„არა ქიმიურ ტერმინალს“ - საპროტესტო აქცია ბათუმის პორტთან [ფოტო] - Batumelebi • ახალი ტერმინალი, ბათუმის პორტი, პორტის ახალი ტერმინალი, საპროტესტო აქცია, • batumelebi.ge

„ეს იყო კლოუნადა“ – ამ სიტყვებით დაიწყო საპროტესტო აქცია ახალი ტერმინალის წინააღმდეგ დღეს, 20 იანვარს. აქციის ორგანიზატორებმა ასე უმაღლესი საბჭოს წევრის, ლადო მგალობლიშვილის ქმედება შეაფასეს, რომელმაც გუშინ, „აჭარის ტელევიზიის“ პირდაპირ ეთერში კარბამიდი შეჭამა. აქციის ორგანიზატორების შეფასებით, დეპუტატი უპასუხისმგებლოა.

საპროტესტო აქციაზე შეკრებილებმა ბათუმის პორტში ახალი ტერმინალის მშენებლობა კიდევ ერთხელ გააპროტესტეს და თქვეს, რომ აქციებს პერმანენტული ხასიათი ექნება, თუკი ტერმინალის მოწყობას მაინც დაიწყებენ.

აქციის ორგანიზატორების თქმით, ახალი ტერმინალით გადაზიდავენ არა მხოლოდ კარბამიდს, რომელიც უსაფრთხოა, არამედ სხვა ქიმიურ ნივთიერებებსაც, რომლებიც ფეთქებადსაშიშია.

„ბათუმი გაქრება ტურისტული ობიექტების რუკიდან… ეს კი არა, შესაძლოა საერთოდ დაბად იქცეს. ასეთი რამ მომხდარა კიდეც,“ – მიმართა აქციის მონაწილეებს ალეკო თევზაძემ.

კიდევ ერთი აქცენტი, რაც დღევანდელი აქციის ორგანიზატორების მიერ გაჟღერდა, პროტესტის პოლიტიკისგან დამოუკიდებლობაა.

„ჩვენ არავის დაკვეთას არ ვასრულებთ,“ – ირწმუნებიან აქციის ორგანიზატორები.

იმავეს ამბობენ აქციაზე მყოფი მოქალაქეებიც. მათ გვითხრეს, რომ არ სჯერათ ვერსიის, რომლის მიხედვითაც ტერმინალით ქიმიური ნივთიერების გადატანა საფრთხეს არ შეიცავს.

საპროტესტო აქცია ამ წუთებშიც გრძელდება.

ახალი ტერმინალის მშენებლობის მოწინააღმდეგეთა საპროტესტო აქცია ბათუმის პორტთან / 20.01.2019

ბათუმის პორტში ახალი ტერმინალის ასაშენებლად, ბათუმის საზღვაო ნავსადგურმა კერძო კომპანიას 15 128 კვ/მ ფართობი აღნაგობის უფლებით უკვე გადასცა. ტერმინალის მშენებლობის საინვესტიციო ხელშეკრულებას ხელი 2018 წლის 22 მარტს მოეწერა. ახალი ტერმინალი ცენტრალური აზიიდან მინერალური სასუქების ტრანზიტისთვის იქნება განკუთვნილი.

პროექტი ითვალისწინებს სატრანზიტო ტერმინალისა და სასაწყობე ობიექტების მშენებლობას მინერალური სასუქების მიღების, შენახვისა და გადატვირთვის მიზნით. ხელშეკრულებას ორი ხელმომწერი ჰყავს, ბათუმის საზღვაო ნავსადგური და საერთაშორისო ლოჯისტიკური კომპანია Wondernet Exspress-ი.

ვრცლად ამ თემაზე: