დილით ექვსზე უკვე სამსახურში უნდა იყვნენ, უნიფორმა ეცვათ და ქარბუქში, თავსხმასა თუ სიცხეში ქალაქს უნდა ასუფთავებდნენ. მეეზოვეებისთვის ამინდს მნიშვნელობა არ აქვს. ქუჩები ნებისმიერ დროს უნდა კრიალებდეს. დილით, როცა შენ 9 საათზე გამოდიხარ სახლიდან და დაგვილი ქუჩის გავლით სამსახურისკენ მიიჩქარი, მათ საქმე დამთავრებული აქვთ.
როგორც მეეზოვეები ამბობენ, ხიდან ჩამოცვენილი გამხმარი ტოტებისა და წიწვების დაგვა ყოველდღიურად ჩვეულებრივი ამბავია, თუმცა ძალიან ხშირად ხვდებათ ტროტუარებსა და გაზონებზე დაყრილი სიგარეტის ნამწვები, თუნუქის, მინის ბოთლები და ცელოფნის პარკები, მიუხედავად იმისა, რომ ქუჩაში ნაგვის დაყრა 80-დან 1000 ლარამდე ჯარიმდება.
67 წლის მეეზოვე, დანიელ კახიძე ფიქრობს, რომ ეს კანონი ბათუმში კარგად ვერ მოქმედებს, რადგან რეალობა ხშირად აჩვენებს, რომ გამვლელები ჯარიმის არსებობის მიუხედავად ნარჩენების, განსაკუთრებით კი სიგარეტის ნამწვების ქუჩაში დაყრას არ ერიდებიან.
„ხანდახან მითხოვია ქუჩაში გამვლელისთვის, ახალდაგვილია, არ დააგდო -მეთქი, მაგრამ აბა თქვენ რისთვის ხართო, გავულანძღივარ. არ ვუსმენ, არც ვბრაზდები, ჩემს საქმეს ვაკეთებ.
სადაც ტაქსები დგანან იქ მეტი ნაგავი გროვდება, სიგარეტის ნამწვებს, ბოთლებს ხშირად ადგილზევე ტოვებენ. ნარჩენებს ხანდახან პირდაპირ მანქანიდანაც ისვრიან, არადა ეს დაყრილი თეთრი „ბიჩოკები“ ხომ იცით რა საშინლადაც ჩანს.
იმედია, გამოსწორდება ხალხი. ბევრ ტურისტს უთქვამს ჩემთვის, რომ ბათუმი მაინც სუფთა ქალაქია ჩვენი წყალობით, ეს მახარებს.
დილით 6-დან 9 საათამდე ვმუშაობთ, მერე ვისვენებთ და 2-დან 6-მდე ისევ გამოვდივართ. დასასუფთავებელ უბანს თვეში ერთხელ გვიცვლიან. ყოვედღიურად გორგილაძის ქუჩას ვგვი.
მეეზოვეები, რომ არ ვიყოთ სამ დღეში ქალაქში ვეღარ გაივლით, ისეთი ამბავი იქნება”, – ამბობს 67 წლის დანიელ კახიძე.
ნათელა გუჯაბიძე 55 წლისაა, მთელი მისი ოჯახი დასუფთავების სამსახურში მუშაობს. თვითონ და მისი ქმარი მეეზოვეები არიან, შვილი კი ნაგვის მანქანაზე მუშაობს. ამბობს, რომ ყველაზე რთული ქარიშხალში მუშაობაა, როცა დაგვილი ნაგავი ეფანტება და თავიდან აგროვებს. ამ დროს დამატებით უწევს მუშაობა საქმის დასასრულებლად.
ნათელა გუჯაბიძე, მეეზოვე
„კარგ ამინდში მუშაობას რა უნდა, ადვილია. ზოგი უფრთხილდება ჩვენს შრომას, ზოგი არა. უცხოელები უფრო ერიდებიან ნარჩენების ქუჩაში დაყრას ჩვენებთან შედარებით.
ტურისტებს ურნით რომ დავუნახივარ, დიდ მანძილზე დამდევნებიან, რომ ნარჩენი ამ ურნაში ჩაეყარათ.
მეეზოვეებისადმი დამოკიდებულება შეიცვალა. ადრე დამლაგებლებს, დამსუფთავებლებს სხვანაირად გვიყურებდნენ. ახლა ხშირად მადლობას გვიხდიან ქალაქზე ზრუნვისთვის. ვის არ ესიამოვნება. მსიამოვნებს.
ორ ცვლაში ვმუშაობ და 560 ლარია ჩემი ხელფასი. ისე, გვეუბნებიან, მოიმატებს ხელფასიო. ცხოვრებისთვის ბევრია საჭირო, თან ყველაფერი გაძვირდა. რას ვიზამთ, რაც არის ეს არის”, – გვეუბნება ნათელა გუჯაბიძე.
ყველაზე ახალგაზრდა მეეზოვე, ვისაც ბათუმის ქუჩაში შევხვდით, 38 წლის მერაბ შევარდნაძეა. მერაბი ხუთი წლის წინ ჩამოვიდა ქობულეთიდან ბათუმში საცხოვრებლად და მას შემდეგ ქალაქის ქუჩებს ასუფთავებს.
„დილით ბულვარს ვალაგებ, საღამოს გორგილაძის ქუჩის ნაწილს. 560 ლარი მაქვს ხელფასი, დამატებით პრემიებსაც ვიღებთ წელიწადში ოთხჯერ. პრემია ხელფასის ოდენობისაა.
ცუდია, როცა ქუჩაში ნაგავს ყრიან, მაგრამ ყოველთვის მოქალაქეებს ვერ დაადანაშაულებ, ზოგან ყუთები არაა და ადამიანს ძალიანაც რომ უნდოდეს ვერ იპოვის, სად ჩააგდოს ნარჩენი. ბულვარში ნინოშვილის მიმდებარე ტერიტორიასაც ვასუფთავებ. ბულვარის იქეთ, ადმინსტრაციასთან ახლომახოლო მხოლოდ ერთი ნაგვის ურნა დგას, შესაბამისად, ქუჩაში ყოველთვის მეტი ნარჩენი მხვდება დაყრილი“.
ბათუმის ქუჩებს ყოველდღიურად სამასამდე მეეზოვე გვის. მათი უმრავლესობა შუახნის ან ასაკოვანია.
მთავარი ფოტო: ნათელა გუჯაბიძე
