„სმარტი“ ბათუმში კიდევ ერთი წელი არ გაიხსნება

ტბელ აბუსერიძის ქუჩის მიმდებარედ, ტერიტორიაზე, სადაც სუპერმარკეტ „სმარტის“ მშენებლობა მიმდინარეობს, სამშენებლო მოედნის დამცავი ღობე აიღეს.

მშენებელი კომპანიის, „ველაჯიო დეველოპმენტის“ წარმომადგენლის, ზურაბ ოდილავაძის განცხადებით, ღობის აღება მიმდინარე სამუშაოებს უკავშირდება – ტერიტორიაზე უნდა დაიგოს ბეტონის საფარი.

მშენებარე ობიექტი / ფოტო: როინ გუნდაძე

ობიექტი 2013 წელს უნდა ჩაბარებულიყო, შემდეგ ვადა 2015 წლამდე გადაიწია. შენობის [სუპერმარკეტის] გახსნის თარიღი კომპანიისთვის ამ ეტაპზეც უცნობია. მშენებლების თქმით კი, ობიექტზე დარჩენილია სამუშაოები, რომელთა დამთავრებას კიდევ ერთი წელი დასჭირდება.

მშენებარე ობიექტი / ფოტო: როინ გუნდაძე

ობიექტი „ვისოლ ჯგუფს“ ეკუთვნის. აქ, როგორც გასულ წელს „ბათუმელებთან“, „ვისოლ ჯგუფის“ პრეზიდენტმა სოსო ფხაკაძემ განაცხადა, „სმარტი“, „ვენდი“ და „დანკინ დონატსი“ უნდა განთავსდეს. ობიექტის გახსნის ზუსტი თარიღი მაშინ ვერც სოსო ფხაკაძემ დაასახელა: „გაძლევთ გარანტიას, რომ ბათუმში კარგ და თბილ სამ ბრენდს მოვიყვანთ ძალიან მალე.“