები, მაშინ ან დამსაქმებელმა, ან თვითონ უნდა გადაიხადონ იმიტომ, რომ ჩვენი სახელმწიფო უზრუნველყოფს და უფასოდ ცრის მათ, კეთილი ინებონ და აიცრან.

ისინი გარკვეულ პერიოდში კვირაში ერთხელ, ორ კვირაში ერთხელ უნდა გაიტესტონ,” – განაცხადა ამირან გამყრელიძემ.

ჟურნალისტების კითხვაზე, კონკრეტულად რომელ ჯგუფს შეეხება ეს რეკომენდაცია, ამირან გამყრელიძემ უპასუხა:

„ესენი არიან, ძირითადად ვისაც ვტესტავთ დღეს ჩვენ. იგივე ჩემი კოლეგები, მაგრამ ჩემს კოლეგებზე ალბათ გამონაკლისი იქნება, მაინც ის წინა ხაზია.

ესენი არიან სხვადასხვა ესენციური ჯგუფები, როგორიც არიან სხვადასხვა მოლების, მაღაზიების თანამშრომლები, მასწავლებლების გარკვეული ჯგუფები, პოლიციის ჯგუფები, რომლებიც გარკვეული პერიოდულობით იტესტებიან.

დიდია ეს ჩამონათვალი.

მთავრობის 975-ე დადგენილებაა და იქ შეგიძლიათ ნახოთ სრულად. თუ ისინი აიცრებიან ორჯერ, მაშინ ისევ სახელმწიფო გააგრძელებს მათ ტესტირებას. თუ არ აიცრებიან, მაშინ გარკვეული პერიოდის შემდეგ მათ მოუხდებათ ან თვითონ ან დამსაქმებლებმა გადაიხადონ ეს თანხა,” – განმარტა ამირან გამყრელიძემ.