Batumelebi

ფსიქიკურად დაავადებულ ხანდაზმულებს თავშესაფარში მიიღებენ – საუბარია 65 წელს გადაცილებულ ადამიანებზე, ვისაც ასაკობრივი ცვლილებების გამო სხვადასხვა ფსიქიკური დაავადება ქრონიკულად აწუხებს, მაგრამ არა გამწვავებული ფორმით. ამ ტიპის პაციენტების სტაციონარში მოთავსება ამჟამად შეუძლებელია. აჭარის ჯანდაცვის სამინისტრო ივლისიდან 50 ასეთი პაციენტის დაფინანსებას აპირებს.

„ესენი არიან მოხუცები, რომლებიც გარშემომყოფებს საფრთხეს არ უქმნიან, მაგრამ ხშირად ოჯახებს მათი მოვლის საშუალება არ აქვთ, ან მარტოხელები არიან…“, –  გვიყვება ლელა სურმანიძე, აჭარის ჯანმრთელობისა და სოციალური დაცვის მინისტრის მოადგილე.

ალცჰეიმერი, ამნეზიური სინდრომი, დემენცია [ინტელექტუალური შესაძლებლობების დაქვეითება], დელირიუმი [აღგზნებადობა], თავის ტვინის დაზიანებით გამოწვეული აშლილობები – ლელა სურმანიძის განმარტებით, ძირითადად, ამ ფსიქიკური დაავადების მქონე მოხუცებს მოათავსებენ თავშესაფარში.

ფსიქიკური დაავადების მქონე მოხუცებისთვის თავშესაფარი უკვე მოწყობილი აქვს ბათუმის ფსიქიატრიულ საავადმყოფოს. ამ კლინიკასთან ხელშეკრულება აჭარის ჯანმრთელობისა და სოციალური დაცვის სამინისტრომ 3 ივლისს გააფორმა. ხელშეკრულების მიხედვით, თავშესაფარი იზოლირებული უნდა იყოს ფსიქიატრიული დაწესებულებებისგან. თავშესაფრის პრეზენტაცია ოფიციალურად 19 ივლისს იგეგმება.

პროგრამაში ნებისმიერი სხვა კლინიკაც შეიძლება ჩაერთოს, რომელსაც იზოლირებული თავშესაფრის მოწყობა შეუძლია. თავშესაფრით მოსარგებლეს ასევე შეეძლება შეწყვიტოს კონკრეტულ თავშესაფართან თანამშრომლობა და მისთვის გამოყოფილი ვაუჩერით სხვა თავშესაფარში გადავიდეს.

„ეს გულისხმობს 24- საათიან მომსახურებას ადგილზე, მულტიდისციპლინური მეთოდით მკურნალობას ინდივიდუალური მართვის გეგმის შესაბამისად, მედიკამენტებით და სამჯერადი კვებით უზრუნვეყოფას, ჰიგიენური ნივთებით მომარაგებას,“ – ამბობს ლელა სურმანიძე.

თავშესაფარში მყოფი თითოეული პაციენტისთვის სახელმწიფო დღეში 15 ლარს დახარჯავს. ლელა სურმანიძე ამბობს, რომ ეს თანხა არაა საკმარისი, თუმცა ამ ეტაპზე სახელმწიფო პროგრამა ამ ოდენობას ითვალისწინებს. თავშესაფარში გაჩერება მოხუცს 6 თვის განმავლობაში შეუძლია, „თუმცა, თუ არსებობს მკურნალობის გაგრძელების საჭიროება, შესაძლებელია დამატებით გაიცეს ვაუჩერი. ყურადღება მიექცევა ოჯახის სოციალურ მდგომარეობასაც,“ – დასძენს ლელა სურმანიძე.

მინისტრის მოადგილე განმარტავს, რომ აქამდე ეს მოხუცები მხოლოდ ამბულატორიული მომსახურებით სარგებლობდნენ და იღებდნენ მედიკამენტებს. პროგრამა ამ ეტაპზე 50 მოხუცის დაფინანსებას ითვალისწინებს, თუმცა თუ მიმართვიანობა მაღალი იქნება, სამინისტრო ბენეფიციარების რაოდენობის გაზრდას მომავალი წლიდან შეძლებს.

თავშესაფრით სარგებლობის თხოვნით სამინისტროს ერთმა მოხუცმა უკვე მიმართა. ჯანდაცვის მინისტრის მოადგილის თქმით, 83 წლის მამაკაცს უახლოეს დღეეში მოათავსებენ თავშესაფარში, რომელიც ბათუმის ფსიქიატრიულ საავადმყოფოშია მოწყობილი.

ფოტო: თავშესაფარი ფსიქიკური დაავადების მქონე მოხუცებისთვის ბათუმის ფსიქიატიული საავადმყოფოს ტერიტორიაზე.

კვირის ბოლოს ხულოში „სელიმობას“ აღნიშნავენ. ტრადიციული დღესასწაულის აღსანიშნავად ხულოს მუნიციპალიტეტის ბიუჯეტიდან 5256 ლარი და 90 თეთრი დაიხარჯება. ბიუჯეტის ნახევარზე მეტი – 2987 ლარი და 50 თეთრი, ვახშმისთვისაა გათვალისწინებული.

ხულოს მუნიციპალიტეტის გამგეობასა და კომპანია „არსი 2“-თან გაფორმებულ ხელშეკრულებაში იპოვით ჩამონათვალს, თუ რა არის გათვალისწინებული „სელიმობისთვის“. სია ბუკლეტების დაბეჭდვით და ვარდების შეძენით იწყება და გრძელდება იმ კერძების ჩამოთვლით, რაც სტუმრებმა ვახშამზე უნდა მიირთვან: სინორი, ქათამი, კაიმაღი, ბორანი, ხაშლამა ღრმა თეფშებზე…

„ეს არის ტრადიციული კერძები, რითაც მობრძანებულ სტუმრებს ვუმასპინძლებდით. მენიუ არავის შეუდგენია, ზოგადად ასე ხდება, ყოველწლიურად აღინიშნება სელიმობა,“ – გვითხრა ხულოს მუნიციპალიტეტის გამგებელმა, ბესიკ ბაუჩაძემ. მისივე თქმით, სელიმობა მოიცავს მუზეუმის მონახულებას და კულტურულ ღონისძიებას.

ვინ დაესწრება ვახშამს?  ბესიკ ბაუჩაძე გვპასუხობს, რომ ვახშამს „მუნიციპალიტეტის მეგობრები“ დაესწრებიან: „ესენი არიან მეცნიერები, ისტორიკოსები, პედაგოგეგბი, რეგიონის ხელმძღვანელი პირები, ასევე სელიმ ხიმშიაშვილის შთამომავლები…“

კომპანია, რომელიც ხულოს გამგეობას ვახშმებით ამარაგებს

„არსი 2“ არის კომპანია, რომელიც თითქმის ყველა ტენდერს იგებს ხულოში, რაც სარესტორნო მომსახურებას უკავშირდება. ამ კუთხით გამოცხადებულ ელექტრონულ შესყიდვაში ეს კომპანია ერთადერთი მონაწილეა და გამარჯვებულიც.

„სელიმობამდე“ კომპანია „არსი 2“-თან ხულოს მუნიციპალიტეტის გამგეობამ 2017 წლის 10 აპრილს ორი ხელშეკრულება გააფორმა. ერთ-ერთის ბიუჯეტი 11 564 ლარია და იგი სხვადასხვა ღონისძიების გამართვას გულისხმობს, მათ შორის, 18-19 აპრილის სტიქიური უბედურების დროს დაღუპულთა ხსოვნისადმი მიძღვნილ ღონისძიებას. ჩამონათვალი აქაც ვარდებით იწყება და 70-კაციანი სუფრით სრულდება სოფელ წაბლანაში. ამ ვახშმისთვის ხულოს ბიუჯეტიდან 1890 ლარი დაიხარჯა.

10 აპრილს გაფორმებული კიდევ ერთი ხელშეკრულება ანსამბლ „ბერმუხას“ საიუბილეო ღონისძიების ორგანიზებას გულისხმობს. სუფრა აქ 45 კაცზე გაშლილა. ამ ვახშმისთვის 1305 ლარი დახარჯულა.

„არ ვიცი, საიდან იმარჯვებს ეს კომპანია, ან რატომ არის ერთადერთი მონაწილე. ელექტრონული შესყიდვა არის დახურული,“ – ამბობს ხულოს მუნიციპალიტეტის გამგებელი, ბესიკ ბაუჩაძე.

კომპანია „არსი 2“ ბათუმში რეგისტრირებული კომპანიაა. საჯარო რეესტრის მონაცემებით, მისი დამფუძნებელი რამაზ გოგიჩაიშვილია.

დანები დედებს

კომპანია „არსი 2“-მა მოიგო ასევე ხულოს გამგეობის შესყიდვა – „დედისა და ქალთა საერთაშორისო დღისადმი მიძღვნილი ღონისძიების ორგანიზება“. ვახშამს ეს ღონისძიებაც ითვალისწინებდა. სუფრა 20 კაცისთვის ყოფილა გათვალისწინებული და ამისთვის 1085 ლარი დახარჯულა [ერთი კაცი – 54 ლარი და 25 თეთრი].

ვახშმამდე დედებს სუფრის დანების კოლექცია აჩუქეს, წყლის მადუღარა და მიხაკები. ჯამში ამ ღონისძიებისთვის ხულოს მუნიციპალიტეტის ბიუჯეტიდან 3516 ლარი და 40 თეთრი დაიხარჯა.

შუამთობა – ვახშამი ტრადიციული ფასით 

2012 წლიდან დღემდე სუფრის გაშლა ბეშუმში 7 ათასი ლარია. ხულოს მუნიციპალიტეტის გამგეობა სახალხო დღესასწაულის სუფრისთვის ტენდერს არ აცხადებს. გამგეობა მუდმივად პირდაპირ შესყიდვას აფორმებს ერთსა და იმავე პირთან – ემზარ აბაშიძესთან. წლების განმავლობაში არც მენიუ იცვლება. მაგალითად, 2012 წელს და ახლაც გამგეობა ერთ თიკანში 135 ლარს დახარჯავს.

„თუ თქვენ იცნობთ ბეშუმს, იქ სხვა ალტერნატივა არ არსებობს. სხვა სასადილო იქ არ არის, სადაც 200 კაცი დაეტევა,“ – ასე ხსნის ერთსა და იმავე პირთან პირდაპირი შესყიდვის გაფორმებას ხულოს მუნიციპალიტეტის გამგებელი.

რატომ არ ცდილობს გამგეობა ალტერნატივის გაჩენას ტენდერის გამოცხადებით? – ბესიკ ბაუჩაძე ამბობს, რომ თუკი გაიგებს ინფორმაციას, რომ ახალი და დიდი კაფე მოეწყო ბეშუმში, ან გოდერძზე, მაშინ გამოაცხადებს ტენდერს: „სადაც ახლა იმართება შუამთობა, ეს არის ფაცხები. ხშირად იქაც ვერ ეტევა ხალხი და ხელახლა იშლება სუფრები. ეს არ არის ღრეობა. შუამთობას ულოცავს ხალხი ერთმანეთს“.

ბათუმის საკრებულომ დღეს, 5 ივლისს, გამართულ საკრებულოს სხდომაზე ბიუჯეტის ცვლილებების პროექტი წარმოადგინა, რომლის მიხედვით, ბიუჯეტი შემოსულობის ნაწილში იზრდება 20 ათასი ლარით, ხოლო გადასახდელების ნაწილში – 111 ათასი ლარით.

ცვლილებების მიხედვით, 91 ათასი ლარი მოდის კვირეულის დაფინანსებისთვის გამოიყოფა, 20 ათასი ლარი კი კულტურული მემკვიდრეობის დამცავი ზონების დამტკიცებისთვის საჭირო მოსამზადებელი სამუშაოებისთვის. ასევე, პარკების, სკვერების რეაბილიტაციის ფარგლებში  ჯავახიშვილის  70-74-ში არსებული სკვერის განათებაზე 6 ათასი ლარი გამოიყოფა, 33 ათასი ლარი კი – მუნიციპალური ტრანსპორტის სათადარიგო ნაწილების შეძენაზე.

ცვლილება შეეხო ბოტანიკური ბაღის ქვეპროგრამასაც, 17 ათასი ლარი გოდერძის ალპური ბაღის განვითარების მიზნით ბოტანიკური ბაღის თანამშრომლების გერმანიაში გამგზავრებაზე დაიხარჯება, 16 300 ლარი კი – კორდის შეძენაზე.

ცვლილება შეეხო სტუდენტური დასაქმების პროგრამასაც, ტენდერის შედეგად გამოთავისუფლებული 5 ათასი ლარით პროგრამაში მონაწილე პირებისთვის სერტიფიკატები დამზადდება.

„ქობულეთის გამგებელს, მგონი, საერთოდ დაავიწყდა, რომ ჩაქვიც ქობულეთს ეკუთვნის და მიხედვა უნდა,“ – აცხადებს ბონდო თედორაძე, ქობულეთის საკრებულოს წევრი „ერთიანი ნაციონალური მოძრაობიდან“. მისი თქმით, საგზაო დატურისტული ინფრასტრუქტურა დაბა ჩაქვის ტერიტორიაზე მოუწესრიგებელია, ასევე დაუსუფთავებელია პლაჟი.

„ქობულეთის სანდასუფთავების ბიუჯეტი მილიონ 800 ათასი გახდა, მაგრამ ჩაქვის პლაჟისთვის ამ სამსახურმაც კი ვერ მოიცალა. როცა ვსაუბრობთ ტურიზმზე, ჩაქვის რესურსის გამოუყენებლობა დანაშაულია. ეს საკითხი არაერთხელ დავსვი ქობულეთის საკრებულოს სხდომაზე, მაგრამ პასუხი მივიღე, რომ ჩაქვში ჯერ მიწისქვეშა კომუნიკაციები უნდა მოწესრიგდეს და ტენდერის ჩატარებას ელიან. დროებით მიწის გასწორება ხომ მაინც შეიძლება?“ – ამბობს ბონდო თედორაძე „ბათუმელებთან“.

„ტენდერი გამოცხადებული გვაქვს საპროექტო დოკუმენტაციის შესყიდვაზე და ველოდებით შედეგს, მანამდე რომ გავაკეთოთ და მერე კიდევ ფული დავხარჯოთ, ეს ბიუჯეტის არასწორი ხარჯვა იქნება,“ – გვითხრა მალხაზ რომანაძემ, ქობულეთის მუნიციპალიტეტის გამგებლის მოადგილემ.

მალხაზ რომანაძის განმარტებით, სანდასუფთავების სამსახურს ორი ერთეული ტექნიკა დაემატა და ჩაქვის სანაპირო ზოლს, მათ შორის, პლაჟს კვირაში ორჯერ დაასუფთავებენ. მისივე თქმით, პარასკევიდან დაბა ჩაქვში გამწვანების სამსახური დაიწყებს მუშაობას.

რაც შეეხება გზების დროებით მოწესრიგებას. ქობულეთის გამგებლის მოადგილე ამბობს, რომ ამას გზების დეპარტამენტი მიხედავს. მალხაზ რომანაძე ბონდო თედორაძეს პასუხობს, რომ ქობულეთის გამგეობას ჩაქვი არ დავიწყებია: „ერთი ადგილით ხომ არ განისაზღვრება მარტო? იქ წყლის სისტემა წესრიგდება, საბავშვო ბაღის მშენებლობა მიმდინარეობს. უცებ ქალაქი არ აშენდება“.

„ენერგო-პრო ჯორჯიას“ განცხადებით, ქსელის გეგმიური სარეაბილიტაციო სამუშაოების გამო 5 ივლისს, 12:00-დან 17:00 საათამდე, ელექტროენერგიის მიწოდება შეეზღუდება 420 აბონენტს ზემო აჭარის სოფლებში: მერისში, გუნდაურსა და ნამონასტრევში.

5 ივლისს, 06:00-დან 09:00 საათამდე, ელექტროენერგია ასევე შეეზღუდება 1100 აბონენტს ბათუმის ნაწილში [ბაგრატიონის, მელიქიშვილისა და მიმდებარე ქუჩებზე].

შვიდი თვის საქმიანობის ანგარიში აჭარის უმაღლესმა საბჭომ დღეს, 4 ივლისს, წარმოადგინა. შეხვედრას, ძირითადად, საჯარო მოხელეები და თანამდებობის პირები ესწრებოდნენ მთავრობიდან. ანგარიშის მოსმენის შემდეგ გათვალისწინებული იყო დისკუსიაც, თუმცა ხელოვნების ცენტრში, სადაც შეხვედრა შედგა, ისე ცხელოდა, რომ შეკითხვა მხოლოდ ერთი დაისვა, ისიც ნადირობაზე.

ტრიბუნასთან და ტრიბუნის მიღმაც დავით გაბაიძემ, უმაღლესი საბჭოს თავმჯდომარემ, კანონმდებლების საქმიანობის მთავარ მიღწევად გამჭვირვალობა დაასახელა. „მე პრესსამსახურის გარეშეც ვცდილობ ჟურნალისტებთან და საზოგადოებასთან კომუნიკაციას. გამჭვირვალობა არის მთავარი მიღწევა,“ – უთხრა „ბათუმელებს“ დავით გაბაიძემ.

ანგარიშის წარმოდგენის დროს მან ასევე ბევრი დრო დაუთმო იმაზე საუბარს, რომ უმაღლესი საბჭოს საიტზე საჯარო ინფორმაციები პროაქტიულად ქვეყნდება, ხოლო აპარატში საზოგადოებასთან ურთიერთობის დეპარტამენტი ცალკე შეიქმნა.

დავით გაბაიძე მიღწევად ასახელებს აქტიურ საკანონმდებლო საქმიანობასაც. „ბათუმელების“ კითხვაზე, რომელი კანონი მიიღო უმაღლესმა საბჭომ, რამაც მნიშვნელოვანი პრობლემა გადაჭრა, გვპასუხობს, რომ ასეთია ნორმატიული აქტების შესახებ კანონი, რომელიც სამართლებრივ აქტებს შორის იერარქიას არსებითად აწესრიგებს. „აქტიურ საკანონმდებლო საქმიანობას მაინც მას შემდეგ უნდა ველოდოთ, როცა აჭარის ავტონომიური რესპუბლიკის კონსტიტუციას მივიღებთ,“ – დასძინა უმაღლესი საბჭოს თავმჯდომარემ.

ანგარიში მეოთხე მოწვევის უმაღლესმა საბჭომ შეხვედრაზე წერილობითაც წარმოადგინა. აქ, ძირითადად, ციფრებია. ვინ რამდენი მოქალაქე მიიღო, რამდენი კორესპონდენცია დარეგისტრირდა, რამდენი გადამისამართდა, ესა თუ ის კომისია რამდენჯერ შეიკრიბა, ბიურო, თუ პლენარული…

მთლიანობაში, მეოთხე მოწვევის უმაღლესმა საბჭომ შვიდი თვის განმავლობაში მიიღო 56 სამართლებრივი აქტი, მათ შორის, 37 დადგენილება, 14 ცვლილება კანონში, ხოლო 5 – რეგლამენტის ცვლილება.

[red_box]ერთი კითხვა, მადლობა ერთი და რჩევაც ერთი[/red_box]

მას შემდეგ, რაც დავით გაბაიძემ მოხსენების წარმოდგენა დაასრულა, საზოგადოებას ზურაბ პატარაძემ მიმართა, აჭარის მთავრობის თავმჯდომარემ. მან, ძირითადად, ხელისუფლების საქმიანობის შედეგზე ისაუბრა, და არა – უმაღლეს საბჭოზე. მაგალითად, როგორ გაიზარდა ექსტრემალური ტურიზმის მიმდევართა რაოდენობა აჭარის მაღალმთიანეთში.

„შეკითხვების დროა. გისმენთ“, – მიმართა აუდიტორიას დავით გაბაიძემ. შეკითხვა მხოლოდ მოქალაქე ასლან ლორთქიფანიძემ დასვა: რატომ არ იღებს უმაღლესი საბჭო კანონს ნადირობის რეგულირების შესახებ, როცა ეს აჭარის ავტონომიური რესპუბლიკის კომპეტენციაა. უმაღლესი საბჭოს თავმჯდომარემ მას უპასუხა, რომ ამ თემაზე დეპუტატები სამომავლოდ აუცილებლად იმუშავებენ.

დეპუტატებს მიმართა ადვოკატმა, თენგიზ კახიძემ. მან უმაღლეს საბჭოს საქმიანობისთვის მადლობა გადაუხადა და პირადად დავით გაბაიძის მისამართით თქვა, რომ ყოფილი ადვოკატები არ არსებობენ.

„ისევე, როგორც არ არსებობენ ყოფილი ადვოკატები, არც ყოფილი დიპლომატები არსებობენ,“ – ჩაიცინა ზურაბ პატარაძემ, რომელიც ჯერ კიდევ ტრიბუნასთან იდგა.

შეხვედრას ზურაბ პატარაძესთან ერთად ესწრებოდნენ მინისტრები, დეპარტამენტების და სამსახურების უფროსები, უფროსი და რიგითი საჯარო მოხელეები, უმაღლესი საბჭოს აპარატის წევრები, რამდენიმე არასამთავრობო ორგანიზაციის წარმომადგენელი და ერთი ოპოზიცინიორი.

„თითოეული დეპუტატი უნდა მუშაობდეს იმაზე, თუ რას ვთავაზობთ თანაქალაქელებს, საზოგადოებას, რომლებსაც პირობები გაუუარესდათ, სოციცალურ ფონს, ეკომიგრანტებს და სხვა ბევრ პრობლემას ვგულისხმობ. ძალიან ბევრი სამუშაოა იმისთვის, რომ რეალურ პრეზენტაციამდე მივიდეთ,“ – უთხრა პეტრე ზამბახიძემ ჟურნალისტებს. ის რეგიონში „ევროპული საქართველოს“ ერთ-ერთი ლიდერია.

შეხვედრას ესწრებოდნენ აჭარიდან მაჟორიტარი დეპუტატები პარლამენტში. კითხვაზე, რა უნდა შეცვალოს უმაღლესმა საბჭომ, რომ უფრო აქტიური გახდეს? – ანზორ ბოლქვაძემ, ხულოს, შუახევისა და ქედის მაჟორირატმა დეპუტატმა ასე გვიპასუხა:

„ყოველთვის მქონდა უმაღლეს საბჭოსთან ურთიერთობა, ახლანდელთან, ძველთანაც. მე, პირველ რიგში, ვამბობ და ვიტყვი, რომ დეპუტატები, ვინც არიან არჩეულები, კი აქვთ შეხვედრები, მაგრამ ერთი სამად უნდა შეხვდნენ მოსახლეობას, უფრო მეტი მისვლა-მოსვლაა საჭირო… პრობლემა რომ არსებობს, იმას წერტილი უნდა დაესვას. ან კი, ან – არა, უნდა იცოდეს ხალხმა. ის დანაბარები, რასაც ხალხი ამბობს, იმას მთავრობასთან ნორმალურად უნდა მიტანა“, – ამბობს ანზორ ბოლქვაძე „ბათუმელებთან“.

ამ კითხვაზე დავით გაბაიძემ, უმაღლესი საბჭოს თავმჯდომარემ ის სიტყვა ახსენა, რასაც რამდენიმე დღის წინ ბათუმში ჩამოსული ვენეციის კომისიის თავმჯდომარე, ჯანი ბუკიკიო ყველაზე ხშირად ახსენებდა – კონსესუსი.

დავით გაბაიძე გამოწვევად აჭარის კონსტიტუციის მიღებას ასახელებს, რომლის მომზადების პროცესიც ახლა უნდა დაიწყოს. „გამოწვევა არის ის, რომ ჩვენ ერთგვარი კონსესუსის საფუძველზე უნდა მივიღოთ ეს დოკუმენტი, რომელიც დაეყრდნობა თანამშრომლობას… რაღაც ნაწილთან ალბათ მიღწევადია ეს. თუმცა როცა ოპოზიცია აქაც კი არ მოვიდა და განაცხადა, ამ შეხვედრის შესახებ არაფერი ვიცოდიო, ეს სკეპტიკურად განწყობის საშუალებას იძლევა, მაგრამ ვფიქრობ, რომ კონსესუსი მაინც მიღწევადია“, – გვითხრა დავით გაბაიძემ.

წერილობით წარმოდგენილ ანგარიშში უმაღლესი საბჭო დეპუტატების მივლინებების შედეგებზეც წერს. მაგალითად, ვიცე-სპიკერი მერაბ კარანაძე თებერვალში იტალიაში ყოფილა. მას შეხვედრები ფერარასა და როვიკოში გაუმართავს. დეპუტატს ფერარას უნივერსიტეტის რექტორი სამომავლოდ თანამშრომლობას დაჰპირებია.

ევროპაში ვიზიტი ორჯერ მოუსწრია ვლადიმერ მგალობლიშვილს. ავსტრიაში დეპუტატი არტმენეჯერს, ბარბარა შტურმს შეხვდა, რომელსაც ფესტივალების ჩატარების რეგულაციებზე ესაუბრა. გერმანიაში კი, ვლადიმერ მგალობლიშვილს ფესტივალების ასოციაციის სამიტში მიუღია მონაწილეობა.

ანგარიშში მოხვდა უმაღლესი საბჭოს ხუთკაციანი დელეგაციის ვიზიტი პოლონეთში, სადაც ტურისტული გამოფენა მოეწყო და დავით გაბაიძის ვიზიტი ამერიკის შეერთებულ შტატებში.

რა დაჯდა დეპუტატების მივლინებები საზღვარგარეთ, ანგარიშში მოცემული არ არის.

[red_box]რას უნდა ველოდოთ უმაღლესი საბჭოსგან[/red_box]

წერილობითი ანგარიშის ბოლო გვერდზე უმაღლესმა საბჭომ სამომავლო გეგმების ჩამონათვალიც შემოგვთავაზა. ვკითხულობთ, რომ უმაღლესი საბჭო კონსტიტუციის და რეგლამენტის პროექტების მომზადების გარდა, აპირებს აპარატის სტრუქტურის ოპტიმიზაციას, არასამთავრობო ორგანიზაციების მონაწილეობით საბჭოს შექმნას, უფლებამოსილების დელეგირების კუთხით მუშაობის გააქტიურებას, ცვლილებების განხორციელებას დეპუტატების გაცდენების მოსაწესრიგებლად, ელექტრონული ხმის მიცემის სისტემის დანერგვას, ბიუროს ოთახის მოწყობას.

„გამჭვირვალობის გაზრდის მიზნით ვგეგმავთ კიდევ უფრო მეტი საჯარო ინფორმაციის პროაქტიულ გამოქვეყნებას,“ – ამ დაპირებით სრულდება უმაღლესი საბჭოს წერილობითი ანგარიში.

„მცხელა“, – ეს სიტყვა დღევანდელ შეხვედრაზე ყველაზე ხშირად ისმოდა. უმაღლესმა საბჭომ ანგარიშის წარმოდგენა ბათუმის ხელოვნების ცენტრის ფოიეში არჩია, რომლის კონდიცირების სისტემაც ხალხმრავლობაზე გათვლილი არ არის. ჩართული კონდიციონერების პარალელურად, თანამდებობის პირების სკამებს შორის რამდენიმე ვენტილატორიც იდგა. დარბაზი სხვადასხვა რეპლიკით გამოხატავდა პრეზენტაციის სწრაფად დასრულების სურვილს. სამაგიეროდ, უმაღლეს საბჭოს ამ შეხვედრისთვის დარბაზის დასაქირავებლად თანხა ბიუჯეტიდან არ დაუხარჯავს.

ბულვარში, აკვაპარკის მიმდებარე ტერიტორიაზე განთავსებულ ტრენაჟორებთან უსაფრთხოების ნორმები მხოლოდ რუსულ ენაზეა განთავსებული. საქართველოს კანონით სახელმწიფო ენის შესახებ, საჯარო ინფორმირებისთვის განკუთვნილი განცხადების, შეტყობინების, სასათაურო წარწერის, პლაკატის, აბრის, აფიშის, რეკლამის, სხვა ვიზუალური ინფორმაციის ტექსტი სახელმწიფო ენაზე სრულდება. საჭიროების შემთხვევაში, შესაბამისი ინფორმაცია შეიძლება მიეთითოს არასახელმწიფო ენაზედაც.

უსაფრთხოების ნორმებს, რომლებიც მოიცავს აკრძალვების რვაპუნქტიან ჩამონათვალს, თან ერთვის სამაშველო სამსახურის ნომერი -112 და სასწრაფო დახმარების ნომერი – 03, ეს უკანასკნელი კი საქართველოში წლებია აღარ გამოიყენება.

მაგალითად, აბრაზე რუსულად წერია, რომ ტრენაჟორების მოედანზე აკრძალულია ცეცხლის დანთება; ეტლით, გორგოლაჭებით ან სკეიბორდით ყოფნა, ასევე იკრძალება ტრენაჟორებით სარგებლობა 14 წლამდე ასაკის ბავშვებისთვის მშობლების ზედამხედველობის გარეშე და სხვა.

ბულვარის ადმინისტრაციაში ამბობენ, რომ ასეთი სახის ინსტრუქციებზე ქართული წარწერის განთავსების ვალდებულება მათ არ აქვთ. “ეს ტრენაჟორები ტენდერის საფუძველზე იქნა შეძენილი 2015 წლის ბოლოს. მათი მწარმოებელი იყო რუსული კომპანია და, შესაბამისად, მისი გამოყენების და უსაფრთხოების წესები მათ ეროვნულ ენაზეა დატანილი. ჩვენთან მოქმედი კანონმდებლობა არ ზღუდავს რუსული ენის გამოყენებას, მაგრამ ნამდვილად უპრიანი იქნება, რომ პირველად იყოს ქართულ ენაზე და შემდეგ უცხოურ ენაზე”, – ამბობს სსიპ-ბათუმის ბულვარის დირექტორის მოადგილე გოჩა მჟავანაძე.

სიას იურისტი მირზა მამულაძე ამბობს, რომ სახელმწიფო ენის კანონის შესაბამისად, იმ შემთხვევებში, როცა აფიშით, აბრითა თუ ნებისმიერი სხვა საშუალებით ხდება მოსახლეობისთვის ინფორმაციის საჯაროდ მიწოდება, არის ვალდებულება, რომ გამოყენებული იქნეს სახელმწიფო ენა. თუმცა, მისივე განმარტებით, ეს შემთხვევა სამართალდარღვევად არ მიიჩნევა და  ჯარიმების ნაწილში რეაგირება ვერ მოჰყვება. “მაგრამ შეგვიძლია მოვთხოვოთ ოფიციალურად ვალდებულების შესრულება იმის შესახებ, რომ მოხდეს სახელმწიფო ენაზე საზოგადოების ინფორმირება”, – ამბობს ის.

გოჩა მჟავანაძის თქმით, ქართული ინსტრუქციები ტრენაჟორებზე შემოდგომისთვის დაემატება – “პარალელურად უნდა გავაკეთოთ ბულვარის მცენარეების ინვენტარიზაცია, სადაც სამ ენაზე იქნება ამ მცენარეების დასახელება, წარმომავლობა და ა.შ. ამ პროექტის ფარგლებში, ერთ-ერთი მიმართულებაა აღნიშნულ წარწერებზე ქართული და ინგლისური წარწერების დამატებაც.”

2015 წელს გამოცხადებული ტენდერის საფუძველზე, ბულვარის ადმინისტრაციამ რუსული წარმოების ტრენაჟორების ორი კომპლექტი შეიძინა, რაშიც 40 000 ლარი გადაიხადა. ერთი აკვაპარკის, მეორე კი სასტუმრო „კემპინსკის“ მიმდებარე ტერიტორიაზეა განთავსებული.

[red_box]საქართველოს კანონმდებლობით:[/red_box]

[checklist]

• საჯარო ინფორმირებისთვის განკუთვნილი წარწერის სახელმწიფო ენაზე წარმოდგენა სავალდებულოა.
• ოფიციალური სახელწოდების ქართულ, აფხაზურ და არასახელმწიფო ენებზე  გადმოცემისას ქართული ტექსტი თავსდება წინ (მარცხნივ ან ზევით), აფხაზური ტექსტი – ცენტრში, ხოლო არასახელმწიფო ენაზე შესრულებული ტექსტი – შემდეგ (მარჯვნივ ან ქვევით).
• განსხვავებულ შემთხვევაში სახელმწიფო ენაზე შესრულებული ტექსტი არასახელმწიფო ენაზე შესრულებული ტექსტის წინ (მარცხნივ ან ზევით) თავსდება.
• არასახელმწიფო ენაზე შესრულებული ტექსტის სახელმწიფო ენაზე შესრულებულ ტექსტთან ერთად გამოყენებისას არასახელმწიფოენოვანი ტექსტის შრიფტი სახელმწიფოენოვანი ტექსტის შრიფტზე დიდი არ უნდა იყოს.

[/checklist]

საქართველოს მთავრობამ 21 ივნისს ძალადაკარგულად ის განკარგულება გამოაცხადა, რომლითაც მართლმადიდებელ ეკლესიასთან და ილია მეორესთან დაკავშირებული საიუბილეო ღონისძიებების ჩასატარებლად სამთავრობო კომისია შეიქმნა. პატრიარქის აღსაყდრების დღესასწაული წელს, 25 დეკემებერს უნდა გამართულიყო.

კომისიის შექმნის შესახებ განკარგულება მთავრობამ 2017 წლის 23 მაისს მიიღო. ამ კომისიის თავმჯდომარე საქართველოს პრემიერ-მინისტრი გიორგი კვირიკაშვილი იყო.

სამთავრობო კომისიას „საქართველოს სამოციქულო ავტოკეფალური მართლმადიდებელი ეკლესიის 15-საუკუნოვანი ავტოკეფალიის აღდგენიდან 100 წლისთავის, სრულიად საქართველოს კათოლიკოს-პატრიარქის, მცხეთა-თბილისის მთავარეპისკოპოსის, ბიჭვინთისა და ცხუმ-აფხაზეთის მიტროპოლიტის, უწმინდესისა და უნეტარესის ილია II-ის აღსაყდრების 40 წლისა და დაბადებიდან 85 წლის იუბილესადმი მიძღვნილი საიუბილეო ღონისძიებები“ სრულფასოვნად და მაღალ დონეზე უნდა ჩაეტარებინა.

კომისიის შექმნიდან მეორე დღეს საქართველოს საპატრიარქომ გაავრცელა განცხადება, რომლითაც პატრიარქის აღსაყდრების 40 წლისთავთან დაკავშირებით დაგეგმილი ზეიმი გაუქმდა.

„მსოფლიოში შექმნილი არასტაბილური მდგომარეობისა და საქართველოში არსებული სოციალური ვითარების გათვალისწინებით, მისი უწმიდესობისა და უნეტარესობის, ილია II-ის ლოცვა-კურთხევით გაუქმდა კათალიკოს-პატრიარქის აღსაყდრების 40 წლისთავთან დაკავშირებული საიუბილეო ზეიმი და მართლამდიდებელ ეკლესიათა მეთაურებისა და სხვა საპატიო სასულიერო და სერო პირთა საქართველოში მოწვევა“, – აღნიშნული იყო საპატრიარქოს განცხადებაში.

საქართველოს მთავრობას სამთავრობო კომისიის შექმნის შესახებ განკარგულების ძალადაკარგულად გამოცხადების მიზეზი არ აქვს მითითებული.

მიმდინარე წელს თბილისის ოპერისა და ბალეტის თეატრში გადაიდო ილია მეორის დაბადების დღისადმი მიძღვნილი ღონისძიება. 4 იანვარს პატრიარქი 84 წლის გახდა. ილია მეორე ჯანმრთელობის მდგომარეობის გამო გასული წლის 25 დეკემებერს მისი აღსაყდრების 39–ე წლისთავთან დაკავშირებით სადღესასწაულო წირვასაც ვერ დაესწრო.

კათოლიკოს-პატრიარქ ილია II-ის აღსაყდრების 40 წლისთავისადმი მიძღვნილი ღონისძიების „სრულფასოვნად და მაღალი სტანდარტებით“ ჩატარებას მთავრობის, 2015 წლის კიდევ ერთი განკარგულება ეხება, რომლითაც თბილისის განვითარების ფონდს მიეცა უფლება გარკვეული სახელმწიფო შესყიდვები გამარტივებული წესით განეხორციელებინა. ღონისძიება, მართალია, 2017 წლის 25 დეკემბრისთვის იყო დაგეგმილი, თუმცა სახელმწიფო შესყიდვები, ღონისძიების ჩატარების გარდა, თბილისში, მახათას მთაზე ტაძრის მშენებლობასაც უკავშირდებოდა.

სამაშველო სამსახური ბათუმში, ზღვაში, მამაკაცს ეძებს. სამსახურის ინფორმაციით, მამაკაცი გუშინ, 3 ივნისს, საღამოს 19:00 საათზე შევიდა ზღვაში საბანაოდ. „მაშველებმა დაინახეს, რომ ჩადიოდა, თუმცა ამოვიდა თუ არა უკან, არ დაუნახავთ. ჯერჯერობით არ არის ოფიციალურად დადასტურებული, რომ ნამდვილად ზღვაში დაიკარგა,“ – გვითხრეს სამაშველო სამსახურში. ამის მიუხედავად, სამაშველო ჯგუფები დაკარგულ მამაკაცს მაინც ეძებენ.

დაკარგული მამაკაცის შესახებ ინფორმაციას ფეისბუქზე არასამთავრობო ორგანიზაცია „ჩვენი უფლებებისთვის“ ხელმძღვანელი თამაზ ბაკურიძე ავრცელებს. მისი თქმით, მამაკაცი, რომელიც გუშინ საღამოს ზღვაში შევიდა და გაუჩინარდა, მისი ძმაა.

„ჩემი ძმა სპორტსმენი იყო, კარგად ცურავდა და ზღვაში ძალიან შორს შედიოდა ხოლმე. გუშინ საღამოს შვიდი საათის შემდეგ შესულა, მაშველებმა გვითხრეს, რომ დაინახეს, მაგრამ რომ დააგვიანა გამოსვლა,  შემდეგ შევატყობინეთ პოლიციასო,“ – ამბობს თამაზ ბაკურიძე. მისი თქმით, მაშველებმა ზღვის ნაპირზე მამაკაცის ჩუსტები და ავტომანქანის გასაღები იპოვეს.

შსს ინფორმაციით, გამოძიება სსკ-ის 115-ე მუხლით მიმდინარეობს, რაც თვითმკვლელობამდე მიყვანას გულისხმობს. სამინისტროს ინფორმაციით, მიმდინარეობს სამძებრო სამუშაოები პოლიციელებისა და მაშველების მიერ.

არასამთავრობო ორგანიზაცია „ცვლილებები თანაბარი უფლებებისთვის“ თავმჯდომარე თომა კაკაბაძე ამბობს, რომ ერთიან ეროვნულ გამოცდებზე, რომელიც ბათუმში შოთა რუსთაველის სახელმწიფო უნივერსიტეტში მიმდინარეობს, შეზღუდული შესაძლებლობის მქონე აბიტურიანტთათვის გარემო არაადაპტირებულია. თომა კაკაბაძე წელს თავადაა აბიტურიენტი:

„მიუხედავად იმისა, რომ 10 ივნისამდე შევიტანე განცხადება შეზღუდული შესაძლებლობის დამადასტურებელ დოკუმენტთან ერთად და მულტიდისციპლინურმა გუნდმაც შეაფასა ჩემი ფიზიკური შესაძლებლობები, დღეს საგამოცდოდ მისულს, მაინც მიუწვდომელი გარემო დამხვდა!

გავაპროტესტე, მოვითხოვე პასუხისმგებელი პირები, მაგრამ აღმოჩნდა, რომ გამოცდების ეროვნული ცენტრი არ არის პასუხისმგებელი და მიპასუხეს: ჩვენ ვერ ვეტყვით უნივერსიტეტს (ბსუ), რომ მისაწვდომობა უზრუნველყოს.

ტელეფონი კიბემდე დამატოვებინეს და ფოტოები ვერ გადავიღე, რომ მეჩვენებინა კიბეებზე აბიტურიენტების თვალწინ როგორ მომიწია უხერხულ პოზაში აჩანჩალება.
ვიცით, რომ უნივერსიტეტის მეორე კორპუსის პირველი სართული შეღწევადია ეტლით მოსარგებლეთათვის. ნუთუ არ შეიძლებოდა აღნიშნულ კორპუსში მოეწყოთ ჩემთვის საგამოცდო სივრცე?!“

ბათუმის შოთა რუსთველის უნივერსიტეტში ამბობენ, რომ ამ პრობლემის შესახებ იციან და არაადაპტირებული სივრცის მიზეზი ძველი შენობებია. წელს უნივერსიტეტი რემონტს გეგმავს, რის შედეგადაც სასწავლო გარემო შშმ პირთათვის ადაპტირებული გახდება. უნივერსიტეტის პრესსამსახურის ინფორმაციით, გამოცდების დასრულების შემდეგ რემონტი დაიწყება, რის შედეგადაც უნივერსიტეტში დამონტაჟდება პანორამული ლიფტები. „რადგან ძველ შენობებს ეს პრობლემა აქვს, უნდა მომზადდეს პროექტი. უნივერსიტეტმა შეუკვეთა პროექტი კომპანიას, რომელმაც შეისწავლა შენობა და მოამზადა პროექტი, როგორ უნდა დამონტაჟდეს ლიფტი,“ – უთხრეს „ბათუმელებს“ უნივერსიტეტში.

ერთიანი ეროვნული გამოცდების ცენტრის განმარტებას „ბათუმელები“ მოგვიანებით შემოგთავაზებთ.

5 ივლისს ბათუმში, ჰაინრიხ ბიოლის ფონდის სამხრეთ კავკასიის რეგიონული ბიუროს მიერ, ნენსი ფრეიზერის წიგნის „ფემინიზმის გამოღვიძება“ პრეზენტაცია და დისკუსია გაიმართება.

მომხსენებლები იქნებიან ილიას უნივერსიტეტის ფილოსოფიის მაგისტრანტი გიორგი ჩუბუნიძე, რომელიც ფრეიზერის პუბლიკაციის მთარგმნელია და სოლიდარობის ქსელი-მშრომელთა ცენტრის თანადამფუძნებელი, სოფო ჯაფარიძე.

„ქალთა ემანსიპაციის ოცნება კაპიტალისტური დაგროვების ძრავაზეა მიერთებული“-ასეთ მძაფრს კრიტიკას აჟღერებს ნენსი ფრაიზერი პუბლიკაციაში „ფემინიზმის თავგადასავალი“- სახელმწიფოს მიერ მართული კაპიტალიზმიდან ნეოლიბერალურ კრიზისამდე“.

კრებული მისი ბოლო გამოცემაა, რომლის ავტორის 40-წლიანი მოღვაწეობის რეტროსპექტივას გვთავაზობს, სადაც უაღრესად საინტერესო ნააზრევია წარმოდგენილი“-ნათქვამია პრესრელიზში.

ორგანიზატორთა ინფორმაციით, პუბლიკაციის პრეზენტაციასთან ერთად გაიმართება დისკუსია შემდეგ თემებზე: როგორია ემანსიპირებული ბრძოლების ხედვა, რომელიც ფემინიზმს განაახლებს და გამოაღვიძებს?

ადგილობრივ გამოცდილებაზე დაყრდნობით, შედგა თუ არა ფემინიზმის და ნეოფემინიზმის ალიანსი?

რა როლი უნდა შეასრლოს ფემინისტურმა მოძრაობამ სოციალური სამართლიანობისთვის ბრძოლაში დღევანდელ საქართველოში?

დისკუსია და პრეზენტაცია მემედ აბაშიძის 60 ნომერში, „წიგნები ბათუმში“ გაიმართება. დასწრება თავისუფალია.

დღეს, 3 ივლისს, ბათუმის რუსთაველის უნივერსიტეტის ეზოში, მოძრაობა „ეკვილიბრიუმის“ ფარგლებში, საქართველოს პარლამენტის ეროვნული ბიბლიოთეკის დირექტორმა, გიორგი კეკელიძემ, „წიგნის ბუდე“ გახსნა.

„სტუდენტებსა და პროფესორ-მასწავლებლებს შესაძლებლობა აქვთ ორიგინალური სათავსოდან წიგნი აიღონ, წაიკითხონ და უკან დააბრუნონ, ან წაღებული წიგნის ნაცვლად ახალი დატოვონ,“-ნათქვამია ადმინისტრაციის პრესრელიზში.

ბსუ-ს ინფორმაციით, პროექტი მიზნად ისახავს წიგნის კითხვის პოპულარიზაციას. რუსთაველის უნივერსიტეტი სოციალურ კამპანიაში – ,,ეკვილიბრიუმი“ რამდენიმე თვის წინ ჩაერთო და სოციალური ქსელით დაწყებული აქციის – ,,გაიღე წიგნი“ – ეგიდით, შუახევის რაიონის სოფელ ჭვანის ბიბლიოთეკას 400-მდე წიგნი გადასცა.

ხელისუფლების წარმომადგენლებთან „ბათუმის აქციის საქმეზე“ დაკავებულთა შეხვედრა დასრულდა. დახურულ კარს მიღმა უმაღლესი საბჭოს თავმჯდომარე, დეპუტატები და აჭარის მთავრობის აპარატის წევრები დაკავებულების ათამდე ახლობელს შეხვდნენ.

„დაგვპირდნენ, რომ დაგვეხმარებოდნენ პროკურატურასთან კომუნიკაციაში. აქამდე ჩვენ მთავარ პროკურორთან შეხვედრა ვერ მოვახერხეთ. ჩვენი მოთხოვნაა, რომ მიდგომა იყოს ერთიანი და არა ისე, რომ ერთს მცირე დროით უფორმებენ საპროცესოს, სხვებს კი მკაცრი სასჯელის ფონზე სთავაზობენ საპროცესო შეთანხმების გაფორმებას. აჭარის უმაღლესი საბჭოს თავმჯდომარე მხარდაჭერას დაგვპირდა,“ – ამბობს ადვოკატი ზაზა პაპიძე. ის დახურულ შეხვედრას აჭარის უმაღლეს საბჭოში ესწრებოდა.

11-12 მარტის აქციის შემდეგ სულ 21 პირი დააკავეს. მათ გამოძიება სახელმწიფოს წინააღმდეგ გამოვლენილ მასობრივი ძალადობას ედავება. მათ შორის ორს – მერაბ ღოღობერიძეს და ირაკლი ჩხვირკიას – მასობრივი ძალადობის ორგანიზებას.

დაკავებულებიდან ოთხს უკვე გაუფორმდა საპროცესო შეთანხმება, მათ შორის, ორ არასრუწლოვანს. პროკურატურა „ბათუმის აქციის საქმეზე“ დაკავებულებს, ბრალის აღიარების შემთხვევაში, ორწლიან რეალურ სასჯელს და სამწლიან პირობით მსჯავრს სთავაზობს. ბრალის აღიარების გარეშე, საპროცესო შეთანხმების გაფორმება კანონის მიხედვით შეუძლებელია.

სასწრაფო დახმარების სამსახურის ინფორმაციით,  ცოტა ხნის წინ ბათუმში მაშველებმა უცხოელი მამაკაცი გადაარჩინეს. ის თურქეთის მოქალაქეა.

„ცოტა ხნის წინ ერთი მამაკაცი იხრჩობოდა ზღვაში და მაშველებმა ამოიყვანეს, სასწრაფო დახმარებამ კი საავადმყოფოში გადაიყვანა და გადაარჩინეს,“ -გვითხრა სასწრაფო დახმარების უფროსმა, მინდია კახიძემ.

ბულვარში სასწრაფო დახმარების მანქანა 1-ელი ივლისიდან დგას და მოქალაქეებს სამედიცინო დახმარებას უწევს. ოფიციალური ინფორმაციით, ბოლო ორი დღის განმავლობაში სასწრაფო დახმარება ბულვარში 15 ადამიანს გაეწია.

მინდია კახიძის ინფორმაციით, სასწრაფო დახმარების ბრიგადა ბულვარში დილის 10 საათიდან საღამოს ათ საათამდე იმუშავებს ტურისტული სეზონის განმავლობაში. სასწრაფო დახმარების მანქანა თავდადებულის ქუჩის ბოლოში, პლაჟთან დგას.

დღეს, 3 ივლისს, ეროვნული გამოცდები დაიწყო. გამოცდა მიმდინარეობს ქართულ ენასა და ლიტერატურაში.  შეფასებისა და გამოცდების ეროვნული ცენტრის ინფორმაციით, გამოცდის პირველ სესიაზე 97-მდე აბიტურიენტი არ გამოცხადდა.

ბათუმის საგამოცდო ცენტრში 24 აბიტურიენტი არ გამოცხადდა, ერთმა – დააგვიანა.

ბათუმის საგამოცდო ცენტრში 9 000 აბიტურიენტი იყო რეგისტრირებული. გამოცდები მთელი საქართველოს მასშტაბით გახსნილ 22 საგამოცდო ცენტრში მიმდინარეობს. მეორე სესიისთვის რეგისტრაცია 14:00 საათზე დაიწყება.