„ხელისუფლება არ უნდა იყოს გამიჯნული მოსახლეობისგან“ – გვიპასუხა ოპოზიციური ერთობის ხულოს მერობის კანდიდატმა გოგიტა სოლომონიძემ, როცა ვკითხეთ – როგორ უნდა მოახერხოს ადგილობრივმა მთავრობამ მოსახლეობის აქტიურად ჩართვა გადაწყვეტილებების მიღების პროცესში?
გოგიტა სოლომონიძეს პოლიტიკური წარსული პრაქტიკულად არ აქვს, მერობის კანდიდატობამდე ის აქტიურად ჩნდებოდა ბათუმის „თავისუფლების კვარტალში“. გოგიტას საზღვაო აკადემია აქვს დამთავრებული.
რა ხედვებით და დაპირებით აპირებს გოგიტა სოლომონიძე არჩევნების მოგებას? – „ბათუმელებმა“ მას რამდენიმე კითხვა დაუსვა.
- თქვენი აზრით, რა არის ხულოს მთავარი პრობლემა და როგორ აპირებთ თქვენ მის მოგვარებას?
ყველაზე დიდი პრობლემაა სასმელი წყალი. ბეღლეთი იქნება ეს, ღურტა, თუ ყინჩაური, ყველგან არის წყლის პრობლემა. დაბა ხულოშიც ფული დახარჯეს და წყალი მოდის მღვრიე, ან არ არის, გრაფიკით მიეწოდება ხალხს წყალი. ამ პრობლემას არავინ ყურადღებას არ აქცევს. ბოლო წლებში 6 მილიონამდე დაიხარჯა წყლის სისტემების მოსაწყობად და მოუგვარებელია პრობლემა.
- რატომ ვერ მოგვარდა თქვენი ინფორმაციით, კომპეტენციის პრობლემა იყო, თუ კორუფციის?
ძირითადად არის ნეპოტიზმი, რადგან შინაურული გარიგებებია, უყურადღებობა არის, ისე ტარდება ტენდერები და ჩვენი მოსახლეობა წყლის გარეშე რჩება. პასუხის მომთხოვნი არავინ არ არის, რადგან ერთმანეთთან არიან კავშირში.
- შეგიძლია დაგვისახელო კონკრეტული ფაქტი ასეთი გარიგების?
შეგიძლიათ გამოითხოვოთ, პროკურატურაშია შეტანილი საქმეები, მაგალითად, საჯოგია-ნეგოიანში 2- 3 წლის წინ დახარჯეს მილიონზე მეტი ლარი და წყალი არ არის… „ნაციონალურმა მოძრაობამ“ მიმართა პროკურატურას და დაწყებულია გამოძიება.
- რა საშუალებით წარმოგიდგენიათ უფრო მეტი შემოსავლის მიღება ხულოს ბიუჯეტში?
უნდა იყოს ბიზნესის ხელშეწყობა და მეტი შემოსავალი შემოვა ქონების გადასახადისგან. ხულოს აქვს დიდი პერსპექტივა სოფლის მეურნეობაში. აქამდე იყო კარტოფილი, ახლა დაემატა თუთუნი და ჟოლო, რომელიც ბევრად უფრო მოგებიანია.
ხულოში ტურიზმიც განვითარებულია და დღევანდელმა ხელისუფლებამ ყველაფერი გააჩერა, რადგან თვითონ მოირგო ყველაფერი. მაგალითად, ხულო-ზარზმის გზა უკვე 9 წელი გაჩერებულია. ყოველი არჩევნების წინ იმიტაციაა, რომ თითქოს აკეთებენ, სინამდვილეში არჩევნების მერე ყველაფერი ჩერდება.
თქვენ ხომ გესმით, რამხელა დატვირთვა აქვს ამ გზას?! მაგალითად, ზაფხულში რომ მარტივად მოხვდები მწვანე ტბაზე, ან ზამთარში იოლად მიხვალ გოდერძიზე? ეს ყველაფერი ახლა გაჩერებულია.
მთავარი პრობლემა არის ის, რომ მოსახლეობას ხელისუფლება არ ელაპარაკება, ელემენტარული ყურადღება არ არის. დღეს რომ „ნაციონალურ მოძრაობას“ აქვს მაღალი რეიტინგი, ეს არის იმის დამსახურება, რომ მიხეილ სააკაშვილი ყველა სოფელში მიდიოდა, პრობლემას ითავისებდა და გულთან მიჰქონდა.
ხულოს მერი ვახტანგ ბერიძე როცა მუშაობდა პოლიციაში, მას უფრო მეტი სახელი და რეიტინგი ჰქონდა, დღეს, მაგალითად, მას არ აქვს სახელი. ხულოს მოსახლეობამ იცის, რომ ის არის ფორმალური მერი.
ამასობაში, გლეხის საქმე რჩება მოუგვარებელი.
- შემოსავალს რა გაზრდის კონკრეტულად? მაგალითად, ჰესის აშენებამ რა მისცა ხულოს ბიუჯეტს?
ჰესის აშენების შემდეგ ყოველწლიურად ხულოს ბიუჯეტში შედის სამნახევარი მილიონი ლარი. ასეთი პროექტები მრავალი და მრავალი უნდა გაკეთდეს.
- ჰესები ისევ?
საწარმოები ამასთან ერთად. ხილის მიმღები საწარმო შეიძლება მოეწყოს, უხვი მოსავალი გვაქვს, ძალიან დიდი რაოდენობით ხილია, ძირში იყრება და ლპება.
მრავალი პერსპექტივა გააჩნია ჩვენს რეგიონს. მაგალითად, კურორტ „გოდერძიდან“ არის შემოსავალი, მაგრამ არა ის, რა პერსპექტივაც გააჩნია გოდერძის. ინფრასტრუქტურის და გზის პრობლემები როცა მოგვარდება, ეს შემოსავალი გაორმაგდება და გასამმაგდება.
- როგორ წარმოგიდგენიათ ქონების გამიჯვნა, რომ ქონება, სადაც ბიზნესის ინტერესი არსებობს, მუნიციპალური იყოს და ხულომ მიიღოს შემოსავალი?
„ნაციონალურ მოძრაობას“ ჰქონდა დაწყებული მიწების რეგისტრაცია და ეს პროცესი… როცა ამათ ჩაიბარეს ეს ხელისუფლება, რადიკალურად სხვა მიმართულება წავიდა პროცესი. ის, ვინც იყო „ოცნებასთან“ კავშირში, მარტო მას გაუფორმეს. გლეხის ნაწილში ყველაფერი გაჩერებულია.
- გლეხს მიწის რეგისტრაციას ჰპირდებოდა წინასაარჩევნოდ, როგორც „ნაციონალური მოძრაობა“, ასევე „ქართული ოცნება“, მაგრამ ორივე ატყუებდა. რატომ ხდება ასე, თქვენი აზრით?
წინა ხელისუფლების დრო ბევრი რამ შეიქმნა ხულოსთვის და სრულიად საქართველოსთვის. მთელ ქვეყანას ჰქონდა ბიძგი და ამიტომ წარმოვადგენ დღეს მე ამ გუნდს. ეს ხელისუფლება კი, ჭაობისკენ წავიდა…
„ნაციონალური მოძრაობის“ ხელისუფლებაში ყოფნის დროს ყველაფერი იდეალურად არ იყო, რაღაცები იყო პრობლემა, მაგრამ გლეხზე იყო მორგებული, ყველაფერი წინ და წინ მიიწევდა. მე ყველაფერზე პასუხისმგებლობას ვიღებ, მაგრამ რა მინდა გითხრათ: ხულოს ახლანდელი მერი ვახტანგ ბერიძე მაშინ წამყვან თანამდებობას იჭერდა, ასევე პარლამენტის წევრი იყო მაშინაც ანზორ ბოლქვაძე და მგონი, პასუხისმგებლობა მათაც უნდა იტვირთონ, ამაზე უნდა შევთანხმდეთ.
- რა გარანტიაა, რომ ისევ არ ატყუებთ მოსახლეობას?
მე რასაც დავპირდები მოსახლეობას, იმას შევასრულებ. თუ არა, სამომავლოდ ვისაუბროთ ამაზე, მაგრამ დამიჯერეთ, საბოლოოდ, ამ თემაზე საუბარი არ მოგვიწევს.
- დაპირების მიუხედავად, ხულოს სოფლების დიდ ნაწილში ისევ არაა ინტერნეტი. როდის და როგორ შეიძლება მოაგვაროთ ეს პრობლემა, გაქვთ კონკრეტული გათვლა?
მიხეილ სააკაშვილი რომ ყოფილიყო ახლა ისევ ხელისუფლებაში, ეს პრობლემა არ იქნებოდა. მიხეილ სააკაშვილი დიდ ყურადღებას აქცევდა განათლებას და ამის ნათელი მაგალითია ერთიანი ეროვნული გამოცდები, რაც მართლა მიღწევაა, მოდით, ვაღიაროთ. ეს პრობლემა აუცილებლად უნდა მოგვარდეს, რადგან უინტერნეტოდ როგორ შეიძლება ისწავლოს ბავშვმა?
- როგორ აპირებთ მოსახლეობის აქტიურად ჩართვას გადაწყვეტილებების მიღების პროცესში?
ხელისუფლება არ უნდა იყოს გამიჯნული მოსახლეობისგან. დღეს კი მოსახლეობას ხელისუფლება არ ჰყავს ნანახი, ან როცა ხვდებიან, არავინ საუბრობს რეალურ პრობლემებზე. ეს შიშის გამო კი არაა, არამედ იმიტომ, რომ მოსახლეობა ხვდება, ესენი რომ რეალურ გადაწყვეტილებას ვერ იღებენ, ხვდებიან – არაფრის გამკეთებლები არ არიანო.
ხალხი ხელისუფლებასთან შინაურულად უნდა გრძნობდეს თავს. ჩემი გამარჯვების შემთხვევაში, მინდა, ასე შინაურულად ვგრძნობდე მეც თავს, როგორც ამ რაიონის შვილი, ვჯდებოდე გლეხებთან და თავისუფლად მიყვებოდნენ, რა სჭირდებათ.
