Batumelebi

მითების დეტექტორი აქვეყნებს კვლევას, რომლის მიხედვითაც, სოციალურ ქსელში, დიუშენის სამკურნალო მედიკამენტის წინააღმდეგ მიმართული კამპანიის მიღმა AI გენერირებული ტროლები დგანან.

დიუშენის კუნთოვანი დისტროფიით (DMD) დაავადებული ბავშვების მშობლები რამდენიმე თვეა საპროტესტო აქციებს მართავენ თბილისში და სახელმწიფოს სთხოვენ დააფინანსოს დიუშენის სამკურნალო მედიკამენტების ქვეყანაში შემოტანა.

ბოლო 10 დღეა სახელმწიფო კანცელარიის წინ მშობლები ღამეს ათევენ და ირაკლი კობახიძესთან შეხვედრას ითხოვენ.

პროცესის პარალელურად, სოციალურ ქსელში გამოიკვეთა დიუშენის სინდრომის სამკურნალო პრეპარატების წინააღმდეგ მიმართული კამპანია.

მითების დეტექტორის კვლევით, ამ კამპანიაში სახელისუფლებო სარედაქციო პოლიტიკის მედიების და „ქართული ოცნების“ წარმომადგენლების გარდა, ყალბი ანგარიშებიც აქტიურად არიან ჩართულნი.

„სოციალურ ქსელში  საეჭვო, კოორდინირებული აქტივობა უკავშირდება რუსთავი 2-ის მიერ 2026 წლის 20 და 23 აპრილს გამოქვეყნებულ პოსტებს დიუშენის სინდრომის თემაზე. აღნიშნული პოსტები მოიცავს როგორც სამეცნიერო კვლევის აღწერას (ვირთაგვაზე შექმნილი მოდელი და ექსპერიმენტული მედიკამენტის ტესტირება), ისე კახა კალაძის განცხადებას, სადაც ის კითხვის ნიშნის ქვეშ აყენებს კონკრეტული პრეპარატის უსაფრთხოებასა და ეფექტიანობას.

ამ პოსტების  ანალიზი მიუთითებს, რომ არაავთენტური ანგარიშები კონკრეტული სახელისუფლებო გზავნილების მიმართ მხარდაჭერის გაზრდას პოსტის მოწონებების (ლაიქების) და კოორდინირებული არაავთენტური ქმედების (CIB) გზით ცდილობენ.

კვლევის ფარგლებში, გამოვლინდა 75 ყალბი ანგარიში, რომლებიც მათი ქცევის მიხედვით, 2 კატეგორიად შეგვიძლია დავაჯგუფოთ:

1.არაავთენტური ანგარიშები, რომლებიც ფეისბუკ-გვერდებთან „აი, პოლიტიკა“ და „არ აგარევინებთ“ არიან დაკავშირებული და მეტწილად პოსტებზე რეაქციების გამოხატვით შემოიფარგლებიან. აღნიშნული გვერდები, თავის მხრივ, ხელისუფლების მხარდამჭერ, „ნეიტრალური საქართველოს“ ლიდერს ვატო შაქარაშვილს და გია გაჩეჩილაძის მოძრაობას „არ აგარევინებთ“ უკავშირდება.

ეს ანგარიშები წარსულში ასევე გამოიყენებოდა საქართველოს ხელისუფლების მიმართ BBC-ის კრიტიკული გამოძიების წინააღმდეგ სამთავრობო მედიების (რუსთავი 2-ის და ტვ იმედის) ზოგიერთ პოსტზე მოწონებების გზით ჩართულობის გასაზრდელად,“ – ნათქვამია მითების დეტექტორის კვლევაში.

2.„მითების დეტექტორის” მიერ ადრე გამოვლენილი ანგარიშები, რომლებიც სხვადასხვა დროს ჩართული იყვნენ პროევროპული პროტესტის დისკრედიტაციის კამპანიებში,“ – წერს მითების დეტექტორი.

„მითების დეტექტორის“ განმარტებით, მათ მიერ გამოვლენილი ყალბი ანგარიშები შემდეგი ნიშნებით ხასიათდებიან:

„75 ყალბი ანგარიშიდან 47 ხელოვნური ინტელექტის მიერ გენერირებულ იდენტურ ფოტოს მცირედი მოდიფიცირებით იყენებს, 28 ანგარიში კი სხვადასხვა სოციალურ ქსელში რეგისტრირებული მომხმარებლების ფოტოებს იყენებს;

ამ 28 ანგარიშიდან 17 „მითების დეტექტორის“ მიერ წარსულში გამოვლენილ დისკრედიტაციის კამპანიებშიც იყო ჩართული;

75 ანგარიშიდან 47-ს პროფილის ფოტო 2026 წლის აპრილში აქვს ატვირთული, 26-ს კი  2025 წელს, რაც ანგარიშის შექმნის თარიღთან უნდა იყოს დაკავშირებული;

75 ანგარიშიდან 70-ს სამუშაო ადგილად საქართველოში არსებული სხვადასხვა კომპანია აქვს მითითებული.

რაც შეეხება ფეისბუქზე ამ ანგარიშების ქცევას: ყალბი ანგარიშები აქტიურად იწონებენ რუსთავი 2-ის მიერ 20 და 23 აპრილს გამოქვეყნებულ პოსტებს დიუშენის სინდრომის შესახებ. პოსტები ეხება როგორც მიმდინარე სამეცნიერო კვლევებს, ისე კახა კალაძის განცხადებას, რომელიც კითხვის ნიშნის ქვეშ აყენებს კონკრეტული მედიკამენტის უსაფრთხოებასა და ეფექტიანობას“.

„მითების დეტექტორი“ ცალკე გამოჰყოფს ხელოვნური ინტელექტით გენერირებული ანგარიშებს და წერს, რომ რუსთავი 2-ის პოსტებზე ხელოვნურად შექმნილი ჩართულობა აჩენს ეჭვს, რომ საქმე გვაქვს კოორდინირებულ არაავთენტურ ქცევასთან, რომლის ძირითადი მიზანი ონლაინ აქტივობის ხელოვნურად გაზრდაა.

„იმ ანგარიშების პროფილების ფოტოები, რომლებიც ამ პოსტებს „იწონებენ“, არა რეალური ადამიანები, არამედ, სავარაუდოდ, ხელოვნური ინტელექტის გამოყენებით შექმნილი პროფილებია.

მიუხედავად იმისა, რომ ასეთი სურათები რეალისტურ შთაბეჭდილებას ტოვებს, მათში შეინიშნება განმეორებადი ვიზუალური ნიშნები.

სავარაუდოდ, თავდაპირველად შერჩეულია რამდენიმე ძირითადი ფოტო და შემდეგ ამ ფოტოების სხვადასხვა ვარიაციით მიღებულია მრავალი განსხვავებული გამოსახულება. ცვლილებები მოიცავს სახის გამომეტყველების მინიმალურად კორექტირებას (მაგალითად, ღიმილის დამატებას), აქსესუარების (საყურე, სათვალე) დამატება/მოშორებას, თმის ვარცხნილობისა და განათების ცვლილებას. შედეგად ვიზუალურად განსხვავებული, თუმცა ერთმანეთთან აშკარად დაკავშირებული სურათების სერია არის შექმნილი. აღნიშნული ფოტოები ხელოვნური ინტელექტის ამომცნობი ხელსაწყოს – HIVE-ის გამოყენებითაც გადამოწმდა, რომელმაც დაადასტურა, რომ გამოსახულებები ხელოვნური ინტელექტით იყო გენერირებული,“- ნათქვამია კვლევაში.

ქობულეთში ფრინველების არალეგალური სასაკლაო აღმოაჩინეს. ინფორმაციას სურსათის ეროვნული სააგენტო ავრცელებს დღეს, 30 აპრილს.

„ინდივიდუალური მეწარმე ნ. ჟ. საცხოვრებელი სახლის ეზოში, კუსტარულად მოწყობილ სივრცეში ფრინველს კლავდა სავალდებულო აღიარებისა და ვეტერინარული ზედამხედველობის გარეშე.

ბიზნესოპერატორი დაჯარიმდა და შეუჩერდა საწარმოო პროცესი კრიტიკული შეუსაბამობების აღმოფხვრამდე, საქმიანობის აღიარებამდე და რეგისტრაციამდე,“ – აღნიშნულია სურსათის ეროვნული სააგენტოს მიერ გავრცელებულ ინფორმაციაში.

საქართველოს გაზის ტრანსპორტირების კომპანიის ცნობით, ზესტაფონის მუნიციპალიტეტში ცენტრალური გაზსადენის დაზიანებული მონაკვეთის სალიკვიდაციო სამუშაოები წარმატებით დასრულდა და მიმდინარეობს ბუნებრივი აირის მიწოდების აღდგენის პროცესი.

გუშინ, 29 აპრილს, დილის ექვსი საათიდან, გაზსადენზე დაზიანების გამო, გაზი არ მიეწოდებოდა ბათუმისა და ხელვაჩაურის მუნიციპალიტეტებს. დღეს. 30 აპრილს, ბათუმში ბუნებრივი აირის მიწოდება რიგ ქუჩებზე დაიწყო.

კომპანია „სოკარის“ ცნობით, ბუნებრივი გაზის მიწოდება ეტაპობრივად დაიწყო და სრულად აღდგება 2 მაისის 20:00 საათამდე.

კომპანია „სოკარ ჯორჯია გაზი” აბონენტებს მოუწოდებს, დაკეტილ მდგომარეობაში იქონიონ ბინებში არსებული გაზის ონკანები და უყურადღებოდ არ დატოვონ გაზის დანადგარები.

28 აპრილს ირაკლი კობახიძემ „ტვ პირველთან“ თქვა, რომ ნახევარი კილოგრამი რბილი ხორცი 10 ლარი ღირს. რას ფიქრობს ხალხი ამაზე ბათუმში? – ნახეთ „ბათუმელების“ ქუჩის გამოკითხვა.

დღეს, 29 აპრილს, საღამოს, გორგილაძის ქუჩაზე მდებარე სამსართულიან საცხოვრებელ სახლში ხანძარი გაჩნდა.

პირველადი ინფორმაციით, ხანძარი სახლის ბოლო სართულზე გაჩნდა.

„ბათუმელებს“ ადგილზე უთხრეს, რომ შენობიდან მოსახლეობა უკვე გამოიყვანეს.

ამ დრომდე [21:08] დაშავებულების შესახებ ინფორმაცია არ ვრცელდება. ადგილზე შეინიშნება ძლიერი დაკვამლიანება.

არსებული ინფორმაციით, დაიწვა ერთი ბინა.

ადგილზე მობილიზებულია სახანძრო სამსახური. ხანძრის სალიკვიდაციო სამუშაოები გრძელდება.

ინფორმაცია განახლდება.

ნახეთ „ბათუმელების“ პირდაპირი ჩართვა შემთხვევის ადგილიდან:

„შვილის ყოლა საქართველოში კვლავ რჩება საკმაოდ ძლიერ ღირებულებად, მაგრამ ეს არ ნიშნავს იმას, რომ [წყვილი] გააჩენს ორ ან სამ ბავშვს“, – ამბობს ლელა მენაბდიშვილი, ილიას სახელმწიფო უნივერსიტეტის დემოგრაფიისა და სოციოლოგიის ინსტიტუტის მკვლევარი.

რა განაპირობებს საქართველოში შობადობის კრიტიკულად შემცირებას და აქვს თუ არა სახელმწიფოს ოჯახების გაძლიერების პოლიტიკა? – ამ თემაზე ესაუბრა ლელა მენაბდიშვილს „ბათუმელები“.

• ქალბატონო ლელა, თქვენი, როგორც სპეციალისტის დაკვირვებით, რა არის საქართველოში შობადობის შემცირების მიზეზი?

შობადობის მაჩვენებელს ყველაზე კარგად ასახავს ერთ ქალზე გაჩენილი ბავშვების რაოდენობა. ანუ, წყვილმა უნდა გააჩინოს მინიმუმ სამი შვილი, რომ შობადობის მატება იყოს ქვეყანაში.

ორი ბავშვი ნიშნავს, რომ მომდევნო თაობა ანაცვლებს წინას. მესამე უკვე არის მატება. როცა ორი ბავშვია, აქ მოსახლეობის აღწარმოება არ ხდება. ჩვენთან სამი შვილი არ არის, ძირითადად არის ორი შვილი.

21-ე საუკუნე ავიღოთ, ამ საუკუნეში პირველი ჩავარდნა გვქონდა 2000-2007 წლებში, როცა ბუნებრივად, შობადობის გზით მოსახლეობა არ იზრდებოდა.

შემდეგი ეტაპი იყო პატრიარქის ინიციატივა, როცა თქვა, რომ მონათლავდა ყოველ მესამე და მომდევნო შვილს და სხვათა შორის, გაამართლა ამ ინიციატივამ – მომდევნო წლებში ქვეყანაში გაიზარდა შობადობის მაჩვენებელი.

• გამოდის, მოტივაციისთვის მხოლოდ ეს ინიციატივა ვერ იქნებოდა საკმარისი, რადგან შემდეგ წლებში ხომ ისევ დაიწყო კლება?

ყურადღება უნდა მივაქციოთ იმასაც, რომ პირველი და მეორე ბავშვის რაოდენობა სულ მცირდებოდა. ბუნებრივი კლება ნიშნავს იმას, რომ დაბადებულები უფრო ცოტანი არიან, ვიდრე გარდაცვლილები. ანუ ფაქტობრივად, მოსახლეობა არ იმატებს შობადობის გზით.

მიზეზი ძალიან ბევრია. ყველაზე მეტი კვლევა ამბობს იმას, რომ ბავშვების გაჩენა ადამიანებს ხელს უშლის სამსახურებრივ საქმიანობაში, კარიერულ წინსვლაში. დააკვირდით იმასაც, რომ ქორწინების ასაკმა ძალიან გადაიწია. თუ წინა წლებში ქალის სექსუალური ცხოვრება იწყებოდა ქორწინებით, ახლა ეს სტიგმა მოიხსნა და ქალს შეუძლია ჰქონდეს სქესობრივი ცხოვრება ქორწინების გარეშეც, ისევე როგორც კაცს და ეს აღარ აჩქარებს ქალს.

ქალი ფიქრობს, რომ მოდი, გადავავადებ შვილის გაჩენას, ჯერ ავიწყობ კარიერას, მატერიალურად უზრუნველყოფილი გავხდები და ინდივიდუალურმა ღირებულებებმა წამოიწია წინ.

• ეს იმიტომ, რომ რეალურად, ქალი დაუცველია ამ ქვეყანაში და ბუნებრივია, რომ ცდილობს გაძლიერდეს ეკონომიკურად.

დიახ, რა თქმა უნდა, ამანაც იქონია გავლენა. ქალი გახდა უფრო თავისუფალი, დაიწყო განათლების მიღება, წავიდა ევროპაში, ამერიკაში და ცდილობს აიწყოს კარიერა. როცა ქვეყანას გაუჭირდა, მაშინაც ხომ ქალი გავიდა ყველაზე მეტი ქვეყნიდან. ქალი აღარ არის დამოკიდებული კაცზე.

მეორე არის ის, რომ მრავალშვილიანობამ, როგორც ღირებულებამ დაკარგა მნიშვნელობა. შვილის ყოლა კვლავ რჩება საკმაოდ ძლიერ ღირებულებად, მაგრამ ეს არ ნიშნავს, რომ გააჩენს ორ ან სამ ბავშვს.

სხვათა შორის, აქამდე ყველა კვლევა აჩვენებდა, რომ სასურველი ბავშვების რაოდენობა იყო სამი. წელს ჩავატარე კვლევა, 100 დასაქმებული ქალი გამოვკითხე და ყველას ჰყავს ერთი ან ორი შვილი და მესამეს გაჩენას აღარ აპირებს.

• თავად რას ასახელებდნენ მიზეზად?

ბავშვების აღზრდის სირთულეს.

• ეკონომიკური ფაქტორიც ხომ ახდენს ამაზე გავლენას. ძალიან  ძვირია ბავშვის კვება, ჰიგიენა, ძვირია ჯანდაცვა…

რაც უფრო მეტი აქვს შემოსავალი მშობელს, მით უფრო მეტს ხარჯავს შვილის გაზრდაზე.

2022 წელს გამოვკითხე ერთი ადამიანი, რომელიც კერძო კომპანიაში ფინანსურ დირექტორად იყო დასაქმებული და 10 000 ლარი ჰქონდა ხელფასი, მაგრამ მითხრა, რომ არ ჰყოფნიდა. იმიტომ, რომ ორი შვილი მყავს, ცოლი არ მუშაობს და მარტო მე ვარ შემომტანიო. ენგელის კანონია ეკონომიკაში, რომელიც გულისხმობს იმას, რომ რაც უფრო მეტია შემოსავალი, მოთხოვნილებაც მეტია.

• მსგავსი ხელფასი საქართველოში თანამდებობის პირებს და ერთეულებს აქვთ, მოსახლეობის უმრავლესობა დაბალშემოსავლიანია, სადღაც 700-800 ლარზეც კი მუშაობენ ადამიანები. ეს რამდენად საკმარისია შვილის გასაზრდელად? 

ვერ ვიტყვით, რომ საქართველოში სიღარიბე არ არის და გამოკითხულთა უმრავლესობა მიწერს კიდეც, რომ უჭირთ და ფინანსური პრობლემები აქვთ.

გამოკითხვებში მიწერენ, რომ ბინის პრობლემები აქვთ, რომ მუშაობენ და თავისუფალი დრო არ აქვთ. ყველაზე საშინელება ის არის, რომ შემოდგომაზე გამოვკითხე დასაქმებული ქალები და ვკითხე, რამდენ დროს ატარებდნენ საკუთარ შვილებთან. მითხრეს, რომ 3-4 საათს. თუ არ იმუშავებენ, შვილებს ვერ უზრუნველყოფენ. აქ დგას საბავშვო ბაღის პრობლემაც. სახელმწიფო ბაგა-ბაღები არ არსებობს ბავშვი რომ მიიყვანო, კერძო ბაღი ძალიან ძვირია.

ხომ შეიძლება დეკრეტული შვებულება და ანაზღაურება გაიზარდოს? ძალიან რთული სიტუაციაა კერძო კომპანიაში დასაქმებულებისთვის, რადგან დეკრეტულ შვებულებაში გასულ ქალს ადგილს აღარ უნახავენ. ამიტომ, სახელმწიფომ უნდა მიიღოს კანონი, რომ კერძო და საჯარო უწყებებში თანაბარი პირობებით სარგებლობდნენ დასაქმებულები, რადგან ქვეყანაში ასეთი მძიმე მდგომარეობაა, როცა ბუნებრივი მატების ნაცვლად 25 წელიწადში კლება გვაქვს და 1,7-ია შობადობის ჯამობრივი კოეფიციენტი. ფაქტობრივად, აღწარმოება და მშობლების ჩანაცვლებაც კი არ ხდება ამ მაჩვენებლით.

• სტატისტიკის ეროვნული სააგენტოს მონაცემებით, დღეს ქვეყანაში 767 185 ქალი და კაცი ცხოვრობს 20-იდან 35 წლის ასაკის. თუმცა, შობადობის მაჩვენებელი გასულ წელს მაინც დაბალი იყო – სადღაც 37 000. რაზეც ვისაუბრეთ, ეს პრობლემები განაპირობებს შობადობის შემცირებას თუ კიდევ სხვა მიზეზიც არსებობს?

ქორწინება საკმაოდ დაბალია იგივე ეკონომიკური პირობების გამო. კაცებს არ შეუძლიათ ოჯახის შექმნა, რადგან არ აქვთ საკმარისი შემოსავალი. გაიხედეთ ქუჩაში, სავსეა ბირჟები კაცებით.

ძალიან დიდი პრობლემა გვაქვს რეგიონებში, ფაქტობრივად დაცარიელებულია. რეგიონის მოსახლეობის თითქმის 35%-ი თბილისში ცხოვრობს. სამი ქალაქი დარჩა – თბილისი, ბათუმი და ქუთაისი, სადაც ყველაზე მეტი მოსახლეობა ცხოვრობს. რეგიონში დარჩნენ მხოლოდ მოხუცები და ვინ შეცვლის მათ? ახალი თაობა აღარ არის. ასობით სკოლაა სოფლებში, რომლებსაც წლებია პირველკლასელი არ მიუღიათ.

• 2024 წელს 121 425 საქართველოს მოქალაქე გავიდა ქვეყნიდან, 2025-ში 114 374. ალბათ ესეც ახდენს გავლენას შობადობის შემცირებაზე, თქვენ როგორ ფიქრობთ?

ძალიან დიდია ემიგრაციის მაჩვენებელიც. მიდის ხალხი – აქ ვერ ხედავს კეთილდღეობას პერსპექტივაში და იძულებულია წავიდეს. დაბრუნებითაც არავინ ბრუნდება.

2023 წელს, გამოკვლევა რომ ჩავატარეთ დემოგრაფიისა და სოციოლოგიის ინსტიტუტმა რეგიონებში, 2 000 კაცი გამოვკითხეთ თითქმის ყველა რეგიონში და აღმოჩნდა, რომ ამ ოჯახების მეოთხედი იყო წასული ემიგრაციაში. დაბრუნდებიან თუ არა, თუნდაც უახლოესი ხუთი წლის განმავლობაში, არც ამაზე აქვთ პასუხი.

• სამაგიეროდ, 2025 წელს საქართველოში 131 501 უცხოელი შემოვიდა. ეს რა გავლენას მოახდენს დემოგრაფიულ სურათზე, თქვენი აზრით?

ბოლო აღწერის მასალები რომ გამოაქვეყნეს თქვეს, რომ საქართველოს მოსახლეობა გაიზარდა და სადღაც 3 მლნ 900 000-მდეა. ეს მატება, ფაქტობრივად, მოხდა უცხოელების ხარჯზე. რუსეთიდან ბევრია ჩამოსული, უკრაინიდანაც არიან შემოსული ომის გამო და სხვა ქვეყნებიდანაც. ბუნებრივია, ეს ადამიანებიც მოხვდნენ ამ აღწერაში. უცხოელების ხარჯზე მოსახლეობის გაზრდა გვინდა?

• როგორ ფიქრობთ, ის 37 ათასი ბავშვი, რომელიც წინა წელს დაიბადა, საქართველოს მოქალაქეების შვილები არიან თუ შესაძლოა აქ უცხოელებიც მოიაზრებოდნენ. სადმე არსებობს დიფერენცირებული სტატისტიკა?

სამწუხაროდ, არ გვაქვს ასეთი ინფორმაცია, რადგან ეროვნების ჩაწერა არცერთ დოკუმენტში აღარ ხდება. შესაბამისად, ვერ გავიგებთ დაბადებული ბავშვებიდან რამდენია ვთქვათ ეთნიკურად ქართველი.

ზოგადად, თუ საქართველოში შობადობის ასეთი ტენდენციები გაგრძელდა, ეს იქნება დამღუპველი ქვეყნისთვის. აბსოლუტურად ყველა რეგიონში არის ბუნებრივი კლება და როგორმე უნდა დაეხმაროს სახელმწიფო რეგიონებს, რომ არ მოხდეს ახალგაზრდების გადინება.

• გახსოვთ ალბათ ივანიშვილის განცხადება, როცა თქვა, რომ ხელისუფლება აქ ვერ შექმნიდან სამუშაო ადგილებს და საქართველოს მოქალაქეებს შეუძლიათ დასაქმდნენ უცხოეთში. ბოლო წლებში უამრავი რეპრესიული კანონი მიიღეს, აკრძალეს გრანტების მიღება, რაც ეხმარებოდა საქართველოს მოქალაქეებს დასაქმებაში, მცირე ბიზნესის წარმოებაში და ოჯახების შენახვაშიც. ამავდროულად, საუბრობენ იმაზე, რომ შობადობა უნდა გაიზარდოს. თქვენ თუ ხედავთ რეალურ ნაბიჯს, რომელსაც სახელმწიფო მოქალაქის სასარგებლოდ დგამს?

ამ წუთში რეალურ ნაბიჯებს ვერაფერს ვერ ვხედავ, რომ გითხრათ სიმართლე. „უნდა გავმრავლდეთ“ ძახილით ეს პრობლემა არ მოგვარდება, რადგან პრობლემა კომპლექსურია.

სახელმწიფო პოლიტიკა უნდა იყოს ისეთი, რომელიც გაითვალისწინებს ახალგაზრდა ოჯახების ინტერესებს. ახალგაზრდა ოჯახები ითხოვენ, რომ ჰქონდეთ ბინის შეძენის შესაძლებლობა, აღარ უნდათ დედ-მამასთან ცხოვრება და სწორია, რომ უნდათ დამოუკიდებელი ცხოვრება. ამიტომ, უნდა დავწიოთ სესხების პროცენტი და წავახალისოთ ახალგაზრდა ოჯახები, რომ შეძლონ ორი და მეტი ბავშვის გაჩენა.

წავახალისოთ მუნიციპალიტეტებში დარჩენილი ახალგაზრდობა, ხელი შევუწყოთ მეწარმეობის, სოფლის მეურნეობის განვითარებას, რაღაც ისეთი უნდა გააკეთონ სოფლებში, რომ ოჯახები დაინტერესდნენ იქ ცხოვრებით. სამშობლოს სიყვარულიც უნდა ვასწავლოთ ბავშვებს, რადგან სიყვარული არის იმაზე ზრუნვა, რაც შენ გიყვარს ხომ?

ყველამ თუ თავისი წილი აგური არ დადო ამ ქვეყნის მშენებლობაში, არაფერი გამოვა. ჩვენ რომ ვიდგეთ და ვიძახოთ 24 საათი, რომ „ოლიგარქი არაფერს არ გვიკეთებს“ და წავალთ აქედან, გავიქცევით. ის ოლიგარქი აქ დარჩება და იქნება კარგად. ამიტომ, კი არ უნდა გაიქცე, უნდა მობრუნდე, როცა ზურგი გექნება იმის, რომ მყარად დგახარ. შენი განათლებით, შენი ცოდნით უნდა მობრუნდე, რომ შენს ქვეყანას მოახმარო ეს ცოდნა.

• როგორ დაბრუნდება, თუ აქ არ შეუქმნის სახელმწიფო განვითარების პირობებს, შვილისთვის წამალს არ მისცემ, დაუძახებს აგენტს, მტერს. ასეთ გარემოში ვინ ისურვებს შვილების ყოლას და ცხოვრებას?

ჩვენც გვეძახდნენ „ჩარეცხილებს“ და სამსახურებიდან გაგვყარეს, მაგრამ მოვტრიალდით და ფეხზე დავდექით. ხელფასს არ გვიხდიდნენ, მაგრამ დემოგრაფიისა და სოციოლოგიის ინსტიტუტი შევინარჩუნეთ. გაქცევა გამოსავალი არ არის.

გამოსავალი არის გზის ძებნა – მოვძებნოთ გონივრული გზა, თორემ თუ ყველა გაიქცევა, აქ დასახლდება სხვა. მე რომ გავიქცე, ჩემი შვილებიც გავიყოლო, ჩვენი ჯიში და ჯილაგი აქ აღარ დარჩება. გადავშენდებით.

• ყველა ადამიანს აქვს ღირსეულად ცხოვრების უფლება. ფაქტია, რომ საქართველოში ამის შესაძლებლობას ხალს არ აძლევენ.

კარგ ცხოვრებას სხვა ვერ შეგვიქმნის თუ არ შევქმენით ჩვენ. ცხადია, სახელმწიფომ უნდა დაიცვას თითოეული მოქალაქის უფლება, მაგრამ მოქალაქეც ვალდებულია სასარგებლო იყოს თავისი ქვეყნისთვის. მთავრობა მოდის და მიდის. ნამდვილად არ შეიძლება 8 და 12 წელიწადი იყოს ერთი ხელისუფლება. ხელისუფლებას უნდა ეშინოდეს ხალხის და არა ხალხს ხელისუფლების.

ვისთვის შენდება ამდენი სახლები ქვეყანაში, თუ საქართველოს მოქალაქე ვერ იყიდის? ხომ შეიძლება ბიზნესიც ფიქრობდეს ადამიანებზე.

_________________

ამ თემაზე:

„ჩემ გარშემო გოგო-ბიჭების 70%-ი ვერ ვქმნით ოჯახს“ – ქალები რეალურ მიზეზებზე, რატომაც შემცირდა შობადობა

See more

„პირდაპირ ვინმეზე ზეწოლა და წნეხი შეიძლება მართლაც არ არის, მაგრამ ამ წლების განმავლობაში „ქართულმა ოცნებამ“ გასაგებად მიანიშნა იერარქებს, რა შეუძლია. მიუთითა: თვით პატრიარქსაც არ დავინდობთ და ვცადეთ მისი დისკრედიტაცია, თქვენ ხომ წარმოგიდგენიათ, რა მოხდება, თუ შევამჩნევთ, რომ თქვენ არ აკეთებთ იმას, რაც ჩვენ გვსურსო,“ – გვიყვება თეოლოგი მირიან გამრეკელაშვილი. მას სინოდის სხდომასა და პატრიარქობის სამი კანდიდატის შერჩევაზე ვესაუბრეთ.

ახალ პატრიარქს სინოდის 39 წევრიდან მინიმუმ 20-ის მხარდაჭერა სჭირდება. შესაძლებელია უკვე იმის თქმა, ვინ იქნება ახალი პატრიარქი? – მირიან გამრეკელაშვილი ვარაუდობს, რომ პირიქით, მეუფე შიოს გაფართოებულ სხდომაზე შესაძლოა 1 ხმა დააკლდეს და პატრიარქი ვერ გახდეს, რადგან „რუსეთის მხრიდან საფრთხეს ყველა ხედავს“.

„მეუფე შიომ გუნდში დააგროვა რაღაც გამოცდილებები, ინფორმაციები, შეისწავლა ეს ხალხი და მიხვდა, ვის რას შეჰპირდეს, ვის რაზე დაემუქროს… თუ მე მოვალ და არ იქნები მხარდამჭერით დაზღვეული, ამას და ამას გიზამ, ვთქვათ, გადაგიყვან-გადმოგიყვან, ან გეობას დაგაბრალებ. ბევრი რამ შეიძლება იყოს.

იერარქების დიდი ნაწილს შესაძლებელია გულში ურჩევნია შეჩვეული ჭირი რაღაც ახალს. ნებისმიერი სიახლე ბევრ ტკივილთან არის დაკავშირებული. ბევრი თვლის, რომ მეუფე გრიგოლი თუ წამოიწყებს ეკლესიის რაღაცნაირად გაჯანსაღების პროცესს, მათაც მოუწევთ ამას ფეხი აუწყონ, რაღაცები შეცვალონ ეპარქიაში. ბევრს ეს მომენტი არ ხიბლავს, რადგან დამატებითი შრომაა,“ – ამბობს მირიან გამრეკელაშვილი.

„ბათუმელებმა“ თეოლოგ მირიან გამრეკელაშვილთან ინტერვიუ ჩაწერა:

• ბატონო მირიან, სინოდის 28 აპრილის სხდომაზე მიტროპოლიტმა შიომ მიიღო 20 ხმა. ახალ პატრიარქს სინოდის 39 წევრიდან მინიმუმ 20-ის მხარდაჭერა სჭირდება. შესაძლებელია უკვე იმის თქმა, ვინ იქნება ახალი პატრიარქი? 

არა. არ ვიცით, რა მოხდება, თუმცა რაც სჭირდება მინიმალურად, ის მიიღო და ეს არის ფაქტობრივი მოცემულობა.

ფაქტია, რომ მეუფე შიოსთვის დაიხარჯა ძალიან დიდი რესურსი. სოციალურ ქსელებში იყო დიდი კამპანია, გააკეთეს ცალკე ანგარიშები, ბოტები, ჩატები, რილსები მოამზადეს და აზიარებდნენ მხარდამჭერ მასალას…

• ფიქრობთ, რომ ამან იმოქმედა ეპისკოპოსების არჩევანზე? 

არა. ამან არ იმოქმედა. უბრალოდ ამან შექმნა საზოგადოებრივი აზრი, რომ მეუფე შიო ღირსეულია. ეპისკოპოსებზე წესით უნდა ემოქმედა, ასე ვთქვათ, ინდივიდუალური მოგვარების გზას – ყველასთან ინდივიდუალურად მიმდინარეობდა მოლაპარაკებები: თუ დამიჭერ მხარს, მიიღებ ამას და ამას.

სავარაუდოდ, როცა მეუფე შიოს ჯგუფმა მეუფე დანიელის კანდიდატურის წამოყენების საკითხი ჩააგდო – შეგახსენებთ, რომ მართვა-გამგეობის დებულებაში წერია, რომ კანდიდატი უნდა იყოს არაუმეტეს 70 წლისა და გამოიყენეს ეს სიტყვა „უმეტეს“ – გაირკვა, რომ მეუფე დანიელის კანდიდატურის გაყვანას ვერ ახერხებდნენ, სავარაუდოდ, დანიელის ჯგუფი შეუერთდა მეუფე შიოს. მაგის ხარჯზე მიიღო შიომ 20 ხმა.

დანიელის ჯგუფს ჰყავდა სამი გამოკვეთილი ფავორიტი თავიდანვე: თავად მიტროპოლიტი დანიელი, რომელიც დაიბლოკა ასაკის გამო; ისაია, რომელიც დაიბლოკა განათლების გამო და მეუფე ნიკოლოზ ფაჩუაშვილი, რომელიც დაიბლოკა რამდენიმე წლის წინ ჟურნალისტების მიერ გაცხადებული, შეიძლება ითქვას, არაკორექტული ქცევის გამო ახალგაზრდების მიმართ. მაშინ ეს საკითხი ჩაიფარცხა, დღეს ბევრს აღარც კი ახსოვს ეს ამბავი, მაგრამ გასაგებია, რომ იმ შემთხვევაში, თუ ის პატრიარქობის კანდიდატი იქნებოდა, ეს თემა ამოტივტივდებოდა. სავარაუდოდ, ამის ხარჯზე გადალაგდა ხმები ამგვარად.

შვიდ-შვიდი ხმა აიღეს მეუფე იობმა და მეუფე გრიგოლმა და დანარჩენი ოთხი ხმა გადანაწილდა სამ კანდიდატზე: ორი ხმა მიიღო გრიგოლ კაციამ, ერთი – მეუფე დოსითეოს ბოგვერაძემ, არცერთი – მელქისედეკ ხაჩიძემ და ერთიც გაბათილდა, რადგან ბიულეტენი იყო ცარიელი.

• ეპისკოპოსების ეს განწყობები რამდენად ცვალებადია, ელით, რომ შესაძლებელია მოხდეს გადაჯგუფება? 

ეს მაინც იყო მოსასინჯი კრება და ძალები შესაბამისად გადანაწილდა ისე, როგორც ეს უნდა დაკრისტალიზებულიყო.

ამ კრების სიახლე ის არის, რომ მეუფე დანიელი, მისი კანდიდატურა და მისი გუნდი გამოირიცხა. ახლა ერთმანეთში დაიწყება მოლაპარაკებების სერიები. მაგალითად, მეუფე დოსითეოსი და მელქისედეკის ხმა სავარაუდოდ გადაიხრება გრიგოლისკენ, ან შიოსკენ – ეს არავინ იცის. ყოველ შემთხვევაში იობისკენ გადახრა ნაკლებ სავარაუდოა.

მეუფე შიო ეცდება, რომ გაიმყაროს შედეგები და ამ ორი ბანაკიდან რომელიმეს გადაბირებას ეცდება. შესაბამისად, არც ისინი იქნებიან გულხელდაკრეფილები.

• არსებობს იმის რისკი, რომ ამ 20 ხმიდან რომელიმე ხმა დაკარგოს მოსაყდრე შიომ? 

კი, აუცილებლად. ჩემი ვარაუდი ეს არის, რომ ასე მოხდება.

• იკვეთება, რომ „ოცნება“ ჩარეულია ამ პროცესში? ღიად ჩანს „ოცნების“ პროპაგანდისტების გზავნილები, რომ სინოდმა მხარი მოსაყდრეს უნდა დაუჭიროს. 

„ოცნების“ პროპაგანდისტები მოქმედებენ. თუ ზემოდან ბრძანება არ არის, თითს არ გაანძრევენ ვინმესთვის, ხომ?

გარდა ამისა, მეუფე შიომ გუნდში დააგროვა რაღაც გამოცდილებები, ინფორმაციები, შეისწავლა ეს ხალხი და მიხვდა, ვის რას შეჰპირდეს, ვის რაზე დაემუქროს. ეს ძალიან მნიშვნელოვანია, როცა კარგად იცნობ მომხრეს და მოწინააღმდეგესაც. მან ვიღაცებს შეიძლება მისცა გარანტია, რომ რაღაც არ მოხდება, თუ ვთქვათ, მე მოვალ, ვიღაცებს კი, პირიქით უთხრა: თუ მე მოვალ და არ იქნები მხარდამჭერით დაზღვეული, ამას და ამას გიზამ, ვთქვათ, გადაგიყვან-გადმოგიყვან, ან გეობას დაგაბრალებ. ბევრი რამ შეიძლება იყოს.

• მოგვიყევით პატრიარქობის სამ კანდიდატზე, რა იკვეთება მათი წინასაარჩევნო გზავნილებიდან, რა იცვლება თითოეულ შემთხვევაში? 

მეუფე იობის წინასაარჩევნო დაპირება არის ის, რომ თუ ის გახდება პატრიარქი, ეცდება, საქართველოში აღადგინოს შუა საუკუნეების დროინდელი, ნაციონალისტურ-კონსერვატორული სიმფონიის მოდელი. ეს გულისხმობს ხელდასხმით მირონცხებულ მეფეს – პატრიარქის მხარდაჭერილ მეფეს და, სავარაუდოდ, საეკლესიო გვარდიის აღდგენას.

ასე რომ, მეუფე იობი თუ გახდება პატრიარქი, მირონცხება მოხდება, აღადგენს მეფეს თუნდაც სიმბოლური თვალსაზრისით და დანარჩენი უკვე მეფემ თავისით უნდა სცადოს, რომ ამ მირონცხებისგან გამოძერწოს რეალური ძალაუფლება. შეძლებს თუ არა ამას, ეს უკვე მასზეა დამოკიდებული.

• მეუფე იობს არ უცდია თავისი კანდიდატით დაეინტერესებინა ივანიშვილი? 

მეუფე იობი იყო ერთ-ერთი თავგამოდებული, შეიძლება ითქვას, თავგანწირული მხარდამჭერი „ქართული ოცნების“, მაგრამ როდესაც იყო 20 ივნისის მოვლენები [საპროტესტო აქციები, რომელიც მოჰყვა რუსი გავრილოვის საქართველოს პარლამენტის თავმჯდომარის სავარძელში ჩასმას], იობი პირველი ჩაება ეპოქალურად ამ პროცესში. იობის კონსერვატიზმი ეფუძნება ნაციონალისტურ ნარატივს და არა რუსულ ნარატივს. ეს არ არის რუსული ნარატივი. იობი არ არის რუსული კონსერვატიზმის წარმომადგენელი. ის არის ნაციონალისტური კონსერვატიზმის წარმომადგენელი.

ამიტომაც, იობისთვის მიუღებელი აღმოჩნდა ძალადობრივი განუკითხაობა, ხალხის ცემა-ტყეპა უმიზეზოდ, ვინც არ მოსწონს ხელისუფლებას, მისი ცემა, ძალადობა, დაჯარიმება. მაშინ იობმა მთავრობის წინააღმდეგ რამდენიმე გაბედული განცხადება გააკეთა და ამით მოიჭრა გზა „ოცნებასთან“, ჩაკეტა თავისი ეპარქია და გადაწყვიტა, რომ მისთვის დასაყრდენი იყო საპატრიარქოს ტახტის ბრძოლისას არა საერო ხელისუფლება, არამედ მკაცრი რელიგიური, ნაციონალური კონსერვატიზმი და საეკლესიო არმია.

• რაც შეეხება მოსაყდრე შიოს, მისი მთავარი გზავნილები რა არის? 

მეუფე შიოს წინასაარჩევნო გზავნილები ასევე არის კონსერვატიზმი, მაგრამ არა ნაციონალისტური კონსერვატიზმი, არამედ ის ეფუძნება, ასე ვთქვათ, რუსულ კულტურულ-პოლიტიკურ იზოლაციონიზმს. იგულისხმება იზოლაციონიზმის შენარჩუნება ევროპასთან, ევროპის ფასეულობით სისტემასთან.

• სად გამოჩნდა ეს მკაფიოდ, კონკრეტული მაგალითი რომ გვითხრათ. 

მეუფე შიო ხშირად იმეორებს რუსულ კონსერვატორულ ნარატივში არსებულ პოსტულატებს. ბოლოს ეს შეარბილა, მაგრამ, მაგალითად, ქალის როლზე რომ ნახოთ მისი ქადაგებების სერია და შეადაროთ, რა ხდება რუსულ ეკლესიაში, ნახავთ, რომ იდენტურია. იგივეა უმცირესობებთან მიმართებით – ის რუსეთიდან აკოპირებს ამ გზავნილებს, შემდეგ ფუთავს რელიგიურ-კულტურულ პატრიოტიზმით. მისი აზრით, სამყარო გარდაქმნის პროცესშია და არ იქნება ურიგო, თუ ჩვენ ამ გარდაქმნების მიღმა ვიქნებით.

• მეუფე შიოს რუსული რელიგიურ–კულტურული სივრცე მოსწონს, რადგან იქ სწავლობდა და მოსკოვში მუშაობდა, თუ თქვენი დაკვირვებით, ის განიცდის რუსული ეკლესიის გავლენას?

ალბათ ერთიც და მეორეც. მეუფე შიო ცდილობს, შეუთავსოს სასიამოვნო სავალდებულოს.

შორიდან დაკვირვებით ასე ჩანს, რომ მას გააჩნია გულწრფელი სიმპათია რუსული სივრცის მიმართ, მაგრამ შეიძლება განიცდიდეს გარკვეულ გავლენასაც. რა ტიპის გავლენაა რუსული ეკლესიის და ვის ხარჯზე მოინდომა ეს, ვერავინ ვერ იტყვის.

მეუფე შიო იქ, რუსეთში ფორმირდა და შეიძლება, გულწრფელად მოსწონს და სჯერა, რომ საქართველოსთვის უკეთესი იქნება, თუ ჩვენი ქვეყანა რუსულ კულტურულ სივრცეში დარჩება და მენტალურად დავახლოვდებით.

• თანაც, „ოცნების“ პოლიტიკასთან თანხვედრაშია მისი ეს ხედვა? 

დიახ, თანხვედრაშია. მეუფე შიოს კიდევ ერთი წინასაარჩევნო დაპირებაა ახლო კავშირი, ახლო კონტაქტი ხელისუფლებასთან.

მეუფე შიო ასევე აპირებს ცვლილებებს ეკლესიის სტრუქტურაში: ახალგაზრდა მღვდლებისგან შექმნა გუნდი, სავარაუდოდ, ესენი არიან დაქორწინებული მღვდლები, რადგან ბერების თემას მეუფე შიო ძალიან სერიოზულად უყურებს და სურს, რომ ეს იყოს გამორჩეული ნაბიჯი ადამიანების ცხოვრებაში, ადვილად არ სურს დაეთანხმოს ადამიანების მხრიდან ბერობის გადაწყვეტილებას, რაც აქამდე ხდებოდა.

ეს განასხვავებს კიდევ მეუფე შიოს მეუფე იობისაგან რადიკალურად. იობი, მაგალითად, ყველას აკურთხებს ბერად, ვინც ამას ეტყვის. მეუფე შიო ცდილობს, რომ ეს აქციოს რაღაც მისტიკური გადაწყვეტილებების კატეგორიად, როგორც ეს ხდება რუსულ ეკლესიაში.

რუსეთში ძალიან ძლიერია ეს ტრადიციული გაგება, თითქოს როდესაც ადამიანი ხდება ბერი, მას შეუძლია  წინასწარმეტყველება, ადამიანში სულის დანახვა და ასე შემდეგ. ეს მოდელები ხშირად ფილმებშიც გვხდება, მაგალითად როგორიცაა მხატვრული ფილმი „კუნძული“.

• გვითხარით მესამე კანდიდატის შესახებ – მეუფე გრიგოლის პატრიარქად არჩევის შემთხვევაში, რა იცვლება არსებითად? 

უნდა აღინიშნოს, რომ ორი ეპისკოპოსი, ვისზეც გესაუბრეთ, წარმოადგენს აღმოსავლეთ საქართველოს ეპარქიებს, ხოლო დასავლეთ საქართველოს ეპარქიების წარმომადგენელი გახლავთ ფოთისა და ხობის მიტროპოლიტი გრიგოლი. იგი აშკარად არის რეფორმატორი, რეფორმების მომხრე. მან სცადა თავის ეპარქიაში მოეწყო გარკვეული მოდელი, მაგალითად, საკმაოდ წარმატებული სასწავლებლის შექმნა მოახერხა ისეთ პერიფერიულ ქალაქში, როგორიც არის ფოთი.

ამის მიღმა მეუფე გრიგოლს აქვს ძალიან მკაფიო პოზიციები ბევრ საკითხთან დაკავშირებით. ეს პოზიცია ცნობილია საზოგადოებისთვისაც.

მეუფე გრიგოლი ახსენებს სამოციქულო ტრადიციის შენარჩუნებას. რუსეთის ეკლესია იმყოფება კონსტანტინოპოლის ეკლესიასთან სქიზმაში [განყოფაში], გათიშულობაში საბერძნეთის ეკლესიასთან უკრაინის ავტოკეფალიის საკითხის გამო, თუმცა ითვლება, რომ ეს გათიშულობა არის დროებითი და ოდესმე რუსული მართლმადიდებლური სივრცე და ბერძნულ-კულტურული ეკლესიები კვლავ გაერთიანდებიან.

შეკითხვა ასეთია: თუ რუსეთი წავიდა ვა-ბანკზე, ანუ ამ გათიშულობის საბოლოო გაფორმებაზე, მაშინ ის ეცდება ამ თავის იზოლაციონიზმში თან ჩაიყოლოს რამდენიმე ეკლესია, რომელსაც ის საკუთარ ორბიტაზე მყოფ ეკლესიად განიხილავს, მათ შორის, ალბათ საქართველოსაც. მეუფე გრიგოლი ერთადერთია, ვინც ამ საფრთხეს თავისი სახელი დაარქვა და თავისი წინასაარჩევნო პროგრამის ერთ-ერთ მთავარ ნაწილად აქცია: სწორედ სამოციქულო ტრადიციის შენარჩუნება.

წარმოიდგინეთ, რომ მოხდეს ამგვარი რამ და საქართველოს ეკლესიის წინაშე დადგეს არჩევანი. ამ მომენტში კი, ჩვენი პატრიარქი არ აღმოჩნდეს საკმარისად ძლიერი და დაჰყვეს რუსეთის ნებას. ჩვენი 1700-წლიანი ტრადიცია შეიძლება ერთი ხელის მოსმით დაიკარგოს და ჩვენ აღმოვჩნდეთ მართლმადიდებელი ეკლესიის საერთაშორისო სხეულის მიღმა.

აი, ამგვარი საფრთხე დგას ყველაზე მეტად მეუფე შიოსთან მიმართებაში: თუ მას რუსეთის ეკლესია მოსთხოვს ამის გაკეთებას ოფიციალურად, როგორ იქნება მისი პოზიცია? ამ საკითხზე მას არასოდეს უსაუბრია, თუმცა უთქმელად ჩანს, რომ მეუფე შიო ამ შემთხვევაში გადაიხრება აშკარად მოსკოვისკენ.

მეუფე გრიგოლი ასევე ხედავს საჭიროებას, ეკლესიამ გამოიმუშაოს ერთგვარი სოციალური დოქტრინა: ეკლესიების უმრავლესობას გააჩნია სოციალური დოქტრინა, სადაც ასახულია ტექსტუალური სახით ის, თუ ეკლესია როგორ ხედავს ამა თუ იმ თანამედროვე საკითხს. მაგალითად, რას ნიშნავს ეკლესიისთვის ხელოვნური ინტელექტი, ოჯახი, სიცოცხლის პატივისცემა და ასე შემდეგ.

საქართველოს პატრიარქი ვერანაირად ვერ იქნებოდა იმგვარი დიადი, თავის დროზე მას რომ არ ჰქონოდა სწორება ახალგაზრდა ადამიანებისკენ. ის როგორც კი მოვიდა ეკლესიაში, ერთ-ერთი რაც დაიწყო იყო ახალგაზრდებთან მუშაობა… მეუფე გრიგოლის ხედავს ასე, რომ გვესაჭიროება ქრისტიანები ეკლესიაში, რომელთაც საკუთარი ქრისტიანობა არ აიძულებს, უარი თქვან საკუთარ გარე სამყაროზე. დანარჩენი ორი კი, გვთავაზობს, შევქმნათ გარკვეული ტიპის ქრისტიანული „ბაბლი“.

მეუფე გრიგოლი ამბობს, რომ სამყარო ვითარდება და ეკლესიამ უნდა მოახერხოს ამ სამყაროზე გავლენის მოხდენა.

• ეს ხედვები ცნობილი იყო უკვე სინოდისთვის, ასევე რუსულ ორბიტაზე აღმოჩენის საფრთხე. რა რესურსი არსებობს, რომ სინოდის უმრავლესობამ მიიღოს გულწრფელი გადაწყვეტილება? 

პატრიარქის ეპოქა იყო ძალიან დიდი, 49 წელი. შემდეგ მეუფე შიოს წილად ხვდა მოსაყდრეობა. იერარქების დიდი ნაწილს შესაძლებელია გულში ურჩევნია შეჩვეული ჭირი რაღაც ახალს. ნებისმიერი სიახლე ბევრ ტკივილთან არის დაკავშირებული. ბევრი თვლის, რომ მეუფე გრიგოლი თუ წამოიწყებს ეკლესიის რაღაცნაირად გაჯანსაღების პროცესს, მათაც მოუწევთ ამას ფეხი აუწყონ, რაღაცები შეცვალონ ეპარქიაში. ბევრს ეს მომენტი არ ხიბლავს – დამატებითი შრომაა.

რუსეთის მხრიდან საფრთხეს ყველა ხედავს. ყველა ამტკიცებს, რომ არ არის პირდაპირი ზეწოლა, მაგრამ „ქართულმა ოცნებამ“ გასაგებად მიანიშნა იერარქებს, რომ ის აგროვებს კომპრომატებს ყველას წინააღმდეგ. მეუფე პეტრეს ინციდენტი, ციანიდის საქმე და სუს-ის კრებსები უნდა განვიხილოთ ერთი საერთო სქემის ნაწილად. თუ ამ ფაქტებს გავიხსენებთ წლების განმავლობაში რაც ხდებოდა, შემდეგ გახდება ბევრი რამ გასაგები.

პირდაპირ ვინმეზე ზეწოლა და წნეხი შეიძლება მართლაც არ არის, მაგრამ წლების განმავლობაში „ქართულმა ოცნებამ“ გასაგებად მიანიშნა იერარქებს, რა შეუძლია. მიუთითა: თვით პატრიარქსაც არ დავინდობთ და ვცადეთ მისი დისკრედიტაცია, თქვენ ხომ წარმოგიდგენიათ, რა მოხდება, თუ შევამჩნევთ, რომ არ აკეთებთ იმას, რაც ჩვენ გვსურსო.

საერთო ჯამში, არავის არ აქვს ჩხუბის და შარის თავი. არავის არ უნდა, თავი იმართლოს, სად და ვისთან ჰქონდა სექსი, ან არ ჰქონია საერთოდ. ეს დელიკატური და უხერხული თემაა და ეს გახადა სწორედ „ოცნების“ მთავრობამ მთავარ სალაპარაკო თემად. ჩვენც დავაშავეთ ყველამ, მათ შორის, ჟურნალისტებმა, ვინც „ოცნებას“ ამაში ავყევით.

„ოცნების“ პარლამენტი ახალ-ახალი ჯარიმების დაწესებას აგრძელებს. პარლამენტს გარემოს დაცვის შესახებ კანონში ცვილებისა და ახალი ჯარიმების დაწესების თაობაზე ინიციატივით მთავრობამ მიმართა .

ინიციირებული პროექტის მიხედვით, საქართველოს მთავრობას უფლება ენიჭება დაადგინოს გამონაკლისი, ნარჩენების დროებით შენახვის ობიექტზე განთავსებისთვის დადგენილ ვადასთან დაკავშირებით. კერძოდ, პროექტის დამტკიცების შემდეგ კოდექსში უნდა დაკონკრეტდეს, თუ რას უნდა მოიცავდეს ნარჩენების მართვის ეროვნული სტრატეგია და სახიფათო ნარჩენების მართვასთან დაკავშირებული საკითხები.

• კოდექსის 40-ე მუხლს ემატება ჩანაწერი, რომლის თანახმადაც წელიწადში 10 ტონამდე არასახიფათო ნარჩენის აღდგენა/განთავსება დადგენილი წესით, რეგისტრაციის გარეშე, გამოიწვევს დამრღვევი პირის დაჯარიმებას 1500 ლარით.
•  კოდექსის 44-ე1 მუხლს ემატება ჩანაწერი, რომლის მიხედვითაც, მწარმოებლის გაფართოებული ვალდებულებისადმი დაქვემდებარებული დისტრიბუტორის მიერ ტექნიკური რეგლამენტით განსაზღვრული მოთხოვნების დარღვევა გამოიწვევს დაჯარიმებას 2000 ლარით.

44-ე1 მუხლის მე-3 ნაწილი ჩამოყალიბდება ახალი რედაქციით, რომელიც აწესებს 5000-ლარიან ჯარიმას რეესტრში რეგისტრაციის გარეშე საქმიანობისთვის. კოდექსის 44-ე1 მუხლს ემატება მე-3 პრიმა ნაწილი, რომლის მიხედვითაც, ანგარიშგებასთან დაკავშირებული მოთხოვნების შეუსრულებლობა, არასწორი ინფორმაციის წარდგენა ან რეგისტრაციის პირობების დარღვევა გამოიწვევს დაჯარიმებას 2000 ლარით.

პროექტის განმარტებითი ბარათის მიხედვით, ცვლილება ეფუძნება ვალდებულების ყოველთვიურ ხასიათს და მწარმოებელთა რაოდენობას.

კოდექსის 44-ე1 მუხლის მე-4 ნაწილი ჩამოყალიბდება ახალი რედაქციით, რომლის მიხედვითაც სანქცია [5000 ლარი] გავრცელდება არა მხოლოდ ანგარიშგების შეუსრულებლობაზე, არამედ სამოქმედო გეგმის შესრულების ანგარიშში არასწორი/არასრული ინფორმაციის წარდგენაზეც.

კოდექსის 44-ე1 მუხლის მე-8 ნაწილი აწესებს 10 000 ლარიან ჯარიმას მგვ-ის [მწარმოებლის გაფართოებული ვალდებულება] ორგანიზაციის მიერ კანონმდებლობით დადგენილ ვადაში შეთანხმებული სამოქმედო გეგმის უქონლობაზე.

კოდექსის 44-ე1 მუხლს ემატება მე-10 ნაწილი, რომელიც აწესებს 5 000-ლარიან ჯარიმას ტექნიკური რეგლამენტებით განსაზღვრული ისეთი მოთხოვნების დარღვევისთვის, რომლებიც არ არის გათვალისწინებული ამავე მუხლის პირველი მე-9 ნაწილებით [მაგ: ინფორმაციის საჯაროდ გამოქვეყნება და ა.შ.]

პროექტის მიხედვით, კოდექსის 47-ე მუხლის პირველი ნაწილი ყალიბდება ახალი რედაქციით: კოდექსის 47-ე მუხლს ემატება 1(1) ნაწილი, რომელიც განსაზღვრავს, რომ 35-ე1, მე-40, 40-ე1, 40-ე2, 42-ე, 43-ე, 44-ე და 44ე1 მუხლებით გათვალისწინებული სამართალდარღვევისთვის სახდელი პირს შეიძლება დაედოს დარღვევის გამოვლენიდან არაუგვიანეს 6 თვისა. ეს განპირობებულია დარღვევასთან დაკავშირებული გარემოებების სრულად გამორკვევისა და მტკიცებულებების სრულად შეკრების აუცილებლობით.

სახდელის დადების ვადის ათვლა იწყება ჩადენის დღიდან, ცვლილება კი გარკვეულ მუხლებზე ითვალისწინებს ვადის ათვლას გამოვლენის დღიდან.

„რადგან მოცემული მუხლებით გათვალისწინებული სამართალდარღვევის ფაქტის ჩადენის დღის განსაზღვრა შეუძლებელია, მიზანშეწონილია, რომ ათვლა დაიწყოს გამოვლენის დღიდან.“

კოდექსის 47-ე მუხლს ემატება ჩანაწერი, რომელიც ითვალისწინებს ჯარიმის 20%-ით შემცირებას, თუ პირი მას დაჯარიმების შესახებ დადგენილების ჩაბარებიდან 10 დღის ვადაში გადაიხდის – ადმინისტრაციულ სამართალდარღვევათა კოდექსის 290-ე8 მუხლით დადგენილია ანალოგიური საშეღავათო დათქმა, რომელიც დამრღვევს აძლევს საშუალებას დაჯარიმების შესახებ დადგენილების ჩაბარებიდან 10
დღის ვადაში გადაიხადოს ჯარიმა 20% ფასდაკლებით.

ნარჩენების მართვის კოდექსი დღეის მდგომარეობით ითვალისწინებს ნარჩენების დროებითი შენახვის ობიექტზე – ნარჩენების 3 წელზე ნაკლები დროით შენახვას, თუ ნარჩენები განკუთვნილია აღდგენისთვის, ან 1 წელზე ნაკლები დროით შენახვას, თუ ნარჩენები განკუთვნილია განთავსებისთვის.

პროექტის განმარტებითი ბარათის მიხედვით, გარემოს დაცვის სფეროში მიმდინარე რეფორმების ფარგლებში, დღის წესრიგში დგება ცალკეული პროდუქტის უფრო ხანგრძლივი ვადით დროებითი შენახვის საჭიროება. ეს საჭიროება მით უფრო მძაფრია იმ პირობებში, როდესაც ქვეყანაში არ მოქმედებს სახიფათო ნარჩენების არცერთი თანამედროვე ნაგავსაყრელი, იმ პირობით, რომ ამით ზიანი არ მიადგება გარემოს და ადამიანის ჯანმრთელობას.

„წვიმიანმა ამინდებმა არ მოგვცა აქამდე ასფალტის დაგების საშუალება, მაისის თვეში მოწესრიგდება ასფალტის საფარი და შემდეგ დაიხაზება,“ – მოგვწერეს გზების დეპარტამენტის პრესცენტრიდან, სადაც ვიკითხეთ: რატომ არ მოეწყო ზებრა გადასასვლელები ფრიდონ ხალვაშის გამზირზე, იგივე ხელვაჩაურის გზაზე?

ამ გზაზე რამდენიმე დღის წინ, 11 აპრილს, დაახლოებით 70 კაცი დაიღუპა – კაცი სახლიდან დღისით გადადიოდა ქუჩის მოპირდაპირე მხარეს. ამ დროს დაეჯახა მას მსუბუქი ავტომანქანა…

„ზებრა გადასასვლელი რომ ყოფილიყო, იქნებ ეს კაცი გადარჩენილიყო. ზებრა გადასასვლელის დახაზვა რა გახდა? ძლივს გააკეთეს ეს ქუჩა, ყველამ იცის ეს ამბავი. რა გააკეთეს „გუთენთრაკენის“ მეთოდით, მაგასაც ყველა ვხედავთ: დაზიანებული ქუჩა, ტროტუარები ფაქტობრივად აღარ გვაქვს.

გარდა ამისა, მთელ ქუჩას ისე ჩაივლი, ზებრა არ შეგვხდება… სად უნდა გადახვიდე? ყველგან დასახლებული პუნქტია და მუდმივად ინტენსიურად მოძრაობენ ავტომანქანები,“ – გვითხრეს დაბა ხელვაჩაურში მცხოვრებმა მოქალაქეებმა.

როგორც ადგილობრივები ჰყვებიან, ფრიდონ ხალვაშის გამზირზე სულ 4 ზებრა გასასვლელია. ეს ქუჩა აჭარის მაღალმთიანეთში მიმავალი ცენტრალური გზის მონაკვეთია და დაახლოებით 7 კილომეტრი სიგრძისაა. ზებრა-გადასასვლელები რომ ფრიდონ ხალვაშის გამზირზე არასაკმარისია, ეს გზების დეპარტამენტში, ანუ მთავრობაშიც წლებია იციან, მაგრამ აღმოჩნდა, რომ აქ ასფალტის დაგებას კიდევ ერთხელ აპირებენ.

ფრიდონ ხალვაშის გამზირის რეაბილიტაცია 2024 წელს დასრულდა. 2 წელიც კი არაა გასული სამუშაოების დასრულებიდან.

„ასფალტი ხელახლა დაიგება?“ – მივწერეთ გზების დეპარტამენტის პრესცენტრს და მეტი დეტალის გარკვევა ვცადეთ.

„კი, განახლდება,“ – მოგვწერეს გზების დეპარტამენტიდან და განმარტეს, რომ ცალკე ტენდერი არ ჩატარდება და მოვლა-შენახვის სამუშაოების ფარგლებში განახლდება ხელვაჩაურის გზა.

„სეზონურად საჭიროებისამებრ მთელი საქართველოს მასშტაბით ხდება ასფალტის საფარის მოწესრიგება. სამუშაოების ფასი დადგინდება მათი დასრულების შემდეგ,“ – მოგვწერეს გზების დეპარტამენტიდან.

2024 წელს დასრულდა ფრიდონ ხალვაშის გამზირის მასშტაბური რეაბილიტაცია. აქვს დეპარტამენტს შეფასება შესრულებული სამუშაოების ხარისხზე? რატომ დარჩა წელს საჭირო ისევ განახლება და ახალი საფარის დაგება? – ამჯერად გზების დეპარტამენტის პრესცენტრში გვიპასუხეს, რომ საჯარო ინფორმაცია უნდა გამოვითხოვოთ.

ფრიდონ ხალვაშის გამზირი ბათუმი-ახალციხის გზის ნაწილია. „ბათუმელები“ 2023 წლის დეკემბერში წერდა, რომ ხალვაშის გამზირზე ახალდაგებული ასფალტი უკვე ამოტეხილია.

საქართველოს საავტომობილო გზების დეპარტამენტმა ხალვაშის გამზირის [ბათუმი(ანგისა)-ახალციხის გზის დასაწყისი] რეაბილიტაციაზე ტენდერი 22,2 მილიონი ლარით გამოაცხადა. ხელშეკრულება კი შპს „ერ ტე დე“-სთან 19 399 999 ლარზე იყო გაფორმებული.

ამავე თემაზე: ფული მიაქვთ ჯიბეში“, ანუ როგორ გააკეთეს ხალვაშის გამზირი – გამოკითხვა ხელვაჩაურში

შპს „ერ ტე დე“ ის კომპანიაა, რომელიც თბილისში, წერეთლის ქუჩის რეაბილიტაციაზე მუშაობდა. ამ ქუჩაზე შესრულებული სამუშაოებით განსაკუთრებით გაითქვა სახელი ამ კომპანიამ, კონკრეტულად კი, ჟურნალისტ ბექა ყორშიას ჟურნალისტური ნამუშევრით „გუთენთრაქენის მეთოდზე“.

კომპანიამ „ერ ტე დე“ ფრიდონ ხალვაშის გამზირზეც ახალდაგებული ასფალტის ნაწილი იმავე 2023 წელს აყარა და ხელახლა დააგო. გზების დეპარტამენტსა და კომპანიას შორის გაფორმებულ ხელშეკრულებაში ცვლილება 16-ჯერ შევიდა. 2023 წლის 15 დეკემბრის ცვლილებით კი, ხელშეკრულების მოქმედების ვადა გაგრძელდა 2024 წლის 29 თებერვლის ჩათვლით.

„რამე არ მითხრა, მღალატობს ნერვები“ – რეპორტაჟი ხელვაჩაურის გადათხრილი გზიდან [ვიდეო]

„ერ ტე დე“ 2013 წელს, თბილისში რეგისტრირებული კომპანიაა, რომლის 100% წილის მფლობელი და დირექტორია ლუხუმ ქართლოსიშვილი. ის „ოცნების“ შემწირველიცაა.

მთავარი ფოტო „ბათუმელების“ 2025 წლის არქივიდან. 

__

ამავე თემაზე:

„რამე არ მითხრა, მღალატობს ნერვები“ – რეპორტაჟი ხელვაჩაურის გადათხრილი გზიდან [VIDEO]

See more

დღეს, 28 აპრილს, გაიმართა წმინდა სინოდის სხდომა, რომელზეც საქართველოს კათოლიკოს-პატრიარქის ტახტზე პატრიარქობის სამი კანდიდატი გამოარჩიეს.

სენაკისა და ჩხოროწყუს მიტროპოლიტი, საპატრიარქო ტახტის მოსაყდრე შიო (მუჯირი),  მროველ-ურბნელი მიტროპოლიტი იობი (აქიაშვილი) და  ფოთისა და ხობის მიტროპოლიტი გრიგოლი (ბერბიჭაშვილი).

წმინდა სინოდში 39 მღვდელმთავარია, დღეს გამართულ სხდომას კი 38 ესწრებოდა. სხდომაზე არ იყო წილკნისა და დუშეთის მიტროპოლიტი ზოსიმე (შიოშვილი).

პატრიარქობის კანდიდატებს შორის ხმები ასე გადანაწილდა:

• სენაკისა და ჩხოროწყუს მიტროპოლიტი, საპატრიარქო ტახტის მოსაყდრე შიო (მუჯირი) – 20 ხმა;
• მროველ-ურბნელი მიტროპოლიტი იობი (აქიაშვილი) – 7 ხმა;
• ფოთისა და ხობის მიტროპოლიტი გრიგოლი (ბერბიჭაშვილი) – 7 ხმა.

ხმები ასევე მიიღეს: წალკელმა ეპისკოპოსმა გრიგოლმა, მარგვეთისა და უბისის ეპისკოპოსმა მელქისედეკმა და ბელგიისა და ჰოლანდიის ეპისკოპოსმა დოსითეოზმა.

საქართველოს ავტოკეფალური მართლმადიდებელი ეკლესიის მართვა-გამგეობის დებულების მიხედვით, რომელიც მიღებულია საქართველოს მართლმადიდებელი ეკლესიის გაფართოებული ადგილობრივი კრების მიერ 1995 წლის 18-19 სექტემბერს, დადგენილია პატრიარქის არჩევის წესი. 

საქართველოს კათოლიკოს-პატრიარქობის კანდიდატი უნდა აკმაყოფილებდეს შემდეგ მოთხოვნებს: ეროვნებით უნდა იყოს ქართველი, უნდა იყოს საქართველოს მართლმადიდებელი ეკლესიის მღვდელმთავარი, უნდა ჰქონდეს საღვთისმეტყველო განათლება და საეკლესიო მმართველობის საკმარისი გამოცდილება, ასაკით უნდა იყოს არანაკლებ ორმოცი წლისა და არაუმეტეს სამოცდაათი წლისა, უნდა იყოს ბერი.

გთავაზობთ პატრიარქობის კანდიდატების ბიოგრაფიებს, რომელიც მომზადებულია საქართველოს საპატრიარქოს მიერ გამოქვეყნებული ოფიციალური ბიოგრაფიების მიხედვით.

საქართველოს 142-ე კათოლიკოს-პატრიარქი სწორედ ამ სამი კანდიდატიდან ერთი გახდება.

•  სრულიად საქართველოს კათოლიკოს-პატრიარქის ტახტის მოსაყდრე, სენაკისა და ჩხოროწყუს, ავსტრალიისა და ახალი ზელანდიის მიტროპოლიტი შიო (მუჯირი)

შიო მუჯირი (ერისკაცობაში – ელიზბარ თეიმურაზის ძე მუჯირი) 1969 წლის 1 თებერვალს თბილისში დაიბადა.

შიო (ელიზბარ) მუჯირი ბერად აღიკვეცა 1993 წლის 5 იანვარს, დიაკვნად აკურთხეს 1995 წლის 19 აგვისტოს, ხოლო მღვდლად აკურთხეს 1996 წლის 6 მაისს.

ეპისკოპოსად აკურთხეს 2003 წლის 7 სექტემბერს, ხოლო მთავარეპისკოპოსის ხარისხი მიანიჭეს 2009 წლის 20 სექტემბერს. მიტროპოლიტობა ებოძა 2010 წლის 2 აგვისტოს.

2017 წლის 23 ნოემბერს კათოლიკოს პატრიარქმა ილია მეორემ შიო მუჯირი საპატრიარქო ტახტის მოსაყდრედ დაასახელა.

განათლება

შიო (ელიზბარ) მუჯირმა დაწყებითი საშუალო განათლება თბილისში, 53-ე საშუალო სკოლაში მიიღო. პარალელურად კი სწავლობდა სამუსიკო სასწავლებელში.

1988 წელს სწავლა გააგრძელა თბილისის სახელმწიფო კონსერვატორიაში ვიოლონჩელოს კლასში.

1998 წელს შიო (ელიზბარ) მუჯირმა დაამთავრა ბათუმის იოანე ღვთისმეტყველის სახელობის სასულიერო სემინარია და სწავლა გააგრძელა მოსკოვის სასულიერო აკადემიის დაუსწრებელ განყოფილებაზე.

2001 წლიდან სწავლობდა მოსკოვის წმიდა ტიხონის საღვთისმეტყველო ინსტიტუტში.

საეკლესიო ცხოვრება

ოფიციალური ბიოგრაფიის მიხედვით, ელიზბარ მუჯირი 1991 წელს  მორჩილად მივიდა შიომღვიმის მონასტერში. 1993 წლის 5 თებერვალს, მორჩილი ელიზბარი აღკვეცეს ბერად და  სახელად შიო უწოდეს. ბერი შიო ჯერ მონასტრის ტრაპეზარი იყო, შემდეგ კი ეკონომოსი.

1995 წელს დიაკვნად აკურთხეს, 1996 წელს კი საქართველოს კათოლიკოს-პატრიარქმა ილია II-მ ბერ-დიაკონი შიო მღვდლად აკურთხა.

1997 წელს მღვდელ-მონაზონი შიო თბილისის კლდისუბნის წმიდა გიორგის ეკლესიის წინამძღვრად დაინიშნა.

1998 წლის 3 აპრილს მღვდელმონაზონ შიოს მიენიჭა იღუმენის წოდება ოქროს ჯვრის ტარების უფლებით და დაადგინეს ილია წინასწარმეტყველის ტაძრის წინამძღვრად.

1999 წლის 6 მარტიდან იღუმენი შიო თბილისის ანჩისხატის ტაძრის ღვთისმსახურია. იმავე წლის 20 სექტემბრიდან ნარიყალას წმიდა ნიკოლოზის სახელობის ტაძრის წინამძღვარია.

2001 წლის ოქტომბერში გახდა მოსკოვის ქართველთა სათვისტომოს წმიდა გიორგის სახელობის ტაძრის წინამძღვარი.

2003 წლის 18 აგვისტოს საქართველოს მართლმადიდებელი ეკლესიის წმიდა სინოდმა (ურბნისი) იღუმენი შიო გამოარჩია ახლადშექმნილი სენაკისა და ჩხოროწყუის ეპარქიის წინამძღოლად.

2010 წლის 2 აგვისტოს დაინიშნა სრულიად საქართველოს კათოლიკოს-პატრიარქის ქორეპისკოპოსად.

2017 წლის 23 ნოემბერს დაინიშნა სრულიად საქართთველოს კათოლიკოს-პატრიარქის მოსაყდრედ.

2026 წლის 17 მარტს გარდაიცვალა საქართველოს კათალიკოს-პატრიარქი, მცხეთა-თბილისის მთავარეპისკოპოსი და ბიჭვინთისა და ცხუმ-აფხაზეთის მიტროპოლიტი, ილია მეორე. 18 მარტს შეკრებიულმა სინოდმა, სენაკისა და ჩხოროწყუს მიტროპოლიტი შიო, სრულიად საქართველოს კათოლიკოს-პატრიარქის ტახტის მოსაყდრედ დაამტკიცა.

2007 წლის 25 დეკემბერს ეპისკოპოსი შიო დაჯილდოვდა წმიდა გიორგის ორდენით.

2009 წლის ეპისკოპოსი შიო აღყვანილ იქნა მთავარეპისკოპოსის ხარისხში.

2018 წლის 21 ივნისს წმინდა სინოდის სხდომაზე დაჯილდოვდა სკუფიაზე ბრილიანტის ჯვრის ტარების უფლებით.

• მროველ-ურბნელი მიტროპოლიტი იობი  

მეუფე იობი, ერისკაცობაში – ელგუჯა ზურაბის ძე აქიაშვილი დაიბადა 1960 წლის 25 მაისს, სოფელი სნოში (დაბა ყაზბეგი).

1988 წლის 3 იანვარს აღიკვეცა ბერად, 1988 წლის 19 იანვარს აკურთხეს დიაკვნად, ხოლო 1988 წლის 27 მარტს აკურთხეს მღვდლად.

1992 წლის 17 მაისს აკურთხეს ეპისკოპოსად, ხოლო 1996 წლის 25 დეკემბერს ებოძა მთავარეპისკოპოსობა.

2000 წლის 28 ნოემბერს გახდა მიტროპოლიტი.

• განათლება  

მეუფე იობი (ელგუჯა) აქიაშვილმა 1977 წელს დაამთავრა სოფელ სნოს საშუალო სკოლა. 1978 წელს სწავლა გააგრძელა საქართველოს სასოფლო-სამეურნეო ინსტიტუტის ეკონომიკის ფაკულტეტზე.

1982 წელს დაინიშნა საქართველოს საპატრიარქოში ეკონომისტად. 1983 წელს კი საპატრიარქოს საფინანსო-სამეურნეო განყოფილების უფროსის მოადგილე გახდა. 1984 წელს გაწვეულ იქნა სამხედრო სამსახურში. დაბრუნების შემდეგ მუშაობა განაგრძო საქართველოს საპატრიარქოში არქივარიუსად.

1985 წელს ჩაირიცხა მცხეთის სასულიერო სემინარიაში.

• საეკლესიო ცხოვრება

ელგუჯა აქიაშვილი სტუდენტობის წლებში სიონის საპატრიარქო ტაძრის სტიქაროსანი იყო. 1988 წლის 3 იანვარს სამთავროს მონასტერში წილკნელმა ეპისკოპოსმა ზოსიმემ (შიოშვილი) ელგუჯა აქიაშვილი ბერად აღკვეცა და უწოდა სახელად იობი. იმავე წლის 19 იანვარს, კათოლიკოს-პატრიარქმა ილია II-მ ბერი იობი აკურთხა დიაკვნად, ხოლო 28 მარტს – მღვდლად.

1988 წლის 22 ივნისს მღვდელმონაზონი იობი დაინიშნა მარტყოფის ღვთაების მონასტრის წინამძღვრად. 1989 წლის ზაფხულში მღვდელმონაზონი იობი მონაწილეობდა აჭარაში მოწყობილ მისიონერულ მოგზაურობაში.

1989 წლის 3 სექტემბერს იგი აყვანილ იქნა იღუმენის ხარისხში, იმავე წლის ოქტომბერში გადაიყვანეს აჭარაში, სხალთის ახლადგახსნილ მამათა მონასტერში.

1990 წლის 28 აგვისტოს კათოლიკოს-პატრიარქმა ილია მეორემ იღუმენი იობი არქიმანდრიტის ხარისხში აიყვანა.

1990 წლის სექტემბერში არქიმანდრიტი იობი გადაყვანილ იქნა ცხუმ-აფხაზეთის ეპარქიაში, კომანის მონასტერში, მაგრამ ელემენტარული საცხოვრებელი პირობების არქონის გამო იძულებული გახდა დროებით კვლავ თბილისში დაბრუნებულიყო.

1990 წლის ივლისიდან დაინიშნა საქართველოს საპატრიარქოს ახლადჩამოყალიბებული სოფლის მეურნეობის განყოფილების თავმჯდომარედ, იმავდროულად ასრულებდა მარტყოფის ღვთაების მონასტრის წინამძღვრის მოვალეობასაც.

1992 წლის მაისში სინოდმა მეუფე იობი გამოარჩია მანგლელ ეპისკოპოსად.

1992 წლის სექტემბრიდან ეპისკოპოსი იობი დაინიშნა სასულიერო აკადემიისა და სემინარიის პრორექტორად.

1992 წლის 25 დეკემბერს მეუფე იობი გადაყვანილ იქნა ბათუმ-შემოქმედის ეპარქიის მმართველად და ხულოს სასულიერო სასწავლებლის რექტორად.

1995 წლის გაზაფხულზე წმიდა სინოდის გადაწყვეტილებით ბათუმ-შემოქმედის ეპარქიის გაყოფის შემდეგ ეპისკოპოსი იობი დაინიშნა ბათუმისა და სხალთის ეპისკოპოსად.

1996 წლის 21 ოქტომბრიდან დაინიშნა ურბნისისა და რუისის ეპარქიის მმართველად და სრულიად საქართველოს კათოლიკოს-პატრიარქის ქორეპისკოპოსად.

1996 წლის 25 დეკემბერს აყვანილ იქნა მთავარეპისკოპოსის, 2000 წლის დეკემბერში მიტროპოლიტის ხარისხში.

2007 წლის 25 დეკემბერს დაჯილდოვდა წმიდა გიორგის უმაღლესი ორდენით.

2003 წელს პირადი განცხადების საფუძველზე განთავისუფლდა ქორეპისკოპოსის თანამდებობიდან და სათავეში ჩაუდგა საპატრიარქოს საღვთისმეტყველო და ლიტურგიკულ კომისიებს. არის საღვთისმსახურო წიგნების შესწავლისა და რედაქტირების კომისიის თავმჯდომარე.

• ფოთისა და ხობის მიტროპოლიტი მეუფე გრიგოლი

მეუფე გრიგოლი, ერისკაცობაში – გურამ გრიგოლის ძე ბერბიჭაშვილი 1956 წლის, 18 ივლისს,  თბილისში.

დიაკვნად აკურთხეს 1989 წლის 14 ოქტომბერს, მღვდლად აკურთხეს 1990 წლის 27 მარტს. ბერად აღიკვეცა 1996 წლის 21 მარტს, ხოლო იმავე წლის 24 მარტს აკურთხეს ეპისკოპოსად.

მთავარეპისკოპოსის ხარისხში აიყვანეს 2003 წლის 7 სექტემბერს, ხოლო მიტროპოლიტობა ებოძა 2007 წლის 3 ივნისს. მეუფე გრიგოლი არის საპატრიარქოს გამომცემლობისა და რეცენზირების დეპარტამენტის თავმჯდომარე.

 განათლება

მიტროპოლიტი გრიგოლი (გურამ) ბერბიჭაშვილი სწავლობდა თბილისის 134-ე საშუალო სკოლაში, რომელიც დაამთავრა 1973 წელს.

1988-1991 წლებში გურამ ბერბიჭაშვილი სწავლობდა თბილისის სასულიერო სემინარიაში. 1991-1994 წლებში კი თბილისის სასულიერო აკადემიაში.

საეკლესიო ცხოვრება

1986-1987 წლებში გურამ ბერბიჭაშვილი მსახურობდა თბილისის დიდმოწამე ბარბარეს (ქვემო) ეკლესიაში ჯერ სტიქაროსნად, შემდეგ მნათედ.

1989 წლის 14 ოქტომბერს, სვეტიცხოვლობას, სვეტიცხოვლის საპატრიარქო ტაძარში ბათუმ-შემოქმედელმა მიტროპოლიტმა კონსტანტინემ (მელიქიძე) გურამ ბერბიჭაშვილი აკურთხა დიაკვნად და განამწესეს ბათუმის საკათედრო ტაძარში.

1990 წლის 24 მარტს, დიაკონი გურამი აკურთხეს მღვდლად და დაადგინეს ოზურგეთის რაიონის სოფელ ლიხაურის ყოვლადწმიდა ღვთისმშობლის შობის ეკლესიის წინამძღვრად.

1991 წლის 6 მაისიდან პარალელურად ახლადამოქმედებული აჭის წმიდა გიორგის სახელობის ეკლესიის წინამძღვარია.

მამა გურამმა ლიხაურისა და აჭის ეკლესიების წინამძღვრობის დროს გამოსცა არაერთი საეკლესიო წიგნი, დააფუძნა ყოველთვიური ჟურნალი „წყარო“.

1993 წლის 15 ივლისს დაჯილდოვდა ოქროს ჯვრის ტარების უფლებით.

1994 წლის 2 თებერვალს მიენიჭა დეკანოზის წოდება.

1996 წლის 21 მარტს ეპისკოპოსმა იობმა დეკანოზი გურამ ბერბიჭაშვილი ბერად აღკვეცა და ეწოდა გრიგოლი.

1996 წლის 23 მარტს მიენიჭა არქიმანდრიტის წოდება და დაჯილდოვდა მიტრისა და გამშვენიერებული ჯვრის ტარების უფლებით.

1996 წლის 24 მარტს კათოლიკოს-პატრიარქმა ილია II-მ არქიმანდრიტი გრიგოლი ფოთის ეპისკოპოსად აკურთხა.

2002 წლის 17 ოქტომბრის წმიდა სინოდის კრების განჩინებით ფოთის ეპარქიას შეეცვალა სახელწოდება და ეწოდა ფოთისა და სენაკის ეპარქია.

2003 წლის 18 აგვისტოს ურბნისის საკათედრო ტაძარში ჩატარებული წმიდა სინოდის კრების გადაწყვეტილებით კი ფოთისა და სენაკის ეპარქიას კვლავ შეეცვალა სახელი და ეწოდა „ფოთისა და ხობის“ ეპარქია.

შესაბამისად შევიდა ცვლილება მღვდელმთავრის ტიტულშიც. 2003 წლიდან მეუფე გრიგოლი მოიხსენიება ფოთისა და ხობის მიტროპოლიტად.

ფოთისა და ხობის ეპარქიაში ამჟამად 5 მოქმედი საპატრიარქოს საგანმანათლებლო (სააღმზრდელო) დაწესებულებაა.

წმ. გრიგოლ ღვთისმეტყველის სახელობის საღვთისმეტყველო-კატეხიზატორული სკოლა, წმიდა ნიკოლოზის ზოგადსაგანმანათლებლო საშუალო სკოლა, ქრისტიანული სულიერებისა და კულტურის ახალგაზრდული ცენტრი „ნუგეში“, ფოთის საგანმანათლებლო და კულტურულ – გამაჯანსაღებელი ცენტრი, ფოთის ბავშვთა სარეაბილიტაციო ცენტრი (თავშესაფარი მშობლების მზრუნველობას მოკლებულთათვის).

წმინდა სინოდის სხდომის დასრულების შემდეგ საქართველოს საპატრიარქომ გამოაქვეყნა სინოდის სხდომის ოქმი.

ქობულეთის ორზოლიანი შემოვლითი გზის 4-ზოლიან ავტომაგისტრალად მოდერნიზების პროექტზე გარემოს ეროვნულმა სააგენტომ დადებითი გარემოსდაცვითი გადაწყვეტილება გასცა. ეს იმას ნიშნავს, რომ საავტომობილო გზების დეპარტამენტს შემდეგ ეტაპზე გადასვლის შესაძლებლობა უკვე აქვს.

პროექტის განხორციელების მიზნით შემსრულებელი კომპანიის შესარჩევად საერთაშორისო ტენდერი უნდა გამოაცხადონ.

ქობულეთის შემოვლითი მაგისტრალის 4-ზოლიან გზად მოდერნიზების პროექტი გარემოსდაცვითი ზედამხედველობის დეპარტამენტს 2024 წლის ნოემბერში წარუდგინეს. სააგენტოს უფროსის ბრძანების მიხედვით, განხილვის პროცედურის შემდეგ სამი ალტერნატიული ვარიანტიდან უპირატესობა მეორე ალტერნატივას მიანიჭეს.

გზშ-ის ანგარიშის მიხედვით, ქობულეთის არსებული შემოვლითი გზა იწყება სოფელ შეკვეთილიდან და მთავრდება ჩაქვი-მახინჯაურის გვირაბებთან. ქობულეთის არსებული შემოვლითი გზის ოთხზოლიან მაგისტრალად მშენებლობა/მოდერნიზაცია დაგეგმილია ქობულეთის და ოზურგეთის მუნიციპალიტეტების საზღვრებში:

მარშრუტის ფარგლებში გზა გაივლის სასოფლო-სამეურნეო დანიშნულების ნაკვეთებისა და საკარმიდამო ტერიტორიების მომიჯნავედ, რომელიც გადაკვეთს მდინარეებს: ნატანები, ჩოლოქი, ოჩხამური, აჭყვა, კინტრიში, დეხვა, ჩაქვისწყალი და სხვა მცირე ზომის ზედაპირულ წყლებს და ბოლო მონაკვეთზე გზა განთავსდება ჩაქვი-მახინჯაურის გვირაბის სიახლოვეს.

დოკუმენტების მიხედვით, საპროექტო გზის საერთო სიგრძეა დაახლოებით 30,7 კმ და დერეფანი პირობითად იყოფა ორ ლოტად:

საწყისი 13 კმ სიგრძის მონაკვეთი სოფელ კაკუჩამდე (პირობითად ლოტი 1) და სოფელ კაკუჩადან ბოლო წერტილამდე (პირობითად ლოტი 2). საავტომობილო გზის დერეფანში გათვალისწინებულია დამატებითი კვანძების და არსებული გვირაბების პარალელურად ორი ახალი, ორზოლიანი გვირაბის მშენებლობა. ასევე დაგეგმილია ახალი ხიდების და გზაგამტარების მოწყობა.

პროექტი ქობულეთის შემოვლითი გზის პარალელურად დამატებითი ორზოლიანი გზის მოწყობას ითვალისწინებს. ახალი გზა თითქმის მთლიან სიგრძეზე არსებული გზის მარცხენა მხარეს მიჰყვება და მხოლოდ გარკვეულ მონაკვეთებში გადადის მარჯვენა მხარეს – მრუდების [მოხვევითი რადიუსების] გაუმჯობესების მიზნით. საპროექტო გზაზე მაქსიმალური დასაშვები სიჩქარე 120 კმ/სთ იქნება.

შერჩეული ვარიანტის მიხედვით, პროექტის ზემოქმედების ქვეშ ექცევა: 581 მიწის ნაკვეთი, რომელთა საერთო ფართობი 10 031 191 კვ.მ-ია. აქედან 193 ნაკვეთი კერძო საკუთრებაა, ჯამური ფართობით – 2 491 944 კვ.მ.

პროექტის თანახმად, ზარალის ანაზღაურდება და კომპენსაციები გაიცემა სრული ღირებულებით, განსახლების სამოქმედო გეგმის შესაბამისად.

ქობულეთის ორზოლიანი შემოვლითი გზის 4-ზოლიან ავტომაგისტრალად მოდერნიზება სატრანსპორტო ნაკადის ზრდის გამო გადაწყდა.

გზშ-ის ანგარიშის თანახმად, პროექტის ხანგრძლივობად განსაზღვრულია დაახლოებით 4 წელი, ხოლო სამშენებლო სამუშაოების ხანგრძლივობად – დაახლოებით 24 თვე. 

ქობულეთის შემოვლითი ორზოლიანი გზის ოთხზოლიანად გადაკეთებაზე მუშაობა გზების დეპარტამენტმა ამ გზის სრულად გახსნიდან 5 წლის შემდეგ, 2023 წელს დაიწყო.

ამჯერად კი ქობულეთის შემოვლით გზაზე დაშვებული მაქსიმალური სიჩქარე 90 კმ/საათიდან 70 კმ/საათამდეა შემცირებული.

ქობულეთის შემოვლითი გზა, რომელიც ორზოლიანია, შეიძლება ითქვას, რომ უსაფრთხო არ არის. ეს გზა, ისევე როგორც ბათუმის შემოვლითი გზა, არ არის ჩქაროსნული ავტომაგისტრალი [ავტობანი] – ორზოლიანია და სავალ ზოლებს შორის არ აქვს გამყოფი ბარიერი.

როგორ მიმდინარეობდა პროექტის განხილვის პროცედურა ვრცლად ამ თემაზე:

„დასრულდება ავტობანის მშენებლობა“ – „ოცნების“ შეუსრულებელი საარჩევნო დაპირება

See more

კომპანია „სოკარის“ ცნობით, გაზსადენზე დაგეგმილი სარემონტო საექსპლუატაციო სამუშაოების გამო, ხვალ, 29 აპრილის 06:00 საათიდან ბათუმის მუნიციპალიტეტში, ქალაქ ბათუმის ქუჩებსა და სოფლებში მცხოვრებ 65 902 აბონენტს გაზმომარაგება შეუწყდება.

ამავე დროს, 29 აპრილის 06:00 საათიდან 30 აპრილის 09:30 საათამდე ასევე, გაზის მიწოდება შეუწყდება ხელვაჩაურის ქუჩებსა და სოფლებში მცხოვრებ 69476 აბონენტს.

ბუნებრივი გაზის მიწოდება ეტაპობრივად დაიწყება 30 აპრილის 09:30 საათიდან და სრულად აღდგება 2 მაისის 20:00 საათამდე.

კომპანია „სოკარ ჯორჯია გაზი” აბონენტებს მოუწოდებს, დაკეტილ მდგომარეობაში იქონიონ ბინებში არსებული გაზის ონკანები და უყურადღებოდ არ დატოვონ გაზის დანადგარები.

დამატებითი ინფორმაციისთვის დარეკეთ „სოკარ ჯორჯია გაზის” ცხელ ხაზზე: 16 114

გაზის გათიშვასთან დაკავშირებით განცხადებას ავრცელებს საქართველოს გაზის ტრანსპორტირების კომპანია.

კომპანიის ცნობით, ზესტაფონის მუნიციპალიტეტში, სოფელ დილიკაურთან, ცენტრალური გაზსადენის მონაკვეთზე დაფიქსირდა გაზის გაჟონვა, რაც საჭიროებს დაუყოვნებლივ რეაგირებას.

„უსაფრთხოების უზრუნველყოფისა და ავარიული სიტუაციის დროული ლიკვიდაციის მიზნით, მიმდინარე წლის 29 აპრილს, 06:00 საათიდან განხორციელდება მაგისტრალური გაზსადენის შესაბამისი მონაკვეთის გათიშვა, რის შედეგადაც ზესტაფონის, ასევე ბოსლევის, ხარაგაულის, წევისა და აჭარის გაზგამანაწილებელი სადგურების მომხმარებლებს დროებით შეეზღუდებათ ბუნებრივი გაზის მიწოდება.

სარეაბილიტაციო სამუშაოების დასრულება დაგეგმილია 29 აპრილის 21:00 საათამდე და დაიწყება ეტაპობრივად გაზმომარაგების აღდგენა“ – წერს საქართველოს გაზის ტრანსპორტირების კომპანია.

„სოკარის“ ინფორმაციით, გაზსადენზე დაგეგმილი სარემონტო სამუშაოების გამო ხვალ, 29 აპრილს, აჭარაში 389 აბონენტს ბუნებრივი აირის მიწოდება შეუწყდება.

მაგალითად, ბათუმში ენვერ ხაბაძის ქუჩაზე 13:00 საათიდან 16:00 საათამდე შეუწყდება 284 აბონენტს ბუნებრივი აირის მიწოდება.

ბათუმში, მცხეთის N12ა-ში, 12 აბონენტი დარჩება ასევე ბუნებრივი აირის გარეშე 10:00 საათიდან 12:00 საათამდე.

29 აპრილის 12:00 საათიდან 14:00 საათამდე კი ხელვაჩაურის მუნიციპალიტეტში გრიგოლ რობაქიძის ქუჩაზე მცხოვრებ 34 აბონენტს შეუწყდება გაზმომარაგება. „სოკარის“ ცნობით, ამ მისამართზე გაზის მიწოდება დღის ბოლომდე სრულად აღდგება.

ამავე დღეს, ანუ 29 აპრილს, ბუნებრივი აირის მიწოდება ასევე შეუწყდება ხელვაჩაურის მუნიციპალიტეტში, დიდაჭარის ქუჩაზე მცხოვრებ 27 აბონენტს, 11:00 საათიდან 13:00 საათამდე. ბუნებრივი აირის მიწოდება აღდგება ამავე დღეს.

„სოკარი“ აბონენტებს მოუწოდებს, დაკეტილ მდგომარეობაში იქონიონ ბინებში არსებული გაზის ონკანები და უყურადღებოდ არ დატოვონ გაზის დანადგარები.

ყოფილი მეუღლის მიმართ განხორციელებული ძალადობის, ადევნებისა და ბინის მფლობელობის ხელშეუხებლობის დარღვევის ბრალდებით ერთი პირი დააკავეს.

„ბრალდებულმა ახმეტის მუნიციპალიტეტში,  ყოფილი მეუღლის საცხოვრებელ სახლში, უნებართვოდ შეაღწია და არასრულწლოვანი შვილების თანდასწრებით მასზე ფიზიკურად იძალადა. ასევე, დადგინდა, რომ ბრალდებული სისტემატურად უთვალთვალებდა ყოფილ მეუღლეს“.

გამოძიება სისხლის სამართლის კოდექსის 126-ე პრიმა, 11 პრიმა 151-ე პრიმა და 160-ე მუხლებით მიმდინარეობს, რაც 3 წლამდე ვადით თავისუფლების აღკვეთას ითვალისწინებს.

„საერთაშორისო სატვირთო და სამგზავრო ნებართვები აიღეს ისეთმა ფიზიკურმა და იურიდიულმა პირებმა, რომლებსაც არ გაუმარჯვიათ სააგენტოს მიერ გამოცხადებულ კონკურსებში. შესაბამისად, სააგენტოში არ არსებობს კონტროლის მექანიზმი, რომელიც უზრუნველყოფდა მრავალჯერადი ნებართვების გაცემას მხოლოდ იმ შემთხვევაში, როდესაც დადასტურებული იქნებოდა ნებართვის მაძიებლის გამარჯვება“- სახმელეთო სააგენტოს მუშაობაში არსებულ მნიშვნელოვან დარღვევებზე ამჯერად სახელმწიფო აუდიტი წერს.

ანგარიშის მიხედვით სახმელეთო სააგენტოს კვლევა ძირითადად 2022 -2023 წლებს მოიცავს. ამ და შემდეგ წლებში სახლემეთო სააგენტოს მუშაობასთან დაკავშირებულ პრობლემებზე „ბათუმელებს“ სტატიები, ფოტო-ვიდეო მასლები აქვს გამოქვეყნებული 2021 -2024 წლებში. 

ამავე თემაზე: შავ ბაზარზე 300-1000 დოლარის გადახდა გვიწევს – მძღოლები სააგენტოს კორუფციაში ადანაშაულებენ

ამ პერიოდში, სხვადასხვა დროს, სააგენტოს წინააღმდეგ არაერთი აქცია გამართეს მძღოლებმა, ისინი „ბათუმელებთან“ საუბრობდნენ, თუ რა სქემას იყენებდა სააგენტო „ფულის საკეთებლად.“

აუდიტის ანგარიშის მიხედვით, საერთაშორისო საავტომობილო სამგზავრო არარეგულარული ნებართვის მისაღებად, კომპანიების მიერ სააგენტოში წარმოდგენილი დოკუმენტაციის შესწავლისას გამოვლინდა შემთხვევები, როდესაც კომპანიებს არ ჰქონდათ წარმოდგენილი სპეციალური ECMT ფორმით შევსებული საკონტროლო დოკუმენტი. მიუხედავად ამისა, სააგენტოს მიერ გაცემულია ნებართვები.

„სააგენტოში არ არსებობს კონტროლის პრევენციული მექანიზმი, რომელიც შესაძლებელს გახდიდა შემოწმებულიყო საერთაშორისო საავტომობილო სამგზავრო არარეგულარული ნებართვების მაძიებელთა მიერ წარდგენილი დოკუმენტაციის სისრულე და სიზუსტე.

კომისიის სხდომის ოქმებში არ არის დოკუმენტირებული ისეთი შემთხვევები, როდესაც ECMT ნებართვების მისაღებად ჩატარებულ კონკურსებში ნებართვები მიიღეს კომპანიებმა, რომლებსაც არ ჰქონდათ წარმოდგენილი ისეთი მნიშვნელოვანი დოკუმენტაცია, როგორებიცაა: სატვირთო ავტომობილის ტექნიკური და უსაფრთხოების მოთხოვნებთან შესატყვისობისა და გზისთვის ვარგისიანობის ECMT სერტიფიკატები, მენეჯერისა და მძღოლების კომპეტენციის დამადასტურებელი დოკუმენტაცია და მათთან გაფორმებული ხელშეკრულებები, ავტოსატრანსპორტო საშუალებების სარეგისტრაციო მოწმობები და მათი არსებობა დასტურდებოდა სააგენტოს სამსახურების მიერ წინა პერიოდის კონკურსების დანართებსა და ელექტრონულ ბაზებში მოძიების შედეგად. აღნიშნული დოკუმენტები ნებართვის მაძიებლებს ეთვლებოდათ წარმოდგენილად, რაც არ არის დოკუმენტირების საუკეთესო პრაქტიკა“ – აღნიშნულია დასკვნაში. 

აუდიტი ხაზგასმით წერს, რომ  მრავალჯერადი ნებართვების გასაცემად გამართულ კონკურსებში ნებართვების მაძიებელთა მიერ წარმოდგენილი განაცხადები სააგენტოში სრულყოფილად არ არის დოკუმენტირებული და შენახული.

სააგენტომ აუდიტს ვერ წარუდგინა  ამ განცხადებების მნიშვნელოვანი ნაწილი.

კერძოდ, 776 განაცხადიდან 136 განაცხადი აუდიტის ჯგუფისთვის არ იყო წარდგენილი, ხოლო შესწავლილი 410 განაცხადიდან 119 შემთხვევაში გაიმარჯვეს ისეთმა კომპანიებმა, რომლებსაც სააგენტოში სრულყოფილად არ ჰქონდათ წარდგენილი კანონმდებლობით მოთხოვნილი დოკუმენტაცია.

ამასთანავე, აღსანიშნავია, რომ კომისია დასაშვებად ცნობდა კონკურსანტების მიერ წარმოდგენილ სამეწარმეო რეესტრის ამონაწერებს, რომლებიც საბუთების ჩაბარების თარიღისთვის არ იყო განახლებული. შესაბამისად, სააგენტო არ ფლობდა უახლეს ინფორმაციას ნებართვის მაძიებლის უფლებამოსილი პირების შესახებ.

გამოვლინდა შემთხვევები, როდესაც ნებართვების მაძიებლებმა სააგენტოში წარადგინეს არავალიდური სანოტარო აქტები. აუდიტი ასევე წერს, რომ სააგენტოში არ არის დანერგილი სრულყოფილი პრევენციული კონტროლის მექანიზმი, რომელიც უზრუნველყოფს წარდგენილი სანოტარო აქტების ნამდვილობის გადამოწმებას და  სააგენტოს მიერ გასაცემი ნებართვების შესახებ ინფორმაცია ქვეყნების და სახეობების მიხედვით არ არის საჯაროდ ხელმისაწვდომი.

„აღნიშნულის გამო, შესაძლოა ნებართვის მაძიებლები აღმოჩნდნენ არათანაბარ პირობებში და დროულად ვერ მიიღონ სასურველი რაოდენობის ნებართვები. ამასთანავე, ხელმისაწვდომი ნებართვების შესახებ დეტალური ინფორმაციის არქონა შეიძლება ხელისშემშლელ ფაქტორს წარმოადგენდეს გადამზიდი კომპანიებისთვის, დაგეგმონ საკუთარი ეკონომიკური აქტივობა“. 

აუდიტის ინფორმაციით, მესამე ქვეყნების ნებართვების გაცემის პროცესთან დაკავშირებით, სააგენტომ დაინტერესებულ პირებს დაუწესა ბარიერები, რითაც კომპანიებისთვის შეიზღუდა ნებართვების ხელმისაწვდომობა. სააგენტოს მიერ გამოცემული ბრძანების მიხედვით, ნებართვის მაძიებლები ვალდებულნი არიან გაწევრიანდნენ ასოციაციებში, რათა შეძლონ სასურველი ნებართვის მისაღებად სააგენტოსთვის განაცხადის წარდგენა. გარდა ასოციაციის წევრობასთან დაკავშირებული რიგი შეზღუდვებისა, კომპანიებს დამატებით წარმოეშვათ ფინანსური ვალდებულებები ასოციაციის საწევრო გადასახადის სახით.

სახელმწიფო აუდიტის სამსახურმა ვერ მიიღო რწმუნება სააგენტოს მიერ კომპანიებისთვის მნიშვნელოვანი ბარიერების დაწესების მიზანშეწონილობასთან დაკავშირებით.

CMT ნებართვების გაცემის პროცესში, ინფორმაციის სრულყოფილად ასახვის მიზნით, კომისიის სხდომის ოქმებში დადოკუმენტირდეს თითოეული ისეთი შემთხვევა, როდესაც ნებართვის მაძიებლების მიერ წარმოუდგენელი დოკუმენტაციის მოძიება და არსებობის დადასტურება განხორციელდა სააგენტოს სამსახურების მიერ წინა პერიოდის კონკურსის დანართებსა და ელექტრონულ ბაზებში.

გერმანიის კანცლერის, ფრიდრიხ მერცის თქმით, აშშ-ს არ გააჩნია სტრატეგია ირანის წინააღმდეგ ომისთვის, მათ შორის, თუ როგორ უნდა დასრულდეს ის.

„ამ ეტაპზე, მე არ მესმის, რა სტრატეგიულ ვარიანტს აირჩევენ ამერიკელები, მით უმეტეს, რომ ირანელები აშკარად ძალიან ოსტატურად ახერხებენ მოლაპარაკებებს – ან, უფრო სწორად, ძალიან ოსტატურად არ აწარმოებენ მოლაპარაკებებს“, – განაცხადა გერმანიის კანცლერმა 27 აპრილს დასავლეთ გერმანიაში სტუდენტებთან შეხვედრისას.

მერცის ციტატას „დოიჩე ველე“ ავრცელებს.

როგორც გამოცემა წერს, მერცის თქმით, ირანის წინააღმდეგ ომის დაწყების გადაწყვეტილება არასწორად იყო გააზრებული.

გერმანიის კანცლერმა ასევე თქვა, რომ აშშ-მ და ისრაელმა ირანის წინააღმდეგ ომი დაიწყეს ევროპელებთან წინასწარი კონსულტაციის გარეშე.

კანცლერმა განაცხადა, რომ მან უკვე ორჯერ გამოთქვა სკეპტიციზმი ამ ქმედებების მიმართ აშშ-ის პრეზიდენტთან, დონალდ ტრამპთან. „რომ მცოდნოდა, რომ ეს ხუთ ან ექვს კვირას გაგრძელდებოდა და მხოლოდ გაუარესდებოდა, კიდევ უფრო კატეგორიულად ვეტყოდი“, – დასძინა მან.

გერმანიის კანცლერის თქმით, ასეთი კონფლიქტების პრობლემა ყოველთვის ის არის, რომ რთულია მისი დასრულება. „ეს ძალიან მტკივნეულად ვნახეთ ავღანეთში 20 წლის განმავლობაში. ეს ვნახეთ ერაყში“ – თქვა მან.

ირანისა და აშშ-ის დელეგაციებს შორის პირველი პირდაპირი მოლაპარაკებები პაკისტანის დედაქალაქ ისლამაბადში 11 აპრილს, ცეცხლის შეწყვეტის შეთანხმების მიღწევიდან რამდენიმე დღეში გაიმართა, თუმცა დადებითი შედეგი არ გამოიღო.

თეირანმა მოლაპარაკებებში პროგრესის პირობად ირანის პორტების აშშ-ის ბლოკადის მოხსნა დაასახელა. თუმცა, ტრამპი აცხადებს, რომ ისლამურმა რესპუბლიკამ უნდა შეწყვიტოს ბირთვული პროგრამის განახლების უფლების მოთხოვნა, რადგან, მისი თქმით, თეირანის მიერ ბირთვული იარაღის განვითარება იყო აშშ-სა და ისრაელის ირანის წინააღმდეგ ომის მიზეზი.

ამასობაში, ახლო აღმოსავლეთში საომარი მოქმედებების შეჩერება, რომელიც თავდაპირველად ორი კვირით იყო დაწესებული, ძალაში რჩება. ცეცხლის შეწყვეტის ვადის ამოწურვამდე ცოტა ხნით ადრე, ტრამპმა განაცხადა, რომ ცეცხლის შეწყვეტა გაგრძელდება „სანამ მოლაპარაკებები ასე თუ ისე არ დასრულდება“. აშშ-ის პრეზიდენტი აცხადებს, რომ ეს გადაწყვეტილება ირანული მხარის მოთხოვნით მიიღო.

ირანის ხელმძღვანელობამ უარი თქვა შემდგომ მოლაპარაკებებზე. ტრამპმა ასევე 26 აპრილს განაცხადა, რომ მისი დელეგაცია აღარ გაფრინდება პაკისტანში ირანთან ომის დასრულების მიზნით მოლაპარაკებებისთვის. ერთი დღით ადრე, აშშ-ის პრეზიდენტმა გააუქმა ამ თემაზე მისი წარმომადგენლების დაანონსებული ვიზიტი ისლამაბადში, სადაც ირანთან მოლაპარაკებების შემდეგი რაუნდი აპრილის ბოლოს იყო დაგეგმილი.

დღეს, 27 აპრილს, კვიპროსის დედაქალაქ ნიქოზიაში ქართველმა ემიგრანტებმა, „პლატფორმა 2025-მა“ პარლამენტს გადასცეს სასანქციო წინადადებების პაკეტი სახელწოდებით – „მზიას სია“. ამ სიაშია ირაკლი დგებუაძე – პოლიციელი, რომელმაც თქვა, რომ სილის გაწვნის შემდეგ ლოყა ეტკინა და მოსამართლე ნინო სახელაშვილი, რომელსაც მიაჩნია, რომ მოძალადე დგებუაძისთვის სილის გაწვნის გამო ჟურნალისტის 2 წლით ციხეში გამოკეტვა სამართლიანია.

„მზიას სიაში“ ქართველმა ემიგრანტებმა ასევე ჩაწერეს სინდისის პატიმრების საქმის გამყალბებელი გამომძიებლები, პროკურორები, მოსამართლეები, პროპაგანდისტები, „ოცნების“ რეჟიმის წარმომადგენლები, „ტიტუშკები“, ცრუმოწმეები…

მათ მოითხოვეს კვიპროსის მთავრობისგან, ასევე ევროკავშირისგან (კვიპროსი ამჟამად ევროკავშირის თავმჯდომარე ქვეყანაა) „ქართული ოცნების“ პოლიტიკოსების, პროპაგანდისტების, ე.წ. ცრუმოწმეების, ძალოვანი და სასამართლო სისტემის წარმომადგენლების, ტიტუშკების დასანქცირება.

,,მზიას სიაში” რეჟიმის 280 წარმომადგენელია და ის შემუშავებულია „მოძრაობა მზიას“ მიერ ქართულ დემოკრატიულ ძალებთან თანამშრომლობის ფარგლებში.

გარდა ამისა, ქართველი ემიგრანტები ითხოვენ, „ქართული ოცნების“ არაღიარების პოლიტიკის გაძლიერებას, მათი დანაშაულების გამოძიებას, ასევე თბილისის პროტესტის მონაწილეების მოწამვლის ფაქტზე საერთაშორისო გამოძიების ჩატარებას.

„პლატფორმა 2025“ და ემიგრანტების სხვა ჯგუფები იმავე მოთხოვნით ევროკავშირის ყველა ქვეყნის, აშშ-ის, გაერთიანებული სამეფოს, ისლანდიის, ნორვეგიის მთავრობებს მიმართავენ.

მზია ამაღლობელი უკანონო პატიმრობაში მყოფი ჟურნალისტია, გამოცემების – „ბათუმელებისა“ და „ნეტგაზეთის“ დამფუძნებელი. მას სილის გაწვნის გამო 2 წლით თავისუფლების აღკვეთა სწორედ ნინო სახელაშვილმა მიუსაჯა.

„მზიას სია“ ქართველი ემიგრანტების 34-მა ჯგუფმა და ორგანიზაციამ შეიმუშავეს ქართულ სამოქალაქო ორგანიზაციებთან და პროდასავლურ პოლიტიკურ პარტიებთან თანამშრომლობით. ახლა ისინი ამბობენ, რომ ქართულ დემოკრატიულ ძალებსა და პოლიტიკურ პარტიებსაც სთავაზობენ, ეს სია ერთად შეიმუშაონ და მასაც დაარქვან „მზიას სია“.

___

ვრცლად, რა არის მზიას სია

ვინ მოხვდება „მზიას სიაში“ – რის გაკეთებას გეგმავენ ემიგრანტები 

See more

„ბათუმის მერიაში გვითხრეს, რა გეგონათ, სულ მაქ იქნებოდითო? მაინც და მაინც ჩვენ, მცირე მოვაჭრეებს თუ გაგვივიდა ვადა, 20 წელია მთავრობაში არიან და მათ ვადა არ გაუვიდათ?“ – ამბობს ქალი, რომელიც სუვენირებით ვაჭრობდა ბათუმში და დღეს, 27 აპრილს უკვე მეორედ ჩავიდა ურეკში, სასტუმრო „პარაგრაფთან“, რომ ამ გზით მიეწვდინა ხმა ქვეყნის არაფორმალური მმართველისთვის, ბიძინა ივანიშვილისთვის.

ბათუმში სუვენირებით და ხილით მოვაჭრე ათობით ადამიანი უმუშევარი 2026 წლის თებერვლიდან დარჩა – ბათუმის მერიამ სავაჭრო ჯიხურები გოგებაშვილის ქუჩიდან, ასევე ბათუმის ბულვარის ტერიტორიიდან აიღო. მოვაჭრეებმა ამ დრომდე არ იციან, მოახერხებენ თუ არა მუშაობის გაგრძელებას და რა პირობებში. მათ აღარ მისცეს საშუალება, იმავე სანებართვო პირობებით ემუშავათ ჯიხურებში, სადაც წლებია მუშაობდნენ.

დღეს, 27 აპრილს, ურეკში, სასტუმრო „პარაგრაფის“ შესასვლელთან შეკრებილი მოქალაქეები აცხადებდნენ, რომ ქვეყნის არაფორმალურ მმართველთან, ბიძინა ივანიშვილთან მივიდნენ, რადგან „ის წყვეტს ყველაფერს“ და ეს რომ ასეა, სუვენირებით მოვაჭრეების საქმეშიც გამოჩნდა: მოვაჭრეები განმარტავენ, რომ წინა აქციის შემდეგ, როცა აქცია ისევ შეკვეთილში გაიმართა, აქციის მონაწილეებს იმავე დღეს შეხვდა ბათუმის მერი გიორგი ცინცაძე.

„მანამდე ჩაწერილი ვიყავით და არ გვხდებოდა… გიორგი ცინცაძემ თქვა, რომ იმ ეტაპზე არ იცოდა, რა როგორ მოხდებოდა. მივეცით ვადა 30 დღე. 30 დღის შემდეგ გვითხრეს, რომ ისევ ფიქრის რეჟიმში არიან,“ – ამბობენ მოვაჭრეები.

სუვენირებითა და ხილის წვენებით მოვაჭრეების წინა აქცია შეკვეთილში 2026 წლის 24 მარტს გაიმართა.

დღეს სუვენირებით მოვაჭრეებს შეკვეთილში არავინ შეხვედრია. ბათუმში ჩამოსვლის შემდეგ მათ აჭარის უმაღლეს საბჭოსთან და ბათუმის მერიასთან გამართეს აქცია და კიდევ ერთხელ შეხვდნენ ბათუმის მერს, გიორგი ცინცაძეს.

ამ თემაზე:

თვითდასაქმებულები აჭარის მთავრობის სახლთან აქციას მართავენ და თამაზაშვილთან შეხვედრას ითხოვენ

See more