Batumelebi | უმაღლესი საბჭოს წევრის საქმეზე სასამართლომ ყველა მოწმე დაკითხა უმაღლესი საბჭოს წევრის საქმეზე სასამართლომ ყველა მოწმე დაკითხა – Batumelebi
RU | GE  

უმაღლესი საბჭოს წევრის საქმეზე სასამართლომ ყველა მოწმე დაკითხა

უმაღლესი საბჭოს წევრის, ელგუჯა ბაგრატიონის და ქობულეთის საკრებულოს წევრის, ბონდო თედორაძის საქმის განხილვა მოსამართლე ლაშა თავართქილაძემ უკვე დაასრულა. მათ ადმინისტრაციული წესით პოლიციელის კანონიერი მოთხოვნის დაუმორჩილებლობას ედავებიან. „ერთიანი ნაციონალური მოძრაობის“ წევრები – ელგუჯა ბაგრატიონი და ბონდო თედორაძე გუშინ, საღამოს დააკავეს. შინაგან საქმეთა სამინისტროს ინფორმაციით, მათ ბათუმი-ქობულეთის საავტომობილო გზის გადაკეტვა სცადეს. გუშინ ამ გზაზე  ციხისძირიდან ხეების გადატანის გამო მოძრაობა შეფერხებული იყო.

„გზა ჩვენ არ გადაგვიკეტავს,  გზა ჩაკეტა ბიძინა ივანიშვილმა, რომელსაც ხეები გადააქვს. დღის განმავლობაში ვიდექით მეორეხარისხოვან გზასთან. საღამოს მოვიდა პოლიცია და მოგვთხოვა, რომ გზის იმ ნაწილიდანაც გაგვეყვანა მანქანა“, – ამბობს ელგუჯა ბაგრატიონი.

ბათუმის საქალაქო სასამართლომ დღეს მოწმეების ჩვენებები მოისმინა, მათ შორის, ორი პოლიციელის. მათი თქმით, ელგუჯა ბაგრატიონმა გზის გადაკეტვა სცადა, ხოლო ბონდო თედორაძემ წინააღმდეგობა პოლიციელებს გაუწია, როცა ისინი ელგუჯა ბაგრატიონს აკავებდნენ.

თუკი ელგუჯა ბაგრატიონსა და ბონდო თედორაძეს ადმინისტრაციული სამართალდარღვევა დაუდასტურდებათ, მათ 250-დან 2500 ლარამდე ჯარიმის გადახდა, ან 15 დღით ადმინისტრაციული პატიმრობის მოხდა მოუწევთ. მოსამართლე ლაშა თავართქილაძე გადაწყვეტილებას 13 თებერვალს გამოაცხადებს.

ნეტგაზეთის მასალების სხვა გამოცემებში გადაბეჭდვის წესი
ავტორი