Batumelebi | „ელექტრას“ პრემიერა ბათუმში „ელექტრას“ პრემიერა ბათუმში – Batumelebi
RU | GE  

„ელექტრას“ პრემიერა ბათუმში

 

14 თებერვალს, საღამოს 7 საათზე, ბათუმის დრამატულ თეატრში პრემიერა შედგება. სოფოკლეს „ელექტრა“ რეჟისორმა მიშა ჩარკვიანმა დადგა. დასი სპექტაკლზე ორ თვე-ნახევარი მუშაობდა.  „ბათუმელები“ მიშა ჩარკვიანს ესაუბრა. 

 

 

მიშა, რატომ გადაწყვიტეთ ანტიკური ტექსტის დადგმა?

 

იმიტომ, რომ ანტიკური ტექსტი ყოველთვის ახალია, არ  ძველდება, გაძლევს შენი ვერსიების განხორციელების საშუალებას და ეს ძალიან საინტერესოა. გარდა ამისა, მე მგონია, რომ ეს თემა აქტუალურია. `ელექტრა~ ღიად პოლიტიკური პიესაა და ლაპარაკია არა მხოლოდ პოლიტიკური ნიშნით, არამედ ზოგადად ანგარიშსწორებაზე. ჩემი აზრით, დღეს საქართველოში მიმდინარე პოლიტიკური მოვლენების პარალელურად თეატრიც უნდა ლაპარაკობდეს იმაზე, თუ რა ხდება ქვეყანაში.

 

მედიასთან აღნიშნეთ, რომ ეს სპექტაკლი არის აგრესიული პროტესტი. რას აპროტესტებთ?

 

 

ვაპროტესტებ იმას, რაც ამდენი წელია ხდება ჩვენს თავს, რომ არაფრით არ დამთავრდა, არ დალაგდა და ვერ დაიწყო ქვეყანამ ნორმალურად ცხოვრება. მე არ ვიცი კონკრეტულად ვისკენ არის ეს პროტესტი მიმართული, ერთი მხრივ საზოგადოებისკენ, მეორე მხრივ პოლიტიკისკენ, ქვეყნის მმართველობისკენ, რომელმაც ვერ მოახერხა ის, რომ ქვეყნისთვის ნორმალური საცხოვრებელი პირობები შეექმნა.

 

 

მე 1990 წელს დავიბადე, იქედან მოყოლებული მთელი ქვეყანა არის პოლიტიზებული, იმიტომ, რომ სხვა გამოსავალი არ აქვთ, უბრალოდ, არ შეუძლიათ ამის გარეშე იცხოვრონ და ყოველდღიური რეალობა არის ის, რომ აინტერესებთ რა ჰქვიათ იმ ადამიანებს, ვინც მათ ცხოვრებას განაგებენ. ჩემთვის ეს სპექტაკლი აგრესიული პროტესტი იქნება იმიტომ, რომ მგონია, ასეთ ისტორიაში, როგორც ჩვენ, ქვეყნის ცხოვრება ბოლო 20-24 წელია ვითარდება, არ შეიძლება მშვიდად ვისხდეთ და ვლაპარაკობდეთ გრძნობებსა ან მოვლენებზე. ამიტომ გადავწყვიტე ზუსტად ამ ტექსტის დადგმა, მინდა, რომ დავსვა საკითხები და მოვთხოვო, პირველ რიგში საზოგადოებას პასუხი ამაზე, რატომ არის ჩვენი ცხოვრება ასეთი, რატომ ვერ ვახერხებთ მშვიდად ცხოვრებას.

 

 

რას უნდა ელოდეს მაყურებელი?

 

 

რა თქმა უნდა, სპექტაკლი კლასიკური დადგმისგან ძალიან შორსაა. ეს ჩემი ექსპერიმენტია, ვცდილობ, ავიღო კლასიკური ტექსტი და გავაკეთო ამ ტექსტის ახალი, თანამედროვე გააზრება. მაყურებელი უნდა ელოდეს `ელექტრას~ თანამედროვე კონტექსტს, უნდა ელოდეს ანტიკურ პიესას, რომელიც დღესაც, ამდენი საუკუნის შემდეგ, ისეთივე აქტუალურია, როგორც იყო მაშინ და, ჩემი აზრით, კიდევ უფრო აქტუალურიც. უნდა ელოდნენ, რომ ნახავენ ძველ პიესას საკუთარ თავზე, თავიანთ დროზე.

 

 

ვინ ასრულებს სპექტაკლში მთავარ როლს?

 

 

მეგი კობალაძე თამაშობს ელექტრას. სპექტაკლისთვის მუსიკა დაწერა ნიკა ფასურმა, ლევან ოჩხიკიძეა მხატვარი და ეს არის „ელექტრას“ ახალი, ორიგინალი თარგმანი, ტექსტი დათო გაბუნიამ თარგმნა სპეციალურად ამ დადგმისთვის.   

 

ნეტგაზეთის მასალების სხვა გამოცემებში გადაბეჭდვის წესი
„ბათუმელები"