დიდი ბრიტანეთის თავდაცვის სამინისტროს დაზვერვა დღეს, 30 აგვისტოს, ტვიტერზე წერს, რომ რუსეთში ორ რუს ჯარისკაცს სამხედრო სასამართლომ ორი წლით კოლონიაში ყოფნა მიუსაჯა უკრაინის ფრონტზე დაბრუნების ბრძანებაზე უარის თქმის გამო.
„2023 წლის 18 ივლისს „მედიაზონამ“ გაავრცელა ინფორმაცია, რომ რუსეთი კვირაში 100-მდე ჯარისკაცს ასამართლებს ბრძოლაზე უარის თქმის გამო. თუ ეს ტენდენცია გაგრძელდება, წელიწადში დაახლოებით 5200 განაჩენი იქნება უკრაინაში ბრძოლაზე უარის თქმისთვის“ – წერს ბრიტანული დაზვერვა და ასკვნის, რომ მსჯავრდებულთა მაღალი მაჩვენებელი მეტყველებს რუსეთის არმიის დაბალ მოტივაციაზე.
„ბრძოლაზე უარი, სავარაუდოდ, ასახავს არასაკმარის მომზადებას, მოტივაციას და ძლიერ სტრესს, რასაც რუსი ჯარისკაცები აწყდებიან უკრაინის ფრონტის ხაზზე“ – წერს დაზვერვა.
ბრიტანული დაზვერვის მოკლე ცნობებში აღნიშნულია, რომ მიუხედავად იმისა, რომ ზოგიერთმა ჯარისკაცმა უარი თქვა ბრძოლაზე და დაღუპვის მაჩვენებლები კვლავ მაღალია, რუსეთი დიდი ალბათობით აკომპენსირებს დანაკარგებს ფრონტის ხაზზე ცუდად გაწვრთნილი ჯარისკაცების დიდი რაოდენობით.
