საპარლამენტო არჩევნებამდე ერთი კვირით ადრე ქედის მუნიციპალიტეტის გამგებლის პირველ მოადგილეს ხელფასი 400 ლარით გაუზარდეს. ეს გადაწყვეტილება ქედის საკრებულომ დღეს, 30 სექტემბერს ხმაურის ფონზე მიიღო.
დეპუტატების პროტესტი გამგებლის პირველი მოადგილის გურამ ბერიძისთვის სახელფასო სარგოს 400 ლარით გაზრდამ გამოიწვია, პროტესტის მიუხედავად ხმათა უმრავლესობით (11 მომხრე, შვიდი წინააღმდეგი) ბერიძეს ანაზღაურება 1 300 ლარიდან 1 700 ლარამდე გაეზარდა. ვიდრე საკრებულო დღის წესრიგით გათვალისწინებული საკითხების განხილვას დაიწყებდა, საკრებულოს თავმჯდომარემ ამირან ცინცაძემ გამგებლის პირველი მოადგილის თანამდებობრივი სარგოს საკითხის გადადება იმ მოტივით მოითხოვა, რომ მისი თქმით საკითხი კარგად შესწავლილი არ იყო, თუმცა საკრებულომ თავმჯდომარის მოთხოვნა არ დააკმაყოფილა და საკითხი დღის წესრიგიდან არ მოხსნა.
მიუხედავად იმისა, რომ საკრებულოს თავმჯდომარე არწმუნებდა კოლეგებს იმაში, რომ საკითხი კარგად შესწავლილი არ იყო და ხელფასი შეუსწავლელად არ უნდა გაზრდოდა გამგებლის მოადგილეს, კენჭისყრისას საკითხს თავად ამირან ცინცაძემ დაუჭირა მხარი. კითხვაზე რატომ დაუჭირა მხარი გამგებლის მოადგილის ხელფასის მატებას, თუ საკითხი შესწავლილი არ იყო? ამირან ცინცაძე ასე პასუხობს – „ჩვენ ვიცოდით ის ხელფასი უნდა დაგვემტკიცებინა, მაგრამ ფინანსური მხარეები გვქონდა გასარკვევი, ეს გადაწყვეტილება რაიმე ფინანსურ ვალდებულებას ხომ არ შეგვიქმნიდა გამგეობის წინაშე,“ – ამბობს ამირან ცინაძე.
საკრებულოს ოპოზიციამ კი გამგებლის მოადგილისთვის ხელფასის მატება არჩევნებამდე რამდენიმე დღით ადრე შეაფასა – „პიროვნებაზეა მორგებული, ხელფასებს ასე ზრდიან, ეს მავნებლობა კი არ არის, იმდენად უსირცხვილო და იმდენად მოსაბეზრებელია, რომ ასეთ სხდომებს აღარ დავესწრები. როდესაც მე ვიყავი გამგებელი, ჩემს პირველ მოადგილეს ხელფასი 1350 ლარი ჰქონდა“ – განაცხადა ქედის საკრებულოს წევრმა „ნაციონალური მოძრაობიდან“ – ვაჟა ბოლქვაძემ. ქედის გამგებლის პირველი მოადგილე, გურამ ბერიძე, აჭარის უმაღლესი საბჭოს თავმჯდომარის, ავთანდილ ბერიძის ბიძაშვილია.
