Batumelebi

„ბატონო ჯუმბერ, დარეგისტრირებული ხართ თუ არა რომელიმე ინტერნეტსაიტზე რომელიმე აზარტული თამაშის მომხმარებლად?“ – პროკურორის ეს შეკითხვა დამაბნეველი აღმოჩნდა ხელვაჩაურის ყოფილი მერის – ჯუმბერ ვარდმანიძისთვის. მან მოსამართლე ლევან ყოლბაიას მოწმის სახით ჩვენება მისცა ხელვაჩაურის მერიაში „ნახევარი მილიონის მითვისების საქმეზე“.

ჯუმბერ ვარდმანიძე იყო ხელვაჩაურის მერი, როცა პროკურატურის ვერსიით, „ხელვაჩაურის წყლის“ დირექტორმა, ვლადიმერ [დავით] მიქელაძემ დაახლოებით ნახევარი მილიონი ლარი მიითვისა. „ხელვაჩაურის წყალი“ კი, პირდაპირ იყო სამართლებრივად ანგარიშვალდებული ჯუმბერ ვარდმანიძესთან – ის ხელვაჩაურის მერი იყო 2017-2021 წლებში.

ჯუმბერ ვარდმანიძე ახლა აჭარის განათლების მინისტრის მრჩეველია.

პროკურორის კითხვას ხელვაჩაურის ყოფილმა მერმა აზარტული თამაშების საიტების შესახებ მოკლედ უპასუხა: „აღარ ვარ“.

– „2017-2020 წლებში თუ იყავით დარეგისტრირებული?“ – იკითხა ისევ პროკურორმა.

– „დასაშვებია“, – მხრები აიჩეჩა თანამდებობის პირმა.

– „სხვა პირის მონაცემები გამოგიყენებიათ აზარტული თამაშების განსახორციელებლად?“ – პროკურორის ამ შეკითხვაზე უკვე ხელვაჩაურის ყოფილმა მერმა თქვა, რომ ეს მისი „პირადი საქმეა“ და კითხვას აღარ უპასუხებს.

მოწმეს მოსამართლემ განუმარტა, რომ ვალდებულია შეკითხვებს უპასუხოს, როცა ის განრიდებული არ არის.

„კარგი, ბატონო, ჩემი შვილის საიტით [აზარტული თამაშების საიტები] ვსარგებლობდი. ეს ჩემი პირადი საქმეა და რატომ უნდა მოხდეს ჩარევა?“ – დარბაზს გადახედა ხელვაჩაურის ყოფილმა მერმა და მოსამართლეს მიუბრუნდა პროკურორზე: „ჩემს პირად საქმეში რატომ უნდა ყოფდეს ცხვირს?“ – იკითხა მოწმემ.

– „ყოფილა შემთხვევა, როცა თანხა მოუცია თქვენთვის ვლადიმერ მიქელაძეს?“ – მოწმეს დაუბრუნდა პროკურორი.

– „დავუშვათ მოუცია 100 – 200 ლარი, არ მახსენდება… ბოლომდე რომ მართალი ვიყო, რესტორანში გადაუხდია პურის ჭამის დროს“, – დასძინა ხელვაჩაურის ყოფილმა მერმა.

„თქვენი აზრით, რატომ აქვს პროკურატურას ბრალი წარდგენილი ჯგუფურად ჩადენილი მითვისებისთვის, რატომ გაჩნდა ეს ეჭვი?“ – ადვოკატ ადილარ წირღვავას ეს შეკითხვაც არ მოეწონა ხელვაჩაურის ყოფილ მერს.

„ვერ გეტყვით. აბა, მე რა ვიცი. ის ჩემ დავალებას ასრულებდა, რომ წყალი ყოფილიყო სუფთა,“ – თქვა ხელვაჩაურის ყოფილმა მერმა და კიდევ ერთხელ გაიმეორა, რომ ხელვაჩაურის მერიაში, სადაც თვითონ იყო პირველი პირი, ნახევარი მილიონი ლარის მითვისების ამბავი, მხოლოდ პროკურატურისგან გაიგო.

„ვისთან იყო „ხელვაჩაურის წყალი“ პასუხისმგებელი?“ – ჩაეკითხა მოწმეს ადვოკატი ადილარ წირღვავა.

„ჩემ წინაშე,“ – ჩაილაპარაკა მოწმემ და პაუზის შემდეგ დასძინა: „ჩემი მოადგილე იყო კურატორი“.

„მოადგილე“ კახაბერ ფუტკარაძეა, რომელმაც თანამდებობა დღეს, 21 ივნისს დატოვა მას შემდეგ, როცა „ბათუმელებმა“ ამ საქმის სასამართლო სხდომაზე ბუღალტრის ჩვენება გააშუქა: – ბუღალტრის ჩვენების მიხედვით, „ხელვაჩაურის წყალში“ ფიქციურად დასაქმებული იყო ხელვაჩაურის მერის მოადგილის, კახაბერ ფუტკარაძის შვილი თორნიკე ფუტკარაძე. მისი ხელფასი 1040 ლარი იყო.

ჯუმბერ ვარდმანიძემ დაუდასტურა სასამართლოს, რომ მოადგილის შვილის „ხელვაჩაურის წყალში“ განწესება მასთან იყო შეთანხმებული.

„ვერ გეტყვით, ვისი ინიციატივით დასაქმდა, მაგრამ ჩემი თანხმობის გარეშე არ მოხდებოდა, დეტალები არ მახსოვს,“ – თქვა ჯუმბერ ვარდმანიძემ. მას არ უთქვამს, რომ თორნიკე ფუტკარაძე ფიქციურად იყო დასაქმებული.

ჩვენების დროს ვარდმანიძემ ახსენა, რომ კომუნიკაცია ჰქონდა ვახტანგ აბაშიძესთან – წყალსაცავებთან და ჭაბურღილებთან მხვდებოდაო.

ვახტანგ აბაშიძე ამბობს, რომ მას სამსახურში თორნიკე ფუტკარაძე არასდროს უნახავს. ვახტანგ აბაშიძე, „ხელვაჩაურის წყლის“ დირექტორის მოადგილე იყო, როგორც ბრალდებულ დავით მიქელაძის დირექტორობის დროს, ისე ახლაც.

ამ დეტალზე ვარდმანიძის გამოკითხვის დროს მხარეებს ყურადღება არ გაუმახვილებიათ.

პროკურორმა კიდევ ეს იკითხა:

„ეს სპეციფიკური სფეროა. გაარკვიეთ, რომ მას [თორნიკე ფუტკარაძეს] შესაბამისი ცოდნა ჰქონდა?“ – იკითხა პროკურორმა თორნიკე გოგეშვილმა.

„იქ ბევრი დამხმარე თანამდებობაა, რასაც არ სჭირდება კონკრეტული ცოდნა… ის იყო სპეციალისტის პოზიციაზე,“ – აღნიშნა ჯუმბერ ვარდმანიძემ.

ჯუმბერ ვარდმანიძის მტკიცებით, კადრების დამატების საჭიროება „ხელვაჩაურის წყალში“ არსებობდა, თუმცა ვერ დაასაბუთა, ვინ დაადგინა და რა ფორმით ამის საჭიროება. ხელვაჩაურის ყოფილმა მერმა ვერც ის თქვა, დამატებით რამდენი ახალი თანამშრომელი დაასაქმეს იმ უწყებაში, რომელიც 100 პროცენტით ეკუთვნის ხელვაჩაურის მუნიციპალიტეტს და ანგარიშვალდებულია ხელვაჩაურის მერიასთან.

„მე ხომ მათი ბრიგადირი არ ვიყავი… მივსულვარ და დამხვედრიან ადგილზე… იყო საუბრები, რომ საჭიროა კადრების დამატება. ჩემი დავალება იყო, რომ წყალი ჰქონოდა ხალხს და ეს წყალი ყოფილიყო სუფთა.

ერთხელ ფოტო გამომიგზავნა ვლადიმერმა ისეთი, ვუთხარი წაშალე ეს ფოტო შენ და მეც წავშლი, ვინმემ არ ნახოს-მეთქი. ჩანდა წყალსაცავში ჭიაყელა, ბაყაყი, ბოდიში და სლიკვიც. ეს ყველაფერი ვლადიმერმა მოაწესრიგა,“ – აღნიშნა ხელვაჩაურის ყოფილმა მერმა.

„მოწამვლა დაფიქსირდა ამ სამი წლის განმავლობაში ხელვაჩაურის მუნიციპალიტეტში?“ – ფეხზე წამოდგა და ისე დაუსვა შეკითხვა ბრალდებულმა ყოფილ უფროსს.

„არა. თუ ვინმეს კუჭი აეშალა, არ ვიცი,“ – ირონია დაეტყო ჩინოვნიკს.

„მე რუსულ მილებს ვყიდულობდი ბაზარზე „ჩეკები“ მქონდა, მაგრამ გუშინ ბუღალტერმა ესეც არ დაადასტურა… ეს არ უნდა აისახოს?“ – დირექტორობის პერიოდი გაიხსენა ბრალდებულმა და პროკურატურის მისამართით თქვა, რომ ყველა ხარჯი მითვისებად არ უნდა ჩაუთვალონ, როცა „ჩეკები“ არსებობს.

„მქონდა გადაცდომები, თავს არ ვიმართლებ, მაგრამ ეს ხარჯები არ არის გამოკლებული,“ – თქვა ბრალდებულმა და იქვე თორნიკე ფუტკარაძეც ახსენა – ხელვაჩაურის მერის უკვე ყოფილი მოადგილის შვილი, რომელიც, მაგალითად, ხელფასს სრულად იღებდა – ფუტკარაძის ხელფასიც მითვისებულ ნახევარ მილიონში ყოფილა ასახული.

„უნდა აისახოს, უნდა აისახოს,“ – მხრები აიჩეჩა ხელვაჩაურის მერმაც, ვითომ მე რატომ მეხება ეგ საკითხიო და თანდათან მოწმის ტრიბუნიდან ბრალდებულის გისოსებს მიუახლოვდა.

„დაუბრუნდით თქვენს ადგილს“, – შენიშვნა მისცა მანდატურმაც მოწმეს.

„კონტროლის რა მექანიზმი გქონდათ?“ – ხელვაჩაურის ყოფილ მერს ეს შეკითხვაც დაუსვა ადვოკატმა ადილარ წირღვავამ.

„აუდიტი“ – თქვა მოწმემ და განმარტა, რომ შიდა აუდიტს დანაშაულის ჩადენის შესახებ მისთვის ინფორმაცია არასდროს მიუწოდებია: – „იქ იყო საუბარი გაორებაზე, მაგალითად, თანამდებობრივ გაორებაზე, რაზეც ვისაუბრეთ…“

„როგორ ხსნით ამ შეუთავსებლობას, როცა თქვენ მანამდე მხოლოდ გაორება შეამჩნიეთ, პროკურატურამ კი…“ – გაოცება ვეღარ დამალა მოსამართლემ.

„არ ვიცი, მოწმენდილ ცაზე მეხის გავარდნასავით იყო ჩემთვის ეს ამბავი,“ – მოსამართლეს თვალი აარიდა ხელვაჩაურის ყოფილმა მერმაც.

————————–

ვლადიმერ [დავით] მიქელაძე „ხელვაჩაურის წყალკანალის“ ყოფილი უფროსია და მას გამოძიება ბიუჯეტიდან დიდი ოდენობით ფულის მითვისებას ედავება – 520 920 ლარი.

ვლადიმერ მიქელაძეს ბრალი აქვს ასევე წარდგენილი: სამსახურებრივი უფლებამოსილების ბოროტად გამოყენების, სამსახურებრივი სიყალბისა და ყალბი საგადასახადო დოკუმენტის დამზადება-გამოყენების კუთხით.

20 ივნისს ამ საქმეზე სასამართლოს ჩვენება ხელვაჩაურის წყლის“ ბუღალტერმა მისცა. სასამართლო სხდომის „ბათუმელებში“ გაშუქების შემდეგ, თანამდებობა ხელვაჩაურის მერის მოადგილემ -კახაბერ ფუტკარაძემ დატოვა. მოსამართლეს მოწმეებმა უთხრეს, რომ „ხელვაჩაურის წყალს“ კახაბერ ფუტკარაძე კურატორობდა, მისი შვილი კი, ათეულობით სხვა ადამიანის მსგავსად, ფიქციურად იყო დასაქმებული დავით მიქელაძის დირექტორობის დროს.

ამ თემაზე:

„დირექტორთან კაბინეტში შემქონდა ფული“ – მოწმე ხელვაჩაურში 520 ათასი ლარის მითვისებაზე

See more

„იდეა ჩემი იყო და ბატონ ჯუმბერს [ჯუმბერ ვარდმანიძე, ხელვაჩაურის ყოფილი მერი] შევუთანხმე. მან მითხრა, ყველა დოკუმენტი იდეალურად უნდა იყოსო.

მერე მკითხა, როგორ არის ის საქმეო“, – თქვა ბრალდებულმა ვლადიმერ მიქელაძემ, რომელიც „ხელვაჩაურის წყლის“ ყოფილი დირექტორია და პროკურატურა 520 ათასი ლარის ჯგუფურად მითვისებას ედავება.

„ჯგუფურად“ ჩადენილ დანაშაულზე ბრალდებული ამ დრომდე მხოლოდ ვლადიმერ მიქელაძეა. მან დღეს, 3 ივლისს, მოსამართლე ლევან ყოლბაიას ჩვენება მისცა და თქვა, რომ ფიქციური დასაქმებებით, თუ სხვა მანიპულაციებით მიღებული შემოსავლიდან, ჯამში 288 ათასი ლარი ჯუმბერ ვარდმანიძეს მისცა – ხელვაჩაურის მაშინდელ მერს [ჯუმბერ ვარდმანიძე ხელვაჩაურის მერი იყო 2017 წლიდან 2021 წლის ჩათვლით].

აქ წაიკითხეთ: „თვეში 9 ათას ლარს ვაძლევდი ვარდმანიძეს“ – ბრალდებულის ჩვენება 520 ათასის მითვისებაზე

„თქვენ აღიარებთ ბრალს იმ განსხვავებით, რომ ამ თანხის ნაწილი სხვა პირებმა მიიღეს?“ – ჰკითხა პროკურორმა ბრალდებულს.

„დიახ, დაახლოებით 288 ათასი ჯუმბერ ვარდმანიძეს მივეცი, სადღაც 22 ათასი მოადგილეს – კახაბერ ფუტკარაძეს“, – თქვა ბრალდებულმა და იქვე ისიც მოუყვა მოსამართლეს, როგორ დასაქმდა „ხელვაჩაურის წყალში“ კახაბერ ფუტკარაძის შვილიც.

„ჩემი ინიციატივით ლაბორატორიის უფროსი დავასაქმე მხოლოდ,“ – ირონია დაეტყო ბრალდებულს და პაუზის შემდეგ განაგრძო, – „ერთ დღეს ჯუმბერმა მითხრა: მოვილაპარაკეთ და მისი ბაღანა გავაფორმოთო… ერთხელ დავინახე მისი შვილი, როცა ხელშეკრულებას აწერდა. მეორედ ბატონ კახაბერთან შევხვდი სახლში, დღეობაზე… ვერ ვიცანი, თქვენ ის ხართ, ჩვენთან რომ მუშაობთ-მეთქი?“

ბრალდებულ ვლადიმერ მიქელაძის თქმით, მას ნახევარი მილიონიდან წილის სახით მხოლოდ 140 ათასი ლარი ერგო.

„მაგის ნაწილი სხვადასხვა ნივთის შესაძენად დავხარჯე და არ დასტურდება. ვიცოდი, რომ „ჩეკები“ არსებობდა, შემდეგ აღმოჩნდა, რომ არ არის,“ – დასძინა ბრალდებულმა.

ვლადიმერ მიქელაძემ დეტალურად აღწერა, როგორ ფორმდებოდა ხელშეკრულებები ფიქციურად და ნაწილდებოდა ფული. ყოფილი მაღალჩინოსნის თქმით, ბიუჯეტიდან ფულის მითვისების პროცესში რამდენიმე თანამდებობის პირი იყო ჩართული. ბრალდებულის თქმით, იგი ხელვაჩაურის მაშინდელ მერს – ჯუმბერ ვარდმანიძეს ხელზე აძლევდა ფულს.

„თქვენ ჯუმბერ ვარდმანიძეს შეხვდით თევზის რესტორანშიც. იქაც ამ საქმის ფული გადაეცით მას?“ – იკითხა პროკურორმა თორნიკე გოგეშვილმა ისე, რომ ბრალდებულს მანამდე ეს რესტორანი არ უხსენებია.

„დიახ, 9 ათასი ლარი მივეცი მაშინაც,“ – თავი დაუკრა პროკურორს ბრალდებულმა.

დადგება თუ არა ამ საქმეზე სხვა პირების, მათ შორის, ჯუმბერ ვარდმანიძის პასუხისმგებლობის საკითხი? – პროკურორი ამბობს, რომ „გამოძიების ინტერესებიდან გამომდინარე“ ჯერ დეტალებზე ვერ ისაუბრებს, თუმცა „გამოძიება გრძელდება“.

კიდევ ერთი მტკიცებულება, რაც შესაძლოა ყოფილ მერს პროკურატურამ დაუდოს, ეს აზარტული თამაშებისთვის ვლადიმერ მიქელაძის მიერ ჯუმბერ ვარდმანიძისთვის გადარიცხული თანხაა – სასამართლოს წინა სხდომაზე ჯუმბერ ვარდმანიძემ სასამართლოს დაუდასტურა, რომ ის აზარტული თამაშებით იყო დაკავებული. სასამართლოს დღევანდელ სხდომაზე კი, ვლადიმერ მიქელაძემ ისაუბრა იმაზეც, რომ მას კონკრეტულ ნომერზე სთხოვდნენ გადასარიცხი აპარატიდან თანხის ჩარიცხვას.

„…მაწვდიდნენ პასპორტის რაღაც ნომერს და იქ ვრიცხავდი ხან 300 ლარს, ხან 350 ლარს, 400 ლარს, 500 ლარს… მირეკავდნენ თბილისიდან, ამ ნომერზე უნდა ჩარიცხო თანხა. მერი არ რეკავდა, მისი თანმხლები პირი მირეკავდა“, – უთხრა მოსამართლეს ბრალდებულმა ვლადიმერ მიქელაძემ.

„რამდენ ხანში ერთხელ მიდიოდით ჯუმბერ ვარდმანიძესთან თანხის გადასაცემად?“ – ჩაეკითხა ბრალდებულს პროკურორი.

„აკუმულირდებოდა თანხა და მერე გადავცემდი: 50 და 100 ლარიანებს გადავცემდი ბატონ ჯუმბერს…“ – თქვა ბრალდებულმა და ისიც გაიხსენა, კაბინეტში ჯუმბერ ვარდმანიძემ სმს ჩუმად რომ წააკითხა:

„არ მითხრა, ვისგან ჰქონდა მიღებული ეს სმს, მაგრამ იქ ეწერა, არაფერი ემუქრება დათოსო, მე დათოთი მიცნობენ აჭარაში… ვიცოდი უკვე, რომ პროკურატურაში იყო საქმე. ბატონმა ჯუმბერმა კი მითხრა, მოგვარებულია უკვე პრობლემაო. მაქსიმუმ შეიძლება ჯარიმა იყოსო. თავიდან დავუჯერე და ამასობაში, დამაპატიმრეს,“ – თქვა ბრალდებულმა.

ამ სქემაზე თავდაპირველად „ხელვაჩაურის წყლის“ მთავარმა ბუღალტერმა – ნორა დიასამიძემ ისაუბრა. ბუღალტერმა აღწერა, რომ პერიოდულად ხელშეკრულებებით ფიქციურად საქმდებოდნენ ადამიანები, ვისგანაც შემდეგ ფულს ბუღალტერი აგროვებდა და ხელზე აძლევდა დირექტორს კაბინეტში. „ხელვაჩაურის წყალში“ იყო დასაქმებული ბუღალტრის ოჯახის წევრებიც.

ბრალდებულ ვლადიმერ მიქელაძეს პროკურორმა გაახსენა მანამდე ნათქვამი სიტყვები: ამ ყველაფრის არქიტექტორი ვინ იყო, სად არის პრობლემის წყარო და სათავეო, როცა ჰყვებოდა ბრალდებული.

„ვინ დაგეგმა ეს?“ – მიმართა ისევ ბრალდებულს პროკურორმა.

„სათავე ნაგებობებზე რევიზორსაც უჭირდა ასვლა…“ – გულახდილობა არჩია ბრალდებულმა.

ამ თემაზე:

ვარდმანიძემ თქვა, რომ აზარტული თამაშებით იყო დაკავებული – ხელვაჩაურის ყოფილი მერის ჩვენება

See more

 

„ამ თანხის დაახლოებით 50 – 55 პროცენტს ვაძლევდი ჯუმბერ ვარდმანიძეს. 2019 წელს თვეში ვაძლევდი 7 ათას ლარს, 2020 წელს – 8 ათას ლარს თვეში, 2021 წელს – 9 ათას ლარს თვეში“, – პირდაპირ აღწერა კორუფციის სქემა სასამართლოს დღევანდელ სხდომაზე ვლადიმერ მიქელაძემ, წინასწარ პატიმრობაში მყოფმა ხელვაჩაურის წყლის ყოფილმა ხელმძღვანელმა.

დღეს, 3 ივლისს, მოსამართლე ლევან ყოლბაიას ჩვენება ბრალდებულმა ვლადიმერ (დავით) მიქელაძემ მისცა – „ხელვაჩაურში ნახევარი მილიონის მითვისების საქმეზე“.

ვლადიმერ მიქელაძის თქმით, მან ჯამში 288 ათასი ლარი გადასცა ხელზე ჯუმბერ ვარდმანიძეს.

„…კაბინეტში ვაძლევდი, იქ, კაბინეტის უკან პატარა ოთახია – მოსაცდელი კაბინეტი და იქ ვაძლევდი.

ფულის გადაცემის დროს მანიშნებდა და საპირფარეშოს კართან ვაძლევდი.

იყო შემთხვევები, როცა მასთან, სახლში მიმიტანია ეს ფული. მეტყოდა, როდის იქნებოდა სახლში და მივიდოდი.

ასევე, მაწვდიდნენ პასპორტის რაღაც ნომერს და იქ ვრიცხავდი ხან 300 ლარს, ხან 350 ლარს, 400 ლარს, 500 ლარს… მირეკავდნენ თბილისიდან, ამ ნომერზე უნდა ჩარიცხო თანხა. მერი არ რეკავდა, მისი თანმხლები პირი მირეკავდა“, – უთხრა მოსამართლეს ბრალდებულმა ვლადიმერ მიქელაძემ.

 

აქ წაიკითხეთ: მილიონიანი უკანონო მშენებლობა, არჩევნები და უშვერი გინება – 3 ამბავი ხელვაჩაურის მერზე

 

გამოძიების ვერსიით, ბრალდებული, რომელიც 3 წელი დირექტორობდა „ხელვაჩაურის წყალს“, ფიქციურად ასაქმებდა ადამიანებს. მას პროკურატურა სხვადასხვა სამოხელეო დანაშაულთან ერთად, განსაკუთრებით დიდი ოდენობით თანხის – 520 ათასი ლარის ჯგუფურად მითვისებას ედავება.

ვლადიმერ მიქელაძის თქმით, ხელვაჩაურის მაშინდელი მერი, ჯუმბერ ვარდმანიძე, უშუალოდ იყო ჩართული ადამიანების ფიქციურ დასაქმებაში და ყოველთვიურად იღებდა წილს.

ბრალდებულმა ასევე დაადასტურა, რომ დასაქმებული ჰყავდა თორნიკე ფუტკარაძეც – ხელვაჩაურის მერის უკვე ყოფილი მოადგილის – კახაბერ ფუტკარაძის შვილი.

ვლადიმერ მიქელაძის თქმით, პატიმრობის პერიოდში მან მოლაპარაკება სცადა ჯუმბერ ვარდმანიძესთან.

„თქვა, რომ მხოლოდ 100 ათას ლარს გადაიხდიდა“, – დასძინა ბრალდებულმა.

მოლაპარაკება ვერ შედგა.

ვლადიმერ მიქელაძე წარდგენილ ბრალს ნაწილობრივ ადასტურებს, თუმცა მიიჩნევს, რომ პროკურატურამ არასწორად დაითვალა „მითვისებული თანხა“.

ამას გარდა, ნახევარ მილიონს უნდა გამოაკლდეს ის თანხა, რასაც მიქელაძე ხელვაჩაურის მაშინდელ მერს, ჯუმბერ ვარდმანიძეს უხდიდა – ვლადიმერ მიქელაძეს ჯგუფურად ჩადენილ დანაშაულს ედავებიან, ბრალდებული კი, მხოლოდ ერთი კაცია.

„ჩემი ინიციატივით მე იქ არავინ დამინიშნავს, ლაბორატორიის უფროსი დავნიშნე მხოლოდ“, – აღნიშნა ბრალდებულმა.

ვლადიმერ მიქელაძის მტკიცებით, საქმეს რეალურად სჭირდებოდა დამატებით ადამიანური რესურსი და ამიტომაც აიყვანა ადამიანები ხელშეკრულებებით, თუმცა იყო ფიქციური დასაქმებაც…

„ძალიან მძიმე სიტუაცია დამხვდა“, – 2018 წლიდან დაიწყო ამბის მოყოლა ბრალდებულმა ვლადიმერ მიქელაძემ, როცა ის „ხელვაჩაურის წყლის“ დირექტორად დანიშნეს.

„აქ თქვეს მოწმეებმა, თვეში ერთხელ იწმინდებოდა სათავე ნაგებობაო. სინამდვილეში 2-3 დღეში ერთხელ არის საჭირო წმენდა… ხანდაზმული ადამიანები მუშაობდნენ, წმენდა კი სისტემატურად იყო საჭირო.

სულ 42 წყალსადენია, არსად ქლორირება არ ხდებოდა, მე დავიწყე ეს პროცესი“, – დეტალურად მოუყვა ბრალდებული მოსამართლეს, რა შეცვალა „ხელვაჩაურის წყალში“.

ვლადიმერ მიქელაძის თქმით, „გადაცდომა“ დაუშვა მაშინ, როცა ნაღდი ანგარიშსწორებით ყიდულობდა მილებს და დანადგარებს.

ბრალდებულმა ისაუბრა „ხელვაჩაურის წყლის“ ყოფილ მთავარ ბუღალტერზეც, რომლის ჩვენებაც წინა სხდომაზე სკანდალური აღმოჩნდა.

„ძალიან უჭირდა ნორას, 4 ბანკში ჰქონდა ვალი“, – თქვა ბრალდებულმა და თვითონაც აღწერა, როგორ ახერხებდა ნორა ფულის ხელზე შეგროვებას.

————–

ვლადიმერ მიქელაძეს პროკურატურა ჯგუფურად დიდი ოდენობის თანხის – 520 ათასი ლარის მითვისებას ედავება.

გამოძიება ამ დრომდე გრძელდება “ჯგუფურად” ჩადენილ დანაშაულზე, თუმცა ბრალდებული მხოლოდ ერთი პირია – ვლადიმერ მიქელაძე.

“ბათუმელებში” რეპორტაჟის გამოქვეყნების შემდეგ თანამდებობა დატოვა ხელვაჩაურის ყოფილმა მერმა, ჯუმბერ ვარდმანიძემ. ის აჭარის განათლების მინისტრის მრჩეველი იყო.

თანამდებობა დატოვა კახაბერ ფუტკარაძემაც – ის ხელვაჩაურის მერის მოადგილე იყო. მოწმეების თქმით, მისი შვილიც ფიქციურად იყო დასაქმებული „ხელვაჩაურის წყალში“, როგორც ათეულობით სხვა ადამიანი.

___

ხელვაჩაურის მერი სამსახურის ავტომანქანით „ოცნების“ სააგიტაციო შეხვედრაზე

See more

ამ თემაზე:

ვარდმანიძემ თქვა, რომ აზარტული თამაშებით იყო დაკავებული – ხელვაჩაურის ყოფილი მერის ჩვენება

See more