მოძრაობა „ხმა“ საზოგადოებრივ მაუწყებელზე ეთერს ითხოვს.
განცხადებაში, რომელიც „ხმამ“ ფეისბუქით გაავრცელა, ნათქვამია, რომ 2026 წლის ზაფხულში, ორი თვის განმავლობაში, დედაქალაქსა და საქართველოს რეგიონებში თანამოაზრე მოხალისეებთან ერთად, 35 928 ხელმოწერა შეაგროვეს საქართველოს საჯარო სკოლებში უფასო კვების დანერგვის მოთხოვნით.
„ეს არის რაოდენობა ადამიანების, რომლებსაც ჩვენ ქუჩაში პირისპირ შევხვდით და მათ ფიზიკური ხელმოწერით გამოხატეს უფასო სასკოლო კვების მხარდაჭერა. თუმცა რეალურად ამ იდეის მხარდამჭერი ადამიანების რიცხვი გაცილებით მეტია:
კანონპროექტის ხელმომწერების ოჯახის წევრები, დედაქალაქსა და რეგიონებში მცხოვრები უამრავი ადამიანი, რომლებიც გვწერდნენ, რომ სურდათ ხელმოწერა, მაგრამ დროის და ადამიანური რესურსის შეზღუდულობის გამო, ყველა მხარდამჭერთან ფიზიკურად შეხვედრა ვერ მოვახერხეთ.
კერძო ტელევიზიების მხრიდან არაერთი შემოთავაზება გვქონია, მათ ეთერებში გვესაუბრა უფასო სასკოლო კვების მოთხოვნის საზოგადოებრივ კამპანიაზე, მის აუცილებლობაზე, ხელმოწერების შეგროვების პროცესსა და მის შედეგებზე, მაგრამ ჩვენთვის მნიშვნელოვანია, რომ უფასო სასკოლო კვების საკითხზე მსჯელობის მთავარი სივრცე საზოგადოებრივი მაუწყებელი იყოს.
საზოგადოებრივი მაუწყებელი ერთადერთი ეროვნული მაუწყებლობაა, რომლის ფუნქცია, არსებობის იდეა და დანიშნულებაც საჯარო ინტერესების მიხედვით მუშაობაა.
ამასთანავე, უფასო სასკოლო კვების პროგრამა პოლიტიკური შინაარსის და ამ მოთხოვნის გარშემო მასშტაბური სახალხო მობილიზაციის გამოც, არის საკითხი, რომელზეც მსჯელობა სამართლიანი იქნება პოლიტიკური ფორმატის სატელევიზიო გადაცემებში“- აცხადებს „ხმა“.
„ხმა“ ასევე ხაზს უსვამს, რომ უფასო სასკოლო კვების მოთხოვნით კანონპროექტი უკვე წარდგენილია პარლამენტში და მალე დაიწყება საპარლამენტო განხილვები.
„მოგმართავთ საქართველოს საზოგადოებრივ მაუწყებელს: იმისთვის, რომ უფასო სასკოლო კვების მოთხოვნის შესახებ ინფორმაცია მივაწვდინოთ კიდევ უფრო მეტ ადამიანს, პირველ რიგში ხელმომწერებს და ასევე უფასო სასკოლო კვების ასიათასობით პოტენციურ ადრესატს, დაუთმეთ პირდაპირი ეთერი უფასო სასკოლო კვების საკითხს.
საქართველოს კანონმდებლობის თანახმად, საზოგადოებრივი მაუწყებელი ვალდებულია უზრუნველყოს აუდიტორიის დროული და ყოველმხრივი ინფორმირება საქართველოში მიმდინარე მოვლენების შესახებ.
საზოგადოებრივი მაუწყებლის მაყურებელი უნდა იყოს ინფორმირებული, რომ მთელ საქართველოში ხალხი გამოხატავს მხარდაჭერას კანონპროექტის მიმართ, რომ მოსთხოვონ საქართველოს პარლამენტს საჯარო სკოლებში უფასო სასკოლო კვების ამოქმედება. ამ კანონპროექტის დამტკიცება იქნება დამოუკიდებელი საქართველოს ისტორიაში რესურსების სამართლიანი გადანაწილების ერთ-ერთი უიშვიათესი შემთხვევა და ქვეყანაში არსებული უთანასწორობით გამოწვეული ზიანის შესამცირებლად გადადგმული მასშტაბური ნაბიჯი.
ხოლო ის ფაქტი, რომ ეს იდეა სახალხო ინიციატივაა, ამ მოვლენის მნიშვნელობას კიდევ უფრო ზრდის.
მიიღეთ საქართველოს 35 ათასზე მეტი მოქალაქის ხელმოწერა უფასო სასკოლო კვების მოთხოვნაზე, როგორც სანდო, აქტუალური და მნიშვნელოვანი ამბავი და დაუთმეთ პირდაპირი ეთერი ინიციატივაზე საუბარს“- წერს „ხმა“.
_______________
მთავარი ფოტო: „ბათუმელების“ არქივიდან/სასკოლო კვება ესტონეთის სკოლებში.
