სამწლიანი პაუზის შემდეგ სახალხო დღესასწაული „ბათუმობა“ ისევ გაიმართება.
სადღესასწაულო ღონისძიებები ძველ ბულვარში, საზაფხულო თეატრისა და კოლონადების მიმდებარედ, 29 აპრილს ჩატარდება.
„ბათუმობა 2023“-ის ორგანიზებაზე ბათუმის კულტურის ცენტრმა ტენდერი 202 ათას 196 ლარით გამოაცხადა.
ტენდერის პირობის მიხედვით, პრეტენდენტმა უნდა უზრუნველყოს:
- საგამოფენო სივრცის (დახლები) მოწყობა; ჯიხურები, შესასვლელი თაღი, მიმართულების ნიშნულები
- სხვადასხვა სახის ინსტალაცია, ფილმების ჩვენების ორგანიზება, ლიტერატურული კუთხე, ფოტოგამოფენა
- ბრენდირებული მაისურების და დროშების დამზადება;
- ელექტროენერგიის წყაროსთან დაკავშირება, ქსელის მოწყობა და გამართული ფუნქციონირება
- ქეითირინგით უზრუნველყოფა, ტრანსპორტითა და პიროტექნიკური მომსახურება
- კონფიტი, ლედეკრანი, სცენის ფარდით შეფუთვა; ბანერების და აფიშების ბეჭდვა
- დიჯეი აპარატურით მომსახურება, სახეზე მოხატვის ორგანიზება და სხვ.
ტენდერში წინადადებების მიღება 31 მარტს დაიწყება და 3 აპრილს დასრულდება.
„ბათუმობა“ ქალაქში ბოლოს 2019 წელს გაიმართა.
„ბათუმობა 2020“, ასევე „ბათუმობა 2021“ კორონავირუსის პანდემიის გამო არ ჩატარდა.
„ბათუმობა“ არ ჩატარდა არც გასულ, 2022 წელს. მაშინ მერიაში განაცხადეს, რომ ღონისძიებების ნაწილი ტურისტული სეზონის გახსნის დღისთვის გადაიტანეს.
_______________
ფოტოზე: „ბათუმობა 2018“. ფოტო: „ბათუმელები“/მანანა ქველიაშვილი
