Batumelebi | „ბათუმობა“ 8 მაისს აღარ ჩატარდება „ბათუმობა“ 8 მაისს აღარ ჩატარდება – Batumelebi
RU | GE  

„ბათუმობა“ 8 მაისს აღარ ჩატარდება

„ბათუმობა 2021“, რომლის ჩატარებაც 8 მაისს იყო დაგეგმილი, აღარ ჩატარდება. ღონისძიების ორგანიზებაზე ბათუმის კულტურის ცენტრსა და ინდმეწარმე ლაშა კვარაცხელიას შორის დადებული ხელშეკრულება მხარეთა ურთიერთშეთანხმებით შეწყდა.

ღონისძიების ორგანიზებაზე ხელშეკრულება 78 900 ლარზე 2021 წლის 8 აპრილს გაფორმდა და ამავე წლის 21 აპრილს შეწყდა. კულტურის ცენტრს ტენდერი მომსახურების შესყიდვაზე 100 000 ლარით ჰქონდა გამოცხადებული.

„მხარეები აღნიშნავენ, რომ ქვეყანაში კორონავირუსის გავრცელების პრევენციის მიზნით შეიზღუდა თემატური საჯარო, სოციალური ღონისძიებების ორგანიზება და ჩატარება. ამასთან ის პერიოდი [2021 წლის 8 მაისი, მანამდელი და მისი მომდევნო დღეები], როდესაც უნდა ჩატარდეს „ბათუმობა 2021,“ ვირუსის გავრცელების აცილების მიზნით განისაზღვრა უქმე დღეებად. მხარეები აღნიშნავენ და ერთმნიშვნელოვნად თანხმდებიან, რომ დასახელებულ ვითარებაში სახალხო დღესასწაული „ბათუმობა 2021“-ის ორგანიზება/ჩატარება ვერ მოხერხდება“, – აღნიშნულია ხელშეკრულების შეწყვეტის აქტში.

ბათუმის კულტურის ცენტრში „ბათუმელებს“ უთხრეს, რომ „ბათუმობა 2021“ შეიძლება მიმდინარე წელს არც ჩატარდეს, მიზეზად კი, პანდემია დაგვისახელეს. „კონკრეტული პასუხი მომდევნო კვირაში გვეცოდინება,“ – გვითხრეს ცენტრში.

„ბათუმობა“ ბოლოს 2019 წელს გაიმართა. პანდემიის გამო არ ჩატარდა არც „ბათუმობა 2020“.

 

მთავარი ფოტო: „ბათუმობა“/ფოტო: „ბათუმელების“ არქივიდან
ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com