ბათუმი,განათლება,მთავარი,სიახლეები

37,9 მილიონი ლარი ორი სკოლის ახალი კორპუსებისა და სახელოვნებო სკოლისთვის ბათუმში

27.03.2023 • 1970
37,9 მილიონი ლარი ორი სკოლის ახალი კორპუსებისა და სახელოვნებო სკოლისთვის ბათუმში

ბათუმის №14 და №18 საჯარო სკოლების დამატებითი კორპუსების და სახელოვნებო სკოლის მშენებლობაზე აჭარის განათლების სამინისტრომ ტენდერი 37 944 034 ლარით გამოაცხადა.

შესყიდვა მრავალწლიანია და 2023-2026 წლებს მოიცავს.

სამუშაოები სამივე მისამართზე უნდა დასრულდეს 30 თვეში ხელშეკრულების დადებიდან. თუმცა, „№14 სკოლის ნაწილში სამუშაოების წარმოება უნდა შეჩერდეს ერთიანი ეროვნული გამოცდების მიმდინარეობისას, ძირითადად ივლისის თვე, რაზედაც მიმწოდებელს წერილობით ეცნობება. ეს ვადა არ ჩაითვლება მიწოდების ვადაში“.

ტენდერში წინადადებების მიღება 2023 წლის 23 აპრილს დაიწყება და 28 აპრილს დასრულდება.

„ტენდერში მონაწილე პრეტენდენტს 2019 წლის 1-ლი იანვრიდან, ტენდერისათვის „წინადადებების მიღება დასრულებულია“ სტატუსის მინიჭების თარიღამდე პერიოდში, საქართველოს ტერიტორიაზე ან/და სხვა ქვეყნის ტერიტორიაზე ჯამში 37 944 034 ლარის, მათ შორის არაუმეტეს ერთი დასრულებული ხელშეკრულების ან/და ერთი პროექტის ფარგლებში, შესრულებული უნდა ჰქონდეს არანაკლებ 18 972 017 ლარის ღირებულების, სამოქალაქო დანიშნულების შენობ(ებ)ის მშენებლობის, ან რეკონსტრუქციის, ან რეაბილიტაციის სამუშაოები“ – აღნიშნულია ტენდერის მოთხოვნებში.

ანგარიშსწორება განხორციელდება აჭარის ბიუჯეტიდან შემდეგი სავარაუდო განაწილებით:

  • 2023 წელი – 3 000 000 ლარი;
  • 2024 წელი – 17 000 000 ლარი;
  • 2025 წელი – 12 00 000 ლარი;
  • 2026 წელი – დანარჩენი.

ტენდერს თან ახლავს საპროექტო დოკუმენტაცია, რომლის საფუძველზეც სამუშაოები უნდა შესრულდეს.

პროექტის მიხედვით ბათუმში, ინასარიძის ქ. №11-ში, მე-14 საჯარო სკოლის ტერიტორიაზე ახალი სასწავლო და ცეკვის სასწავლო-სარეპეტიციო კორპუსების მშენებლობაა დაგეგმილი.

ამავე ტერიტორიაზე რეაბილიტაცია ჩაუტარდება ასევე არსებული ორსართულიანი შენობის იმ ნაწილს, რომელსაც დღეს სახელმწიფო ანსამბლი იყენებს.

ფოტო/რენდერი პროექტიდან

მე-14 სკოლის ახალი სასწავლო კორპუსი სამსართულიანი იქნება და განკუთვნილია მხოლოდ სასწავლო პროცესისათვის, ამ კორპუსის გვერდით კი ცეკვის სასწავლო-სარეპეტიციო კორპუსი ორსართულიანი იქნება – 220 ადგილიანი დარბაზით, სცენით.

  • პროექტის ხარჯთაღრიცხვის მიხედვით, მე-14 სკოლის დამატებითი კორპუსების მშენებლობის მაქსიმალური ღირებულება ჯამში 12 770 793 ლარია.

დამატებითი კორპუსის, ასევე დამხმარე ნაგებობებისა და სტადიონის მშენებლობაა დაგეგმილი ბათუმში, თამარის დასახლებაში, მე-18 სკოლის ტერიტორიაზეც [გრიშაშვილის ქ. N3].

1. მე-18 სკოლის არსებული შენობა. 2. საპროექტო დამატებითი შენობა. 3. საპროექტო დამხმარე შენობა. 4. საპროექტო საქვაბე. 5. საპროექტო ღია სპორტული მოედანი ტრიბუნებით. 6. საპროექტო სარბენი ბილიკი ქვიშის ორმოთი. ფოტო პროექტიდან

აღნიშნული სკოლის ახალი სასწავლო კორპუსი 600 მოსწავლეზე იქნება გათვლილი.

მე-18 სკოლის ახალი კორპუსი / რენდერი პროექტიდან

  • პროექტის ხარჯთაღრიცხვის მიხედვით, მე-18 სკოლის დამატებითი კორპუსის, სტადიონისა და დამხმარე ნაგებობების მშენებლობის მაქსიმალური ღირებულება ჯამში 6 240 272 ლარია.

რაც შეეხება სახელოვნებო სკოლას, ის გოროდოკის დასახლებაში, ე.წ. განათლებისა და მეცნიერების ქალაქში [სვიშევსკის ქ. N1] უნდა ააშენონ.

ახალ შენობაში გადაიტანენ ბათუმის 5 სასწავლებელს: მ. ბალანჩივაძის ხელოვნების სკოლას, ვ. ჭაბუკიანის სახელობის კლასიკური ბალეტის სკოლას, ნ. კანდელაკის სახელობის სამხატვრო სკოლას, რ. ლაღიძის სახელობის სამუსიკო სკოლას და აჭარის ხალხური ხელოვნების სკოლას.

სახელოვნებო სკოლისთვის ორი შენობა აშენდება. პროექტის მიხედვით, პირველ, სამსართულიან შენობაში განთავსდება სკოლების ისეთი საერთო მოხმარების ობიექტები, როგორიცაა: საკონფერენციო დარბაზი, ბიბლიოთეკა და სასადილო.

ამასთან, პირველი კორპუსი მთლიანად ეთმობა კანდელაკის სახელობის სამხატვრო სკოლას, რომელიც მოიცავს საგამოფენო დარბაზს, სივრცეებს ადმინისტრაციისათვის და სხვადასხვა ზომის სახელოსნოებს.

მეორე, 4-სართულიანი კორპუსი კი დანარჩენ სასწავლებლებს დაეთმობა.

სახელოვნებო სკოლა/რენდერი პროექტიდან

  • სახელოვნებო სკოლის მშენებლობისთვის ჯამში 18 932 969 ლარია იმ ხარჯთაღრიცხვის მიხედვით, რომელიც სატენდერო დოკუმენტაციას ახლავს.

განახლება:37 944 034 ლარით გამოცხადებული ტენდერი არ შედგა.

სახელოვნებო სკოლის დაპროექტებაზე ტენდერი სამინისტრომ 2019 წლის ნოემბერში გამოაცხადა 365 ათასი ლარით.

ამავე თემაზე: 

https://batumelebi.netgazeti.ge/news/245127/

გადაბეჭდვის წესი


ასევე: