ივანიშვილის პარკისთვის ხე სტუდენტთა საერთო საცხოვრებლის საძირკველთან ამოთხარეს [ფოტოამბავი]

მწვანე კონცხზე, სტუდენტთა საერთო საცხოვრებელთან ახლოს, მრავალწლოვანი ხეა ამოთხრილი. „ნაციონალური მოძრაობის“ წევრების თქმით, აქედან ხე ბიძინა ივანიშვილის ბაღისთვის ამოთხარეს, რაც საერთო საცხოვრებლის შენობას, სადაც ამ დრომდე ცხოვრობენ სტუდენტები, საფრთხეს უქმნის.

ბათუმის შოთა რუსთაველის სახელმწიფო უნივერსიტეტში ამბობენ, რომ ვითარებას ადგილზე გაეცნენ და ვიზუალური დათვალიერებით, შენობას ტექნიკური პრობლემა არ აქვს და შეფასება, რომ ის წარმოადგენს ადგილობრივი მცხოვრებლებისთვის საფრთხეს, მხოლოდ ვარაუდია.

ამ დროისათვის ამ შენობაში 60-მდე სტუდენტი ცხოვრობს. ისინი სექტემბერში, სამშენებლო სამუშაოების დასრულების შემდეგ გადავლენ ახალ სტუდენტურ საცხოვრებელში.

ბსუ-ს ახალი საერთო საცხოვრებლის ასაშენებლად 2 592 082 ლარზე აქვს გაფორმებული ხელშეკრულება კომპანია „ვექტორთან“.

სტუდენტთა საერთო საცხოვრებლის შენობა ბსუ-ს აღარ ეკუთვნის. ბათუმში, მწვანე კონცხზე მდებარე ყოფილი აგრარული უნივერსიტეტისა და ბსუ-ს საერთო საცხოვრებლის შენობები პირობებიან აუქციონზე ბიძინა ივანიშვილის კომპანიამ „ბიზნეს დეველოპმენტმა“ 2017 წელს შეიძინა. აუქციონში მხოლოდ ეს ერთი კომპანია მონაწილეობდა, რომელმაც აღნიშნული ქონება 4 600 000 ლარად იყიდა.