კორონავირუსზე ვაქცინაციის პროცესში სოფლის ექიმები ჩაერთვებიან, გამსვლელი ბრიგადები კი ცენტრებიდან მოშორებულ სოფლებში ივლიან.
გამსვლელმა ბრიგადებმა ამჯერად მორიგი ვაქცინაცია ხულოს სოფლებში – რიყეთსა და დიოკნისში ჩაატარეს. იმუნიზაციის პროცესს აჭარის ჯანდაცვის მინისტრი ნინო ნიჟარაძეც გაეცნო.
აჭარის ჯანდაცვის მინისტრის ინფორმაციით, ამ დრომდე სულ 17-მდე სოფელში ჩატარდა 500-ზე მეტი აცრა.
„ეს ტემპი არ არის საკმარისი და მიზნად გვაქვს თითოეული სოფლის ამბულატორიის ვაქცინაციაში ჩართვა.
პროცესი უკვე დაწყებულია, 60-ვე უბანი შეუერთდება იმუნიზაციის პროცესს და პრაქტიკულად მთელი მუნიციპალიტეტები, სოფლების ჩათვლით, უნდა აიცრას სოფლის ექიმის ოპერირების შედეგად.
ჩვენ მოვუწოდებთ მოსახლეობას უფრო მეტი აქტიურობისაკენ. ვალდებულები ვართ შემოდგომის სეზონს დაბალი რისკებით შევხვდეთ,“ – აღნიშნა ნინო ნიჟარაძემ.
აჭარის სოფლებში შესაძლებელია როგორც „ფაიზერის“, ისე ჩინური ვაქცინებით – „სინოფარმითა“ და „სინოვაკით“ აცრა.
ბოლო მონაცემებით აჭარის რეგიონში ამ დროისთვის ორი დოზით აცრილია 66 550 ადამიანი, მოსახლეობის 24.6 პროცენტი.