6,4 მილიონი ლარი ბათუმში გიორგი ბრწყინვალის ქუჩის მოსაწესრიგებლად – ტენდერი


ბათუმში გიორგი ბრწყინვალის ქუჩის კეთილმოწყობისთვის ქალაქის 2019 წლის ბიუჯეტში 6 471 900 ლარია გათვალისწინებული. სამუშაოების შესყიდვაზე ტენდერი ბათუმის მერიის ა(ა)იპ საქალაქო ინფრასტრუქტურისა და კეთილმოწყობის სამმართველომ უკვე გამოაცხადა.

გიორგი ბრწყინვალის ქუჩის სრული რეაბილიტაცია ტენდერში გამარჯვებულთან ხელშეკრულების გაფორმებიდან 390 დღეში უნდა დასრულდეს. ტენდერში წინადადებების მიღება 2019 წლის 31 იანვარს დაიწყება და 5 თებერვალს დასრულდება.

ელექტრონული ტენდერი აუქციონის გარეშეა გამოცხადებული. ანუ, ტენდერში ღირებულების წარდგენა ხდება მხოლოდ ერთხელ, ელექტრონული ვაჭრობის ძირითად დროში და შეთავაზებული ფასის კლება შესაძლებელია განხორციელდეს მხოლოდ ერთხელ [ვაჭრობის ძირითად დროში] და არა ვაჭრობის დამატებით რაუნდებში.

შესრულებული სამუშაოს საგარანტიო პერიოდი შეადგენს 24 თვეს საბოლოო მიღება-ჩაბარების აქტის გაფორმებიდან; საგარანტიო პერიოდის განმავლობაში ხარვეზის გამოვლენის შემთხვევაში მიმწოდებელი ვალდებულია შემსყიდველის მიერ დადგენილ ვადაში მოახდინოს გამოვლენილი ხარვეზის აღმოფხვრა ისე, რომ შესრულებული სამუშაოები სრულ შესაბამისობაში იყოს ხელშეკრულებით გათვალისწინებულ პირობებთან.

სარეაბილიტაციო ქუჩის სიგრძე არის 1865 გრძ.მ, სავალი ნაწილის სიგანე – 8 მ, სავალი ნაწილის ფართობი 30 068 კვ/მ, ტროტუარების სიგანე ცვალებადია, საშუალოდ 3,5 მ.

არსებული სიტუაცია [ტექნიკური დოკუმენტაციის მიხედვით]: „გიორგი ბრწყინვალეს ქუჩა მდებარეობს ე.წ. „ჭაობის“ უბანში. იგი იწყება სულაბერიძის ქუჩიდან და მთავრდება ოძელაშვილის ქუჩასთან. ადგილობრივი მოსახლეობის გადმოცემით, ქუჩაზე გზის საფარი მოწყობილია გასული საუკუნის 80-იან წლებში. მისი ფუძე მოწყობილია ღორღით, რაც დაზიანებულია. აღენიშნება ჯდენები და ორმოები, საფარი გამოფიტულია და მთლიანად ასაღებია. ვინაიდან ქუჩას არ გააჩნია გამართული სანიაღვრე არხები, ატმოსფერული ნალექების დროს მოდინებული წყლების ძირითად ნაწილს „იწოვს“ არსებული გრუნტი, ხოლო დარჩენილი წყალი გროვდება გზის ზედაპირზე გუბეების სახით. ქუჩის ორივე მხარეს განთავსებულია საცხოვრებელი სახლები და ეზოები. სახლებთან მისასვლელ გზაზე გაჩენილია ორმოები. გზის ზოგიერთ მონაკვეთს გააჩნია ბორდიურები და ფეხით მოსიარულეთათვის განკუთვნილი ტროტუარი, რაც ძლიერაა დაზიანებული და საჭიროებს რეაბილიტაციას“.

– – – – – – – – –  –

„ჭაობის უბანში“ სხვა, 8 ქუჩის კეთილმოწყობაზე ტენდერი ბათუმის მერიის კეთილმოწყობის სამმართველომ 2018 წლის ივლისშიც გამოაცხადა. შესყიდვის სავარაუდო ღირებულება 6 მილიონ 587 866 ლარი იყო. ამ ტენდერზეა დამოკიდებული შემდეგი ქუჩების მოწესრიგება: ბაგრატიონის შესახვევი, გურამიშვილის ქუჩა, გურამიშვილის შესახვევი, მელიქიშვილის I შესახვევი, ოსტროვის I შესახვევი, სააკაძის ქუჩა, სააკაძის შესახვევი, ჩოლოყაშვილის II შესახვევი. სამუშაოები იმ მიზეზის გამო ვერ დაიწყო, რომ ბათუმის საქალაქო სასამართლომ ეს ტენდერი შეაჩერა.

საინჟინრო-გეოლოგიური კვლევები „ჭაობის უბანში“ მდებარე ქუჩების სარეაბილიტაციოდ კი 2015 წელს ჩატარდა. კვლევის დეტალური შედეგები შეგიძლიათ იხილოთ აქ:

გიორგი ბრწყინვალის ქუჩა ბათუმში

მთავარი ფოტო: გიორგი ბრწყინვალის ქუჩა ბათუმში / ფოტო „ბათუმელების“ არქივიდან.
ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com