გოდორის, გიდელის, ჭიპონის, სალამურს ოსტატები
გიორგი აბულაძემ პროექტის მონაწილე ქედელ ხელოვანებს პროექტის მიზანი, სამომავლო გეგმები გააცნო და ხელოვნების სფეროში შეტანილი წვლილისთვის ორგანიზაციის სახელით მადლობის ბარათები გადასცა.
გიორგი აბულაძე ამბობს, რომ ის დარგები, რომლებიც უხუცესებმა ჩვენამდე მოიტანეს, მალე შესაძლოა დავიწყებას მიეცეს, მცირედი ყურადღების მიქცევა კი ძალიან მნიშვნელოვანი და სტიმულის მიმცემია.
„არაერთი ხალხური რეწვის ოსტატი გვყავს, რომლებიც ეროვნულ საქმეს აკეთებენ, ჩვენამდე მათ მოიტანეს ის საქმე. სამწუხაროა ის ფაქტი, რომ ვისთანაც ვიყავი, უმრავლესობა მათი შთამომავლებისა: შვილები, შვილიშვილები არ ხელობენ, არ არიან დაინტერესებული, რაც გვაფიქრებინებს, რომ წლების შემდეგ სალამურის, ჭიპონის, ასევე სხვადასხვა საკრავისა თუ სასოფლო მოხმარების ნივთების კეთების ისტორია დავიწყებას მიეცემა“.
გიორგი აბულაძის ინფორმაციით, ქედაში დაახლოებით 40 ხელოვანია – მხატვრები, ბადის, გოდორისა და გიდლის მქსოველები, ჭიპონის, სალამურის, ფანდურის და სხვადასხვა მუსიკალური საკრავის ოსტატები.
„პროექტის ფარგლებში ქედაში ქუჩის ბიბლიოთეკის მოწყობას ვგეგმავ, მაგრამ შესაძლებელია იდეა შეიცვალოს“, – აცხადებს გიორგი აბულაძე.
CAUCULT-ის (კავკასიის კულტურულ ინიციატივათა ქსელი) მიზანია ხელი შეუწყოს სხვადასხვა კულტურულ ინიციატივას საქართველოს, აზერბაიჯანისა და სომხეთის რეგიონებსა და ქალაქებში. პროექტი დაფინანსებულია ევროკავშირის მიერ აღმოსავლეთ პარტნიორობის კულტურის პროგრამი _ „EuroEast Culture ხიდების მშენებლობა კულტურის მეშვეობით“ _ ფარგლებში.
შშმ პირები ბათუმის მერიას მიმართავენ
ამ მიზნით არასამთავრობო ორგანიზაცია „შშმ პირთა უფლებებისათვის“ ხელმძღვანელმა თაზო მჟავანაძემ დღეს ბრიფინგი გამართა და მუნიციპალური ტრანსპორტით უფასო მგზავრობა მოითხოვა.
მისივე განმარტებით, ბათუმის მერია მხოლოდ უსინათლო ადამიანებს უფინანსებს გაზიფიცირების 90-პროცენტს, მჟავანაძე კი მერიას მიმართავს, რომ გაზიფიცირების 30-პროცენტი თანადაფინანსება პირველი ჯგუფის შეზღუდული შესაძლებლობის მქონე პირებსაც გაუწიონ.
დეპრესია სტუდენტის ხედვით
დასაწყისისთვის აღვნიშნოთ, რომ დეპრესია აფექტური სინდრომია, რომელიც ხასიათდება უგუნებობით, აზროვნებისა და მოძრაობის შენელებით, რომელიც ახლავს ყველა ფსიქიკურ დაავადებას. საჭიროა განვასხვავოთ ნორმალური და პათოლოგიური შემთხვევები. ნორმალური ან პერიოდული დეპრესიული მდგომარეობის დროს ადამიანებს აერთიანებთ დარდისა და წუხილის გრძნობა. პათოლოგიურს კი მიეკუთვნება დეპრესია და მელანქოლია. ამ ყველაფერს კი, საერთო ჯამში, იწვევს სულიერი ტკივილი, ვინმეს, ან რაიმე მნიშვნელოვანის დაკარგის გრძნობა, სიყვარულისა და პირადი ცხოვრების არქონა, როგორც გარეგანი, ასევე შინაგანი გრძნობების ერთმანეთთან შერწყმის დანაკლისი. განსხვავება ისაა, თუ როგორ ძალუძთ ადამიანებს მათ თავს დამტყდარ პრობლემებთან გამკლავება, დაუბრუნდებიან თუ არა გარესამყაროს და თავს მისი მთლიანობის ნაწილად განიხილავენ, რა ხანგრძლივობა ექნება დეპრესიულ მდგომარეობას.
არსებობენ ადამიანები, რომლებიც ბავშვობიდანვე მოწყენილები არიან, არ სწამთ გარესამყაროს, გარშემომყოფი ადამიანებისა და საკუთარი თავისაც კი. ფიქრობენ, რომ ცუდები არიან და არ იმსახურებენ სიყვარულს. სწორედ ეს არის დეპრესია – მათი ჩვეული მდგომარეობა, რომლის არარსებობაც წარმოუდგენლად მიაჩნიათ. საკუთარი თავისა (თვითპერცეფცია) და გარესამყაროს ასეთი აღქმის მიზეზი ადრეულ ასაკში უნდა ვეძებოთ, კერძოდ, დედის ან მისი შემცვლელი, მზრუნველი ადამიანის ქცევაში. როგორც ჩანს, შფოთვისა და დაძაბულობის სიტუაციებში ეს ადამიანი ვერ რეაგირებდა ბავშვის მოთხოვნილებებზე დროულად და ადეკვატურად, მაშინ, როდესაც ბავშვისთვის დედა მთელ სამყაროს წარმოადგენს, ის მისთვის ყველაფერია, როგორც ემოციონალურ, ასევე ფიზიკურ კონტექსტში, მიღებულია სანდო პიროვნებად, ასეთი არასრულყოფილი გამოცდილების შემთხვევაში ბავშვს ექმნება წარმოდგენა, რომ მის ირგვლივ ყველაფერი სასტიკია, რისი ნდობაც არ შეიძლება, მას ვერ გაუგებენ და ამ ყველაფერთან ერთად ბავშვი ფიქრობს, რომ არც თვითონ არის სიყვარულის, სითბოსა და მზუნველობის ღირსი. ამგვარი დეპრესიული მდგომარეობის კიდევ ერთ წყაროდ ითვლება ფრუსტრაცია (იმედგაცრუება, რომელიც ტკივილს აყენებს). ბავშვი ვერ ბედავს დედის მიმართ გამოხატოს საკუთარი გრძნობები, რადგან ფიქრობს რომ აწყენინებს მას და ამით დაკარგავს მზრუნველ ადამიანს, მას განუდგებიან და აღარ ეყვარებათ, შესაბამისად, ის აღარ გამოხატავს თავის ემოციონალურ მდგომარეობას და მთელს ბრაზსა და სიძულვილს შინაგანად ავლენს, მიმართავს საკუთარ თავზე, რის შედეგადაც იგი ცუდ პიროვნებად აღიქმება.
თუ ბავშვი რეალურად კარგავს საყვარელ ადამიანს, მშობელს, განქორწინებისა თუ სიკვდილის შემთხვევაში, პირველ რიგში, იგი საკუთარ თავს არწმუნებს, რომ ყველაფერში დამნაშავე სწორედ თვითონ არის, რადგან არასაკმარისად კარგი იყო, რაღაც ცუდი ჩაიდინა. სწორედ ამიტომ, უმჯობესია ამ საკითხის განხილვა ბავშვთან, მიუხედავად მისი ასაკისა, რადგან წინააღმდეგ შემთხვევაში იგი თვითონ გამოიტანს არასწორ დასკვნებს, რაც ცუდად იმოქმედებს მასზე მთელი სიცოცხლის მანძილზე და იცხოვრებს დანაშაულის გრძნობით.
დეპრესია ყოველთვის უკავშირდება რაღაცის დაკარგვის, დანაკლისის შესახებ განცდებს, იქნება ეს საყვარელი ადამიანის, ურთიერთობის დაკარგვა, თუ სასიყვარულო იმედგაცრუება, იმედებისა და ილუზიების მსხვრევა. ყველა ამ შემთხვევაში ადამიანი რაღაცას კარგავს, რაზეც ემოციონალურად ძლიერ იყო მიჯაჭვული. თუ დედისადმი ადრეული ურთიერთობების გამოცდილება მყარი იყო, მაშინ ადამიანი მსგავს რთულ ცხოვრებისეულ სიტუაციას ადვილად გადაიტანს და ყველაფერს თავს გაართმევს, შემდეგ კი ინტერესსა და სიყვარულს ახალ ობიექტზე გადაიტანს. მაგრამ დეპრესიის შემთხვევაში საქმე სხვაგვარადაა. აქ საქმე გვაქვს ერთგვარი გაშვების პრობლემასთან. მიუხედავად იმისა, რომ ადამიანი რეალურ სამყაროში აღარ არის, ის არსებობას მეორე ადამიანში აგრძელებს, შინაგანი დიალოგების, სწავლებების, დადანაშაულების სახით, რაც საკუთარი თავისადმია მიმართული, თითქოს ყველაფერი ამ ადამიანის შეცდომის გამო მოხდა და შესაძლოა დანაშაულის გამოსყიდვაა საჭირო.
დეპრესიის მთავარი სიმპტომი ცუდი ხასიათია, ან საერთოდ უხასიათობა, სიყვარულის შეუძლებლობა, კავშირების დამყარების სურვილი არც არსებობს, ინტერესს არაფერი იწვევს. ამ ყველაფერს კი იმ ფაქტით ვხსნით, რომ ამ ადამიანის გული თავისუფალი არ არის და აგრძელებს იმ ობიექტის სიყვარულს, რომელმაც იგი მიატოვა.
დეპრესიის წინააღმდეგ ბრძოლასა და მისგან თავის დაცვას მანია ეწოდება. ის ახასიათებს ადამიანის ტრიუმფს საყვარელი ობიექტის მიმართ, როდესაც თავისუფლდება მისი სიყვარულისგან და მასზე დამოკიდებული აღარ არის. ადამიანი ასეთ დროს საკუთარ ყოვლისშემძლეობას გრძნობს, როდესაც თვითონ ძალუძს წარმართოს და დაიქვემდებაროს ობიექტი, რომლის სიყვარულზეც ადრე თვითონ იყო დამოკიდებული.
დეპრესიისაგან განკურნების ფორმები ერთმანეთს გვანან და ასევე განსხვავდებიან ერთმანეთისგან. მელანქოლიური დეპრესია საჭიროებს ანტიდეპრესანტების დანიშვნას ფსიქიატრის მეთვალყურეობის ქვეშ. თუ არსებობს სუიციდის საფრთხე, საავადმყოფოში დაწვენა აუცილებელია. ანტიდეპრესანტები ნევროტული დეპრესიული სიმპტომების გამოვლინების შემთხვევაშიც დადებითად მოქმედებს. თუმცა, ანტიდეპრესანტები პანაცეა არ გახლავთ. მათი მიღება ისეთი დეპრესიული ინდივიდების მიერ, რომლებიც დამოკიდებულების მიმართ მიდრეკილნი არიან, ახალი დამოკიდებულების საფრთხეს გვიქადის. ამასთანავე, ანტიდეპრესანტებისა და ალკოჰოლის თანამედროვე მიღება სიცოცხლისთვის საფრთხეს წარმოადგენს, ქიმიური კომპონენტების არასასურველი ურთიერთქმედების გამო.
რაც შეეხება დეპრესიისადმი ბრძოლის მეორე გზას, ფსიქოთერაპიას, ის არ არის სწრაფი, მაგრამ ყველაზე ეფექტური მეთოდია. საქმე ეხება არა ფსიქოანალიზსა და ფსიქოლოანალიზურ ფსიქოთერაპიას, არამედ რაციოანალურ, თანადგომისადმი მიმართულ ფსიქოთერაპიას. მხოლოდ ხშირი ეგოისტური ტრამვების ღრმა გამოკვლევა დაეხმარება ინდივიდს გამოვიდეს ხანგრძლივი დეპრესიული მდგომარეობიდან. ფსიქოანალიზის დროს ცნობიერად იკვეთება აქამდე არაცნობიერად არსებული ურთიერთობების პატერნები, ხდება მათი წყაროების გაანალიზება. ადამიანი ხელახლა სწავლობს საკუთარი თავისა და გარესამყაროს აღქმასა და ძველი შეხედულებებისაგან გათავისუფლებას.
და ბოლოს, ფაქტები დეპრესიის შესახებ:
● დეპრესიით იტანჯებიან 2%-დან 10%-მდე ადამიანები;
● დეპრესიას 2-ჯერ უფრო ხშირად ვხვდებით ქალებთან;
● ის ხშირად 25-დან 35-წლის ასაკში გვხვდება;
● სუიციდის შემთხვევების 80%-ის მიზეზად დეპრესია სახელდება;
● დეპრესიული მდგომარეობის ნახევარი პაციენტებისა და ექიმების მიერ ვერ ამოიცნობა;
● დეპრესია ხშირად სომატური დაავადებების მიღმა იმალება, ან ხელს უწყობს მათ გაუარესებას.
მოსამართლის ვაკანსია ბათუმში
მოსამართლის ერთი ვაკანსია არის ბათუმში. მოსამართლეობის მსურველები ყოფილი მოსამართლეები და მოქმედი ადვოკატები არიან.
ბათუმის საქალაქო სასამართლოს მოსამართლეობა სურთ: თემურ კაკაბაძეს, მაია ჯვარშეიშვილს, დავით კეკენაძეს, მაგული კუნჭულიას, ნანა კალანდაძეს, ნარგიზ ცეცხლაძეს, ზურაბ სურმანიძეს, ნინო ბუაჩიძეს, იგორ გვაგვალიას, გიორგი გრატიაშვილს, ირაკლი შავაძეს, სალიხ შაინიძეს, თეიმურაზ ქათამაძეს, ლია ოთარაშვილსა და ჟანა ჯიბლაძეს.
ქვეყნის მასშტაბით კონკურსში მონაწილეობას 99 ყოფილი და მოქმედი მოსამართლე, ასევე იუსტიციის უმაღლესი საბჭოს სკოლის მსმენელები იღებენ.
ხელისუფლება წინასაარჩევნოდ მიწის რეფორმას გეგმავს
„ბუნებრივია, ყველა პარტიას აღელვებს რამდენ ადამიანს გაiყვანს საკრებულოებში და როგორ გადანაწილდება ადგილები საარჩევნო შტაბებში. საუბარი იყო იმაზეც, რომ რაიონებში, სოფლებში არ არის ცვლილებები და პატრიოტი ადამიანები უმუშევრები არიან, ასე რომ მობილიზება სჭირდება მთელ გუნდს. შენიშვნები იყო აჭარის მთავრობასა და უმაღლეს საბჭოს შორის კომუნიკაციის საკითხზეც. თუმცა, არჩილ ხაბაძემ და უმაღლესი საბჭოს წევრებმაც დადეს პირობა, რომ თვეში ორჯერ შეხვდებიან ერთმანეთს“.
კომუნიკაციის გაუმჯობესების პირობა უმაღლესი საბჭოსა და აჭარის მთავრობის წევრებმა გასულ წელს ბიძინა ივანიშვილსაც მისცეს. თუმცა, როგორც თხილაიშვილი აცხადებს, „მსგავსი სირთულეები ახლავს მრავალპარტიულ კოალიციას“.
გარდა საარჩევნო კვოტებისა, როგორც დეპუტატი აცხადებს, მან პრემიერთან მიწის დაუსრულებელ რეფორმაზეც ისაუბრა და გარანტიები მიიღო, რომ წელს დაახლოებით 10 ათასი ოჯახი მიწას მიიღებს.
„ვფიქრობ, რომ მიწის საკითხს ნამდვილად მოვასწრებთ წელს და ათი ათას კაცს მიწას გადავცემთ ქობულეთსა და ხელვაჩაურში. ქალაქის საზღვრებში მოქცეული მოსახლეობა კი ცალკე განხილვის საგანი იქნება. მთავარია, ეს დავძრათ და მიყოლებით არ დარჩება არც ერთი ოჯახი მიწის გარეშე. მთავარია, რომ დაჩქარებული ტემპით, სწრაფად, ამ საგაზაფხულო სესიაზე შეგვიძლია მარტის ბოლომდე გავიტანოთ საკითხი და ამის შემდეგ გადავცეთ საქართველოს პარლამენტს. პრემიერი დამეთანხმა და ძალიან აქტუალურად მიიღო ამ საკითხის დასმა“-განაცხადა ანზორ თხილაიშვილმა.
ანზორ თხილაშვილის თქმით, მან პრემიერთან ციტრუსის სუბსიდირებისა და სოციალურად დაუცველი ოჯახებისთვის სტატუსის მინიჭების ფორმულაზეც ისაუბრა. „ვფიქრობ, სტატუსის მინიჭების კოეფიციენტი უნდა გადაიხედოს, რადგან დღეს მოქმედი ნორმები არ აძლევს სოციალურად დაუცველ ოჯახებს განვითარების შესაძლებლობას. 100 და თუნდაც ათასლარიანი შემოსავალი არ უნდა გახდეს სოციალური დახმარების შეწყვეტის მიზეზი. უნდა დადგინდეს შემოსავლის ზედა ზღვარი“.
სტატია გასწორებულია.
კანონპროექტი ეკომიგრანტების შესახებ
კომისიამ ერთ-ერთი მორიგი სამუშაო შეხვედრა უკვე დაასრულა და როგორც კანონპროექტის ინიციატორები ამბობენ, სავარაუდოდ კანონპროექტს პარლამენტს გაზაფხულზე წარუდგენენ.
ეკომიგრანტთა შესახებ კანონპროექტის კონცეფციის განხილვაში მონაწილეობა მიიღეს: სახალხო დამცველის აპარატის მართლმსაჯულების დეპარტამენტის უფროსმა, საერთაშორისო და ადგილობრივმა არასამთავრობო ორგანიზაციებმა.
სამუშაო შეხვედრაზე კანონპროექტში ეკომიგრანტის ცნების განსაზღვრვა, ეკომიგრანტთა გრძელვადიანი განსახლების კრიტერიუმები, განსახლებულ ეკომიგრანტთა ინტეგრაცია და ქონების საკუთრებაში გადაცემის ვადები განიხილეს.
აჭარიდან კომისიის წევრები არიან აჭარის ჯანდაცვის სამინისტროს თანამშრომლები – რამაზ ჯინჭარაძე და დალი ქიქავა, ასევე არასამთავრობო ორგანიზაცია „ბორჯღალის“ წარმომადგენლები.
მედეა ჩარკვიანს ბრალი წარუდგინეს
საქართველოს ფინანსთა სამინისტროს საგამოძიებო სამსახურის საგამოძიებო დეპარტამენტის თანამშრომლების მიერ ჩატარებული საგამოძიებო მოქმედებების შედეგად, ყალბი დოკუმენტების დამზადება-გამოყენების და სახელმწიფო ბიუჯეტის კუთვნილი დიდი ოდენობით ფულადი თანხის მითვისების ფაქტზე, სისხლის სამართლის პასუხისგებაში მიცემულ იქნენ შპს ,,თექ-ევ ინშაათის“ დირექტორი ჰალილ ექში და ტექნიკური დირექტორი გიორგი ოდიშვილი, ასევე, სამსახურებრივი უფლებამოსილების ბოროტად გამოყენებისა და სახელმწიფო ბიუჯეტის კუთვნილი დიდი ოდენობით ფულადი თანხის მითვისებაში დახმარებისათვის ბრალდებულის სახით პასუხისგებაში მიცემული იქნა ბათუმის თოჯინებისა და მოზარდ მაყურებელთა სახელმწიფო პროფესიული თეატრის მმართველი მედეა ჩარკვიანი და სამუშაოთა ტექნიკური ზედამხედველი ილია ზაქარიაძე.
სისხლის სამართლის საქმეზე ჩატარებული გამოძიებით დადგენილია, რომ შპს ,,თექ-ევ ინშაათს“ სსიპ ,,ბათუმის თოჯინებისა და მოზარდ მაყურებელთა სახელმწიფო თეატრისათვის“ უნდა შეესრულებინა ბათუმის თოჯინებისა და მოზარდ მაყურებელთა თეატრის შენობის 1 163 226,28 ლარის ღირებულების სარეკონსტრუქციო – სარემონტო სამუშაოები. ჩატარებული საგამოძიებო მოქმედებებისა და საინჟინრო ექსპერტიზის დასკვნის თანახმად დადგენილია, რომ აღნიშნული კომპანიის მიერ არ იქნა მოწყობილი თეატრის განათების, გახმოვანებისა და კონდიცირების სისტემები. მიუხედავად ამისა, ყალბი სამუშაოთა აქტების ფორმა N2 საფუძველზე, სამუშაოები შესრულებულად იქნა მიღებული. სამუშაოების მწარმოებელი კომპანიის მიერ შეუსრულებელი და უხარისხოდ შესრულებული სამუშაოების გამო თოჯინებისა და მოზარდ მაყურებელთა თეატრი არ ფუნქციონირებს ერთ წელზე მეტია და მის ექსპლუატაციისთვის ვარგის მდგომარეობაში მოყვანას დღეისთვის 300 000-ზე მეტი ლარი ესაჭიროება.
გამოძიება მიმდინარეობს საქართველოს სისხლის სამართლის კოდექსის 182-ე მუხლის მე-2 ნაწილის „დ“ და მე-3 ნაწილის „ბ“ პუნქტით, 332-ე მუხლის პირველი ნაწილით და 362-ე მუხლის მე-2 ნაწილის ,,ბ“ პუნქტით, რაც სასჯელის სახით ითვალისწინებს თავისუფლების აღკვეთას 7-დან 11 წლამდე ვადით.
კომენტარი: ბექა კვიციანი – საქართველოს ფინანსთა სამინისტროს საგამოძიებო სამსახურის უფროსი გამომძიებელი
ავტობუსის მძღოლების მოთხოვნა და “ავტოტრანსპორტის” დირექტორის პასუხი
_ ბატონო გია, მძღოლებმა შიმშილობა დაიწყეს, სხვა მოთხოვნებთან ერთად ისინი თქვენ გადადგომას ითხოვენ, შეხვდით თუ არა მათ?
_ თავიდან ოთხი მოთხოვნა იყო, ხელფასის მომატება, დირექტორის გადადგომა, ოთახის გამოყოფა და კოლექტიური ხელშეკრულება, ყველა მოთხოვნა მოხსნეს და ახლა ჩემ გადადგომას ითხოვენ.
_ სხვა მოთხოვნები დაკმაყოფილდა?
_ არა, არც ერთი მოთხოვნა არ შესრულებულა.
_ თქვენი გადადგომის მიზეზი რა არის თქვენი აზრით?
_ არ ვიცი ზუსტად. ამბობენ, ხელფასი რომ ვერ მოვუმატე, მაგიტომ, სინამდვილეში არის ერთი პატარა ჯგუფი, რომელსაც დირექტორის შეცვლა სურს. მძღოლების ნაწილი დღე-ღამეს ათენებს, სვამს, კარტს თამაშობს და ვისაც მუშაობა უნდა, იმათაც ამის საშუალებას არ აძლევენ. როცა დააპირა ზოგიერთმა მძღოლმა მუშაობა, არ გაუშვეს.
_ მძღოლები ამბობენ, რომ ერთი წლის წინანდელი დაპირება _ ხელფასის მომატება _ თქვენ ვერ შეასრულეთ…
_ ხელფასები ვერ მოვამატეთ, რადგან სხვა მარშრუტები დავნიშნეთ. საკრებულოს გადაწყვეტილებით, ბილეთების გაყიდვით მათ შემოსავალი ისედაც გაეზარდათ.
_ თქვენ გადადგომას ითხოვენ და თქვენ რას აპირებთ?
_ შეხვედრა გვქონდა დეპუტატებთან, ვიცე-მერებთან, საკრებულოს თავმჯდომარესთან. არსებობს პროცედურები და ვინც დამნიშნა, ისინი თუ ჩათვლიან საჭიროდ, გადამაყენებენ. თანამდებობაზე ჩემი დარჩენის საკითხის განხილვას უკვე დაჰპირდა საკრებულოს თავმჯდომარე გაფიცულ მძღოლებს. ალბათ ბათუმის საკრებულო ამ კვირაში იმსჯელებს ჩემი გადაყენების საკითხზე.
P.s. “ბათუმელები“ გაფიცულ მძღოლებსაც ესაუბრა. “250-მდე კაცი ითხოვს ბატონი ლორიას გადადგომას და საათში 50 თეთრით ხელფასის გაზრდას. ხელფასის გაზრდის შეთანხმება იყო ერთი წლის უკან, მაგრამ არ გაიზარდა, დღემდე გვატყუებენ.” _ თქვა შოთა გორგილაძემ, მძღოლმა.
აქციის მესამე დღეს გაფიცული მძღოლებიდან ერთ-ერთს სამუშაოდ გასვლა სურდა, თუმცა დანარჩენმა მას ამის საშუალება არ მისცა. “ეს იყო პროვოკაცია დირექტორის მხრიდან, უნდოდა პატრული შემოეყვანა, რომ ძალადობის ფაქტი აღენიშნათ. ბიჭებმა უბრალოდ არ გავატარეთ ავტობუსი და არავითარ შეურაცხყოფას ადგილი არ ჰქონია” _ განმარტა ვაჟა გოგელიამ, მძღოლმა.
„ჩვენ მოძველებულ სტანდარტებს ვანგრევთ“ – ქალები გემზე
ნათია ლაბაძის ოჯახში მამა, ბაბუა და ბიძაშვილები მეზღვაურები არიან. სწორედ ისინი გახდნენ ნათიასთვის სტიმული პროფესიის არჩევის დროს. „დღესაც მესმის, რომ გემთწამყვანობა არ არის ქალის საქმე, მაგრამ ყველაფერს ფიზიკური ძალა არ სჭირდება. გონებით გაცილებით მეტის გაკეთებაა შესაძლებელი“, – გვეუბნება ნათია. მისი აზრით, მსოფლიოში დიდი ხანია შეიცვალა სტერეოტიპები ქალის საქმიანობასთან მიმართებაში. „ვაჩვენებთ, რომ ქალებიც ძლიერები ვართ. რამდენი კაცი ვიცი, წარმატებით რომ დაუმთავრებია აკადემია, მაგრამ ზღვის შიშის გამო აღარ უმუშავია გემზე. ყველაფერს აქვს თავისი რთული მხარე, მაგრამ ყველა სირთულე დაძლევადია“.
ნათიასგან განსხვავებით, ანა ყურშუბაძე ოჯახში პირველია, რომელმაც არჩევანი მეზღვაურის პროფესიაზე გააკეთა. „მამაჩემს უნდოდა, მაგრამ ვერ გახდა მეზღვაური. ყოველთვის მამაკაცური პროფესიები მიზიდავდა, მიფიქრია ჯარზე, პოლიციის აკადემიაზე, მაგრამ საბოლოოდ საზღვაოზე გავაკეთე არჩევანი. მიზიდავს ექსტრემი და არ მომწონს, როცა ქალის შესაძლებლობებს ეჭვის ქვეშ აყენებენ“.
ანა ამბობს, რომ ყველა სირთულეს აცნობიერებს, რაც მომავალ კაპიტანს შეიძლება წინ დახვდეს. „მანდ რა გინდოდა, რისთვის, რატომ?“ – ყველას ასეთი რეაქცია ჰქონდა. თანაკურსელი ბიჭებიც მეუბნებიან, წადი სახლში, აქ რა გინდაო. ერთმა ისიც მითხრა, „შენ სამზარეულოს კაპიტანი იქნებიო“. ძალიან ბევრი ახალგაზრდა დღესაც მშობლების არჩევანით გეგმავს საკუთარ ცხოვრებას, მე კი ჩემი არჩევანი გავაკეთე“.
კითხვაზე, მათი აზრით, არიან თუ არა მზად ქართველი მამაკაცები, რომ მეზღვაურ ქალთან შექმნან ოჯახი, ნათია ასე პასუხობს: „რა მნიშვნელობა აქვს ვინ იქნება ზღვაზე, ქალი თუ კაცი, ჩვენ ხომ ვეგუებით მეზღვაურ ქმრებს“. ანას აზრით კი, ქართველ მამაკაცებს ეს ალბათ გაუჭირდებათ: „ჯერჯერობით მაინც. ამიტომ სასურველია, რომ ქმარიც მეზღვაური გყავდეს“.
გოგონების აზრით, გამონათქვამი – „ქალი გემზე უბედურების მომტანია“ – განვითარებულმა სამყარომ დიდი ხანია დაივიწყა.
„მეზღვაური ქალი აღარ არის სიახლე ევროპასა და ამერიკაში. მამაჩემი მეუბნებოდა, მიკვირდა და თან ძალიან მომწონდა, როცა ეკიპაჟში ქალებს დავინახავდიო. სხვათა შორის, თურქულ გემებზე ბევრი მექანიკოსი ქალია. მეც ვიცნობდი ერთ ებრაელს, რომელმაც აქ დაამთავრა აკადემია და ახლა ისრაელში სამხედრო გემის კაპიტანია“ – გვეუბნება ნათია. ის ახლა პრაქტიკას საზღვაო აკადემიის გემზე და ფოთის ტერმინალის გემებზე გადის. იმედი აქვს, რომ პრაქტიკას ყულევის ნავსადგურშიც გაივლის.
ანას სურვილია საკრუიზო გემზე დაიწყოს მუშაობა, ნათია კი ყველა შემოთავაზებისთვის მზადაა. „სულერთია, იქნება ეს ტანკერი თუ საკრუიზო, მთავარია ზღვაში გავიდე“.
მომავალ გემწამყვანებს განსაკუთრებული რეჟიმით ცხოვრება არ უწევთ. ერთადერთი, რაც ცოტათი ეზარებათ, საზღვაო აკადემიაში დილის მოწყობაა, რომელიც ნახევარი საათი გრძელდება. „მოგვწონს ჩვენი უნიფორმები, მოსახერხებელია და დიზაინიც ხშირად იცვლება“ – ამბობს ნათია. ანას კი ის მოსწონს, როცა დილით არ უჩნდება კითხვა _ „რა ჩავიცვა?“ რადგან ყოველთვის ვიცი, რასაც ჩავიცმევ“.
ბათუმის საზღვაო აკადემიის რექტორის, ირაკლი შარაბიძის თქმით, ქალი მეზღვაურების სიმრავლით ევროპის ქვეყნებში პოლონეთი გამოირჩევა. ქალი კაპიტნები ხშირად არიან აშშ-ის გემებსა და ეკიპაჟის შემადგენლობაშიც.
რატომ ირჩევენ ქალები მეზღვაურის პროფესიას იშვიათად? როგორც ირაკლი შარაბიძე ამბობს, რაიმე ტიპის აკრძალვა ამ კუთხით არ არსებობს: „უბრალოდ, მეზღვაურობა უფრო მძიმე, კაცური საქმეა და ალბათ, კაცები უფრო აკეთებდნენ ამ მიმართულებით არჩევანს, ვიდრე – ქალები. თუმცა ბოლო წლებში სურათი შეიცვალა, ქალები ზღვაზეც გახდნენ მამაკაცების კონკურენტები“.
სამგზავრო ავტობუსი მაჭახლის თემისთვის
სამგზავრო ავტობუსი ხელვაჩაურის მუნიციპალიტეტის გამგეობამ გასული წლის ბოლოს 75 ათას ლარად შეიძინა. მანამდე მაჭახლის თემს წლების განმავლობაში ამორტიზებული ავტობუსი ემსახურებოდა, რის გამოც მოსახლეობამ მუნიციპალიტეტის ხელმძღვანელ პირებთან ბევრჯერ გამოთქვა პროტესტი.
გამგეობამ სამგზავრო ავტობუსის იჯარით გაცემის შესახებ ელექტრონული აუქციონი ორჯერ გამოაცხადა, თუმცა აუქციონში მონაწილეობა არავინ მიიღო. მიმდინარე წლის თებერვალში მოქალაქე ელდარ ნაგერვაძემ ტრანსპორტის იჯარით გაცემასთან დაკავშირებით გამგეობას განცხადებით მიმართა.
2014 წლის 14 თებერვალს გაფორმებული ხელშეკრულების საფუძველზე ელდარ ნაგერვაძეს მაჭახლის თემის ტრანსპორტით უზრუნველყოფის მიზნით ავტობუსი გადასცეს.
მოიჯარე ვალდებულია, განახორციელოს ყოველდღე ორი მარშრუტი ზედა ჩხუტუნეთი-ბონის კულტურის სახლის მიმართულებით.
ლევან ვარშალომიძე დაკითხვიდან გამოვიდა
„მოწმის სახით ვიყავი დაბარებული. არჩევნები მოდის და ტერორი უფრო გამკაცრდება. არ გამოვრიცხავ პროკურატურში ჩვენი პარტიის წევრების დაბარებას. მიხარია, რომ დღეს იმ ქალაქში ვცხოვრობ, რომელსაც 10 წლის განმავლობაში ვაშენებდით“.
პროკურატურის განცხადება ლევან ვარშალომიძის დაკითხვასთან დაკავშირებით
აღნიშნულ სისხლის სამართლის საქმეზე გამოძიება დაწყებულია 333 მუხლის პირველი ნაწილით, რომელიც გულისხმობს სამსახურებრივი უფლებამოსილების გადამეტებას“.
მიკროავტობუსის მძღოლების განცხადება
შპს „აჭარტრანსრეგულირების“ ხელმძღვანელის ვაჟა ცინცქილაძის თქმით კი, 40 თეთრის გადახდაზე უარს ამბობს ზოგიერთი ის მგზავრიც, რომელიც არ სარგებლობს სოციალური შეღავათით.
„ოთხმა სამგზავრო კომპანიამ გადავწყვიტეთ, რომ სანამ ავტობუსები განაახლებენ მუშაობას, მანამდე იმ მგზავრებს, რომლებიც ქალაქში შეღავათიანი ტარიფით გადაადგილდებოდნენ, 30 თეთრად მოვემსახუროთ. თუმცა, ის მგზავრებიც, რომლებიც არ სარგებლობენ სოციალური შეღავათებით, 40 თეთრის გადახდაზე უარს ამბობენ, გვეჩხუბებიან და ცხელ ხაზზე გვიჩივიან“ _ ამბობს ცინცქილაძე.
ბათუმში სულ ოთხი კერძო კომპანიაა, რომლებიც სამგზავრო გადაზიდვებს უზრუნველყოფს.
მუნიციპალური ავტობუსების მძღოლები რამდენიმე დღეა ხელფასების გაზრდის მოთხოვნით გაიფიცნენ, ზოგიერთი მათგანი კი მესამე დღეა შიმშილობს.
ლევან ვარშალომიძე პროკურატურაში დაკითხვაზეა
პროკურატურის პრესსამსახურში ინფორმაციას ამ დროისთვის არ ადასტურებენ.
ინტერფრაქციული ჯგუფი ხვალიდან ამოქმედდება
„კომისიას ევალება ერთი კვირის ვადაში შეისწავლოს შპს „ბათუმის ავტოტრანსპორტის“ მძღოლთა ნაწილის მოთხოვნები და პრეტენზიები, ხელფასების ზრდისა და დანიშვნა-გათავისუფლების საკითხები, მოთხოვნების საფუძვლიანობა.
კომისია შეხვდება მძღოლებსაც, საკრებულოს წარმომადგენლებსაც და ბოლოს წარმოადგენს წინადადებებს იმის შესახებ, თუ როგორ უნდა დარეგულირდეს ეს საკითხი“ _ განაცხადა საკრებულოს იურიდიული განყოფილების უფროსმა სულიკო შვენთიძემ.
ინტერფრაქციული ჯგუფის შექმნის დოკუმენტს საკრებულოს თავმჯდომარე ირაკლი ჩავლეიშვილი ხელს ხვალ ოფიციალურად მოაწერს.
არის თუ არა „მეგა პალასის“ მფლობელი არჩილ ხაბაძის მეგობარი?
„აჭარის მთავრობის საკუთრებაში არსებული ქონება, რომელიც ხიმშიაშვილის ქუჩაზე ტურისტულ ზონაში მდებარეობს, აუქციონამდე რამდენიმე დღით ადრე დაარსებულ კომპანიაზე გასხვისდა, რომლის მესაკუთრეები აჭარის მთავრობის თამჯდომარის არჩილ ხაბაძის მეგობრები არიან. მიწა გასხვისდა სასტარტო ფასზე 30-ით ნაკლებად და მე როგორც ვიცი, იქ აპირებენ არა სასტუმროს, არამედ კერძო საცხოვრებელი სახლის მშენებლობას“ _ განაცხადა რობერტ ჩხაიძემ.
შპს „მეგა პალასის“ ერთ-ერთი მფლობელი ლევან ხიმშიაშვილი „ბათუმელებთან“ საუბარში ამბობს, რომ არჩილ ხაბაძეს კარგად იცნობს: „ქართუ ბანკთან“ მქონდა სასესხო ურთიერთობა და იქედან ვიცნობ ხაბაძეს. რაც შეეხება მიწის ყიდვას, ამის თაობაზე განცხადება ინტერნეტში სამი თვის განმავლობაში იყო განთავსებული და ნებისმიერ მსურველს შეეძლო აუქციონში მონაწილეობის მიღება. მათ შორის რობერტ ჩხაიძესაც“.
ლევან ხიმშიაშვილი ამბობს, რომ მიწა 610 000 ლარად, ორმილიონიანი ინვესტიციის განხორციელების პირობით იყიდა. პირობის მიხედვით, აღნიშნულ მიწაზე 70-ნომრიანი სასტუმრო კომპლექსი უნდა აშენდეს.
მაია მიმინოშვილი ბათუმში მოსწავლეებს შეხვდა
„როგორც იცით, ეროვნული გამოცდებისთვის მე-12 კლასელთა რეგისტრაცია უკვე დაიწყო, უცხო ენის გამოცდას დაემატა სმენითი ნაწილი და ამ საკითხზე იყო საუბარი მოსწავლებთან. ცვლილებები შეეხო ზოგადი უნარების გამოცდასაც, სადაც ბარიერი გაიზარდა. მაია მიმინოშვილმა ისაუბრა ამ ცვლილებების აუცილებლობასა და მნიშვნელობაზე“.
მარიზა აბაშიძის თქმით, მეთორმეტე კლასელებს ეროვნულ გამოცდებში განხორციელებული ცვლილებების გამო შენიშვნები არ გამოუთქვამთ.
„როგორც ქალბატონი მაია აცხადებს, ამ ცვლილებებით უფრო გაადვილებულია გამოცდების ჩაბარების პროცესი, ვიდრე გართულებული“. _ გვითხრა მარიზა აბაშიძემ.
დირექტორი ამბობს, რომ ინგლისურ ენაში სმენითი ნაწილის გაუმჯობესების მიზნით, სკოლას მოსასმენი დისკები გადასცეს.
მძღოლების მოთხოვნებზე ინტერფრაქციული ჯგუფი იმსჯელებს
ავტობუსის მძღოლები ხელფასის გაზრდასთან ერთად, შპს „ბათუმი ავტოტრანსპორტის“ დირექტორის, გია ლორიას გადადგომასაც მოითხოვენ.
როგორც საკრებულოს პრესსამსახურში აცხადებენ, დღეს პირველი საათისთვის მერიაში უნდა შეიქმნას ინტერფრაქციული ჯგუფი, რომელიც მძღოლების მოთხოვნებზე იმსჯელებს.
„ჯერ არ არის გადაწყვეტილი ვინ შევა ინტერფრაქციულ ჯგუფში, საუბარია არასამტავრობო ორგანიზაციების წარმომადგენლებზეც, ჯგუფი განიხილავს როგორც ხელფასების ასევე გია ლორიას გადაყენების საკითხსაც“-აცხადებენ საკრებულოს პრესსამსახურში.
მუნიციპალური ავტობუსების შეჩერებამ პრობლემები შექმნა მზგავრთა გადაადგილებაში. შპს „ბათუმის ავტოტრანსპორტში“ 320 მძღოლია დასაქმებული.
ბათუმში ავტობუსის მძღოლებმა შიმშილობა დაიწყეს
„აქამდე ხელფასის მომატებას, დირექტორის გადადგომას და პროფკავშირებისათვის ადმინისტრაციულ შენობაში ერთი ოთახის გამოყოფას ვითხოვდით, მაგრამ ახლა მხოლოდ დირექტორის გადადგომას ვითხოვთ. გიორგი ლორია უნდა გადადგეს,“ – აცხადებს შპს „ავტოტრანსპორტის“ პროფკავშირის ხელმძღვანელი ემზარ გოგიტიძე.
შპს „ავტოტრანსპორტის“ 300 მდე მძღოლი მეხუთე დღეა გაფიცულები არიან და ავტობუსები სამუშაოდ ხაზზე არ გამოჰყავთ.
სახელმწიფო ანსამბლის წევრები პროტესტს აგრძელებენ
„ჩვენ ვიბრძოლებთ ბოლომდე. ყოველდღე ვცხადდებით სამსახურში, მაგრამ რეპეტიციებს მანამდე არ ჩავატარებთ სანამ თემურ ქორიძე არ დაბრუნდება სამხატვრო ხელმძღვანელად. სამოცი კაცი მოვითხოვთ თემურ ქორიძეს დაბრუნებას და ანსამბლის დირექტორი თუ ვერ იმუშავებს მასთან მაშინ თვითონ წავიდეს თანამდებობიდან,“- განაცხადა აქციის წევრმა ნათია მოისწრაფიშვილმა.
ანსამბლის ხელმძღვანელი ოთარ მიქელაძე ამბობს, რომ ანსამბლის ის წევრები, ვინც თემურ ქორიძის დაბრუნებას ითხოვს, უმრავლესობას არ წარმოადგენენ, რადგან მათგან 15 ახალგაზრდა სტაჟიორია და არა აქვს შრომითი ხელშეკრულება ანსამბლთან გაფორმებული.
„ქორიძემ სტაჟიორები მოიყვანა და მათი პირადი საქმე არ შექმნა. არავითარი ბრძანებით არ გაუფორმებია ისინი. ახლა კი მათ თავის სასარგებლოდ იყენებს“- უთხრა „ბათუმელებს“ ოთარ მიქელაძემ.
„ვსაუბრობთ დემოკრატიაზე“ – სემინარების ციკლი ბათუმში
მომდევნო ლექცია ხვალ, 16 თებერვალსაა დაგეგმილი. ლექციის თემა იქნება „დემოკრატია და სახელმწიფო“. პოლიტოლოგი კობა კუპრაშვილი დემოკრატიის არსზე ისაუბრებს. როდის ვითარდებიან ისინი სხვადასხვა მიმართულებით და როგორია იდეალური „დემოკრატია“ და „სახელმწიფო“.
სემინარები ტარდება პროექტის „დემოკრატიის ისტორიები სამოქალაქო ცნობიერებისათვის“ ფარგლებში, რომელიც ხორციელდება ორგანიზაცია „ბორჯღალი“ს მიერ.
„გვამებს მიმავალი ვაგონებიდან ყრიდნენ“
„1949 წლის დეკემბერში, შუაღამისას, რუსი ჯარისკაცები დაესხნენ ჩემს ოჯახს და ბებია, ბაბუა, ჩემი მშობლები და ოჯახის სხვა წევრები იძულების წესით, შეურაცხმყოფელი სიტყვებით, შეყარეს სატვირთო მანქანაზე. დედა ამ დროისთვის ფეხმძიმედ იყო. როგორც დედისგან მახსოვს, ვაგონში მხოლოდ ერთი სარკმელი იყო და სუნთქვა ჭირდა. არ იყო საპირფარეშო, მგზავრობისას ბევრი ადამიანი დაიღუპა, გვამებს კი მიმავალი ვაგონებიდან ყრიდნენ. მხოლოდ გაჩერებისას, სადგურებში აწვდიდნენ თითო ნაჭერ პურს, ცხენის ხორცის ბალანდას და ცოტა წყალს. თუ წყლის დალევას ვერ მოასწრებდნენ, იყინებოდა. ასეთ ყინვაში იმგზავრეს 25 დღე.
გადასახლება შეეხო როგორც ბებიაჩემის, ასევე ბაბუაჩემის ოჯახებსაც. გადასახლებაში იყო დეიდაჩემიც.
ბაბუაჩემი თურქეთის მოქალაქე იყო. მას ახალშენში პირველი ცოლი და შვილები ჰყავდა. შემდეგ შექმნა ბებიაჩემთან ახალი ოჯახი. ბებიაჩემიც თურქეთის მოქალაქე იყო, იმ დროს თურქეთსა და საბერძნეთს ომი ჰქონდათ ერთმანეთთან. ბებიას ოჯახი საზღვართან ცხოვრობდა და მათი უსაფრთხოება დაცული არ იყო. ხშირად იტაცებდნენ გოგონებს, აუპატიურებდნენ ან ყიდდნენ. ამიტომ ბებიაჩემი გამოუშვეს საქართველოში ერთ ნათესავთან და შემდეგ დარჩა სამუდამოდ. მას 13 და-ძმა ჰყავდა და სიცოცხლის ბოლომდე მათ ნახვას ნატრობდა, თუმცა ვერ შეძლო. შემდეგ ის პერიოდი იყო, როცა მიმოწერაც კი არ შეიძლებოდა. პირველად 1994 წელს შეძლო მამაჩემმა ვიზით საბერძნეთში წასვლა.
ჩემი ოჯახი ყაზახეთში, ჩუმკეტში გადაასახლეს. ვაგონებიდან პირდაპირ დაუსახლებელ უდაბნოში დაყარეს ღია ცის ქვეშ. ამ პირობებში იმშობიარა დედაჩემმა და ქალიშვილი გააჩინა, რომელიც საშინელი პირობების გამო სამ თვეში გარდაიცვალა. მოგვიანებით დედაჩემის მამაც გარდაიცვალა, ბებიას კი ნერვები დაუავადდა. დედისთვის ეს ყველაზე შემზარავი და საშინელი დღეები იყო. მოგვიანებით, როცა მამაჩემმა მუშაობა შეძლო, პატარა ბარაკი ააშენეს, სადაც მე და ჩემი ძმა დავიბადეთ. ხუთი წელი გავატარეთ გადასახლებაში. ახლაც მახსოვს ის სახლი, ოთახები და ბაღი, სადაც ცოტა ხნით დავდიოდი. არც სათამაშო გვქონია და არც რაიმე გასართობი, ადგილობრივი ბავშვებიც კი ერიდებოდნენ ჩვენთან თამაშს. არც საკვები გვქონდა წესიერი. გასაკვირია, პატარები საერთოდ როგორ გადავრჩით. ყაზახეთში საცხოვრებლად უვარგისი ბუნებრივი პირობები იყო. არ იყო შუქი, შეშა… ზაფხულში ისეთი სიცხე იყო, დამდგარ წყალს მატლები ესეოდა. ბევრი ადამიანი მოკვდა წყლით. დედაჩემიც მოიწამლა და სასწაულებრივად გადაურჩა სიკვდილს.
ბოლო წლებში უფრო ადვილად გაგვქონდა თავი. საჭმელს ყველა ერთად ვჭამდით, ვინ რას იშოვიდა, იმის მიხედვით. ზოგი აცხობდა და ყიდდა, დეიდაჩემი კი კერავდა, ქსოვდა და შემდეგ საკვებზე ცვლიდა.
მამაჩემმა სტალინის სახელზე წერილი გააგზავნა და საქართველოში დაბრუნება სთხოვა. არ ვიცი, ეს წერილი მართლა მივიდა თუ არა სტალინამდე, მაგრამ ხუთი წლის შემდეგ დაბრუნების უფლება მოგვცეს. ხალხისგან განსაკუთრებული სიძულვილი არ გვიგრძნია, შეიძლება იმიტომ, რომ სიტუაცია შედარებით შეცვლილი იყო ქვეყანაში. თუმცა ცხოვრების თავიდან დაწყება ძალიან გაგვიჭირდა.
ბაბუაჩემი გაკულაკებული იყო და ქონება წართმეული ჰქონდა. არც ბებიაჩემის ოჯახს დაუტოვეს სახლი, იქ უკვე სხვა ადამიანები ცხოვრობდნენ.
ნაქირავებში ვცხოვრობდით დიდხანს, შემდეგ ერთი ოთახი მოგვცეს, სადაც კანალიზაციის მილები პირდაპირ იატაკზე გამოდიოდა. შემდეგ მოგვცეს ბინა, მაგრამ ავეჯი არ გვქონდა. დედაჩემი ჩემოდნებს გადააფარებდა სუფრას და ისე ვსადილობდით. შემდეგ დედაჩემმა ჰოსპიტალში დაიწყო მუშაობა, მამაც მუშაობდა და ნელ-ნელა ავაწყვეთ ცხოვრება. თუმცა იმ წლებმა, რომელიც გადასახლებაში გავატარეთ, ჩვენს ცხოვრებაზე მძიმე კვალი დატოვა.
მომავალმა თაობებმა უნდა იცოდნენ ეს ისტორიები, რადგან სწორად შეაფასონ მოვლენები. წარსული გამოცდილების ცოდნა მათ შეცდომებისგან დაიცავს. ვინმე რომ წაიწუწუნებდა, დედაჩემი იმ მძიმე დროს გაიხსენებდა ხოლმე. მეც დავბერდი და ზოგი რამ კარგად აღარ მახსოვს. კარგი იქნებოდა, ჩანაწერები რომ გამეკეთებინა. საინტერესო წიგნი გამოვიდოდა“.
პარადოქსი
შავი ზღვის სანაპირო, კერძოდ, ბათუმის შემოგარენი, ხელვაჩაურისა და ქობულეთის მუნიციპალიტეტების სოფლები, მტაცებელი ფრინველების მრავალრიცხოვანი მიგრაციის ერთ-ერთი ყველაზე ვიწრო დერეფანია, სადაც ყოველწლიურად 800.000-ზე მეტი გადამფრენი მტაცებელი ფრინველი აღირიცხება. სწორედ, ამ ფაქტის გამო ეს ადგილები მსოფლიოში ფრინველების მიგრაციაზე დაკვირვების მოცულობით მესამეა. იგი ცნობილია `აღმოსავლეთ შავი ზღვის სამიგრაციო დერეფნის~ სახელით. შემოდგომის პერიოდში სკანდინავიიდან, რუსეთის ტყეებიდან და ცენტრალური აზიიდან 35 სახეობის გადამფრენი მტაცებელი მიფრინავს სამხრეთით, აფრიკისაკენ გამოსაზამთრებლად. სწორედ რეგიონის უნიკალური ტოპოგრაფია და კლიმატი განაპირობებს ამდენი ჩიტის ერთ ადგილზე თავმოყრას, რაც დაუვიწყარი შთაბეჭდილებების მიღების უტყუარი წინაპირობაა.
ჭოროხის დელტის ტერიტორია მნიშვნელოვანია მიგრირებადი და მიმომფრენი ფრინველებისათვის. აქაა შემორჩენილი ფლორის ის სახეობები შავი ზღვის სანაპიროზე, რომელსაც ევროკავშირის `ნატურა 2000~ და ზურმუხტის ქსელი იცავს. ტერიტორიას განსაკუთრებული სამეცნიერო, საგანმანათლებლო და ეკოტურისტული პოტენციალი აქვს. 2006-2007 წლებში ორგანიზაცია `ჭოროხმა~ მოამზადა კიდევაც კანონი `ჭოროხის დელტის~ დაცული ტერიტორიის ჩამოყალიბებისთვის, თუმცა ის დღემდე არ არის მხარდაჭერილი სახელმწიფოს მხრიდან. დღეს ჭოროხის დელტას საკურორტო რეკრეაციული ზონის სტატუსი აქვს, ხოლო მის შემოგარენს ე.წ. `სამხედრო ბაზის~ ტერიტორიას რეკრეაციული ზონის. სამწუხაროდ, ეს სტატუსი ვერ იცავს მათ ხელყოფისაგან – ადგილობრივი კანონმდებლობის მიხედვით, მასზე შეიძლება აშენდეს სასტუმროები, ადმინისტრაციული შენობები, გასართობი ცენტრები თუ სხვა ინფრასტრუქტურული პროექტები (ნუსხა საკმაოდ ვრცელია).
საქართველოს კონსტიტუციის მიხედვით, ყველა ვალდებულია გაუფრთხილდეს ბუნებრივ და კულტურულ გარემოს, ასევე რამსარის კონვენციით (1971, 2 თებერვალი, ქ. რამსარი ირანი), რომელსაც საქართველო 1996 წელს შეუერთდა, ხელმომწერები იღებენ ვალდებულებას, რომ მათ უნდა უზრუნველყონ წყალჭარბი ტერიტორიების დაცვა და მდგრადი გამოყენება ქვეყნის მთელ ტერიტორიაზე. მთავრობებმა მიწათსარგებლობის სახელმწიფო დაგეგმვისას უნდა გაითვალისწინონ წყალჭარბი ტერიტორიების დაცვის აუცილებლობა და შეუნარჩუნონ ამ ტერიტორიებს ეკოლოგიური ხასიათი.
რეკრეაცია ეს არის ადამიანის ბუნებასთან კავშირ-ზემოქმედების პროცესი. ეკონომიკური თვალსაზრისით რეკრეაციულ რესურს ქვეყნისთვის დიდი მნიშვნელობა აქვს, ვინაიდან მისი სწორად დაგეგმარებისა და გამოყენების შემთხვევაში შესაძლებელია ქვეყნის ეკონომიკის საგრძნობლად გაზრდა.
ჩვენ შემთხვევაში კი ეკონომიკის ზრდა და ინვესტიციების მოზიდვა ხშირად წინააღმდეგობაში მოდის რეგიონის ეკოლოგიურ უსაფრთხოებასა თუ კულტურული მემკვიდრეობის დაცვასთან. ინფრასტრუქტურის განვითარების მიზნით მდინარე ჭოროხსა და მიმდებარე ტერიტორიაზე დაგეგმილია შემდეგი ინფრასტრუქტურული პროექტები: ჰიდროელექტროსადგურის კასკადის მშენებლობა; მდინარე აჭარისწყალზე (მდ. ჭოროხის შესართავი) სამსაფეხურიანი ჰესების კასკადის მოწყობა; ბათუმის შემოვლითი გზის მშენებლობა (48 კმ); ბათუმიდან მდ. ჭოროხზე საავტომობილო გზისა და ოთხხაზიანი საავტომობილო ხიდის მშენებლობა; ასევე აჭარის ფინანსთა და ეკონომიკის სამინისტროში ამუშავებენ საინვესტიციო წინადადება/პროექტს, რომელიც ჭოროხის დელტისა და მიმდემბარე ტერიტორიაზე ტურისტული ინფრასტრუქტურის განვითარებას ითვალისწინებს.
ინფრასტრუქტურული პროექტები იწვევს გარემოს შეუქცევად ცვლილებას, ფრინველთა სიკვდილიანობის ზრდასა და გადაშენებას. სახელმწიფომ, პირველ რიგში, უნდა განსაზღვროს ის პრიორიტეტები და ფასეულობები, რაზეც აგებულია საინვესტიციო თუ ეკონომიკური ზრდის პოლიტიკა, ამისთვის კი პასუხი უნდა გაეცეს შემდეგ კითხვებს: სად ვიმყოფებით დღეს, სად გვსურს, რომ ვიყოთ და როგორ ვაღწევთ სასურველ შედეგს.
და ბოლოს, ფრინველებზე დაკვირვებით დაინტერესება ვისთვის პარადოქსი შეიძლება იყოს, ვისთვის კი გარემოსთან შეხების ერთ-ერთი საშუალება და სამყაროს ახლებური ხედვაა. ყველას გვქონია ბავშვობაში პირველი სიხარული, როცა მერცხლები ჩვენს აივანზე ბუდეს იშენებდნენ, შემდეგ ბარტყებზე ზრუნავდნენ და პირველ ფრენას ასწავლიდნენ. და როგორ ტოვებდნენ ბუდეს ზაფხულის მიწურულს… თურმე ისინი ჩვენი ჭოროხის დელტაზე აფარებენ თავს და შემდეგ აგრძელებენ გზას თბილი ქვეყნებისკენ.
პარადოქსი – (ბერძნული სიტყვა რწმენის მიღმა) საყოველთაოდ აღიარებული შეხედულების, საღი აზრის მკვეთრად საწინააღმდეგო (სინამდვილეში ან ერთი შეხედვით) მსჯელობა, მოსაზრება.
ბათუმში ხსოვნის დღე აღნიშნეს
ბათუმის მერიის პროგრამის ფარგლებში, სხვადასხვა ქვეყნის ტერიტორიაზე მებრძოლ ვეტერანებს საჩუქრად 200 ლარი გადაეცემათ. გარდა ამისა, ვეტერანთა ოჯახებისთვის გაზიფიკაციის ხარჯების 90 %-ს ქალაქის თვითმმართველობა გაიღებს.
ასევე, ბათუმის მერიის გადაწყვეტილებით, ვეტერანები თავისუფლდებიან მუნიციპალური ტრანსპორტით მგზავრობის, ტელეფონის სააბენონტო და კომუნალური გადასახადებისგან.
მომზადებულია პრესრელიზზე დაყრდნობით.
ბათუმის აფიშა
ბათუმის სახელმწიფო მუსიკალურ ცენტრში:
ფესტივალ „ბათუმური საღამოების“ ფარგლებში დღეს ბათუმის სახელმწიფო მუსიკალურ ცენტრში ორი ღონისძიებაა დაგეგმილი. 17 საათზე იხილავთ ახალგაზრდა რეჟსორ ნინელი გოგიტიძის დოკუმენტურ ფილმს იური ხაბაძე – „პორტრეტს“. 18 საათზე პრემიერაა დაგეგმილი. ბათუმის მუსიკალური ცენტრის ახალგაზრდულ–მუსიკალური თეატრი წარმოგიდგენთ თეატრალიზებულ კონცერტს რ. კოჩიანტის „Notre Dame De Paris“. ბილეთის ფასი 5 ლარია.
ხარიტონ ახვლედიანის მუზეუმში:
12:00 საათიდან 16:00 საათამდე, ახალგაზრდა ხელოვანის სულხან შაქარაძის მუყაოსგან დამზადებული ყვავილების, მანქანების, ბინების მაკეტების გამოფენა გიამართება. გამოფენა დღეს დასრულდება.
კონოთეატრ „აპოლოში“:
ევროკავშირის ფილმების ჩვენება 16 თებერვალს დასრულდება. დღეს ნაჩვენები იქნება ლატვიის ფილმი „დედა, მე შენ მიყვარხარ“. ფილმი ქართული და ინგლისური სუბტიტრებით იქნება.
„აპოლოში“ ასევე ნახავთ
12:00 საათზე – ტარზანი 3D – 7 ლარი
14:00 საათზე – ტარზანი 3D – 7 ლარი
16:00 საათზე – ფრანკენშტეინი 3D – 8 ლარი
18:00 საათზე – ევროკავშირი ფილმი – დედა, მე შენ მიყვარხარ – 0 ლარი
22:00 საათზე – უოლ სთრითის მგელი 3D – 8 ლარი
ავტობუსის მძღოლებსა და თვითმმართველობას შორის შეთანხმება არ შედგა
შეხვედრაზე ავტოტრანსპორტის პროფკავშირის ხუთი წარმომადგენელი, შპს „ავტოტრანსპორტის“ დირექტორი გია ლორია, საკრებულოს თავმჯდომარე ირაკლი ჩავლეიშვილი, ქალაქის ვიცე-მერები, აჭარის პროფკავშირების ხელმძღვანელი ილია ვერძაძე და არასამთავრობო ორგანიზაციის წევრები იმყოფებოდნენ.
გაფიცულ მძღოლებს ორი ძირითადი მოთხოვნა ჰქონდათ: ხელფასების გაზრდა, საათში 50 თეთრით და ავტოტრანსპორტის დირექტორის გია ლორიას თანამდებობიდან გადაყენება.
მოთხოვნა ქალაქის თვითმმართველობამ არ დააკმაყოფილა. რის შემდეგაც ავტოტრანსპორტის პროფკავშირის წარმომადგენლებმა პროტესტის ნიშნად შეხვედრა დატოვეს.
მძღოლები გია ლორიას მმართველობას იწუნებენ და უპატივცემულობაში ადანაშაულებენ, რასაც მისი თანამდებობიდან გადაყენების მოთხოვნის მთავარ მიზეზად ასახელებენ.
„მამისტოლა კაცს გინებით მესაუბრება, თუმცა მან დღეს შეხვერდაზე ეს უარყო“- გამოთქვა პროტესტი ერთ-ერთმა მძღოლმა ფერული ცინცაძემ.
„მე განვუცხადე ირაკლი ჩავლეიშვილს არ შეიძლება ისეთი ადამიანი იყოს საწარმოს დირექტორი ვინც დედას აგინებს თანამშრომლებს. შეთანხმებას ვერ მივაღწიეთ იმიტომ, რომ საკრებულოს თავმჯდომარე გია ლორიას მფარველობს,“ – განაცხადა ბათუმის ავტოტრანსპორტის პროფკავშირების თავმჯდომარემ ემზარ გოგიტიძემ.
საკრებულოს თავმჯდომარე მძღოლების პროტესტის დაკმაყოფილებას ინტერფრაქციული ჯგუფის შექმნით აპირებს.
„შევთავაზებთ, რომ შეიქმნება ინტერფრაქციული ჯგუფი, რომელიც ამ საკითხს თავიდან ბოლომდე შეისწავლის. განიხილავს მათ მოთხოვნებს – სახელფასო საკითხს, მათთვის გარკვეული ფართის გამოყოფასა და კოლექტიური ხელშეკრულების საკითხებს, რასაც ასევე მოითხოვენ. ჯგუფში იქნება, როგორც ბათუმის მერიისა და საკრებულოს, ასევე მათი წარმომადგენლებიც. კომისიის მუშაობის შემდეგ, თუ საჭირო გახდა დადგება ნებისმიერი ადამიანის პასუხისმგებლობის საკითხი,“ – განაცხადა შეხვედრის ბოლოს ირაკლი ჩავლეიშვილმა.
პროფკავშირებმა განაცხადეს, რომ ინტერაქციულ ჯგუფის შექმნას და მათი საკითხის ამ გზით გადაჭრას დიდი დრო სჭირდება, ამიტომ აქციის გაგრძელებას შიმშილობით გეგმავენ.
შეგახსენებთ, რომ ბათუმში ავტობუსების მძღოლები მესამე დღეა გაფიცულები არიან. ქალაქში ყოველდღიურად მოძრავი 140 ავტობუსიდან არ ერთი არ ასრულებს სატრანსპორტო რეისებს. მათ ნაცვლად კი მგზავრები შეღავათიან ფასად – 30 თეთრად, მიკროავტობუსებით სარგებლობენ.
აჭარის სპორტული ფედერაციები ყურადღებას ითხოვენ
ბათუმის სპორტული სკოლის ხელმძღვანელმა მუხრან ვახტანგაძემ აღნიშნა, რომ გარდა ფინანსური სიმწირისა, აჭარაში სპორტი უყურადღებობას განიცდის.
შეხვედრას აჭარის განათლების, კულტურისა და სპორტის მინისტრი გიორგი თავამაიშვილიც ესწრებოდა. მან სპორტის მოღვაწეებს უყურადღებობისთვის ბოდიში მოუხადა.
შეხვედრაზე ასევე მწვრთნელების კვალიფიკაციის ამაღლებასა და საქართველოს დამსახურებული მწვრთნელების ყოველთვიურად 150 ლარით ანაზღაურებაზეც ისაუბრეს. ბერძნულ-რომაული ჭიდაობის მწვრთნელ ლევან შავაძის ინფორმაციით აჭარაში სულ საქართველოს ექვსი დამსახურებული მწვრთნელია.
გიორგი თავამაიშვილი ფედერაციებს დაფინანსების გაზრდას შეჰპირდა, თუმცა დასძინა, რომ ამ პრობლემის მოგვარება იოლი არ არის.
„ყველა ქალი ფემინისტია“
“ვინ ვარ? ალბათ ვერშემდგარი საერთაშორისო ურთიერთობის სპეციალისტი, რომელსაც ძალიან უყვარს მუსიკა, კინო, თეატრი და ზოგადად ხელოვნება.” – ასე იწყებს საკუთარ თავზე საუბარს 22 წლის კაპელდინერი მარიამ სალუქვაძე. მარიამი კაპელდინერად ხელოვნების ცენტრში გახსნის დღიდან მუშაობს. ამბობს, რომ არ უყვარს თავის სამუშაოზე საუბარი: “ჩემი მოვალეობაა დარბაზში შევხვდე ხალხს, მივესალმო და მივუთითო მათი ადგილები რომელ მხარესაა. ზოგჯერ მკაცრიც ვარ, ხშირად ვიძლევი შენიშვნებს ხმაურისას. რაზეც ვოცნებობდი, ის სამსახური არ არის, დადებითი რაც აქვს, არის ის, რომ უყურებ ყველაფერს რასაც აჩვენებენ. საკუთარი თავის რეალიზებას ვერ ახდენ, პასუხობ მარტივ შეკითხვებზე. მე მინდა შემოქმედებითად გავიზარდო, ამისთვის ბევრ რამეს ვაკეთებ.”
მარიამი ექვსი თვის განმავლობაში აჭარის ტელევიზიის “დილის ტალღაში” რეპორტიორად მუშაობდა: “აჭარის ტელევიზიაში კარგა ხანს უნდა იყო სტაჟიორი, რომ აგიყვანონ, ადრეც ვიყავი იქ სტაჟიორად ცოტა ხნით, უნივერსიტეტის გამო ვერ ვახერხებდი, თან ვხედავდი, რომ ნაკლები იყო შანსი ჩემი აყვანის, ამიტომაც წამოვედი. შემდეგ, როცა რეორგანიზაცია მოხდა, დამირეკეს და შემომთავაზეს სტაჟირება. ექვსი თვე ველოდებოდი, რომ ამიყვანდნენ, დავიღალე და წამოვედი. ალტრუიზმია როგორც ასეთი, დიდხანს მოხალისეობრივი ცხოვრება მოსაბეზრებელია, როცა მთელ სულს და გულს დებ იმაში, რასაც აკეთებ და ვერ იღებ შედეგს. მატერიალური ინტერესიც მაქვს, 22 წლის ვარ, ფულის გარეშე ვერაფერს გააკეთებ, ვერ წახვალ თეატრში, კინოში და საერთოდ ვერ გააკეთებ იმას, რაც გინდა.” – ამბობს მარიამი.
“დაკარგული ოთხი წელი” მარიამისთვის საერთაშორისო ურთიერთობების შესწავლისთვის საჭირო პერიოდია: “ხელოვნების უნივერსიტეტში მინდოდა ჩაბარება, მშობლებმა არ ჩამაბარებინეს, სხვა ვერსად წარმომედგინა თავი, სულერთი იყო რაზე ვისწავლიდი. ყველა დანარჩენს ისევ დიპლომატია ვარჩიე, რადგან ახალი სპეციალობა იყო. პირველი კურსი იყო ჩემთვის ტანჯვა-წამება, საერთოდ არ მაინტერესებდა რასაც მასწავლიდნენ, მერე შევეჩვიე. მაგისტრატურას ხელოვნების უნივერსიტეტში ვისწავლი, სავარაუდოდ ხელოვნების მენეჯმენტს.”
უნივერსიტეტში მარიამმა კინოკლუბი შექმნა, რომლითაც სტუდენტების დაინტერესებას სამი წლის განმავლობაში ცდილობდა: “როცა პატარა ვიყავი, მე და მამაჩემი ერთად ვუყურებდით ფილმებს, მას შემდეგ შემიყვარდა ფილმები. კინოკლუბი იმის გამო გავაკეთე, რომ მინდოდა არა ჰოლივუდური, არამედ ევროპული ფილმები გვენახა, რომელიც არის უფრო მეტად ღირებული და ბევრი სიახლის მომცემი. ჩემთვის მტკივნეული თემაა, უნივერსიტეტი შესაბამისი ტექნიკით ვერ გვამარაგებდა, მე და ჩემს ორ მეგობარს გვიწევდა ყველაფერზე სირბილი. თან მაქსიმუმ 10-12 ბავშვი თუ ესწრებოდა კინოჩვენებებს, ისევ ჩემი მეგობრები, რომლებიც ჩემი ხათრით დადიოდნენ.”
ამბობს, რომ არამყარი ხასიათი აქვს, რადგან ყველაზე ხშირად შეხედულებები ეცვლება: “კოსმოსური სისწრაფით მეცვლება ხასიათი, ყველაფერი მოქმედებს _ გარემო, ამინდი, სამსახური, მუსიკა. ყველაზე მეტად მაინც მუსიკა მოქმედებს, რადგან ჩემთვის ყველაფერია, მუსიკას ვუსმენ ყველგან, სადაც ამის საშუალება მეძლევა. ქუჩაში ყოველთვის ყურსასმენებით დავდივარ, ამის გამო ყველა მეჩხუბება: – რომ გეძახდი რატომ არ გამომხედე? რატომ არ მესალმები? – ზოგს ამის გამო ამპარტავანი ვგონივარ, არადა მე უბრალოდ საყვარელ მელოდიას ვუსმენ. მუსიკაშიც არამდგრადი ვარ, ვუსმენ ყველა ჟანრს რაც კი არსებობს, მომწონს კლასიკა, პოპი, მეტალი. გააჩნია, როგორ განწყობაზე ვარ.”
მარიამი ფემინისტია. არ მოსწონს ფემინიზმის ის აღქმა, რაც საქართველოში აქვთ: “ფემინისტები ჰგონიათ ლესბოსელები, ეკლესიის მოწინააღმდეგეები. ნებისმიერი ქალია ფემინისტი, არც ერთ ქალს არ მოსწონს, როცა მასზე მბრძანებლობენ ან ცუდად ექცევიან. ფემინიზმი ეს არის თანასწორობის, თანაბარი შესაძლებლობების სურვილი. ისიც არ იციან, რომ ორგვარი ფემინიზმი არსებობს: რადიკალური და ლიბერალური. რადიკალურს აქვს მკაცრი მოთხოვნები, გათხოვება მათთვის არის მამაკაცის მონობა. მე ლიბერალი ფემინისტი ვარ, რაც სულ სხვა რამაა, აქ არის გენდერულ თანასწორობაზე საუბარი, რაც ეხება კარიერას და განათლების მიღების შესაძლებლობას, ქალსა და კაცს უნდა ჰქონდეს ერთნაირი უფლებამოსილება.” – ამბობს მარიამი.
მარიამისთვის ყველაზე მნიშვნელოვანია ის, თუ როგორ გამოიყურება, ყველა სტილის მორგებას ახერხებს, ერთადერთი რასაც ვერ ეგუება, ეს მაღალქუსლიანი ფეხსაცმელია, ამბობს, რომ თავს არაკომფორტულად გრძნობს: “წითელი პომადა განსაკუთრებულად მიყვარს, როცა ცუდ ხასიათზე ვარ, მაშინ აუცილებლად უნდა მესვას. სულ ვიპრანჭები, დილას მაკიაჟით ვიწყებ, მომწონს, როცა კარგად გამოვიყურები, სარკეში რომ ჩავიხედავ, საკუთარი თავი უნდა მომეწონოს, არც ბევრი დრო მჭირდება მოწესრიგებისთვის. ჩემს ხელფასს კოსმეტიკასა და წიგნებში ვხარჯავ.”
გარდერობში ყველანაირი სტილის ტანსაცმელი აქვს, ფერების არევა არ უყვარს: “არ გამოვდივარ გარეთ, თუ წითელი ფერი არ ურევია ან ჩემს სამოსში ან მაკიაჟში. უფრო ხშირად შავი ფერი დომინირებს, ფერების არევა არ მიყვარს.” – ამბობს მარიამი.
მარიამი ოცნებობს პატარა საკონდიტრო მაღაზიის გახსნაზე: “მინდა ძალიან ლამაზი ქაფქეიქები იყიდებოდეს ჩემს მაღაზიაში, რომელიც სიხარულს და სიამოვნებას მოგვრის ხალხს. მაღაზიას ალბათ რომელიმე სიმღერის სახელს დავარქმევ. დიდი ფინანსები არ სჭირდება ჩემს ამ იდეას, ამ დროისთვის მშობლების იმედი მაქვს, თუ დამეხმარებიან, განვახორციელებ.” – ამბობს მარიამი.
“Notre-Dame de Paris” ბათუმში
სპექტაკლს ბათუმის სახელმწიფო მუსიკალური ცენტრის ახალგაზრდული მუსიკალური თეატრი წარმოადგენს.
სპექტაკლის რეჟისორი ტიგრან გასპარიანია, დამდგმელი ქორეოგრაფი _ ზურაბ სვანაძე, დამდგმელი მხატვარი _ ვაჰაგნ ტევანიანი, არანჟირება და გაორკესტრება კი მინდია ხითარიშვილისაა.
მიკროავტობუსებით მგზავრობისას მგზავრები 30 თეთრს გადაიხდიან
„ჩემი კომპანიის ყველა მძღოლი გავაფრთხილე, ავტობუსის ფასად ამგზავრონ მოქალაქეები. სპეციალურ განცხადებას სამწუხაროდ ვერ გამოვაკრავთ მარშუტკებში, მაგრამ მოქალაქეების ინფორმირებას სხვადასხვა გზებით ვცდილობთ,“ – განაცხადა შპს „მწვანე შუქის“ ხელმძღვანელმა ნოდარ ფუტკარაძემ.
ბათუმში მიკროავტობუსებით მგზავრთა გადაყვანას ოთხი კომპანია ახორციელებს. აქცია ყველა კომპანიის კუთვნილ მიკროავტობუსებით მგზავრობაზე ვრცელდება.
ბათუმში შპს „ავტოტრანსპორტის“ ავტობუსის მძღოლები მესამე დღეა გაფიცულები არიან. ისინი ხელფასების გაზრდას ითხოვენ.
კორუფციის კვლევის პრეზენტაცია ბათუმში
ორგანიზაციის მთავარმა ანალიტიკოსმა ერეკლე ურუშაძემ ისაუბრა კვლევაზე სახელწოდებით: „პოლიტიკოსები ბიზნესში და ბიზნესი პოლიტიკაში“:
„ამ თემაზე იმიტომ გავამახვილეთ ყურადღება, რომ ის კორუფციის ერთ-ერთ წყაროდ იქცევა ხოლმე. აღმოვაჩინეთ, რომ კომპანიები, ბიზნესმენები, რომლებიც დაკავშირებული არიან თანამდებობის პირებთან, მთელი რიგი შეღავათებით სარგებლობენ სახელმწიფოსგან. ჩვენი რეკომენდაციაა, მაქსიმალურად შეიზღუდოს სუბიექტური გადაწყვეტილებების შესაძლებლობა სახელმწიფო ორგანოებში. სახელმწიფო შესყიდვები არ უნდა ტარდებოდეს ტენდერის ავლით, პრივატიზება აუქციონის გზით უნდა ხდებოდეს და არა პირდაპირი მიყიდვის წესითა და კომპანიების თვითნებურად შერჩევით.“
გამარტივებული შესყიდვების შესახებ ისაუბრა „გამჭვირვალობის“ კიდევ ერთმა ანალიტიკოსმა გიორგი ჭანტურიამ:
„კვლევის ფარგლებში გავაანალიზეთ 450 ათასი გამარტივებული კონტრაქტი. მათ შორის ბათუმის მერიის მიერ დადებული კონტრაქტები. აღმოჩნდა, რომ არჩევნების პერიოდში ბათუმის მერია აქტიურად აწარმოებდა გამარტივებულ ანუ არაკონკურირებად შესყიდვებს“.
მიუხედავად იმისა, რომ არსებობს საკანონმდებლო ნორმები, რომლებიც თანამდებობის პირთა ინტერესთა კონფლიქტებს არებულირებს ბიზნესში, გამჭვირვალობის ანალიტიკოსები მიიჩნევენ, რომ ეს ნორმები არ ხორციელდება პრაქტიკაში. კანონმდებლობის შეცვლის რეკომენდაციით ისინი საქართველოს პარლამენტს მიმართავენ.
სამომავლოდ „საერთაშორისო გამჭვირვალობა საქართველო“ ამ კუთხით რეგიონული მონაცემების კვლევას გეგმავს.
კორპუსებში ინდივიდუალური წყალმზომი მრიცხველების დამონტაჟება იწყება
პროექტის ფარგლებში გაუქმდება საერთო მოხმარების ძველი, ამორტიზებული მილები და ახალი მილები დამონტაჟდება.
„აბონენტთა კუთვნილ ქსელებში დანაკარგების მინიმუმამდე შესამცირებლად საჭიროა შიდა და საერთო კომუნიკაციის მოწესრიგება. საჭიროების შემთხვევაში საერთო მოხმარების აღმავალ-დაღმავალი მილების შეცვლას კომპანია ბათუმის წყალი უზრუნველყოფს,” – ნათქვამია „ბათუმის წყლის“ მიერ გავრცელებულ პრესრელიზში.
შიდა კომუნიკაციის მოსაწესრიგებლად მოსახლეობას მიეცემა ერთთვიანი საცდელი პერიოდი, მოხმარებული წყლის ზუსტი აღრიცხვის მიზნით. გადასახადის დარიცხვა კი მომდევნო თვიდან დაიწყება.
საცხოვრებელ ფართობში არსებული შიდა ქსელის გაუმართაობის შემთხვევაში, შპს „ბათუმის წყლის“ თანამშრომლები უზრუნველყოფენ კონსულტაციის გაწევას ინდივიდუალურად, რათა თავიდან იქნას აცილებული წყლის ზედმეტ დანახარჯთან დაკავშირებული გაუგებრობები. რაც შეეხება წყლის მრიცხველისა და მის მონტაჟთან დაკავშირებულ სამუშაოების ხარჯებს, მას ბათუმის მერია დაფარავს.
პროექტის საერთო ბიუჟეტი 6.8 მილიონ ევროს შეადგენს, აქედან 4.5 მილიონი ევრო ევროკავშირმა, 0.7 მილიონი _ გერმანიის განვითარების ბანკმა, ხოლო 1.6 მილიონი ქალაქ ბათუმის მერიამ გამოყო. სამუშაოები 2015 წლის ბოლომდე გაგრძელდება.
„ელექტრას“ პრემიერა ბათუმში
მიშა, რატომ გადაწყვიტეთ ანტიკური ტექსტის დადგმა?
იმიტომ, რომ ანტიკური ტექსტი ყოველთვის ახალია, არ ძველდება, გაძლევს შენი ვერსიების განხორციელების საშუალებას და ეს ძალიან საინტერესოა. გარდა ამისა, მე მგონია, რომ ეს თემა აქტუალურია. `ელექტრა~ ღიად პოლიტიკური პიესაა და ლაპარაკია არა მხოლოდ პოლიტიკური ნიშნით, არამედ ზოგადად ანგარიშსწორებაზე. ჩემი აზრით, დღეს საქართველოში მიმდინარე პოლიტიკური მოვლენების პარალელურად თეატრიც უნდა ლაპარაკობდეს იმაზე, თუ რა ხდება ქვეყანაში.
მედიასთან აღნიშნეთ, რომ ეს სპექტაკლი არის აგრესიული პროტესტი. რას აპროტესტებთ?
ვაპროტესტებ იმას, რაც ამდენი წელია ხდება ჩვენს თავს, რომ არაფრით არ დამთავრდა, არ დალაგდა და ვერ დაიწყო ქვეყანამ ნორმალურად ცხოვრება. მე არ ვიცი კონკრეტულად ვისკენ არის ეს პროტესტი მიმართული, ერთი მხრივ საზოგადოებისკენ, მეორე მხრივ პოლიტიკისკენ, ქვეყნის მმართველობისკენ, რომელმაც ვერ მოახერხა ის, რომ ქვეყნისთვის ნორმალური საცხოვრებელი პირობები შეექმნა.
მე 1990 წელს დავიბადე, იქედან მოყოლებული მთელი ქვეყანა არის პოლიტიზებული, იმიტომ, რომ სხვა გამოსავალი არ აქვთ, უბრალოდ, არ შეუძლიათ ამის გარეშე იცხოვრონ და ყოველდღიური რეალობა არის ის, რომ აინტერესებთ რა ჰქვიათ იმ ადამიანებს, ვინც მათ ცხოვრებას განაგებენ. ჩემთვის ეს სპექტაკლი აგრესიული პროტესტი იქნება იმიტომ, რომ მგონია, ასეთ ისტორიაში, როგორც ჩვენ, ქვეყნის ცხოვრება ბოლო 20-24 წელია ვითარდება, არ შეიძლება მშვიდად ვისხდეთ და ვლაპარაკობდეთ გრძნობებსა ან მოვლენებზე. ამიტომ გადავწყვიტე ზუსტად ამ ტექსტის დადგმა, მინდა, რომ დავსვა საკითხები და მოვთხოვო, პირველ რიგში საზოგადოებას პასუხი ამაზე, რატომ არის ჩვენი ცხოვრება ასეთი, რატომ ვერ ვახერხებთ მშვიდად ცხოვრებას.
რას უნდა ელოდეს მაყურებელი?
რა თქმა უნდა, სპექტაკლი კლასიკური დადგმისგან ძალიან შორსაა. ეს ჩემი ექსპერიმენტია, ვცდილობ, ავიღო კლასიკური ტექსტი და გავაკეთო ამ ტექსტის ახალი, თანამედროვე გააზრება. მაყურებელი უნდა ელოდეს `ელექტრას~ თანამედროვე კონტექსტს, უნდა ელოდეს ანტიკურ პიესას, რომელიც დღესაც, ამდენი საუკუნის შემდეგ, ისეთივე აქტუალურია, როგორც იყო მაშინ და, ჩემი აზრით, კიდევ უფრო აქტუალურიც. უნდა ელოდნენ, რომ ნახავენ ძველ პიესას საკუთარ თავზე, თავიანთ დროზე.
ვინ ასრულებს სპექტაკლში მთავარ როლს?
მეგი კობალაძე თამაშობს ელექტრას. სპექტაკლისთვის მუსიკა დაწერა ნიკა ფასურმა, ლევან ოჩხიკიძეა მხატვარი და ეს არის „ელექტრას“ ახალი, ორიგინალი თარგმანი, ტექსტი დათო გაბუნიამ თარგმნა სპეციალურად ამ დადგმისთვის.
უფასო სამედიცინო გამოკვლევები შუახევში
ვიზიტის ფარგლებში პროფესორმა გოროხოვმა უფასო სამედიცინო გამოკვლევები უკვე ჩაატარა ქედის მუნიციპალიტეტში.
ასევე უფასო სამედიცინო გამოკვლევები დაგეგმილია ხულოსა და ქობულეთში. ხულოს მუნიციპალიტეტში არსებულ პირველად ჯანდაცვის დაწესებულებაში გამოკვლევები 19 თებერვალს ჩატარდება, 20 თებერვალს კი _ ქობულეთში, ჩაისუბნის პირველადი ჯანდაცვის ცენტრში.
აჭარის ტურიზმის დეპარტამენტი ტალინის ტურისტულ გამოფენაზე
გამოფენა 1991 წლიდან ტარდება ტალინში და მასში 25-ზე მეტი ქვეყანა მონაწილეობს. ბალტიისპირეთის ქვეყნები საქართველოს ტურიზმის ეროვნული ადმინისტრაციის მიერ 2014 წლის მნიშვნელოვან ტურისტულ ბაზრად სახელდება. აჭარის ტურიზმისა და კურორტების დეპარტამენტი მიმდინარე წელს ბალტიისპირეთის ქვეყნებში სხვადასხვა მარკეტინგულ ღონისძიებას გეგმავს.
გამოფენა 16 თებერვალს დასრულდება.