„მიწის დამუშავება ხარებით ზემო იმერეთში“ – ასეა აღწერილი ფოტო მეხუთე კლასის ისტორიის მოსწავლის წიგნში, თუმცა ფოტო არა ზემო იმერეთში, არამედ ხულოში, სოფელ ღორჯომშია გადაღებული 2014 წლის გაზაფხულზე, „ბათუმელების“ რეპორტიორის, მანანა ქველიაშვილის მიერ.
მეხუთე კლასის ისტორიის მოსწავლის წიგნი გრიფირებული სახელმძღვანელოა. იგი გამომცემლობა „კლიომ“ გამოსცა 2018 წელს. როგორ აღმოჩნდა აჭარაში, ღორჯომში გადაღებული ფოტო ზემო იმერეთის ილუსტრირებისთვის საავტორო უფლებების დარღვევით და ფაქტის გაყალბებით სასკოლო სახელმძღვანელოში? გამომცემლობაში გვითხრეს, რომ მათ ავტორები აწვდიან მასალებს.
ფოტო სახელმძღვანელოდან. ტარიელ ნაკაიძის ფოტო
ორიგინალი. ფოტო: ბათუმელები/მანანა ქველიაშვილი
სახელძღვანელოს რამდენიმე ავტორი ჰყავს: როლანდ თოფჩიშვილი, ელენე მეძმარიაშვილი, ნოდარ ელიზბარაშვილი და გიორგი ავთანდილაშვილი. „ბათუმელები“ ელენე მეძმარიაშვილს ესაუბრა, რომელიც სერიის საერთო რედაქტორია. მან „ბათუმელებთან“ აღნიშნა, რომ „ძალიან მკაცრად ამოწმებდნენ საავტორო უფლებების შესახებ ინფორმაციას“:
„ალბათ ვერ ნახეს [ავტორებმა] იმერეთი და ჩათვალეს, რომ ეს ზუსტად ის არის, რაც ჩვენ გვჭირდებოდა, იმიტომ, რომ იგივეა იმერეთში. საქართველოში ფოტოების, ილუსტრაციების პრობლემა ნამდვილად არსებობს, როდესაც ავტორი მუშაობს სახელმძღვანელოზე, რასაკვირველია, ვიძიებთ ფოტოებს და ინტერნეტში ვეძებთ თავისუფალ ფოტოებს. თუ მანდ „ბათუმელები“ არის დაფიქსირებული, ეს გაუგებრობაა ნამდვილად… ხარებით ხვნის პროცესი არ არის ისეთი სერიოზული დარღვევა, ხარებით იხვნება მიწა რეგიონებში. ხშირად ხდება, როცა ვიყენებთ ფოტოს, რომელიც შეესაბამება ტექსტს. შეიძლება ფოტოს გამოცვლა, წავალთ მაღალმთიან იმერეთში და გადავიღებთ ფოტოს. ვისაც გადავუღეთ სურათები, ყველასგან ნებართვა ავიღეთ, მაგრამ რადგან ეს ინტერნეტში იდო… „ბათუმელების“ რომ იყო, ეს არ შეგვიმჩნევია, თორემ მაგას არ დავუშვებდით ნამდვილად“, – განაცხადა „ბათუმელებთან“ ელენე მეძმარიაშვილმა.
იმავე სახელმძღვანელოში, თუმცა მეორე ნაწილში, კიდევ ერთი შეცდომაა. კერძოდ, წერია, რომ ენგურჰესი სვანეთში მდებარეობს, სამეგრელოს ნაცვლად.
ამავე თემაზე:
მდებარეობს თუ არა ენგურჰესი სვანეთში? – შეცდომა გრიფირებულ სახელმძღვანელოში
