Batumelebi | ხელისუფლება წინასაარჩევნოდ მიწის რეფორმას გეგმავს ხელისუფლება წინასაარჩევნოდ მიწის რეფორმას გეგმავს – Batumelebi
RU | GE  

ხელისუფლება წინასაარჩევნოდ მიწის რეფორმას გეგმავს

 

აჭარის მთავრობისა და უმაღლესი საბჭოს წევრები პრემიერ-მინისტრს თვითმმართველობის მოახლოებულ არჩევნებთან დაკავშირებით  შეხვდნენ. როგორც უმაღლესი საბჭოს წევრი ანზორ თხილაიშვილი „ბათუმელებთან“ საუბარში აცხადებს, ძირითადი საკითხი, რომელიც პრემიერთან განიხილეს, კოალიციაში შემავალი პარტიების კვოტები იყო. 

„ბუნებრივია, ყველა პარტიას აღელვებს რამდენ ადამიანს გაiყვანს საკრებულოებში და როგორ გადანაწილდება ადგილები საარჩევნო შტაბებში. საუბარი იყო იმაზეც, რომ რაიონებში, სოფლებში არ არის ცვლილებები და პატრიოტი ადამიანები უმუშევრები არიან, ასე რომ  მობილიზება სჭირდება მთელ გუნდს.  შენიშვნები იყო აჭარის მთავრობასა და უმაღლეს საბჭოს  შორის კომუნიკაციის საკითხზეც. თუმცა, არჩილ ხაბაძემ და უმაღლესი საბჭოს წევრებმაც  დადეს პირობა, რომ თვეში ორჯერ შეხვდებიან ერთმანეთს“.

 

 

კომუნიკაციის გაუმჯობესების პირობა უმაღლესი საბჭოსა და აჭარის მთავრობის წევრებმა  გასულ წელს ბიძინა ივანიშვილსაც მისცეს. თუმცა, როგორც თხილაიშვილი აცხადებს, „მსგავსი სირთულეები ახლავს მრავალპარტიულ კოალიციას“.  

 

 

გარდა საარჩევნო კვოტებისა, როგორც დეპუტატი აცხადებს, მან პრემიერთან მიწის დაუსრულებელ რეფორმაზეც ისაუბრა და გარანტიები მიიღო, რომ წელს დაახლოებით 10 ათასი ოჯახი მიწას მიიღებს.

 

 

„ვფიქრობ, რომ მიწის საკითხს ნამდვილად მოვასწრებთ წელს და ათი ათას კაცს მიწას გადავცემთ ქობულეთსა და ხელვაჩაურში.  ქალაქის საზღვრებში მოქცეული მოსახლეობა კი ცალკე განხილვის საგანი იქნება. მთავარია, ეს დავძრათ და მიყოლებით არ დარჩება არც ერთი ოჯახი მიწის გარეშე. მთავარია, რომ დაჩქარებული ტემპით, სწრაფად, ამ საგაზაფხულო სესიაზე შეგვიძლია მარტის ბოლომდე გავიტანოთ საკითხი და ამის შემდეგ გადავცეთ საქართველოს პარლამენტს. პრემიერი დამეთანხმა და ძალიან აქტუალურად მიიღო ამ საკითხის დასმა“-განაცხადა ანზორ თხილაიშვილმა.

 

 

  ანზორ თხილაშვილის თქმით, მან პრემიერთან ციტრუსის სუბსიდირებისა და სოციალურად დაუცველი ოჯახებისთვის სტატუსის მინიჭების ფორმულაზეც ისაუბრა.  „ვფიქრობ, სტატუსის მინიჭების კოეფიციენტი უნდა გადაიხედოს, რადგან დღეს მოქმედი ნორმები არ აძლევს სოციალურად დაუცველ ოჯახებს განვითარების შესაძლებლობას.  100 და თუნდაც ათასლარიანი შემოსავალი არ უნდა გახდეს სოციალური დახმარების შეწყვეტის მიზეზი. უნდა დადგინდეს შემოსავლის ზედა ზღვარი“.    

 

 

შეხვედრა პრემიერთან

 

 

სტატია გასწორებულია. 

ნეტგაზეთის მასალების სხვა გამოცემებში გადაბეჭდვის წესი
ლელა დუმბაძე