იმ პირებს, რომლებიც დარეგისტრირებული იყვნენ 2021 წლის უმაღლეს პროფესიულ საგანმანათლებლო პროგრამებზე, მაგრამ ვერ შეძლეს ტესტირებაზე გასვლა შემდეგი მიზეზებით:
- „ოკუპირებული ტერიტორიების შესახებ“ საქართველოს კანონის მე-2 მუხლის „ა“ და „ბ“ ქვეპუნქტებით გათვალისწინებულ ტერიტორიებზე;
- საკარანტინო სივრცეში/თვითიზოლაციაში;
- საკარანტინო ზონაში;
- ქვეყნის ფარგლებს გარეთ;
- სამკურნალო დაწესებულებაში/იზოლაციაში ახალი კორონავირუსის (COVID-19)-ის დადასტურების გამო
შესაძლებლობა აქვთ, 15 სექტემბრიდან 25 სექტემბრის ჩათვლით, დასაბუთებული განცხადებით მიმართონ განათლების სამინისტროს და გავიდნენ ზოგადი უნარებისა და ქიმია-ბიოლოგიის ტესტირებაზე.
განათლების სამინისტროს განცხადებით, აპლიკანტს თან უნდა ჰქონდეს თანდართული მტკიცებულება/დოკუმენტი, რომელიც დაადასტურებს ზემოჩამოთვლილთაგან ერთ-ერთ გარემოებას.
„ხოლო იმ პირებმა, რომლებიც რეგისტრირებულები არიან საბაზო და საშუალო პროფესიულ პროგრამებზე და მონაწილეობას იღებენ პროფესიული საგანმანათლებლო დაწესებულების მიერ ორგანიზებულ შიდა შერჩევებში (მოტივაციური გასაუბრება, შემოქმედებითი და სპეციალური ტურები, დაწესებულების შიდა ტესტირება, პრაქტიკული სამუშაო შემთხვევები, ასევე შეფასებისა და გამოცდების ეროვნული ცენტრის მიერ ორგანიზებული საბაზო ზოგადი უნარების ტესტი და ა.შ), ზემოთ აღნიშნული გარემოებების არსებობის შემთხვევაში, განცხადებით უნდა მიმართონ შესაბამის საგანმანათლებლო დაწესებულებას,“- აცხადებს განათლების სამინისტრო.
