რუსეთის ფედერაციის უშიშროების საბჭოს თავმჯდომარის მოადგილე დიმიტრი მედვედევი კვლავ იმუქრება ბირთვული იარაღით და მესამე მსოფლიო ომით.
„რასიისკაია გაზეტაში“ გამოქვეყნებულ წერილში მედვედევი წერს, რომ დასავლელი პოლიტიკოსები „ვერ აცნობიერებენ, რას აკეთებენ“.
„დაპირისპირება იქნება ძალიან ხანგრძლივი. დაპირისპირება გაგრძელდება ათწლეულების განმავლობაში. მისი გადაჭრის ერთ-ერთი გზა მესამე მსოფლიო ომია. მაგრამ ეს აშკარად ცუდია, რადგან გამარჯვებულებს არ აქვთ გარანტირებული შემდგომი კეთილდღეობა, როგორც ეს იყო წინა მსოფლიო ომების შემდეგ. სავარაუდოდ, უბრალოდ არ იქნება გამარჯვებული“ – ამბობს მედვედევი ინტერვიუში და ახსენებს ბირთვულ ზამთარს, რადიაციასა და რადიოაქტიურ დაბინძურებას, „რომლის შედეგად უამრავი ადამიანი დაიღუპება“.
ინტერვიუში მედვედევი ახსენებს ნატოს და ფინეთს, რომელსაც „ლენინის დაუფიქრებლობის გამო შექმნილს“ უწოდებს.
„ახლა ჩვენთვის ფინეთი არის მტრული ქვეყანა, რომელიც ოდესღაც ლენინის დაუფიქრებლობის გამო შეიქმნა და დღეს ნატოში შევიდა. ფინეთთან და მის მსგავს სხვა ქვეყნებთან (როგორიცაა: პოლონეთი, ბალტიისპირეთის ქვეყნები და, რა თქმა უნდა, დიდი ბრიტანეთი), უკეთესი იქნებოდა დიპლომატიური ურთიერთობების დროებით შეჩერება ან თუნდაც ამ დროისთვის მათი დონის დაწევა“ – ამბობს მედვედევი.
