Batumelebi | ბულვარში „ამბასადორი“ უნდა დაინგრეს – კიდევ რას დაუჭერდა მხარს საკრებულოში ირაკლი კუპრაძე ბულვარში „ამბასადორი“ უნდა დაინგრეს – კიდევ რას დაუჭერდა მხარს საკრებულოში ირაკლი კუპრაძე – Batumelebi
RU | GE  

ბულვარში „ამბასადორი“ უნდა დაინგრეს – კიდევ რას დაუჭერდა მხარს საკრებულოში ირაკლი კუპრაძე

პირველ რიგში ააიპ-ებისა და სხვა მუნიციპალური ორგანიზაციების გაუქმებას აპირებს „ლელოს“ წევრი ირაკლი კუპრაძე, თუკი მოსახლეობის ნდობას მიიღებს 2 ოქტომბრის არჩევნებზე და ბათუმის საკრებულოში შევა. იგი მიიჩნევს, რომ მუნიციპალური ორგანიზაციებს სხვადასხვა ხელისუფლება მხოლოდ პარტიული აქტივისტების დასასაქმებლად იყენებს.

კიდევ რის შეცვლას აპირებს „ლელოს“ საარჩევნო სიის პირველი ნომერი ბათუმის საკრებულოში?

  • პირველ რიგში, მოგვიყევით, როგორ მოხერხდა ბათუმში შეთანხმება ოპოზიციის საერთო კანდიდატებზე, რა არის ერთიანი კანდიდატების უპირატესობა და რატომ ვერ მოხერხდა ეს სხვა რეგიონებში? 

ბათუმსა და მთლიანად აჭარის რეგიონში შედგა შეთანხმება ოპოზიციას შორის მერების კანდიდატურებზე, ასევე ვიცე-მერებზე, რიგ შემთხვევაში – მაჟორიტარებზე, საკრებულოს თავმჯდომარეებზე.

ეს არის მნიშვნელოვანი, რადგან ამ შეთანხმებით საზოგადოებას ვეუბნებით, რომ ოპოზიციურ სპექტრს, მიუხედავად განსხვავებებისა, შეგვწევს ძალა, კოალიციურად ვმართოთ ქალაქი, კოალიციურად ვიმოქმედოთ წინასაარჩევნო კამპანიის ჩატარების დროს.

  • თუმცა გახარიას პარტიას, ასევე „გირჩს“ და „პატრიოტთა ალიანსს“ ჰყავს ცალკე კანდიდატები. 

ეს არის საგამონაკლისო წესი, თუმცა სამივე არის უშანსო. მათ აქვთ დამოუკიდებელი ხაზი, რასაც მე, როგორც პოლიტიკური აქტორი, პატივს ვცემ.

  • თქვენ რატომ გაქვთ მოგების შანსი?

ყველა პოლიტიკური აქტორი,  რომელსაც გააჩნია ძალა, ძალისხმევა, საარჩევნო გამოცდილება და წინა არჩევნების შედეგებიც ამაზე მიუთითებს, ქმნის გაერთიანებულ ფლანგს მუნიციპალური არჩევნებისთვის.

  • თუკი თქვენ მოხვდით საკრებულოში, რა იქნება პირველი რიგის ამოცანა? რაზე ისაუბრებდით, ახლა რომ საკრებულოში იყოთ? 

პირველ რიგში, ვისაუბრებდი გაბერილ კადრებზე. რა თქმა უნდა, ნებისმიერი ტიპის დასაქმება არის ჩემთვის ძალიან მნიშვნელოვანი. შრომა არის ადამიანის უფლება, სამუშაო ადგილებს უნდა ქმნიდეს როგორც სახელმწიფო, ისე კერძო სექტორი, თუმცა ვხედავ, რომ საჯარო სექტორში დასაქმება უკვე დაკავშირებულია პარტიულ აქტივიზმთან, სადაც პროფესიონალი, კვალიფიციური კადრებისთვის აღარ რჩება სივრცე.

ჩემ გარშემო უამრავი ახალგაზრდაა, რომლებიც გადადიან კერძო სექტორში ან ტოვებენ ბათუმს, საერთოდ მიდიან უცხოეთში, რადგან აქვთ უსამართლობის და უპერსპექტივობის განცდა. მათი ჩაბმა სახელმწიფო საქმიანობაში არის პატრიოტიზმთან დაკავშირებული. ეს დღეს წარმოუდგენელია, მათ არ ეძლევათ შესაძლებლობა ემსახურონ იდეებს, ღირებულებებს.

ჩვენთან კორუფცია და ნეპოტიზმი იქცა მრავალი წელი სახელმწიფო უწყების დამახასიათებელ ნიშნად.

  • ბათუმის მუნიციპალიტეტში კორუფციის ან ნეპოტიზმის რა ფაქტის შესახებ იცით? 

ჩემთვის კორუფცია არსებობს როგორც ინდივიდუალურ საქმეებში, პერსონების დონეზე, ასევე არსებობს კორუფციული სქემები, რომლებიც დაკანონებულია. იგივე მშენებლობებზე კოეფიციენტები, ასევე, როცა მშენებელს პარკირებას არ სთხოვ, მწვანე საფარის არარსებობის ტენდენცია – ჩემთვის ეს არის დაკანონებული კორუფცია.

  • თქვენ არ დაუჭერდით მხარს ე.წ. კოეფიციენტს, რომლითაც ბიზნესმენი მშენებლობის სიმაღლეზე იღებს ნებართვას, ბიუჯეტი კი დამატებით შემოსავალს? 

ნებისმიერ საკითხს, რომელიც იქნება დაყენებული ჩემ მიერ, დასჭირდება კოალიციური ხელისუფლების და სხვა დეპუტატების მხარდაჭერა, ეს იქნება შეთანხმებაზე დამოკიდებული.

ჩემი მიდგომა არის ის, რომ ამ ქალაქს სჭირდება ერთიანი ქალაქგეგმარება და განვითარების სტრატეგია, რომელიც მრავალგზის ჩააგდეს ლობისტურმა ჯგუფებმა და იმ დეპუტატებმა, რომლებიც დაკავშირებული არიან სამშენებლო ბიზნესთან.

„ბათუმელებში“ არაერთხელ წამიკითხავს სტატიები, სადაც მკაფიოდ ჩანს დეპუტატებს რა ინტერესი აქვთ ამა თუ იმ მშენებლობაზე. რეალურად ინტერესთა კონფლიქტი ჩანს ამ საქმეებიდან.

ჩემი მხრიდან იქნება მკაცრად დასმული კორუფციის და ნეპოტიზმის საკითხები. ეს არის ჩემთვის კრიტიკულად და ძალიან მნიშვნელოვანი.

  • როგორ წარმოგიდგენიათ, მაგალითად, ბათუმის ბულვარში კერძო მესაკუთრეებს უარი უთხრათ ახალ მშენებლობაზე, როცა „ამბასადორის“ მშენებლობა ბულვარის შესასვლელში თითქმის დასრულდა? 

სასამართლო უნდა იყოს ამ კუთხით დამოუკიდებელი და დადგინდეს, რამდენად კანონიერად გაიცა ნებართვა. ვფიქრობ, ეს უნდა იყოს საჯარო განხილვის საგანი, მერიამ და საკრებულომ უნდა მიიღოს გადაწყვეტილება და საჩვენებლად დაანგრიოს ის შენობა, რომელიც აშენდა უკანონოდ და მოსახლეობის ინტერესების ხარჯზე.

  • დაუჭერდით მხარს ბულვარში აშენებული „ამბასადორის“ დანგრევას? 

კვალიფიციური ადამიანების და იურისტების კონსულტაციების შემდეგ ვფიქრობ, რომ ბათუმის „ამბასადორი“ აშენდა უკანონოდ.

მე რომ ახლა ბათუმის საკრებულოს დარბაზში ვიჯდე და განიხილებოდეს „ამბასადორის“ დანგრევა-არდანგრევის საკითხი, თუნდაც დაზარალდეს სახელმწიფო ბიუჯეტი და ის ადამიანები პასუხისგებაში მიეცნენ, ვინც ეს დანაშაული ჩაიდინა, მივცემდი ხმას, რომ უკანონოდ აშენებული შენობა საჩვენებლად დაინგრეს.

  • პლაჟების მრავალწლიანი იჯარით გასხვისებაზე რას ფიქრობ? 

პლაჟები უნდა გასხვისდეს მხოლოდ იმ პირობით, რომ ხელმისაწვდომი იყოს ნებისმიერი მოქალაქისთვის, იმის მიუხედავად, რას მოაწყობს იქ ბიზნესმენი. საჯარო სივრცის შემოღობვის უფლება არავის აქვს.

  • ბათუმის ბიუჯეტი რაში უნდა დაიხარჯოს, რა იქნებოდა თქვენთვის პრიორიტეტი? 

პირველ რიგში, უნდა ვისაუბროთ სსიპ-ებისადა ააიპ-ების გაუქმებაზე, რომლებიც თითიდან გამოწოვილი მიზეზითაა შექმნილი და საქმესთან არანაირ ბმაში არაა. ჩვენ უნდა ვისაუბროთ ამ მუნიციპალური ორგანიზაციების გაუქმებაზე.

ეს იქნება მტკივნეული, მაგრამ უნდა ვიცოდეთ, რომ ნებისმიერი თეთრი, რომელიც იხარჯება ბიუჯეტიდან, უნდა ემსახურებოდეს მხოლოდ და მხოლოდ საქმეს. ამ ფინანსური რესურსის გამოთავისუფლებით შესაძლებელი იქნება ახალ პროექტებზე საუბარი, მაგალითად, იგივე წყლით მომარაგება შემოერთებულ ტერიტორიებზე. ეს ხალხი უკვე ორჯერ გადააგდო „ქართულმა ოცნებამ“ და ახლაც ბათუმის მოსახლეობის ამ ნაწილს აწუხებს წყლის და კანალიზაციის პრობლემა.

  • გაქვთ დათვლილი, რა დაჯდება ეს სამუშაოები და სად ნახავთ ამ ფულს? 

ამის დათვლა შეუძლებელია, რადგან შესრულებული სამუშაოების მონიტორინგი არასდროს არ განხორციელებულა. სამუშაოებს, რომელიც განხორციელდა, ასრულებდნენ „ოცნებასთან“ დაახლოებული კომპანიები და არ სრულდებოდა ხარისხიანად… არაერთხელ გვინახავს და ერთი თვის წინაც ვნახეთ, როგორ დაიტბორა ქუჩები იმ ადგილებშიც, სადაც რეაბილიტაცია ჩატარდა.

კვალიფიციურ სპეციალისტებს უნდა ვკითხოთ, რა მდგომარეობაშია ჩვენი სისტემა. ამის შემდეგ გვეცოდინება, რა არის გასაკეთებელი და რა ფინანსებია ამისთვის საჭირო. ბოლო პერიოდში „ქართულმა ოცნებამ“ საერთოდ უარი თქვა კვლევებსა და მეცნიერებაზე. ვხედავთ, რომ, მაგალითად, გაშენდა სკვერი, სადაც მხოლოდ პატარ-პატარა ბუჩქებია და თაკარა მზე. თუნდაც შინდისის სკვერი ავიღოთ ან სხვები. ამ პროცესში ისინი არ ეყრდნობიან კვალიფიციურ ადამიანებს.

ასევე ვფიქრობ, რომ კულტურა უნდა გათავისუფლდეს მუნიციპალურ დონეზე პოლიტიკური გავლენებისგან. კულტურის მუშაკები არიან უბრალოდ დატერორებული და დაშინებულები, მათ აღარანაირი დაფინანსება და ხელშეწყობა აღარ აქვთ სახელმწიფოსგან. კულტურის სფეროში მხოლოდ პარტმუშაკებს და პარტიული ერთგულების დამტკიცების შემდეგ აქვთ შესაძლებლობა გამართონ ფესტივალები, საგანმანათლებლო პროექტები და ასე შემდეგ. დღეს თეატრისა და მხატვრების სხვადასხვა სივრცის დაპაუზება არის თვალნათლივ დასანახი.

  • მეჩეთზე მინდა გკითხოთ – დაუჭერდით მხარს ახალი მეჩეთის აშენებას, რაზეც ბათუმის მერია წლებია უარს ამბობს იმის მიუხედავად, რომ სასამართლომ ეს დისკრიმინაციულად შეაფასა? 

ხელისუფლებას აქვს ვალდებულება, რომ კომუნიკაცია ჰქონდეს ყველა ჯგუფთან. სასამართლოს მიერ მიღებული გადაწყვეტილება არის ჩემთვის სწორი და სამართლიანი, რადგან იგრძნობა რამდენად დისკრიმინაციულია ბათუმის მერიის მიერ ნათქვამი უარი.

ჩემი აზრით, კანონს ამ მიმართულებით ალტერნატივა არ გააჩნია და უნდა აღსრულდეს სასამართლოს გადაწყვეტილება. ნებისმიერ ხელისუფალს, რომელიც ამ გადაწყვეტილების წინაშე დგას, უნდა ჰქონდეს გამბედაობის და სამართლიანობის უპირობო განცდა.

ჩვენ ვსაუბრობთ ადამიანებზე, ბათუმელებზე, რომლებიც ჩვენ გარშემო ცხოვრობენ. მე ძალიან ბევრი მუსლიმი მეგობარი მყავს, ვისთან ერთადაც ვიზრდებოდი, მეზობელია, კლასელი, კურსელი. ვთვლი, რომ მათი ინტერესი უნდა იყოს ისევე დაფასებული, როგორიც დომინანტური რელიგიის წარმომადგენლების.

ვფიქრობ, რომ მოსახლეობასთან სწორი კომუნიკაციის პირობებში, სადაც არ იქნება დამატებით საგარეო თუ საშინაო სპეკულაციები ამ საკითხებზე, ცალსახა და გარდაუვალი იქნება ის, რომ მუსლიმ თემს ეს შესაძლებლობა ერთობლივად მივცეთ.

ნეტგაზეთის მასალების სხვა გამოცემებში გადაბეჭდვის წესი
ავტორი