Batumelebi | რატომ ვერ გაგრძელდა მახინჯაურის გვირაბთან მოსაბრუნებელი კვანძის მშენებლობა რატომ ვერ გაგრძელდა მახინჯაურის გვირაბთან მოსაბრუნებელი კვანძის მშენებლობა – Batumelebi
RU | GE  

რატომ ვერ გაგრძელდა მახინჯაურის გვირაბთან მოსაბრუნებელი კვანძის მშენებლობა

ჩაქვი-მახინჯაურის გვირაბთან მოსაბრუნებელი კვანძის მშენებლობაზე 2018 წლის ოქტომბერში გამოცხადებული ტენდერი უარყოფითი შედეგით დასრულდა. საქართველოს საავტომობილო გზების დეპარტამენტის სატენდერო კომისიამ ტენდერში მონაწილე პრეტენდენტებს დისკვალიფიკაცია მისცა და ხელახალი ტენდერი 2019 წლის 18 იანვარს გამოაცხადა.

ახალ ტენდერში მოსაბრუნებელი კვანძის ასაშენებლად გათვალისწინებული სავარაუდო თანხის ოდენობა – 4 485 415 ლარი – არ შეცვლილა. თუმცა, როგორც კომისიის ოქმშია აღნიშნული, შეიცვალა გარკვეული მოთხოვნები პრეტენდენტთა გამოცდილებასთან და მათ ფინანსურ შესაძლებლობებთან დაკავშირებით, ასევე დაზუსტდა სხვა მოთხოვნები.

ამჯერად წინადადებების მიღება 2019 წლის 21 თებერვალს დაიწყება და 26 თებერვალს დასრულდება. მშენებლობის ვადები არ შეცვლილა – მოსაბრუნებელი კვანძი ხელშეკრულების გაფორმებიდან რვა თვეში უნდა აშენდეს.

მოსაბრუნებელი გზა მახინჯაურის მხრიდან გვირაბის თავზე გადაივლის, თუმცა 2018 წელს ტენდერი ისე გამოაცხადეს, რომ სახელმწიფოს კერძო მესაკუთრეებისგან ის ნაკვეთები არ ჰქონდა გამოსყიდული, სადაც ამ გზამ უნდა გაიაროს.

აღნიშნული გზა გადის სახელმწიფოს საკუთრებაში არსებულ 7910 კვ/მ და კერძო საკუთრებაში არსებულ 2620 კვ/მ  მიწის ნაკვეთებზე. „ბათუმელების“ ინფორმაციით, ამ კერძო ნაკვეთებს  8-10 მესაკუთრე ჰყავს.

მოსაბრუნებელი გზის მოსაწყობად სამუშაოები 2017 წელს დაიწყო და იმავე წელს უნდა დასრულებულიყო. სამუშაოები დაიწყეს, თუმცა დროულად ვერც გეოლოგიური დასკვნა დაიდო, ვერც პროექტი და არც ის თანხა აღმოჩნდა საკმარისი, რაც კვანძის ასაშენებლად გათვალეს.

გზის გარკვეული ნაწილის მშენებლობაზე და შესაბამის კვლევა-პროექტირებაზე დეპარტამენტმა 2,5 მილიონი ლარი უკვე დახარჯა. სამშენებლო სამუშაოები კომპანია „გზამ“ შეასრულა [„გზა“ 2018 წელს გამოცხადებულ ტენდერშიც მონაწილეობდა, თუმცა კომისიამ მასაც დისკვალიფიკაცია მისცა].

ვრცლად ამ თემაზე:

მოსაბრუნებელი გზა მახინჯაურის გვირაბის თავზე – დამატებით 4,4 მილიონი ლარი ბიუჯეტიდან

ავტოტრანსპორტის მოსატრიალებელი კვანძი გვირაბთან მახინჯაურის მხარეს გაკეთდება. „მახინჯაურიდან გასული ავტომანქანა, საჭიროების შემთხვევაში, გვირაბის მისასვლელიდან უკან დაბრუნებას ამ კვანძის საშუალებით შეძლებს. ეს კვანძი უფრო ქალაქში მოძრაობისთვისაა გათვლილი“ – ამბობენ დეპარტამენტში.

 

მთავარი ფოტო: ჩაქვი-მახინჯაურის გვირაბი. ადგილი, სადაც მოსაბრუნებელი კვანძი უნდა აშენდეს / ფოტო „ბათუმელების“ არქივიდან
ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com