ამხანაგობამ მერიის პროგრამებით რომ ისარგებლოს, ახალ პორტალზე უნდა დარეგისტრირდეს

ქალაქ ბათუმის მერიის ინფორმაციით, დაიწყო ბინათმესაკუთრეთა ამხანაგობების აღრიცხვა ელექტრონულ პორტალზე.

მერიის განცხადებით, „23 მუნიციპალური პროგრამით სარგებლობის უფლება ექნება მხოლოდ აღნიშნულ პორტალზე რეგისტრირებულ ამხანაგობებს. აქედან 19 პროგრამა სრულად მუნიციპალური სახსრებით ფინანსდება, ხოლო 4 – თანადაფინანსებით [99% – მერიის პროცენტული წილი, 1%- ამხანაგობის]“.

პორტალზე დასარეგისტრირებლად ამხანაგობამ უნდა მიმართოს შესაბამისი ადმინისტრაციული ერთეულის სერვისცენტრს და მოითხოვოს რეგისტრაცია.

„ამხანაგობას ექმნება ინდივიდუალური ელექტრონული გვერდი, რაც საშუალებას მოგცემთ:

• შეატყობინოთ მუნიციპალიტეტს ამხანაგობის ტერიტორიაზე არსებული ინფრასტრუქტურული პრობლემების შესახებ

• მიიღოთ ადგილობრივი თვითმმართველობის მიერ ფინანსური მხარდაჭერა

• სახლიდან გაუსვლელად, დისტანციურად ჩაერთოთ მუნიციპალურ პროგრამებში და მიიღოთ ამხანაგობის აღრიცხვის ბარათი

• მიიღოთ თქვენთვის საჭირო ინფორმაცია და თვალი ადევნოთ მიმდინარე პროცესებს.“ – აღნიშნულია მერიის მიერ გავრცელებულ განცხადებაში.

მერიის ინფორმაციით, 1-ელი სექტემბრის მდგომარეობით, პორტალზე დასარეგისტრირებლად შესულია 120 განაცხადი.