Batumelebi | დასჯის ნაცვლად „ალტ-ინფო“ ეროვნული მაუწყებელი გახდა დასჯის ნაცვლად „ალტ-ინფო“ ეროვნული მაუწყებელი გახდა – Batumelebi
RU | GE  

დასჯის ნაცვლად „ალტ-ინფო“ ეროვნული მაუწყებელი გახდა

პასუხის მოთხოვნის და დასჯის ნაცვლად „ალტ-ინფო“ ეროვნული მაუწყებელი გახდა. გადაწყვეტილება დღეს, 9 სექტემბერს, კომუნიკაციების ეროვნულმა კომისიამ მიიღო. დღეიდან „ალტ-ინფო“ ქვეყნის მასშტაბით იმაუწყებლებს, როგორც ფასიანი პაკეტების საშუალებით, ისე უფასო სიგნალით.

კომისიის სხდომაზე არაფერი უთქვამთ იმის შესახებ, რომ „ალტ-ინფო“ ძალადობის ანუ დანაშაულის ჩადენისკენ მოწოდებით არის დაკავებული და უშუალო ორგანიზატორი იყო 5 და 6 ივლისის აქციების დარბევის, სადაც ერთდროულად 53 ჟურნალისტი და ოპერატორი დაშავდა. კომისიის წევრებს არ უხსენებიათ სხვა მედიასაშუალებების მიერ გავრცელებული ფაქტები, რომლითაც ჩანს „ალტ-ინფოს“ წამყვანების თანამონაწილეობა ძალადობისკენ მოწოდებაშიანუ დანაშაულში.

კომისიის დღევანდელ სხდომაზე არც სახალხო დამცველის მიმართვა უხსენებიათ – 6 სექტემბერს ომბუდსმენმა „ალტ-ინფოს“ წამყვანის, ზურაბ მახარაძის წინააღმდეგ სისხლის სამართლებრივი დევნის დაწყების მოთხოვნით მიმართა პროკურატურას.

კომუნიკაციების ეროვნულ კომისიას „ალტ-ინფოს“ ავტორიზაციის მოდიფიცირებისთვის [ასე ერქვა დღეს განსახილველ საკითხს ოფიციალურად] მხოლოდ რამდენიმე წუთი დასჭირდა. რამდენიმე წუთი პრაქტიკულად ნათია კაპანაძეს დაეთმო – კოალიცია „მედია ადვოკატირებისთვის“ კოორდინატორს. მას ერთი კითხვის დასმის უფლება მისცეს.

„მე მაქვს შეკითხვა ბატონ შოთასთან,“ – ნათია კაპანაძემ „ალტ-ინფოს“ დირექტორს, შოთა მარტინენკოს მიმართა, რომელიც ასევე ესწრებოდა დისტანციურ სხდომას: – „თქვენთვის, როგორც მაუწყებლის დირექტორისთვის, საკუთარი თანამშრომლების უსაფრთხოება რამდენად მნიშვნელოვანია?“

„თუ სურს ბატონ შოთას, გიპასუხოთ,“ – „ალტ-ინფოს“ დირექტორს უთხრა კომისიის დირექტორის მოვალეობის შემსრულებელმა, ვახტანგ აბაშიძემ. მან ისიც დასძინა, რომ „არსებით ნაწილში უნდა დავრჩეთ, ჩვენ ამან შესაძლოა სხვა კითხვებში გადაგვიყვანოს“, ანუ კომუნიკაციის კომისიამ სხდომაზე დასმული ერთადერთი შეკითხვა საქმესთან კავშირში ვერ დაინახა.

„მე საერთოდ ვერ ვხვდები ეს კითხვა რა შუაშია იმასთან, რასაც ახლა განვიხილავთ, რატომ უნდა ვუპასუხო ამ კითხვას?“ – იკითხა „ალტ-ინფოს“ დირექტორმა.

დღემდე „ალტ-ინფო“ მხოლოდ „რუსთავის“ და  „ეგრისის“ მულტიპლექსის, ასევე “მაგთიკომის” მეშვეობით მაუწყებლობდა. დღეიდან ამ არხს „სტერეოს“ და „სილქნეტის“ მომხმარებლებიც მიიღებენ.

საკითხის „განხილვა“ ასე დასრულდა.

„კომისიას შეეძლო შეეჩერებინა ეს პროცესი და ეთქვა, რომ არსებობს გარემოებები, რომელიც გავლენას ახდენს გადაწყვეტილებაზე,“-  ამბობს „ბათუმელებთან“ ნათია კაპანაძე, კოალიცია „მედიის ადვოკატირებისთვის“ კოორდინატორი.

ნათია კაპანაძე ყურადღებას ამახვილებს მედიაში გავრცელებულ ვიდეოკადრებზე, რომელიც აჩენს ეჭვებს „ალტ-ინფოს“ მხრიდან ძალადობის მოწოდებასა და მის ორგანიზებაზე.

„ვნახეთ გავრცელებული წყაროებიდან, როგორ მოხდა ძალადობრივი ჯგუფების ფორმირება, ვხედავდით, როგორც აორგანიზებდნენ ძალადობას და მედიაზე თავდასხმას, როგორ მოუწოდებდნენ ღიად ადამიანებს, რომ მონაწილეობა მიეღოთ ძალადობაში,“ – აღნიშნავს ნათია კაპანაძე.

კომისიას რეალურად არ ჰქონდა საფუძველი უარი ეთქვა „ალტ-ინფოსთვის“ მაუწყებლობის გაფართოებაზე, განმარტავს ნათია კაპანაძე, თუმცა თუკი კომისიისთვის მნიშვნელოვანი იქნებოდა სახალხო დამცველის შეფასება, ასევე მედიაში გავრცელებული ფაქტები „ალტ-ინფოს“ მხრიდან ძალადობაში მონაწილეობის შესახებ, შეეძლო პროცესი შეეჩერებინა ფაქტების გამოკვლევის მოტივით.

„თუკი კომისია დაინახავდა დანაშაულის ნიშნებს, უნდა მიემართა საგამოძიებო ორგანოსთვის… საბოლოოდ, მარეგულირებელ კომისიას მხოლოდ იმ შემთხვევაში შეეძლო „ალტ-ინფოსთვის“ უარი ეთქვა ავტორიზაციის მოდიფიცირებაზე, თუკი სასამართლო დაადასტურებდა მაუწყებლის მხრიდან ძალადობის მოწოდებას, ანუ დანაშაულის ჩადენას.

გამოხატვის თავისუფლება გულისხმობს იმას, რომ პატივი უნდა სცე იმ იდეებს, რომლებიც არ მოგწონს, არ არის მისაღები, მაგრამ გამოხატვის თავისუფლებამ არ უნდა დაგეგმოს დანაშაული,“ – აცხადებს ნათია კაპანაძე.

კომუნიკაციების ეროვნულმა კომისიამ „ალტ-ინფოს“ 5, 6 და 12 ივლისის ეთერში გასული გადაცემები შეისწავლა. კომისიის შეფასებით, ამ გადაცემებში იყო უხამსობა და „ალტ-ინფო“ სამართალდამრღვევად მიიჩნია, თუმცა კომისიას არ შეუსწავლია „ალტ-ინფოს“ მუშაობა 5 ივლისამდე, როცა მედიაში გავრცელებული ინფორმაციის მიხედვით, „ალტ-ინფო“ ძალადობისკენ მოწოდებით იყო დაკავებული.

„ეს ძალიან ცუდი ტენდენციაა, როცა მარეგულირებელი ცდილობს მაუწყებლის შინაარსში ჩარევას, მაგრამ თუკი სურდა კომისიას იმის გარკვევა, იკვეთება თუ არა დანაშაულის ნიშნები, მაშინ მას „ალტ-ინფოს“ 5 ივლისამდე ეთერში გასული გადაცემები უნდა ენახა. ცნობილია, რომ კითხვა არსებობს დანაშაულის, ანუ ძალადობის დაგეგმვასა და ძალადობის მოწოდებისკენ,“ – განმარტავს ნათია კაპანაძე.

რას ცვლის კომუნიკაციების კომისიის ახალი გადაწყვეტილება?

„ეს ნიშნავს შერჩევითი სამართლის გაძლიერებას, შერჩევითად ადამიანების დაცვას და შერჩევითად ადამიანების დაზიანებას,“ – გვითხრა ნათია კაპანაძემ.

___

გასულ წელს ფეისბუქმა გააუქმა 50 ანგარიში, 49 გვერდი, 4 ჯგუფი, 8 ღონისძიება და 19 ინსტაგრამ-ანგარიში, რომლებიც დაკავშირებული იყო მედიაორგანიზაცია “ალტ-ინფოსთან”. როგორც “ფეისბუქის” განცხადებაშია ნათქვამი, “ალტ-ინფოსთან” დაკავშირებული გვერდების აქტივობა საქართველოს შიდა აუდიტორიაზე იყო გამიზნული და ამჟამად “ალტ-ინფო” აკრძალულია ფეისბუქზე.

ამავე თემაზე:

FB-მა “ალტ ინფოსთან” და “პატრიოტთა ალიანსთან” დაკავშირებული ანგარიშები წაშალა

ნეტგაზეთის მასალების სხვა გამოცემებში გადაბეჭდვის წესი
ავტორი