Batumelebi

სურსათის ეროვნული სააგენტოს ინფორმაციით, აჭარის დეპარტამენტის ინსპექტორებმა ქობულეთის მუნიციპალიტეტში საზოგადოებრივი კვების ობიექტები შეამოწმეს.

უწყების ცნობით, არაგეგმური ინსპექტირების შედეგად კრიტიკული შეუსაბამობები გამოვლინდა შემდეგ ობიექტებში:

• ი/მ „ნ. მ.“ – სასადილო (ქობულეთი, რუსთაველის II ჩიხი, N13);
• ი/მ „ა. ნ.“ – სასადილო (ქობულეთი, თავისუფლების ქ. #26);
• ი/მ „მ. გ.“ – კაფე-ბარი (ქობულეთი, აღმაშენებლის ქ. #376ბ).

შემოწმებისას ობიექტებზე ასევე დაფიქსირდა ეტიკეტირების წესების დარღვევა და ეკონომიკურ საქმიანობათა რეესტრში რეგისტრაციის არქონა – წერს სააგენტო.

გამოვლენილი დარღვევების გამო, ბიზნესოპერატორები დაჯარიმდნენ და კრიტიკული შეუსაბამობების აღმოფხვრამდე საწარმოო პროცესი შეუჩერდათ.

ჩეჩნეთის ლიდერმა რამზან კადიროვმა ჩეჩენ კაცებს მოუწოდა, წვერი დაიმოკლონ და „რელიგიის შესაბამისად“ ატარონ.

კადიროვმა ასევე განაცხადა, რომ ქალებმაც ისლამური ნორმების შესაბამისად უნდა ჩაიცვან და ის ეწინააღმდეგება არაბული ტანსაცმლის ტრადიციების მიბაძვას.

ჩეჩნეთის უსაფრთხოების წარმომადგენლებთან შეხვედრაზე კადიროვმა აღნიშნა, რომ ზოგიერთი კაცი ძალიან გრძელ წვერს იზრდის, თუმცა ისინი არ ესწრებიან პარასკევის ლოცვას მეჩეთში. მისი თქმით, ამ დროს ეს კაცები ისვენებენ და მათი გარეგნობა ახალგაზრდა თაობისთვის მაგალითია.

„ჩვენ გვყავს მამაკაცები ძალიან გრძელი წვერით. თუმცა ისინი არ ესწრებიან პარასკევის ლოცვას და არ დადიან მეჩეთებში; ისინი უბრალოდ 24/7 სეირნობენ გამზირებზე და ისვენებენ. მათ გრძელი წვერი და აკეცილი შარვალი გაუგებარ მოდად აქციეს და ახალგაზრდა თაობა მათ მიბაძვას იწყებს. მე მოვუწოდებ მათ: შეიჭერით წვერი და ატარეთ თქვენი რელიგიის შესაბამისად“, – ციტირებს კადიროვს რუსული მედია.

მან ასევე თქვა, რომ ზოგიერთმა ქალმაც დაიწყო თავის სრულად დაფარვა და არ არის საჭირო არაბული სტილის მიბაძვა. „აქ ბურკა არასდროს ეცვათ“, – განაცხადა კადიროვმა.

ბათუმი-სარფის 11.3 კილომეტრი ახალი გზის მშენებლობაზე ხელშეკრულება გაფორმებულია.

საქართველოს საავტომობილო გზების დეპარტამენტის ინფორმაციით, ახალ გზას საერთაშორისო ტენდერში გამარჯვებული კომპანია China Railway Tunnel Group Co., Ltd [CRTG] ააშენებს. ხელმოწერის ცერემონია საქართველოს ინფრასტრუქტურის სამინისტროში დღეს, 9 სექტემბერს, გაიმართა.

„ხელშეკრულებას ხელი მოაწერეს საავტომობილო გზების დეპარტამენტის თავმჯდომარის მოადგილემ, სალომე წურწუმიამ და China Railway Tunnel Group Co., Ltd-ის ოფიციალურმა წარმომადგენელმა, ლიანგ ჰონგჯუნმა.

პროექტის ფარგლებში აშენდება 11.3 კმ სიგრძის 2-ზოლიანი მაგისტრალური გზა, 7.6 კმ-იანი გვირაბი და 3 ხიდი, მათ შორის 1.47 კმ სიგრძის სახიდე გადასასვლელი, ბათუმი-სარფის 7.6 კმ-იანი გვირაბი, ქვეშეთი-კობის მთავარი გვირაბის შემდეგ, საქართველოში სიგრძით მეორე საავტომობილო გვირაბი იქნება“ – წერს გზების დეპარტამენტი.

ახალი გზის მშენებლობა ძირითადად აზიის განვითარების ბანკის სესხით დაფინანსდება, რომლის ოდენობა, ფინანსთა სამინისტროს ინფორმაციით, 350 მილიონ აშშ დოლარს აღემატება.

„პროექტის ღირებულება 809 მილიონ ლარზე მეტია, სამშენებლო სამუშაოების ვადა კი 48 თვე. პროექტი აზიის განვითარების ბანკის [ADB] სესხისა და საქართველოს სახელმწიფო ბიუჯეტის თანადაფინანსებით განხორციელდება.“ – აცხადებს ინფრასტრუქტურის სამინისტრო.

ახალი გზა ბათუმის შემოვლით გზას სარფში საქართველო-თურქეთის საზღვართან დააკავშირებს. ბათუმი[ჭოროხი]-სარფის გზის პროექტის შესახებ ვრცლად ნახეთ ამ ბმულზე.

ამავე თემაზე:

„ხელისუფლება არ თმობს მზია ამაღლობელის საქმეს, როგორც პოლიტიკური ბრძოლის იარაღს. მზია ამაღლობელის საქმე მუდმივად რჩება მათ პოლიტიკურ დღის წესრიგში და პოლიტიკური ანგარიშსწორების იარაღად იყენებენ ამ საქმეს,“ – ამბობს მზია ამაღლობელის ადვოკატი მაია მწარიაშვილი.

მაია მწარიაშვილმა ეს კომენტარი ტვ პირველს მისცა, დღეს, 9 სექტემბერს, „ქართული ოცნების“ პარლამენტის თავმჯდომარის, შალვა პაპუაშვილის განცხადების საპასუხოდ.

შალვა პაპუაშვილმა პარლამენტში ბრიფინგი გამართა, პოლიციელისთვის სილის გაწვნას „ძალადობრივი თავდასხმა“ უწოდა.

„მზია ამაღლობელს შეეფარდა ყველაზე მცირე სასჯელი, რაც კი შეიძლებოდა შეფარდებოდა სასამართლოს მხრიდან. ამაზე ნაკლები სასჯელი საპროცესო კოდექსით შესაძლებელია მხოლოდ საპროცესო შეთანხმების შემთხვევაში – ეს არის კანონიც და პრაქტიკაც. საპროცესო შეთანხმება შეთავაზებული იყო მზია ამაღლობელისთვის. ამისთვის საჭირო იყო მხოლოდ ერთი რამ, ის, რომ მზია ამაღლობელს ეთქვა ის, რასაც დღეს ყველა ამბობს, ეს იყო დანაშაული და რომ ქცევა იყო არასწორი…“ – თქვა შალვა პაპუაშვილმა.

„ბატონმა პაპუაშვილმა, ბრძანა, რომ თურმე ყველაზე მცირე სასჯელი შეუფარდეს მზია ამაღლობელს, რაც კი შეიძლებოდა. სამართლებრივი სიცრუეა ეს.

განაჩენი დადგა და არა თავდასხმის მუხლით, არამედ 353-ე, წინააღმდეგობის გაწევის მუხლით. ამ მუხლით გათვალისწინებულია საპატიმრო სასჯელზე უფრო მსუბუქი სასჯელები: ჯარიმა, შინაპატიმრობა და შემდეგ მოდის პატიმრობა.

ანუ  სიცრუეა, რომ თურმე „აი ისეთი პატივი ვეცით, რომ ყველაზე დაბალი სასჯელი შევუფარდეთ“.

მეორე მინდა პასუხი გავცე მანიპულაციას, თითქოს „დღეს აღარავინ დავობს რომ მზია ამაღლობელი დამნაშავეა“.

არ არის მზია ამაღლობელი დამნაშავე. სისხლის სამართალში ლექციები არ მინდა წავუკითხო სახელისუფლებო სპიკერებს, არ იციან მათ არც სამართალი და მით უმეტეს, არც სისხლის სამართალი.

ცივილიზებული სამყარო და მათ შორის ჩვენც, იურისტები, პროცესზე ასე ვსაუბრობთ: მზია ამაღლობელის ბრალი და სასჯელი არის დაუსაბუთებელი, არის უსაფუძვლო, არაპროპორციული, არის გადაჭარბებული და განაჩენი არის უკანონო.

და ეს არა მხოლოდ საერთაშორისო სტანდარტით, არამედ ჩვენი მოქმედი კანონმდებლობითაც. მათ არ ესმით ცივილიზებული სამყაროს ენა. მთელი ცივილიზებული სამყარო დღესაც, ისევე როგორც მაშინ, ამბობს, რომ მზია არის უდანაშაულო, მას არ ჩაუდენია მისთვის ინკრიმინირებული დანაშაული. რას ნიშნავს უდანაშაულო? ნიშნავს, რომ მას არ ჩაუდენია ის დანაშაული, რაც წერია განაჩენში. დიახ, ამას ამბობს ცივილიზებული სამყარო,“ – თქვა მაია მწარიაშვილმა.

ადვოკატის თქმით, ქვეყანაში ინსტიტუციური ზღვარი წაშლილია და ხელისუფლება ისე გადადის-გადმოდის ამ საზღვრებს, როგორც გაუხარდება.

„უდანაშაულობის პრეზუმფცია, არაფერი არ არსებობს. რატომ არ კარგავს აქტუალურობას ეს საქმე? არ კარგავს სწორედ იმიტომ, რომ მზია ამაღლობელი ვერ გატეხეს. ვერ ათქმევინეს აი ეს რაღაცა, ასე ვთქვათ, პოლიტიკური და შეთქმულების თეორიის სიგიჟეები, რომ თურმე მზია ამაღლობელი ასრულებდა ვიღაცის დავალებას.

ამ ბრალდებაზე არაერთი სარჩელით მიმართა მზია ამაღლობელმა სასამართლოს. არცერთი ეს სარჩელი არც კი განიხილა სასამართლომ სამოქალაქო სამართალწარმოების წესით.

ჩვენს სასამართლო დარბაზებში მართლმსაჯულება დიდი ხანია არ აღესრულება.

ყოფილი პრემიერი განცხადებებს აკეთებს, „პოლიტიკურ ცირკში მონაწილეობას არ მივიღებო“. თუ მისი პროცესი პოლიტიკური ცირკია, მაშინ მზია ამაღლობელის საქმე რატომ არ არის პოლიტიკური ცირკი, მითხარით?

ადვოკატ მაია მწარიაშვილის თქმით, სტრასბურგში არაერთი საჩივარია მზია ამაღლობელის საქმეზე. მათ შორის, ერთ-ერთი, რაზეც დავა მიდის, არის პოლიტიკური კონტექსტი. მე-18 მუხლის დარღვევა.

„ამის დასტურია დღევანდელი პაპუაშვილის „მარგალიტები“. ბატონი პაპუაშვილი სადღაც ჩამორჩა მატარებელს. ის საუბრობდა რაღაც ძალადობრივ თავდასხმაზე პოლიციელზე. ბატონო პარლამენტის თავმჯდომარევ, ეს კვალიფიკაცია აღარ აქვს ამ საქმეს, შეიცვალა. კვალიფიკაციამ გაგასწროთ, ავტობუსმა გაგასწროთ ამ თვალსაზრისით და დღეს საზოგადოებას რატომ უყვებიან იგივე ზღაპრებს?

დიახ, ამ საქმის პირველი კვალიფიკაცია გახლდათ, პოლიციელზე თავდასხმა, რომელიც შეიცვალა.

პროკურატურა და სისხლისსამართლებრივი ინსტრუმენტები, პოლიტიკურ ინსტრუმენტად იქცა ამ ქვეყანაში, ამიტომ ხელისუფლებას მოვიაზრებ მზია ამაღლობელის საქმის მეორე მხარედ, ასე ვთქვათ და არა სახელმწიფო ბრალდებას.

სამწუხაროდ, მათი შეთავაზება რა იყო, ხომ? „აღიარე, აღიარე, რასაც გაბრალებთ და რასაც ვერ ვამტკიცებთ, მაგრამ გაბრალებთ, აღიარე ყველაფერი“. დიახ, ამას ამბობს დღესაც პაპუაშვილი, საპროცესო შეთანხმებას მიიღებო. სასამართლომ შეცვალა ეს კვალიფიკაცია.

მზია ამაღლობელს რის აღიარებასაც სთხოვდნენ, სასამართლომაც თქვა: „მეც კი არ მჯერა ეგო“, წარმოგიდგენიათ? ამ სასამართლომაც შეცვალა ეგ კვალიფიკაცია. საპროცესოს სანაცვლოდ რასაც სთხოვდა სახელმწიფო ბრალდება და თურმე ბატონი პაპუაშვილიც ამას სთხოვდა, ის არ არის განაჩენით. ამიტომ ვთქვი, გაასწროთ ამათ ავტობუსმა, მორჩა ეგ ზღაპარი,“ – თქვა მაია მწარიაშვილმა.

„როცა ბავშვს აღარ მოუწევს შეშის ღუმელზე გათბობა, როცა კლასები იქნება თანამედროვე სისტემებით აღჭურვილი, გვექნება ჭკვიანი დაფები, ლეპტოპები, ფერადი პრინტერები და სხვა აუცილებელი რესურსებიც, მერე ვიმსჯელოთ ფორმებზეც“, – ამბობს არჩილ თოდუა.

არჩილი, ზუგდიდის მე-9 საჯარო სკოლაში სამოქალაქო განათლებას ასწავლის. ის წელს „მასწავლებლის ეროვნული ჯილდოს ფინალისტიც“ გახდა.

როგორია მასწავლებლობა საქართველოს საჯარო სკოლაში, რა სირთულეები აქვთ მოსწავლეებს და ახერხებს თუ არა სკოლაში დემოკრატიის დაცვას? – ამ თემაზე ესაუბრა მას „ბათუმელები“.

• ბატონო არჩილ, რატომ გადაწყვიტეთ მასწავლებლობა იმ გამოწვევების ფონზე, რაც დღეს აქვს საქართველოს საჯარო სკოლებს?

სკოლაში 2022 წლიდან ვმუშაობ. კონკურსის წესით ამიყვანეს, როგორც სამოქალაქო განათლების მასწავლებელი. 2015 წლიდან კი პერიოდულად ვასწავლი ზუგდიდის სახელმწიფო უნივერსიტეტში, როგორც მოწვეული ლექტორი, „დემოკრატია და მოქალაქეობას“ და სულ ვფიქრობდი, რომ ყველაზე სწორია, ახალგაზრდებს ასწავლო სწორი ღირებულებები უფრო ადრეულ ეტაპზე.

ამიტომაც ვიფიქრე, რომ უფრო საინტერესო ჩემთვის, როგორც პედაგოგისთვის, სკოლაში მუშაობა იქნებოდა და მადლიერი ვარ, რომ ეს შესაძლებლობა მომეცა.

ამ პროფესიის არჩევანი ალბათ იმანაც განაპირობა, რომ მასწავლებლების ოჯახში გავიზარდე. მამაჩემი სიცოცხლის ბოლომდე იყო სკოლაში და დედა დღესაც  მასწავლებელია. სხვა ნათესავებიც მყავს პედაგოგები, ასე რომ, ეს პროფესია ჩემთვის უცხო არ არის.

• სამოქალაქო განათლება ბავშვებს ასწავლის დემოკრატიულ ღირებულებებს. „ოცნების“ ხელისუფლება კი ქვეყანაში ავტოკრატიას აძლიერებს. ასეთ ვითარებაში მასწავლებლებს გაქვთ იმის შინაგანი რესურსი, რომ წინააღმდეგობა გაუწიოთ პროპაგანდას, დაიცვათ ეს ღირებულებები?

ძალიან მძიმე, კრიზისულ ვითარებაში ვართ დღეს, კრიზისის პირობებში არსებობს ჩვენი სახელმწიფო ბოლო რამდენიმე წელია და ამ პროცესში განსაკუთრებული როლი აკისრიათ მოქალაქეებს. დემოკრატია უნდა იყოს საზოგადოების დაკვეთა და საზოგადოებამ ყველაფერი უნდა გააკეთოს იმისთვის, რომ ქვეყანაში გვქონდეს რეალური დემოკრატია, ისეთი, როგორიც ვთქვათ, დასავლეთ ევროპის ქვეყნებშია.

სკანდინავიის ქვეყნების დონეზე შეიძლება არა, რადგან ამ ქვეყნებში დემოკრატიის ძალიან მაღალი სტანდარტია, მაგრამ აღმოსავლეთ ევროპის ქვეყნების დონეზე ხომ შეგვიძლია მინიმუმ ყოფნა.

საზოგადოებამ უნდა შევძლოთ განვავითაროთ, გავაძლიეროთ და ავაშენოთ ისეთი სახელმწიფო, სადაც ნებისმიერი ადამიანი თავისუფლად, დაცულად იგრძნობს თავს, სადაც ადამიანებს მიეცემათ შესაძლებლობა, საკუთარი თავის რეალიზება მოახდინონ.

საკუთარი თავი იპოვონ აქ, ამ სახელმწიფოში და არ მოუწიოთ ემიგრაციაში ყოფნა. ვიცით, რომ დღეს ათასობით ადამიანია ემიგრაციაში წასული უკეთესი ცხოვრებისთვის, იმისთვის, რომ აქ დარჩენილი ოჯახები არჩინონ და ასევე უამრავი ადამიანი, ჩემ გარშემოც მაგალითად, ცდილობს გამონახოს გზები იმისთვის, რომ დატოვოს საქართველო და უცხოეთიდან არჩინოს ოჯახი ან ოჯახთან ერთად გადასახლდეს საერთოდ სხვა სახელმწიფოში.

ეს ძალიან მძიმე ამბავია. ამიტომ, ჩვენ თუ არ შევქმნით და არ ავაშენებთ თავისუფალ სახელმწიფოს, ეს პროცესები კიდევ უფრო გაღრმავდება.

• ფაქტია, რომ ევროკავშირში გაწევრიანების რეალური შანსები წაართვა „ოცნების“ ხელისუფლებამ საქართველოს. ახალგაზრდები რას ფიქრობენ ამ ყველაფერზე. მათ თუ აქვთ განცდა იმის, რომ დემოკრატიული ღირებულებები მათი დასაცავიც არის?

ახალგაზრდა თაობას ძალიან კარგად ესმის ბევრი რამ, მაგრამ მასწავლებლებს გვაქვს მეტი წილი პასუხისმგებლობა იმაზე, რომ მოსწავლეებს კარგად გავააზრებინოთ და ვასწავლოთ საკუთარი პრინციპების დაცვა. ჩვენს ქვეყანას დღეს გაცხადებული აქვს, მათ შორის კონსტიტუციითაც, რომ საქართველო ევროპული ოჯახის სრულფასოვანი ნაწილი უნდა გახდეს. ამიტომ ეს დათქმა უნდა მოვიდეს პრაქტიკაში.

ჩვენ, ძალიან ცუდი და მრავალწლიანი გამოცდილება გვაქვს რუსული ქოლგის ქვეშ ცხოვრების, რუსული ოკუპაციის და ამან სასიკეთო არაფერი მოუტანა ჩვენს სახელმწიფოს არცერთ ეტაპზე. ისტორიულად ჩვენი ქვეყანა ყოველთვის იყო დასავლეთის, თავისუფალი სივრცის ნაწილი. მითოლოგიაშიც რომ წავიდეთ, ჩვენი პირველი მითიც, არგონავტების შესახებ, ევროპულ სახელმწიფოს – საბერძნეთს უკავშირდება.

აქედან მოყოლებული ცდილობდა ჩვენი ქვეყანა საკუთარი ნავსაყუდელი დასავლეთში, ევროპაში ეპოვა და დღეს, როცა არსებობს ეს შესაძლებლობა, არ უნდა გავუშვათ შანსი ხელიდან. აბსოლუტურად ყველა პროფესიის ადამიანმა, ყველაფერი უნდა გააკეთოს იმისთვის, რომ დავბრუნდეთ იქ, სადაც ჩვენი ადგილია.

• წელს გამოცვალეს სახელმძღვანელოები და ისიც კი მოვისმინეთ, რომ „წულუკიანის კომისიის“ დასკვნის შეტანას ცდილობენ სკოლებში. ყველას გვახსოვს ეს კომისია როგორ მსჯელობდა, თუ ვინ დაიწყო აგვისტოს ომი – სააკაშვილმა თუ რუსეთმა. შეძლებენ ისინი თავიანთი მიზნების მიღწევას სკოლებში?

სანამ შეგვიძლია, ჩვენ მოსწავლეებს უნდა ვასწავლოთ სიმართლე – რა არის სწორი და რა არასწორი. ისტორიას ვერ შეცვლი, ვერ გააყალბებ და საქართველოს ისტორიაში რუსეთს ვერ გამოიყვან, როგორც ჩვენ მეგობარ სახელმწიფოს.

დარწმუნებული ვარ, ისტორიის მასწავლებლების უმრავლესობა სწორედ ამ პოზიციაზეა. იგივე როლი აკისრიათ ქართული ლიტერატურის მასწავლებლებსაც, რადგან ბევრი ქართველი ავტორი, პოეტი თუ მწერალი სწორედ რუსული აგრესიის, რუსული რეპრესიების მსხვერპლი გახდა და არაერთი ნაწარმოები აღწერს ამ ყველაფერს.

სამოქალაქოს მასწავლებლებსაც განსაკუთრებული როლი აკისრიათ ამ კუთხით, რომ ბავშვებს საკლასო ოთახებში ასწავლოს რეალური ისტორია.

ჩემი მშობლებისგან ძალიან ხშირად გამიგია, რომ საბჭოთა პერიოდში უნივერსიტეტში სწავლობდნენ ათეიზმის კურსს, მაგრამ ყველაზე მეტი, რელიგიაზე და ქრისტიანობაზე სწორედ იმ ლექტორებისგან გაიგეს, რომელთა პასუხისმგებლობაც ათეიზმის სწავლება იყო.

ვფიქრობ, გაუჭირდებათ ისეთი მასწავლებლის პოვნა, რომელიც საკუთარი ქვეყნის ინტერესების წინააღმდეგ ასწავლის რაიმეს. ახალგაზრდებსაც კარგად ესმით ვისკენ არის სიმართლე, ვინ არის ოკუპანტი და ვინ მეგობარი. ამიტომ არა მგონია ვინმეს გააბედვინონ საკუთარი ისტორიის არასწორი სწავლება.

მე ვარ ზუგდიდიდან, რომელიც ოკუპირებულ აფხაზეთს ემიჯნება, ჩემი სტუდენტების მეტი წილი სწორედ იძულებით გადაადგილებული პირები არიან აფხაზეთიდან. მათ ყველაზე კარგად, პრაქტიკაში იციან, ვინ არის მტერი, ვინ არის ოკუპანტი და რას ნიშნავს ოკუპაციის პირობებში ცხოვრება.

შესაბამისად, რთულად წარმომიდგენია, რომ ერთ დღეს, ქართულ საკლასო ოთახებში თუ უნივერსიტეტის აუდიტორიებში ვიხილოთ სიტუაცია, სადაც მტერზე ვიტყვით, რომ მეგობარია და მეგობარზე ვიტყვით, რომ მტერია.

• ორი დღეა განათლების სამინისტრო PISA-ს კვლევას აფრიალებს და ამბობს, რომ წინსვლა გვაქვს განათლებაში. მოგვიყევით, რეალურად რა ხდება სკოლაში, რა აწუხებთ ან უხარიათ ბავშვებს?

მე პატარა სკოლაში ვასწავლი, მაგრამ ყველა მათგანის ინტერესი, პირველ რიგში, არის ის, რომ ჰქონდეთ კარგი, უზრუნველი მომავალი და ეს მომავალი თვითონვე ააშენონ, თვითონვე შექმნან. ამიტომ, ისეთ საგნებს ითვისებენ, რაც მათ მომავალში გამოადგებათ. მათ შორის, სამოქალაქო განათლებასაც.

მეც ვცდილობ ისეთი პროექტები განვახორციელო, რაც მათ ინტერესებზე იქნება მორგებული. მასწავლებელი ყოველთვის იმის ძიებაში უნდა იყოს, თუ რა არის მოსწავლეთა ინტერესი, რა სფეროში, რა მიმართულებით სჭირდებათ მათ დახმარება.

ახლა, ამ ინტერვიუს შვედეთიდან გაძლევთ და რომ შევადაროთ ერთმანეთს, უზარმაზარი განსხვავებაა ქართულ და შვედურ სკოლებს შორის. აქ ყველაფერი ხელმისაწვდომია ბავშვებისთვის. კარგად აღჭურვილი სკოლები, კარგი, გამწვანებული ეზოები, არაერთ სპორტულ სახეობაზე მიუწვდებათ ხელი. დასვენებაც შეიძლება, სწავლაც და გართობაც. ეს ყველაფერი აკლიათ ჩვენს მოსწავლეებს.

ჩვენთან ჯერ კიდევ იმაზე მიდის მსჯელობა, სკოლებში უნდა იყოს თუ არა უფასო კვება.

აუცილებელია, რომ სახელმწიფომ განათლებაში სწორად ჩადოს ფინანსური რესურსები. სოფელშიც და ქალაქშიც მოსწავლეებს თანაბარი ხელმისაწვდომობა უნდა ჰქონდეთ ყველაფერზე. არ შეიძლება ერთ სკოლაში გათბობის ცენტრალური სისტემა იყოს და მეორე სკოლაში შეშის ღუმელებით თბებოდნენ ბავშვები.

ჩვენ ერთი მხრივ სისტემური და მეორე მხრივ რესურსების კრიზისების ფონზე გვიწევს დღეს მასწავლებლებს მუშაობა. განსაკუთრებით რეგიონებში.

მასწავლებლებს და სკოლას უნდა ჰქონდეთ სრული თავისუფლება. სკოლა პოლიტიკური კონიუნქტურისა და მანიპულაციებისგან აბსოლუტურად დაცული უნდა იყოს, რადგან მხოლოდ დამოუკიდებელ, კრიტიკულად მოაზროვნე, თავისუფალ პედაგოგს შეუძლია აღზარდოს თავისუფალი, ღირსეული, პასუხისმგებლობიანი მოქალაქე, რომელიც, საბოლოო ჯამში, კარგ ქვეყანას ააშენებს.

• რადგან შვედეთში ხართ, ხომ არ გიკითხავთ, 2 ან 3-ცვლიან სკოლებზე თუ სმენიათ რაიმე. ჩვენთან ხომ ასეთ პირობებში უწევთ ბავშვებს სწავლა?

შვედეთში არ არის ორცვლიანი სკოლები. გაკვეთილების დასრულების შემდეგ 6-დან 13 წლამდე ბავშვებისთვის მოქმედებს სპეციალური სკოლისშემდგომი ჯგუფები, სადაც მოსწავლეები რჩებიან საღამომდე. თამაშობენ, მეცადინეობენ და ერთობიან.

მოსწავლეს, პირველ რიგში, მეგობრული, თავისუფალი გარემო უნდა დაახვედრო სკოლაში. უნდა ჰქონდეს განცდა, რომ მას სკოლაში მხარდამჭერები დახვდებიან, სკოლამ ხელი უნდა შეუწყოს კონკრეტული მოსწავლის, კონკრეტული ინტერესის განვითარებას. მათემატიკა გამოსდის კარგად? ამ მხრივ უნდა შეუწყო ხელი, ტექნოლოგიები გამოსდის? აქ უნდა მისცე ფართო შესაძლებლობები. შეიძლება მუსიკის ნიჭი აქვს და კარგი ფლეიტისტი გამოვიდეს.

ამ ყველაფრის ხელშემწყობი უნდა იყოს სკოლა.

• ფორმები ხომ უყიდეს, თან დაავალდებულეს რომ ჩაიცვან. ამაზე რას ფიქრობთ?

როცა ბავშვს აღარ მოუწევს შეშის ღუმელზე გათბობა, როცა კლასები იქნება თანამედროვე სისტემებით აღჭურვილი, გვექნება ჭკვიანი დაფები, ლეპტოპები, ფერადი პრინტერები და სხვა აუცილებელი რესურსები, მერე ვიმსჯელოთ ფორმებზეც.

ფორმა არ არის ნომერ პირველი პრიორიტეტი დღეს, რაზეც სახელმწიფომ უნდა იზრუნოს. სხვა პრობლემებია მოსაგვარებელი. მათ შორის ბუფეტების საკითხი, ფიზიკის, ქიმიის ლაბორატორიების და ასე შემდეგ.

იმ პირობებში, როდესაც ქვეყანაში არაერთი ბავშვი იზრდება მშობლების გარეშე, ხან დედა ჰყავთ ემიგრაციაში, ხან მამა, ან ორივე ერთად, ბუნებრივია, ბავშვის სწავლის მოტივაცია ვერ იქნება მაღალი. ეს ყველაფერი მოქმედებს ბავშვის ფსიქიკაზე.

უნივერსიტეტში მყავდა ერთი სტუდენტი, რომელიც მიყვებოდა, რომ მეშვიდე კლასიდან ხან ერთი მშობელი ჰყავდა ემიგრაციაში, ხან მეორე და ეს ძალიან მტკივნეული იყოს მისთვის. მე სამი შვილი მყავს და სულ ვცდილობ მათ გვერდით ვიყო, დავეხმარო გაკვეთილების მომზადებაში, რაღაც ავუხსნა დამატებით, ეს აკლია ბევრ ბავშვს.

ბავშვი ბედნიერიც უნდა იყოს, სათანადო პირობებიც უნდა ჰქონდეს, რომ სრულფასოვნად მიიღოს ცოდნა. ამისთვის გვჭირდება დასავლური დემოკრატიაც და განვითარებული ეკონომიკაც. ის, რაც ევროპის ქვეყნებს აქვთ დღეს საკუთარი მოქალაქეებისთვის, მოსწავლეებისთვის.

• მე-12 კლასის გაუქმებაზე რას ფიქრობენ ბავშვები. თანახმა არიან „რეპეტიტორიუმის“ გავლაზე?

ჩემ გარშემო მყოფი მოსწავლეების მნიშვნელოვანი ნაწილი ფიქრობს, რომ ისინი უეჭველად გააგრძელებენ სწავლას მე-12 კლასშიც, რადგან ხედავენ, რომ ბევრი ახალგაზრდა წარმატებით ირიცხება ევროპულ უნივერსიტეტებში. არც მათ უნდათ ეს შესაძლებლობა დაკარგონ.

საქართველოში შეიცვალა სამხედრო სავალდებულო სამსახურში გაწვევის შესახებ შეტყობინების წესი. შესაბამისად, გაიზარდა  ჯარიმები და კანონში გაჩნდა სისხლის სამართლებრივი პასუხისმგებლობის ნაწილი.

„ბათუმელები“ დაინტერესდა, დეპუტატებს, ვინც ამ საკანონმდებლო ცვლილებებს მხარი დაუჭირა, თავად თუ ჰქონდათ სამხედრო სავალდებულო სამსახური გავლილი.

ასევე დავინტერესდით, მოიხადეს თუ არა სავალდებულო სამხედრო სამსახური თანამდებობის პირებმა, რომლებიც „ქართულ ოცნებას“ წარმოადგენენ და მხარს უჭერენ მის მიერ მიღებულ კანონმდებლობას.

აღმოჩნდა, რომ ჯარში ნამყოფი არაა აჭარის უმაღლესი საბჭოს თავმჯდომარე, აჭარის სოფლის მეურნეობის მინისტრი, აჭარის მთავრობის თავმჯდომარის შვილი, რომელიც თანამდებობის პირია და თავად ის დეპუტატები, რომლებმაც მხარი დაუჭირეს კანონის გამკაცრებას.

• რა შეიცვალა 13 მაისს „თავდაცვის კოდექსში“

თუ თქვენ ჯარში წასვლა გიწევთ, მაგრამ საზღვარგარეთ ხართ და შეტყობინებას ვერ ჩაიბარებთ, ეს შეტყობინება საჯაროდ გამოქვეყნდება და გამოქვეყნებიდან მეშვიდე დღეს ჩაბარებულად ჩაითვლება.

თუ ათ დღეში სამხედრო გაწვევის კომისიაში არ გამოცხადებით, ავტომატურად ხდებით სამართალდამრღვევი და 1000 ლარით დაჯარიმდებით.

ხოლო თუ ქვეყანაში არ დაბრუნდებით, განმეორებით გამოგიძახებენ და ისევ არ მიხვალთ, მაშინ სისხლის სამართლის დამნაშავე ხდებით და თქვენს წინააღმდეგ საქმე სსკ-ის 356-ე მუხლით დაიწყება.

ჯარში გაწვევის ახალი წესის შესახებ მთავრობის დადგენილება ძალაში პირველი სექტემბრიდან შევიდა. ეს დადგენილება კი თავის მხრივ დაეფუძნა „საქართველოს თავდაცვის კოდექსში“ შეტანილ ცვლილებებს, რომელიც მიმდინარე წლის 13 მაისს, „ქართული ოცნების“ პარლამენტმა მესამე მოსმენით მიიღო.

ცვლილებებს მხარი „ქართული ოცნების“ 72-მა, „ხალხის ძალის“ ექვსმა და „ევროპელი სოციალისტების“ ორმა დეპუტატმა დაუჭირა.

ცვლილებების წინააღმდეგი იყო „გახარია საქართველოსთვის“ 10 დეპუტატი.

საქართველოს ახალგაზრდა მოქალაქეებს სამხედრო სამსახურში გაწვევის წესი განუსაზღვრეს ისეთმა დეპუტატებმაც, რომლებიც თავად არასდროს ყოფილან ჯარში და არ მოუხდიათ სამხედრო სავალდებულო სამსახური.

„გაქვთ თუ არა გავლილი სამხედრო სავალდებულო სამსახური? თუ კი, რომელ წელს და სად? თუ არ ხართ ნამყოფი ჯარში, გთხოვთ მოგვწეროთ მკაფიო განმარტება, რატომ ვერ ან არ გაიარეთ სამხედრო სავალდებულო სამსახური“, – „ბათუმელებმა“ ეს კითხვები პარლამენტის ოფიციალურ საიტზე მითითებულ მეილებზე „ქართული ოცნების“ რამდენიმე დეპუტატს გაუგზავნა.

კერძოდ, ვახტანგ თურნავას, ირაკლი კირცხალიას, ზურაბ რურუას, თორნიკე ფაღავას, გიორგი ხახუბიასა და არჩილ ბერიძეს ვკითხეთ, ჰქონდათ თუ არა გავლილი სამხედრო სავალდებულო სამსახური.

„ბათუმელების“ ინფორმაციით, მე-11 მოწვევის პარლამენტის დეპუტატები: ვახტანგ თურნავა, ირაკლი კირცხალია, ზურაბ რურუა, თორნიკე ფაღავა, გიორგი ხახუბია და არჩილ ბერიძე არ არიან ჯარში ნამყოფი.

„ბათუმელებმა“ არაერთგზის სცადა მათთან დაკავშირება. შეკითხვები გავუგზავნეთ მეილზე, გავუგზავნეთ სმს შეტყობინება და თითოეულ დეპუტატთან ვცადეთ დაკავშირება სატელეფონო ზარის საშუალებით.

დავუკავშირდით საქართველოს პარლამენტის პრესსამსახურსაც, რომელსაც გავაცანით ჩვენი კითხვები. პრესსამსახურისგან მივიღეთ დადასტურება, რომ დეპუტატები ნამდვილად იყვნენ ინფორმირებულები და იცოდნენ რა საკითხზე გვსურდა მათგან პასუხი.

5 დღის განმავლობაში არცერთმა დეპუტატმა ჩვენს არცერთ შეტყობინებას არ უპასუხა. გვსურდა ასევე მიგვეღო პასუხი კითხვაზე, ჰქონდათ თუ არა ალტერნატიული სამხედრო სამსახური გავლილი.

ცნობისათვის, ზემოთ ჩამოთვლილი დეპუტატებიდან თავდაცვის კოდექსში ცვლილებებს ხმა მისცა: ნიკა ელისაშვილმა, ირაკლი კირცხალიამ, ზურაბ რურუამ, თორნიკე ფაღავამ, გიორგი ხახუბიამ და არჩილ ბერიძემ. 13 მაისის სხდომას არ ესწრებოდა ვახტანგ თურნავა.

თუ რომელიმე დეპუტატი გადაწყვეტს ამ თემაზე კომენტარის გაკეთებას, მას სტატიაში ავსახავთ.

ერთადერთი დეპუტატი „ქართული ოცნებიდან“ ნიკა ელისაშვილი აღმოჩნდა, რომელმაც „ბათუმელების“ სატელეფონო ზარს უპასუხა.

ჯარში ნამყოფი არც ნიკა ელისაშვილი არაა, თუმცა მან „ბათუმელებთან“ სატელეფონო საუბარში განმარტა, რომ გავლილი აქვს „ალტერნატიული სამხედრო სამსახური“ და, შესაბამისად, ჯარში წასვლა აღარ მოუწია.

რა ხდება აჭარაში, აქვთ თუ არა მაღალჩინოსნებს გავლილი სამხედრო სავალდებულო სამსახური – ამ კითხვით რამდენიმე უწყებას და ჩინოვნიკს მივმართეთ.

კერძოდ, დავინტერესდით, ჰქონდა თუ არა გავლილი სამხედრო სავალდებულო სამსახური აჭარის მთავრობის თავმჯდომარის, ზურაბ პატარაძის შვილს, რომელიც ასევე თანამდებობას იკავებს საზღვაო ტრანსპორტის სააგენტოში. ასევე დავინტერესდით აჭარის სოფლის მეურნეობის მინისტრის, დენის სალუქვაძის, აჭარის უმაღლესი საბჭოს თავმჯდომარის, ცოტნე ანანიძის და უმაღლესი საბჭოს წევრის, გოგი ფუტკარაძის შესახებ ინფორმაციით.

აღმოჩნდა, რომ არცერთი ზემოჩამოთვლილი საჯარო პირი ჯარში ნამყოფი არაა.

ჯარში არაა ნამყოფი აჭარის სოფლის მეურნეობის მინისტრი დენის სალუქვაძე.

„დენის სალუქვაძე სამხედრო სავალდებულო სამსახურში არ გაუწვევიათ, რადგან  იმ პერიოდში, როცა სამხედრო სავალდებულო სამსახური უწევდა, განათლებას იღებდა. მას გავლილი აქვს უმაღლესი განათლების სამივე საფეხური – ბაკალავრიატი, მაგისტრატურა და დოქტორანტურა. კანონის შესაბამისად, სამხედრო სავალდებულო სამსახურში გაწვევა მას არ უწევდა“, – მოგვწერეს აჭარის სოფლის მეურნეობის სამინისტროდან.

ჯარში არ არიან ნამყოფები არც ცოტნე ანანიძე და არც გოგი ფუტკარაძე.

„2008 წელს ბაკალავრის დამამთავრებელი კურსის სტუდენტებისთვის მთავრობას ჰქონდა 18 დღიანი რეზერვისტების პროგრამა. გამოვცხადდი, არ წამიყვანეს, იმ მოტივით -„ოპოზიციაშია ეს ბიჭი და მთავარსარდალს ეწინააღმდეგებაო“. ამის შემდეგ, ბაკალავრის დასრულებისთანავე, მაგისტრატურაში ჩავაბარე სისხლის სამართალზე. მაგისტრატურის სტუდენტი ვიყავი, როცა დამიჭირეს. როდესაც ციხიდან გამოვედი, რა თქმა უნდა, აღვადგინე სტატუსი და მერე დავასრულე სამაგისტრო,“ – გვითხრა აჭარის უმაღლესი საბჭოს თავმჯდომარემ, ცოტნე ანანიძემ.

„საქართველოს კანონის „სამხედრო ვალდებულებისა და სამხედრო სამსახურის შესახებ“ კანონის 30-ე მუხლის პირველი პუნქტის თანახმად, რომელიც  განსაზღვრავს წვევამდელის სამხედრო სამსახურში გაწვევის გადავადებას „გ1“ ქვეპუნქტის თანახმად გახლდით – საზღვარგარეთ სხვადასხვა უმაღლესი საგანმანათლებლო დაწესებულების სტუდენტი (2010-2018 წწ).

სამხედრო აღრიცხვის სამსახურის მიერ გამოძახებისთანავე სისტემატურად ვცხადდებოდი შესაბამის სამსახურში, ხოლო სამხედრო სავალდებულო სამსახურის გადავადება ხორციელდებოდა უმაღლესი განათლების თითოეულ საფეხურზე (როგორც საბაკალავრო, აგრეთვე სამაგისტრო პროგრამების) სწავლის დასრულებამდე,“ – გვითხრა უმაღლესი საბჭოს წევრმა „ქართული ოცნებიდან“ გოგი ფუტკარაძემ.

• იყვნენ თუ არა აჭარის მთავრობის თავმჯდომარის შვილები ჯარში?

აქვთ თქვენს შვილებს გავლილი სამხედრო სავალდებულო სამსახური? – ეს კითხვა აჭარის მთავრობის თავმჯდომარეს, ზურაბ პატარაძეს მიმდინარე წლის მაისში დავუსვით.

ზურაბ პატარაძემ დასმულ შეკითხვაზე პირდაპირ პასუხს თავი აარიდა.

„ღმერთმა ამრავლოს საქართველოში მრავალშვილიანი ოჯახები, ეს არის ჩვენთვის დიდი სიმდიდრე. რა თქმა უნდა, ჩვენ ვზრუნავთ ჩვენს ოჯახებზე და ჩვენს შვილებზე. ის, რაც კანონით არის გათვალისწინებული, რა თქმა უნდა, მათ შორის საჯარო მოხელე შესაბამისად მიჰყვება ქმედებას,“ – გვითხრა მან.

განმეორებით დასმულ შეკითხვაზე – თქვენი ერთი შვილი საჯარო სამსახურში მუშაობს, აქვს თუ არა მას სამხედრო სავალდებულო სამსახური გავლილი? – ზურაბ პატარაძემ პასუხს ისევ თავი აარიდა.

„ყველა ქმედება იქნება დაცული, როგორც არის კანონმდებლობით…“ – გვითხრა მან.

ზურაბ პატარაძეს 4 შვილი ჰყავს, 2 ბიჭი და ორი გოგო. ზურაბ პატარაძის უფროსი შვილი, რევაზ პატარაძე საზღვაო ტრანსპორტის სააგენტოს დირექტორის მოადგილეა.

ჩვენ მისგანაც ვცადეთ კომენტარის მიღება და პრესსამსახურის საშუალებით ვკითხეთ, ჰქონდა თუ არა სამხედრო სავალდებულო სამსახური გავლილი.

რევაზ პატარაძემ „ბათუმელების“ კითხვებს არ უპასუხა.

საზღვაო ტრანსპორტის სააგენტოს პრესსამსახურმა კი გვითხრა, რომ კითხვაზე პასუხი – ჰქონდა თუ არა გავლილი სამხედრო სავალდებულო სამსახური რევაზ პატარაძეს, საჯარო ინფორმაციის სახით გამოგვეთხოვა.

ზურაბ პატარაძის მეორე შვილი 20 წლისაა. ის ამჟამად სტუდენტია და მოქმედი კანონმდებლობის მიხედვით, სწავლის პერიოდში სამხედრო სავალდებულო სამსახურისგან თავისუფალია.

დღეს, 9 სექტემბერს, პარტია „ლელომ“ აჭარის კულტურული მემკვიდრეობის დაცვის სააგენტოს მიმართა წერილობით და ბათუმში, გამსახურდიას 41-ე ნომერში არსებული მოდერნის სტილის, კულტურული მემკვიდრეობის ძეგლთან დაკავშირებით სრული ინფორმაცია მოითხოვა.

„ჩვენ ვითხოვთ ყველა სახის დოკუმენტაციას, მათ შორის ცვლილებებს, რაც დაფიქსირდა ზვიად გამსახურდიას 41-ში მდებარე ძეგლთან დაკავშირებით.

ასევე, გავდივართ კონსულტაციას შესაბამის ჯგუფებთან, რომ მოხდეს ძეგლის რეაბილიტაციასთან დაკავშირებული ყველა სახის დოკუმენტაციის შესწავლა.

გარდა ამისა, ვაპირებთ, ბათუმის საკრებულოში დავაყენოთ ინიციატივა სამუშაო ჯგუფთან დაკავშირებით, რომელიც შეისწავლის რეაბილიტაციის ყველა ეტაპს.

მნიშვნელოვანია, რომ ეს ამბავი გასაჯაროვდეს, რადგან ჩვენ ვნახეთ „ნექსთის“ განცხადება, სადაც საუბარია იმაზე, რომ შენობის გაფერადება-დამახინჯება არ იყო შეთანხმებული სააგენტოსთან და ეს დაადასტურა კიდეც სააგენტომ.

შესაბამისად, ვითხოვთ ყველა დოკუმენტაციას, რომ გამოვიკვლიოთ, რამდენად სწორად იქნა გაცემული ამ ძეგლის შესახებ ნებართვები“ – ამბობს ბათუმის საკრებულოს წევრი „ლელოდან“ ვაჟა დარჩია.

მისი თქმით, სააგენტომ აღნიშნული დოკუმენტაცია წესით 10 დღეში უნდა მიაწოდოს. ვაჟა დარჩიამ „ბათუმელებთან“ ასევე აღნიშნა, რომ ითხოვენ, გასაჯაროვდეს პროექტი, რათა საზოგადოებამ იცოდეს, როგორი იქნება ძეგლის საბოლოო იერსახე რეაბილიტაციის შემდეგ.

„ნებისმიერი ცვლილება შეთანხმებული უნდა ყოფილიყო სააგენტოსთან, რადგან ეს არის ეროვნული მნიშვნელობის ძეგლი და ექსპერიმენტები არ უნდა ტარდებოდეს მის ფასადზე.

საქართველოს მოქალაქეებს, რომლებიც პროტესტში არიან ჩართულნი, აჯარიმებენ ასფალტზე წარწერის გამო და ამ დროს „ნექსთი“ თავისი ნება-სურვილით, ერთ-ერთ ყველაზე მნიშვნელოვან ძეგლს საქართველოში, ფაქტობრივად, სპობს, ფასადს უნადგურებს და ჩანს, რომ ამ ძეგლთან დაკავშირებით სამუშაოები ისე არ არის ჩატარებული, როგორც ამას კანონი ითვალისწინებს“ – ამბობს ვაჟა დარჩია.

ასევე დღეს, 9 სექტემბერს, კულტურული მემკვიდრეობის სააგენტოს მიმართა მოძრაობა „თავისუფლების მოედნის“ წევრმა, აზა გაბუნიამ.

„გთხოვთ, მოგვაწოდოთ საჯარო ინფორმაცია და შესაბამისი დოკუმენტაციის ასლები, რომლებიც უკავშირდება ბათუმში, ზვიად გამსახურდიასა და მერაბ კოსტავას ქუჩების №12/14- გადაკვეთაზე  მდებარე კულტურული მემკვიდრეობის ძეგლზე მიმდინარე/განხორციელებულ სამუშაოებს. კერძოდ, გთხოვთ მოგვაწოდოთ:

სააგენტოსთან შეთანხმებული თავდაპირველი პროექტის სრული ასლი, რომლის საფუძველზეც აღნიშნულ კულტურული მემკვიდრეობის ძეგლზე სამუშაოების განხორციელება გახდა შესაძლებელი;

აღნიშნულ პროექტში შეტანილი ყველა ცვლილების, დამატებისა და კორექტირების შესახებ დოკუმენტაცია, მათ შორის ცვლილებები/განახლებული პროექტების სრული ასლები, არსებობის შემთხვევაში;

• აღნიშნულ ობიექტთან დაკავშირებით სააგენტოს მიერ გაცემული ყველა ნებართვის, თანხმობის, ბრძანებისა და ადმინისტრაციული აქტის ასლები;
• სააგენტოს შესაბამისი კომისიების/საბჭოების სხდომების ოქმები, გადაწყვეტილებები და დასკვნები, რომლებზეც განხილული ან შეთანხმებული იყო აღნიშნულ შენობაზე სამუშაოების, მათ შორის ფასადის ცვლილების საკითხი;
• მესაკუთრის, ინვესტორის, საპროექტო ორგანიზაციის ან სხვა დაინტერესებული პირების მიერ სააგენტოში წარმოდგენილი ყველა წერილის, განცხადების, განმარტების, პროექტისა და სხვა დოკუმენტის ასლები, რომლებიც აღნიშნულ ობიექტსა და მიმდინარე სამუშაოებს შეეხება;
• ინფორმაცია და შესაბამისი დოკუმენტაცია იმის შესახებ, რა პირობებითა და მოთხოვნებით იქნა შეთანხმებული სამუშაოების განხორციელება, მათ შორის ფასადის, ფერთა გადაწყვეტის, დეკორატიული ელემენტებისა და სხვა არქიტექტურული დეტალების მიმართ დადგენილი მოთხოვნები;
• სააგენტოს მიერ აღნიშნულ ობიექტზე განხორციელებული მონიტორინგისა და ინსპექტირების ყველა მასალა, მათ შორის შემოწმების აქტები, ოქმები, დასკვნები, ფოტოფიქსაცია და სხვა შესაბამისი დოკუმენტაცია;
• ინფორმაცია იმის შესახებ, დადგინდა თუ არა სამუშაოების მიმდინარეობისას კულტურული მემკვიდრეობის დაცვის კანონმდებლობის, გაცემული ნებართვის ან შეთანხმებული პროექტის პირობების დარღვევა; თუ ასეთი დარღვევა დადგენილია, გთხოვთ მოგვაწოდოთ: დარღვევის დადგენის თარიღი; შესაბამისი ადმინისტრაციული აქტის, ოქმის, დასკვნის ან სხვა დოკუმენტის ასლი; ინფორმაცია, რა სამართლებრივი რეაგირება განხორციელდა სააგენტოს მიერ;

რა სამართლებრივი წარმოება მიმდინარეობს ან განხორციელდა აღნიშნულ ფაქტთან დაკავშირებით; მიღებული გადაწყვეტილებებისა და გატარებული ღონისძიებების ამსახველი დოკუმენტაციის ასლები“- წერია განცხადებაში, რომლითაც აზა გაბუნიამ სააგენტოს მიმართა.

წერილში ასევე ნათქვამია, რომ სააგენტომ აცნობოს საზოგადოებას, შეესაბამება თუ არა ობიექტზე ამჟამად შესრულებული სამუშაო სააგენტოს მიერ შეთანხმებულ პროექტსა და ნებართვის პირობებს და თუ არა, რა ღონისძიებების განხორციელებას გეგმავს ან უკვე განახორციელა სააგენტომ დარღვევის აღმოსაფხვრელად.

კომპანია NEXT-მა მის საკუთრებაში არსებული კულტურული მემკვიდრეობის ძეგლი სააგენტოსთან შეთანხმების გარეშე გადაღება. როგორც კომპანიაში „ბათუმელებთან“ საუბარში განაცხადეს, ეს მხოლოდ ტესტი იყო.

თუმცა, როგორც სპეციალისტები ამბობენ, ძეგლის რეაბილიტაციის დროს ყველა მოქმედება უნდა იყოს შეთანხმებული ძეგლთა დაცვის სააგენტოსთან.

ამ თემაზე:

აჭარაში უძრავი ქონების პრივატიზაციის პროცესის ანალიზი ცხადყოფს, რომ სახელმწიფო ქონების გასხვისება ხშირ შემთხვევაში კონკურენციის გარეშე, მმართველ პარტიასთან დაკავშირებული პირების სასარგებლოდ მიმდინარეობს – აცხადებს ორგანიზაცია „საერთაშორისო გამჭვირვალობა – საქართველო“.

„გამჭვირვალობა“ წერს, რომ ამ პროცესის ფორმალურობასა და საეჭვო გარემოებებზე მიუთითებს თუნდაც ის ფაქტი, რომ ერთ-ერთი გამარჯვებული კომპანია – შპს „გოდე 2026“ – უშუალოდ აუქციონის მიმდინარეობისას, მის დასრულებამდე სულ რაღაც ერთი კვირით ადრე დაფუძნდა.

კვლევა – „გაყიდული აჭარა: როგორ ინაწილებენ უკონკურენტოდ რეგიონის ქონებას „ქართული ოცნების“ დონორები“ – „გამჭვირვალობამ“ დღეს, 9 სექტემბერს გამოაქვეყნა.

„საერთაშორისო გამჭვირვალობა – საქართველომ“ შეისწავლა 2025 წლის 1-ელი იანვრიდან დღემდე აჭარის ფინანსთა და ეკონომიკის სამინისტროს მიერ მოწყობილი ელექტრონული აუქციონები, რომელთა მიზანი აჭარის უძრავი ქონების პრივატიზაცია იყო. ამ პერიოდში სამინისტრომ სულ 69 ელექტრონული აუქციონი გამოაცხადა.

„კვლევის ძირითადი მიგნებები აჩვენებს შემდეგ მანკიერ კანონზომიერებებს:

უკონკურენტო პრივატიზაციის პრაქტიკა: 2025 წლის იანვრიდან გამოცხადებული 69 ელექტრონული აუქციონიდან 54 არ შედგა. შემდგარი 15 აუქციონიდან 8 შემთხვევაში კი ქონება სრულიად უკონკურენტოდ, საწყის ფასზე მინიმალური ბიჯით გასხვისდა.

პოლიტიკური კავშირები და ნეპოტიზმი: პრივილეგირებულ სუბიექტებს შორის ვხვდებით აჭარის მთავრობის თავმჯდომარის, ზურაბ პატარაძის მეგობარს (რომელმაც კურორტ გოდერძიზე მიწა მინიმალური, 3,300-ლარიანი ფასნამატით შეიძინა) და „ქართული ოცნებიდან“ ხელვაჩაურის საკრებულოს წევრ შოთა ფუტკარაძეს, რომელიც ბათუმის პორტის მიმდებარე ტერიტორიას დაეუფლა.

ფინანსური გარიგებები და სახელმწიფო ტენდერები: აღნიშნული კომპანიების მფლობელებსა და მათ ოჯახის წევრებს მმართველი პარტიისთვის ჯამში 1,387,000 ლარი აქვთ შეწირული. თავის მხრივ, აუქციონებში გამარჯვებულმა ორმა კომპანიამ სახელმწიფოსგან, ტენდერების გზით, დამატებით 59.5 მილიონზე მეტი ლარი მიიღო (მათ შორის, თითქმის 16 მილიონი – უკონკურენტოდ).

ამგვარი პრაქტიკის პირდაპირი შედეგი სახელმწიფო ბიუჯეტის მნიშვნელოვანი დანაკლისია. მაშინ, როდესაც მმართველი პარტიის ელიტა ქონებას მინიმალურ ფასად იფორმებს, აჭარის ბიუჯეტში დაგეგმილი 125 მილიონის ნაცვლად, გასხვისდა მხოლოდ 4.5 მილიონი ლარის უძრავი ქონება (გეგმის 3.6%)“ – წერს ორგანიზაცია.

კვლევაში აღნიშნულია, რომ ელექტრონულ აუქციონებში გამარჯვებული 2 კომპანიის წილის მფლობელები, დირექტორები და ოჯახის წევრები მმართველი პარტია „ქართული ოცნება – დემოკრატიული საქართველოს“ მსხვილი შემწირველები არიან – სხვადასხვა დროს მათ ჯამში 1,387,000 ლარი შესწირეს.

„მათ შორის 1-მა კომპანიამ (შპს „ნოვა) აუქციონი უკონკურენტოდ მოიგო, ხოლო მეორე კომპანიის დირექტორი და 50% წილის ბენეფიციარი მესაკუთრე, „ქართული ოცნებიდან“ ხელვაჩაურის საკრებულოს წევრი, შოთა ფუტკარაძეა. შოთა ფუტკარაძის მამა, ოთარ ფუტკარაძე, შპს „ბონდი 2009“-ის 25% წილის მფლობელი და „ქართული ოცნების“ მსხვილი შემწირველია. მათ სულ შეიძინეს 20,481 კვადრატული მეტრი ჯამური ფართობის 2 მიწის ნაკვეთი და 417.72 კვადრატული მეტრი ჯამური ფართობის 2 შენობა-ნაგებობა, რომლებიც კომერციულად მიმზიდველ ადგილზეა ბათუმში, ბაქოს ქუჩაზე, პორტის მიმდებარე ტერიტორიაზე და სამრეწველო ზონაში“ – წერს „გამჭვირვალობა“.

ორგანიზაცია აღნიშნავს იმასაც, რომ აუქციონებში გამარჯვებულმა 2 კომპანიამ (შპს „ნოვამ“ და შპს „ნიუ სთაილმა“) სახელმწიფო შესყიდვებიდან, დაფუძნებიდან დღემდე, ჯამში მიიღეს 59,540,688 ლარის შემოსავალი. მათ შორის, უკონკურენტოდ მოიგეს 15,862,903 ლარის ჯამური ღირებულების 50 ელექტრონული ტენდერი.

„არშემდგარი აუქციონების შედეგად ვერ შესრულდა შესაბამისი წლების აჭარის რესპუბლიკური ბიუჯეტის შემოსულობების გეგმა. კერძოდ, 2024 წელს უძრავი ქონების პრივატიზაციიდან დაგეგმილი იყო 112,650,000 ლარის შემოსავლის მიღება, ხოლო ფაქტობრივად მიიღეს  22,835,500 ლარი. 2025 წლის 9 თვეში დაგეგმილი იყო 125,055,555 ლარის უძრავი ქონების გასხვისება, რის ნაცვლად გასხვისდა 4,500,200 ლარის უძრავი ქონება ანუ გეგმის 3,6%“ – წერს „გამჭვირვალობა“.

14-დან 16 სექტემბრის ჩათვლით ბათუმში, „შერატონში“, ევროპული კონფერენცია ჩატარდება –  European Conference on Ethics and Integrity in Academia [ECEIA 2026] ეთიკისა და კეთილსინდისიერების შესახებ.

კონფერენციას ილიას სახელმწიფო უნივერსიტეტი და აკადემიური კეთილსინდისიერების ევროპული ასოციაცია [ENAI]  უმასპინძლებენ.

ილიას სახელმწიფო უნივერსიტეტის ინფორმაციით,  პროექტ ETHICS-ისადმი მიძღვნილ სესიებზე საერთაშორისო აკადემიური საზოგადოების წინაშე წარმოდგენილი იქნება ევროკომისიის მიერ დაფინანსებული ოთხწლიანი პროექტის „კვლევის პასუხისმგებლიანად წარმართვა – კვლევის კეთილსინდისიერება და ეთიკა ქართულ უნივერსიტეტებში [ETHICS]“ შედეგები.

პროექტის კოორდინატორია ილიას სახელმწიფო უნივერსიტეტი.

ღონისძიების მთავარი მიზანია საქართველოს უმაღლეს საგანმანათლებლო დაწესებულებებში კვლევის ეთიკისა და კეთილსინდისიერების კულტურის განვითარება, პასუხისმგებლობიანი კვლევის პრაქტიკის ხელშეწყობა და შესაბამისი ინსტიტუციური და საგანმანათლებლო მექანიზმების განვითარება.

კონფერენციის პროგრამის, რეგისტრაციისა და სხვა დეტალური ინფორმაციის გასაცნობად შეგიძლიათ ეწვიოთ ECEIA 2026-ის ოფიციალურ ვებგვერდს. 

შსს-ს ინფორმაციით, დიდი ოდენობით თანხის [1,5 მილიონი ლარის] თაღლითურად დაუფლების ბრალდებით ბათუმში ერთი პირი დააკავეს.

„ბრალდებული დიდი ოდენობით თანხის მართლსაწინააღმდეგოდ მისაკუთრების მიზნით, მოქალაქეებს ატყუებდა, რომ ოქროს ნაკეთობების ბიზნესში თანხის დაბანდების სანაცვლოდ მათ მიღებულ მოგებას გაუნაწილებდა.

ის თერთმეტი დაზარალებულისგან მოტყუებით დაეუფლა 707 975 ლარსა და 296 000 აშშ დოლარს, რამაც დიდი ოდენობით – 1 541 734 ლარის ზიანი გამოიწვია“ – წერს შსს.

გამოძიება სისხლის სამართლის კოდექსის 180-ე მუხლის მე-3 ნაწილით მიმდინარეობს, რაც 9 წლამდე ვადით თავისუფლების აღკვეთას ითვალისწინებს.

გონიოში ადგილი, სადაც ახალ საბავშვო ბაღს ააშენებენ, ცნობილია. გაურკვეველი რჩება ძველი ბაღის ადგილის საკითხი, სადაც შენობის რემონტი დაიწყეს, თუმცა სამუშაოები შეწყდა. იმ კომპანიის ხელმძღვანელები კი, ვინც თავის დროზე ამ ბაღის რემონტის ტენდერი მოიგო, დღეს პატიმრობაში არიან.

ერთი ხელშეკრულების ფარგლებში [Design-Build მეთოდით], გონიოში 200 ბავშვზე გათვლილი საბავშვო ბაღისთვის დეტალური საპროექტო დოკუმენტაციის კორექტირებისა და სამშენებლო სამუშაოების შესყიდვაზე საქართველოს მუნიციპალური განვითარების ფონდმა ახალი ტენდერი გამოაცხადა.

შესყიდვის სავარაუდო ღირებულება 8 021 640 ლარია. ტენდერში წინადადებების მიღება 2026 წლის 4 ოქტომბერს დაიწყება და 9 ოქტომბერს დასრულდება.

რაც შეეხება ახალი ბაღის მშენებლობას, ის ხელშეკრულების გაფორმებიდან 15 თვეში უნდა დასრულდეს. აქედან პირველი 3 თვე პროექტის კორექტირებისთვისაა საჭირო [ფონდი ბაღების მშენებლობაზე ტენდერს ტიპიური პროექტებით აცხადებს, რომელიც გამარჯვებულმა კონკრეტულ ლოკაციას უნდა მოარგოს].

გონიოში საბავშვო ბაღის შენობა, რომელიც უნდა გაერემონტებინათ, პეტრე იბერის N 1-ში მდებარეობს. ახალი ბაღი კი, აფსაროსის II ჩიხის, N5ა-ში უნდა ააშენონ. არსებული და ასაშენებელი ბაღების ადგილებს შორის დაშორება დაახლოებით 2 კილომეტრია.

რაც შეეხება არსებული [ფაქტობრივად უკვე ყოფილი] საბავშვო ბაღის ტერიტორიას, მისი ფართობი 1011 კვადრატული მეტრია და ის ამ დროისთვის კვლავ ბათუმის მუნიციპალიტეტის საკუთრებაშია.

გონიოში, პეტრე იბერის პირველში, #29-ე საბავშვო ბაღის შენობის სარემონტო სამუშაოებზე გამოცხადებულ ტენდერში გამარჯვებულმა კომპანიამ, რომელსაც ამ ბაღთან ერთად კიდევ ორი საბავშვო ბაღის სარემონტო სამუშაოები დაუკვეთეს, 1 მილიონ 523 373 ლარი მიიღო, თუმცა სამუშაოები არ შეუსრულებია.

2025 წელს კომპანიას ხელშეკრულება შეუწყვიტეს.

ბათუმის 29-ე და კიდევ ორი საბავშვო ბაღის სარემონტო სამუშაოებზე ხელშეკრულება მუნიციპალური განვითარების ფონდმა 2023 წელს გააფორმა შპს „ლაგი კაპიტალთან“. ხელშეკრულების ღირებულება 12 მილიონ 190 000 ლარი იყო, პრეისკურანტი – 1 მილიონ 775 269 ლარი, დღგ-ს გარეშე.

დღეს ამ კომპანიის მფლობელები პატიმრობაში არიან.

ბათუმის მერიაში ამბობდნენ, რომ შენობა უსაფრთხო არ იყო და ახალი უნდა ააშენონ, ოღონდ არა ამ ადგილზე. მერიაში არ გვეუბნებოდნენ, სად აპირებდნენ ტერიტორიის გამოყოფას ახალი ბაღისთვის.

___

ვრცლად ამ თემაზე

სურსათის ეროვნული სააგენტოს ცნობით, ხელვაჩაურში, სოფელ ახალსოფელში მდებარე რესტორანში, რომელიც შპს „უმუთს“ ეკუთვნის, განმეორებით დააფიქსირეს ვადაგასული საქონლის ხორცი, ეტიკეტირების წესის დარღვევა და არაკრიტიკული შეუსაბამობები.

სააგენტოს ცნობით, ბიზნესოპერატორი 3000 ლარით დაჯარიმდა.

ასევე, კრიტიკული შეუსაბამობების გამო საწარმოო პროცესი შეუჩერდა სამ კვებით დაწესებულებას ბათუმში: კაფე-ბარ „იემენს“, რუსთაველის #61-ში; „მამას რესტორანს“ აეროპორტის გზატკეცილზე, სადაც, სააგენტოს ცნობით, დარღვეული იყო ჰიგიენური ნორმები და ასევე, სურსათის შესახებ ინფორმაციის მიწოდების წესის გამო – შპს ,,ჩუქუროვა ლეზზეთს“ – აეროპორტის გზატკეცილი 300 ა, სადაც, „სხვა დარღვევებთან ერთად დაფიქსირდა ცხვრის ხორცი ჯანმრთელობის ნიშანდების გარეშე“.

ბათუმში, თამარის დასახლებაში მდებარე პლაჟზე სამუშაოები მიმდინარეობს. ნაპირსა და ზღვას შორის რკინის შუნტებით დამცავი ჯებირი და გზაა მოწყობილი.

ადგილზე „ბათუმელებს“ უთხრეს, რომ ამ ადგილიდან მახინჯაურის სარკინიგზო გვირაბამდე მონაკვეთში, ზღვის გასწვრივ, სავარაუდოდ, ავტომაგისტრალს აფართოებენ.

სამუშაოები აქ 29-მილიონიანი ტენდერის ფარგლებში მიმდინარეობს, რომელიც თამარ მეფის გამზირის რეაბილიტაციას ითვალისწინებს. ტენდერში გამარჯვებულია „ოცნების“ პარლამენტარ გიორგი ჭყონიას ყოფილი კომპანია „გზა“.

„გზასთან“ ხელშეკრულება ბათუმის მერიის ინფრასტრუქტურისა და კეთილმოწყობის სამმართველომ 2026 წლის 13 მარტს გააფორმა. აქედან დაახლოებით სამ თვეში კი გიორგი ჭყონიამ „გზას“ ასივე პროცენტი წილი საკუთარი შვილების კუთვნილ კომპანიას „ჯი აი კაპიტალს“ მიჰყიდა.

რა სამუშაოები მიმდინარეობს პლაჟზე და ითვალისწინებს თუ არა პროექტი გზის გაფართოებას ზღვის მხარეს? ამასთან, დარჩება თუ არა პლაჟის ის ვიწრო ზოლი, რაც დღეს აქ არის, პროექტის დასრულების შემდეგ? – ამ კითხვებით „ბათუმელები“ მერიის სამმართველოს დაუკავშირდა.

სამმართველოს ინფორმაციით, გათვალისწინებულია ნაპირსამაგრი კედლების მოწყობა, თუმცა არა პლაჟის ხარჯზე.

„აღნიშნული სარემონტო სამუშაოები ხორციელდება საავტომობილო გზის გაფართოების მიზნით, ხოლო ნაპირსამაგრი კედლების მოწყობა გათვალისწინებულია გზის მიმდებარე ტერიტორიაზე.

რაც შეეხება ტერიტორიაზე უკვე დამონტაჟებულ ლითონის შპუნტებს, ეს კონსტრუქციები დროებითია და მათი გამოყენება განპირობებულია დროებითი გზისა და სამშენებლო ტექნიკის უსაფრთხო გადაადგილებისათვის“. – მოგვწერეს ბათუმის მერიის საქალაქო ინფრასტრუქტურისა და კეთილმოწყობის სამმართველოდან.

პროექტის ხარჯთაღრიცხვის დოკუმენტის მიხედვით, გათვალისწინებულია „ნაპირდამცავი ბეტონის კედლისა და პლაჟზე ჩასასვლელი კიბეების მოწყობა. კედლისა და კიბეების დასაცავად ლითონის 9 მეტრი სიგრძის შპუნტების მოწყობა. ნაპირდამცავი რკინა-ბეტონის კედლის ფარგლებში რკინა-ბეტონის გამათანაბრებელი სარტყელის მოწყობა შპუნტების თავზე ბეტონით B30“. მოეწყობა ლითონის მოაჯირებიც.

„აღნიშნულ მონაკვეთზე შენარჩუნდება არსებული პლაჟი, რომელზეც გათვალისწინებულია ჩასასვლელების მოწყობა და რომლებიც სრულად იქნება ადაპტირებული შეზღუდული შესაძლებლობის მქონე პირთათვის“ – მოგვწერეს მერიის სამმართველოდან.

ბათუმში, ბაქოს ქუჩის, ოდისეი დიმიტრიადის ქუჩისა და თამარ მეფის გამზირის რეაბილიტაცია თბილისის ქუჩის დასაწყისამდე – მრავალმილიონიანი პროექტია. ამ პროექტის პირველი მონაკვეთის სამუშაოებზე გამოცხადებულ ტენდერშია „გზა“ გამარჯვებული.

I მონაკვეთი, როგორც პროექტშია აღნიშნული, მოიცავს თამარ მეფის გამზირს – თამარის დასახლებიდან [კულტურის ცენტრის შენობიდან] მწვანე კონცხამდე [თბილისის ქუჩის დასაწყისამდე].

საქალაქო ინფრასტრუქტურისა და კეთილმოწყობის სამმართველოსა და შპს „გზას“ შორის ხელშეკრულება 29 163 899 ლარზეა გაფორმებული. ხელშეკრულების მიხედვით, პირველ მონაკვეთში სამუშაოები 2027 წლის 10 დეკემბრის ჩათვლით პერიოდში უნდა დასრულდეს.

შესყიდვების პორტალის მიხედვით, ამ დროისთვის შპს „გზისთვის“ ქალაქის ბიუჯეტიდან ავანსად უკვე გადარიცხულია 8 749 168 ლარი.

შპს „გზას“ ივნისის თვეში კობახიძის განკარგულებით დაბა ქედაში 19 500 კუბური მეტრი ქვიშა-ხრეშის ულიცენზიოდ მოპოვების უფლებაც მისცეს.

მიმდინარე პროექტის ფარგლებში, ამ ტერიტორიაზე უკვე აიღეს ბარაკული ტიპის სახლები, რომლებიც ავტომაგისტრალსა და სარკინიგზო ხაზს შორის იყო.

ავტომაგისტრალის მეორე [ზღვის] მხარეს კი ერთ და ორსართულიან სახლებს კერძო კომპანია ანგრევს. ამ ადგილზე და ე.წ. ძველი 12-სართულიანების მიმდებარედ კი „ოცნების“ დეპუტატები და მათი პარტნიორები 6 ცათამბჯენის აშენებას გეგმავენ.

მერიის საქალაქო ინფრასტრუქტურისა და კეთილმოწყობის სამმართველოს თამარ მეფის გამზირის [I მონაკვეთის] რეაბილიტაციაზე ტენდერი 29 548 035 ლარით ჰქონდა გამოცხადებული.

ამ თემაზე ვრცლად:

ბათუმში, კოსტავასა და გამსახურდიას ქუჩების კვეთაში არსებული ეროვნული მნიშვნელობის კულტურული ძეგლის სტატუსის მქონე, მოდერნის სტილის შენობა, კომპანია Next-მა იყიდა. ამის შესახებ ინფორმაცია „ბათუმელებს“ თავად კომპანიაში დაუდასტურეს. მანამდე, შენობას „სოდი ინვესტმენტი“ ფლობდა, რომლის დირექტორიც თავდაცვის ყოფილი მინისტრი, ირაკლი ალასანიაა.

„ნექსთის“ იურისტი, ვახტანგ გედენიძე „ბათუმელებთან“ ამბობს, რომ ძეგლი „სოდი ინვესტმენთისგან“ 2025 წლის 26 სექტემბერს იყიდეს.

რამდენად შეიძინეს აღნიშნული შენობა, ამაზე იურისტი არ საუბრობს. „ეს კომერციული საიდუმლოებაა“, – გვითხრა ვახტანგ გედენიძემ.

ახალი მეპატრონის შესახებ ინფორმაცია საჯარო რეესტრში ჯერ ასახული არ არის.

რატომ არ აისახა ახალი მფლობელი რეესტრში? – ვკითხეთ ვახტანგ გედენიძეს. მისი თქმით, ახალი მფლობელი თანხის სრულად გადახდის შემდეგ აისახება.

„წინარე ნასყიდობაა, ამიტომ ვერ ნახავდით რეესტრში. ეს იმას ნიშნავს, სანამ შესყიდული ქონების საფასურს სრულად არ გადაიხდი, ქონება ახალი მფლობელის სახელზე არ გადმოდის. ანუ, ოფიციალურად ეს შენობა ჯერ არ არის Next-ის საკუთრებაში“, – გვითხრა ვახტანგ გედენიძემ.

ორი დღის წინ მე-19 საუკუნის მოდერნის სტილის ძეგლის ფასადი კომპანიის წარმომადგენლებმა ფერადი საღებავით გადაღებეს. სახლის ფასადზე გამოსახული ორნამენტები ფირუზისფერ და ფორთოხლისფერ ფერებში იყო გადაწყვეტილი, რასაც საზოგადოების მხრიდან მძაფრი კრიტიკა მოჰყვა.

მსგავსი ფერები არ ახასიათებს არსებულ შენობას. ბუნებრივია, გაჩნდა კითხვები, თუ ვისი გადაწყვეტილებით შეიღება ამ ფერებში ორნამენტები, რატომ შეიღება და იყო თუ არა ეს ძეგლის ხელყოფა?

„ბათუმელებს“ აჭარის კულტურული მემკვიდრეობის დაცვის სააგენტოში უთხრეს, რომ შენობის ფასადის ამ ფერებში შეღებვა არ იყო მათთან შეთანხმებული.

ვინ და რატომ გადაწყვიტა ფასადის გადაღებვა და რატომ არ შეათანხმა ეს გადაწყვეტილება სააგენტოსთან? – ვკითხეთ ვახტანგ გედენიძეს.

„ეს იყო ტესტი, რომ გაგვეგო, თუ როგორ დაჯდებოდა ფერი ფასადზე. რაღაც ფერზე ხომ უნდა შეიღებოს და პროცესში შეგვიძლია ამის დატესტვა. ამ პროცესსაც სააგენტო ლამის ყოველკვირეულად მონიტორინგს უკეთებს და სურვილიც რომ გვქონდეს, ვერ გადავუხვევთ“, – გვითხრა გედენიძემ.

რატომ განაცხადა სააგენტომ, რომ მასთან არ იყო შეთანხმებული ფასადის გადაღებვა, თუკი მონიტორინგს უწევს? – ისევ ვკითხეთ გედენიძეს.

„ზუსტად ერთი დღე გამოვიყენეთ ტესტისთვის და შემდგომ ისევ გადავღებეთ. ეს იყო და ეს. საცდელი იყო, ასე ვთქვათ, რამდენიმე ფერი დავსვით, რომ შეგვეხედა რომელი ფერი რომელ დეტალს უფრო მოუხდებოდა.

საზოგადოებისთვის არ შეგვიღებავს, ჩვენთვის შევღებეთ, რომ დაგვენახა, როგორ დაჯდებოდა ფერი. ასე დატოვების სურვილი არ გვქონია. ფერის ცვლილება რთული პროცესია და თუ რაიმე ცვლილება შევა, ყველა პროცედურის გავლით მოხდება.

თუ დავაპირებთ ფერის ცვლილებას, მივმართავთ სააგენტოს ცვლილების შესათანხმებლად.

თუ გადავწყვეტთ რაღაც ფერის დატოვებას რომელიმე ორნამენტზე, ეს გაეგზავნება ხელოვნებათმცოდნეს, რომელიც ჩაატარებს კვლევას და თუ დადებითი იქნებოდა პასუხი, მერე მივმართავდით ძეგლთა დაცვას“, – ამბობს ვახტანგ გედენიძე.

გუშინ, 6 სექტემბერს, ნექსთმა შეღებილი ძეგლი ისევ გადაღება.

კომპანიის წარმომადგენელს ვკითხეთ, რა ვადებია გათვალისწინებული შენობის საბოლოო დასრულებისთვის, რადგან შენობა უკვე რამდენიმე წელია ხარაჩოებშია, რაზეც გედენიძემ გვითხრა, რომ კონკრეტული ვადები ზეპირად არ ახსოვს.

ხელოვნური კუნძულის მშენებლობისთვის კომპანია „ამბასადორი ბათუმი აილენდი“ სასარგებლო წიაღისეულის მოპოვების ლიცენზიისგან „ოცნების“ მთავრობამ კიდევ ერთხელ გაათავისუფლა.

„ამბასადორი“ ამჯერად ულიცენზიოდ 980 490 კუბურ მეტრ  წიაღისეულს კვლავ ქობულეთის სოფელ კვირიკეს ტერიტორიაზე მოიპოვებს. კომპანია წიაღისეულს ულიცენზიოდ კვირიკეში აქამდეც მოიპოვებდა, რისთვისაც აქ მთა დაშალეს.

ამ თემაზე: კობახიძის განკარგულებით კვირიკეში მთას შლიან – წიაღისეულს ხელოვნური კუნძულისთვის იყენებენ

ახალი განკარგულებით, იმ ტერიტორიის ფართობი, სადაც „ამბასადორს“ წიაღისეულის მოპოვების ნებართვა მისცეს, 14 ჰექტარია [140 070 კვადრატული მეტრი].

„სახელმწიფოებრივი და საზოგადოებრივი ინტერესების გათვალისწინებით, ქალაქ ბათუმში, ოდისეი დიმიტრიადის ქუჩის მიმდებარედ, შავი ზღვის აკვატორიაში ხელოვნური კუნძულის/ნახევარკუნძულის მოწყობის მიზნით, შპს „ამბასადორი ბათუმი აილენდი“ 12 თვის ვადით გათავისუფლდეს სასარგებლო წიაღისეულის მოპოვების ლიცენზიისაგან და მიეცეს უფლება, მოიპოვოს 980 490 კუბური მეტრი სასარგებლო წიაღისეული [ანდეზიტ-ბაზალტები და ტუფობრექჩიები] ქობულეთის მუნიციპალიტეტის, კვირიკეს ადმინისტრაციული ერთეულის ტერიტორიაზე“, – წერია 2026 წლის 20 აგვისტოს განკარგულებაში, რომელსაც ხელს ირაკლი კობახიძე აწერს.

ამავე განკარგულების მიხედვით, ლიცენზიისაგან გათავისუფლებული „ამბასადორი“ ვალდებულია:

• უზრუნველყოს მინერალური რესურსების ეროვნული სააგენტოს შესაბამისი გეოსაინფორმაციო პაკეტითა და სახელმწიფო ქონების ეროვნული სააგენტოს მიერ განსაზღვრული პირობების შესრულება;
• მოპოვებული სასარგებლო წიაღისეული გამოიყენოს მხოლოდ ხელოვნური კუნძულის მშენებლობისთვის;
• სასარგებლო წიაღისეულის მოპოვების ლიცენზიისაგან გათავისუფლებისთვის, ერთი თვის ვადაში, საქართველოს სახელმწიფო ბიუჯეტში უზრუნველყოს 238 728 ლარის გადახდა.

ბათუმში ხელოვნური კუნძულის მშენებლობისთვის ქობულეთის სოფელ კვირიკეში მთა დაშალეს:

„ამბასადორი ბათუმი აილენდი“ ხრეშს, ქვებსა  და ლოდებს აჭარაში სხვა ადგილებშიც მოიპოვებს, თითქმის ყველა შემთხვევაში – ულიცენზიოდ. ლიცენზიისგან კი მას „ოცნების“ მთავრობა ათავისუფლებს განკარგულებებით, რომლებსაც ხელს ირაკლი კობახიძე აწერს.

არასამთავრობო ორგანიზაცია „მწვანე ალტერნატივას“ ანალიტიკოსი ქეთი გუჯარაიძე „ბათუმელებთან“ ამბობს, რომ ყველა ეს განკარგულება უკანონოა. აქედან გამომდინარე კი, შეიძლება ვთქვათ, რომ უკანონო განკარგულების საფუძველზე წიაღისეულის მოპოვებაც უკანონოა.

„პრობლემა იმაშია, რომ ლიცენზიისგან გათავისუფლების მექანიზმს, რომელსაც მთავრობის ის დადგენილება გვთავაზობს, რომელიც ლიცენზირების საკითხებს არეგულირებს [ვგულისხმობ 2005 წლის N136 დადგენილებას], საერთოდ არ ცნობს ზემდგომი აქტები. ამ შემთხვევაში ეს არის „ლიცენზიებისა და ნებართვების შესახებ“ და „წიაღის შესახებ“ კანონები“, – ამბობს ქეთი გუჯარაიძე.

ამ თემაზე ვრცლად:

ქუთაისის საქალაქო სასამართლომ  „კანონიერი ქურდების საქმე“ განიხილა და  ცხრა პირი დამნაშავედ ცნო.

პროკურატურა წერს, რომ სასამართლო პროცესზე მტკიცებულებებით დადგინდა, რომ „ქურდული სამყაროს“ წევრს კონფლიქტური ურთიერთობა ჰქონდა „ქურდული სამყაროს“ სხვა წევრთან, რის გამოც ამ უკანასკნელმა პირადი მოტივით სცემა მას.

საბოლოოდ დაპირისპირებულმა მხარეებმა ,,კანონიერ ქურდს“ მიმართეს, ვისი ჩართულობითაც „ქურდული სამყაროს“ წევრების შეკრება მოეწყო და „ქურდული გარჩევა“ განხორციელდა.

პროკურატურის ვერსიით, „ქურდული სამყაროს საქმიანობის მხარდამჭერები“ ფინანსურ ვალდებულებებს არ ასრულებდნენ, ამიტომაც „ქურდული სამყაროს“ წევრმა ,,ქურდული გარჩევა“ მოაწყო და სცემა მათ.

ამის შემდეგ „ქურდული სამყაროს საქმიანობის მხარდამჭერებმა“ სოციალური ქსელის გამოყენებით დასახმარებლად მიმართეს „კანონიერ ქურდს“, რომელმაც კონფლიქტის მონაწილეები დაიბარა თურქეთში, სადაც შედგა ქურდული შეკრება და ქურდული გარჩევა.

ასევე, „კანონიერი ქურდის“ ძმამ ქუთაისში დაიბარა და ანგარიშსწორება მოუწყო ერთ-ერთ ,,ქურდული სამყაროს წარმომადგენელს“, ვინაიდან ეს უკანასკნელი თავს შეურაცხყოფილად მიიჩნევდა, მან დასახმარებლად და გადაწყვეტილების მისაღებად „ქურდული სამყაროს“ სხვა აქტიურ წევრს და კრიმინალურ ავტორიტეტს მიმართა, უამბო დაპირისპირების მოტივები და დეტალები, რომელმაც, თავის მხრივ, სოციალური ქსელის საშუალებით საქმის კურსში ჩააყენა მასთან დანაშაულებრივ კავშირში მყოფი „კანონიერი ქურდი“.

ქუთაისის საქალაქო სასამართლომ ბრალდებულები სრულად ცნო დამნაშავედ წარდგენილ ბრალდებებში და სასჯელის ზომად „კანონიერ ქურდს“ 10 წლით, ,,ქურდული სამყაროს წევრობის”, „ქურდული სამყაროს საქმიანობის მხარდაჭერის”, „ქურდულ შეკრებაში“ მონაწილეობის ფაქტებზე შვიდ ბრალდებულს 8-8 წლით, ხოლო „კანონიერი ქურდისთვის და ქურდული სამყაროს წევრზე მიმართვის“ ფაქტზე ბრალდებულს 4 წლით თავისუფლების აღკვეთა განუსაზღვრა.

_______________

ფოტო არქივიდან

ავტორი: ანა კალანდაძე, ვაშინგტონი

___

დასავლელი უსაფრთხოების ექსპერტები აფრთხილებენ, რომ მაშინ, როცა ჩრდილოატლანტიკურ ალიანსს პირდაპირი სამხედრო აგრესიის მოგერიება სრულად შეუძლია, ის ვერ აჩერებს ვლადიმირ პუტინის მზარდ „ჩრდილოვან ომს“. შედეგად, ბალტიისპირეთის ქვეყნები კრემლის მორიგი გამოცდის მთავარ სამიზნედ რჩებიან.

„ატლანტიკური საბჭოს“ მიერ ორგანიზებულ ონლაინ-დისკუსიაზე, რომელსაც ყოფილი ელჩი უკრაინაში ჯონ ჰერბსტი უძღვებოდა, წამყვანმა ანალიტიკოსებმა აღნიშნეს, რომ აშშ-ის ცენტრალური სადაზვერვო სააგენტოს დირექტორის, ჯონ რეტკლიფის ბოლოდროინდელი ვიზიტი მოსკოვში მკაფიო სიგნალია: კრემლი დასავლეთის გამძლეობასა და მზადყოფნას აქტიურად ამოწმებს.

• გამოცდა ბალტიის საზღვარზე

„დემოკრატიის განახლების ინიციატივის“ თავმჯდომარემ და ჭადრაკში მსოფლიოს ყოფილმა ჩემპიონმა, გარი კასპაროვმა ხაზგასმით აღნიშნა, რომ მოსკოვს დასავლეთის ერთიანობის გასატეხად სრულმასშტაბიანი სახმელეთო შეჭრა სულაც არ სჭირდება – ამისთვის მცირე, მიზანმიმართული ტერიტორიული პროვოკაციაც საკმარისი იქნება.

„ორი კვადრატული მილი ტერიტორია… დარჩნენ იქ ორი დღე,“ – თქვა კასპაროვმა ისეთ სასაზღვრო ქალაქებზე მითითებით, როგორიცაა ნარვა ან დაუგავპილსი – „მას მხოლოდ იმის ჩვენება სჭირდება, რომ ნატო მკვდარია, ამერიკა პროცესში არ ერევა და ეს უკვე პოლიტიკური გამარჯვებაა.“

კასპაროვმა ასევე ეჭვქვეშ დააყენა ვაშინგტონის უსაფრთხოების გარანტიების სიმტკიცე: „მთავარი კითხვა ისაა, თუ რატომ აქვთ რუსეთის მოსაზღვრე ევროპელ მოკავშირეებს სერიოზული ეჭვები ამერიკის სამხედრო ერთგულებაზე იმ შემთხვევაში, თუ რუსეთი, თუნდაც მცირე ჯგუფებით, ნატოს სახმელეთო საზღვარს გადაკვეთს.“

CIA-ს ყოფილმა მაღალჩინოსანმა, გლენ კორნმა აღნიშნა, რომ კიევი ჩრდილოეთის ფრონტის გახსნის საფრთხეზე დასავლეთს უკვე დიდი ხანია აფრთხილებს: „უკრაინელები ამის შესახებ სულ მცირე ექვსი თვეა გვაფრთხილებენ… რომ არსებობს შეშფოთება ახალი ფრონტის გახსნაზე, და ისინი პირდაპირ საუბრობენ ბალტიისპირეთზე.“

• ტრამპის ფაქტორი და პუტინის პარტნიორები

მიუხედავად ამისა, კორნის შეფასებით, პუტინის მხრიდან ვაშინგტონში არსებული პოლიტიკური უთანხმოების სისუსტედ აღქმა სახიფათო შეცდომა იქნებოდა, რასაც დონალდ ტრამპის პირველი საპრეზიდენტო ვადის გამოცდილებაც მოწმობს.

„არ შეცდეთ პრეზიდენტ ტრამპთან დაკავშირებით. ის ძალიან არაპროგნოზირებადია,“ – განაცხადა კორნმა. – „მე მინახავს, როგორ დგამდა ის ნაბიჯებს რუსების წინააღმდეგ… ადრეც მითქვამს: ის ყველაზე აგრესიულად პასუხობდა რუსეთის გარკვეულ ქმედებებს იმ პრეზიდენტებს შორის, ვის ადმინისტრაციაშიც ჩემი კარიერის განმავლობაში მიმუშავია“.

„ატლანტიკური საბჭოს“ ევრაზიის ცენტრის უფროსმა მკვლევარმა, აგნია გრიგასმა დაამატა, რომ აშშ-ის ადმინისტრაცია უკვე ზეწოლას ახდენს მოსკოვის საერთაშორისო პარტნიორებზე: „უბრალოდ აღვნიშნავდი, რომ ტრამპის ადმინისტრაცია პუტინის მოკავშირეებს უტევს. ნუ დავივიწყებთ ამას – ირანსა და მადუროს.“

• გეოგრაფია და „ჩრდილოვანი ომი“

გრიგასის თქმით, ბალტიის ქვეყნების გეოგრაფიული მდებარეობა – როდესაც რეგიონი კალინინგრადს, ბელარუსსა და სუვალკის დერეფანს შორის არის მოქცეული – მას განსაკუთრებით დაუცველს ხდის. მისივე განცხადებით, ლიეტუვა უკვე გახდა ჰიბრიდული ტაქტიკის სამიზნე, რაც მიგრანტების იარაღად გამოყენებაში, ინფრასტრუქტურულ დივერსიებსა და საჰაერო სივრცის მუდმივ დარღვევებში გამოიხატება.

„ბალტიისპირეთში ეს შეშფოთება, რა თქმა უნდა, ყველაზე დიდია,“ – აღნიშნა გრიგასმა. -„ისინი განსაკუთრებით მოწყვლადნი არიან გეოგრაფიის გამო… ეს კრიზისი გრძელდება და ის რეგიონში რეალურ პოლიტიკურ და ფსიქოლოგიურ კრიზისს წარმოადგენს.“

დისკუსია ატლანტიკური საბჭოს სკოუკროფტის ცენტრის ექსპერტმა, ტორი ტაუსიგმა შეაჯამა და ხაზი გაუსვა, რომ ნატომ გადამწყვეტი ზომები უნდა მიიღოს, სანამ ჰიბრიდული შეტევები სრულმასშტაბიან კონფლიქტში გადაიზრდება.

„ნატო რუსეთთან ბევრი თვალსაზრისით უკვე ომშია; ეს, უბრალოდ, მე-5 მუხლის რეაგირების ზღვარს ქვემოთ ხდება,“ – განაცხადა ტაუსიგმა. – „ჰიბრიდულ ფრონტზე ვფიქრობ, ნატომ აჩვენა, რომ შეკავების პოლიტიკამ მარცხი განიცადა.“