Batumelebi

2 ოქტომბერს, ადგილობრივი თვითმმართველობის არჩევნებზე ბათუმმა ახალი მერი უნდა აირჩიოს. “ბათუმელებმა” მერობის სამ კანდიდატს, სხვადასხვა საკითხზე დაუსვა კითხვები, რომელზე პასუხებსაც პერიოდულად შემოგთავაზებთ. ერთ-ერთი კითხვა ეხებოდა ბათუმში მეჩეთის მშენებლობის საკითხს და სასამართლო დავას, რომელიც ოთხი წელია გრძელდება ბათუმის მერიასა და მუსლიმ თემს შორის.

მაშინ როცა ქალაქში საცხოვრებელ ადგილას ნებართვით ან უნებართვოდ შენდება ეკლესიები, რატომ აიძულებთ მუსლიმებს სასამართლოებში დავას მეჩეთის აშენებაზე უფლების მოსაპოვებლად? – ასე იყო ფორმულირებული კითხვა, რომელიც „ბათუმელებმა“ არჩილ ჩიქოვანს დაუსვა, ბათუმის მერობის კანდიდატს „ქართული ოცნებიდან“.

არჩილ ჩიქოვანი ერთ წელზე მეტია ბათუმის მერის მოვალეობას ასრულებს და სწორედ მისი ხელმძღვანელობის პერიოდში გაასაჩივრა ბათუმის მერიამ ორი ინსტანციის სასამართლოს გადაწყვეტილება უზენაეს სასამართლოში.

• არჩილ ჩიქოვანი, ბათუმის მერობის კანდიდატი პარტია „ქართული ოცნებიდან“:

სამშენებლო საკითხებთან დაკავშირებით ერთგვაროვანი შეკითხვა სხვადასხვა ინტერპრეტაციით დასვით. გპასუხობთ ცალსახად – მუნიციპალიტეტი იმოქმედებს და მოქმედებს კანონმდებლობის შესაბამისად. მათ შორის ის პრეცედენტული გადაწყვეტილებები, რომელიც უნდა მიიღოს სასამართლომ და რომელიც დამხვდა მე მემკვიდრეობად, ბუნებრივია გაგრძელდება ამაზე სამართლებრივი ნაწილი. ამავდროულად მე და ჩემი გუნდი ყოველთვის ვიმოქმედებთ კომპეტენციის ფარგლებში, კანონმდებლობის შესაბამისად.

ბატონო არჩილ, შესაძლებელია თქვენ უკვე იყოთ მერი, როდესაც უზენაესი სასამართლო მიიღებს გადაწყვეტილებას. რადგან ორი ინსტანციის სასამართლომ თქვა, შეიძლება უზენაესმაც გამოიტანოს გადაწყვეტილება, რომ მერიის მხრიდან იყო დისკრიმინაციული მიდგომა, რაც თქვენ დაგხვდათ მემკვიდრეობით. თქვენ, როგორც მერი, შეცვლით ამ მიდგომას?

ჩემი ხედვა და დამოკიდებულება არის კანონის განუხრელი დაცვა. სასამართლო არის ორგანო, სადაც ნებისმიერი ადამიანი შეჯიბრებითობის პრინციპით, ასევე ნებისმიერი ადმინისტრაციული ორგანო, მათ შორის ქალაქ ბათუმის მუნიციპალიტეტის მერიაც, როდესაც ის ჩართულია მხარედ სამოქალაქო საქმის წარმოებაში თავის პოზიციას და თავის სამართლებრივ მხარეს წარმოადგენს.

აქედან გამომდინარე, ბუნებრივია, მე იურისტი ვარ, კარგად ვიცი რას ნიშნავს კანონის დაცვა, კანონის უზენაესობა. ყველა იმ უფლების პატივისცემით და რეალიზებით, რაც ჩვენს თანამოქალაქეებს გააჩნიათ, ასევე ჩვენი უფლებამოსილების ფარგლებში, ჩვენ მივიღებთ კანონმდებლობით დადგენილ ყველა იმ გადაწყვეტილებას, რომელიც კანონთან სრულ თანხვედრაში იქნება.

_____________________________________________

ქალაქში საცხოვრებელ ადგილას ნებართვით ან უნებართვოდ შენდება ეკლესიები, მუსლიმებს კი სასამართლოში უწევთ დავა მეჩეთის მშენებლობის უფლების მოსაპოვებლად. თუ მერი გახდებით თქვენც აიძულებდით მუსლიმებს სასამართლოებში დავას ამ უფლების მოსაპოვებლად? –  ასე იყო ასე იყო ფორმულირებული კითხვა, რომელიც „ბათუმელებმა“ ოპოზიციური პარტიების კანდიდატებს დაუსვა.

• ირაკლი მიქელაძე, ბათუმის მერობის კანდიდატი პარტია „გიორგი გახარია საქართველოსთვის“:

უნებართვოდ რაც შენდება, გინდ ეკლესია იყოს, გინდაც მეჩეთი, ჩემთვის არის მიუღებელი, იმიტომ, რომ ჩვენ ვცხოვრობთ სახელმწიფოში, სადაც არსებობს განსაზღვრული საკანონმდებლო ბაზა და განსაზღვრულ საკანონმდებლო ბაზას, რა თქმა უნდა, უნდა ემორჩილებოდეს თითოეული მოქალაქე.

მე, როგორც სამართალმცოდნე, პირველ რიგში ვაღიარებ კონსტიტუციას. ჩვენი კონსტიტუცია კი განსაზღვრავს აღმსარებლობის თავისუფლებას. ასე რომ თითოეულ ადამიანს, აღმსარებლობის მიუხედავად, შეუძლია ააშენოს სალოცავი, რათა განახორციელოს ის რიტუალები, რომელიც ამ რელიგიით არის განსაზღვრული.

თუკი მე მერი გავხდები, მუსლიმებს, ქრისტიანებს, ბუდისტებს, კათოლიკეებს და ყველა სხვა რელიგიების წარმომადგენლებს, რომლებსაც ექნებათ შესაბამისი დოკუმენტაცია წარმოდგენილი, რომელიც არ ეწინააღმდეგება ჩვენს საკანონმდებლო სივრცეს, არ მოუწევთ სასამართლოში წასვლა.

_____________________________________________

• გიორგი კირთაძე, ბათუმის მერობის კანდიდატი ოპოზიციური ერთობიდან:

გავიგე თქვენი კითხვა, მაგრამ მინდა მოისმინოთ ჩემი პასუხი. მიმაჩნია, რომ ბიძინა ივანიშვილმა ბევრი ცუდი საქმე გააკეთა ამ ქვეყანაში და ამ ქვეყნის სახელმწიფოებრიობას ბევრი მიმართულებით შეუქმნა საფრთხე. მაგრამ თუ მე მკითხავთ და პირველი, რასაც გამოვყოფდი ბიძინა ივანიშვილის ანტისახელმწიფოებრივ ქმედებებში, ეს არის რელიგიური თემებით ძალიან ცუდად სპეკულირება, რაც საბოლოოდ მიმართულია იმისკენ, რომ ჩვენი სახელმწიფოებრიობა დაინგრეს.

მეჩეთის საკითხში პოლიტიკური მდგენელი თავიდან ბოლომდე არის ივანიშვილის პასუხისმგებლობა. მან აქცია მეჩეთი პოლიტიკურ საკითხად. გახსოვთ ალბათ 2012 წლამდე, მის ხელისუფლებაში მოსვლამდე დაიწყო ამ თემით სპეკულირება. მერე ძალიან ბევრი ამბავი – ქობულეთის, ჭელას, გურიის ამბავი და ა.შ. და ა.შ.

მე მიმაჩნია, რომ ჩვენ ვცხოვრობთ სეკულარულ სახელმწიფოში, რომელიც გვაძლევს იმის საშუალებას, რომ ყველა აღმსარებლობის ადამიანს თავისუფლად მიეცეს ლოცვის საშუალება. აღმსარებლობაში და რწმენაში ყველანი ვართ თავისუფლები და როგორც არის შესაძლებელია აშენდეს ეკლესია, ასევე უნდა იყოს შესაძლებელი აშენდეს მეჩეთი. ოღონდ. კიდევ ერთხელ ვიმეორებ, პოლიტიკური მდგენელი ამას თავიდან ბოლომდე უნდა მოშორდეს და მერე სეკულარული სახელმწიფოს პრინციპების დაცვით ეკლესია, მეჩეთი, სინაგოგა და სხვა რელიგიური დაწესებულებები უნდა იყოს ყველგან.

კიდევ ერთხელ ვიმეორებ, პოლიტიკური მდგენელის მოშორება არის ძალიან მნიშვნელოვანი ამ შემთხვევაში, პოლიტიკური მდგენელი არ უნდა იყოს და ჰო, თუ ბათუმელ მუსლიმებს სჭირდებათ მეჩეთი, მათ უნდა ჰქონდეთ მეჩეთი და მერია მას ხელოვნურად ხელს არ უნდა უშლიდეს.

______________________

რატომ არის ბათუმში მეჩეთის აშენების საკითხი მნიშვნელოვანი: 

ოთხ წელზე მეტია მუსლიმი თემი ბათუმში მეჩეთის აშენების უფლების მოსაპოვებლად სასამართლოში იბრძვის. ორი ინსტანციის სასამართლომ (ბათუმის საქალაქომ და ქუთაისის სააპელაციომ) ბათუმის მერიას დისკრიმინაცია დაუდგინა. კერძოდ, ბათუმის საქალაქო სასამართლომ 2019 წლის 30 სექტემბერს დისკრიმინაციად მიიჩნია მუსლიმი თემის მიმართ ბათუმის მერიის დამოკიდებულება „ბათუმის ახალი მეჩეთის საქმეზე“. მოსამართლე ჯუმბერ ბეჟანიძემ უკანონოდ ჩათვალა ბათუმის მერიის გადაწყვეტილება, რომლითაც მუსლიმ თემს მეჩეთის აშენებაზე უარი უთხრეს.

2021 წლის აპრილში ქუთაისის სააპელაციო სასამართლომ ბათუმის საქალაქო სასამართლოს გადაწყვეტილება, ბათუმში ახალი მეჩეთის მშენებლობის საქმეზე, ძალაში დატოვა. მეორე ინსტანციის სასამართლომაც მიიჩნია, რომ ბათუმის მერიამ უკანონო და დისკრიმინაციული გადაწყვეტილება მიიღო მუსლიმების მიმართ.

ამის მიუხედავად, 2021 წლის ივნისში ბათუმის მერიამ უზენაეს სასამართლოს მიმართა და ორი ინსტანციის სასამართლოს მიერ მიღებულ გადაწყვეტილებას ასაჩივრებს.

35 წლის ჰაიკ ასრიანცი საქართველოში პირველად 2008 წელს ჩამოვიდა, როგორც ტურისტი, 2011 წელს კი საქართველოში საცხოვრებლად გადმოსვლა გადაწყვიტა. ცხრა წელია, რაც თბილისში ცხოვრობს და დღემდე ფიქრობს, რომ საქართველო ის ადგილია, სადაც წამოსვლა აქამდე არ უნანია.

ჰაიკი ამბობს, რომ როცა რუსთაველი, ძველი თბილისი მოინახულა, მაშინვე მოიხიბლა იქაურობით. ეს ადგილები დღემდე ყველაზე სენტიმენტალურია მისთვის.

• რატომ გახდა საქართველო ჩემი სახლი

„როცა ოჯახის წევრებს ჩემი გადაწყვეტილების შესახებ ვუთხარი, პირველი კითხვა იყო – რატომ საქართველო? და რატომ არა, ვთქვათ,  ევროპის რომელიმე ქვეყანა, აშშ ან კანადა? გარკვეულწილად, ეს კითხვა იმანაც  განაპირობა, რომ მათ აღქმებში ჯერ კიდევ იყო წარმოდგენები 90-იანი წლების საქართველოზე, როგორც საშიშ და კრიმინალურ ქვეყანაზე. თუმცა შემდეგ, როცა სტუმრად ჩამოდიოდნენ, ნახეს ახალი საქართველოც,“  – გვეუბნება ჰაიკი.

მას ძალიან უყვარს მოგზაურობა, ამიტომ საქართველოს თითქმის ყველა კუთხე აქვს  მოვლილი. რამდენჯერმე იყო კახეთში, თელავში და ამბობს, რომ კარგად იცნობს იქაურობას. მოინახულა სამეგრელო, რაჭა და სვანეთიც.

„სადაც არ უნდა წავიდე, ყველა მხარე ძალიან მომწონს – ბუნება, ტყეები და ტბები. ზოგჯერ მგონია, რომ ადგილობრივები არ აფასებენ ამ ყველაფერს სათანადოდ. როცა მოგზაურობ, სჯობს გამორთო სმარტფონი და გაიხედ-გამოიხედო, ნახო რამდენად გასაოცარი ბუნებაა საქართველოში,“- ამბობს ჰაიკი.

ჰაიკი ბოლო ექვსი თვეა ბათუმში ცხოვრობს. როგორც გვეუბნება, მოსწონს ბათუმის სიმყუდროვე, ადამიანები, არქიტექტურა და ზღვა, მიუხედავად სუბტროპიკული წვიმებისა.

ზოგჯერ აღიზიანებს საცობები ქუჩებში, განსაკუთრებით წვიმის დროს. ასეთ დროს სკუტერს ქირაობს ხოლმე, თუმცა, ძირითადად, ფეხით გადაადგილდება ქალაქში.

„ერთხელ ჩემი სკუტერი მომპარეს, მაგრამ პოლიციამ ვერ იპოვა“- ჰაიკი სხვა უსიამოვნო შემთხვევას ვერ იხსენებს, რომელიც ბათუმს უკავშირდება.

ერთადერთი, რაზეც გული სტკივა, ქალაქის  ურბანული განვითარებაა.

„ბევრი ცნობილი შენობა, სინამდვილეში, საკმაოდ ულამაზოა. ქალაქის ნაწილი დამახინჯებულია მაღალი შენობებით.

ამას ალბათ ვერაფერს უშველით, თუმცა საცობებს და ქალაქის გამწვანებას შეგიძლიათ მიხედოთ,“- გვეუბნება ის.

• თუ აქ ცხოვრებას გადაწყვეტთ, ქართული უნდა ისწავლოთ

„ვისაც საქართველოში ცხოვრება სურს, ვურჩევ, ქართული ენა ისწავლოს. მე ქართული ანბანი 10 დღეში ვისწავლე. დავიწყე კითხვაც.

როცა ქუჩებში დავდივარ, შემიძლია გავარჩიო რომელია მარკეტი, აფთიაქი, წავიკითხო რესტორნის მენიუ. მართალია, ჯერ სრულყოფილად ვერ ვსაუბრობ, მაგრამ ყველაფერი მესმის. ყოველდღე ვსწავლობ ახალ სიტყვებსა და ფრაზებს“ – ამბობს ჰაიკი

• ვფიქრობ, ქართველები და სომხები ერთმანეთს სათანადოდ არ იცნობენ

„ქართული კულტურა მრავალფეროვანი და სტუმართმოყვარეა, ამიტომ  ქსენოფობიის იარლიყს მაინც და მაინც არ მივაწებებდი. ვფიქრობ, ასეთი რამ ყველა სხვა საზოგადოებაშიც არის. ეს ინდივიდუალურად, ცალკეული ადამიანების პრობლემაა და სამწუხაროდ, მეც მქონია შეხება ასეთ ხალხთან, თუმცა ძირითადად სოციალურ ქსელებში წამიკითხავს ქსენოფობიური კომენტარები.

შენზეა დამოკიდებული, ჩაერთვები დისკუსიაში და აჩვენებ, რომ არასწორად ფიქრობს, თუ უბრალოდ დააიგნორებ. მე იგნორს ვარჩევ ხოლმე,“- ამბობს ჰაიკი.

თუმცა გვეუბნება, რომ ამ საკითხის მიმართ ოპტიმისტურად არის განწყობილი და სჯერა, რომ ადამიანები შეიცვლიან დამოკიდებულებას: „ისწავლიან, რომ არ უნდა დაახარისხონ ადამიანები ეთნიკური ან სხვა ნიშნით. მე ქართველი მეგობრებიც მყავს და ეს მაძლევს ამის იმედს.“

ჰაიკის აზრით, ქართველებსა და სომხებს ჯერ კიდევ არასწორი წარმოდგენები რომ აქვთ ერთმანეთზე იმის ბრალია, რომ არ ცდილობენ სათანადო კონტაქტის დამყარებას.

„თუმცა ბოლო დროს ეს დამოკიდებულება თითქოს იცვლება. სომხები ხშირად მოგზაურობენ საქართველოში. მაგალითად, კორონავირუსამდე 1 მლნ-მდე სომეხმა იმოგზაურა საქართველოში. შეუძლიათ შეხვდნენ ერთმანეთს და ისაუბრონ. უფრო ხშირად დადიან ახალგაზრდები, რასაც ვერ ვიტყვი ქართველებზე. ქართველები არ მოგზაურობენ სომხეთში.

ბოლო დროს ახალგაზრდებმა დაიწყეს მოგზაურობა კლუბების და ღამის ცხოვრებისთვის, თუმცა ბიზნესს და ტურისტულ მოძრაობებს ვერ ვხედავთ,“- გვეუბნება ჰაიკი.

• ნებისმიერ ბიზნესს ნებისმიერ ქვეყანაში ახლავს სირთულეები

„ნებისმიერ რეალობაში ახლავს ბიზნესს გამოწვევები. ჩვენი ერთ-ერთი დიდი გამოწვევა ახალი ხალხის აყვანაა გუნდში. ქართველები ნიჭიერი არიან, თუმცა სრულ განაკვეთზე მუშაობა ურჩევნიათ, სტაბილურ და მყუდრო გარემოში. პატარა კორპორატიულ გარემოში სამუშაოდ მოტივირებული ადამიანების პოვნა რთულია,“- ამბობს ჰაიკი.

საქართველოში გადმოსვლამდე ის მარკეტინგისა და გაყიდვების სფეროში მუშაობდა. ასევე კომპიუტერული მეცნიერებებისა და კომუნიკაციების სფეროში.

„ამავე დროს ვეხმარებოდი სტარტაპერებს ბაზარზე გასვლაში. საქართველოში გადმოსვლის შემდეგ სარეკლამო კომპანიაში კონსულტანტად დავიწყე მუშაობა. საბოლოოდ კი ჩემს საყვარელ საქმეზე ფოკუსირება გადავწყვიტე, ანტერპრენერი ვარ და უკვე ოთხი წელია, რაც დამწყებ სტარტაპერებს ვეხმარები.

კორონავირუსის პანდემიამ გარკვეული პრობლემები ჩვენც შეგვიქმნა, თუმცა არ გავჩერებულვართ და ონლაინ გავაგრძელეთ შეხვედრები“.

• სამზარეულო თითქოს ჰგავს, მაგრამ მაინც განსხვავებულია

„ქართული და სომხური სამზარეულო თითქოს ჰგავს ერთმანეთს, მაგრამ მაინც განსხვავებულია. ქართული სამზარეულო მომწონს, რადგან ბევრ ხორცსა და ყველს იყენებენ.

რა თქმა უნდა, მომწონს ხინკალი, მწვადი, ხაჭაპური – ყველანაირი. კუბდარის მიმართ გულგრილი დამოკიდებულება მქონდა, თუმცა სვანეთში ყოფნისას თავიდან აღმოვაჩინე.

აქ ყველგან შეგიძლია შეუკვეთო ან თვითონ დაამზადო, მაგრამ სომხეთში გვაქვს რამდენიმე კერძი, რომლებიც მენატრება ხოლმე. აქ არსად მინახავს. ამიტომ კარგი იქნება, სომხური რესტორნებიც რომ იყოს საქართველოში. ბევრი არ არის. ბევრი სომეხი მეგობარი მყავს აქ და იქნებ გააკეთონ რამე.

საერთო ჯამში, საქართველოში კომფორტს  გიქმნის  ეს ერთობლიობა –  ღირებულებები, ცხოვრების ხარისხი, ხალხი, სამზარეულო და კლიმატი“ – ამბობს ჰაიკი.

______________________________________________________

2 ოქტომბერს ადგილობრივი თვითმმართველობის არჩევნებზე ბათუმმა ქალაქის მერი უნდა აირჩიოს.

რა არის ბათუმის სამი მთავარი პრობლემა? – ჰკითხა “ბათუმელებმა” ბათუმის მერობის სამ კანდიდატს – არჩილ ჩიქოვანს, ბათუმის მერობის კანდიდატს „ქართული ოცნებიდან“; გიორგი კირთაძეს, რომელიც ოპოზიციურ ერთობას წარმოადგენს და ირაკლი მიქელაძეს, რომელიც გიორგი გახარიას პარტია „საქართველოსთვის“ მერობის კანდიდატია.

• ირაკლი მიქელაძე, ბათუმის მერობის კანდიდატი პარტია „გიორგი გახარია საქართველოსთვის“:

ბათუმის სამი ძირითადი პრობლემა, პირველ რიგში, ეს არის მუნიციპალიტეტში მმართველობის ფორმა, რომელიც აუცილებლად შესაცვლელია და რა თქმა უნდა, ხელმისაწვდომი უნდა გახდეს ჩვენი თანაქალაქელებისთვის ის სერვისები, რასაც ბათუმის მუნიციპალიტეტი სთავაზობს.

ბათუმში უმთავრესი პრობლემა არის ასევე ინფრასტრუქტურული პრობლემები, რომლებიც აუცილებლად მოსაგვარებელია.

და რა თქმა უნდა, ბათუმის მთავარი გამოწვევა არის ტურისტული და ეკონომიკური ცენტრების შექმნა, რომელიც გამოიწვევს ბათუმის ფუნქციონირებადი ნაწილის გაუმჯობესებას.

• არჩილ ჩიქოვანი, ბათუმის მერობის კანდიდატი პარტია „ქართული ოცნებიდან“:

ბათუმის გამოწვევებთან დაკავშირებით ჩვენ არაერთგზის გვისაუბრია.

უმთავრესი და მთავარი არის ბათუმის შეუქცევადი განვითარება. მათ შორის ინფრასტრუქტურის განვითარება. რეკრეაცია და ეკოლოგია. განათლება და ახალგაზრდული სფერო.

ასე სამ კონკრეტულს ვერ ჩამოვთვლი, მაგრამ ყველა მიმართულებით გვჭირდება განვითარება. რაც შეეხება პრობლემურ საკითხებს და პრობლემას გადაუჭრელი პრობლემის ნაწილში, ესეთი ტიპის პრობლემები არის, რაც იყო და რაც მოწესრიგდება, ეს არის განაშენიანების გენერალური გეგმა.

ეს არის ამავდროულად ავარიული სახლები, რომელზეც დავიწყეთ ჩვენ მუშაობა.

ასევე სოციალური საკითხები დასაქმება და ჯანდაცვა.

• გიორგი კირთაძე, ბათუმის მერობის კანდიდატი გაერთიანებული ოპოზიციიდან:

რთულია ბათუმის პრობლემების სამში ჩატევა, მაგრამ თუ სამ მთავარ პრობლემას ვიტყვით:

პირველი – ისევე როგორც მთელ ქვეყანაში, მათ შორის ჩვენს ქალაქშიც, მთავარი პრობლემა არის დასაქმება. ღირსეული სამსახურის პოვნა ამ ქალაქის მცხოვრებლებს უჭირთ, ამიტომ მათ უწევთ საქართველოს სხვა ქალაქებში ან უფრო მეტიც, ქვეყნიდან წასვლა.

მეორე პრობლემად დავასახელებდი ინფრასტრუქტურულ ნაწილს თვითმმართველობის კომპეტენციაში შემავალი საკითხებიდან. სამწუხაროდ, ბოლო წლების განმავლობაში არც ერთი ახალი ქუჩა არ მოწყობილა ამ ქალაქში.

გახსოვთ, ალბათ, ბაგრატიონის ქუჩა, ჟიული შარტავას ქუჩა, ანწუხელიძის, კაჩინსკის – სხვა, უამრავი, ახალი ქუჩა შეიქმნა წინა ხელისუფლების დროს. მიუხედავად იმისა, რომ პროექტები და ფული იყო დატოვებული, სამწუხაროდ, ეს ყველაფერი ხელისუფლებამ გააჩერა.

ამასთან ერთად მნიშვნელოვანია, რომ ინფრასტრუქტურაში, კომუნალური მეურნეობის მიმართულებითაც ძალიან რთული მდგომარეობა გვაქვს.

მესამე და მთავარ ნაწილად შეიძლება გამოიყოს შემოერთებული ტერიტორიების სრული ადაპტირება ქალაქთან. სერვისების მიწოდება შემოერთებულ ტერიტორიებზე სამწუხაროდ არ ხდება და არ ხდება იმის გამო, რომ მერია მუშაობს ცუდად.

ნახეთ ვიდეო: 

დღეს, 10 სექტემბერს, ბათუმში, გაფორმების ეკონომიკურ ზონასთან ტრაილერის მძღოლებმა საპროტესტო აქცია გამართეს. აქციის დროს პოლიციამ ტრაილერის ოთხი მძღოლი დააკავა.

შსს ინფორმაციით გამოძიება ადმინისტრაციულ  სამართალდარღვევათა 173-ე მუხლით არის დაწყებული, რაც პოლიციის კანონიერ მოთხოვნაზე დაუმორჩილებლობას გულისხმობს.

ტრაილერის მძღოლები ტვირთის სხვა ქვეყნებში გადატანის ნებართვას ითხოვენ. მათ დღეს „გაფორმების ეკონომიკური ზონის“ შესასვლელიც გადაკეტეს, თუმცა პოლიციის ხელმძღვანელი პირების თხოვნით, მალევე გაათავისუფლეს იმ პირობით, რომ ადგილზე მოვიდოდნენ ტრანსპორტის სააგენტოს წარმომადგენლები.

დღეს ტრანსპორტის სააგენტომ გაავრცელა ინფორმაცია იმის თაობაზე, რომ მძღოლები ნებართვას ორშაბათს, ანუ 13 სექტემბერს მიიღებდნენ, თუმცა მძღოლები აცხადებენ, რომ მათ სააგენტოს განცხადების არ სჯერათ.

ამ დროისათვის საპროტესტო აქცია დასრულებულია.

ნახეთ ჩანაწერი „ბათუმელების“ პირდაპირი ჩართვიდან:

ყინულის სასახლის მიმდებარედ, ბათუმის სპორტული კომპლექსის დაუსრულებელი მშენებლობის წინ, დღეს „ნაციონალური მოძრაობის“ წევრებმა ბრიფინგი გამართეს.

„სპორტის სახეობა – ცურვა ზღვისპირა ქალაქ ბათუმში ხელისუფლების კორუფციულ ინტერესებს შეეწირა“ – ამბობენ „ნაციონალური მოძრაობის“ წევრები.

„აქ უნდა აშენებულიყო ძალიან მნიშვნელოვანი სპორტული დარბაზი, ყინულის მოედნითა და საცურაო აუზით. მშენებლობის ღირებულება 19 მილიონი დოლარი იყო. საიდანაც 4 მილიონი დოლარი „ქართულმა ოცნებამ“ გაურკვეველი წარმომავლობის კომპანიას გადაურიცხა, რომელმაც მიატოვა მშენებლობა და თანხა წაიღო.

ქალაქის მერის მოვალეობის შემსრულებელს, არჩილ ჩიქოვანს, რომელიც ახლა კენჭს იყრის, უნდა ვკითხოთ მთელმა ქალაქმა: იღებს თუ არა პასუხისმგებლობას დაუსრულებელ მშენებლობაზე, მოსულა თუ არა და უნახავს თუ არა ეს ტერიტორია საერთოდ, რომელიც სპორტულ-გამაჯანსაღებელი კომპლექსი უნდა ყოფილიყო და ახლა კი ტრაილერების სადგომად, ნარკოტიკების მოხმარების ადგილადაა ქცეული.

შენობაში შიგნით არაფერია, მხოლოდ გარედანაა კარკასი და 4 მილიონის გაკეთებული აქ არაფერია. გამოვიდეს ჩიქოვანი და თქვას, რომ აქ არის ფული მოპარული მისი მეგობრების მიერ,  შეიძლება მის მიერაც და უნდა დადგეს იმ ადამიანების პასუხისმგებლობის საკითხი, ვინც ეს ფული მოიპარა,“ – ამბობს „ნაციონალური მოძრაობიდან“ ბათუმის საკრებულოს წევრობის კანდიდატი ლაშა კილაბერია.

მრავალფუნქციური სპორტული დარბაზის მშენებლობა და კეთილმოწყობა 2018 წლის სექტემბერში უნდა დასრულებულიყო.

აჭარის ავტონომიური რესპუბლიკის ფინანსთა და ეკონომიკის სამინისტროს, შპს „სტადიონსა“ და კანადურ კომპანია Westincor Limited-ს შორის პირდაპირი წესით გაფორმდა ხელშეკრულება, რომელიც ითვალისწინებდა მასშტაბური სპორტული ღონისძიებებისთვის შესაბამისი ინფრასტრუქტურის მოწყობას.

ხელშეკრულების მიხედვით უნდა დანგრეულიყო  ყინულის ძველი სასახლე  და აშენებულიყო  ახალი საცურაო აუზი და  თანამედროვედ აღჭურვილი ყინულის დარბაზი, 1000 მაყურებელზე გათვლილი ტრიბუნებით, საკონფერენციო და ჯგუფური სავარჯიშო დარბაზებით.

2021 წლის ივლისში ცნობილი გახდა, რომ  ყინულის ახალი არენის მშენებლობის დასასრულებლად საჭირო პროექტს აჭარის მთავრობა კონკურსით შეისყიდის, მანამდე კი, ფასების დასადგენად ბაზარს იკვლევს.

ამავე თემაზე: 

საქართველოს პროკურატურამ დამამძიმებელ გარემოებებში ჩადენილი ავსტრალიის მოქალაქის, შანაი ბრუკის განზრახ მკვლელობის ფაქტზე, რ.მ.-ს ბრალი დაუმძიმა.

„გამოძიებით დადგინდა, რომ 2021 წლის 30 ივლისს, დაახლოებით 16:00 საათზე, თბილისში, მთაწმინდის პარკის მიმდებარე ტერიტორიაზე, ბრალდებული ყაჩაღურად, პირადი ნივთების დაუფლების მიზნით თავს დაესხა შანაი ბრუკი ედუარდს.

მსხვერპლის მიერ გაწეული წინააღმდეგობის გამო, ბრალდებულმა, ყაჩაღობის გაადვილების და შემდგომში მისი დაფარვის მიზნით, ანგარების მოტივით, მისი მოკვლა გადაწყვიტა.

ბრალდებულმა შანაი ბრუკს დანით კისრის არეში მიაყენა დაზიანება და გაგუდა. ამის შემდეგ იგი მსხვერპლის პირად ნივთებს დაეუფლა და დანაშაულის კვალის დაფარვა სცადა, ცხედარს ხის ტოტები დააფარა, დანაშაულის იარაღი – დანა მიმდებარე ტერიტორიაზე გადააგდო და ადგილიდან მიიმალა“- აცხადებს პროკურატურა.

მათივე ინფორმაციით, გამოძიების პროცესში გამოიკითხა 200-ზე მეტი პირი, მათ შორის გარდაცვლილი ქალის მეგობრები, თანამშრომლები, მეზობლები, დანაშაულის დღეს მთაწმინდის პარკის ტერიტორიაზე მყოფი და იქ დასაქმებული პირები.

„საქმის მოწმეებისგან მიღებული ინფორმაციის საფუძველზე, დამნაშავე პირის იდენტიფიცირების მიზნით, შეიქმნა ფოტორობოტი, რომელიც გაეგზავნა ყველა ოპერატიულ დანაყოფს.

შესწავლილია შანაი ბრუკის გადაადგილების მარშრუტები და ამოღებულია ასევე, შემთხვევის ადგილის, გარდაცვლილის დროებითი საცხოვრებელი სახლის და მთაწმინდის პარკის მიმდებარე ქუჩებზე განთავსებული, შინაგან საქმეთა სამინისტროს საზოგადოებრივი უსაფრთხოების მართვის ცენტრის – „112“-ის და კერძო ობიექტების კუთვნილი რამდენიმე ათეული ვიდეოსამეთვალყურეო კამერის ჩანაწერი. დანიშნულია დაქტილოსკოპიური, ტრასოლოგიური, ბიოლოგიური და გენეტიკური ექსპერტიზები.

გამოძიების მიერ შეკრებილი მტკიცებულებების, მათ შორის, მოწმეთა ჩვენებების, ვიდეოსამეთვალყურეო კამერების ჩანაწერების, გენეტიკური ექსპერტიზის დასკვნის საფუძველზე, მოსამართლის განჩინებით, სამართალდამცავებმა 8 სექტემბერს რ.მ. დააკავეს“-აცხადებს პროკურატურა.

რ.მ-ს ბრალდება საქართველოს სისხლის სამართლის კოდექსის 179-ე მუხლის პირველი ნაწილით (ყაჩაღობა, ესე იგი თავდასხმა სხვისი მოძრავი ნივთის მართლსაწინააღმდეგო მისაკუთრების მიზნით, ჩადენილი სიცოცხლისათვის ან ჯანმრთელობისათვის საშიში ძალადობით ანდა ასეთი ძალადობის გამოყენების მუქარით), 109-ე მუხლის პირველი ნაწილის ,,გ“ და მესამე ნაწილის ,,გ“ ქვეპუნქტებით (განზრახ მკვლელობა, ჩადენილი სხვა დანაშაულის დაფარვის და მისი ჩადენის გაადვილების მიზნით; ანგარებით) წარედგინა, რაც სასჯელის სახედ და ზომად 16 წლიდან 20 წლამდე ან უვადო თავისუფლების აღკვეთას ითვალისწინებს.

პროკურატურა სასამართლოს მიმართავს ბრალდებულის მიმართ აღკვეთის ღონისძიების სახით პატიმრობის გამოყენების შუამდგომლობით.

ბათუმში მცირე წონის ჩვილი დაიბადა, რომელიც ექიმებმა გამოაჯანმრთელეს და გუშინ გაწერეს ბათუმის საერთაშორისო ჰოსპიტლიდან.

დაბადებისას ჩვილი 550 გრამს იწონიდა. როგორც კლინიკაში „ბათუმელებს“ უთხრეს, ბავშვების ნაადრევად დაბადების შემთხვევები საკმაოდ ხშირია, თუმცა ასეთი მცირე წონით, იშვიათად იბადებიან. პატარა გოგონა სამი თვის წინ, 25-ე კვირაზე დაიბადა და მან რამდენიმე თვე ახალშობილთა რეანიმაციაში გაატარა.

„გვქონია 600-გრამიანი, 800-გრამიანი ახალშობილების დაბადების პრაქტიკა, თუმცა 550-გრამიანი ახალშობილი პირველად გვყავდა. დაიბადა ძალიან ღრმად დღენაკლი, სამი თვე გაატარა ჩვენთან, ჰქონდა სხვადასხვა სახის პრობლემა, თუმცა ეს პრობლემები ეტაპობრივად დაიძლია,“ – გვითხრეს კლინიკაში.

ნაადრევად დაბადებული ჩვილები სპეციალურ ინკუბატორში თავსდებიან, სადაც  შესაბამისი გარემო და ტემპერატურული რეჟიმია ახალშობილისთვის.

„ადრე არ იყო ტექნოლოგიები განვითარებული და ვერ ხერხდებოდა დღენაკლული ბავშვების გადარჩენა, თუმცა თანამედროვე მედიცინა  გვაძლევს შესაძლებლობას, რომ ასეთი პატარა ახალშობილებიც გადავარჩინოთ. ლივია უკვე თავის მშობლებთან და უფროს და-ძმებთანაა,“ – გვითხრეს კლინიკაში.

___________________________

მთავარი ფოტო: ახალშობილი, რომელიც დაბადებისას 550 გრ იწონიდა/ბაუ

დაავადებათა კონტროლის ეროვნული ცენტრის ცნობით, 10 სექტემბრის მონაცემებით, საქართველოში კორონავირუსზე სრულად ვაქცინირებულია 553 912 ადამიანი, რაც მოზრდილი მოსახლეობის 19.4 პროცენტია.

ერთი დოზითაა აცრილი 879 384 ადამიანი – მოზრდილი მოსახლეობის 30.8%.

რაც შეეხება კორონავირუსზე ვაქცინაციის მონაცემებს აჭარაში, ამ დროისათვის რეგიონში ვაქცინის ორივე დოზით აცრილია 24.6 %, ხოლო ერთი დოზით – 39.2 პროცენტი.

დაავადებათა კონტროლის ეროვნული ცენტრის სტატისტიკის მიხედვით, ყოველდღიურად აჭარაში სხვა რეგიონებთან შედარებით უფრო მეტი აცრა კეთდება – დღეში საშუალოდ 3 ათასი.

ბოლო დღეებში საქართველოში დღეში 20 ათასზე მეტი ადამიანი იცრება კოვიდზე.

ამ დროისთვის აცრა შესაძლებელია 4 ვაქცინით: „ფაიზერით“, „სინოფარმით“, სინოვაკითა“ და „ასტრაზენეკათი“.

10 სექტემბრის მონაცემებით საქართველოში სულ ჩატარებულია 1 433 296 აცრა.

საქართველოს ჯანდაცვის მინისტრის მოადგილის, თამარ გაბუნიას განცხადებით, კოვიდის მოსალოდნელი, ახალი ტალღა განსაკუთრებით საშიში იქნება 60 წელს გადაცილებული მოსახლეობისთვის, ამიტომაც საჭიროა ამ ასაკობრივი ჯგუფის მიზნობრივი ვაქცინაცია კორონავირუსზე:

„შემდეგი ტალღა იქნება რეალურად კრიტიკულად საშიში ამ ასაკობრივი ჯგუფისთვის, თუ ჩვენ ახლა არ მივაღწიეთ მათ ვაქცინაციას,“ – აღნიშნა თამარ გაბუნიამ.

ამავე თემაზე: 

სახმელეთო ტრანსპორტის სააგენტოს ცნობით, თურქეთის რესპუბლიკაში დაუტვირთავი ავტოსატრანსპორტო საშუალებების შესვლის (სპეციალური) ნებართვების გაცემა, დაიწყება ორშაბათს, 13 სექტემბერს, დილის 9.00 საათიდან, სააგენტოს თბილისის, ბათუმისა და ფოთის ოფისებიდან.

„ხოლო, რაც შეეხება მე-3 ქვეყანაში/მე-3 ქვეყნიდან გადაზიდვის თურქეთის რესპუბლიკის ნებართვებს, მათი გაცემა დაიწყება, ასევე ერთდროულად, 20 სექტემბერს, დილის 9.00 საათიდან, სააგენტოს სამივე ოფისიდან“ – აცხადებს სახმელეთო ტრანსპორტის სააგენტო.

რამდენიმე დღის წინ სატვირთო ავტომანქანების მძღოლებმა ბათუმში, სახმელეთო ტრანსპორტის სააგენტოსთან საპროტესტო აქცია გამართეს. მძღოლები ტვირთის სხვა ქვეყნებში გადატანის ნებართვას ითხოვენ.

ამავე თემაზე:

10 სექტემბრის მონაცემებით, ბოლო 24 საათში აჭარაში კოვიდის 211 ახალი შემთხვევა დადასტურდა.

დღეის მონაცემებით, აჭარის კოვიდკლინიკებში 699 პაციენტს მკურნალობენ კოვიდზე, მათგან 33 ხელოვნურ სუნთქვაზეა.

რეგიონში კოვიდსასტუმროშია 537 ადამიანი.

10 სექტემბრის მონაცემებით, საქართველოში კორონავირუსის  2262 ახალი შემთხვევა დადასტურდა. ბოლო 24 საათში ქვეყნის მასშტაბით ჩატარდა 34 225 კვლევა ტესტით.

გასულ დღე-ღამეში საქართველოში 54 ადამიანი გარდაიცვალა კოვიდით.

9 სექტემბრის მდგომარეობით, დადებითობის  დღიური მაჩვენებელია 6,61%, ბოლო 7 დღის – 7.42%, ბოლო 14 დღის – 8,27%.

დღეს ქვეყანაში გამოვლენილი ინფიცირების 2 262 ახალი შემთხვევიდან თბილისში გამოვლენილია 827 შემთხვევა, აჭარაში – 211, იმერეთში – 335, ქვემო ქართლში – 129, შიდა ქართლში – 139, გურიაში – 59, სამეგრელო – ზემო სვანეთში – 222, კახეთში – 216, მცხეთა-მთიანეთში – 61, სამცხე-ჯავახეთში – 35, რაჭა-ლეჩხუმსა და ქვემო სვანეთში – 28.

ბათუმში, ერთ-ერთი კოვიდსასტუმროს ეზოში, 49 წლის კოვიდინფიცირებული კაცი გარდაიცვალა.

აჭარის ჯანდაცვის სამინისტროს ინფორმაციით, პაციენტს კოვიდსასტუმროში შეყვანისთანავე განუვითარდა სავარაუდოდ ეპილეფსიური გულყრა გონების დაკარგვის ეპიზოდით, მას ადგილზე გაეწია შესაბამისი სამედიცინო დახმარება, თუმცა გატარებული ღონისძიებების მიუხედავად დაფიქსირდა გარდაცვალება.

ბოლო ერთი თვის მონაცემებით, საქართველოში 2000-ზე მეტ ადამიანი დაიღუპა. 9 სექტემბრის მონაცემებით, ქვეყანაში კოვიდით უკვე დაიღუპა 8 035 ადამიანი.

2 ოქტომბრის არჩევნებზე შუახევის მუნიციპალიტეტის საკრებულოში 22 წლის თედო თავდგირიძე კენჭს იყრის „ნაციონალური მოძრაობის“ პარტიული სიით. თედო ერთ-ერთი ყველაზე ახალგაზრდა კანდიდატია.

რატომ გადაწყვიტა მეოთხე კურსის სტუდენტმა საკრებულოში მოხვედრა, რა აუცილებელი ცვლილებებია გასატარებელი მუნიციპალიტეტში მისი დაკვირვებით და რა ძალისხმევაა საჭირო ამ ცვლილებებისთვის? – თედო თავდგირიძე ამ და სხვა საკითხებზე „ბათუმელებთან“ საუბრობს.

• თედო, რატომ გადაწყვიტეთ საკრებულოში გეყარათ კენჭი?

საკრებულოში ყოფნა ჩემი თვითმიზანი არაა, ეს უბრალოდ ცვლილებების შესაძლებლობაა. პროტესტი გიჩნდება და რეალობის შეცვლა გინდება მხოლოდ მაშინ, როცა ჩაგვრა გვაქვს გამოვლილი.

როგორც ბევრი ბავშვისთვის, ჩემთვისაც სპორტი იყო მთავარი ოცნება, მაგრამ ქალაქელი ბავშვებისგან განსხვავებით სოფელი ბევრ რამესაა მოკლებული: სასპორტო სკოლებს, მოედნებს, ბიბლიოთეკებს. წლებია ეს მაწუხებდა, როგორც ახალგაზრდას.

სახელმწიფომ უნდა შეუწყოს ხელი ყველა ადამიანს განავითაროს საკუთარი შესაძლებლობები. მიმაჩნია, რომ სახელმწიფოს დამოკიდებულება ხალხის მიმართ გულგრილია.

ვთვლი, რომ პოლიტიკა იდეების განხორციელების საშუალებაა, ამიტომ გადავწყვიტე კენჭი მეყარა. ბევრი ჩემხელა ახალგაზრდა დაკომპლექსებულია პროპაგანდით, რომ წინა ხელისუფლება საშინელი იყო და ამ თემით იფარება რეალური პრობლემები, რისგანაც თვალის არიდებას ვცდილობთ.

პატარა ვიყავი, როცა საარჩევნო კამპანიისას პოლიტიკოსები მოდიოდნენ პიჯაკებით, მზაკვრული ღიმილით ატარებდნენ საარჩევნო კამპანიას და ბავშვიც ვგრძნობდი, რომ იტყუებოდნენ.

• ხელისუფლებისგან შექმნილ რა მდგომარეობას წაწყდომიხართ, რამაც პრობლემები შეუქმნა თქვენს თემს და კრიტიკულად განგაწყოთ?

ვფიქრობ, ეს არის გულგრილობა. ხელისუფლების გულგრილობა ხალხის მიმართ.  ჩემი მთავარი მიზანია განვითარებისთვის საჭირო გარემო შევუქმნათ სოფლად ახალგაზრდებს. ზემო აჭარაში არც ინტერნეტი არ იჭერს, არც ბიბლიოთეკებია, არც სპორტული დარბაზები და საფეხბურთო მოედნები.

ყველას უნდა ჰქონდეს ახალი წიგნებით სავსე, თანამედროვე ბიბლიოთეკასა და ინტერნეტზე წვდომა, გლობალურ მსოფლიო პროცესებში სოფლებსაც უნდა შეეძლოთ ჩართვა.

მაქსიმალურად ღია და გახსნილია პარტია, რომელსაც წარმოვადგენ. ოპოზიციური პარტიიდან ვიქნები საკრებულოში და ეს ჩემთვის თავისუფლების გარანტი იქნება. არავინ მიკრძალავს კრიტიკული აზრის გამოთქმას და ეს ჩემთვის ძალიან მნიშვნელოვანია.

• სოფელ შუბნის და, ასევე, შუახევის მუნიციპალიტეტის სამი მთავარი პრობლემა რა არის თქვენი დაკვირვებით?

ეს არის ჯანსაღი ცხოვრების წესის არქონაა, ინფრასტრუქტურის არარსებობა, თანამედროვე, ახალი წიგნებით აღჭურვილი ბიბლიოთეკებიც კი არ გვაქვს. საჯარო სკოლის ბიბლიოთეკები ძველი, საბჭოური წიგნებითაა ძირითადად წარმოდგენილი.

როცა ახალი თაობაც იმას კითხულობს, რასაც 40 წლის წინანდელი თაობა კითხულობდა, საზოგადოება ვერ განვითარდება. ჩვენ გვაქვს ერთი მხრივ ფურცელზე არსებული საქართველო და მეორეა რეალობა – რეალური საქართველო.

თუ საზოგადოების განვითარება გვსურს, პიროვნულად, თითოეულ მოქალაქეს უნდა მივცეთ შესაძლებლობებისამებრ განმავითარებელი, მხარდამჭერი გარემო.

მესამე პრობლემაა ფუნქციადაკარგული თვითმმართველობა შუახევში. კოსტუმიანი ბიძები როცა იგებენ არჩევნებს და შედიან საკრებულოში, არ მოაქვთ ცვლილებები, სხედან საკრებულოში და ეს მათთვის მხოლოდ ხელფასის წყაროა. თვითმმართველობაში არ არის ბევრი ახალგაზრდა და შესაბამისად პროცესს „დრაივი“ აკლია.

• ბიბლიოთეკების არქონა თქვენთვის პირადადაა პრობლემა თუ არის ხალხი, ვინც ითხოვს ბიბლიოთეკებს, ახალ წიგნებს და მაინც არ არის ეს რესურსი ხელმისაწვდომი?

კი, ასეა. უნდა ხალხს ახალი წიგნები და არ აქვთ. მთელი სტუდენტობა და მოსწავლეები ჩართულები იყვნენ ონლაინსწავლებაში, 8 თვით იკეტება ზამთრობით ზემო აჭარა, რა უნდა აკეთოს მთელი ამ ხნის განმავლობაში ხალხმა?

პირადად მეც მქონდა პრობლემა, ვერ ვახერხებდი სწავლის პროცესში ნორმალურად ჩართვას, ჯერ კიდევ სტუდენტი ვარ, მეოთხეკურსელი. არც ბიბლიოთეკებია ხელმისაწვდომი, არც ინტერნეტი და შესაბამისად მედია. ზემო აჭარის სოფლები მთლიანად ვაკუუმში ექცევა. განვითარება ინფორმაციაზე წვდომის გარეშე წარმოუდგენელია.

ბიბლიოთეკებს, სპორტულ მოედნებს, ჩემპიონატებს, შეჯიბრებებს ვფიქრობ ადგილობრივი მერია და საკრებულო უნდა აფინანსებდეს  ბიუჯეტიდან.

• არსად არ არის შუახევში საფეხბურთო მოედნები და სპორტული დარბაზები?

შუბანსა და კიდევ ერთ სოფელში გაიხსნა სპორტდარბაზი მხოლოდ, საფეხბურთო მოედნებიც არ არის. მთლიანად ზემო აჭარა დემოგრაფიული კატასტროფის წინაშეა.

ბარში მიდის ახალგაზრდების უმრავლესობა საცხოვრებლად, იცლება სოფლები. ახალგაზრდების უმრავლესობა აღარ ბრუნდება, რადგან სოფელში არ არის დასაქმების და განვითარების შესაძლებლობა. სოფელი მიტოვებული რჩება.

• ხშირად, როცა ახალგაზრდები პოლიტიკით ინტერესდებიან, ძირითადად მმართველ პარტიაში ერთიანდებიან. თქვენი აზრით, ეს არის თუ არა პრობლემა და რატომ?

მმართველი პარტია არ არის ორიენტირებული და მოტივირებული, რომ ახალგაზრდები იყვნენ ჩართული პროცესში. დამოუკიდებლადაც შეიძლებოდა კენჭისყრა, მაგრამ, როგორც გითხარით, „ნაციონალური მოძრაობა“, ჩემი აზრით, ყველაზე ღია მოთამაშეა ოპოზიციურ პარტიებს შორის. გამოკვეთილი აქვს იდეოლოგია, შეხედულებები და ამიტომ გადავწყვიტე მათგან მეყარა კენჭი.

• თუ ვერ აღმოჩნდით საკრებულოში, დატოვებთ სოფელს? ვერგამარჯვების შემთხვევაში სამოქმედო რაიმე გეგმა გაქვთ?

რა თქმა უნდა მაქვს. სოფელს არ დავტოვებ, უბრალოდ, ბათუმში ვსწავლობ, ვაგრძელებ სწავლას, მაგისტრატურას და დოქტორანტურასაც დავამთავრებ ალბათ. ადგილობრივ პოლიტიკაში რამდენად ჩავერთვები, არჩევნები გვაჩვენებს.

• სად სწავლობთ, რას საქმიანობდით აქამდე, სანამ საკრებულოში გადაწყვეტდით კენჭისყრას?

დავამთავრე შუახევის სოფელ შუბნის საჯარო სკოლა, იმავე წელს ჩავაბარე ბსუ-ში ჰუმანიტარული მეცნიერებების ფაკულტეტზე, ისტორიის სპეციალობაზე. სკოლიდანვე კარგად ვსწავლობდი. წარჩინებით ვსწავლობდი უნივერსიტეტშიც, ვიყავი სტიპენდიანტი სტუდენტი და დღემდე ამ უნივერსიტეტში ვსწავლობ, მეოთხე კურსზე ვარ, ვაპირებ გავაგრძელო სწავლა ამავე უნივერსიტეტში.

მაქსიმალურად მოტივირებული ვარ მეტი ცოდნა და გამოცდილება შევიძინო და ყველა ასპარეზზე მიცდია საკუთარი თავი. სპორტით ვიყავი დაკავებული და დღემდე არ ვწყვეტ სპორტულ ცხოვრებას, მითამაშია ფრენბურთი პროფესიულ დონეზე, ვთამაშობდი ფეხბურთს მოყვარულთა ლიგაში, ასევე კარგად ვთამაშობ მაგიდის ჩოგბურთს და პირველი ადგილიც მიმიღია საზაფხულო ბანაკში, ვიყავი მედიაპროექტ „ეტალონში“ პირველი ადგილის მფლობელი, სხვა ბევრ აქტივობებშიც ვყოფილვარ, მონაწილეობას ვიღებ სტუდენტურ სამეცნიერო კონფერენციებში.

ავტორი: ანა ძნელაძე

დღეს ინფორმაცია და დეზინფორმაცია სოციალური ქსელის მეშვეობით ყველა ასაკის ადამიანამდე მიდის, მათ შორის მოსწავლეებთანაც. სკოლებში ამ თემას ყველაზე ხშირად სამოქალაქო განათლების გაკვეთილებზე განიხილავენ. რა დრო ეთმობა დეზინფორმაციისა და სანდო ინფორმაციის გარჩევას სკოლებში? – ამ თემაზე სამოქალაქო განათლების მასწავლებელს, თამარ ბაუჟაძეს ვესაუბრეთ.

• რა არის დეზინფორმაცია? როგორ განმარტავთ მას?

მარტივად – ეს არის ცრუ ინფორმაცია, რომელსაც გამიზნულად ავრცელებენ და რომელიც ვიღაცის ინტერესის სფეროს წარმოადგენს, თუმცა ძალიან მავნებელია ბევრი ჩვენგანისთვის.

•  თქვენი დაკვირვებით, რამდენად ხშირად ექცევიან მოსწავლეები დეზინფორმაციის გავლენის ქვეშ?

ძალიან ხშირად, ყოველდღიურად. ავიღოთ სოციალური ქსელი – იმდენად ბევრ ინფორმაციას ვეჩეხებით, რომ ბუნებრივია, ყველას არ ვკითხულობთ, მაგრამ საკმარისია სათაურიც კი. ინფორმაციის გავლენა იმდენად დიდია, რომ შეიძლება სრულიად დამანგრევლად იმოქმედოს ადამიანის ფსიქიკაზე.

ინფორმაცია მიდის აბსოლუტურად ყველასთან, განსაკუთრებით მაშინ, როდესაც თანხას იხდიან და რეკლამით უშვებენ. ვიღაცები დეზინფორმაციას გამიზნულადაც კი ავრცელებენ: ძალაუფლების გასამყარებლად ან პოპულარობის მოსაპოვებლად…

სამწუხაროდ, ბავშვები კი არა, უფროსებიც ვართ დეზინფორმაციის გავლენის ქვეშ, მიუხედავად იმისა, რომ ვიცით, როგორ უნდა გადავამოწმოთ. ამისგან დაცული არავინ არაა.

• თუ შეგიძლიათ, თქვენი მოსწავლეების მაგალითზე გვითხრათ, რა სახის დეზინფორმაციას აწყდებიან ყველაზე ხშირად ისინი?

მიმდინარე აქტუალურ საკითხებზე, იმაზე, რა მითებიც ტრიალებს უკვე საზოგადოებაში.

მახსოვს, ერთი მოსწავლე მოვიდა აჟიტირებული, გაოგნებული და გაბრაზებული იყო. დავინტერესდი რა მოხდა და აღმოჩნდა, რომ მის საყვარელ მსახიობს ფეიკნიუსები დაუწერეს და ამაზე იყო გაბრაზებული. მე ამ მსახიობის სახელი და გვარიც არ ვიცოდი, მაგრამ აღმოჩნდა, რომ მთელმა კლასმა იცოდა და სერიოზული განხილვა მიდიოდა.

მოსწავლეებისთვის სერიოზული საკითხები რაც არის, რაც მათ აინტერესებთ, აბსოლუტურად ყველაფერი არის ხელმისაწვდომი, თან ერთ საკითხზე იმდენად განსხვავებული და ბევრი ინფორმაციის და დეზინფორმაციის მოსმენა უწევთ, რომ მიუხედავად იმისა, რომ ვასწავლით კრიტიკულად აზროვნებას და ინფორმაციის გადამოწმებას, მაინც უჭირთ.

• როგორ ფიქრობთ, რა სახის საფრთხე შეიძლება შეუქმნას მოზარდს დეზინფორმაციამ?

მაგალითად, თუ ბავშვს აინტერესებს ძალადობა ან სექსუალური შევიწროება და დაიწყებს ამ საკითხების ძიებას, შეიძლება ისეთ დეზინფორმაციას წააწყდეს, ყვითელი პრესის დონეზე განხილულ ფეიკნიუსს, რომ შესაძლოა დიდი ზიანი მიადგეს მის ფსიქიკას და მერე საკმაოდ დიდი დრო დასჭირდეს რეაბილიტაციისათვის. ესეც – თუ გავიგეთ და საკუთარ თავში არ ჩაიკეტა.

ასევე, არის შემთხვევა, როცა ვიღაც იტყუება, რომ მატერიალურად უჭირს და შეიძლება თანხა სულ სხვა რამისთვის, მაგალითად ალკოჰოლის საყიდლად უნდა. ამ დროს მოსწავლე ფიქრობს, რომ შეიძლება სხვამაც მოატყუოს და სხვა დროს უკვე შეიძლება დაეჭვდეს – იქცევა თუ არა სწორად ამ ტიპის დახმარების გაწევით. სოციალურ ქსელში ჭირს გარჩევა, ვის ნამდვილად სჭირდება დახმარება და ვის არა.

• როგორ ფიქრობთ, სამოქალაქო განათლება სკოლაში რამდენად განიხილავს ამ თემას, რამდენად მოიცავს?

გულწრფელად რომ გიპასუხოთ, ეს იმდენად მნიშვნელოვანი საკითხია, რომ ამაზე საუბარი ყველა საგნის პედაგოგს უნდა შეეძლოს, რადგან ყოველდღიური ცხოვრების ნაწილია.

რაც შეეხება სამოქალაქო განათლებას, მე-7 კლასის პროგრამის ფარგლებში შედის მცირე დოზით, როდესაც განვიხილავთ მედიას და ხელისუფლებას, ჩვენ ვსაუბრობთ რა არის დეზინფორმაცია, რა არის მედიაჩეკერი, როგორ შეგვიძლია გადავამოწმოთ წყარო და რა გავლენა შეიძლება მოახდინოს სოცმედიაში ჭარბმა ინფორმაციამ.

• როგორც მივხვდი, მეშვიდე კლასის შემდგომ არ ხდება ამ თემების განხილვა…

მერვე კლასშიც განიხილება, თუმცა მცირე დოზით, მხოლოდ ერთი კარია დათმობილი. მეცხრე და მეათე კლასში თემატურად არ არის, თუმცა, ბუნებრივია არავინ არ გვზღუდავს და ამაზე საუბარს არ კრძალავს, თუ ჩვენ ვხედავთ, რომ საჭიროება მოითხოვს.

• როგორ ფიქრობთ, მეშვიდე და მერვე კლასში სრულყოფილად ხდება ამ თემის განხილვა ?

სრულყოფილება ამ თემაში არ არსებობს, მაგრამ ეს არავითარ შემთხვევაში არ ნიშნავს „გადარბენილ“ თემას. შეიძლება ეს ერთი თვე გრძელდებოდეს, შეიძლება – ერთი სემესტრიც, სხვადასხვა საკითხთან კომბინაციაში, საჭიროებიდან გამომდინარე.

მაგრამ ერთია როცა ვასწავლით და მეორე მომენტია, როცა პრაქტიკაში ხდება ცოდნის გამოყენება.

ძალიან ვცდილობ მოსწავლეებამდე მივიტანო ყველა საჭირო ინფორმაცია, რაც მათ დაეხმარებათ გადამოწმებაში, თუ ეტყვი მოსწავლეებს – „მოდი, აბა, ყალბი ინფორმაცია მოიძიე“ – ეგრევე იპოვიან, მაგრამ თავისით, დამოუკიდებლად თუ გაახსენდებათ და გამოიყენებენ, ძალიან საინტერესოა. მეეჭვება, რადგან არასდროს არ უთქვამთ, აი, გადავამოწმე და მცდარი აღმოჩნდაო.

ბევრი მუშაობა გვჭირდება ჯერ კიდევ.

• როგორ ფიქრობთ, განათლება არის თუ არა ერთადერთი პრევენცია დეზინფორმაციის დასაძლევად?

ერთადერთი და არაფერი სხვა. ყალბ ინფორმაციას ჩვენ მხოლოდ განათლებით შეგვიძლია გავუმკლავდეთ.

• 21 საუკუნეში ინფორმაციის და დეზინფორმაციის გავრცელება ძალიან სწრაფად ხდება, როგორ უნდა დაიცვას ამისგან მოზარდმა, სკოლის მოსწავლემ თავი?

პირველი და ძალიან ძალიან მნიშვნელოვანი – სათაურებს ნუ კითხულობთ მხოლოდ, წაიკითხეთ შიგთავსი, სტატია, ახალი ამბავი. სათაური მარკეტინგული ხრიკების ნაწილია.

მეორე – დააკვირდით ვინ ავრცელებს ამ ინფორმაციას, ვისწავლოთ გარჩევა, რომელია პროფესიონალი მედია.

მესამე – ჩვენ გვჭირდება სწორი მართვა იმის, რასაც ვკითხულობთ. ჩემი სოციალური ქსელი რომ გაგიხსნათ, შეიძლება 1000-მდე ინფორმაცია გვაჩვენოს, თუმცა ეს არ ნიშნავს, რომ თითოეულს მათგანს წავიკითხავ.

დღეს დეზინფორმაციის გავრცელების წყარო არა მარტო სოციალურ მედიაში არსებული გვერდებია, დეზინფორმაცია ნებისმიერმა ადამიანმა შეიძლება გაავრცელოს, თუნდაც უნებლიეთ.

მითების სამყაროში ვცხოვრობთ, მაგრამ განა ადამიანებს ამ მითების გავრცელების მხოლოდ ცუდი მოტივი აქვთ, უბრალოდ ხანდახან მათაც არ იციან როგორ გადაამოწმონ ინფორმაცია, ვის ენდონ. ადამიანები ენდობიან მათთვის ავტორიტეტულ პირებს და ნებისმიერი შეიძლება შეცდეს. უნდა ვისწავლოთ მოსმენა და კითხვა.

_______________________

მასალა მომზადებულია „მედიაწიგნიერების საკვირაო სკოლის“ ფარგლებში, რომელსაც „ბათუმელები“ ახორციელებს „ამერიკულ კუთხესთან“ ერთად. მასალაში გამოთქმული მოსაზრებები შესაძლოა არ გამოხატავდეს დონორი ორგანიზაციის შეხედულებებს.

საქართველოს ჯანდაცვის მინისტრის მოადგილის, თამარ გაბუნიას განცხადებით, კორონავირუსის ახალი ტალღა საქართველოში რამდენიმე თვეში, ახალი წლის შემდეგ არის მოსალოდნელი. ამის შესახებ მან დღეს, 9 სექტემბერს ისაუბრა ჟურნალისტებთან.

„ვერასდროს ვერ გამოვრიცხავთ სამომავლოდ რის მოლოდინი უნდა გვქონდეს, შესაძლებელია კიდევ სხვა ტალღაც იყოს, ამისთვის უნდა ვიყოთ მაქსიმალურად მომზადებული.

…ეს არ იქნება მოკლე მომავალში, მაგრამ სავარაუდოდ, მომავალი წლისთვის უნდა ველოდოთ ახალ ტალღას. ნოემბრის დასაწყისს ვერ ვიტყოდი, უფრო ახალი წლის შემდეგ,“ – უთხრა ჟურნალისტებს მინისტრის მოადგილემ.

მისივე თქმით, ახალი ტალღა განსაკუთრებით საშიში იქნება 60 წელს გადაცილებული მოსახლეობისთვის, ამიტომაც საჭიროა ამ ასაკობრივი ჯგუფის მიზნობრივი ვაქცინაცია კორონავირუსზე:

„შემდეგი ტალღა იქნება რეალურად კრიტიკულად საშიში ამ ასაკობრივი ჯგუფისთვის, თუ ჩვენ ახლა არ მივაღწიეთ მათ ვაქცინაციას,“ – აღნიშნა თამარ გაბუნიამ.

დღეს, 9 სექტემბერს, საქართველოში კორონავირუსით გარდაცვლილთა რაოდენობამ ჯამში 8 ათასს გადააჭარბა.

2021 წლის 6 აგვისტოს საქართველოში კოვიდით გარდაცვლილთა რაოდენობა 6016 იყო, დღევანდელი, 9 სექტემბრის მონაცემებით კი, საქართველოში კოვიდით გარდაცვლილია 8035 ადამიანი, შესაბამისად, 35 დღეში კოვიდით გარდაიცვალა 2016 პაციენტი.

ამავე პერიოდში [6 აგვისტოდან 9 სექტემბრამდე] საქართველოში კოვიდით დაინფიცირდა 132 595 ადამიანი.

საქართველოში კორონავირუსის პანდემიის გავრცელებიდან დღემდე ინფიცირდა 572 948 ადამიანი.

კოვიდის პირველი შემთხვევა საქართველოში 2020 წლის 26 თებერვალს დადასტურდა.

რაც შეეხება მსოფლიო სტატისტიკას, კორონავირუსის პანდემიის დაწყებიდან დღემდე კოვიდის დიაგნოზით 4 596 463 ადამიანი გარდაიცვალა.

_______________

ფოტოზე: რესპუბლიკური საავადმყოფოს ექთანი. წყარო: nplg.gov.ge, ციფრული ფოტოგამოფენა„ქართველი ექთნები ეპიდემიის წინა ხაზზე“

9 სექტემბრის მონაცემებით, ბოლო 24 საათში აჭარაში კოვიდის 249 ახალი შემთხვევა დადასტურდა.

დღეის მონაცემებით, აჭარის კოვიდკლინიკებში 721 პაციენტს მკურნალობენ კოვიდზე, მათგან 32 ხელოვნურ სუნთქვაზეა.

რეგიონში კოვიდსასტუმროშია 593 ადამიანი.

9 სექტემბრის მონაცემებით, საქართველოში კორონავირუსის 2455 ახალი შემთხვევა დადასტურდა.

გასულ დღე-ღამეში საქართველოში 58 ადამიანი გარდაიცვალა კოვიდით.

8 სექტემბრის მდგომარეობით, დადებითობის მაჩვენებელი 7 დღის მანძილზე არის – 7.69%.

გიორგი გახარია ტელეკომპანია „იმედს“ მიმართავს და ცალმხრივი ინფორმაციის გავრცელებაში ადანაშაულებს.

„მივმართავ ტელეკომპანია „იმედს“, თქვენს ტელევიზიას ჯერ „ნაციონალური მოძრაობა“ აიძულებდა და ახლა ორგანიზაცია „ოცნება“ გაიძულებთ, „მოდელირებული ქრონიკებით“, ცალმხრივი ინფორმაციით ასაზრდოოთ საკუთარი მაყურებელი!

ერთია, რომ არ აშუქებთ ჩვენს აქტივობებს, არც ერთ ჩვენს ღონისძიებას და საკუთარ მაყურებელს უმალავთ რეალობას, მეორე კი, რომ ყველას იწვევთ ეთერში, ყველას ალაპარაკებთ ჩვენზე, ალანძღინებთ ჩვენს თავს, ჩვენ კი, პასუხის საშუალებასაც არ გვაძლევთ!

ამიტომ, კიდევ ერთხელ მოგმართავთ, არათუ მზად ვარ, არამედ, მოვითხოვ, თქვენს არხზე ნებისმიერ გადაცემაში პირდაპირ ეთერს!“ – წერს გიორგი გახარია ფეისბუქზე.

„ბათუმის წყლის“ ინფორმაციით, ბათუმში ხვალ, 9 სექტემბერს, 14:30 საათიდან 22:30 საათამდე, წყლის მიწოდება შეწყდება შემდეგ მისამართებზე:

სამების ქუჩა და ჩიხები, ფანასკერტელ-ციციშვილის ქუჩა, აკაკი შანიძის ქუჩა, ფრიდონ ხალვაშის ქუჩა (#304-374).

წყლის შეწყვეტის მიზეზი გეგმური სარეაბილიტაციო სამუშაოებია.