Batumelebi | პოლიციამ აღმოაჩინა საკუთარ ბინაში გარდაცვლილი დედა-შვილი პოლიციამ აღმოაჩინა საკუთარ ბინაში გარდაცვლილი დედა-შვილი – Batumelebi
RU | GE  

პოლიციამ აღმოაჩინა საკუთარ ბინაში გარდაცვლილი დედა-შვილი

ბათუმში, ინასარიძის ქუჩაზე, ცოტა ხნის წინ, ბინაში იპოვეს ორი გარდაცვლილი პირი. როგორც ადგილზე მისულ “ბათუმელებს” უთხრეს, გარდაცვლილია დედა-შვილი. მეზობლების ინფორმაციით, „შვილი – 50 წლამდე მამაკაცი უვლიდა დედას, რომელიც ავადმყოფობდა და, ძირითადად, იწვა. დღეს, პოლიცია როცა შევიდა სახლში, შვილი ნახეს საწოლში, დედა კი შესასვლელ კარებთან“.

მეზობლებისავე თქმით, დედა-შვილი სოციალურად დაუცველი იყო. მათ ბინაში ელექტროენერგია გამორთულია, სახლში არ ჰქონდათ ბუნებრივი აირი. ინასარიძის #14-ში ამბობენ, რომ დედა-შვილს ფსიქიკური პრობლემები ჰქონდა.

მეზობლებმა პოლიციის გამოძახება მას შემდეგ გადაწყვიტეს, რაც დედა-შვილი ბოლო დღეები ვეღარ შენიშნეს. გარდაცვალების სავარაუდო თარიღთან დაკავშირებით კითხვის დასმის დროს თვითმხილველები ამბობენ, რომ “სახლში მძიმე სუნია”.

შს სამინისტროს ინფორმაციით, ცხედრები, ჯერჯერობით, პროზექტურაში არ გადაუტანიათ.

 

 

ნეტგაზეთის მასალების სხვა გამოცემებში გადაბეჭდვის წესი
ავტორი
გაზეთი "ბათუმელები" გამოდის 2001 წლიდან.