Batumelebi

რა იქნება ფარული საგამოძიებო მოქმედებისთვის კარგი მოდელი და როგორ მუშაობს ამ კუთხით სისტემა ევროპის ქვეყნებში? – „ბათუმელებმა“ ტელესაკომუნიკაციო სისტემების ექსპერტს, დეივ ორელს რამდენიმე შეკითხვა დაუსვა. დეივ ორელი დღეს, 22 იანვარს, ჩვენებას აძლევს საკონსტიტუციო სასამართლოს პლენუმს „ფარული მოსმენების საქმეზე“.

დეივ ორელი ირლანდიიდანაა. ის ფიზიკოსია და ახორციელებს ტექნიკური მოწყობილობების აუდიტს. ორელი ჩართულია კიბერდანაშაულების გამოძიების პროცესშიც.

ბატონო დეივ, საკონსტიტუციო სასამართლოში, სხდომაზე გამოსვლის დროს აღნიშნეთ, რომ მთავარი პრობლემა საქართველოში არის ერთი სააგენტოს ორი ფუნქცია. სააგენტო სუს-ს ექვემდებარება, რომელიც უსაფრთხოების კუთხით აგროვებს მონაცემებს, ხოლო ფარული ჩანაწერებით დაინტერესებულია პროკურატურაც. რისკს კონკრეტულად სად ხედავთ? 

რისკი არის ინფორმაციის გადინებაში. ერთ სააგენტოს აქვს ორი სხვადასხვა ფუნქცია, ეს არის პრობლემა. სახელმწიფო უსაფრთხოების სამსახური ზოგადი, ფართო მიზნებისთვის აგროვებს ინფორმაციას, გამოძიება -კონკრეტულ პირთან, კონკრეტულ საკითხთან დაკავშირებით. გამოძიებას კონკრეტული ინფორმაციის მიღება სურს. ერთ სააგენტოში ამ ინფორმაციის არსებობით კი, გამოძიებას ეძლევა შესაძლებლობა არასანქცირებული, არალეგალური გზებით მოიპოვოს ინფორმაცია. საუბარია ინფორმაციაზე, რომელიც სუს-ს აქვს თავისი მიზნებისთვის. მთავარია, რომ ეს ორი რამ იყოს გამიჯნული. ერთია, სანქცირებულად ფარული საგამოძიებო მოქმედების ჩატარება და მეორეა უსაფრთხოება, რომელსაც თავისი მიზნები აქვს და მის მოქმედებას სხვა სამართლებრივი დასაბუთება სჭირდება.

რა იქნება კარგი მოდელი ფარული თვალთვალისთვის? კამპანია – „ეს შენ გეხებას“ ავტორები, რომლებმაც საკონსტიტუციო სარჩელი მოამზადეს, განიხილავდნენ იმას, რომ ეს მონაცემები მობილური სატელეკომუნიკაციო ოპერატორებმა დაიცვან და გამოძიებამ გამოითხოვოს, საჭიროების შემთხვევაში. საუბარია ასევე დამოუკიდებელი ორგანოს შექმნაზეც, რომლის შემადგენლობასაც პარლამენტი დააკომპლექტებს. 

პირველ რიგში, ერთი სააგენტო ორი ფუნქცით ორგანიზაციულ პრობლემას ქმნის. ინფორმაცია კრიმინალური გამოძიებისთვის, ინფორმაცია უშიშროებისთვის – ერთი ორგანიზაციისთვის ეს ძალიან ბევრია. ევროპის ქვეყნებში არსებობს პრაქტიკა, როცა მობილური სატელეკომუნიკაციო ოპერატორები ინახავენ ინფორმაციას, მაგრამ ეს მოითხოვს დამატებით ხარჯებს. ამ ქვეყნებში უსაფრთხოების სამსახური მიმართავს ოპერატორს შესაბამისი სამართლებრივი დასაბუთებით და იღებს ინფორმაციას.

კონკრეტულად ირლანდიაში, სადაც თქვენ ცხოვრობთ, რა მოდელია? 

ჩვენთან ოპერატორები ინახავენ ინფორმაციას და კრიმინალურ გამოძიებას, როცა სჭირდება, გარკვეული პროცედურების გავლის შემდეგ, შეუძლიათ მიიღონ ეს ინფორმაცია. მობილურ ოპერატორებს აქვთ ვალდებულება, შეინახონ და დაიცვან მონაცემები…

გყავთ თუ არა პერსონალურ მონაცემთა დაცვის ინსპექტორი და კიდევ რა ბერკეტები არსებობს მეტი დაცულობისთვის? სხდომაზე აღნიშნეთ, რომ საქართველოში ინსპექტორზე გვერდისავლის ტექნიკური შესაძლებლობა არსებობს. 

ინსპექტორი არსებობს და კიდევ საკანონმდებლო მექანიზმები: თუკი ვინმეს ეჭვი უჩნდება, რომ უკანონოდ უთვალთვალებენ, მას შეუძლია შეატყობინოს პოლიციას ამის შესახებ და იწყება გამოძიება.

მთავარი ფოტო: დეივ ორელი

„ბათუმელების“ სტატიას – „რა შეეშალა პრემიერ ბახტაძეს – ევროკავშირის მიერ €3,4 მილიარდის გამოყოფა არ დასტურდება“, საქართველოს საგარეო საქმეთა სამინისტრო წერილობით გამოეხმაურა.

გამოხმაურებას უცვლელად გთავაზობთ:

„2019 წლის 15 იანვარს, ევროკომისიამ გამოაქვეყნა ტრანსევროპული სატრანსპორტო ქსელის (TEN-T) საინვესტიციო გეგმა, რომელშიც თავმოყრილია „აღმოსავლეთ პარტნიორობის“ ქვეყნების ის სატრანსპორტო და ინფრასტრუქტურული პროექტები, რომელიც უკავშირდება ტრანსევროპულ სატრანსპორტო ქსელს (TEN-T).

საგარეო საქმეთა სამინისტროს, ისევე როგორც ევროკავშირის მხრიდან გავრცელებულ ინფორმაციაში დეტალურად არის განმარტებული აღნიშნული პროექტის შინაარსი და მათ შორის საინვესტიციო გეგმის მნიშვნელობა.

კერძოდ, ინფორმაციაში, რომელიც გავრცელდა უწყების მიერ აღნიშნულია, რომ ევროკავშირის მიერ გამოქვეყნებული საინვესტიციო გეგმის ფარგლებში იდენტიფიცირებული ინფრასტრუქტურული პროექტების განხორციელებაზე საქართველოსა და „აღმოსავლეთ პარტნიორობის“ დანარჩენ ქვეყნებში, ჯამში 12.8 მილიარდი ევრო დაიხარჯება.

იქვე განმარტებულია, რომ აღნიშნული ფინანსური რესურსი დაიხარჯება, როგორც ევროკავშირის, ასევე მისი საფინანსო ინსტიტუტების, მათ შორის საერთაშორისო საინვესტიცო ინსტიტუტების და თავად პარტნიორი ქვეყნების მხრიდნაც. უწყების მიერ გავრცელებულ ინფორმაციაში ცალსახად იყო ხაზგასმული, რომ ევროკომისიის მიერ წარმოდგენილი საინვესტიციო გეგმა გახლავთ მნიშვნელოვანი ბერკეტი და გზავნილი, იმისთვის, რომ მასში წარმოდგენილ პროექტებში, ევროკავშირის და მისი საფინანსო ინსტიტუტების გარდა, დამატებით მოზიდულ იქნას ინვესტიციები.

დავაზუსტებთ, რომ საინვესტიციო გეგმით საქართველოში იდენტიფიცირებულია 18 პრიორიტეტული პროექტი, რომელთა ჯამური ღირებულება დაახლოებით 3.4 მილიარდ ევროს შეადგენს, შესაბამისად გათვალისიწნებულია, რომ მოცემულ პროექტებში დაიხარჯება სწორედ დასახელებული ოდენობის ინვესტცია, მათ შორის ბუნებრივია, ევროკავშირის მხრიდანაც.

საქართველოს პრემიერ-მინისტრმა, აღნიშნული საინვესტიციო გეგმის დამტკიცების შეფსებისას, საჭიროდ აღარ ჩათვალა დამატებითი განმარტებები, გამომდინარე იქიდან, რომ როგორც საგარეო საქმეთა სამინისტროს, ასევე ევროკავშირს წინა დღეს გავრცელებული ჰქონდა ამომწურავი ინფორმცია გეგმის შესახებ“.

მთავარი ფოტო: საქართველოს მთავრობის ფეისბუქგვერდიდან

ბათუმში, ხუთ ქუჩაზე, მუნიციპალური ტრანსპორტის გაჩერებებზე არსებული მოსაცდელები აიღეს. კომპანიაში, რომელიც ქალაქის მერიასთან გაფორმებული ხელშეკრულებით ახალი მოსაცდელების დამონტაჟებაზეა პასუხისმგებელი, განაცხადეს, რომ სამონტაჟო სამუშაოებს დღეიდან, 22 იანვრიდან დაიწყებენ და 10-15 დღეში დაასრულებენ.

„დამოკიდებული ვართ, რა თქმა უნდა, ამინდზე. ახალი მოსაცდელები იქნება ჯიხურების ანუ სავაჭრო დანიშნულების გარეშე და იმ დიზაინის, რაც ბოლო პერიოდში დავდგით ქალაქში. თუმცა იქნება გაცილებით დიდი ზომის. ის მოსაცდელები, რაც ავიღეთ, ამორტიზებულია და მათი სხვა ადგილებზე დადგმა არ იგეგმება,“ – გვითხრეს კომპანია „ალმაში“. სწორედ ეს კომპანია ახორციელებს გაჩერებებზე მოსაცდელი კონსტრუქციების მონტაჟს.

კომპანიის განცხადებით, ბათუმში, გოგებაშვილის, რუსთაველის, ხიმშიაშვილის, გორგილაძისა და ჭავჭავაძის ქუჩებზე სულ 50 ძველი მოსაცდელი ჩანაცვლდება ახლით.

რაც შეეხება ადგილებს, სადაც არის გაჩერება, თუმცა არ არის მოსაცდელი, ბათუმის მერიაში განაცხადეს, რომ იგეგმება 20 ასეთ ადგილზე მოსაცდელის დადგმა. „ალმაში“ კი გვითხრეს, რომ კონკრეტულად სად დაიდგმება მოსაცდელი, ამ ეტაპზე არ იციან: „ველოდებით წერილს მერიიდან. როგორც ვიცით, იმ ნაკვეთების რეგისტრაცია მიმდინარეობს, სადაც კონსტრუქციები უნდა დაიდგას“.

ქობულეთის მუნიციპალიტეტის სოფელ ციხისძირიდან მრავალწლოვანი ხე გადააქვთ, რომელიც რამდენიმე დღეა რკინიგზასთან, ბობოყვათის რეზიდენციის მოპირდაპირედ დგას. ხე სოფელ შეკვეთილში, იმ ტერიტორიაზე გადააქვთ, სადაც მილიარდერი ბიძინა ივანიშვილი დენდროლოგიურ პარკს აშენებს. ამ პარკისთვის ათეულობით სხვადასხვა სახეობის მრავალწლოვანი ხე გაიტანეს აჭარიდან.

ხეს, რომელიც ახლა რეზიდენციასთანაა, ბობოყვათის პლაჟიდან შეკვეთილში ზღვით გადაიტანენ. პლაჟამდე მისასვლელი გზა რკინაბეტონის ფილებით უკვე მოწყობილია. მოწყობილია რკინიგზაზე გადასასვლელიც. ამ გზით არაერთი ხე გადაიტანეს.

ქობულეთის მუნიციპალიტეტის სოფელ ზენითში ბიძინა ივანიშვილის პარკში გადასატანად 5 მრავალწლოვანი ხე 2018 წლის ადრე გაზაფხულზე ამოთხარეს. ეს ხეები ამ დრომდე არ გაუტანიათ. როგორც მაშინ ითქვა, ხეები გზის სივიწროვის გამო ვერ გაჰქონდათ. ზაფხულის განმავლობაში კუსტარულად მოწყობილი სარწყავი სისტემით გადასატანად გამზადებულ ხეებს ყოველდღიურად რწყავდნენ. მიუხედავად ამისა, როგორც ადგილობრივი მცხოვრებლები ამბობენ, ერთი ხე ხმება.

აჭარის გზების დეპარტამენტმა ალამბარი-ზენითის მიმართულებით გზის რეკონსტრუქციის სამუშაოები დაიწყო, რაც მაშინ ოპოზიციამ გააპროტესტა და პროკურატურასაც მიმართეს.

აჭარიდან მრავალწლოვანი ხეები ოზურგეთის მუნიციპალიტეტის სოფელ შეკვეთილში, ზღვისპირას, იმ ტერიტორიაზე გადააქვთ, რომელიც შპს „ურეკი რეზიდენსის“ საკუთრებაშია. ამ ტერიტორიაზე მილიარდერი, ყოფილი პრემიერ-მინისტრი და დღეს უკვე მმართველი პარტიის თავმჯდომარე, ბიძინა ივანიშვილი დენდროლოგიურ პარკს აშენებს.

კომპანია „ურეკი რეზიდენსი“ ბიძინა ივანიშვილმა 2016 წლის ივლისში დააფუძნა. 2017 წლის იანვარში კომპანიის წილის 100% თავის შვილს, ბერა ივანიშვილს 4 მილიონ ლარად მიჰყიდა. ბერა ივანიშვილი დღეს „ურეკი რეზიდენსის“ ერთადერთი მფლობელია.

საქართველოს ფინანსთა სამინისტროს საგამოძიებო სამსახურის თანამშრომლებმა მარკირებას დაქვემდებარებული დიდი ოდენობით აქციზური საქონლის აქციზური მარკის გარეშე შენახვა – გადაზიდვის სამი ფაქტი გამოავლინეს და ერთი პირი დააკავეს.

ფინანსთა სამინისტროს საგამოძიებო სამსახურის ცნობით, საგამოძიებო მოქმედებების შედეგად აჭარის, ქვემო ქართლის და სამეგრელო-ზემო სვანეთის რეგიონებში, დანაშაულში მხილებული პირების საცხოვრებელი სახლიდან და სატრანსპორტო საშუალებებიდან ამოღებულ იქნა სარეალიზაციოდ განკუთვნილი, სხვადასხვა დასახელების, დიდი ოდენობით – 4 110 კოლოფი უაქციზო სიგარეტი, რომლის საერთო საბაზრო ღირებულება 12 000 ლარს აღემატება.

სამსახურის ცნობით, გამოძიება მიმდინარეობს საქართველოს სისხლის სამართლის კოდექსის მე-200 მუხლის პირველი და მეორე ნაწილებით, რაც ითვალისწინებს თავისუფლების აღკვეთას 4-დან 6 წლამდე ვადით.

„ევროკავშირმა საქართველოს გამოუყო 3,4 მილიარდი ევროს ფინანსური სახსრები“, – განაცხადა საქართველოს პრემიერ-მინისტრმა მამუკა ბახტაძემ რამდენიმე დღის წინ გამართულ ბრიფინგზე. თუმცა, როგორც „ბათუმელებმა“ გაარკვია, ევროკავშირს საქართველოსთვის აღნიშნული ფინანსური სახსრები არ გამოუყვია. არადა, პრემიერ-მინისტრმა ევროკავშირს ამ თანხის გამოყოფისთვის იმავე ბრიფინგზე მადლობაც გადაუხადა.

საქართველოს პრემიერმა ასევე განაცხადა, რომ „აღნიშნული თანხა მოხმარდება რამდენიმე ათეულ ინფრასტრუქტურულ პროექტს“.

ასეთი ინფრასტრუქტურული პროექტები, რომლებიც თითქოს ევროკავშირის მიერ გამოყოფილი 3,4 მილიარდი ევროთი უნდა დაფინანსდეს, მთავრობამ და „ქართულმა ოცნებამაც“ გამოაქვეყნეს თავიანთ ოფიციალურ ფეისბუქგვერდებზე. ამ პროექტების ჩამონათვალშია „ბათუმის გზაგამტარი – 115 მლნ ევრო“.

„ბათუმელები“ სწორედ იმის გარკვევას შეეცადა, თუ რომელ გზაგამტარზეა საუბარი, ვინაიდან ბათუმის შემოვლით გზას უკვე აშენებენ [მახინჯაურის გვირაბიდან მდინარე ჭოროხამდე] და მას ევროკავშირი არ აფინანსებს, ხოლო მდინარე ჭოროხიდან სარფამდე ახალი გზის მშენებლობის დეტალური პროექტი ჯერ არ არის, თუმცა ამ მონაკვეთსაც სულ სხვა დონორი ჰყავს.

ის, რომ ბათუმის შემოვლითი და ჭოროხი-სარფის გზებს ევროკავშირი არ აფინანსებს, საქართველოს საავტომობილო გზების დეპარტამენტშიც დაგვიდასტურეს.

დეპარტამენტში ვერაფერი გვითხრეს თითქოსდა ევროკავშირის მიერ გამოყოფილი 115 მილიონი ევროს შესახებ: „ჩვენთან რაც ევროპის საინვესტიციო ბანკის დაფინანსებით ხორციელდება, ეს არის პროექტები: „სამტრედია-გრიგოლეთი“, „გრიგოლეთი- ქობულეთი“ და რიკოთის მესამე მონაკვეთი.  ეს ზუსტად ვიცით. ბათუმის შემოვლითი გზა აზიის განვითარების ბანკისა და აზიის ინფრასტრუქტურის საინვესტიციო ბანკის დაფინანსებით შენდება, ხოლო ჭოროხი-სარფის მონაკვეთში გზას აზიის განვითარების ბანკი დააფინანსებს. ჭოროხი-სარფის მონაკვეთის დეტალური პროექტირება ჯერ არ დაწყებულა“.

მაშინ, რაზე დაყრდნობით განაცხადა მამუკა ბახტაძემ ევროკავშირის მიერ 3,4 მილიარდი ევროს გამოყოფაზე? – 2019 წლის 15 იანვარს ევროკომისიამ გამოაქვეყნა ტრანსევროპული სატრანსპორტო ქსელის (TEN-T) საინვესტიციო გეგმა, რომელსაც ახლავს რუკები, მათ შორის საქართველოს რუკაც, რომელზეც დატანილია მიმდინარე თუ დაგეგმილი პროექტების შესახებ ინფორმაცია და ამ პროექტების სავარაუდო ღირებულება.

პროექტები ემთხვევა იმ პროექტების ჩამონათვალს, რომლებიც საქართველოს მთავრობამ გამოაქვეყნა და რომლებიც, მთავრობის ინფორმაციით, ევროკავშირისგან გამოყოფილი 3,4 მილიარდი ევროთი უნდა დაფინანსდეს, რაც არ არის სწორი.

ევროკომისიის მიერ გამოქვეყნებულ რუკაზე მითითებულია პროექტები, რომლებიც უკვე მიმდინარეობს საქართველოში ან დაგეგმილია, თანაც ყველა პროექტზე მითითებულია სავარაუდო ღირებულება და ის, თუ ვინ აფინანსებს ამა თუ იმ პროექტს. ანუ, ეს მხოლოდ საინვესტიციო გეგმაა [სხვადასხვა ინვესტორის მითითებით] და არა ის დოკუმენტი, რომ ევროკავშირმა აღნიშნული პროექტები უშუალოდ და მთლიანად დააფინანსა.

რუკაზე გარკვევითაა მითითებული ბათუმის ასაქცევი-სარფის [თურქეთის საზღვარი] გზის მონაკვეთი და იქვე მითითებულია, რომ ეს პროექტი, რომელიც, სავარაუდოდ, 115 მილიონი ევრო ღირს, აზიის განვითარების ბანკის დაფინანსებით განხორციელდება.

რატომ გაავრცელა მთავრობამ ინფორმაცია, რომ ევროკავშირმა საქართველოს 3,4 მილიარდი ევრო გამოუყო? – ამ კითხვაზე პასუხის მიღება პრემიერის პრესსამსახურში ვცადეთ, თუმცა ვერ დავუკავშირდით. კითხვით მივმართეთ საქართველოს ფინანსთა სამინისტროსაც, თუმცა პასუხი ამ დრომდე ვერც სამინისტროსგან მივიღეთ.

ამავე დროს, ევროკავშირის წარმომადგენლობამ საქართველოში თავის ოფიციალურ გვერდზეც გამოაქვეყნა ინფორმაცია, სადაც არაფერია ნათქვამი საქართველოსთვის თანხის გამოყოფაზე.

„პროგრამა „აღმოსავლეთ პარტნიორობის“ (EaP) წევრ ქვეყნებში სატრანსპორტო კავშირების განმტკიცებისა და ეკონომიკური ზრდის სტიმულის მიზნით ევროკომისიამ და მსოფლიო ბანკმა შეიმუშავეს ინდიკატური ტრანსევროპული სატრანსპორტო ქსელის (TEN-T) თანაინვესტირების სამოქმედო გეგმა, რომელიც განკუთვნილია სომხეთისთვის, საქართველოსთვის, აზერბაიჯანისთვის, ბელორუსისთვის, მოლდოვასა და უკრაინისთვის…“ – აღნიშნულია ამ ინფორმაციაში, სადაც მოყვანილია ევროკომისარ იოჰანეს ჰანის განმარტებაც, რომ ეს „გეგმა დაეხმარება გადაწყვეტილების მიმღებ პირებს სტრატეგიული ინვესტიციების პრიორიტეტების განსაზღვრაში სატრანსპორტო ინფრასტრუქტურის მიმართებაში, რომელიც მიზნად ისახავს ტრანსევროპული სატრანსპორტო ქსელის დასრულებას“.

„ბათუმელები“ დაუკავშირდა ევროკავშირის წარმომადგენლობას საქართველოში, სადაც გვითხრეს, რომ ევროკავშირის ელჩი ამჟამად ბრიუსელშია და აღნიშნულ საკითხზე კომენტარს ვერ გააკეთებენ.

პრემიერ-მინისტრის ბრიფინგი:

საქართველოს მთავრობის მიერ გამოქვეყნებული ინფორმაცია:

„ქართული ოცნების“ მიერ გამოქვეყნებული რუკა, რომელიც ევროკომისიის მიერ გამოქვყნებული რუკის იდენტურია:

საქართველოს საზღვაო ტრანსპორტის სააგენტოს ინფორმაციით, ლიბიაში დაკარგული ქართველი მეზღვაური დავით რაზმაძე, დღეს 21 იანვარს, გარდაცვლილი იპოვეს.

„პირველადი ინფორმაციით დასტურდება, რომ დავით რაზმაძის ცხედარი ნავსადგურის ტერიტორიაზე ზღვაში იპოვეს. ექსპერტიზა ტარდება და დანარჩენ დეტალებს არკვევენ,“ – უთხრეს „ბათუმელებს“ სააგენტოს პრესსამსახურში.

23 წლის დავით რაზმაძე მარშალის დროშის ქვეშ მცურავ გემ MV Dogan Bey -ზე მუშაობდა. საზღვაო ტრანსპორტის სააგენტოს ინფორმაციით, გემი ლიბიის ნავსადგურ Misurata-ში იმყოფებოდა, როცა ქართველი მეზღვაური გემბანიდან ღამით, მორიგეობის დროს, 7 იანვარს გაუჩინარდა.

დავით რაზმაძის ოჯახი გორში ცხოვრობს, თუმცა, როგორც სააგენტოში გვითხრეს, იგი ბათუმში გაიზარდა.

დავით რაზმაძის მამა, ზაზა რაზმაძე, 2008 წელს, აგვისტოს ომის დროს, დაბომბვისას გადაღებული ცნობილი ფოტოს გმირი იყო. ფოტოზე ის გარდაცვლილ ძმას დასტიროდა. თავად ზაზა რაზმაძე 2014 წელს კარალეთში, დევნილთა დასახლებაში გარდაიცვალა უბედური შემთხვევის შედეგად.

წამლის სააგენტოს ცნობით, ევროკავშირის ქვეყნების ბაზრიდან გამოთხოვას დაექვემდებარა რამდენიმე სერიის სხვადასხვა ფარმაცევტული პროდუქტი, მათ შორის ერთი – ჰეპარინ ნატრიუმი პანფარმა 25 000 ს.ე./5 მლ (5 000 ს.ე./მლ) 5მლ ინტრავენური საინექციო ხსნარი, რომლის ვარგისიანობის ვადა 2020 წლის პირველ იანვრამდე იყო.

სააგენტოს ცნობით, ევროკავშირის ქვეყნებიდან მედიკამენტი შესაძლოა კონტამინაციის, დაბინძურების გამო იქნა გამოთხოვილი.

„ჰეპარინ ნატრიუმი პანფარმა 25 000 ს.ე./5 მლ (5 000 ს.ე./მლ) 5მლ ინტრავენური საინექციო ხსნარი ფლაკონი №10“ სერია: 50207; ვარგისობის ვადა: 01.2020წ. მწარმოებელი „Rotexmedica GmbH Arzneimittelwerk“ გერმანია. სავაჭრო ლიცენზიის მფლობელი „PANPHARMA S.A.“ საფრანგეთი –  ზემოაღნიშნული, 50207 სერიის მქონე ფარმაცევტული პროდუქტი ექვემდებარება საქართველოს ბაზრიდან გამოთხოვას“, – აღნიშნულია სააგენტოს მიერ გავრცელებულ ინფორმაციაში.

დღეს, 21 იანვარს, საქართველოს ტერიტორიულ წყლებში, ბათუმის პორტში აშშ-ის სამხედრო ხომალდი Donald Cook-ი შემოვიდა.

Donald Cook-ი (DDG 75) სარაკეტო გამანადგურებელია, რომლის ეკიპაჟში 306 მეზღვაურია. ეს ხომალდის მეორე ვიზიტია საქართველოში. პირველად აშშ-ის სამხედრო-საზღვაო ძალების კუთვნილი Donald Cook-ი ბათუმის ნავსადგურში 2007 წელს იმყოფებოდა.

ხომალდი Donald Cook-ი მონაწილეობას მიიღებს უსაფრთხოებისა და თანამშრომლობის საჩვენებელ ქმედებებში, რომელიც ემსახურება აშშ-ის ევროპული სარდლობისა და მეექვსე ფლოტის მიზნებს. Donald Cook-ის კაპიტანი მეთიუ პაუელია.

ამერიკული ხომალდი ბათუმის ნავსადგურში რამდენიმე დღე დარჩება.

ლიბიაში ქართველ მეზღვაურს ეძებენ. დავით რაზმაძე 7 იანვარს გაუჩინარდა, თუმცა საქართველოს საზღვაო ტრანსპორტის სააგენტოს ამის შესახებ 16 იანვარს შეატყობინეს.

დავით რაზმაძე მარშალის დროშის ქვეშ მცურავ გემ MV Dogan Bey -ზე მუშაობდა. საზღვაო ტრანსპორტის სააგენტოს ინფორმაციით, გემი ლიბიის ნავსადგურ Misurata-ში იმყოფებოდა, როცა ქართველი მეზღვაური გემბანიდან ღამით, მორიგეობის დროს გაუჩინარდა.

„საზღვაო ტრანსპორტის სააგენტო და საგარეო საქმეთა სამინისტრო ყველა შესაძლო გზით ცდილობს სიტუაციის გარკვევას, ვმუშაობთ ყველა მიმართულებით. დღეს გემთმფლობელის წარმომადგენელი ჩავიდა ლიბიაში, რათა ადგილზე გაატაროს შესაბამისი ღონისძიებები“, – მოგვწერეს საზღვაო ტრანსპორტის სააგენტოდან.

დავით რაზმაძის ოჯახი გორში ცხოვრობს, თუმცა, როგორც სააგენტოში გვითხრეს, თავად ბათუმში გაიზარდა. დავით რაზმაძე 23 წლისაა. ის გემზე სამუშაოდ პირველად 3 თვის წინ წასულა.

ჩაქვი-მახინჯაურის გვირაბთან მოსაბრუნებელი კვანძის მშენებლობაზე 2018 წლის ოქტომბერში გამოცხადებული ტენდერი უარყოფითი შედეგით დასრულდა. საქართველოს საავტომობილო გზების დეპარტამენტის სატენდერო კომისიამ ტენდერში მონაწილე პრეტენდენტებს დისკვალიფიკაცია მისცა და ხელახალი ტენდერი 2019 წლის 18 იანვარს გამოაცხადა.

ახალ ტენდერში მოსაბრუნებელი კვანძის ასაშენებლად გათვალისწინებული სავარაუდო თანხის ოდენობა – 4 485 415 ლარი – არ შეცვლილა. თუმცა, როგორც კომისიის ოქმშია აღნიშნული, შეიცვალა გარკვეული მოთხოვნები პრეტენდენტთა გამოცდილებასთან და მათ ფინანსურ შესაძლებლობებთან დაკავშირებით, ასევე დაზუსტდა სხვა მოთხოვნები.

ამჯერად წინადადებების მიღება 2019 წლის 21 თებერვალს დაიწყება და 26 თებერვალს დასრულდება. მშენებლობის ვადები არ შეცვლილა – მოსაბრუნებელი კვანძი ხელშეკრულების გაფორმებიდან რვა თვეში უნდა აშენდეს.

მოსაბრუნებელი გზა მახინჯაურის მხრიდან გვირაბის თავზე გადაივლის, თუმცა 2018 წელს ტენდერი ისე გამოაცხადეს, რომ სახელმწიფოს კერძო მესაკუთრეებისგან ის ნაკვეთები არ ჰქონდა გამოსყიდული, სადაც ამ გზამ უნდა გაიაროს.

აღნიშნული გზა გადის სახელმწიფოს საკუთრებაში არსებულ 7910 კვ/მ და კერძო საკუთრებაში არსებულ 2620 კვ/მ  მიწის ნაკვეთებზე. „ბათუმელების“ ინფორმაციით, ამ კერძო ნაკვეთებს  8-10 მესაკუთრე ჰყავს.

მოსაბრუნებელი გზის მოსაწყობად სამუშაოები 2017 წელს დაიწყო და იმავე წელს უნდა დასრულებულიყო. სამუშაოები დაიწყეს, თუმცა დროულად ვერც გეოლოგიური დასკვნა დაიდო, ვერც პროექტი და არც ის თანხა აღმოჩნდა საკმარისი, რაც კვანძის ასაშენებლად გათვალეს.

გზის გარკვეული ნაწილის მშენებლობაზე და შესაბამის კვლევა-პროექტირებაზე დეპარტამენტმა 2,5 მილიონი ლარი უკვე დახარჯა. სამშენებლო სამუშაოები კომპანია „გზამ“ შეასრულა [„გზა“ 2018 წელს გამოცხადებულ ტენდერშიც მონაწილეობდა, თუმცა კომისიამ მასაც დისკვალიფიკაცია მისცა].

ვრცლად ამ თემაზე:

ავტოტრანსპორტის მოსატრიალებელი კვანძი გვირაბთან მახინჯაურის მხარეს გაკეთდება. „მახინჯაურიდან გასული ავტომანქანა, საჭიროების შემთხვევაში, გვირაბის მისასვლელიდან უკან დაბრუნებას ამ კვანძის საშუალებით შეძლებს. ეს კვანძი უფრო ქალაქში მოძრაობისთვისაა გათვლილი“ – ამბობენ დეპარტამენტში.

მთავარი ფოტო: ჩაქვი-მახინჯაურის გვირაბი. ადგილი, სადაც მოსაბრუნებელი კვანძი უნდა აშენდეს / ფოტო „ბათუმელების“ არქივიდან

აჭარის ტელევიზიის პირდაპირ ეთერში, უმაღლესი საბჭოს დეპუტატმა ლადო მგალობლიშვილმა, როგორც თავად ირწმუნება, ქიმიური ნივთიერება კარბამიდი შეჭამა. ლადო მგალობლიშვილმა ეს იმის საილუსტრაციოდ გააკეთა, რომ ამ ნივთიერების გადატანა იგეგმება ბათუმის ახალი ტერმინალიდან და ის უსაფრთხოა. გარკვეული ჯგუფი ბათუმის პორტში ტერმინალის მშენებლობას აფასებს, როგორც „ბათუმზე ქიმიურ შეტევას“ და, შესაბამისად, ახალ მშენებლობას აპროტესტებს. ლადო მგალობლიშვილს პირდაპირ ეთერში ოპონირებას უწევდა ალექსანდრე თევზაძე, რომელიც საპროტესტო აქციების ერთ-ერთი ორგანიზატორია.

ლადო მგალობლიშვილის აზრით, ეს საპროტესტო აქციები დაფინანსებულია და რუსული პროპაგანდის ნაწილია: „მე სასუქი ახლა მაქვს თან წამოღებული, რასაც უწოდებენ მკვლელს. ეს შეუძლია სტუმარმა [ალექსანდრე თევზაძემ] წაიღოს და არის თუ არა ეგრეთ წოდებული კარბამიდი შეამოწმოს ლაბორატორიაში… ვითომ აი ეს სასუქი ხალხს კლავს, ამის გადაზიდვა ხალხს კლავს. აი, თქვენს თვალწინ… არის თუ არა ეგრეთ წოდებული კარბამიდი, აი ახლა ვიღებ და გადავყლაპე“.

ნივთიერების გადაყლაპვის შემდეგ, ლადო მგალობლიშვილმა ტერმინალის მშენებლობის მოწინააღმდეგეებს უწოდა მატყუარები და ისინი გააკრიტიკა: „ეს არის ირიბად რუსული პროპაგანდა, დაფინანსებული კამპანია.. აი, ეს არის ზუსტად ის ნივთიერება, რისი ტერმინალიც ბათუმში უნდა აშენდეს და რაც უნდა გადაიზიდოს და რაც მე პირდაპირ ეთერში შევჭამე. აი, ამის გადაზიდვაზეა მხოლოდ საუბარი და არანაირ სხვა რამეზე. დანარჩენი არის საკითხის ულტრირება, არის ტყუილი. ეს არის მიზანმიმართული კამპანია, რომელიც არის დაფინანსებული. ორგანიზატორს მე, პირადად, ვთხოვ დაასახელოს ის ფინანსები, რითაც ესენი ამ კამპანიას ახორციელებენ ბათუმში, ბანერებს აკრავენ, სივრცეებს ქირაობენ და საიდან მოდის ეს ფული დაასახელონ. ეს არის საქართველოს ეკონომიკისთვის უმნიშვნელოვანესი. ქვეყანა ამით მიიღებს 25 მილიონ შემოსავალს. ნებისმიერი ადამიანი, ვინც ამას ეწინააღმდეგება, ის ეწინააღმდეგება ეკონომიკის განვითარებას… იძულებული გავხდი და ეს გავაკეთე, რადგან არ შეიძლება ამით ხალხის დაშინება, არ შეიძლება შვილების მომავალზე ხალხის დაშანტაჟება“.

„ბათუმელების“ მიერ მოპოვებული ოფიციალური დოკუმენტებით ახალი ტერმინალიდან კარბამიდის გარდა სხვა ნივთიერებების გადაზიდვაც იგეგმება. სპეციალისტების განმარტებით, ეს ნივთიერებები სოფლის მეურნეობაში ახლაც გამოიყენება.

როგორც დაანონსებულია, ახალი ტერმინალის მშენებლობას ბათუმში აქციით ხვალ გააპროტესტებენ.

ახალი ტერმინალის მშენებლობასთან დაკავშირებით დეტალურ ინფორმაციას გაეცანით აქ.

შესყიდვების სააგენტოს დავების საბჭოში არასამთავრობო ორგანიზაციების ორი წარმომადგენლის შესარჩევად განაცხადების მიღება დაიწყო. განცხადებების წარდგენის შემდეგ, თვის ბოლოს, მესამე სექტორი საჯარო სხდომაზე შეარჩევს დავების საბჭოს წევრებს. განცხადებების მიღება 25 იანვრამდეა შესაძლებელი.

შესყიდვების სააგენტო ორგანიზებას უწევს ნებისმიერი საჯარო დაწესებულების საბიუჯეტო შესყიდვას. დავების განხილვის საბჭო კი საჩივრებს განიხილავს, რომლის ავტორი შესაძლებელია იყოს როგორც შემსყიდველი ორგანიზაცია, ასევე, მიმწოდებელი კომპანია.

საბჭოს წევრს სამართლის ან ეკონომიკის ბაკალავრის აკადემიური ხარისხი უნდა ჰქონდეს და არ უნდა წარმოადგენდეს რომელიმე შემსყიდველ ან მიმწოდებელ ორგანიზაციას. ის არ უნდა წარმოადგენდეს ამ ორგანიზაციებს და არც მათი საკონსულტაციო მომსახურებით უნდა იყოს დაკავებული.

„არასამთავრობო ორგანიზაციების წარმომადგენლების მიერ საბჭოს წევრების ვაკანტური ადგილების დაკავება შესაძლებელია მხოლოდ არჩევნების წესით. შესაბამისად, არასამთავრობო ორგანიზაციებიდან საბჭოს წევრობის კანდიდატების განაცხადთა მიღების შემდგომ ჩატარდება არჩევნები. არჩევნები იმართება საჯაროდ. საბჭოს წევრთა არჩევნებში აქტიური საარჩევნო უფლებით მონაწილეობა შეუძლიათ მხოლოდ არასამთავრობო ორგანიზაციების წარმომადგენლებს, რომლებმაც ამ მიზნით წინასწარ გაიარეს რეგისტრაცია. ერთი არასამთავრობო ორგანიზაციიდან ხმის მიცემა შეუძლია მხოლოდ ერთ წარმომადგენელს. ხმის მისაცემად არასამთავრობო ორგანიზაციის წარმომადგენელმა თან უნდა იქონიოს უფლებამოსილების დამადასტურებელი დოკუმენტი/მოწმობა. არჩევნების დანიშვნის დრო და ადგილი არასამთავრობო ორგანიზაციების  წარმომადგენლებს დამატებით ეცნობებათ,“ – აღნიშნულია შესყიდვების სააგენტოს ინტერნეტგვერდზე.

დავების საბჭოს წევრის საქმიანობა არ არის ანაზღაურებადი.

„ამ პოზიციის ანაზღაურების გარეშე არსებობა ამცირებს ხარისხობრივ მაჩვენებელს, რადგან საქმე მოცულობითი და დატვირთულია. შესაბამისად, დატვირთული საქმიანობიდან გამომდინარე ნამდვილად არ ვფიქრობ, რომ უხელფასოდ მუშაობა არის იმ რეზულტატის მიღების შესაძლებლობის მომტანი, რის გამოც გაითვალისწინა კანონმდებელმა თავის დროზე არასამთავრობო ორგანიზაციის კვოტა დავების საბჭოში,“ – მიიჩნევს იურისტი გიორგი ხიმშიაშვილი, ორგანიზაცია „იურიდიული მრჩევლის“ ხელმძღვანელი.

გიორგი ხიმშიაშვილი ასევე მიიჩნევს, რომ დავების საბჭოს ფორმირების პროცესში პარლამენტი უნდა იყოს ჩართული:

„მაღალია იმის ალბათობა, რომ პოლიტიკურ ინტერესებთან აფილირებული არასამთავრობოს წარმომადგენელი შეიძლება მოხვდეს საბჭოში. ეს რისკები მაქსიმალურად უნდა შემცირდეს.

ვფიქრობ, საპარლამენტო რგოლის შემოტანა უმჯობესია, რაც გაზრდის საბჭოს ლეგიტიმაციის ხარისხს. ზოგადად, დავების საბჭოს სრული შემადგენლობას უნდა აკომპლექტებდეს პარლამენტი, რადგან სწორედ დავების საბჭოა ის უწყება, რომელიც კონტროლს უწევს ათეულობით მილიონი ლარის ხარჯვას“.

„მამუკა ხაზარაძესთან ერთ კომპანიაში ვართ პარტნიორები, მაგრამ მე ძალიან აპოლიტიკური ვარ და ახლა ამაზე საუბარი არ მინდა…“ – გვიპასუხა ბიზნესმენმა გიორგი ზარიძემ, კომპანია Wondernet Express-ის დირექტორმა. ეს კომპანია ბათუმის პორტში ახალი ტერმინალის მშენებლობას გეგმავს, რასაც საზოგადოების ერთი ჯგუფი აპროტესტებს. გუშინ, 18 იანვარს, ბათუმის მერიაში ახალი ტერმინალის მშენებლობის თემაზე საჯარო დისკუსია გაიმართა. დისკუსიას გიორგი ზარიძეც ესწრებოდა.

„ბათუმელების“ მიერ მოპოვებული დოკუმენტების მიხედვით, გიორგი ზარიძე ასევე სააქციო საზოგადოება „ვანდერნეთ ლოჯისთიქის“ დირექტორი და სამეთვალყურეო საბჭოს წევრია. ამ საბჭოს თავმჯდომარეა დიმიტრი აბდუშელიშვილი, მისი მოადგილე – ალიშერ იკრამოვი. სამეთვალყურეო საბჭოს ერთ-ერთი წევრი  მამუკა ხაზარაძეა, „თიბისი ბანკის“ დამფუძნებელი. უშუალოდ „ვანდერნეთ ლოჯისთიქის“ დამფუძნებლები კი არიან კომპანიები: „ვანდერნეთ ექსპრესი“, „თიბისიეიჩ ანაკლია“, ასევე, აშშ-ში რეგისტრირებული „კონტი ინტერნეიშენალი“, რომელიც „ანაკლიის განვითარების კონსორციუმშიც“ შედის.

ხომ არ უკავშირდება ახალი ტერმინალის წინააღმდეგ არსებული პროტესტი „თიბისი ბანკის“ წინააღმდეგ დაწყებულ კამპანიას? – ვკითხეთ გიორგი ზარიძეს.

„არ ვიცი, ვისი დაკვეთაა ეს. ისეთი სტატიები გამოვიდა, რომ ლამის ნატო-ს ტერმინალი შენდება და მალე წყალქვეშა ნავების მოწყობასაც დაგვაბრალებენ… მარტო ბიზნესის კუთხით რომ შევხედოთ, დავხარჯეთ 100 მილიონი იმიტომ, რომ ვიჯდეთ ბომბზე?“ – გვითხრა გიორგი ზარიძემ. მას მამუკა ხაზარაძის შესახებ კითხვა გავუმეორეთ, თუმცა კითხვას ისევ არ უპასუხა. საუბრის შეწყვეტის მიზეზად მან ჯანმრთელობის მდგომარეობა დაასახელა და ინტერვიუს დღეისთვის დაგვპირდა.

დღეს, 19 იანვარს, გიორგი ზარიძემ ჩვენს სატელეფონო ზარს აღარ უპასუხა. „ვფიქრობ, ყველა კითხვას ამომწურავად გავეცით პასუხი,“ – მოგვწერა მან. გიორგი ზარიძემ, ასევე, შემოგვთავაზა ჩვენს კითხვებს წერილობით უპასუხოს.

საქართველოს პროკურატურის ინფორმაციით, „თიბისის ბანკის” საქმეზე გამოძიება ფინანსური მონიტორინგის სამსახურმა 2018 წლის მაისში მიწოდებული ინფორმაციის საფუძველზე დაიწყო. მამუკა ხაზარაძის წინააღმდეგ სოციალურ ქსელში წარმოებულ კამპანიას კი გაეცანით აქ.

ბათუმის პორტში ახალი ტერმინალის ასაშენებლად, ბათუმის საზღვაო ნავსადგურმა კერძო კომპანიას 15 128 კვ/მ ფართობი აღნაგობის უფლებით უკვე გადასცა. ტერმინალის მშენებლობის საინვესტიციო ხელშეკრულებას ხელი 2018 წლის 22 მარტს მოეწერა. ახალი ტერმინალი ცენტრალური აზიიდან მინერალური სასუქების ტრანზიტისთვის იქნება განკუთვნილი.

პროექტი ითვალისწინებს სატრანზიტო ტერმინალისა და სასაწყობე ობიექტების მშენებლობას მინერალური სასუქების მიღების, შენახვისა და გადატვირთვის მიზნით. ხელშეკრულებას ორი ხელმომწერი ჰყავს, ბათუმის საზღვაო ნავსადგური და საერთაშორისო ლოჯისტიკური კომპანია Wondernet Exspress-ი.

ვრცლად ამ თემაზე: