უკრაინის თავდაცვის ძალები აგრძელებენ წინსვლას ბახმუტის, მელიტოპოლისა და ბერდიანსკის მიმართულებით, – ამის შესახებ „ტელეგრამზე“ უკრაინის თავდაცვის მინისტრის მოადგილე ანა მალიარი წერს.
„აღმოსავლეთით გრძელდება როგორც შეტევითი, ასევე თავდაცვითი ოპერაციები. ჩვენ მივდივართ ბახმუტის მიმართულებით და მტერი განაგრძობს შეტევას ლიმანის, ავდიევკისა და მარინკის მიმართულებით. მტერი ცდილობს, ჩვენი ჯარების განდევნას პოზიციებიდან, მაგრამ იღებს ღირსეულ პასუხს. იქ მძიმე ბრძოლები მიმდინარეობს“ – წერს ანა მალიარი.
იგი დასძენს, რომ გასული კვირის განმავლობაში, ოპერატიული მდგომარეობის გაუმჯობესებისა და ფრონტის ხაზის გასწორების შედეგად, გათავისუფლებული ტერიტორია 9 კვადრატული კილომეტრით გაიზარდა.
მისივე თქმით, უკრაინის სამხრეთით ქვეყნის თავდაცვის ძალები მიიწევენ მელიტოპოლისა და ბერდიანსკის, კერძოდ, ნოვოდაროვკას, პრიუტნოიეს, ნოვოდანილოვკას, რობოტინოს, ნოვოსელკასა და სტარომაიორსკის მიმართულებით.
ანა მალიარის თქმით, დამცველები ყველა მიმართულებით წარმატებულები იყვნენ და გასული კვირის განმავლობაში გათავისუფლებული ტერიტორიები 28.4 კვ.კმ-ით გაიზარდა.
