განათლება,მთავარი,სიახლეები

მინისტრმა მასწავლებლებსა და დირექტორებს უთხრა, რომ დირექციების ხელფასები იზრდება

29.04.2018 • 8475
მინისტრმა მასწავლებლებსა და დირექტორებს უთხრა, რომ დირექციების ხელფასები იზრდება

ხელფასების ზრდა საქართველოს განათლებისა და მეცნიერების მინისტრმა ბათუმში მასწავლებლებსა და დირექტორებთან გამართულ შეხვედრაზე ახსენა. ამ უწყების პრესსამსახურის ცნობით, მიხეილ ჩხენკელმა შეხვედრაზე მასწავლებელთა მიზნობრივ ტრენინგებსა და პროფესიული განვითარების სქემაზეც ისაუბრა.

შეხვედრაზე ასევე ითქვა სკოლის ადმინისტრაციის ხელფასების გაზრდაზეც.

დახურულ შეხვედრაზე მყოფი ბათუმის მეორე საჯარო სკოლის დირექტორი, მარიზა აბაშიძე “ბათუმელებთან” მინისტრთან შეხვედრის დეტალებს იხსენებს.

“ისაუბრა სახელმძღვანელოებზე, ისაუბრა ეროვნულ სასწავლო გეგმაში შეტანილ ცვლილებებზე და მათ შორის დირექციის ხელფასის ზრდაზეც. მასწავლებელს სქემაში მოძრაობასთან ერთად  ეზრდება ხელფასი. ეს საკითხი ასე არის დარეგულირებული – სქემაში საფეხურიდან საფეხურზე ადის მასწავლებელი და მისი ხელფასი იზრდება.  ადმინისტრაციის ხელფასი კი საშტატო განრიგით რეგულირდება. როგორც ჩანს, სწორედ განრიგში შეიტანს ცვლილებას”, – ამბობს მარიზა აბაშიძე.

მარიზა აბაშიძის თქმით, მინისტრს არ დაუკონკრეტებია, როდიდან არის მოსალოდნელი ხელფასების ზრდა.

მისივე თქმით, მინისტრმა ისაუბრა ეროვნულ სასწავლო გეგმის შესახებაც და განაცხადა, რომ სასწავლო გეგმა შედარებით გამარტივდება.

აჭარის განათლების სამინისტროს ინფორმაციით, პედაგოგებს მინისტრი 25 აპრილს შეხვდა. ამ შეხვედრის შესახებ ინფორმაცია საქართველოს განათლების სამინისტრომ მხოლოდ დღეს, 29 აპრილს, გამოაქვეყნა.

 

 

 

გადაბეჭდვის წესი


ასევე: