ბათუმში, მაღაზია “სანტა ესპერანსაში” ქართველი ავტორის, ნეფერტარის (ნინო ჭიპაშვილი) პირველი წიგნის, “ბედუინის” პრეზენტაცია გაიმართა.
წიგნი ავტორის სადებიუტო ნაწარმოებია. თავიდან ის ჩაფიქრებული იყო როგორც ლიტერატურული თამაში, რომელიც ოთხი წლის განმავლობაში ერთ-ერთ ქართულ ლიტერატურულ პორტალზე ქვეყნდებოდა.
სათავგადასავლო რომანი უდაბნოში დაკარგული ახალგაზრდა ქართველი ქალის ისტორიას მოგვითხრობს, რომელსაც თავს ათასი ფათერაკი გადახდება. საჰარაში, საფარიტურზე წასული ქალი, აღმოაჩენს რომ ტური ადამიანების გამტაცებლების მიერაა ორგანიზებული. გაიქცევა და უდაბნოში დაიკარგება. მოგვიანებით კი ბედუინს შეხვდება, რომელიც მას უდაბნოსგან თავის დაღწევაში ეხმარება.
წიგნის ავტორის თქმით, ნაწარმოების ინსპირაცია ეგვიპტეში მოგზაურობა გახდა, რომლის დროსაც მწერალს ერთი ღამის გატარება უდაბნოში, მარტოს მოუწია.
“ბედუინი” სულაკაურის გამომცემლობამ გამოსცა.
