დეპუტატმა ლადო მგალობლიშვილმა პირდაპირ ეთერში სასუქი კარბამიდი შეჭამა


აჭარის ტელევიზიის პირდაპირ ეთერში, უმაღლესი საბჭოს დეპუტატმა ლადო მგალობლიშვილმა, როგორც თავად ირწმუნება, ქიმიური ნივთიერება კარბამიდი შეჭამა. ლადო მგალობლიშვილმა ეს იმის საილუსტრაციოდ გააკეთა, რომ ამ ნივთიერების გადატანა იგეგმება ბათუმის ახალი ტერმინალიდან და ის უსაფრთხოა. გარკვეული ჯგუფი ბათუმის პორტში ტერმინალის მშენებლობას აფასებს, როგორც „ბათუმზე ქიმიურ შეტევას“ და, შესაბამისად, ახალ მშენებლობას აპროტესტებს. ლადო მგალობლიშვილს პირდაპირ ეთერში ოპონირებას უწევდა ალექსანდრე თევზაძე, რომელიც საპროტესტო აქციების ერთ-ერთი ორგანიზატორია.

ლადო მგალობლიშვილის აზრით, ეს საპროტესტო აქციები დაფინანსებულია და რუსული პროპაგანდის ნაწილია: „მე სასუქი ახლა მაქვს თან წამოღებული, რასაც უწოდებენ მკვლელს. ეს შეუძლია სტუმარმა [ალექსანდრე თევზაძემ] წაიღოს და არის თუ არა ეგრეთ წოდებული კარბამიდი შეამოწმოს ლაბორატორიაში… ვითომ აი ეს სასუქი ხალხს კლავს, ამის გადაზიდვა ხალხს კლავს. აი, თქვენს თვალწინ… არის თუ არა ეგრეთ წოდებული კარბამიდი, აი ახლა ვიღებ და გადავყლაპე“.

ნივთიერების გადაყლაპვის შემდეგ, ლადო მგალობლიშვილმა ტერმინალის მშენებლობის მოწინააღმდეგეებს უწოდა მატყუარები და ისინი გააკრიტიკა: „ეს არის ირიბად რუსული პროპაგანდა, დაფინანსებული კამპანია.. აი, ეს არის ზუსტად ის ნივთიერება, რისი ტერმინალიც ბათუმში უნდა აშენდეს და რაც უნდა გადაიზიდოს და რაც მე პირდაპირ ეთერში შევჭამე. აი, ამის გადაზიდვაზეა მხოლოდ საუბარი და არანაირ სხვა რამეზე. დანარჩენი არის საკითხის ულტრირება, არის ტყუილი. ეს არის მიზანმიმართული კამპანია, რომელიც არის დაფინანსებული. ორგანიზატორს მე, პირადად, ვთხოვ დაასახელოს ის ფინანსები, რითაც ესენი ამ კამპანიას ახორციელებენ ბათუმში, ბანერებს აკრავენ, სივრცეებს ქირაობენ და საიდან მოდის ეს ფული დაასახელონ. ეს არის საქართველოს ეკონომიკისთვის უმნიშვნელოვანესი. ქვეყანა ამით მიიღებს 25 მილიონ შემოსავალს. ნებისმიერი ადამიანი, ვინც ამას ეწინააღმდეგება, ის ეწინააღმდეგება ეკონომიკის განვითარებას… იძულებული გავხდი და ეს გავაკეთე, რადგან არ შეიძლება ამით ხალხის დაშინება, არ შეიძლება შვილების მომავალზე ხალხის დაშანტაჟება“.

„ბათუმელების“ მიერ მოპოვებული ოფიციალური დოკუმენტებით ახალი ტერმინალიდან კარბამიდის გარდა სხვა ნივთიერებების გადაზიდვაც იგეგმება. სპეციალისტების განმარტებით, ეს ნივთიერებები სოფლის მეურნეობაში ახლაც გამოიყენება.

როგორც დაანონსებულია, ახალი ტერმინალის მშენებლობას ბათუმში აქციით ხვალ გააპროტესტებენ.

ახალი ტერმინალის მშენებლობასთან დაკავშირებით დეტალურ ინფორმაციას გაეცანით აქ.

რა ქიმიურ ნივთიერებებს გადაზიდავენ ახალი ტერმინალიდან – ხელშეკრულების დეტალები

 

ნეტგაზეთის მასალების სხვა გამოცემებში გადაბეჭდვის წესი
ავტორი
ეთერ თურაძე არის გაზეთ "ბათუმელების" მთავარი რედაქტორი 2001 წლიდან