Batumelebi

გარემოს ეროვნული სააგენტო გაფრთხილებას ავრცელებს მოსალოდნელი ამინდის შესახებ.

სააგენტოს ცნობით, 2 და 3 სექტემბერს, დღის მეორე ნახევრიდან, 4 სექტემბრის დილამდე საქართველოს ტერიტორიის უმეტეს ნაწილზე მოსალოდნელია ხანმოკლე წვიმა, ზოგან ძლიერი. ასევე, სეტყვა და ქარი.

„მოსალოდნელმა ძლიერმა ნალექებმა საქართველოს მდინარეებზე შესაძლებელია წყლის დონეების მნიშვნელოვანი მატება, პატარა მდინარეებზე წყალმოვარდნები, ხოლო მთიან ზონებში მეწყრულ-ღვარცოფული პროცესების ჩასახვა-გააქტიურება გამოიწვიოს“ – წერს სააგენტო.

„მეტი რა უნდა მოხდეს ცხოვრებაში, რომ ვერ გავუძლო? რის ატანას ვეღარ შევძლებ ამის მერე? იცი, რა კარგია, როცა სირთულეებს დაძლევ და ასე იწყებ ფიქრს? ვფიქრობ ახლა ასე. ორთვიანი სამხედრო წვრთნების გავლის შემდეგ ამერიკის საჰაერო ძალებში მოსახვედრად.

წარმოიდგინეთ, ტეხასის 45 გრადუსი სიცხე, 18 საათი დგახარ ფეხზე და ღამით საშუალოდ 5 საათი გძინავს. გწვრთნიან ფიზიკურად და ფსიქოლოგიურად. გაართმევ თუ არა წვრთნებს თავს, დამოკიდებულია იმაზე, კრიტიკულ მომენტში რამდენად სწორ დროს შეძლებს შენი გონება სწორი გადაწყვეტილებების მიღებას.

2 თვე შენ, როგორც ადამიანი, შენი სურვილებით და საჭიროებებით – არ არსებობ. კედლის მიღმა, სადაც წვრთნები ტარდება, ვერავის და ვერაფერს ხედავ, ყველაფერს მოწყვეტილი ხარ, არ გაქვს ტელეფონი, ვერავის ეკონტაქტები. ერთადერთი მისია გაქვს: ყველაფერს უნდა გაუძლო და გადარჩე“, – ასე აღწერს 26 წლის ბარბარე ურიდია ამერიკაში, ტეხასის შტატში სამხედრო წვრთნებს, რომელიც წელს გაიარა.

• „ჩემი გადაწყვეტილება არაორდინალური და ამბიციური იყო“

წვრთნების დასრულების შემდეგ ხალხით სავსე დიდ მოედანზე სამხედრო სერტიფიკატი რომ გადასცეს, სახალხოდ გამოაცხადეს, რომ ამერიკის მოქალაქეობასაც ანიჭებდნენ. „წარმოუდგენელი ამბავი იყო, ამერიკაში ჩასვლიდან რამდენიმე თვეში მომანიჭეს მოქალაქეობა. ეს ჩემს ცხოვრებაში ერთ-ერთი ყველაზე ამაღელვებელი მომენტი იყო“, – იხსენებს ბარბარე, მხატვარი და ბოდიარტისტი თბილისიდან, ახლა უკვე აშშ-ის საჰაერო ძალების სამხედრო კოლეჯის სტუდენტიც.

ბარბარე ემიგრაციაში 11 თვის წინ წავიდა.

„ჩემი გადაწყვეტილება არაორდინალური და ამბიციური იყო, ალბათობა იმისა, რომ ამერიკის საჰაერო ძალებში ვერ ჩავრიცხულიყავი და პირველივე თეორიული გამოცდებიც კი ვერ ჩამებარებინა, დიდი იყო“, – ამბობს ბარბარე.

პირველ რიგში, სახელმწიფო გამოცდის თეორიული ნაწილი უნდა ჩაებარებინა, წვრთნებამდე რომ მისულიყო. რამდენიმე საგანი ჩააბარა, მათ შორის მექანიკა და ინჟინერია, რის შესახებაც მანამდე ზოგადი ინფორმაციაც კი არ ჰქონდა.

„ვიჯექი და საათობით, ყოველდღე ვმეცადინეობდი, ადამიანიც კი არ მყავდა ირგვლივ ისეთი, ვისაც მექანიკისა და ინჟინერიის რამე გაეგებოდა, დამეხმარებოდა.

ამ გამოცდების ქულები განსაზღვრავდა საბუთებისა და დოკუმენტების მომზადების ეტაპზე გადასვლას. ჩავაბარე ეს გამოცდები. დაიწყო მეორე ეტაპი. იმდენ დოკუმენტსა და წვრილმან საბუთს გთხოვენ, იმდენ რამეზე გიწევს მოკლე დროში ერთდროულად ფიქრი, მაგრამ ეს ყველაფერი სინამდვილეში კიდევ უფრო რთული პროცესებისთვის მამზადებდა“, – ამბობს ბარბარე.

მეორე ეტაპი ზემოხსენებული ორთვიანი წვრთნები იყო, საბაზისო სამხედრო წვრთნა. ბარბარე ჰყვება, რომ ამერიკული სამხედრო ძალების სხვადასხვა დანაყოფი: საჰაერო ძალები, საზღვაო ფლოტი თუ კოსმოსური ძალები სხვადასხვა ბაზაზე იწვრთნებიან.

• „ყველა სხვადასხვა აქცენტით, სხვადასხვანაირი ინგლისურით გელაპარაკება, თავიდან შეიძლება გაგიჟდე, სანამ შეეგუები“

ორთვიანი სამხედრო წვრთნის შემდეგ ბარბარემ Air Man-ის სტატუსი მიიღო.

მერე სამხედრო კოლეჯში დაიწყო სწავლა და ახლა სამხედრო  საქმეს სწავლობს. ცხოვრობს სტუდენტთა საერთო საცხოვრებელში.

„ყველაზე რთული სამხედრო წვრთნები იყო, კოლეჯში სწავლა ბევრად მარტივია. აქაც არის სპეციფიკური წესები, რასაც უნდა დაემორჩილო, მაგრამ ამ წესებთან შეგუება შესაძლებელია.

წვრთნებს რაც შეეხება, ის ორი თვე სრულიად შეუსაბამოა ადამიანის ცხოვრების ყოველდღიურობასთან, მხოლოდ კონკრეტული დროით თუ გაუძლებს ამას ადამიანი“, – ამბობს ბარბარე.

კოლეჯის დასრულების შემდეგ ის საჰაერო ოპერატიულ ძალებში დაიწყებს სამსახურს.

„რთული იყო ამ გზის გავლა, მე არ მქონდა გამოცდილება და ბაზა სამხედრო სამსახურისთვის, მაგრამ რახან საჰაერო ძალებში გაერთიანება გადავწყვიტე, ძალიან დაჩქარდა ჩემი ადაპტაციის პროცესი. ეს უსწრაფესი რიტმი ძალიან მტკივნეული იყო და რთული. ენის ბარიერიც მქონდა, რასაც ნელ-ნელა ვძლევ. არ იყო ჩემი ინგლისური იდეალური, როცა აქ ჩამოვედი. თან ყველა სხვადასხვა აქცენტით, სხვადასხვანაირი ინგლისურით გელაპარაკება, თავიდან შეიძლება გაგიჟდე, სანამ შეეგუები.

ამ ტემპმა და სამხედრო წვრთნებმა სხვა ადამიანად მაქცია, გამაძლიერა“, – ამბობს ბარბარე.

მისთვის ახალ გარემოში ცხოვრებამ ბევრი რამ შეცვალა. დაბალი თვითშეფასება მქონდა, ახლა ასე არ არის და თითოეული წუთიც ძვირფასია ჩემთვის. ვფიქრობ, როგორ და რაში გამოვიყენებ სასარგებლოდო, – ამბობს ბარბარე.

• „ეს ქვეყანა ყველა ადამიანში პოულობს რაღაცას, რისი გააქტიურებითაც იღებს შედეგს“

ბარბარესთვის საქართველოში ცხოვრება ძალიან რთული იყო. მხატვარია და მიაჩნია, რომ საქართველო არ სწყალობს მხატვრებს:

„ამით ვერ იცხოვრებ. საშუალოსტატისტიკური ქართველი ორიენტირებულია გადარჩენაზე: ფიქრობს, ჰქონდეს საკვები და თავშესაფარი, დაიკმაყოფილოს ელემენტარული საჭიროებები.

სულიერი საზრდო, ხელოვნება, კულტურა, განათლება – ფუფუნებაა. ჩემი, როგორც მხატვრის ცხოვრება საქართველოში დალხენილი არ ყოფილა, ვაპროტესტებდი ამ ყოფას, ვიყავი სამოქალაქო აქტივისტი, ყოველთვის ვიდექი ჩაგრული უმცირესობების გვერდით აქციებზე“, – გვიყვება ბარბარე.

ამბობს, რომ საქართველოდან წასვლის გადაწყვეტილება მძიმე სოციალური მდგომარეობის, სტრესული რეალობის გამო გადაწყვიტა.

„პირველი დიდი ტრავმა სკოლაში მივიღე. ბოლო ზარის ღონისძიება მიმყავდა 2015 წელს, მიხაროდა ცხოვრების ახალ ეტაპზე გადასვლა და თმა ვარდისფრად შევიღებე. ამის გამო დირექტორმა მომხსნა ღონისძიებიდან და გამაგდო. ეს ჩემთვის დიდი შეურაცხყოფა იყო, კარგი მოსწავლე ვიყავი სკოლაში. ამიხსნეს, რომ სკოლის იმიჯს ვარცხვენდი“, – იხსენებს ბარბარე.

ფიქრობს, რომ ქვეყანა ისეთია, როგორც თითოეულ ინდივიდს, ერთ კონკრეტულ ადამიანს ეპყრობა საზოგადოება, გარემო.

რა გახდა მისთვის ცხადი ამერიკაში 11-თვიანი ცხოვრების შემდეგ, რა შთაბეჭდილება აქვს ამ ქვეყანაზე და როგორ ახასიათებს გარემოს, სადაც ახლა ცხოვრობს – ამაზე საუბრისას ბარბარე ამბობს, რომ მისთვის ახალმა ქვეყანამ დიდი შესაძლებლობები გააჩინა.

„ამერიკა თითოეულ ადამიანში შესაძლებლობას, უნარს და ნიჭს ხედავს. მიუხედავად იმისა, რომ ადამიანების ინტელექტუალური შესაძლებლობები ერთმანეთისგან განსხვავდება, ყველა ადამიანს აქვს თუნდაც ერთი საქმის საუკეთესოდ შესრულების უნარი მაინც და ეს იცის ამერიკამ.

ეს ქვეყანა ყველა ადამიანში პოულობს რაღაცას, რისი გააქტიურებითაც იღებს შედეგს, რა შედეგიც ამერიკას აქვს სხვადასხვა სფეროში, სხვადასხვა თვალსაზრისით.

ყველა ადამიანის რესურსს იყენებს. საქართველოში ასე არ ხდება. საქართველოში პირდაპირი მნიშვნელობით იფლანგება ადამიანების ენერგია და შესაძლებლობები. ეს არის ყველაზე დიდი სხვაობა ამ ორ ქვეყანას, ორ საზოგადოებას შორის, ჩემი აზრით“, – ამბობს ბარბარე და დასძენს, რომ მთავარი მისთვის ახლა საინტერესო გზაზე დგომის შეგრძნებაა.

„ვგრძნობ, რომ ჩემი აქ ყოფნა პროგრესის გზაა და ამას ვერაფერი შეაჩერებს. ზუსტად ვიცი, რომ ჩემი თავის უკეთესი ვერსიისკენ მივდივარ, ზუსტად ვიცი, რომ მომავალში დღევანდელზე უკეთეს საკუთარ თავს მივიღებ“, – ამბობს ქართველი ემიგრანტი.

ამერიკის საჰაერო ძალებში, 2021 წლის მონაცემებით, 328 888 ადამიანი მსახურობდა, ეს რიცხვი ყოველწლიურად იცვლება, მაგრამ არა მნიშვნელოვნად. 1995 წლიდან 2021 წლამდე აშშ-ის საჰაერო ძალებში მყოფთა რაოდენობა 300 000-ზე ნაკლები არასდროს ყოფილა.

„წარმოიდგინეთ, შარლ მიშელმა რომ დაურეკოს პრეზიდენტს და გაესაუბროს, რა უნდა ქნას სალომე ზურაბიშვილმა? უთხრას, რომ თქვენ ახლა დამიცადეთ, მე პოზიციის გამოხატვის თავისუფლება არ მაქვს, წავალ, მთავრობისგან ნებართვას ავიღებ და მერე დაგიბრუნდებითო?

ვინც ასეთ მარაზმულ სცენარზე საუბრობს, ის არ კითხულობს კონსტიტუციას სწორად,“ – ანა ნაცვლიშვილი, პარლამენტის წევრი „ლელოდან“ დარწმუნებულია, რომ „ქართულ ოცნებას“ პრეზიდენტის იმპიჩმენტის პროცესის დაწყებით იმის იმედი კი არ აქვს, რომ იმპიჩმენტს ბოლომდე მიიყვანს, არამედ ეს გზავნილია კრემლისთვის და ევროპისთვისაც.

რის მიღწევას ცდილობს „ქართული ოცნება“ პრეზიდენტის იმპიჩმენტის პროცესის დაწყებით? – „ბათუმელებმა“ ანა ნაცვლიშვილთა ინტერვიუ ჩაწერა.

• ქალბატონო ანა, „ქართული ოცნება“ იმპიჩმენტის პროცედურას იწყებს. თქვენი აზრით, რამდენად გამოუვა „ოცნებას“ეს? 

არაფრის გამორიცხვა არ შეიძლება, თუმცა ვფიქრობ, რომ „ოცნების“ გათვლა არის არა ის, რომ ბოლომდე მივიდეს იმპიჩმენტი და ყველა ეტაპი გაიაროს, არამედ იმის ჩვენება, რომ „ქართული ოცნება“ არის რუსეთის, კრემლის დავალების შემსრულებელი.

ეს მოძრაობა, რასაც ჩვენ ახლა ვუყურებთ, ივანიშვილის მორიგი თამაშია, თუ როგორ ვაჭრობს იგი საქართველოს და ქართველების ბედით.

ცხადია, რუსეთს არ უნდა, საქართველომ მიიღოს კანდიდატის სტატუსი. კრემლის ამოცანაა, მყარად მონიშნოს ეს ქვეყანა თავის გავლენის სფეროდ. რუსეთი ცდილობს, არათუ შემდეგი ნაბიჯები გადავდგათ ჩვენ ევროინტეგრაციის გზაზე, არამედ სტატუსიც კი არ მივიღოთ. ეს არის რუსული ხელისუფლება ქართული გვარებით და ამ თამაშის გათვლა არაა ის, რომ ბოლომდე მივიდნენ, რადგან მათ 100 ხმა დასჭირდებათ იმპიჩმენტისთვის, რაც არ აქვთ.

პრეზიდენტის იმპიჩმენტის პროცესის დაწყება არის გზავნილი კრემლისთვის და ევროპისთვისაც. „ოცნება“ ამით ეუბნება რუსეთს, რომ შესაძლოა, სამართლებრივ და პოლიტიკურ, სრულ დელეგიტიმიზაციაზეც წავიდეს, ოღონდაც კრემლის დავალება შეასრულოს.

ეს იმ ტიპის იმპიჩმენტია, როცა სხვას კი არ უწყობ იმპიჩმენტს, როცა ასეთი საფუძვლით მოქმედებ, არამედ იმპიჩმენტს უწყობ საკუთარ თავს. მართალია, პარტიის იმპიჩმენტი არ არსებობს, მაგრამ, ცხადია, პოლიტიკურ იმპიჩმენტზე ვსაუბრობ და დელეგიტიმაციაზე. ეს უზარმაზარი თვითდაზიანებაა, რომელზეც ახლა პარტია „ქართული ოცნება“ მიდის.

• ევროკავშირისთვის როგორ იკითხება „ქართული ოცნების“ მხრიდან პრეზიდენტის იმპიჩმენტის პროცესის დაწყება? 

რა თქმა უნდა, ძალიან მძიმედ იკითხება. გამოდის, ევროპის კარზე აკაკუნებს ქვეყანა, რომელსაც ჰყავს ღიად პრორუსული ხელისუფლება. ეს არის გზავნილი ევროპისთვის, რომ ყველაფერზე წამსვლელია ხელისუფლება იმისთვის, რომ არ მივიღოთ სტატუსი.

• პრეზიდენტის განცხადებები პირიქით, ხელს უშლიდაო ევროინტეგრაციასო, ირაკლი კობახიძე ამბობს. საინტერესოა ასევე სამართლებრივად უნდა დაესაბუთებინა თუ არა მთავრობას და განემარტა საზოგადოებისთვის: კონკრეტულად რის გამო შეუზღუდეს პრეზიდენტს ევროპის ქვეყნებში ვიზიტი? 

ირაკლი კობახიძის ბევრი განცხადება გვახსოვს და არცერთი არ იყო ადეკვატური დროსა და სივრცეში, მათ შორის, შოვის ტრაგედიის დროს გადარჩენილი ადამიანის დადანაშაულება.

რაც შეეხება ახსნა-განმარტებას: რა თქმა უნდა, ეს არის დისკრეცია, მაგრამ მთავრობის დისკრეციული უფლებამოსილება არ ნიშნავს თვითნებობას. ეს არც გაუმჭვირვალობას ნიშნავს.

ასეთი გადაწყვეტილებები დეტალურად უნდა იყოს ახსნილი საზოგადოებისთვის, ამის მოლოდინი კი, დღეს არც არავის აქვს. რასაც ახლა პრუტუნებენ, ეს არ არის ახსნა-განმარტება და არც არსებობს არგუმენტი, რის გამოც შეიძლება პრეზიდენტს ხელი შეუშალო ქვეყნის ევროინტეგრაციის მიზნის მიღწევაში.

• ელექტორალურად რას იგებს ამ პროცესით, თქვენი აზრით, „ქართული ოცნება“? ვიცით, რომ მოსახლეობის აბსოლუტურ უმრავლესობას ევროინტეგრაცია სურს, ამ მიდგომით კი გამოჩნდა, რომ ხელისუფლება კრემლის გულის მოგება სურს. 

„ქართულ ოცნებას“ ელექტორალური გათვლა არ აქვს. ელექტორალურად და, ზოგადად, დემოკრატიაში ეს იქნებოდა უკიდურესად წამგებიანი ნაბიჯი. მათ დემოკრატიაზე არ აქვთ გათვლა – ისინი მოქალაქეების წინაშე კი არ გრძნობენ ანგარიშვალდებულებას, არამედ რუსეთის წინაშე. კრემლისთვის კი პრინციპულად სჭირდება: საქართველოში მაინც ჰქონდეს რაღაც წარმატების იმიტაცია.

გარდა ამისა, „ოცნება“ გათვლას აკეთებს იმ მოქალაქეებზე, ვისაც კვებავს დეზინფორმაციით და თვლის, რომ ეს გამოუვა, თუმცა ეს პროცესი აშიშვლებს ამოცანას: თუ რომელიმე კეთილსინდისიერ მოქალაქეს აქამდე უჭირდა იმის დაჯერება, რომ ეს ხელისუფლება პრორუსულია, ეს ნაბიჯი აღარ ტოვებს ამ ნაბიჯს.

დღეს დასავლეთი რუსეთის იზოლაციის პოლიტიკაზეა შეთანხმებული, რთულია ამ პოლიტიკის აღსრულება, მაგრამ ისინი ძალ-ღონეს არ იშურებენ. მთელი დასავლეთი რუსეთს არქმევს სახელს, როგორც ტერორისტ სახელმწიფოს და საერთაშორისო დანაშაულის ჩამდენს.

რუსეთს, რომელმაც თავისი სამხედრო ამოცანა უკრაინაში ვერ შეასრულა, სჭირდება სადღაც მაინც იმის ჩვენება, რომ აქვს გავლენა რეგიონში და ეს საჯილდაო ქვაა ახლა საქართველო. ივანიშვილი კი, აგზავნის მესიჯს, რომ ის ყველაფერზე წამსვლელია.

ეს პროცედურა დარჩება ისტორიას. ეს სამართლებრივი აქტია და ნებისმიერი პირი, რომელიც მას მხარს დაუჭერს, იქნება კონსტიტუციის 78-ე მუხლის დამრღვევი. ეს მუხლი ყველას გვავალებს, ვიმუშაოთ ევროინტეგრაციისთვის.

„ქართულ ოცნებას“ რომ რეალურად სურდეს სტატუსის მიღება, მინიმუმ თვითონ უნდა აწყობდნენ ევროპაში მსგავს ტურნეს, ან თუ ეჭვიანობაა პრეზიდენტზე, მაშინ ერთად უნდა გაეკეთებინათ ეს.

• თქვენი დაკვირვებით, დამოუკიდებელი მოთამაშე ხდება სალომე ზურაბიშვილი?

თავს შევიკავებ ამაზე საუბრისგან, ეს პოლიტოლოგებმა გაარჩიონ. ჩემთვის ეს საკითხი არ დაიყვანება მხოლოდ ზურაბიშვილის და „ოცნების“ ურთიერთობამდე – მწვავეა ეს თუ მოჩვენებითი.

ჩემთვის თემა არის ის, რომ საქართველოს დღევანდელი ხელისუფლება არის კრემლის დავალების შემსრულებელი. ეს რუსულ კანონზე მძიმე შემთხვევაა, რადგან აქ მეორე კენჭისყრა აღარ იქნება, ვეღარ იტყვიან, რომ უკან დაიხიეს…

ეს არ არის ევროპაში ქვეყნის შემყვანი ხელისუფლება. თქვენ რომ იყოთ ევროპის რომელიმე ქვეყნის ლიდერი და ასეთი ქვეყანა გიკაკუნებდეთ კარზე, სადაც პრეზიდენტს სტატუსის თხოვნის ტურნეს გამო იმპიჩმენტი დაუწყეს, რა დასკვნას გამოიტანთ ასეთ ქვეყანაზე?

• გამორიცხავთ, რომ „ქართულ ოცნებას“ ჰქონდა კონკრეტული საფუძველი, რის გამოც შეუზღუდეს პრეზიდენტს ვიზიტი ევროპაში? 

ეს არის კონსტიტუციის სულისკვეთების საწინააღმდეგოდ წაკითხვა, როცა ავითარებენ პოზიციას, რომ პრეზიდენტის ყოველ ნაბიჯს სჭირდება საქართველოს მთავრობის თანხმობა.

წარმოიდგინეთ, შარლ მიშელმა  რომ დაურეკოს პრეზიდენტს და გაესაუბროს, რა უნდა ქნას სალომე ზურაბიშვილმა? უთხრას, რომ თქვენ ახლა დამიცადეთ, მე პოზიციის გამოხატვის თავისუფლება არ მაქვს, წავალ, მთავრობისგან ნებართვას ავიღებ და მერე დაგიბრუნდებითო?

ვინც ასეთ მარაზმულ სცენარზე საუბრობს, ის არ კითხულობს კონსტიტუციას სწორად.

კონსტიტუცია დაირღვა თუ არა, ეს საერთოდ ხელოვნურად შემოტანილი თემაა. ნებართვა არ სჭირდება პრეზიდენტს თავისი პოზიციონირებისთვის, რადგან ის არის სახელმწიფოს მეთაური, დამოუკიდებლობის და ერთიანობის სიმბოლო და საგარეო პოლიტიკაში როლის მქონე.

მთავრობასთან შეთანხმება არის საჭირო იმ შემთხვევაში, როცა გარკვეულ პირობას დებ ქვეყნის სახელით, როცა ხელშეკრულებას აწერ ხელს. ასეთ შემთხვევაშია პასუხისმგებლობა თანაზიარი და ვერ იმოქმედებს პრეზიდენტი მთავრობის თანხმობის გარეშე. კონსტიტუცია პირიქით გვავალებს ყველას, ყველაფერი გააკეთე ევროინტეგრაციას რომ შეეწყოს ხელიო.

„ქართული ოცნების“ ამოცანაა ასევე ის, რომ საინფორმაციო ველი შეიცვალოს როგორმე – შოვის ტრაგედია ჰკიდია „ქართული ოცნების“ თავზე. ამ ტრაგედიიდან „ქართული ოცნება“ ასე მარტივად ვერ უნდა გამოძვრეს.

ამ თემაზე:

„იმპიჩმენტის პროცედურის პირველი ეტაპია იმპიჩმენტის პროცედურის აღძვრა. ამისთვის საჭიროა პარლამენტის სრული შემადგენლობის არანაკლებ 1/3 [სულ მცირე 50 დეპუტატი], – აღნიშნულია „ახალგაზრდა იურისტთა ასოციაციის“ მიერ დღეს, პირველ სექტემბერს გავრცელებულ ინფორმაციაში. საია განმარტავს, რა პროცედურა სჭირდება პრეზიდენტის იმპიჩმენტს და რა მოხდება შემდეგ, თუ იმპიჩმენტი შედგება.

„ქართული ოცნება“ პრეზიდენტ სალომე ზურაბიშვილის იმპიჩმენტის პროცედურას იწყებს. ამის შესახებ პარტიის ლიდერმა ირაკლი კობახიძემ დღეს, პირველ სექტემბერს, განაცხადა პარტიის პოლიტსაბჭოს სხდომის გამართვის შემდეგ.

• „იმპიჩმენტის აღძვრის თაობაზე გადაწყვეტილების მიღების შემდეგ, საკითხი 7 დღის ვადაში გადაეცემა საკონსტიტუციო სასამართლოს.
• საკონსტიტუციო სასამართლო ამ საკითხს განიხილავს და 1 თვის ვადაში ადგენს, დაარღვია თუ არა თანამდებობის პირმა კონსტიტუცია, ან არსებობს თუ არა მის ქმედებაში დანაშაულის ნიშნები. საქმეს განიხილავს 9-წევრიანი პლენუმი, გადაწყვეტილების მისაღებად კი 6 მოსამართლის თანხმობაა საჭირო.
• თუ არ დადასტურდა ეს ფაქტები [„ქართული ოცნება“ საუბრობს პრეზიდენტის მხრიდან კონსტიტუციის დარღვევაზე, თუმცა ამ დრომდე არ წარმოუდგენია კონკრეტული საფუძვლები, თუ რის გამო შეუზღუდა მთავრობამ პრეზიდენტს ვიზიტი ევროპის ქვეყნებში. ავტ], საქმე წყდება.
• თუ საკონსტიტუციო სასამართლომ თავისი დასკვნით დაადასტურა თანამდებობის პირის მიერ კონსტიტუციის დარღვევა ან მის ქმედებაში დანაშაულის ნიშნების არსებობა, პარლამენტი დასკვნის წარდგენიდან 2 კვირის ვადაში განიხილავს და კენჭს უყრის იმპიჩმენტის წესით მისი თანამდებობიდან გადაყენების საკითხს.
• პრეზიდენტი იმპიჩმენტის წესით თანამდებობიდან გადაყენებულად ჩაითვლება, თუ ამ გადაწყვეტილებას მხარს დაუჭერს პარლამენტის სრული შემადგენლობის არანაკლებ 2/3 – სულ მცირე 100 დეპუტატი. ამ შემთხვევაში პრეზიდენტი გადაყენებულად ჩაითვლება და 45 დღის ვადაში გაიმართება რიგგარეშე არჩევნები.
• ვინაიდან 2017-2018 წლების ან შემდგომი საკონსტიტუციო ცვლილებები არ ითვალისწინებდა 2018 წელს არჩეული პრეზიდენტის შემდგომი საპრეზიდენტო არჩევნების ჩასატარებლად საგამონაკლისო წესს, ხოლო პრეზიდენტის პირდაპირი არჩევის წესი 2018 წელს არჩეული პრეზიდენტის ფიცის დადების მომენტიდან გაუქმდა, 2024 წლამდე გასამართი რიგგარეშე არჩევნები წარიმართება კონსტიტუციის ძირითად ნორმაში გაწერილი პროცედურით – არაპირდაპირი წესით.
• კერძოდ, ახალ პრეზიდენტს 5 წლის ვადით აირჩევს 300-წევრიანი კოლეგია, რომლის შემადგენლობაშიც შევლენ: პარლამენტის ყველა წევრი, აფხაზეთისა და აჭარის ავტონომიური რესპუბლიკების უმაღლესი საბჭოების წევრები და საკრებულოების შემადგენლობიდან პარტიების მიერ დანიშნული წევრები. პრეზიდენტი აირჩევა კოლეგიის სრული შემადგენლობის 2/3-ის მხარდაჭერით [200 ხმა].
• თუ პარლამენტმა სასამართლოს დასკვნის მიღებიდან 2 თვის ვადაში არ მიიღო გადაწყვეტილება თანამდებობის პირის იმპიჩმენტის წესით თანამდებობიდან გადაყენების შესახებ, იმავე საფუძვლით იმპიჩმენტის პროცედურის დაწყება დაუშვებელია.
• ამასთან, საქართველოს პრეზიდენტის იმპიჩმენტის პროცედურის განხორციელება საგანგებო ან საომარი მდგომარეობის დროს არ შეიძლება.

———————-

საქართველოს პრეზიდენტმა ევროპულ ქვეყნებში ვიზიტი უნებართვოდ მას შემდეგ გადაწყვიტა, რაც საქართველოს მთავრობამ მას ჯერ უკრაინაში ვიზიტზე უთხრა უარი, შემდეგ კი ყველა საერთაშორისო ვიზიტი დაუბლოკა.

„ქართული ოცნების“ თავმჯდომარე ირაკლი კობახიძე ამბობს, რომ ეს უარი გამართლებულია როგორც სამართლებრივად, ისე – პოლიტიკურად. მისი თქმით, პრეზიდენტს კანდიდატის სტატუსის მიღებასთან დაკავშირებით მთავრობისგან განსხვავებული პოზიცია აქვს და ეს არის ძირითადი მიზეზი.

სპეციალური საგამოძიებო სამსახურის ინფორმაციით, თბილისსა და აჭარაში 4 სამართალდამცავი ძალადობაშია მხილებული.

„დანაშაულში მხილებულია საქართველოს შინაგან საქმეთა სამინისტროს მცხეთა-მთიანეთის პოლიციის დეპარტამენტის თანამშრომელი გ.გ., რომელიც 2023 წლის 8 აგვისტოს დუშეთის მუნიციპალიტეტში ყოფით ნიადაგზე წარმოშობილი კონფლიქტისას ცეცხლსასროლი იარაღით, სიცოცხლის მოსპობით დაემუქრა მოქალაქეს.

საქართველოს პროკურატურამ აღნიშნულ პირს ბრალდება მუქარისთვის წარუდგინა.

სპეციალური საგამოძიებო სამსახურის მიერ დანაშაულში მხილებულია საქართველოს შინაგან საქმეთა სამინისტროს დაცვის პოლიციის დეპარტამენტის თანამშრომელი ს.ა., რომელიც მეუღლეს  სისტემატურად აყენებდა შეურაცხყოფას და ამცირებდა, მიმდინარე წლის აგვისტოში კი მეუღლეს მათი შვილის სიცოცხლის მოსპობით დაემუქრა.

ბრალდებული დააკავეს ძალადობისა და მუქარისთვის. დანაშაული 4-დან  6 წლამდე თავისუფლების აღკვეთას ითვალისწინებს.

დანაშაულში მხილებული იქნა საქართველოს შინაგან საქმეთა სამინისტროს განსაკუთრებულ დავალებათა დეპარტამენტის თანამშრომელი ლ. კ.  რომელმაც 2023 წლის 2 ივლისს გორში, ურთიერთშელაპარაკების ნიადაგზე, ფიზიკური შეურაცხყოფა მიაყენა და სიცოცხლის მოსპობით დაემუქრა მოქალაქეს.

საქართველოს პროკურატურამ სამართალდამცავს ძალადობისა და მუქარისთვის  ბრალდება წარუდგინა.

სპეციალური საგამოძიებო სამსახურის მიერ დანაშაულში, ასევე, მხილებულია საქართველოს შინაგან საქმეთა სამინისტროს დაცვის პოლიციის დეპარტამენტის ინსპექტორი გ.ჭ, რომელმაც 2022 წლის ნოემბრის თვეში ქობულეთის მუნიციპალიტეტის სოფელ ხალაში, საკუთარ საცხოვრებელ სახლში, არასრულწლოვანი შვილების თანდასწრებით მეუღლეს ფიზიკური შეურაცხყოფა მიაყენა, ხოლო შემდგომში სიცოცხლის მოსპობით დაემუქრა.

საქართველოს პროკურატურამ სამართალდამცავს ძალადობისა და მუქარისთვის  ბრალდება წარუდგინა“ – ნათქვამია საგამოძიებო სამსახურის მიერ.

•  5439 – პარკირების საფასურის გადახდის გარეშე დგომა;
• 2724 – ტროტუარზე დგომა;
• 1979 – დგომა-გაჩერებისა და სხვა ნიშნების დარღვევა;
•  783 – ავტობუსის გაჩერებაზე დგომა;
•  410 – ველობილიკზე არასწორი პარკირება;
• 78 – შშმ პირის ტრანსპორტისთვის განსაზღვრულ ადგილზე დგომა;
•  514 – ევაკუირებულია

საქართველოს მილიონზე მეტი მოქალაქე, რომელიც დაგროვებით საპენსიო სქემაშია ჩართული, 2028 წლის იანვრამდე დაბალრისკიან პორტფელში ავტომატურად დარჩება.

შესაბამისი კანონპროექტის მეორე მოსმენით განხილვა ჯანდაცვის კომიტეტში 4 სექტემბერსაა ჩანიშნული.

• რა მოხდა?

2018 წელს ქვეყანაში მიიღეს კანონი „დაგროვებითი პენსიის შესახებ“. ამ კანონის საფუძველზე 2019 წლის 1 იანვარს ამოქმედდა საპენსიო დანაზოგის სქემა და შეიქმნა საპენსიო სააგენტო.

2018 წელს მიღებულ კანონში იყო ჩანაწერი, რომ პირველი ხუთი წელი, 2019 წლის პირველი იანვრიდან 2023 წლის 6 აგვისტომდე, საპენსიო დანაზოგების ინვესტირება უნდა მომხდარიყო ნაკლებად რისკიან საინვესტიციო პორტფელში.

2023 წლის აგვისტოში საპენსიო სააგენტომ გაავრცელა ინფორმაცია და მოქალაქეებს 6 სექტემბრამდე მისცა ვადა თავიანთი საპენსიო დანაზოგების სხვადასხვა რისკის მქონე საინვესტიციო პორტფელებში განსათავსებლად.

საპენსიო სააგენტო მოქალაქეებს სამ საინვესტიციო პორტფელს სთავაზობდა – ნაკლებრისკიანს, საშუალო რისკიანს და მაღალ რისკიანს.

ინფორმაციამ მოქალაქეებში დაბნეულობა და კითხვები გამოიწვია. განმარტების მიუხედავად, ბოლომდე ნათელი არ იყო, რა სარგებელი ჰქონდა თითოეულ პორტფელს.

საბოლოოდ , 25 აგვისტოს ხელისუფლებამ თქვა, რომ საკანონმდებლო ცვლილებას გეგმავდა, რომლის მიხედვითაც 2028 წლის იანვრამდე საპენსიო სქემის ყველა მონაწილის დანაზოგი დაბალრისკიან პორტფელში დარჩებოდა.

• საპენსიო რეფორმა – რა სქემებია საქართველოში

საქართველოში არსებობს ორი ტიპის საპენსიო სისტემა – სახელმწიფო პენსია და სავალდებულო დაგროვებითი სქემა.

ასევე, მუშაობენ ნებაყოფლობითი დაგროვებითი სქემის ამოქმედებაზე.

ამჟამად ქვეყანაში 800 ათასზე მეტი პენსიონერია, ვინც სახელმწიფო პენსიას იღებს. ამას გარდა, საპენსიო სააგენტოს მონაცემებით, სავალდებულო დაგროვებითი სქემაში 2023 წლის აგვისტოს მონაცემებით 1 416 142 პირია ჩართული.

დაგროვებითი პენსიით უკვე ისარგებლა 4 800-მა მონაწილემ.

სავალდებულო დაგროვებითი პენსიის სქემაში ჩართვა რეგულირდება საქართველოს კანონით „დაგროვებითი პენსიის შესახებ“.

„ეს კანონი არის ხელშეკრულება, რომელიც ხალხმა გააფორმა საპენსიო სააგენტოსთან და ამ ხელშეკრულების ფარგლებში გადასცა თავის ფული სამართავად,“ – ასე ხსნის საპენსიო სააგენტოს ფუნქციას გოგა მელიქიძე, საპენსიო სააგენტოს უფროსი საინვესტიციო ოფიცერი.

• რა არჩევანი აქვთ საპენსიო სქემაში ჩართულებს

მართალია, ახალი კანონპროექტით, სქემის ყველა მონაწილე 2028 წლის იანვრამდე დაბალრისკიან პორტფელში რჩება, მაგრამ მოქალაქეებს აქვთ არჩევანი, თავიანთი დანაზოგი სამ საინვესტიციო პორტფელში – დაბალრისკიანში, საშუალორისკიანში და მაღალრისკიანში გადაანაწილონ.

• რას ნიშნავს დაბალრისკიანი საინვესტიციო პორტფელი?

ნაკლებადრისკიანი საინვესტიციო პორტფელი ნიშნავს, რომ საპენსიო დანაზოგის 20 % დაბანდებულია უცხოურ აქციებში, 20 % სახაზინო ობლიგაციებში და 60 %-ის საბანკო დეპოზიტები განთავსებულია ლარში.

• რას ნიშნავს საშუალორისკიანი საინვესტიციო პორტფელი?

საშუალორისკიანი საინვესტიციო პორტფელი ნიშნავს, რომ საპენსიო დანაზოგის 35 % დაბანდებულია უცხოურ აქციებში,  20 % სახაზინო ობლიგაციებში და 45 %-ის საბანკო დეპოზიტები განთავსებულია ლარში.

• რას ნიშნავს მაღალრისკიანი საინვესტიციო პროტფელი?

მაღალრისკიანი საინვესტიციო პორტფელი ნიშნავს, რომ საპენსიო დანაზოგის 55 % დაბანდებულია უცხოურ აქციებში,  20 % სახაზინო ობლიგაციებში და 25 %-ის საბანკო დეპოზიტები განთავსებულია ლარში.

საპენსიო სააგენტომ გასულ კვირას ვებინარი გამართა. ვებინარზე დაგეგმილი ცვლილებები მიმოიხილა საპენსიო სააგენტოს უფროსმა საინვესტიციო ოფიცერმა, გოგა მელიქიძემ.

გოგა მელიქიძის განმარტებით, მთავარი სხვაობა საინვესტიციო პორტფელებს შორის აქტივების გადანაწილებაა. ეს, თავის მხრივ, გრძელ ვადაში განსხვავებულ მომგებიანობასა და რისკიანობასთანაა დაკავშირებული.

ნაკლებად რისკიან პორტფელში, დაგროვებული დანაზოგები განთავსებულია საბანკო ანაბრებსა და ობლიგაციებში. მცირე დოზით დასაშვებია ინვესტირება უცხოურ ვალუტასა და გლობალურ აქციებში.

„იმის გამო, რომ ინვესტიციების უმეტესობა საპროცენტო ინსტრუმენტებში ხდება, ეს პორტფელი სტაბილური მომგებიანობით და შედარებით ნაკლები რისკით ხასიათდება. ამიტომ მას შეიძლება სტაბილური პორტფელი ვუწოდოთ.

გასული 5 წლის განმავლობაში აღნიშნული პორტფელის მომგებიანობა შეადგენდა ჯამში 49%-ს, რაც წლიურ 9.3%-ს შეესაბამება. ინფლაციასთან მიმართებით ამ სტაბილურმა (ნაკლებად რისკიანმა) პორტფელმა ჯამში 10.13%-ით მეტი, ხოლო წლიურად საშუალოდ 2.17%-ით მეტი მომგებიანობა აჩვენა.

ეს პორტფელი უკეთ შეეფერება იმ ადამიანებს, ვინც ინვესტიციებში სიფრთხილეს არჩევს და არ უყვარს რისკის აღება. ხშირად ასეთები არიან საპენსიო ასაკთან მიახლოებული ადამიანები, რომლებსაც არ სურთ პენსიაზე გასვლის წინ მათი დანაზოგების ღირებულების მნიშვნელოვანი მერყეობა,“ – განმარტავენ საპენსიო სააგენტოში.

გოგა მელიქიძის განმარტებით, მაღალრისკიან პორტფელში დაგროვებული დანაზოგები, განსხვავებით ნაკლებად-რისკიანისგან, უმეტესად ინვესტირდება უცხოურ ვალუტაში და გლობალურ აქციებში.

„დასაშვებია ინვესტირება საპროცენტო ინსტრუმენტებშიც (დეპოზიტები, ობლიგაციები), თუმცა შედარებით მცირე წილით. ეს პორტფელი გრძელ ვადაში ხასიათდება მაღალი, მზარდი მომგებიანობით, ამიტომ მას შეიძლება მზარდი პორტფელი ვუწოდოთ.

აქციების ფასის შესაძლო მერყეობის გამო, ამ პორტფელს თან ახლავს შედარებით მაღალი რისკიც. კანონის შესაბამისად, მზარდ პორტფელში უცხოური აქტივების წილი 60%-მდე შეიძლება გაიზარდოს. ეს იმას ნიშნავს, რომ აქტივების ძირითადი ნაწილის ინვესტირება საერთაშორისო საფონდო ბირჟებზე, კომპანიების აქციებში მოხდება.

გარდა ამისა, პორტფელის 10%-მდე მოცულობის ინვესტირება შესაძლებელია „ალტერნატიული“ აქტივების კლასშიც, რაც მოიცავს მაღალი შემოსავლიანობის მქონე ისეთ აქტივებს როგორებიცაა საინვესტიციო ფონდები, პირდაპირი სესხები და სხვა.

„დაკარგვის რისკი არის მინიმალური,“ – ამტიცებს გოგა მელიქიძე, საპენსიო სააგენტოს უფროსი საინვესტიციო ოფიცერი და აგრძელებს:

„რატომ? იმიტომ, რომ საოპერაციო რისკები არის ბოლომდე გადაზღვეული. არ ხდება ამ საპენსიო სააგენტოში საინვესტიციო პორტფელების შენახვა ან რამე მსგავსი. საპენსიო სააგენტოს ჰყავს სპეცდეპოზიტარი. გვიდევს საიტზე, თუ ვინ არის ჩვენი სპეცდეპოზიტარი, რომელიც შევარჩიეთ საკმაოდ დეტალური პროცესით. ახლა გადის იმ ხელშეკრულებას ვადა და მეორე რაუნდი იქნება ხელშეკრულების.

ეს კანონში წერია, რომ უნდა გვყავდეს სპეცდეპოზიტარი, სადაც შევინახვათ ყველა საპენსიო აქტივს.

საქართველოს ბანკია წარმომადგენელი და საქართველოს ბანკია სპეცდეპოზიტარი. ის ინახავს ყველა საპენსიო აქტივს, რასაც ჩვენ ვყიდულობთ.

ასევე არის ანგარიშსწორების აგენტი.

მაგრამ საოპერაციო რისკი მაქსიმალურად დაზღვეულია. გამორიცხულია, არაფერი არ დაიკარგება.

სხვა რისკები რა არის? არის ინფლაცია. ინფლაცია ყველა ქვეყანაშია და ჩვენგან დამოუკიდებლად ხდება.

ბოლო 4 წლის განმავლობაში ჩვენ გვქონდა კოვიდი, მერე იყო ინფლაცია, მერე იყო ომი და მერე იყო გაათმაგებული ინფლაცია. ყველაფერი მოხდა, რაც სხვა დროს დეკადის პერიოდზე ხდებოდა ხოლმე. მიუხედავად ამისა, პროტფელს რეალური ამონაგები დავაწერინეთ, 12 % და ეს ღელვა კარგად გავიარეთ.

ინფლაცია არის და იქნება. ჩვენი მთავარი საინვესტიციო მიზანი არის დავძლიოთ ინფლაცია.

ბევრი მონაწილე კითხულობს საკმაოდ ლეგიტიმურად, რომ მე რომ დღეს ერთი ლარი მიჩანს, 65 წელს რომ მივაღწევ, საპენსიო ასაკს და გავალ პენსიაზე, ეს ერთი ლარი ხომ აღარაფერი აღარ იქნება. ამას საერთოდ ღირებულება არ ექნება ხო?

სწორედ მანდ შემოდის მთავარი საინვესტიციო მიზანი, რომ ჩვენი ამოცანაა დავძლიოთ ინფლაცია. თუ ინფლაციას ვჯობნით, კარგად ვმუშაობთ, თუ ინფლაციას ვერ ვჯობნით, ცუდად ვმუშაობთ.

ამიტომ ვყიდულობთ აქციებს. აქციები არის საშუალება, რომ ინფლაცია დავამარცხოთ“.

გოგა მელიქიძის თქმით, შედარებით გაზრდილ რისკიანობას გლობალური აქციების მაღალი წონა განაპირობებს (დაბალრისკიან პორტფელში გლობალური აქციების წილი მხოლოდ 20%-ია), გლობალური აქციების ბაზარს კი მოკლევადიან პერიოდში მეტი მერყეობა ახასიათებს.

„თუ შევხედავთ გლობალური აქციების ასწლეულიან ისტორიას, ვნახავთ, რომ კრიზისულ პერიოდებში აქციების ფასები შეიძლება მნიშვნელოვნად შემცირდეს, თუმცა მათი დაკარგვის ალბათობა მინიმალურია.

ამასთან, მსგავსი ტიპის მერყეობა ისტორიულად მხოლოდ მოკლევადიან პერიოდში გრძელდება, რის შემდეგაც აქციების ფასები საწყის მაჩვენებლებს უბრუნდება და ზრდას განაგრძობს. გრძელვადიან პერსპექტივაში გლობალურ აქციებში ინვესტირება სხვა აქტივების კლასებთან შედარებით, როგორებიცაა მაგალითად ობლიგაციები და ფულადი სახსრები, ბევრად უფრო მომგებიანია და ერთ-ერთი საუკეთესო გზაა კაპიტალის ზრდის და ინფლაციის დამარცხების“, – განმარტავს საპენსიო სააგენტოს უფროსი საინვესტიციო ოფიცერი.

რა სარგებელი შეიძლება ჰქონდეს დაბალრისკიან საინვესტიციო პორტფელის მქონე სქემის მონაწილეს, თუკი ისე მოხდება, რომ წლიური მოგება ინფლაციის დონესაც არ აღემატება? – ვკითხეთ გოგა მელიქიძეს. 

საპენსიო სააგენტოს უფროსი საინვესტიციო ოფიცერის განმარტავს, რომ სტაბილურ, ანუ ნაკლებადრისკიან პორტფელში განთავსებული დაგროვებული დანაზოგები ძირითადად ინვესტირდება საპროცენტო ინსტრუმენტებში, როგორებიცაა საბანკო ანაბრები და ობლიგაციები, ხოლო უცხოურ ვალუტაში და გლობალურ აქციებში ინვესტირების წილი შეზღუდულია პორტფელის 20%-მდე. ვინაიდან ინვესტიციების უმეტესობა საპროცენტო ინსტრუმენტებში ხორციელდება, ეს პორტფელი სტაბილური მომგებიანობით და შედარებით ნაკლები რისკით ხასიათდება.

„გასული 5 წლის განმავლობაში აღნიშნული პორტფელის წლიური საშუალო მომგებიანობა 9.4%-ი იყო, რამაც 5 წლის ჯამში 52% შეადგინა. ინფლაციასთან მიმართებით 10.13%-ით მეტი მომგებიანობა აჩვენა (რეალური ამონაგები), ხოლო წლიურად საშუალოდ 2.17%-ით მეტი.

მაღალი ინფლაციის პირობებში, კონკრეტულ პერიოდებში შესაძლებელია სტაბილური პორტფელის ამონაგები ინფლაციის მაჩვენებელზე დაბალი იყოს, თუმცა ინფლაციის შენელების ფონზე რეალური ამონაგებიც გაიზრდება“.

„ბათუმელების“ კიდევ ერთი კითხვა დანაზოგის დაბანდებას შეეხებოდა. დავინტერესდით, როგორ ირჩევა სანდო კომპანიები, სადაც ხდება საპენსიო დანაზოგების დაბანდება? მაგალითად, რატომ მიიჩნევთ, რომელიმე ქართულ კომპანიას უფრო სანდოდ, ვიდრე უცხოური და რა პრინციპით კეთდება ეს არჩევანი?

„საპენსიო სააგენტოს საინვესტიციო მანდატი მოიცავს ინვესტიციების განხორციელებას შემდეგ აქტივების კლასებში: გლობალურ აქციებში, ქართულ საბანკო დეპოზიტებსა და ქართულ სახაზინო და კორპორაციულ ობლიგაციებში.

როდესაც ინვესტირება ადგილობრივ კორპორაციულ ობლიგაციებში ხორციელდება, ინვესტირებამდე საინვესტიციო სამსახური დეტალურად სწავლობს გამომშვებ კომპანიას, მათ შორის კომპანიის ბიზნეს მოდელს, ფინანსურ მდგომარეობას, მმართველობით სტრუქტურას და საკრედიტო რეიტინგის ანალიზს, რის საფუძველზეც მიირება საინვესტიციო გადაწყვეტილება.

რაც შეეხება გლობალურ აქციებს, საპენსიო სააგენტო არ ირჩევს რომელიმე კონკრეტულ კომპანიას საინვესტიციოდ, არამედ ინვესტირებას ახორციელებს ინდექს ფონდებში, რომლებიც აერთიანებს ათასობით კომპანიას. საინვესტიციო საბჭოსთან ერთად შერჩეული ინდექს ფონდები დივერსიფიცირებულია გეოგრაფიულად და რომელიმე ერთი კომპანიის გავლენა ჯამურად საპენსიო დანაზოგებზე მინიმუმამდეა შემცირებული“.

საპენსიო სააგენტოს საქმიანობა რეგულირდება საქართველოს  კანონით „დაგროვებითი პენსიის შესახებ“.

საპენსიო სააგენტოს აქვს ორი მთავარი ფუნქცია:

• გაწიოს საპენსიო მომსახურება ანუ აწარმოოს საპენსიო კონტრიბუციებისა და გაცემების მენეჯმენტი
• საპენსიო დანაზოგების საინვესტიციო მართვა.

კანონის თანახმად, საპენსიო სქემის მონაწილეების საუკეთესო ინტერესების გათვალისწინებით უნდა მოხდეს მათი დანაზოგების ადმინისტრირება და მართვა.

საპენსიო სააგენტოს ჰყავს ორი საბჭო – სამეთვალყურეო საბჭო და საინვესტიციო საბჭო. ერთმანეთისგან გამიჯნული და დამოუკიდებელი ორგანო.

სამეთვალყურეო საბჭო არის პასუხისმგებელი იმაზე, რამდენად სწორად გროვდება საპენსიო კონტრიბუციები, ადმინისტრირება და გაცემა. საინვესტიციო საბჭო პასუხისმგებელია, თანხა რომელიც შემოდის მონაწილეების სახელზე, იმართოს მონაწილეების საუკეთესო ინტერესების მიხედვით.

„მთავრობა არ მართავს ამ ფულს. არც არასოდეს მართავდა და სამომავლოდაც არ გააკეთებს ამას. მთავრობა პასუხისმგებელია, გააკონტროლოს 2+2+2 პროცენტი ჯეროვნად ხომ გროვდება. ხომ არ არის საოპერაციო ხარვეზები. საპენსიო დანიშვნები, საპენსიო განაცემები ხომ სწორად ხდება და ამ მიმართულებით ხომ არის სისტემა გამართული. ეს არის სამეთვალყურეო საბჭოს პასუხისმგებლობა.

საინვესტიციო საბჭოს პასუხისმგებლობაა, რომ პოლიტიკური დღის წესრიგისგან დამოუკიდებლად მართოს საპენსიო სქემის დანაზოგები და ერთადერთი ამოცანაა – მონაწილის საუკეთესო ინტერესებით დააბანდოს ეს თანხა.

კანონი ამბობს, რომ სამეთვალყურეო საბჭო, სადაც შედიან მთავრობის წევრები, აგროვებს და გასცემს საპენსიო დანაზოგს. ამაზეა პასუხისმგებელი.

სამეთვალყურეო საბჭო ნიშნავს გენერალურ დირექტორს. საინვესტიციო საბჭო ნიშნავს უფროს საინვესტიციო ოფიცერს, რომელიც საინვესტიციო საბჭოს ქვეშ აყალიბებს საინვესტიციო სამსახურს. საინვესტიციო სამსახური საინვესტიციო საბჭოს ქვეშ დამოუკიდებლად მართავს ამ დანაზოგებს.

საინვესტიციო საბჭოს, შესაბამისად საინვესტიციო საქმიანობას არეგულირებს ეროვნული ბანკი.

საპენსიო სააგენტო არის ანგარიშვლადებული პარლამენტთან. პარლამენტი არის ზედა რგოლი. შემდეგ მოდის ეროვნული ბანკი და ის უყურებს საინვესტიციო საქმიანობას. ასეა ეს ვერტიკალი დალაგებული,“ – განმარტავს გოგა მელიქიძე.

ამავე თემაზე:

„აზვირთებული, უსახლკარო და მშიერი ხალხი წაგლეკავთ, ჩვენ დასაკარგი აღარაფერი გვაქვს,“ – ეწერა ტრანსპარენტზე, რომელიც უსახლკარო ადამიანებმა დღეს, 31 აგვისტოს, ბათუმის მერიასთან გამოფინეს. საპროტესტო აქციის მონაწილეებს ბათუმის მერიიდან და საკრებულოდან არავინ შეხვედრია.

ათობით ადამიანი ბათუმის მერიასთან პერიოდულად იკრიბება და ითხოვს ისეთი საცხოვრებლის შეთავაზებას, რომლის გამოსყიდვასაც ისინი შეძლებენ.

„წლებია ნაქირავებში ვცხოვრობთ, სოციალურად დაუცველები ვართ, „იაფი სახლი“ არ გვიწევს. მერია მხოლოდ თავშესაფარს გვთავაზობს, სადაც დღისით ვერ გაჩერდები. ყველამ იცით, რომ ქალაქში ბინები გაძვირდა, მერიაში ჩვენი მოსმენაც კი არ სურთ,“ – გვიყვება მზიური ბალაძე, რომელიც 38 წელია ცხოვრობს ნაქირავებში შშმ შვილთან ერთად.

მზიური ბალაძე ერთი წლის წინ შეხვედრია ბათუმის მერს, არჩილ ჩიქოვანს:

„დამპირდა, რომ შეიმუშავებდნენ პროგრამას, მაგრამ არაფერს არ გვთავაზობენ. იმის მერე არც მერი გვხდება და არც სხვა ვინმე, ვინც მოგვისმენს.

ჩემი შემოსავლის წყარო მხოლოდ პენსია და შვილის პენსიაა, რომელიც შშმ პირია. ჯამში 550 ლარს ვიღებთ, ქირაში კი, 350 ლარია. სასადილოში ვერ ვიარე, რადგან ორი ტრანსპორტის გამოცვლა მიწევდა, შორია.

ძალიან რთულია ამ თანხის გადანაწილება ისე, რომ გეყოს. გოგო შვილი დაოჯახებულია და ის მეხმარება, თორემ ვერ ვიარსებებდით. მე დაოჯახების დღიდან ნაქირავებში ვარ, ჩემი მეუღლე მრავალშვილიანი ოჯახიდან იყო, ელოდა ბინას საბჭოთა წყობის დროს, მაგრამ შემდეგ წყობა შეიცვალა…“ – გვითხრა მზიური ბალაძემ.

„ჩემს მცირეწლოვან შვილს აუტისტური სპექტრი აქვს, მეუღლეს მუშაობა არ შეუძლია, აგვისტოს ომის ვეტერანია, ქირაში ვართ სამი წელია და 500 ლარს ვიხდით,“ – ამბობს მადლენა გოგიტიძე. ისიც ითხოვს ბათუმის მერიისგან ისეთი პროგრამის შექმნას, რომელიც მას ბინის შეძენის შესაძლებლობას მისცემს.

„ჩვენი სახლი ქობულეთში ბანკმა წაიღო, მერე ემიგრაციაში ვიყავი თურქეთში, დავბრუნდი, შვილი გავაჩინე და მას ბევრი საჭიროება აქვს. ძალიან მეხმარება აჭარის ჯანდაცვის სამინისტრო, მაგრამ ქირის ფულს ვერ ვუთავდებით,“ – გვითხრა მადლენა გოგიტიძემ.

აქციის მონაწილეები არ გამორიცხავენ გადაკეტონ გზის სავალი ნაწილი მომავალი კვირის ხუთშაბათს, როცა ისევ ბათუმის მერიასთან, ვარდების სკვერში შეიკრიბებიან.

გულნარა აბაშიძე: „სამი ბავშვი გამოვაწყვე სასკოლოდ, 390 ლარი ვალი დამრჩა. უბინაოდ რაც დავრჩით, შვილიშვილებს მე ვზრდი, ბავშვების დედა წავიდა…ჩემი შვილი „სანდასუფთავებაში“ მუშაობს და ხელფასი 700 ლარი აქვს, ქირაში 500 ლარის ვიხდით. რა უნდა ვქნათ?“

დალი თებიძე: „მოდით და ჩემი ბინა ნახეთ – არ იცხოვრება, 450 ლარს ვიხდი თვეში, დიაბეტიანი შვილიშვილი მყავს და ოთახს ფანჯარა საერთოდ არ აქვს. ჩემი გოგო მუშაობს მხოლოდ „ნაზილბეში“ 650 ლარად. ესაა ჩვენი შემოსავალი, სოციალური გვაქვს და სასადილო, მაგრამ რაში გვყოფნის?

ხილსაც ვერ ვყიდულობთ, ან ხილს ვინღა ყიდულობს?“

ხელვაჩაურის მერიამ ბოლო 9 თვეში 9 ახალი ავტომობილი იყიდა.

4 ავტომობილის შესყიდვაზე ხელშეკრულება 2023 წლის 15 აგვისტოსაა გაფორმებული კომპანია „სტრადა მოტორსთან“.

ხელვაჩაურის მერიამ 4 ახალ მსუბუქ FIAT TIPO 1.6 -ის მარკის ავტომობილში 168 896 ლარი გადაიხადა, თითოეულში 42 224 ლარი.

ხელშეკრულებას ხელს ხელვაჩაურის მერი, ზაზა დიასამიძე და „სტრადა მოტორსის“ წარმომადგენელი აწერენ. სატენდერო წინადადებაში გაწერილი იყო მოთხოვნები, როგორი უნდა ყოფილიყო მოწოდებული ავტომობილები.

კერძოდ, ავტომობილები უნდა ყოფილიყო ახალი, არაუადრეს 2022 წლის გამოშვების, მარცხენასაჭიანი, ექსპლუატაციაში არმყოფი და განბაჟებული. ავტომობილების ფერი არ შეიძლებოდა ყოფილიყო შავი.

მანამდე ხუთი ახალი ავტომობილი ხელვაჩაურის მერიამ 2022 წლის დეკემბერში იყიდა.

ხუთ Renault Duster-ის მარკის ახალ ავტომობილში ხელვაჩაურის მერიამ 270 000 ლარი გადაიხადა, თითოეულში 54 000 ლარი.

ხელვაჩაურის მერიის მიერ ახალშეძენილ ავტომობილებს სპეციალური ბრიფინგით გამოეხმაურა „ერთიანი ნაციონალური მოძრაობის“ წევრი მიშა ბოლქვაძე.

„მხოლოდ წელს ხელვაჩაურის მუნიციპალიტეტის მერიამ სახელმწიფო ბიუჯეტიდან ნახევარი მილიონი დახარჯა საკუთარი კომფორტისთვის, მაშინ, როდესაც რუსული ოცნების ხელისუფლების პირობებში ათასზე მეტ გაჭირვებულ ოჯახს გაუუქმდა სოციალური დახმარება, მაშინ, როცა ყოველდღიურად ღარიბდებიან ჩვენი მოქალაქეები, რუსულმა ოცნებამ გადაწყვიტა, გააგრძელოს გულაობა სახელმწიფო ბიუჯეტით,“ – თქვა ბრიფინგზე მიშა ბოლქვაძემ და ხელვაჩაურის მერია კორუფციაში დაადანაშაულა.

მიშა ბოლქვაძის თქმით, მერიამ არასწორად დასახა პრიორიტეტები.

„სოფლებში არასაკმარისი ნაგვის ბუნკერების გამო, იმის გამო, რომ არ გაქვთ ავტომობილები, რომლებიც დროულად გაიტანენ ნარჩენებს, არის სრული ანტისანიტარია. კიდევ ერთხელ მოგიწოდებთ, თქვენი კომფორტისთვის კი არ შეიძინოთ ავტომობილები, შეიძინეთ ნაგვის გასატანი ავტომობილი, რომლებიც მოემსახურება სოფელში მცხოვრებ მოსახლეობას.

ეს ბიუჯეტი შევსებული აქვთ ჩვენს მოქალაქეებს, თქვენ პირადად გიხდიან ხელფასს ჩვენი მოქალაქეები და ბიუჯეტი მორგებული უნდა იყოს ჩვენს მოქალაქეებზე,“ – თქვა მიშა ბოლქვაძემ.

„ბათუმელები“ დაუკავშირდა ხელვაჩაურის მუნიციპალიტეტის მერიის საზოგადოებასთან ურთიერთობის სამსახურის ხელმძღვანელს. ჩვენ მას ვკითხეთ, რა მიზნით შეიძინა ხელვაჩაურის მერიამ 9 ახალი ავტომობილი და ვისთვის იყო ის განკუთვნილი.

„ავტომობილები შეძენილი იქნა მუნიციპალური საჭიროებისათვის, რათა ზედამხედველობის სამსახურს ქონოდა შესაძლებლობა გამართული და ეფექტიანი მუშაობის,“ – მოგვწერეს პასუხად ხელვაჩაურის მუნიციპალიტეტიდან.

გარემოს ეროვნულმა სააგენტომ შავი ზღვის წყლის ხარისხის მორიგი მონიტორინგი 15 და 19 აგვისტოს ჩაატარა. სააგენტო წერს, რომ მონიტორინგის შედეგების მიხედვით, შავი ზღვის წყლის ხარისხი ნორმის ფარგლებშია.

სააგენტოს ცნობით, კვლევებისას განისაზღვრა ქიმიური პარამეტრები, მათ შორის, 13 მძიმე მეტალი, ნავთობის ჯამური ნახშირწყალბადები, 16 პოლიარომატული ნახშირწყალბადისა და სხვა ფიზიკურ-ქიმიური პარამეტრის კონცენტრაცია.

გარემოს ეროვნული სააგენტო შავი ზღვის წყლის ხარისხის მონიტორინგს 10 დღეში ერთხელ 9 სადგურზე ახორციელებდა. 10 ივლისიდან სადგურების რაოდენობას დაემატა ანაკლია-განმუხურის ტერიტორიის 3 წერტილი. აღებულ სინჯებში ისაზღვრება 59 პარამეტრის მნიშვნელობა.

სააგენტოს ცნობით, სინჯები საანალიზოდ გარემოს ეროვნული სააგენტოს ატმოსფერული ჰაერის, წყლისა და ნიადაგის ანალიზის აკრედიტებულ ლაბორატორიაში იგზავნება, რომელიც აღჭურვილია მაღალი სიზუსტის მქონე ანალიტიკური ხელსაწყოებით და სრულად აკმაყოფილებს თანამედროვე მოთხოვნებსა და სტანდარტებს.

მწერლების თქმით, რუსულმა მედიამ გაავრცელა ინფორმაცია, რომ თითქოს ქართველი საბავშვო ავტორები მონაწილეობას მიიღებენ 30 აგვისტოს დაგეგმილ ფორუმზე მოსკოვში, რომელიც პირველი სექტემბრის ჩათვლით გაიმართება.

„ბათუმელები“ ერთ-ერთ საბავშვო მწერალსა და ილუსტრატორს, ლელა ცუცქირიძეს ესაუბრა ამ საკითხზე. მისი თქმით, ქართველი საბავშვო ავტორებისთვის დღეს, ოკუპაციისა და უკრაინაში მიმდინარე ომის პირობებში, კატეგორიულად მიუღებელია რუსულ ღონისძიებებში რაიმე ფორმით საქართველოს მონაწილეობა ან საქართველოს სახელის გაჟღერება ოკუპანტ ქვეყანაში.

„რუსულ საინფორმაციო საშუალებებში სიუჟეტები გაკეთდა იმის შესახებ, რომ თითქოს საქართველო, დსთ-ს ქვეყნებთან ერთად, მონაწილეობს მოსკოვში დაგეგმილ საბავშვო წიგნების გამოფენაზე.

დავინტერესდი, თუ ვინ მონაწილეობდა ამ ფესტივალში და ორად ორი ქართული გვარი ამოვიკითხე, რომლებიც არც ერთი არ არის მწერალი და საქართველოში რეგისტრირებული რუსული ცენტრის „აზბუკას“ თანამშრომლები არიან.

ამ დროს, მთელი რუსული მედია აჭრელებულია იმით, რომ თითქოს ქართველი ავტორებიც ვმონაწილეობთ ამ ფორუმში“ – ამბობს ლელა ცუცქირიძე.

მისი აზრით, მსგავსი ინფორმაციის გავრცელება რუსული პროპაგანდის ნაწილია და საქართველოში რეგისტრირებული რუსული ცენტრებიც ამ პოლიტიკას ატარებენ.

„როგორ შეიძლება ჩვენ, ქართველი მწერლები, ასეთ ღონისძიებაში მონაწილეობას დავეთანხმოთ. ჯერ ერთი, საიდან აქვს ლეგიმიტაცია ამ ორგანიზაციას, რომ ქვეყნის სახელით მიიღოს მონაწილეობა.

თუ თვითონ მიდის ეს კონკრეტული ორგანიზაცია, გასაგებია, მაგრამ ის, რომ ეს ინფორმაცია ისე გავრცელდეს, თითქოს საქართველო მონაწილეობს, ჩვენთვის კატეგორიულად მიუღებელია.

ეს არის დიდი პროვოკაცია. დარწმუნებული ვარ, მათ არც კი აინტერესებთ, ვინ მიიღებს მონაწილეობას, მათთვის მთავარია გაჟღერდეს ქართული გვარები და საქართველოს სახელი მოსკოვში.

მაშინ, როცა რუსეთი ბავშვებს ხოცავს უკრაინაში, მოსკოვში საბავშვო ლიტერატურის ფორუმის მოწყობა, უბრალოდ ცინიზმია. პროვოკაციაა არა მარტო ქართული სახელმწიფოს წინააღმდეგ, არამედ ქართველი ავტორების წინააღმდეგაც, რადგან ისე გააჟღერეს, თითქოს ქართველი ავტორები მივდივართ მოსკოვში. ეს ასე არ არის.

ან რა გულით უნდა მიიღო მონაწილეობა, როცა ბავშვებს კლავენ, როცა ჩვენს ქვეყანაში რუსეთი დღემდე აწარმოებს მცოცავ ოკუპაციას დაპყრობილი ტერიტორიების გარდა. ან რა უნდა გააკეთონ იქ, ფეხზე უნდა წამოუდგნენ და წუთიერი სამძიმარი უნდა უთხრან დაღუპული ბავშვების გამო?“ – ამბობს ლელა ცუცქირიძე.

მისი თქმით, დღეს საქართველოში ძალიან ბევრი რუსული ცენტრი თუ ორგანიზაცია რეგისტრირდება, რაც სწორედ მსგავსი რუსული მიზნებისთვის გამოიყენება.

„ვინმე აკონტროლებს ამ ორგანიზაციებს? უამრავი ღონისძიება აქვთ ჩანიშნული, რა საჭიროა ამდენი რუსული ცენტრი საქართველოში. თუ აქ ცხოვრობენ, ქართული ისწავლონ, ჩვენი სახელმწიფო ენა და არა რუსული ცენტრები გახსნან. ასე არ უნდა იქცეოდნენ, წესით და რიგით.

ყველაფერი აქვთ მოწყობილი, ყველაფერში ხელი ემართებათ ჩვენი კანონებისა თუ ხელისუფლების წყალობით და ფაქტია, ასეთი ცენტრები იმისთვის არის შექმნილი, რომ მსგავსი პროვოკაციები დაგეგმონ. ასეთ პროვოკაციებში საბავშვო ავტორებიც კი გარიეს“, – ამბობს ლელა.

მისი აზრით, ამასთან დაკავშირებით ოფიციალური განმარტება კულტურის სამინისტრომ უნდა გააკეთოს და გაემიჯნოს რუსულ ფორუმში საქართველოს სახელით მონაწილეობას.

„რუსეთთან რაიმე ფორმით ურთიერთობა დღევანდელ მოცემულობაში ჩემთვის მიუღებელია. სხვა საბავშვო ავტორებიც იმავეს ფიქრობენ, ამიტომ ჩვენ, ქართველი ავტორები, სინდისთან რომ ვიყოთ მართლები, გვინდა ყველას გავაგებინოთ, რომ მოსკოვში, რუსულ საბავშვო ფორუმში მონაწილეობას არ ვიღებთ“, – ამბობს ლელა ცუცქირიძე.

34 წლის იყო, ემიგრაციაში რომ წავიდა. სამი პროფესია აქვს, ჟურნალისტია, რეალტორი და კომპიუტერული მეცნიერებების სპეციალისტი. ბოლო ორი საქმე ამერიკაში ჩასვლის მერე ისწავლა.

„ძიების პროცესში ვიყავი. ამერიკაში რომ ჩავედი, რეალტორის საქმის სწავლა დავიწყე, პარალელურად კომპიუტერულ მეცნიერებებს ვსწავლობდი, მომავლის ეს პროფესია იქცა ჩემს ძირითად საქმედ, ყოველდღიურად ვითარდება კომპიუტერული მეცნიერებები და არასდროს გაძლევს მოდუნების უფლებას, სულ სიახლეებს უნდა უწყობდე ფეხს“, – ამბობს 48 წლის ქართველი ემიგრანტი რუსუდან წერეთელი, რომელიც 2015 წლიდან მერილენდის შტატის ქალაქ ოუინგსმილში ცხოვრობს.

აშშ-ს ემიგრაციაში წასვლამდეც კარგად იცნობდა.

ხშირად სხვადასხვა საერთაშორისო პროგრამით ჩადიოდა აშშ-ში, მერე ჰარვარდის უნივერსიტეტში სწავლობდა ჟურნალისტებისთვის განკუთვნილი ერთწლიანი პროგრამით და იყო ნეიმენის სახელობის სტიპენდიატი. პროგრამის დასრულების შემდეგ ამერიკაში არ დარჩენილა და საქართველოში დაბრუნდა. წითელი ჯვრისა და ნახევარმთვარის ორგანიზაციაში დაიწყო მუშაობა კომუნიკაციის დეპარტამენტის ხელმძღვანელად. 

„ემიგრაციაში 2010 წლის 10 იანვარს წამოვედი, არა იმიტომ, რომ მატერიალურად მიჭირდა, პოლიტიკური ვითარება იყო ძალიან მძიმე, არ იყო არანაირი თავისუფლება, მათ შორის არც სიტყვის თავისუფლება. ასეთ საზოგადოებაში ცხოვრება მიჭირდა.

დავტოვე საქართველო. სამართლიან სახელმწიფოში ცხოვრება სხვა რამაა. რთულია, როცა შენს ქვეყანაში ბევრ უსამართლობას ხედავ და არ გაქვს ძალა რამე მნიშვნელოვნად შეცვალო. ეს იყო ჩემი წამოსვლის მიზეზი. ამერიკელი მეგობრებიც დამეხმარნენ გადაწყვეტილების მიღებაში. მათი მხარდაჭერით და თანადგომით წამოვედი“ – იხსენებს რუსუდან წერეთელი. ის უკვე ამერიკის მოქალაქეა.

ამერიკის საემიგრაციო სამსახურმა რუსუდანს მალევე მიანიჭა ქვეყანაში ცხოვრებისა და მუშაობის უფლება.

თავიდან „ამერიკის ხმაში“ დაიწყო მუშაობა, მაგრამ მიხვდა, რომ სიახლე სჭირდებოდა და კომპიუტერული მეცნიერებების შესწავლა დაიწყო. ახლა Amazon Cloud-ის ვებსერვისების ლიცენზირებული სპეციალისტია. მანამდე კომპიუტერული მეცნიერებების სხვა მიმართულებებშიც მიიღო რამდენიმე სხვადასხვა ლიცენზია, ხელმძღვანელობს პროგრამისტების ორ დიდ გუნდს კომპანიაში, რომლებიც Cloud-ის პროგრამებს ქმნიან.

„ჩვენს კომპანიას მსოფლიოს სხვადასხვა ქვეყანაში აქვს ოფისები და ბევრი სხვადასხვა ეროვნების პროგრამისტთან მაქვს ურთიერთობა. ძალიან კმაყოფილი ვარ ამ პროფესიით, 48 წლის ვარ და ამ გადმოსახედიდან ყველაზე სწორი გადაწყვეტილება მივიღე 39 წლისამ, როცა შევიცვალე პროფესია და სიახლეებს არ შევუშინდი. სამსახურიც ძალიან მიწყობს ხელს პიროვნული და პროფესიული განვითარებისთვის“, – ამბობს რუსუდანი.

მიუხედავად იმისა, რომ ენა კარგად იცოდა და იცოდა, რას გააკეთებდა ემიგრაციაში წასვლის შემდეგ, მაინც იყო სირთულეები, რისი გადალახვაც დასჭირდა. ჰყვება, რომ მთავარი სირთულე ზღვა ინფორმაციაა და უნდა იცოდე, როგორ გაფილტრო ეს ინფორმაცია, რომ იპოვო შენთვის სასარგებლო, შენზე რეალურად მორგებული შესაძლებლობები.

რუსუდანი ჰყვება, რომ ელემენტარული, პრაქტიკული საჭიროებების შესახებ თუ არ გაქვს სწორი ინფორმაცია, ამერიკაში შეიძლება ბევრგან მოტყუვდე და დაზარალდე: ბინის ქირაობის, მანქანის ყიდვის თუ სამსახურის ძებნის დროს.

როცა ამერიკაში ენის ცოდნის გარეშე ჩამოდიან და არასწორი მოლოდინი აქვთ ამ ქვეყნისგან, მერე ძალიან უჭირთო, – ამბობს.

სანამ მერილენდის შტატის ქალაქ ოუინგსმილში იყიდდა სახლს და აქვე დამკვიდრდებოდა, რუსუდანი ამერიკაში სხვადასხვა დროს ცხოვრობდა მასაჩუსეტსის შტატში – ბოსტონში, ნიუ იორკში და ვირჯინიის შტატის ქალაქ ალექსანდრიაში.

ამერიკაში ჩასვლისას თავიდან რეალტორის საქმე ისწავლა და ლიცენზიაც მიიღო, აგენტად მუშაობდა და უძრავი ქონების შეძენაში ეხმარებოდა ამერიკელებს:

„უძრავი ქონების აგენტად მუშაობის დროს ბევრი რამ ვისწავლე აქაური სამშენებლო წესებისა და კანონმდებლობის შესახებ. ერთ ხესაც კი ვერ გადარგავს ან დარგავს სახლის წინ ვერავინ ქალაქის მერიასთან შეთანხმების გარეშე, აზრადაც არ მოუვა არავის პატარა რამეც კი მიაშენოს სახლს ინსპექციასთან შეთანხმების გარეშე.

სახელმწიფო უმკაცრესად აკონტროლებს მშენებლობებს და პასუხისმგებლობას აკისრებს ამ სფეროში ჩართულ ხალხს. მიუხედავად იმისა, რომ ამერიკა კაპიტალისტური ქვეყანაა, როცა საქმე ეხება ადამიანის უსაფრთხოებას და ბუნებრივი კატაკლიზმებისგან თავდაცვას, სახელმწიფო მკაცრად აკონტროლებს ყველაფერს. მშენებელი იღებს პასუხისმგებლობას, ძალიან მკაფიოდაა განსაზღვრული ამა თუ იმ ხარვეზის, უარყოფითი შედეგის შემთხვევაში ვინ რაზეა პასუხისმგებელი“, – ამბობს რუსუდანი.

კითხვაზე – რა შემთხვევაში დაბრუნდებოდა ემიგრაციიდან საქართველოში, რუსუდანი გვპასუხობს, რომ მისთვის უმთავრესი კანონის უზენაესობა, ნამდვილი დამოუკიდებლობა და ევროკავშირის წევრობაა:

„1989 წლის 9 აპრილიდან დავიწყეთ ჩვენ დამოუკიდებლობისთვის ბრძოლა, ამ კურსს არ უნდა გადავუხვიოთ, ცრუ ლიბერალიზმი და ნომენკლატურული, სამთავრობო პარტიული სიმახინჯეა ახლა ჩვენთან, რასაც სახელსაც კი ვერ ვარქმევ. 

რატომღაც მოდად იქცა ამერიკელების ლანძღვა საქართველოში, რაც გონებაშეზღუდულობა მგონია, თუნდაც მხოლოდ იმიტომ, რომ ჩვენი სახელმწიფო ბოლო 30 წლის განმავლობაში შედგა და არსებობს ამერიკელი ხალხის მატერიალური დახმარებით, მთელი ეს ფინანსური რესურსი, რაც საქართველოს აქვს აშშ-სგან, ამერიკელი ხალხის, მათ შორის, ჩემ მიერ გადახდილი ყოველთვიური გადასახადების წვლილია.

ეს ქვეყანა ჩვენზე, საშუალო ფენაზე დგას. უზარმაზარ გადასახადებს ვიხდით ყოველწლიურად, რომ ძლიერი იყოს ამერიკა და შეძლოს სხვა ქვეყნების, მათ შორის, საქართველოს დახმარება“, – გვეუბნება ქართველი ემიგრანტი.

რუსუდან წერეთელს წლების წინ ონკოლოგიური დიაგნოზი დაუსვეს და ექიმებმა ამერიკაში მისი სრულად გამოჯანმრთელება და გადარჩენა შეძლეს. ამბობს, რომ ეს მაღალი სამეცნიერო სტანდარტებითა და უახლესი სამედიცინო პრეპარატებით მკურნალობის შედეგია.

რუსუდანის თქმით, დიდი მნიშვნელობა აქვს ონკოლოგების დამოკიდებულებას პაციენტებისადმი, სიახლეებს მკურნალობისას, რაც ყოველდღიურად ინერგება ისე, რომ უკვე მეოთხე სტადიის მკერდის კიბოს განკურნების მაგალითებიც კი არსებობს.

ქართველი ემიგრანტი ფიქრობს, რომ ევროკავშირის კანდიდატის სტატუსის მიღება და ინტეგრაცია ბევრ სხვა ცვლილებასთან ერთად ნიშნავს მკურნალობის ხარისხის გაუმჯობესებას ადგილზე და მაღალტექნოლოგიურ სამედიცინო სერვისებს ქართველებისთვის თურქეთში სიარულისა და საფრანგეთში ლტოლვილად ჩაბარების ნაცვლად:

„ძალიან მნიშვნელოვანია საქართველო გახდეს ევროკავშირის წევრი, თუნდაც მხოლოდ იმიტომ, რომ 70 წელი ვიყავით საბჭოთა კავშირში და ვნახეთ, რასაც ნიშნავდა რუსეთის მარწუხებში ყოფნა.

ჩვენ ახლა ვხედავთ შეთითხნილ, ლობირებულ ისტერიას, როცა ხალხს აზიზღებენ დასავლეთს და ეუბნებიან, რომ წაილეკება ქვეყანა, თუ საქართველო ევროკავშირში გაწევრიანდება ან ამერიკის მხარდამჭერი იქნება.

აზიზღებენ საქართველოს მოსახლეობას, დასავლეთს, ამას ხელს უწყობს სამთავრობო, პრორუსული პროპაგანდაც. ხალხიც ბრმად ენდობა ხელისუფლების მიერ დასავლეთის, ამერიკის ისტერიულ ლანძღვას“, – ამბობს ემიგრანტი.

რუსუდანს მეუღლე და 21 წლის შვილი ჰყავს, რომელიც ასევე კომპიუტერულ მეცნიერებებს სწავლობს მერილენდის უნივერსიტეტში.

ევროპის ქვეყნებსა და აშშ-ში საქართველოდან ემიგრაციაში წამსვლელთა რიცხვი ყოველწლიურად იზრდება. სტატისტიკის ეროვნული სამსახურის მონაცემებით, 2021 წელს საქართველო დატოვა 80 351-მა მოქალაქემ. იმავე პერიოდში, საქსტატის თანახმად, ქვეყანაში ემიგრაციიდან დაბრუნდა 39 526 მოქალაქე. შესაბამისად, უარყოფითი მიგრაციული სალდო იყო 25 966.

2022 წელს, საქსტატის მონაცემებით, საქართველოდან ემიგრაციაში წავიდა 108 590 ადამიანი.