Batumelebi

თურქეთიდან საქართველოში, სარფის საბაჟოზე შემოსასვლელად მოქალაქეებს დიდ რიგში დგომა უწევთ. კონკრეტულ მიზეზებს, თუ რა ქმნის პრობლემას, რიგში მდგომ მოქალაქეებს არ ეუბნებიან. ბათუმში მდებარე თურქეთის საკონსულოში „ბათუმელებს” უთხრეს, რომ მათი ინფორმაციით, ეს შეფერხება მხოლოდ ზაფხულის სეზონს შეიძლება უკვაშირდებოდეს, როცა მიმოსვლა ინტენსიურია, თუმცა რიგში მდგომი მოქალაქეები ამბებობენ, რომ მსგავსი რიგები საზღვრის გადასაკვეთად წინა წლებში არ ყოფილა.

ეს პირველი შემთხვევა არ არის, როცა სარფის საბაჟოზე თურქეთის მხრიდან მოქალაქეების გადმოსვლა ფერხდება.

ქედის საფეხბურთო კლუბ „ბეთლემის“ დირექტორად სულხან ჯიჯავაძე მას შემდეგ დაინიშნა, რაც საფეხბურთო კლუბში მოთამაშე ოთხ ფეხბურთელსა და მწვრთნელ-ასისტენტს საქართველოს ფეხბურთის ფედერაციამ დისკვალიფიკაცია მისცა, ხოლო კლუბს სანქციის სახით 50 000 ლარის გადახდა დააკისრა სპორტული მანიპულირებისთვის. შეიცვალა როგორც გუნდის შემადგენლობა, ასევე მთავარი მწვრთნელი და მწვრთნელ-ასისტენტიც. პირველ ლიგაში მოთამაშე გუნდი ფედერაციის გადაწყვეტილებით ჩამოქვეითდა და ასპარეზობას მეორე ლიგაში განაგრძობს.

საქართველოს ფეხბურთის ფედერაციამ ქედის საფეხბურთო კლუბ „ბეთლემის“ თხოვნა, გუნდისთვის საჯარიმო სანქცია – 50 000 ლარი მოეხსნა, რადგან გუნდი თანხის გადახდას ვერ შეძლებდა და არსებობას შეწყვეტდა, გაითვალისწინა, „ბეთლემს“ სანქცია მოუხსნა და ფულადი ჯარიმისაგან გაათავისუფლა.

სანქციის მოხსნის შემდეგ ცვლილებები გატარდა როგორც გუნდის შემადგენლობაში, ასევე ადმინისტრაციაშიც. კლუბის ყოფილი დირექტორი, გამგებლის ერთ-ერთი მოადგილის მამა, ნაზიმ ფარტენაძე, „ბეთლემის“ უსაფრთხოების სამსახურის უფროსმა და ქედის სასპორტო სკოლის ბაზაზე არსებული თავისუფალი ჭიდაობის მწვრთნელმა, სულხან ჯიჯავაძემ ჩაანაცვლა. შეიცვალა კლუბის მთავარი მწვრთნელი, ამ პოზიციაზე ავთანდილ კუნჭულია ბათუმის „დინამოს“ ბავშვთა გუნდის მწვრთნელმა ამირან გოგიტიძემ შეცვალა, დისკვალიფიცირებული მწვრთნელ-ასისტენტი რომა ქობულაძე კი ირაკლი ბარამიძემ ჩაანაცვლა, რომელიც „ბეთლემის“ ბავშვთა ასაკობრივი გუნდის მწვრთნელის პოზიციაზე მუშაობდა. შეიცვალა გუნდის მეკარეც, ლევან ბექთაშევი ადი მაქაცარიამ შეცვალა.
გუნდს 14 ახალი ფეხბურთელი ჰყავს, ძველი შემადგენლობიდან გუნდში მხოლოდ სამი ქედელი ფეხბურთელი – ელიზბარ ერქომაიშვილი, ჯაბა გორგაძე და რუსლან ბარამიძე თამაშობს.

„ბეთლემის“ დირექტორი ამბობს, რომ გუნდის ძირითადი ბირთვი ჩამოყალიბდა, თუმცა რეორგანიზაცია არ დასრულებულა. ის აქვე დასძენს, რომ ხელშეკრულება მხოლოდ ძირითად ფეხბურთელებთან გააფორმეს.

„14 ახალი ფეხბურთელი გვყავს, გუნდის ძირითადი შემადგენლობა ცნობილია და თერთმეტივე ფეხბურთელთან გავაფორმეთ ხელ¬შეკრულება, სახელფასო ფონდი კი 18 ფეხბურთელზეა გათვლილი. ძირითადი მოთამაშეები არიან: ადი მაქაცარია, ნიკოლოზ ჩიხლაძე, რომეო კანკია, ლაშა რამიშვილი, გელოდი ფალავანდიშვილი, ვიტალი დარჩიძე, ტატო აბუსერიძე, ბესო დემურაძე, შაქრო დუმბაძე, ზაზა ტუღუში და მირზა ფარტენაძე. ყოფილმა შემადგენლობამ შედეგი ვერ დადო, როცა შედეგი არ არის, ახალი ფეხბურთელები უნდა მოიწვიო. ამავდროულად, როცა მწვრთნელი იცვლება, ახალ მწვრთნელს თავისი ხედვა აქვს, საშუალება უნდა მისცე ის ფეხბურთელი ათამაშოს გუნდში, ვისაც საჭიროდ მიიჩნევს. პირველი თამაში მეორე ლიგაში პირველ სექტემბერს ხობთან გვაქვს და ქედაში ვმასპინძლობთ გუნდს,“ – ამბობს სულხან ჯიჯავაძე.

გუნდის მთავარი მწვრთნელი ამირან გოგიტიძე გუნდის არსებულ შემადგენლობას დამაკმაყოფილებლად აფასებს:

„მწვრთნელად ერთი თვეა რაც დავინიშნე, ამ ეტაპზე უფასოდ ვმუშაობ, ცუდ მდგომარეობაში იყო გუნდი, დახმარება სჭირდებოდა, მთხოვეს და ამოვედი. მირჩევნია ფეხბურთელმა აიღოს ანაზღაურება და ჩემი მუშაობით სასიკეთო საქმე გაკეთდეს. რაც შეეხება გუნდის შემადგენლობას, ძირითადი ბირთვი 16 ფეხბურთელის შემადგენლობით გვყავს, ერთი-ორი ფეხბურთელის გამოკლებით გუნდის არსებული შემადგენლობა დარჩება, ვითარება ჯერჯერობით დამაკმაყოფილებელია და წვრთნის პროცესში ვართ, წინა მოსამზადებელ პერიოდს თითქმის ვასრულებთ“.

გუნდის მთავარი მწვრთნელი საფეხბურთო კლუბის მწირ ფინანსებზე საუბრობს. მისი თქმით, ფეხბურთელისთვის აქ არც სამედიცინო (მედიკამენტების) ხარჯია გათვალისწინებული და არც კვების. განახლებული ქედის „ბეთლემი“ წვრთნებს ძველი ფორმებითა და ასევე, ძველი ბურთებით განაგრძობს.

„ექვსი თვის შემდეგ გუნდს ახალი ფორმა, ბურთი და საჭირო ინვენტარი უნდა ჰქონდეს. არსებული მწირი ფინანსებიდან გამომდინარე, აქ ეს საჭიროებები გათვლილი არ არის, ვარჯიშითა და სწორი კვებით ვითარდება ფეხბურთელის სხეული და ხდება მისი ფორმირება, ყველაფერი მატერიალურ პირობებზეა დამოკიდებული. 2300 კალორია მაინც უნდა მიიღოს დღის განმავლობაში ფეხბურთელმა, წვრთნაზე მოსული ფეხბურთელი შეიძლება ნაჭამიც კი არ იყოს, ვარჯიშიდან წავა და არც ის ვიცით, იღებს თუ არა საჭირო რაოდენობის საკვებს. სპორტში კვება, მასაჟი და ვიტამინები აუცილებელია,“ – ამბობს მწვრთნელი.

კითხვას, რამდენად შესაძლებელია მწირი დაფინანსების პირობებში საფეხბურთო კლუბმა კარგ შედეგს მიაღწიოს, მთავარი მწვრთნელი ასე პასუხობს:

„ყველაფერი ფეხბურთელებზეა დამოკიდებული, გუნდში დამწყები ფეხბურთელი არავინაა, ყველა გამოცდილია, გვყავს როგორც პირველი ლიგის თამაშებში გამოცდილი ფეხბურთელები, ასევე მეორე ლიგასა თუ უმაღლეს ლიგაში მოთამაშე სპორტსმენები. ახლა მთავარია იბრძოლონ, ივარჯიშონ და მაყურებელი გაახარონ, ჩვენ შევეცდებით კარგი ფეხბურთი ვითამაშოთ.

თამაშებზე გამოიკვეთება, რის შესაძლებლობა გააჩნია გუნდს და რისი _ არა. იმედი მაქვს, 2017 წლისთვის გუნდი პირველ ლიგაში გააგრძელებს ასპარეზობას. ზოგადად, სპორტი ძვირადღირებულია და ძნელია პატარა ბიუჯეტით დიდი შედეგი დადო, მაგრამ გამორიცხული და მიუღწეველი არაფერია“.

ქედის საფეხბურთო კლუბი ადგილობრივი ბიუჯეტიდან ფინანსდება. იქედან გამომდინარე, რომ პირველი ლიგიდან „ბეთლემი“ ჩამოქვეითდა და ასპარეზობას მეორე ლიგაში განაგრძობს, გუნდს შეუმცირდა დაფინანსებაც. `350 000 ლარი იყო გუნდის დაფინანსება, ახლა 50 000 ლარია, ამ თანხიდან 5 000 ლარი საწევროს საფასურია, დანარჩენი თანხა კი გუნდს მოხმარდება“ – ამბობს სულხან ჯიჯავაძე. მისი ინფორმაციით, წამყვანი ფეხბურთელის ხელფასი აქ 600 ლარია, ხოლო იმ ფეხბურთელების, რომლებიც ძირითად შემადგენლობაში არ არიან – 300 ლარი.

ამავე თემაზე:

ორი ავტოგოლი, ოთხი დისკვალიფიცირებული ფეხბურთელი და დაჯარიმებული ქედის „ბეთლემი“

ცოტა ხნის წინ უმაღლეს საარჩევნო კომისიაში საარჩევნო ბლოკების რეგისტრაციის ვადა ამოიწურა. უსკოს 5 სხვადასხვა ბლოკის შექმნის მიზნით ჯამში 11-მა საარჩევნო სუბიექტმა მიმართა, ესენია:

• .„გაერთიანებული დემოკრატიული მოძრაობა“ და „დემოკრატიული მოძრაობა – ერთიანი საქართველო“ ქმნიან ბლოკს შემდეგი სახელწოდებით – „ნინო ბურჯანაძე – დემოკრატიული მოძრაობა“;
• .,,საქართველოს ერთიანი კომუნისტური პარტია“ და „ნეიტრალური საქართველო“ – ბლოკის სახელწოდება „კვარაცხელია – სოციალისტური საქართველო;“
• ,,ახალი მემარჯვენეები,’’ ,,მოძრაობა სახელმწიფო ხალხისთვის,” და ,,ამოქალაქო პლატფორმა- ახალი საქართველო” – საარჩევნო ბლოკის სახელწოდება – „ პაატა ბურჭულაძე სახელმწიფო ხალხისთვის“ ;
• . „თოფაძე – მრეწველები“ და „ჩვენი სამშობლო“ – ბლოკის სახელწოდება „თოფაძე მრეწველები, ჩვენი სამშობლო“ ;
• .,,სახალხო პარტია“ და „ჩვენები“ – ბლოკის სახელი – „ჩვენები – სახალხო პარტია“.

უსკოს შესაბამისი სამსახური კომისიის თავმჯდომარეს დასკვნას ბლოკის შექმნასთან დაკავშირებით ხვალ წარუდგენს. იმ შემთხვევაში თუ წარმოდგენილი დოკუმენტაცია (უფლებამოსილი პირების მიერ ხელმოწერილი შესაბამისი განცხადება და პარტიის წესდება) შეესაბამება კანონით დადგენილ მოთხოვნებს, უსკოს თავმჯდომარე დასკვნის წარდგენიდან მეორე დღეს რეგისტრაციაში გაატარებს საარჩევნო ბლოკს.

საარჩევნო ბლოკის რეგისტრაციისთანავე უსკოს თავმჯდომარის განკარგულებით უფლებამოსილება უწყდებათ ბლოკში გაერთიანებული პარტიების წარმომადგენლებს ყველა საარჩევნო კომისიაში, ხოლო საარჩევნო ბლოკს შეუძლია დანიშნოს 2 წარმომადგენელი თითოეულ საარჩევნო კომისიაში.

შპს „ბათუმის წყალი“ სარეაბილიტაციო სამუშაოების ჩატარებას გეგმავს, რის გამოც, დღეს, 26 აგვისტოს, ღამის 12:00 საათიდან დილის 09:00 საათამდე წყალმომარაგება შეუწყდება დაბა ჩაქვში, მწვანე კონცხზე, მახინჯაურში, განთიადსა და თამარის დასახლებაში მცხოვრებ აბონენტებს.

დღეს, აჭარის მთავრობის სხდომა გაიმართა, რომელზეც განსახილველად 12 საკითხი იყო გამოტანილი.

დღევანდელ სხდომაზე აჭარის ფინანსთა და ეკონომიკის მინისტრმა რამაზ ბოლქვაძემ რეგიონში მოქმედ, რამდენიმე შპს-ს საინვესტიციო საქმიანობის ხელშესაწყობად რიგი ღონისძიებების განხორციელების შესახებ ისაუბრა. კერძდ 6 კომპანიას – (შპს “გიაგო”, შპს “რეკან გრუპ ჯორჯია”, შპს “TCF GEORGIA”, შპს “ADOG-GEORGIA”, შპს “ბათმშენი 2007”, “შპს “ბიჯი თრეიდი”, ინდ მეწარმე “მერაბ ბერიძე (რ.კ. “ქაქუთი””)  პირობით გადაუვადდა პირგასამტეხლოს გადახდა და მიეცათ დამატებიტი ვადა ვალდებულებების შესასრულებლად – “საუბარია 82 000 000 აშშ დოლარის ინვესტირებაზე. ასევე გაიწერა ახალი პირობები. ჩვენთვის ძალიან მნიშვნელოვანია რომ ინვესტორებთან მივაღწიოთ მიზანს და არა ის რომ გვქონდეს მათთან ჯარიმებით ურთიერთობა, ჩვენთვის მნიშვნელოვანია რომ დაიწყოს და განხორციელდეს ყველა ის საინვესტიციო პროექტი, რომელიც აქამდე მიმდინარეობდა და მნიშვნელოვანია ამ ინვესტიციების შედეგად შეიქმნას ახალი სამუშაო ადგილები და განვითარდეს რეგიონის ეკონომიკა. ამ ეტაპზე ჩვენ მოგვმართა მხოლოდ ექვსმა ინვესტორმა, თუმცა ამ კუთხით დამატებითი კონსულტაციები მიმდინარეობს სხვადასხვა კომპანიებთან. ჩვენ განვიხილავთ ნებისმიერ შემოთავაზებას ინვესტორების მხრიდან, რადგან მათთან მიმართებაშ უნდა ვიყოთ ძალიან ფაქიზები იმიტომ, რომ ეს საკითხი რეგიონისთვის ერთ-ერთი მნიშვნელოვანი და პრიორიტეტული საკითხია” – თქვა რამაზ ბოლქვაძემ.

სხდომაზე აჭარის სოფლის მეურნეობის მინისტრმა ლაშა კომახიძე „აჭარის ავტონომიური რესპუბლიკის სოფლად განვითარების რეგიონული სტრატეგიის შემმუშავებელი საბჭოს შექმნის შესახებ“ აჭარის მთავრობის 2015 წლის 25 სექტემბრის №180 განგარგულებაში ცვლილებების შეტანის შესახებ ისაუბა. ცვლილების თანახმად კომისიის შემადგენლობაში სოფლის მეურნეობის მინისტრი ლაშა კომახიძე და ფინანსთა და ეკონომიკის მინისტრი რამაზ ბოლქვაძე დაემატება. ასევე გაიზარდა საბჭოს მიზნები და ამოცანები. ლაშა კომახიძემ ლოჯისტიკური ცენტრების პროგრამაზე ისაუბრა და აჭნიშნა, რომ აჭარის სოფლის მეურნეობის ხელშეწყობის მიზნით, 300-ზე მეტ სოფელში, მცირე მეწარმეების მიერ წარმოებული პროდუქცია ამ კომპანიების დახმარებით ერთად მოიყრის თავს, დახარისხდება და სასაქონლო სახის მიცემის შემდეგ ტრანსპორტირდება ერთ მსხვილ წერტში, რომელიც ბათუმში ან ბათუმის ახლოს იქნება განთავსებული – “პრობლემა რომელსაც მე ფერმერებთან შეხვედრისას ვხვდები და რომელიც მანამდეც ძალიან კარგად ვიცოდი, არის წარმოებული პროდუქციის შემდგომში რეალიზაციის პრობლემა. საქმე ისაა, რომ ჩვენ გვყავს ძირითადად მცირემიწიანი ფერმერები და ამ მცირე მიწებზე წარმოებული პროდუქცია არ ქმნის იმ მასას, რომელიც შეიძლება საინტერესო იყოს მსხვილი შემსყიდველისთვის. ამაზე გამოხმაურების ერთ-ერთი ნაბიჯი იყო სახელმწიფოსა და ევროკავშირის პროგრამა კოოპერატივების ხელშეწყობის მიმართულებით. რეალურად ლოჯისტიკური ცენტრების პროგრამით, ჩვენ ვაგრძელებთაი ამ მიმართულებას იმისთვის, რომ ცალკეული ფერმერებს მივცეთ საშუალება ადგილზე მუნიციპალიტეტებში ლოჯისტიკურ ცენტრებში მოაგროვონ საკუთარი ნაწარმი. ანუ თუკი ერთი ფერმერი ცალკე აღებული საკუთარი პროდუქციით, არ არის მსხვილი წარმომადგენელი ბაზარზე – რამდენიმე სოფლის ფერმერი ეს უკვე მნიშვნელოვანი ანგარიშშგასაწევი მასაა, მათ მიერ შეგროვებული პროდუქტი არის ძალიან სერიოზული მასა, რომელიც დამუშავდება იმ ლოჯისტიკურ ცენტრებში, რომლებიც გაკეთდება მუნიციპალიტეტებში. დამუშავებაში იგულისხმება შეფუთვა, დახარისხება, სასაწყობო მეურნეობების გამოყენება, ტრანსპორტირება სოფლებიდან ამ ლოჯისტკურ კომპანიებამდე და შემდეგ მათი ძირითად ცენტრებამდე ტრანსპორტირება. ასეთი სახემიცემული პროდუქტი ყველა მუნიციპალიტეტიდან თავს მოიყრის ერთ ძირითად ბაზარზე, რომელიც იქნება ბათუმში ან ბათუმის მიმდებარე ტერიტორიაზე” – თქვა მინისტრმა.

მტავრობის დღევანდელ სხდომაზე „ახალციხე-ბათუმის“ 220 კილოვატიანი ორჯაჭვა ელექტროგადამცემი ხაზის მშენებლობის პროექტთან დაკავშირებით ადგილობრივ მუნიციპალიტეტებში განსახორციელელებელ ღონისძიებებზე ისაუბრა ხელვაჩაურისა და შუახევის მუნიციპალიტეტების გამგებლებმა ნადიმ ვარშანიძემ და ტარიელ ებრალიძემ.

ასევე, ხულოს მუნიციპალიტეტის გამგეობას თანხმობა მიეცა, სახელმწიფოებრივი და საზოგადოებრივი მნიშვნელობის ღონისძიებების შეზღუდულ ვადებში შეუფერხებლად ჩატარების მიზნით, კურორტ ბეშუმში შიდა გზების სარეაბილიტაციო სამუშაოების (საორიენტაციო ღირებულება 378 000 ლარი) და სოფელ ვერნებში საბავშვო ბაღის ეზოს კეთილმოწყობითი სამუშაოების (საორიენტაციო ღირებულება 33 331 ლარი) სახელმწიფო შესყიდვები, გამარტივებული ელექტრონული ტენდერით განახორციელოს. დღესვე სსიპ „აჭარის სატყეო სააგენტოს“ მიეცა თანხმობა ელექტრონული აუქციონის ფორმით გასცეს მერქნული რესურსი, მათ შორის II ხარისხის საშეშე მერქანი.

8 ხმით 5-ის წინააღმდეგ  – უსკომ “საქართველოს ახალგაზრდა იურისტთა ასოციაციის” საჩივარი არ დააკმაყოფილა. საუბარია 31 ივლისის შემთხვევაზე, როცა, “ერთიანი ნაციონალური მოძრაობის” მაჟორიტარობის კანდიდატების წარდგენის დროს მიხეილ სააკაშვილმა შეკრებილებს ვიდეო ჩართვით მიმართა.  

უსკომ საიას მიერ პირველ აგვისტოს შეტანილი საჩივრის განხილვაზე უარი თქვა, რაც საიამ სასამართლოში გაასაჩივრა. ბათუმის საქალაქო და ქუთაისის სააპელაციო სასამართლოებში უსკომ პროცესი წააგო, რის შემდეგაც დღეს, 25 აგვისტოს საიას სარჩელის განხილვა შედგა.

უსკოს გადაწყვეტილებით, სამართალდარღვევათა ოქმის შედგენა ფაქტობრივად შეუძლებელია პირზე, რომელიც არ იმყოფება საქართველოში. ამ შეფასებით უსკომ ძალაში დატოვა მანამდე ბათუმის 79-ე ოლქის განმარტება იმასთან დაკავშირებით, რომ მიხეილ სააკაშვილის მონაწილეობა “ერთიანი ნაციონალური მოძრაობის” წინასაარჩევნო აგიტაციაში არ შეიცავდა დარღვევის ნიშნებს.

უსკოში საკითხის განხილვის დროს, საიას აჭარის ფილიალის თავმჯდომარემ, გიორგი ხიმშიაშვილმა მაგალითი მოიყვანა გერმანიის პრაქტიკიდან, როცა ანალოგიურ სიტუაციაში სამართალმცოდნეები გასცდნენ ქმედების ჩადენის კლასიკურ გაგებას და შემოიღეს ახალი განმარტება, რომლის მიხედვითაც სამართალდარღვევის ჩადენის ადგილი არის ის ადგილი, სადაც განზრახვას და ზემოქმედებას აქვს შესაბამისი რეაქცია და შედეგი: “ამომრჩეველმა ბათუმში მოისმინა კონკრეტული სუბიექტის, უცხო ქვეყნის მოქალაქე მიხეილ სააკაშვილის მიმართვა. ამ შემთხვევაში სამართალდარღვევის ადგილად უნდა მივიჩნიოთ ბათუმი, ვინაიდან, შედეგი დადგა სწორედ ბათუმში,”– განაცხადა გიორგი ხიმშიაშვილმა.

“ერთიანი ნაციონალური მოძრაობის” წევრი, პეტრე ზამბახიძე კი ფიქრობს, რომ სხვა ქვეყნიდან ვიდეო–მიმართვა არ შეიძლება ჩაითვალოს საქართველოს ტერიტორიაზე მომხდარ ფაქტად:  “ეს არ არის სამართალდარღვევა, რადგანაც ფაქტი არ დაფიქსირებულა საქართველოს ტერიტორიაზე. აქ ხომ საუბარია არა კონკრეტულ სამართალდარღვევაში უშუალო მნაწილეობაზე, არამედ ვიდეოზე. ვირტუალური სამყარო არ შეიძლება გაგებული იყოს საქართველოს ტერიტორიად”

თუკი უსკო “ახალაგზრდა იურისტთა ასოციაციის” სარჩელს დააკმაყოფილებდა, “ერთიანი ნაციონალური მოძრაობა” მინიმუმ 2 ათასი ლარით დაჯარიმდებოდა. საიას ჯერ არ გადაუწყვეტია, გაასაჩივრებს თუ არა უსკოს ამ გადაწყვეტილებას სასამართლოში. 

ფოტო: უსკოს ფეისბუქგვერდიდან

loუსკოს ინფორმაციით უმაღლესი საბჭოს არჩევნებზე, საარჩევნო ბლოკების რეგისტრაციის ვადა ხვალ, 26 აგვისტოს იწურება.

საარჩევნო ბლოკს შეუძლია ორი წარმომადგენლის დანიშვნა თითოეულ საარჩევნო კომისიაში.

როგორც უსკოს ოფიციალურ ფეისბუქგვერდზე ვკითხულობთ, “2016 წლის 25 აგვისტოს 10:00 საათის მონაცემებით, ბლოკის შექმნის მიზნით უმაღლესი საარჩევნო კომისიისთვის განცხადებთ ჯერ არავის მიუმართავს“.

სარფის საბაჟოზე თურქეთის მხრიდან ასეულობით მოქალაქე საპასპორტო კონტროლისგავლას ელოდება. მოქალაქე ზურაბ [ქემალ] ცეცხლაძემ “ბათუმელებს” უთხრა, რომ მისი ინფორმაციით საბაჟოზე გაურკვეველი მიზეზით სპეციალური პროგრამაა გამორთული და სისტემა არ მუშაობს.

საქართველოს შემოსავლების სამსახურის პრესსამსახურში “ბათუმელებს” უთხრეს, რომ არ აქვთ ინფორმაცია, რის გამო არის შეფერხებული მოქალაქეების გადმოსვლა თურქეთიდან საქართველოში. სამუშაო საათების დასრულების გამო, კომენტარი არ გააკეთეს თურქეთის საკონსულოშიც.

„თავისუფალი დემოკრატების“ ლიდერმა ირაკლი ალასანიამ დღეს, ბათუმში, აჭარაში მაჟორიტარი დეპუტატობის კანდიდატები წარადგინა.

ბათუმის N68 ოლქი: პარლამენტში მაჟორიტარი დეპუტატობის კანდიდატი არის ნუგზარ ვარშანიძე, ხოლო აჭარის უმაღლეს საბჭოში – ჯაბა ბერიძე.

ბათუმის N69 ოლქი: პარლამენტში – ნინო ბერაძე, უმაღლეს საბჭოში – კობა ჩხეიძე.

ბათუმის N70 ოლქი: პარლამენტში – თეიმურაზ ხაბაძე, უმაღლეს საბჭოში – არმაზ ბახტაძე.

რაც შეეხება აჭარის მუნიციპალიტეტებს. ქობულეთში მაჟორიტარი დებუტატობის კანდიდატი საქართველოს პარლამენტში არის სოსო ნოღაიდელი, უმაღლეს საბჭოში – კახა კაკალაძე.

ხელვაჩაურის მაჟორიტარი დეპუტატობის კანდიდატი პარლამენტში – ნინო ლორთქიფანიძე, უმაღლეს საბჭოში – პაატა ზაქარაძე.

ქედის, შუახევისა და ხულოს გაერთიანებულ ოლქში დაპუტატობის კანდიდატი პარლამენტში – თეიმურაზ ავალიანი, უმაღლეს საბჭოში – ოთარ ცეცხლაძე.

„აჭარას აქვს ყველა ბუნებრივი პირობა, იმისთვის, რომ იყოს გამორჩეული ევროპული რეგიონი. მაგრამ, მას აკლია ერთადერთი, კომპეტენტური კვალიფიკაციის მატარებელი ხელისუფლება. სწორედ, 2016 წლის არჩევნებში გვეძლევა შანსი, რომ ავირჩიოთ ისეთი პარლამენტი, ისეთი უმაღლესი საბჭო, რომელიც სწორედ კომპეტენტურობის ნიშნით დააკომპლექტებენ მთავრობას.“ – განაცხადა ირაკლი ალასანიამ.

მომავალ საპარლამენტო და უმაღლესი საბჭოს არჩევნებში ბათუმის 79-ე საარჩევნო ოლქიდან მოსახლეობა არჩევანს სამი [68-ე, 69-ე და 70-ე] მაჟორიტარული ოლქის მიხედვით გააკეთებს.  თითოეულ მაჟორიტარულ ოლქში მხოვრები საკუთარ მაჟორიტარს აირჩევს, როგორც აჭარის უმაღლეს საბჭოში, ასევე საქართველოს პარლამენტში.

ბათუმის 68-ე მაჟორიტარიული ოლქის საზღვარი იწყება ქობულეთის სოფელი ციხისძირიდან. ის მოცავს სოფლებს: ციხისძირს, შუაღელეს, ზედა და ქვედა აჭყვას, სტალინის უბანს, საჩინოს, გორგაძეებს, ჩაისუბანს, ხალას, ჩაქვს, სახალვაშოს, მწვანე კონცხს, დაბა მახინჯაურს. ასევე თამარის, ბარცხანის, ბონისა და გოროდოკის დასახლებებს; ოლქის საზღვრებშია მაიაკოვსკის, შავშეთის, სულაბერიძის, წერეთლის, 9 მარტის ქუჩები;  68-ე მაჟორიტარული ოლქის საზღვარი სრულდება ძველ ბათუმთან, ის მოიცავს ბათუმის პორტს და მიმდებარე ტერიტორიას.

ბათუმის 69-ე მაჟორიტარული ოლქი მოიცავს „ძველ ბათუმს“ და ქალაქის ცენტრალურ ნაწილს. საზღვარი იწყება საბაგიროდან და გადის ჭავჭავაძის-ესენინის-წერეთლის-ჭავჭავაძის- ასათიანის-პუშკინის-თავდადებულის-ბაგრატიონის მთისძირის ქუჩებზე [მოიცავს ე.წ. ჭაობის ძირითად ნაწილს და ურეხის დასახლებას მთისძირის ქუჩამდე]; ოლქის საზღვარი მთისძირის ქუჩით გადის გენერალ ასლან აბაშიძის ქუჩაზე, აქედან ბაგრატიონისა და ოძელაშვილის ქუჩებზე, შემდეგ გრძელდება პუშკინის ქუჩაზე, აქედან ტბელ აბუსერიძის ქუჩაზე, საიდანაც გადის გრიბოედოვის, გორგილაძის პარალელურად და ჯავახიშვილის ქუჩით ზღვისპირამდე.

ბათუმის 70-ე მაჟორიტარული ოლქი მოიცავს ქალაქის ტერიტორიას ახალი ბულვარისა და ანგისის დასახლებიდან კვარიათის ჩათვლით. ამავე ოლქში შედის ლუდის ქარხნის დასახლების ნაწილი, ინასარიძის, შ. ხიმშიაშვილის, აღმაშენებლის, ტაბიძის, ლეონიძის ქუჩის დასახლებები, ასევე ადლია, მინდა, ურეხი, თოდოგაური, კახაბერი, მეჯინისწყალი, ავგია, გონიო.

აჭარის ავტონომიური რესპუბლიკის უმაღლესი საბჭოს 2016 წლის 8 ოქტომბრის არჩევნებისათვის ბათუმის მაჟორიტარულ საარჩევნო ოლქებში ამომრჩეველთა საერთო რაოდენობა: N68 მაჟორიტარული საარჩევნო ოლქი – 52 477; N69 მაჟორიტარული საარჩევნო ოლქი – 52 164; N70 მაჟორიტარული საარჩევნო ოლქი – 51 900 ამომრჩეველი.

ბათუმის მაჟორიტარული ოლქები:

ამავე თემაზე:

ქობულეთის, ხელვაჩაურისა და ქედა-შუახევი-ხულოს მაჟორიტარული ოლქების საზღვრები 

ხანძრის შედეგად ქედის მუნიციპალიტეტის სოფ კუჭულაში გორგაძეების 12-წევრიანი ოჯახის საცხოვრებელი სახლი დაიწვა. ხის ერთსართულიან სახლს ხანძარი დაახლოებით დილის ათ საათზე გაუჩნდა და მთლინად განადგურდა. განადგურებულია საყოფაცხოვრებო ნივთებიც. შემთხვევის ადგილზე მუშაობდა ქედის სახანძრო-სამაშველო ბრიგადები. ხანძრის შედეგად არავინ დაშავებულა. შსს-ს ინფორმაციით, გამოძიება მიმდინარეობს სისხლის სამართლის კოდექსის 188-ე მუხლის მიხედვით, რაც სხვისი ნივთის დაზიანებას და განადგურებას გულისხმობს.

“არჩევნების დასრულებამდე, ქედის გამგეობა ამ ოჯახს ვერ დაეხმარება,” – უთხრა “ბათუმელებს” ქედის მუნიციპალიტეტის გამგებელმა, დავით დუმბაძემ. მისი განმარტებით, ქედის გამგეობა შემთხვევას მას შემდეგ შეისწავლის, როცა გამოძიება გადასცემს მასალებს.

გამგებელი ამბობს, რომ დაზარალებული ოჯახის დახმარებას ქედის გამგეობის თანამშრომლები საკუთარი ხელფასიდან აპირებენ, რადგან სარეზერვო ფონდში თანხა აღარ არის: “მართლა ვერაფრის გადარჩენა მოხერხდა. სამწუხაროდ უკვე სარეზერვო ფონდში აღარ გვაქვს თანხა, რომ ოჯახს გადავცეთ. ბიუჯეტის კორექტირებას წინასაარჩევნო პერიიდში ვერ მოვითხოვთ.”

გამგებლის განმარტებით, ხანძრისგან დაზარალებულ ოჯახს, ზოგადად, ქედის გამგეობა დაახლოებით 5 ათასი ლარით ეხმარება.

მიმდინარე წელს ქედაში ხანძრის შედეგად ხუთი სახლი დაიწვა.

აჭარის უმაღლესი საარჩევნო კომისია ხვალ, 25 აგვისტოს, განიხილავს “ახალგაზრდა იურისტთა ასოციაციის” სარჩელს სავარაუდო წინასაარჩევნო აგიტაციის შესახებ. უსკოს უკვე ჩაბარდა ქუთაისის სააპელაციო სასამართლოს გადაწყვეტილება,  რომელმაც ძალაში დატოვა ბათუმის საქალაქო სასამართლოს გადაწყვეტილება. ორივე ინსტანციის სასამართლომ მიიჩნია, რომ უსკო არის იმ კომპეტენციის ორგანო, რომელმაც წინასაარჩევნო აგიტაციის შემთხვევები უნდა განიხილოს.

სავარაუდო წინასაარჩევნო აგიტაციად საიამ 31 ივლისის შემთხვევა მიიჩნია, როცა „ერთიანი ნაციონალური მოძრაობის“ ბათუმის მაჟორიტარი დეპუტატობის კანდიდატების წარდგენაზე ყოფილმა პრეზიდენტმა, მიხეილ სააკაშვილმა მემედ აბაშიძის ქუჩაზე, პარტიული ოფისის წინ შეკრებილებს ვიდეოჩართვის საშუალებით მიმართა.  “ახალგაზრდა იურისტთა ასოციაცია” საარჩევნო კანონმდებლობის იმ ნორმის დარღვევაზე მიუთითებდა, რომლითაც უცხო ქვეყნის მოქალაქეს წინასაარჩევნო აგიტაციაში მონაწილეობა ეკრძალება.

ხვალინდელ სხდომაზე უსკო იმსჯელებს, იყო თუ არა კანონიერი ბათუმის 79-ე საარჩევნო ოლქის გადაწყვეტილება, როცა მან საიას სარჩელის დაკმაყოფილებაზე უარი თქვა. სარჩელის დაკმაყოფილების შემთხვევაში, “ერთიანი ნაციონალური მოძრაობა” 2 ათასი ლარით დაჯარიმდება.