Batumelebi

ხელვაჩაურის  სოფელ ერგეს მოსახლეობამ ბუნებრივი აირის სისტემის ინდივიდუალური გამრიცხველიანების მოთხოვნით აჭარის მთავრობას და მუნიციპალიტეტს მიმართა.

წერილში, რომელსაც 100 მოქალაქე აწერს ხელს, ადგილობრივები ითხოვენ, რომ ინდივიდუალური გამრიცხველიანების პროცესი დროულად დაიწყოს.

სოფელში გაზის ცენტრალური მილების მონტაჟის პროცესი 2020 წელს დასრულდა, ამის მიუხედავად, მოსახლეობა ბუნებრივი აირით ამ დრომდე ვერ სარგებლობს.

„ბათუმელები“ ერთ-ერთ მოქალაქეს, გოჩა მჟავანაძეს ესაუბრა.

„აქამდე მიზეზი ჰქონდათ, რომ – ვმუშაობთ, ვაკეთებთ. 2020 წელს დაასრულეს სამუშაოები, გაკეთდა, ჩაბარდა, თანხა გადაურიცხეს და ამის შემდეგ ინდივიდუალური გამრიცხველიანება უნდა დაწყებულიყო.

სამუშაოების დამკვეთი არის საქართველოს გაზის ტრანსპორტირების კომპანია და მანვე ჩაიბარა სამუშაოები. შემდეგ ეს მილები უნდა გადაეცეს სახელმწიფოს ქონების ეროვნულ სააგენტოს, სააგენტომ კი უნდა გადასცეს სოკარს და შემდეგ სოკარმა უნდა გააკეთოს გამრიცხველიანება. აი, ამ ბიუროკრატიაში არიან გაჭედილი.

რა ეტაპზე არიან, ვერ გავარკვიეთ. ბოლოს რომ ვიკითხე, სახელმწიფო ქონების ეროვნულ სააგენტოზე იყო უკვე გადაცემული, მანდ რა მოხდა, არ ვიცით“ – ამბობს გოჩა მჟავანაძე.

ამ პროცესში მოსახლეობას სამოქალაქო საბჭოების ფარგლებში დახმარებას უწევს არასამთავრობო ორგანიზაცია „საერთაშორისო გამჭვირვალობა საქართველო“. ორგანიზაციაში ამბობენ, რომ აუცილებელია, აჭარის მთავრობამ ადგილობრივ მუნიციპალიტეტთან ერთად, შესაბამის უწყებებთან იშუამდგომლოს და ბუნებრივი აირის ინდივიდუალური გამრიცხველიანების პროცესი დროულად დაიწყოს.

„ბათუმელები“ დაუკავშირდა „სოკარს“ აჭარაში, სადაც გვითხრეს, რომ ინდივიდუალური გამრიცხველიანება მოქალაქის მიერ განცხადების დაწერის შემდეგ დაიწყება.

„ინდივიდუალურად ყველა მოქალაქეს ხომ ვერ შევხვდებოდით, მუნიციპალიტეტის წარმომადგენლობამ იცის, სოფლის რწმუნებულმა იცის, დეპუტატმა იცის, ჩვენი თანამშრომლებიც გაფრთხილებულნი არიან, რომ 2-3 კაცს სადაც დაინახავენ სოფელში, უთხრან, რომ მოვიდნენ და განაცხადი დაწერონ, დაერთების საფუძველი რომ იყოს“- გვითხრეს „სოკარში“.

აჭარის საზოგადოებრივი ჯანდაცვის ცენტრის უფროსის მოადგილე, ნონა ეფაძე, ბათუმის პირველ საჯარო სკოლაში მოწამლულ ბავშვებთან დაკავშირებით აცხადებს, რომ მოსწავლეები ამ დროისთვის თავს კარგად გრძნობენ.

მისი თქმით, პირველი სკოლიდან 15 მოსწავლე გადაიყვანეს კლინიკაში, რომლებსაც ინტოქსიკაციის გამოხატული ნიშნები ჰქონდათ, თუმცა ბავშვები ახლა თავს კარგად გრძნობენ და სავარაუდოდ დღის ბოლომდე კლინიკას ყველა ბავშვი დატოვებს.

„15 ბავშვი გადაიყვანა სასწრაფო დახმარებამ იაშვილის ჰოსპიტალში. მათ გამოხატული ჰქონდათ სხვადასხვა ხარისხით ინტოქსიკაციის ნიშნები. შედარებით საყურადღებო იყო რამდენიმე ბავშვი, სხვებს უფრო მსუბუქად ჰქონდათ ეს ნიშნები.

მოსწავლეებს ჩაუტარდათ შესაბამისი მკურნალობა და ახლაც მიმდინარეობს მათი ჯანმრთელობის მდგომარეობის მონიტორინგი. როგორც მკურნალი ექიმები გვეუბნებიან, მათ ჯანმრთელობის მდგომარეობას საფრთხე არ ემუქრება, პროგნოზი კეთილსაიმედოა და დღის ბოლომდე ყველა ბავშვი დატოვებს კლინიკას“ – ამბობს ნონა ეფაძე.

დღეს, 27 მარტს, ბათუმის პირველ საჯარო სკოლაში, მეშვიდეკლასელ მოსწავლეებსა და ერთ მასწავლებელს ინტოქსიკაციის ნიშნები ჰქონდათ. პირველადი ვერსიით, კლასში სავარაუდოდ გამოიყენეს სპრეი, თუმცა ინფორმაცია ოფიციალურად ჯერ დადასტურებული არ არის.

აღნიშნულ საკითხზე მიმდინარეობს მოკვლევა.

_____________

ამ თემაზე:

დღეს, 27 მარტს, ბათუმის პირველ საჯარო სკოლაში ერთი მასწავლებელი და ათი მეშვიდეკლასელი მოსწავლე ინტოქსიკაციის ნიშნებით საავადმყოფოში გადაიყვანეს.

ბათუმის რესურსცენტრის ინფორმაციით, ინტოქსიკაცია სავარაუდოდ სპრეიმ გამოიწვია, რომელიც კლასში გაუშვეს.

„5-6 ბავშვი და ერთი მასწავლებელია გადაყვანილი. სავარაუდოდ, რომელიღაც ბავშვმა გაუშვა კლასში სპრეი, დაზუსტებით არ ვიცით რა მოხდა, პოლიცია დაადგენს“, – გვითხრა გოჩა დავითაძემ.

მომხდართან დაკავშირებით მოგვიანებით გააკეთა კომენტარი სკოლის დირექციამ. მათი ინფორმაციით, შემთხვევა დილის საათებში მოხდა.

„იყო შემთხვევა, როდესაც მასწავლებელს კლასში დაეწყო ხველება, ჩემამდე კლასში ავიდა მანდატური და მასაც დაეწყო ხველება, ბავშვებსაც ჰქონდათ ხველების ნიშნები და პრევენციის მიზნით გამოვიძახეთ სასწრაფო დახმარება, მშობლები ინფორმირებული მყავს.

მოსწავლეები გადავიყვანეთ იაშვილის კლინიკაში და ახლა კარგად არიან. ჯანდაცვის საზოგადოებრივი ცენტრიც ჩართულია, გამოვიძახეთ პოლიცია, რადგან დაგვეხმაროს დადგენაში რა მოხდა“- გვითხრა ნატალია მგელაძემ.

მისი თქმით, დაზუსტებით არ შეუძლია იმის თქმა, რა მოხდა კლასში და იყო თუ არა რაიმე სითხე გამოყენებული.

„დანარჩენი ბავშვები კარგად არიან, ჩავაბარეთ მშობლებს. მეორე ცვლასაც დაეწყო სწავლა უკვე და სკოლა ფუნქციონირებს“- თქვა მგელაძემ.

„ვინც მაგი თქვა, ის არის თვითონ აგენტი“ – გვითხრეს ბათუმის ახალ მეჩეთში, სადაც პარასკევის ლოცვაზე შეკრებილმა ადამიანებმა  ტარიელ ნაკაიძეს სოლიდარობა გამოუცხადეს.

ტარიელ ნაკაიძე 20 წელია მუსლიმი თემის ინტერესებს აქტიურად იცავს. ამჟამად დამოუკიდებელი დეპუტატია საქართველოს პარლამენტში, მას 22 მარტს პარლამენტის სხდომათა დარბაზში მიკროფონი ჩაარტყეს და აგენტი უწოდეს. კონფლიქტის მეორე დღეს, 23 მარტს, „ქართული ოცნების“ თავმჯდომარემ, ირაკლი კობახიძემ განაცხადა, რომ ტარიელ ნაკაიძეს მძიმე რეპუტაცია აქვს და კუთხეში დგომა ეკუთვნის.

ახალ მეჩეთში შეკრებილი ადამიანების გზავნილი მკაფიოა: „ოცნებას“ ლოგიკა აღარ ჰყოფნის და მუშტი-კრივზე გადადის, მაგრამ ეს არის არა მხოლოდ მუსლიმი თემის შეურაცხყოფა, არამედ პარლამენტის, ქვეყნის, სახელმწიფოს შეურაცხყოფა.

მლოცველები და ოპოზიციონერი პოლიტიკოსებიც ხედავენ, რომ რელიგიური შუღლის გაღვივების მიზანმიმართული ქმედება რუსული პოლიტიკის გაგრძელებაა, ამიტომაც, ტარიელ ნაკაიძე, პირველ რიგში, ამას შენიშნავს: „პატივსაცემია საზოგადოების რეაქცია, რომელმაც ეს საკითხიც სწორად გაიგო და არ გადაზარდა იმ თემაში, რაც საფრთხის შემცველია“.

„…გეუბნებით, რომ ისე უსამართლოდ იქცევიან, სიმართლის წინაშე ლოგიკა აღარ ჰყოფნით და მუშტი-კრივზე გადავიდნენ, ეს არის „ოცნების“ სახე… ეს უკვე ფიზიკური შეხლა-შემოხლის ადგილია და არა პარლამენტი. „ოცნება“ ყველგან მიდის ძალადობით. ეს არის ძალადობა მუსლიმ თემზე და ისეც, ეს არის სიმართლის წინაშე ძალადობა,“ – გვითხრა იოსებ აბაშიძემ, რომელსაც ბათუმის ახალი მეჩეთის ეზოში ვესაუბრეთ, პარასკევის ლოცვის დაწყებამდე.

მუსლიმებს აქვთ სხვა გზავნილებიც: „ახლა ზურგიდან ეპარება ხალხს „ოცნება“ და ისე ურტყამს, ეს კიდევ ერთი მოღალატეობრივი ფაქტია…“, „რუსულ წისქვილზე ასხამს წყალს დღეს ჩვენი ხელისუფლება,“„ვინც დღეს ხელისუფლებაზე ცუდს იტყვის, ყველას აგენტად აღიქვამს ხელისუფლება“, „ყველა ჩვენგანს ჩაგვარტყეს, მეც ჩამარტყეს,“ – გვითხრეს მეჩეთში შეკრებილმა ადამიანებმა.

გუშინ, 24 მარტს, პარასკევის ლოცვის შემდეგ ბათუმის ახალ მეჩეთში მლოცველებს მიმართა იმამმა თამაზ მგელაძემ და ტარიელ ნაკაიძეს სოლიდარობა გამოუცხადა:

„ეს თვე ქართველი მუსლიმებისთვის ძალიან მძიმე ფაქტებით დაიწყო. ყველამ უნდა იცოდეს, რომ ჩვენი კუთხის, ჩვენი ხმის, ჩვენი სიამაყის და ჩვენი ღირსეული წარმომადგენლის, ბატონ ტარიელ ნაკაიძის მიმართ ფიზიკური და მორალური შეურაცხყოფა ყველა მუსლიმის და ეთნიკური უმცირესობის შეურაცხყოფაა.

მინდა იცოდეთ, რომ ამ ადგილას, სადაც ჩვენ მშვიდად ვასრულებთ ღვთისმსახურებას, მისი წვლილი შეუფასებელია. დღეს რომ თავისუფლად შემიძლია საუბარი თქვენთან ამ ტრიბუნიდან, ესეც მისი დამსახურებაა. სრულ სოლიდარობას და გვერდით დგომას ვუცხადებთ ბატონ ტარიელს, რომელიც წლებია უმცირესობების უფლებებს შეუპოვრად იცავს,“ – აღნიშნა მიმართვის დროს თამაზ მგელაძემ.

იმამს ლოცვის დასრულების შემდეგ ჩვენც გავესაუბრეთ. თამაზ მგელაძემ ყურადღება გაამახვილა არა იმაზე, თუ რას უპასუხებდა ვიქტორ ჯაფარიძეს, სოზარ სუბარს ან ირაკლი კობახიძეს, არამედ იმაზე, რომ „ეს ქვეყანა ერთეულების არ არის“ და მოთმინებას იმსახურებს სოლიდარობა სხვა ადამიანებისგან.

„ჩვენ, მუსლიმებს, როგორც ამ ქვეყნის შვილებს, პასუხისმგებლობა გვაქვს გათვითცნობიერებული, მაქსიმალურად ვცდილობთ, თავი შევიკავოთ ისეთი მოწოდებებისგან, რომელიც ადამიანებში აღვიძებს შუღლს და ბოროტებას.

აქ თუ ერთეულებმა შეურაცხყოფა მოგვაყენეს, ეს ქვეყანა ერთეულების არ არის, ეს ჩვენი ქვეყანა, ჩვენი სამშობლოა და მაძლიერებს ის, რომ არიან ადამიანები, რომლებიც გვერდში გვიდგანან, სხვა აღმსარებლობას ვგულისხმობ ამ შემთხვევაში, ვინც ჩვენს გვერდშია და გვამხნევებს, ეს არის ჩვენგან ასეთი მოთმინების და ასეთი ქმედების ღირსი,“ – აღნიშნა თამაზ მგელაძემ.

იმამის დაკვირვებით, ხელისუფლებას სურს ტალახის სროლით დააკნინოს და საბოლოოდ ყველა გააჩუმოს, ვინც მას აკრიტიკებს:

„ამ შემთხვევაში ტარიელის მიმართ ტალახის სროლის მიზანია ის, რომ რაღაცნაირად დააკნინონ, დააშინონ, რომ აი, მუსლიმების სიტყვა ვერ თქვას, მაგრამ ჩვენ ჩვენს ხმას არ დავაჩაგვრინებთ არავის.

რუსული კანონი ვერ გაიტანეს, მაქსიმალურად ამ საქმეში ჩართული ვიყავით მუსლიმებიც და ვაფიქსირებდით ღია პოზიციას, რომ არა რუსულ კანონს. ჩვენ თავისუფლება გვაქვს, რომელიც ჩვენი უმნიშვნელოვანესი მონაპოვარია. მაქსიმალურად ვეცადეთ, რომ ეს არ დაგვეშვა, მე ვფიქრობ, რომ ამ შემთხვევაში უმცირესობის ხმის ჩახშობა სცადა ამ ხალხმა,“ – დასძინა თამაზ მგელაძემ.

„ეს ნაბიჯები არის ღიად დაანონსებული რეპრესიები,“ – მიიჩნევს მაკო ღავთაძე, „ტოლერანტობის და მრავალფეროვნების ინსტიტუტის“ წარმომადგენელი. მას არ უკვირს მუსლიმი თემის დამოკიდებულება დღეს, როცა ამ თემის ხმას პარლამენტში მიკროფონს ურტყამენ – მაკო ღავთაძე ახალი მეჩეთის ისტორიას გვახსენებს – ასეულობით მუსლიმი ახლაც ღია ცის ქვეშ ლოცულობს იმიტომ, რომ ბათუმის მერია დემონსტრაციულად არ ასრულებს სასამართლოს გადაწყვეტილებას.

„მე არ მგონია, რომ ამ სიძულვილმა გაიმარჯვოს. იმედიანად ვარ იმ საზოგადოების სწორი პოზიციის გამო, სწორ მხარეს დგომის გამო, რაც ნამდვილად აჩვენა საზოგადოებამ ბოლო დღეებში და რასაც მუსლიმები აჩვენებენ წლებია,“ – გვიყვება მაკო ღავთაძე, TDI-ის წარმომადგენელი. – „რა თქმა უნდა, ბრაზიც აქვთ ამ ყველაფრის გამო, მაგრამ დინჯად და მოთმინებით მიჰყვებიან ისინი ამ პროცესს.

ესეც კარგი მაგალითია, ვის უწოდებენ მოღალატეს და აგენტს, როდესაც მუსლიმები პირნათლად იცავენ კონსტიტუციას და პატივს სცემენ კანონმდებლობას და მოთმინებით პასუხობენ სრულიად დაუმსახურებელ ჩაგვრას, ცდილობენ, რომ სასამართლოს გზით მიჰყვნენ ამ ყველაფერს,“ – ამბობს მაკო ღავთაძე.

TDI-ის წარმომადგენელი ხაზს უსვამს კიდევ ერთ გარემოებას – ტარიელ ნაკაიძე პირველი ადამიანია ბოლო პერიოდის პარლამენტში, ვინც მუსლიმი თემის ხმაა.

„და არა მხოლოდ მუსლიმების, ის თანაბრად ექომაგება ყველა ჩაგრულ ადამიანს, ეს არის, ფაქტობრივად, ყველა უმცირესობის ხმა პარლამენტში… ეს იყო შეურაცხყოფა არა ტარიელ ნაკაიძის, ამ შემთხვევაში შეურაცხყოფილი და უღირსია ის, ვინც მას მიკროფონი ჩაარტყა, ან კუთხეში დადგომისკენ მოუწოდა.

სახელმწიფომ შექმნა 2014 წელს რელიგიის საკითხთა სახელმწიფო სააგენტო, რომელმაც მოამზადა სახელმწიფო რელიგიური პოლიტიკის დოკუმენტი, სადაც წერია, რომ რელიგიური და ეთნიკური უმცირესობები, განსაკუთრებით კი, საზღვრისპირა მცხოვრები უმცირესობები, წარმოადგენენ საფრთხეს სახელმწიფოს უსაფრთხოებისთვის. რამდენი მოქალაქე და ჯგუფია საზღვრისპირა რეგიონებში? ფაქტობრივად, ნახევარ საქართველოზე მეტს ეს იარლიყო მიაკრეს: „საფრთხის შემცველი“. ხელისუფლება ღიად გადავიდა უკვე ამ რიტორიკაზე,“ – გვითხრა მაკო ღავთაძემ.

პარლამენტში მომხდარი ამბის შეფასება აჭარის რეგიონის დეპუტატებსაც ვთხოვეთ. რესან კონცელიძემ და ზაალ მიქელაძემ „ბათუმელების“ სატელეფონო შეტყობინებები უპასუხოდ დატოვეს.

„არ ვიყავი იმ დღეს მე პარლამენტში, ხულოში ვიყავი. არ უნდა მოხდეს ასეთი დაპირისპირება, არაა მისაღები. მე მიზეზი არ ვიცი, თავი და ბოლო მათი გასარკვევია“, – გვიპასუხა ანზორ ბოლქვაძემ. მას შევახსენეთ, რომ პარლამენტში, უმაღლეს საკანონმდებლო ორგანოში, ჩაარტყეს მიკროფონო მუსლიმი თემის დამცველ დეპუტატს და აგენტი უწოდეს.

„არ უნდა მოხდეს თემა და ვინაიდან მოხდა, მათი გასარკვევია,“ – ანზორ ბოლქვაძემ ისევ სცადა პარლამენტში მომხდარი დაპირისპირება ვიწრო, პირად კონფლიქტად წარმოეჩინა, – „რატომ უნდა ჰქონდეთ პიროვნული, მაგინი ერთად იჯდენ, ერთად ლაპარაკობდნენ, ერთ რიგში ზიან… ალბათ დარტყმამდე მოხდა რაღაც, მე ხომ გამომძიებელი არ ვარ? ეს ჩემი საქმე არ არის,“ – გვითხრა დეპუტატმა.

„ის, რაც პარლამენტში მოხდა, არ ვიცი, რამდენად გააზრებული ჰქონდა 9 განდეგილს, მაგრამ როცა მეორე დღეს გამოვიდა ირაკლი კობახიძე და თქვა, კუთხეში უნდა დადგეს ტარიელ ნაკაიძე, მძიმე რეპუტაცია აქვსო, დავრწმუნდი, რომ ეს უკვე არის სახელმწიფო პოლიტიკა,“ – გვიყვება ხათუნა სამნიძე, პარლამენტის წევრი და „რესპუბლიკელების“ თავმჯდომარე.

ხათუნა სამნიძეს ეჭვი აღარ ეპარება, რომ „ქართული ოცნება“ ძალაუფლების შესანარჩუნებლად შესაძლოა რელიგიური შუღლის გაღვივებაზეც წავიდეს.

„შენც იმავე ქვეყნის ჯაშუში ხარ და კარგად იცი, რომელი ქვეყნისო, მეუბნებოდნენ იმ დღეს. კობახიძის გამოსვლამ კი დამარწმუნა, რომ „ოცნება“ მზადაა, ძალიან სერიოზული თემა ჩამოკიდოს ჰაერში, რასაც ჰქვია რელიგიური შუღლის გაღვივება, კუთხური პრობლემატიკის წინ წამოწევა. „ოცნებამ“ იცის, რომ ეს არ არის თემა, რომელზეც შეიძლება ასე, რეპლიკები ისროლო, თავს დაესხა, კუთხეში დააყენო და ამან თავი არ იჩინოს.

„ქართული ოცნების“ პროპაგანდა ძალიან ახლოსაა რუსულ პროპაგანდასთან. რუსული პროპაგანდა სწორედ რომ შუღლის გაღვივებაა, კუთხური დაპირისპირება, ასე რომ, არა მგონია, ეს გაუაზრებლად ხდებოდეს. ეს რუსული პოლიტიკის გაგრძელებაა.

სადაც დავით-გარეჯი იყო თემა და ადამიანებს ციხეში აგზავნიან ყოველგვარი საფუძვლის გარეშე, რა თქმა უნდა, შუღლის გაღვივება უნდა იყოს დღის წესრიგში, დღეს თუ არა, ხვალ დასჭირდებათ,“ – გვითხრა ხათუნა სამნიძემ.

„ამათგან ყველაფერია მოსალოდნელი,“ – ტარიელ ნაკაიძის დაკვირვებით, ხელისუფლება მზადაა, ყველაფერზე წავიდეს ძალაუფლების შენარჩუნების სანაცვლოდ, – „ესენი არიან გაქცეული, შეშინებული და კუთხეში მიმწყვდეულები, საშიშ მდგომარეობაში არიან.

ესენი ხომ ყველაფერს რუსულს აკეთებენ? – ამიტომაც არიან საშიშები. ცდილობენ, დაყონ საზოგადოება და ერთმანეთს დაუპირისპირონ. მე თუ მკითხავთ, მიტინგებზე მეტად, ამ დროს უფრო საშიშია ხელისუფლება. მათ ყველა გზა მოჭრილი აქვთ და იმედი აღარ აქვთ.

ისინი ცემა-ტყეპასაც გააგრძელებენ პარლამენტში, რადგან ლოგიკურად როცა ვინმე საუბრობს, ვერ პასუხობენ, სხვა, ალტერნატიული გზა მათი გადმოსახედიდან აღარ არსებობს, ან მიკროფონი უნდა ჩაგარტყან, ან რამე მსგავსი ქნან.

იქნებ „ოცნების“ შიგნითაც აღმოჩნდეს ვინმე  და თქვას, რომ ეს არ შეიძლება, რადგან ვერ გამაჩუმებენ და ჩემი ხმა არ ჩაიხშობა, დარწმუნებული უნდა იყვნენ. მე სხვა გზა არ მაქვს,“- უთხრა ტარიელ ნაკაიძემ „ბათუმელებს“.

„თავი და ბოლო მათი გასარკვევია“ – ანზორ ბოლქვაძე ასე ცდილობს პასუხისმგებლობის აცილებას „ტარიელ ნაკაიძის შემთხვევაზე“. 22 მარტს მუსლიმი თემის დამცველ დეპუტატს, ტარიელ ნაკაიძეს ზურგში მიკროფონი ჩაარტყეს და თურქეთის აგენტი უწოდეს.

ანზორ ბოლქვაძე ხულოს, შუახევის და ქედის მაჟორიტარი დეპუტატია პარლამენტში. ბათუმის მაჟორიტარმა დეპუტატმა პარლამენტში – რესან კონცელიძემ, ასევე ქობულეთის და ხელვაჩაურის მაჟორიტარმა, ზაალ მიქელაძემ „ბათუმელებს“ არ უპასუხეს.

„არ ვიყავი იმ დღეს მე პარლამენტში, ხულოში ვიყავი. არ უნდა მოხდეს ასეთი დაპირისპირება, არაა მისაღები. მე მიზეზი არ ვიცი, თავი და ბოლო მათი გასარკვევია“, – გვიპასუხა ანზორ ბოლქვაძემ. მას შევახსენეთ, რომ პარლამენტში, უმაღლეს საკანონმდებლო ორგანოში ჩაარტყეს მიკროფონო მუსლიმი თემის დამცველ დეპუტატს და მას თურქეთის აგენტი უწოდეს.

„არ უნდა მოხდეს თემა და ვინაიდან მოხდა, მათი გასარკვევია,“ – ანზორ ბოლქვაძემ ისევ სცადა პარლამენტში მომხდარი დაპირისპირება ვიწრო პირად კონფლიქტად წარმოეჩინა. – „რატომ უნდა ჰქონდეთ პიროვნული, მაგინი ერთად იჯდენ, ერთად ლაპარაკობდნენ, ერთ რიგში ზიან… ალბათ დარტყმამდე მოხდა რაღაც, მე ხომ გამომძიებელი არ ვარ? ეს ჩემი საქმე არ არის,“ – გვითხრა დეპუტატმა.

„თქვენი საქმე რა არის, მხოლოდ რუსული კანონის მიღება?“ – ვკითხეთ ანზორ ბოლქვაძეს.

„რაც არის ჩემი საქმე, ვიცი, რაზე მეკითხებით, გამოცდები ხომ არ არის?“ – ასეთია ხულოს, შუახევის და ქედის მაჟორიტარის, ანზორ ბოლქვაძის რეაქცია რუსული კანონის მიღებაზე.

ანზორ ბოლქვაძე არც ირაკლი კობახიძის განცხადებებში ხედავს პრობლემას, რომელმაც ტარიელ ნაკაიძეს „მძიმე რეპუტაციის“ ადამიანი უწოდა. დეპუტატს შევახსენეთ, რომ 20 წელია ტარიელ ნაკაიძე მუსლიმი თემის ინტერესებს იცავს. ანზორ ბოლქვაძემ მუსლიმების დაცვა სცადა, თუმცა ვერ ახსნა, რა ლოგიკით არ ეხება მიკროფონის ჩარტყმა, ან უმრავლესობის დეპუტატების გამონათქვამი „მძიმე რეპუტაციასა“ და თურქეთის აგენტობაზე ქართველ მუსლიმებს.

„ქართული ოცნების“ რიტორიკის მსგავსად, ანზორ ბოლქვაძემ სცადა ეს თემაც ჟურნალისტების ინტერპრეტაციისთვის მიეწერა:

„მუსლიმ თემზე საუბარი არ ყოფილა და არ უნდა გამოვიყენოთ ეგ თემა, მუსლიმანებზე შეხება არ ყოფილა საერთოდ, ეს იყო მათი პირადი თემა და გაარკვიონ… მუსლიმანს მისი საქმე აქვს, მუსლიმანს შეცდომა არასდროს დაუშვია არც დაუშვებს,“ – აღნიშნა ანზორ ბოლქვაძემ „ბათუმელებთან“.

აგენტი ხართ და კუთხეში დადექითო, თქვენი ლიდერი ეუბნება, – შევახსენეთ პარლამენტარს.

„იქ მუსლიმანური თემის წამოწევა არ ყოფილა. ამდენი წელია პარლამენტში ვარ, იქ ჩემთვის მუსლიმანობა არავის უხსენებია, ნუ აბრუნებთ თქვენ მაგ თემას სხვანაირად, შურს ნურც თქვენ და ნურც სხვა ნუ ჩამოაგდებს… რა შუაშია ირაკლი კობახიძე? სარწმუნოებაზე შეხების უფლება არც ჟურნალისტს აქვს და არც პარლამენტის წევრს,“ – თქვა ანზორ ბოლქვაძემ და ტელეფონი გაგვითიშა.

„ბელარუსია, როგორც დამოუკიდებელი სახელმწიფო, 1918 წელს 25 მარტს დაიბადა. ჩვენ არ ვართ რუსები, ბელარუსები ვართ და ვითხოვთ დამოუკიდებლობას“, – გვითხრა სერგეი სამსოუმ, რომელიც ლუკაშენკოს რეჟიმს გამოექცა და ბათუმში ცხოვრობს.

დღეს, 25 მარტს, ბელარუსებმა ბათუმში ბელარუსიის დამოუკიდებლობის დღეს აღნიშნეს. ბელარუსებმა მსვლელობა მემედ აბაშიძის ქუჩაზე მოაწყვეს.

„ეს არის თავისუფლების დღეს ჩვენთვის, რომელიც წაგვართვეს, ეროვნული თავისუფლების დღე,“ – ამბობს სერგეი სამსოუ.

ხვალ, 26 მარტს, უკრაინელები ბათუმის ცენტრალურ პარკში ამ მოთხოვნით შეიკრიბებიან: დაიბლოკოს რუსეთისა და ბელარუსის მონაწილეობა 2024 წლის ოლიმპიურ თამაშებში, უკრაინას ახლა სჭირდება საერთაშორისო საინფორმაციო მხარდაჭერა.

სტატისტიკის ეროვნული სამსახური საველე სამუშაოებს იწყებს მოსახლეობის 2024 წლის აღწერისთვის.

სტატისტიკის ეროვნული სამსახურის ინფორმაციით, პირველი ეტაპის სამუშაოები მცხეთა-მთიანეთისა და ქვემო ქართლის რეგიონებში  ტარდება და მიზნად ისახავს რუსთავის, გარდაბნის, თეთრიწყაროს, მარნეულის, ბოლნისის, დუშეთისა და მცხეთის მუნიციპალიტეტებში არსებული შენობებისა და მათში ფაქტიურად მცხოვრები შინამეურნეობების სიების შედგენას.

„მონაცემთა შეგროვება თანამედროვე ტექნოლოგიებით მიმდინარეობს, რომლის დროსაც გამოიყენება პლანშეტური კომპიუტერები. პირველი ეტაპის სამუშაოების დროს შეგროვდება ინფორმაცია ქვეყნის შინამეურნეობებისა და მათში მუდმივად მცხოვრები მოსახლეობის რაოდენობის შესახებ, თითოეული საცხოვრისის მიხედვით, რაც აუცილებელია მოსახლეობის აღწერის ჩასატარებლად.

2023 წლის აპრილიდან შინამეურნეობების წინასწარის სიების შედგენა სხვა რეგიონებშიც გაგრძელდება და მიმდინარე წლის ბოლომდე მთელ ქვეყანას მოიცავს. აღნიშნულ  სამუშაოებში საქსტატის მიერ გადამზადებული 3500-მდე ინტერვიუერი იქნება ჩართული,“ – აღნიშნულია საქსტატის მიერ გავრცელებულ ინფორმაციაში.

მოსახლეობის აღწერის ძირითადი მონაცემების შეგროვება 2024 წლის 14 ნოემბრიდან 19 დეკემბრის პერიოდში იგეგმება, რომლის დროსაც მიიღება დეტალური მონაცემები მოსახლეობის რაოდენობის და მისი შემადგენლობის, ასევე სხვადასხვა სახის დემოგრაფიული, სოციალურ-ეკონომიკური მახასიათებლების შესახებ,  თვითმმართველი ერთეულებისა და დასახლებების  მიხედვით.

მოსახლეობის აღწერები ქვეყანაში 10 წელიწადში ერთხელ ტარდება. საქართველოში უკანასკნელი აღწერა 2014 წელს ჩატარდა.

2022 წლის დეკემბრიდან 2023 წლის თებერვლის ბოლომდე ვიქტორ ჯაფარიძის და მისი ოჯახის საკუთრებაში არსებული მიწის ნაკვეთების გრძელ ჩამონათვალს კიდევ რამდენიმე დაემატა. ვიქტორ ჯაფარიძე პარლამენტის უმრავლესობის წევრია და „ხალხის ძალას“ წარმოადგენს. ის „უცხოელი აგენტების შესახებ“ რუსული კანონის ერთ-ერთი ავტორია.

ვიქტორ ჯაფარიძე მათ შორის არის, ვინც საქართველოს პარლამენტში კოლეგა დეპუტატებთან საქმეებს არჩევს და ამისთვის ხშირად თავის კოლეგებთან ერთად, გუნდურად „მუშტი-კრივზეც“ არ ამბობს უარს.

22 მარტს, ვიქტორ ჯაფარიძემ პარლამენტის სხდომაზე კოლეგას, ტარიელ ნაკაიძეს მიკროფონი ჩაარტყა, ზურგიდან და მოულოდნელად.

მისივე ქონებრივი დეკლარაციის მიხედვით, ვიქტორ ჯაფარიძე ქონების დაგროვებასა და ფულის კეთებაშიც ისეთივე აქტიურია, როგორც „მუშტი-კრივის“ გამართვაში.

2023 წელს ვიქტორ ჯაფარიძის ქონების გრძელ ჩამონათვალს დაემატა მიწის ნაკვეთი თბილისთან ახლოს, სოფელ დიდგორში. აქ პარლამენტის დეპუტატმა თვითნებურად დაკავებული ნაკვეთი, 1343 კვ.მეტრი სპორადული რეგისტრაციის წესით დაირეგისტრირა.

ამ ნაკვეთის დარეგისტრირებაზე დეპუტატმა საჯარო რეესტრისგან უარი ორჯერ მიიღო. თავდაპირველად რეესტრი წერდა, რომ წარდგენილი დოკუმენტები არ შეესაბამებოდა კანონით დადგენილ მოთხოვნებს, მეორე შემთხვევაში კი ადგილზე დათვალიერების ოქმის შესახებ მიუთითებდა – როგორც რეესტრის დოკუმენტებშია აღნიშნული, „სარეგისტრაციო მიწის ნაკვეთის დაინტერესებული პირის მიერ 2007 წლის 20 სექტემბრამდე და ადგილზე დათვალიერების ოქმის შედგენის თარიღისთვის ფლობის ფაქტი“ არ დადასტურდა.

გარდა ამისა, რეესტრი წერდა, რომ მიწის ნაკვეთი თვითნებურად ფლობის ფაქტი მომიჯნავე ნაკვეთების მფლობელებსაც უნდა დაედასტურებინათ, ვიქტორ ჯაფარიძემ კი წარადგინა პირის თანხმობა, რომელიც რეესტრის განმარტებით „არ წარმოადგენდა ბლოკში რეგისტრირებული მიწის მესაკუთრეს.“

საბოლოოდ ვიქტორ ჯაფარიძემ ამ ხარვეზების აღმოფხვრა მოახერხა და 7 თებერვალს მიწის ნაკვეთი დაირეგისტრირა.

2023 წლის თებერვალში ვიქტორ ჯაფარიძემ სპორადული წესით დაირეგისტრირა ასევე 413 კვ.მეტრი მიწის ნაკვეთი მესტიაში.

ვიქტორ ჯაფარიძე სპორადული რეგისტრაციის წესით ითხოვს კიდევ ერთი მიწის ნაკვეთის  დარეგისტრირებას მესტიაში. შესაბამისი განცხადებით მან საჯარო რეესტრს 2022 წლის ნოემბერში მიმართა. რეესტრმა ხარვეზი, კონკრეტულად კი ზედდება დაადგინა – ეს ნაკვეთი დეპუტატს ჯერ არ დაურეგისტრირებია, თუმცა საჯარო რეესტრი დამატებით დოკუმენტების მოძიებას აგრძელებს.

მისივე ქონებრივი დეკლარაციის მიხედვით, გასულ წელს ვიქტორ ჯაფარიძეს მესტიაში 1000 კვ.მეტრი მიწა შეუსყიდია. გარდა ამისა, მან მემკვიდრეობით მიიღო 1440 კვ.მეტრი.

საერთო ჯამში ვიქტორ ჯაფარიძე და მისი ოჯახის წევრები მესტიაში ფლობენ რამდენიმე მიწის ნაკვეთს, ჯამში 3 ჰექტარზე მეტ ფართობს. მათი ნაწილი დეპუტატმა მემკვიდრეობით მიიღო.

ვიქტორ ჯაფარიძე და მისი ოჯახის წევრები ფლობენ 11 კომპანიას. ეს კომპანიები იღებენ დაკვეთებს სახელმწიფო სტრუქტურებისგან. ფლობენ ასევე სასტუმროებს მესტიასა და თბილისში.

ვიქტორ ჯაფარიძე არის ტელეკომპანია „პოსტვ“-ის 52 პროცენტის მფლობელი. კომპანიის წილები მან 500 000 ლარად შეისყიდა.

ვიქტორ ჯაფარიძე და მისი ოჯახის წევრები, ასვე მისი კომპანიების პარტნიორები არიან „ოცნების“ მსხვილი შემწირველები.

„სუს-ის კრებსები აღმოჩნდა საპატრიარქოსთვის ყულფი, რითაც ხელისუფლებამ საბოლოოდ მოთოკა საპატრიარქოს სურვილები, ამბიციები, მისწრაფებები. დღეს გვაქვს დამონებული საპატრიარქო ივანიშვილის მარიონეტული ხელისუფლების მიერ“, – ამბობს „ბათუმელებთან“ მართლმადიდებელი ეკლესიის სასულიერო პირი, დეკანოზი ილია ჭიღლაძე, რომელიც ამჟამად დიდ ბრიტანეთში იმყოფება და რომელსაც მღვდელმსახურება საჯაროდ გაკეთებული განცხადებების გამო შეუჩერეს.

ინტერვიუში დეკანოზი საუბრობს, რა მდგომარეობაში ჩააყენა „ქართულმა ოცნებამ“ მართლმადიდებელი ეკლესია.

• რუსული კანონის ჩავარდნის შემდეგ „ქართულმა ოცნებამ“, კერძოდ, ირაკლი კობახიძემ თქვა, რომ „რუსთაველზე იყო ეკლესიის მაგინებლების აქცია“. თქვენი აზრით, ვინ იდგა რუსთაველზე და თქვენთვის, როგორც მართლმადიდებელი სასულიერო პირისთვის, ვინ არის ეკლესიის მაგინებელი რეალურად დღეს?

ძალიან მნიშვნელოვანი საკითხია. პირველ რიგში, ყველამ უნდა გააცნობიეროს, რომ ეკლესიაში არსებული დარღვევების, დანაშაულების, გადაცდომების მხილება ეს არ არის ეკლესიის მტრობა. პირიქით, ეს არის ეკლესიის მოკეთეობა და სიყვარული, რადგან, ესე იგი, ადამიანს სურს, ეკლესიაში იყოს უკეთესი მდგომარეობა.

აი, ეს კლიშე თავისუფლად შეიძლება გამოეყენებინათ, მაგალითად, იმ საეკლესიო პირებსაც, ვისაც უპირისპირდებოდა დავით აღმაშენებელი რუის-ურბნისის კრების დროს და აღმაშენებელსაც ეძახდნენ ალბათ „ეკლესიის მტერს“.

როგორც „ქართლის ცხოვრებაში“ წერია, აღმაშენებლის დროსაც, ღვთის ეკლესია ავაზაკთა ქვაბად იყო გადაქცეული და ღვთის სახლიდან სიწმინდის და სიმართლის ნაცვლად, ყოველგვარი უკეთურება გამოდიოდა.

დღესაც იგივე ხდება, როდესაც ადამიანები ეკლესიაში არსებულ აი, ამ ქვაბ-ავაზაკებს ამხელენ და წუხან იქ არსებულ მდგომარეობაზე. ამდენად, ისრების გადატანა თავისუფლებისთვის მებრძოლი, პროევროპული, ანტირაშისტული განწყობების მქონე, პატრიოტი და ღირსეული მოსახლეობის წინააღმდეგ, რომ თურმე „ეკლესიას ებრძვიან“, რა თქმა უნდა, ეს არის უდიდესი სიყალბე.

ჯერ ერთი, ყველამ ვიცით, რომ აქციის მიზნები არ ყოფილა ეკლესიასთან დაკავშირებული, სულ სხვა თემას ეხებოდა, მაგრამ საქმეც ის არის, რომ ირიბად, ეს აქცია მაინც კავშირშია ეკლესიასთან.

• რა კავშირს ხედავთ თქვენ?

საქართველოს მართლმადიდებელი ეკლესია სტალინური პერიოდიდან მოყოლებული იქცა კრემლის პოლიტიკის იარაღად და რუსული აგენტურითაა გავსებული. რა თქმა უნდა, საქართველოს ეკლესიაში გაბატონებულ რუსულ აგენტურას ნამდვილად სურს რუსული კანონის მიღება, ნამდვილად სურთ ქვეყნის პროდასავლური კურსის ჩაშლა და რუსეთის დაბრუნება საქართველოში.

ასეთი ფსევდო-საეკლესიო პირებისთვის ეს აქცია და, ზოგადად, ქართველი ერის ნება, რომ ვიაროთ დასავლეთისკენ, საშიშია. ამიტომ ეს იარლიყი – „ანტიეკლესიური“, სინამდვილეში დღეს პროეკლესიური უფროა, რადგან ეკლესიისთვის უკეთესი გარემო იქნება ევროპულ საქართველოში, ვიდრე არის რუსული გავლენების მქონე საქართველოში.

• როცა ივანიშვილი მოვიდა ხელისუფლებაში, მან თქვა, რომ ეკლესიის კრიტიკას ტაბუ უნდა მოეხსნას, რომ შეიძლება პატრიარქის კრიტიკა და ასე შემდეგ. ამ კაცის პარტია დღეს ადამიანების სტიგმატიზებას ეწევა სწორედ ეკლესიის სახელით. რაში გამოიხატება რეალურად ეს მტრობა, როგორ ფიქრობთ, თქვენ, როგორც სასულიერო პირი?

პირველ რიგში, დღეს ეკლესიას მტრობენ ის ძალები, ამ შემთხვევაში ვიტყოდი ღიად, რომ ივანიშვილის რუსული ხელისუფლება, რომელიც ცდილობს რუსული გავლენების შენარჩუნებას საქართველოში ზოგადად და მათ შორის ქართულ ეკლესიაში.

ეს არის ყველაზე დიდი მტრობა საქართველოს მართლმადიდებელი ეკლესიისადმი, რადგან რუსულმა გავლენებმა, კრემლის აგენტურამ, საქართველოს ეკლესია კრიმინალურ დამნაშავეობაში ჩაძირა პირდაპირ. აი, ამ ჭაობიდან საქართველოს მართლმადიდებელი ეკლესიის გამოსვლის ერთადერთი გზა და საშუალება არის რუსული გავლენებისგან და ეკლესიაში საბჭოთა დროიდან ჩანერგილი რუსული აგენტურისგან გათავისუფლება.

ყველაზე დიდი ეკლესიური აქტი სწორედ ეს იქნება, ყველაზე პროეკლესიური და ყველაზე მართლმადიდებლური, ყველაზე ქრისტიანული, როცა ეკლესია გათავისუფლდება კრემლის აგენტურისგან.

• ჩვენ გვახსოვს ე.წ. სუსის ფაილები. თქვენი აზრით, ამ ფარულ ჩანაწერებს იყენებს „ქართული ოცნება“ იმისთვის, რომ ეკლესია საბოლოოდ გაანეიტრალოს?

საბჭოთა პერიოდიდან მოყოლებული დღემდე, რა თქმა უნდა, ყველა ხელისუფლება ახორციელებდა ეკლესიაზე თვალთვალს მეტ-ნაკლები დოზით და ყველა ხელისუფლება აგროვებდა კომპრომატებს, მაგრამ ივანიშვილის ხელისუფლების გარდა, არავის გამოუტანია ეს მასალები გარეთ.

ერთადერთი, პატარა შემთხვევა იყო, როცა ზვიად გამსახურდიამ დევნილობაში გამოაქვეყნა თბილისიდან წაღებული კგბ-ს კარტოთეკები, სადაც ილია მეორის და ზოგიერთი სასულიერო პირის კგბ-სთან თანამშრომლობა იყო ასახული. მერე დარჩა ეს მასალები ინტერნეტსივრცეში, მაგრამ ეს მაინც იყო მცირე დოზით და პირადი ცხოვრების ამსახველი რაიმე ფაქტი არ ყოფილა.

ივანიშვილის სუს-ის კრებსებმა კი 2021 წელს ეკლესიის მთელი შიდა სამზარეულო გამოფინა, თავისი კორუფციული სქემებით თუ სხვა დარღვევებით.

რა თქმა უნდა, დამოკლეს მახვილივით აქვს ეს კრებსები საპატრიარქოს და მართლმადიდებელ ეკლესიას, მაგრამ ეს არ არის ყველაფერი, მთლიანი მასალები, რაც ხელში აქვს ხელისუფლებას, იქ არის აღნიშნული, რომ სუს-ს ასევე აქვს ვიდეოფაილები ცალკეული მაღალი იერარქების პირადი ცხოვრების შესახებ და ეს ვიდეოფაილები არ გამჟღავნებულა.

ეს არის შანტაჟის კარგი საშუალება. უნდა ვთქვათ ისიც, რომ უშუალოდ პატრიარქის და საპატრიარქოს პირადი შანტაჟი, საგარეო პოლიტიკურ ვექტორთან დაკავშირებით, არ სჭირდება ივანიშვილს, რადგან შიოლაშვილიც და ივანიშვილიც, ორივე რუსული კადრია და რუსეთიდანაა მოვლენილი საქართველოში.

ეს არის კარგი საშუალება, რომ ცალკეული პირები აქციონ მონებად, ვინც არის საპატრიარქოს მაღალ თანამდებობაზე. კარგი საშუალებაა, ასევე, დააკომპრომატონ, თუკი ვინმე მათთვის არასასურველ ნაბიჯს გადადგამს.

• ის, რაზეც თქვენ საუბრობთ, არის ეკლესიის დასუსტებისკენ, მისი დაკნინებისკენ მიმართული პოლიტიკა?

ეკლესიის დაცემის და მტრობის ყველაზე დიდი ფორმა არის, როდესაც ხელისუფლება თვალს ადევნებს ეკლესიის შიგნით არსებულ ყველა უწესრიგობას და უბედურებას, მათ შორის, ამორალურ ქმედებებს ეთიკის კუთხით და ხელს აფარებს ამას. სინამდვილეში, ხელისუფლება ხელს უწყობს, რომ უფრო მეტად დაექვემდებაროს და დაემონოს მას და აღმოჩნდეს უფრო დიდი ტყვე.

როდის არის პიროვნება ან ორგანიზაცია თავისუფალი გარემოფაქტორებისგან? როდესაც ის არის მორალურად სუფთა. როდესაც დღეს საპატრიარქოს მორალური და სამართლებრივი მხარე არის უკიდურესად მინუსებში, რა თქმა უნდა, ასეთი ეკლესიაც არის ხელისუფლების ტყვე და ის ყველა მის დაკვეთას შეასრულებს.

ამდენად, ძალიან მნიშვნელოვანია, გააცნობიეროს საზოგადოებამ ეს ყველაფერი. დღეს შეგვიძლია ვთქვათ, რომ ყველაზე დიდი მტერი მართლმადიდებლობას და მართლმადიდებელ ეკლესიას საქართველოში ჰყავს რაშისტული ხელისუფლება, ივანიშვილის მარიონეტული ხელისუფლება, რომელიც არა მარტო ხელს აფარებს ეკლესიაში არსებულ დანაშაულებს, არამედ ხელს უწყობს კიდევაც.

ხელს უწყობს არა მხოლოდ დუმილით, არამედ ხელს უწყობს, აი, ამ უღირსი პიროვნებების დაწინაურებასაც. მათ საზოგადოებრივ მაღალ სივრცეებში ყოფნას, რომლებიც მიღებულნი არიან ხელისუფლებაში, მთავრობაში, არიან მინისტრების, პარლამენტარების გვერდით, პრაქტიკულად, ჩვენ გვაქვს დანაშაულებრივი ალიანსი და უნისონი, პუტინის მარიონეტული „ოცნების“ ხელისუფლებას და საპატრიარქოს მაღალჩინოსნებს შორის.

ეს არ არის სულიერება და რწმენასთან არაფერი შეხება არ აქვს. ეს არის რელიგიით და ქრისტიანობით სპეკულაცია და მისი გამოყენება პოლიტიკური მიზნებისთვის, ფინანსური და ძალაუფლების გაძლიერებისთვის, რაც სულიერების პირველი მტერია.

•  ფიქრობთ, რომ ამ ყველაფერზე საჭიროა იმ მრევლთან საუბარი, ვინც განიცდის პროპაგანდის გავლენას. გაქვთ ამის რესურსი იმ სასულიერო პირებს, ვინც ღიად საუბრობთ ამაზე?

რეალურად, სულ ორი-სამი სასულიერო პირი ვართ, ვინც ამაზე ხმამაღლა ვსაუბრობთ. მიზეზი არის ის, რომ ილია მეორესთან არანაირი აზრი არ აქვს პირად ან წერილობით საუბარს, რადგან მას არაფრის შეცვლა არ სურს ეკლესიაში.

მეორე ნაწილი სასულიერო პირებისა, ვინც პროდასავლურადაა განწყობილი და აწუხებთ ქვეყანაში, ეკლესიაში გაბატონებული რუსული გავლენები, შიშის გამო არის ჩუმად. ეშინიათ საეკლესიო სასჯელების – საყვედურის, მღვდელმოქმედების შეჩერება, განკვეთა, თანამდებობრივი დაქვეითება და ასე შემდეგ. ამიტომ იძულებულნი არიან, პირში წყალი ჩაიგუბონ.

• თქვენ რატომ საუბრობთ, არ გეშინიათ?

მე დამსაჯა ამისთვის საპატრიარქომ 2021 წელს – სოციალურ ქსელში და მედიაში გაკეთებული კრიტიკული განცხადებების გამო დროებით შემიჩერა მღვდელმსახურების უფლება. ასე, რომ ეს იყო სიგნალი ყველა მღვდლისთვის.

ამიტომ ძალიან ფრთხილად აკრიტიკებს საპატრიარქოს მამა თამაზ ლომიძე და ასევე მამა ზაზა თევზაძე თბილისში. გამომდინარე იქიდან, რომ მე ავირჩიე უკომპრომისო გზა მათი მხილების, ჩემი სასჯელი აღმოჩნდა უფრო მძიმე.

ისინი ელოდებიან ჩემ სინანულს, ქედის მოხრას, მაგრამ მე არ ვაპირებ კომპრომისს, რადგან სასწორზე დგას ეკლესიის მომავალი, მისი მდგომარეობა, თავისი უდიდესი პრობლემებით და სიმართლე, რომელიც აუცილებლად უნდა ითქვას. მეორე მხარეს დევს ჩემი პირადი კომფორტი, ანუ მღვდლობა. მე ავირჩიე პირველი, რომელიც ბევრად მნიშვნელოვანია.

• 2024-ში არჩევნებია, შეძლებს საზოგადოება ამ პრობლემის გააზრებას და დანახვას, თუ რუსული პროპაგანდა მიაღწევს მიზანს?

სახელისუფლებო მედია თავიდან ბოლომდე ცდილობს ადამიანებისთვის ტვინების გამორეცხვას და ტაბუ აქვს დადებული ყოველგვარ კრიტიკას, ამიტომ მოსახლეობის რაღაც ნაწილი უსმენს მათ.

ჩვენი ათობით მოქალაქე პირდაპირ მოგვევლინა ღიად პრორუსად, მათ შექმნეს პარტიები, ტელევიზიები – „იმედი“, „ობიექტივი“, „ალტ-ინფო“, „პოსტ ტვ“, არიან კულტურის, ხელოვნების სფეროში, სასულიერო იერარქიაში და ეს ზღვა ნაკადი ტვინს ურეცხავს მოსახლეობას.

ამიტომ, ერთადერთი სწორი გზა გვრჩება, რომ კრიტიკულმა მედიამ მაქსიმალურად გააშუქოს ეკლესიაში არსებული პრობლემები.

სუს-ის კრებსების გამოქვეყნების შემდეგ საპატრიარქოს აღარ შესწევს ძალა და არც სურვილი, რომ შეეწინააღმდეგოს „ქართულ ოცნებას“. ფაქტობრივად, სუს-ის კრებსები აღმოჩნდა საპატრიარქოსთვის ყულფი, რითაც ხელისუფლებამ საბოლოოდ მოთოკა და აღვირი გაუკეთა საპატრიარქოს სურვილებს, ამბიციებს, მისწრაფებებს. დღეს გვაქვს დამონებული საპატრიარქო და ივანიშვილის რუსული ხელისუფლება. მთლიანობაში, ეს ორივე ძალა, რა თქმა უნდა, რუსეთის გავლენის და წნეხის ქვეშ იმყოფება.

ორშაბათიდან, №11 სამარშრუტო ხაზზე მოძრავ Zonda-ს მარკის ტრანსპორტს სრულად ჩაანაცვლებს ახალი, ლურჯი ავტობუსები.

ბათუმის ავტოტრანსპორტის ცნობით, „12 ავტობუსი უკვე ქალაქშია, მიმდინარეობს ხაზზე გასასვლელად მოსამზადებელი სამუშაოები.

ავტოპარკის განახლება ეტაპობრივად ხდება და აპრილის თვეში დასრულდება.“

ISUZU-ს ფირმის ახალი ავტობუსები სრულად ჩაანაცვლებს Zonda-ს [ყვითელი] მარკის მოძველებულ ტრანსპორტს ბათუმში.

ახალი ავტობუსები გათვლილია 70 მგზავრზე და ადაპტირებულია შშმ პირთათვის. ავტობუსებში ინტეგრირებულია გათბობის, კონდიცირების, ვენტილაციის, საინფორმაციო ხმოვანი და ვიდეომონიტორინგის სისტემები.

• ბათუმის მერია ამ ეტაპზე 65 ავტობუსს ჯამში 34 879 000 ლარად იყიდის.

---

მთავარ ფოტოზე №11 ავტობუსი.

2022 წელს, წინა წელთან შედარებით, დაახლოებით 108,5%-ით გაიზარდა საქართველოს იმ მოქალაქეთა რიცხვი, რომლებმაც ევროკავშირის ქვეყნებში პირველად მოითხოვეს თავშესაფარი.

2022 წელს საქართველოს 25 935-მა მოქალაქემ მოითხოვა თავშესაფარი ევროკავშირის ქვეყნებში. ევროკავშირში თავშესაფრის მთხოვნელთა რაოდენობის მიხედვით, საქართველო, 30 ქვეყანას შორის, მე-8 ადგილზეა.

2021 წელს ამ ჩამონათვალში საქართველო მე-11 ადგილზე იყო – 2021 წელს ევროკავშირში თავშესაფარი მოითხოვა საქართველოს 12 440-მა მოქალაქემ.

2022 წლის მონაცემებით, საქართველოს უსწრებენ ბანგლადეში, პაკისტანი, კოლუმბია, თურქეთი, ვენესუელა, ავღანეთი და სირია.

მნიშვნელოვანი ზრდა ფიქსირდება მთლიან მონაცემებშიც. 2022 წელს თავშესაფრის მოთხოვნით ევროკავშირისთვის არაწევრი ქვეყნების 881 220 მოქალაქეს მიუმართავს, მაშინ, როდესაც ეს მონაცემი 2021 წელს 537 355 იყო.

როგორც ევროსტატის მონაცემები აჩვენებს, საქართველოს უფრო მეტ მოქალაქეს მოუთხოვია ევროკავშირის ქვეყნებში თავშესაფარი [პირველად], ვიდრე ერაყის [25 415], ინდოეთისა [25 400] და უკრაინის [24 720] მოქალაქეებს.

საქართველოს მაჩვენებელი, გარდა იმისა, რომ უსწრებს ომში მყოფი უკრაინის მაჩვენებელს, გაცილებით აღემატება ამ კატეგორიაში საქართველოს მოქალაქეების 2021 წლის რაოდენობასაც. რიცხვი 12 440-იდან 25 935-მდე, რაც თითქმის 108,5%-იან ზრდას ნიშნავს.

2022 წელს თავშესაფრისთვის მოთხოვნით საქართველოს 7 965 მოქალაქეს მიუმართავს გერმანიისთვის, 3240-ს – იტალიისთვის და 2705-ს ირლანდიისთვის.

ევროკავშირის ქვეყნებში თავშესაფრის მოთხოვნის მიხედვით პირველ ადგილზე სირიაა, 131 970 მოქალაქით.

2022 წელს ევროკავშირის არაწევრი ქვეყნების მოქალაქეები თავშესაფრის მოთხოვნით ყველაზე ხშირად გერმანიას მიმართავდნენ – 217 735, მას საფრანგეთი მოჰყვება – 137 510 და ესპანეთი – 116 135 აპლიკანტით. 2022 წელს ამ სიაში მეოთხე ადგილი ავსტრიამ დაიკავა, რომელმაც გასულ წელს დაკავებული მეხუთე ადგილი იტალიას გაუცვალა.

ევროკავშირის ქვეყნებში მოთხოვნათა 49.1 სხვადასხვა სახით დააკმაყოფილეს, 50.9%-ს კი უარი ეთქვა.

მიღებულ აპლიკაციათა ყველაზე დიდი პროცენტული მაჩვენებელი – 95.7%, დადებითად გადაწყვიტა ესტონეთმა, სადაც სულ 2 940 აპლიკაცია დაფიქსირდა. ესტონეთის შემდეგ მოდის ბულგარეთი და ნიდერლანდები. გერმანიამ კი, სადაც ყველაზე მეტი განაცხადი დაფიქსირდა თავშესაფრის მოთხოვნით, 35%-ს უარი უთხრა.

უარის მიხედვით, ყველაზე მაღალი მაჩვენებელი ევროკავშირში კვიპროსს აქვს, აქ 2022 წელს აპლიკანტთა 93.7 პროცენტს – 8 425 მოქალაქეს ეთქვა უარი თავშესაფრის პირველ მოთხოვნაზე, მას მალტა და ხორვატია ჩამორჩებიან 9.1 და 13.7 პროცენტით.

აჭარის საარქივო სამმართველოში საზღვარგარეთთან, საზოგადოებასთან, მასმედიასთან ურთიერთობის, დოკუმენტების გამოყენებისა და პუბლიკაციის სამსახურში, სამკითხველო დარბაზში მკვლევართა მიღება გასული წლის ნოემბერში შეწყდა და ამ დრომდე არ განახლებულა.

საარქივო სამმართველოს უფროსის ბრძანების თანახმად, მკვლევრების მიღების შეწყვეტის მიზეზი მიწის რეგისტრაციის წესისა და საკადასტრო მონაცემების სრულყოფის შესახებ საქართველოს კანონით გათვალისწინებული სისტემური და სპორადული რეგისტრაცია გახდა.

როდის განაახლებს აჭარის საარქივო სამმართველო მკვლევართა მიღებას? – დღეს, 24 მარტს, „ბათუმელებმა“ ამ კითხვაზე პასუხი ვერ მიიღო.

„თუ ვინმეს რამე პრობლემა აქვს, ჩემთან მოვიდეს“ – გვითხრა საარქივო სამმართველოს უფროსმა, მაია ივანიშვილმა. იგი დაინტერესდა კონკრეტული სახელებით და გვარებით, ვის აწუხებს ეს საკითხი.

„მობრძანდეს ეს ადამიანი და თუ სურვილი აქვს, ჩემგან აიღოს ინფორმაცია და არა ტელევიზიით და პრესით და ა.შ. ჩემთან გაიაროს თემა.

მე მაქვს უფლება, როგორც საარქივო სამმართველოს უფროსს, რომ გადავიყვანო ყველა სამსახური გარკვეულწილად თავის საქმიანობაში, ეს არის კანონით განსაზღვრული. მე არ მცალია ახლა მკვლევრების მისაღებად, იმიტომ, რომ ვარ გადასული ძალიან რთულ პროექტზე, რომელსაც ჰქვია მიწის გაფორმებები და სპორადული გაფორმებები მიწის. ამიტომ დარბაზი დროებით დახურული მაქვს.

თუ რომელიმე მკვლევარს პრობლემა აქვს და პასუხი უნდა გავცე კითხვაზე, მობრძანდეს ჩემთან და მე გავცემ სასიამოვნო, კარგ პასუხს. თუ ვინმე თქვენით აპირებს უნდა და თუ არა გავხსნა დარბაზი, მაშინ პასუხს სხვანაირად გავცემ, იგივე ბრძანებით.

მე ყველანაირად ვცდილობ, მკვლევრებს პრობლემები აღმოვუფხვრა და გავუკეთო საქმე“ – თქვა მაია ივანიშვილმა ჩვენთან სატელეფონო საუბრისას.

მან არ გვიპასუხა კითხვაზე, როდის იგეგმება დარბაზის გახსნა მკვლევრებისთვის და აღნიშნა, რომ „არქივი არ არის ბიბლიოთეკა“:

„სამკითხველო დარბაზი არ არის ჩემთან [ბრძანებაში, რომელიც საარქივო სამმართველოს ვებგვერდზეა გამოქვეყნებული, მითითებულია სწორედ სამკითხველო დარბაზი], მე ბიბლიოთეკა არა ვარ, სამეცნიერო დარბაზი მაქვს, სადაც შეიძლება გარკვეულწილად მეცნიერების მიღება და მათი მომსახურება. მაგრამ ამ შემთხვევაში ვერ ვახერხებ, დროებით დახურულია, იმისთვის, რომ განვახორციელო პროექტი და ვმუშაობთ ამ თემაზე. ასევე, გვაქვს ღონისძიება – 100 წლის იუბილე და უამრავი საკითხი.

მე არ ვიცი, ამ ადამიანს რა პრობლემა აქვს, მაგრამ ძალიან ნაწყენი ვარ“, – გვითხრა მაია ივანიშვილმა.

აჭარის საარქივო სამმართველო აჭარის განათლების, კულტურისა და სპორტის სამინისტროს საქვეუწყებო დაწესებულებაა. მაია ივანიშვილი სამმართველოს უფროსია 2014 წლიდან.

______________

ფოტოზე: მაია ივანიშვილი, სამკითხველო დარბაზი აჭარის საარქივო სამმართველოში. ფოტო: adjara.gov.ge

26 მარტს, კვირას, ბათუმის ბოტანიკურ ბაღში კამელიების გამოფენა გაიმართება.

ბოტანიკური ბაღის ცნობით, გამოფენაზე წარმოდგენილი იქნება კამელიების 5 სახეობა: იაპონური, მთის ანუ ევგენოლის, ბადისებრი, ზეთოვანი და ჩინეთის კამელია. ასევე, იაპონური კამელიის 78 ჯიში, მთის ანუ ევგენოლის 18 ჯიში და ბაღში გამოყვანილი 25 ჰიბრიდული ფორმა.

გამოფენა 13:00 საათზე გაიხსნება და 17:00 საათამდე გაგრძელდება.

გამოფენა გაიმართება მთავარ სამარშრუტო გზაზე – ბოტანიკური ბაღის ცენტრალურ ნაწილში.

ბოტანიკური ბაღის ცნობით, 26 მარტს საქართველოს მოქალაქეებისათვის ბაღში შესვლა უფასოა.