Batumelebi

საქართველოს მოქალაქის უკრაინელ მეუღლეს ბინადრობის ნებართვას არ აძლევენ

„2014 წლის აგვისტოში, ჩემს უკრაინელ მეუღლესთან ერთად გადავწყვიტეთ გვეცხოვრა საქართველოში, აქამდე ხან მე ვიყავი კიევში, ხან ის – ბათუმში. გადაწყვეტილების მიღების შემდეგ მივმართე იუსტიციის სახლს შეკითხვით: თუ რა საბუთები მჭირდება, რათა ჩემმა უკრაინელმა მეუღლემ და ბავშვმა საქართველოში შეძლონ ცხოვრება კანონიერად. იქ მითხრეს, რომ დ4 კატეგორიის ვიზაა საჭირო დედა-შვილისთვის, რაც ოჯახის გაერთიანებას ნიშნავს… ამ მიზნით მეუღლემ მიმართა საქართველოს საელჩოს უკრაინაში, სადაც ბევრი გაურკვეველი მისვლა – მოსვლის შემდეგ მისცეს ვიზა. ამ ყველაფრის მერე, მეუღლე და შვილი ტოვებენ უკრაინას სამუდამოდ და გადმოდიან საქართველოში საცხოვრებლად . იუსტიციის სახლში საბუთების ჩაბარების შემდეგ, 1 თვეში ბინადრობაზე გვეუბნებიან უარს! თავიდან რომ შევიტანოთ საბუთები მინიმუმ 1 თვე უნდა გავიდეს, 1 თვეში კი ვიზას დრო გაუდის უკვე, ანუ გამოდის, რომ უკვე არალეგალები არიან. ეხლა რომ გაფრინდეს ისევ უკრაინაში თვიფრინავში აღარ აუშვებენ, რადგან მე-8 თვეშია ორსულობის“ – წერს ირაკლი ძნელაძე ფეისბუქზე.

„ბათუმელებთან“ ირაკლი ძნელაძე ამბობს, რომ ოჯახის გაერთიანების მიზნით ბინადრობის ნებართვის მოსაპოვებლად ყველა მოთხოვნილი და ნოტარიულად დამოწმებული საბუთი მიიტანა იუსტიციის სახლში და საჭირო თანხა -180 ლარი გადაიხადა, თუმცა იულიას ბინადრობაზე უარი ისე უთხრეს, რომ მიზეზი არც აუხსნიათ.

„მიზეზი არ აუხსნიათ. ზოგი მეუბნება, რომ ყველას, ავტომატურად უარს ეუბნებიანო, ათასი ვერსია მოვისმინე. ვაპირებ გასაჩივრებას. ფეისბუქზე სტატუსს ბევრი გამოხმაურება მოჰყვა, დაველოდები ორ დღეს და შემდეგ უკვე ვიჩივლებ, სხვა გზა აღარ მაქვს“ – ამბობს ირაკლი.

რა მიზეზით უთხრა უარი სახელწიფომ საქართველოს მოქალაქის მეუღლეს ბინადრობაზე, ამ, და თემასთან დაკავშირებულ სხვა კითხვებზე პასუხს „ბათუმელები“ სერვისების განვითარების სააგენტოსგან ელოდება.

ოფიციალური სტატისტიკის თანახმად ქორწინების საშუალო ასაკი 28-31 წელია

სახელმწიფო სერვისების განვითარების სააგენტოს ინფორმაციით გასულ წელს ყველაზე მეტი, 3 307 წყვილი სექტემბერში დაქორწინდა. ქორწინების რეგისტრაციის კუთხით ლიდერობს თბილისი – 12 261 ქორწინება, მეორე ადგილზეა ბათუმი – 3 023 ქორწინება და მესამეზე ქუთაისი – 2 606 ქორწინების რეგისტრაცია.

სიღნაღში კი, სადაც ქორწინების რეგისტრაცია 24 საათის მანძილზე ხდება, 2014 წელს 588 წყვილი დაქორწინდა, მათგან 57-მა წყვილმა ღამის 12 საათიდან დილის 6 საათამდე იქორწინა.

2014 წელს რეგისტრირებულ ქორწინებათა 78 პროცენტში კაცი უფროსი იყო ქალზე, დაქორწინებულ წყვილთა 22 პროცენტში კი ქალი უფროსი იყო კაცზე.

ოფიციალურ ქორწინებათა 2014 წლის მონაცემები ჩამორჩება 2013 წლის სტატისტიკას: 2013 წელს საქართველოში 34 324-მა წყვილმა იქორწინა.

ტელეკომპანია“ მაესტროს“ საგანგებო განცხადება

„მაესტრო“ მიიჩნევს, რომ მომხდარი არის ჟურნალისტურ საქმიანობაში უხეში ჩარევა, რომლის მსხვერპლიც შესაძლოა გახდეს თითოეული და ნებისმიერი ჟურნალისტი, რომელიც საკუთარ პროფესიულ მოვალეობას ასრულებს. ამიტომ, ტელეკომპანია „მაესტრო“ არ დაუთმობს ეთერს აქციის ორგანიზატორ პოლიტიკურ ძალებს და უარს ამბობს გააშუქოს მათი აქტივობა, ვიდრე:

1. აქციის ორგანიზატორი პოლიტიკური ძალების ლიდერები საჯაროდ არ აიღებენ პასუხისმგებლობას მომხდარ ინციდენტზე.
2. აქციის ოგანიზატორი პოლიტიკური ძალების ლიდერები საჯაროდ არ მოიხდიან ბოდიშს მომხდარის გამო.
3. ვიდრე, ფოტორეპორტიორ ირაკლი გედენიძეს არ აუნაზღაურებენ მატერიალურ ზარალს.
4. ვიდრე, ინციდენტში მონაწილე პირები არ დაისჯებიან კანონის შესაბამისად.
“მაესტრო” აფიქსირებს რომ იგივე პოზიციას დაიკავებს ნებისმიერი პოლიტიკური პარტიის თუ ძალის მიმართ, თუ ადგილი ექნება ანალოგიურ ინციდენტებს.

ვარდების მოედანზე აქცია „შემოულაწუნეს“ მსვლელობისას, ფოტორეპორტიორმა მიიღო ფიზიკური დაზიანებები და დაზიანდა მისი კუთვნილი ტექნიკა.

მიწის დამუშავება გრაფიკით

მიწების დროულად დამუშავებისთვის ხვნის ბარათების დარიგება აჭარის მაღალმთიანეთში გასულ კვირას დაიწყო, მიწის მოსახვნელად ქედაში 3 747 ფერმერი, ხულოში – 4 835 და შუახევში 3 108 ფერმერი მიიღებს ბარათს. როგორც ქედის გამგებლის თანაშემწე სოფლის მეურნეობის დარგში მერაბ ტაკიძე ამბობს, ბარათების დარიგება ქედაში გასულ კვირას დაიწყო და კვირის ბოლომდე დასრულდება.
„მოსახლეობასთან ხვნის ბარათები გამგებლის წარმომადგენლებს მიაქვთ, ერთი კვირის განმავლობაში ყველა ოჯახი მიიღებს ბარათს, იმ შემთხვევაში, თუ ოჯახს არ სჭირდება ხვნის ბარათი, მას შეუძლია დააბრუნოს და შესაბამისი ქულა აგრობარათზე დაერიცხება“, – ამბობს მერაბ ტაკიძე.

ხვნის ბარათების დარიგება მიმდინარეობს ხულოსა და შუახევის მუნიციპალიტეტებშიც.

ქედის მუნიციპალიტეტის ცხრა თემიდან რვა თემში ხვნის ბარათით, სახნავ-სათეს მიწებს გასული წლის მსგავსად წელსაც სოფლის მეურნეობის სამინისტროს შპს „მექანიზატორი“ დაამუშავებს. გარდა „მექანიზატორისა“, ქედაში ხვნის ბარათით მიწის დამუშავების უფლება ამხანაგობა „ქედას“ აქვს. თუმცა, ამხანაგობას ბარათით მიწის მოხვნის ლიცენზია მხოლოდ ერთ – „ზვარეს“ თემში ვრცელდება, შესაბამისად, მხოლოდ ამ თემის მოსახლეობას მოუხნავენ მიწებს ბარათით ამხანაგობის კუთვნილი სამი ტრაქტორით. მაგრამ იმ შემთხვევაში, თუ ფერმერი ბარათის გარეშე დაამუშავებინებს საკუთრებაში არსებულ მიწას, ერთი ჰექტარი მიწის დამუშავებაში ის 140 ლარს გადაიხდის.

მიწის დამუშავებასთან დაკავშირებით გასულ წელს ქედის მოსახლეობა `მექანიზატორის~ მიმართ უკმაყოფილებას გამოთქვამდა, რადგან შპს-მ მიწების დროულად დამუშავება ვერ შეძლო – ხუთი ტრაქტორიდან სამი ხშირად მწყობრიდან გამოდიოდა, მიწას კი მხოლოდ ორი ტრაქტორი ამუშავებდა. შპს „მექანიზატორის“ ქედის მუნიციპალიტეტის ბრიგადის მენეჯერის, ზურაბ სურმანიძის თქმით, მიწის მოხვნაზე ქედაში წელს პრობლემები არ იქნება, შპს-ს ამ დროისთვის ქედაში ოთხი ტექნიკა აქვს და ოთხივე გამართულ მდგომარეობაშია. ზურაბ სურმანიძე მიიჩნევს, რომ რვა თემის მოსახლეობის სავარგული მიწების დამუშავებისთვის ოთხი მექანიზატორი საკმარისია.

„პირველი აპრილიდან დავიწყებთ მიწების დამუშავებას, ხელშეკრულებით დღეიდანაც შეგვიძლია დავიწყოთ მუშაობა, ამის მოთხოვნა თუ იქნება. კარგი ამინდია და არც მოსახლეობა დარჩება დაზარალებული. ვერ გეტყვით გასულ წელს რა და როგორ იყო, მე წელს დავინიშნე. ამ დროისთვის ქედაში ოთხი გამართული მექანიზატორი გვაქვს, გარდა ამისა, ამხანაგობას მისი ტრაქტორები აქვს და ვფიქრობ, სრულიად საკმარისია ქედაში მიწების დროულად დამუშავებისთვის.

არსებული ტექნიკის გარდა, დამატებით მუხლუხიანი ტექნიკა გვინდოდა, შეგვპირდნენ იქნებაო. მოსახლეობას მიწას დავუმუშავებთ როგორც მიწის ხვნის ბარათით, ასევე თანხით, 1 ჰექტარი მიწის მოხვნის ღირებულება 140 ლარია.

გრაფიკი გვაქვს შემუშავებული, პირველ ეტაპზე დანდალოს მიწების დამუშავებას დავიწყებთ, რადგან იქ კარტოფილს თესავენ და ადრე უნდა დაირგოს, შემდეგ სხვა თემებში გადავალთ, მაქსიმუმ ორი თვე დაგვჭირდება“, – ამბობს ზურაბ სურმანიძე.

ხულოს მუნიციპალიტეტშიც მიწას ხვნის ბარათით შპს „მექანიზატორი“ დაამუშავებს. აქ მიწის ხვნისა და აგრობარათს ოჯახები ბეშუმში არსებულ იმ მიწებზეც მიიღებენ, რომლებსაც ისინი ამუშავებენ. „გასული წლის სიები, რომლითაც გაიცა ბარათები, გადასამოწმებლად გადმოგვიგზავნეს, წელს არც ერთი ოჯახი არ დარჩება ბარათის გარეშე. რაც შეეხება გასულ წელს, თითქმის ყველამ მიიღო ხვნისა და აგრობარათი, პრეტენზია, რომ ვინმე გამორჩა და ვერ მიიღო ბარათი, აღმოფხვრილია.

ხულოში 33 000 ჰექტრამდე მიწა იხვნება, უმეტეს ნაწილს გამწევი ძალითა და მცირე მექანიზატორით, მიუდგომელ ადგილებს კი მოტობლოკით ამუშავებენ. დაბალ ზონაში, როგორიცაა დაბა და სხალთის თემი, შეიძლება ტრაქტორით დამუშავდეს. იქედან გამომდინარე, რომ ზოგიერთი მოტობლოკით ამუშავებს, ზოგიერთი ტრაქტორით და ზოგიც გამწევი ძალით, მიწის დამუშავება პრობლემა არასდროს ყოფილა.

გასული წლის მონაცემებიდან გამომდინარე ვფიქრობ, მოსახლეობის დაახლოებით 11% გამოიყენებს ხვნის ბარათს, დანარჩენი კი, დააბრუნებს. ჩვენთან მიწის დამუშავება მარტის ბოლოდან იწყება“, – ამბობს ნოდარ მიქელაძე.

შპს „მექანიზატორი“ მოხნავს მიწას შუახევშიც. ამ მუნიციპალიტეტში არსებული ამხანაგობა „სოფლის აღორძინება“ წელს მიწის დამუშავებს ვერ შეძლებს, რადგან, როგორც ამხანაგობის თავმჯდომარე ზაზა დავითაძე ამბობს, ამხანაგობის საკუთრებაში არსებული „ბელარუსის“ ტიპის სამი ტრაქტორი შესაკეთებელია, საჭირო თანხა კი ამხანაგობას არ გააჩნია. ამხანაგობამ მის ბალანსზე არსებული ტექნიკის გამართვისთვის საჭირო თანხა მუნიციპალიტეტის გამგეობას გასულ წელს სთხოვა და დახმარების დაპირებაც მიიღო.

„ტექნიკა გაუმართავია, თუ მუნიციპალიტეტი დამეხმარება ტექნიკის გამართვაში, მიწებს ჩვენი ტრაქტორებით დავამუშავებთ. 2013 წელს 15 ჰექტარი დავამუშავეთ, გასულ წელს კი არ გვიმუშავია, რადგან ტრაქტორები შესაკეთებელია, რემონტისთვის საჭირო თანხა – 8 000 ლარი ამხანაგობას არ გააჩნია. გასულ წელს გამგეობას მივმართე დახმარებისთვის, მითხრეს ბიუჯეტის კორექტირებისას დაგეხმარებითო, მერე კიდევ მივმართე და ველოდები დახმარებას“, – ამბობს ზაზა დავითაძე.

შუახევის მუნიციპალიტეტის გამგებლის მოადგილე სოფლის მეურნეობის დარგში, რომან ფუტკარაძე ტექნიკის გაუმართაობის შესახებ ინფორმაციას არ ფლობს და აღნიშნავს, რომ ხვნის ბარათით შუახევში მიწებს ამხანაგობა „სოფლის აღორძინება“ დაამუშავებს. „შუახევის მუნიციპალიტეტში გასულ წელს 22-მა ოჯახმა ვერ მიიღო ხვნის ბარათი, წელს ყველა მათგანი ჩავსვით სიაში და ყველა მიიღებს ბარათს, ჩვენთან ამხანაგობა „სოფლის აღორძინება“ ამუშავებს მიწებს და წელსაც ამხანაგობა დაამუშავებს.

რადგან არსებული მიწების 84%-ს დიდი მექანიზატორი ვერ ამუშავებს და აქ მიწების დასამუშავებლად ისევ გამწევი ძალა გამოიყენება, მოსახლეობა ბარათს უკან აბრუნებს. გასულ წელს ხვნის ბარათი დაახლოებით 2600-მა ოჯახმა დააბრუნა. მოსახლეობა უფრო აგრობარათს იყენებს, შესაბამისად, ურჩევნია ქულები ბარათზე დაერიცხოს“, – ამბობს რომან ფუტკარაძე.

პროფესიით აგრონომი და ქედის აგროსერვისცენტრის უფროსი სოსო შერვაშიძე ფერმერებს მიწის დამუშავებისას აგროწესების დაცვას ურჩევს. აგრონომის თქმით, იმისთვის, რომ კარგი მოსავალი მივიღოთ, მიწა სწორად და აგროწესების დაცვით უნდა დამუშავდეს.

„პირველი, რაც უნდა გაკეთდეს – მიწის ანალიზია, ანალიზის შემდეგ გახდება ცნობილი, რა სჭირდება ნიადაგს, ესაჭიროება თუ არა სასუქი. მეორე წესი, რაც აუცილებლად უნდა დავიცვათ, მიწის აგროვადებში დამუშავებაა, 15 აპრილიდან 15 მაისამდე უნდა დამუშავდეს მიწა. ჩვენთან, ძირითადად, მჟავე ნიადაგია, ნიადაგის გასანეიტრალებლად საჭირო ოდენობის დეფეკატი მიწის მოხვნამდე ორი კვირით ადრე მაინც უნდა შევიდეს. იმ შემთხვევაში, თუ ნიადაგი მჟავიანია, მის განეიტრალებას ერთ ჰექტარზე 10 ტონა დეფეკატი სჭირდება“, – ამბობს სოსო შერვაშიძე.

აგროსერვისცენტრის ქედის სამსახურის კონსულტანტი ნიადაგის საკითხებში, შოთა ბერიძე ამბობს, რომ მუნიციპალიტეტების აგროსერვისცენტრები ნიადაგის კვლევის საველე ლაბორატორიებით არის აღჭურვილი, ასეთ ლაბორატორიებში კი ნიადაგის ერთი ანალიზის კვლევის ღირებულება 30 ლარია.

შოთა ბერიძე: „მხოლოდ ნიადაგის კვლევის შემდეგ არის შესაძლებელი რეკომენდაციის გაცემა. რაც შეეხება კვლევას, ერთ კონკრეტულ სავარგულზე იმდენი ანალიზის აღებაა საჭირო, რამდენკონტურიანიცაა მიწა, ან შესაძლებელია ლოკალურად ფერმერს შეტანილი ჰქონდეს სასუქი და ამის მიხედვითაც უნდა მოხდეს ნიადაგის კვლევა. ნიადაგის ანალიზის აღებიდან მეორე დღეს მივცემთ ფერმერს რეკომენდაციას, თუ რა სახის სასუქი უნდა შეიტანოს ნიადაგში, კარგი მოსავალი რომ მიიღოს“.

უფასო სამედიცინო გამოკვლევები ბათუმში 14 წლამდე ბავშვებისათვის

კონსულტაციას გაუწევენ იმ მოზარდებს, რომლებსაც აწუხებთ შემდეგი დაავადებები: მწვავე ოსტეომელიტი, ძვლის კისტა, ძვლის კეთილთვისებიანი სიმსივნეები, თავის ტვინის კისტა (საღი გონებით), კიდურების ანომალია, ჰემანგიომა, ჰირშპრუნგის დაავადება, ორგანოების ატრეზიები- ოპერაციული ჩარევის შემდგომი გართულებები (სტომები), ჰიპოსპადია, ეპისპადია, დამწვრობები და მასთან დაკავშირებული გართულებები, სახის ღია ნაპრალი.

აქცია საქველმოქმედო ორგანიზაცია „ჯანმრთელი ბავშვების“ და ბავშვთა საერთაშორისო საქველმოქმედო ორგანიზაცია „FRIEDENSDORF INTERNATIONAL“-ის (გერმანია) ინიციატივით იმართება, რომლის მიზანია სხვადასხვა დაავადების მქონე ბავშვების მოძიება, აღრიცხვა და გერმანიაში უფასო მკურნალობისათვის გაგზავნა. მშობელმა თან უნდა იქონიოს პაციენტის დაბადების მოწმობის ასლი, ფორმა N100, არსებობის შემთხვევაში რენტგენოლოგიური და ტომოგრაფიული კვლევა, ფოტოსურათი და ცნობა ფაქტობრივი მისამართის შესახებ.

რა ხარისხის მასალით შენდება ბათუმი?

ბატონო ირაკლი, კონკრეტულად რომელ სამშენებლო მასალებს ამოწმებთ ლაბორატორიაში და რამდენად ხშირად მოგმართავენ ხარისხის დასადგენად?

ლაბორატორიაში შესაძლებელია შემოწმდეს სილა, ხრეში, ღორღი, ცემენტი და ბეტონი. გვაქვს ასევე ტექნიკური განყოფილება, სადაც შესაძლებელია ელექტროშემდუღებელი მასალების შემოწმება თანამედროვე ტექნოლოგიებით. შემოწმების დროს დგინდება, შედუღებულ მასალებს გააჩნია თუ არა ბზარი, დაცულია თუ არა შედუღების სტანდარტი და ა.შ. ჩვენ გაგვაჩნია IჩO-ს საერთაშორისო სერტიფიკატი და იმის მიხედვით ვამოწმებთ სტანდარტებს.

თუ მოგმართავენ სამშენებლო კომპანიები მასალების შესამოწმებლად და დაახლოებით როგორ გამოიყურება ეს მომართვიანობა ციფრებში?

სამშენებლო მასალების ხარისხზე შემოწმება სავალდებულო არ არის, ძირითადად ნებაყოფლობით მოგვმართავენ სამშენებლო კომპანიები და კერძო პირებიც.

რამდენია კერძო პირი და რამდენი იურიდიული?

ზუსტად არ ვიცი, მაგრამ საკმაოდ არიან. გვაქვს შემოსავალიც.

ტარიფი როგორაა განსაზღვრული, ყველა მასალის შემოწმებას ერთი ფასი აქვს, თუ განსხვავებულია?

ჩვენთან, ძირითადად, ბეტონის შემოწმებაზე მოდიან და 11 ლარი ღირს მისი შემოწმება. როცა სამშენებლო კომპანია ფილას აგებს თუ ფუნდამენტს ასხამს, ამ შემთხვევაში მოგვმართავენ. სინჯი იღება, ჩერდება წყალში, შვიდი დღის შემდეგ ხდება წყლიდან ამოღება და მოწმდება მისი მარკიანობა, შემდეგ 28-ე დღეს კიდევ მოწმდება მარკიანობა. ანუ თავისი პროცედურები აქვს ამ შემოწმებას.

ქალაქში ბევრი ახალი სახლი შენდება და მოსახლეობას, ფაქტობრივად, არ აქვს ინფორმაცია იმ მასალების ხარისხთან დაკავშირებით, რა მასალითაც ეს კორპუსები შენდება. ლაბორატორიული შედეგების მიხედვით, რა სურათი გვაქვს, რამდენად ხარისხიან მასალებს იყენებენ მშენებლები?

ძირითადად ბეტონზე მოგვმართავენ და ყველა შემოწმებაზე დგება ოქმი. ამ ოქმის ჩანაწერები არ მახსოვს ზეპირად, მაგრამ საერთაშორისო სტანდარტის მიხედვით, მაგალითად, ბეტონის ხარისხი 200-იდან 300 მარკამდე მერყეობს.

კონკრეტულად რომელ სამშენებლო მასალებს ამოწმებთ ლაბორატორიაში და რამდენად ხშირად მოგმართავენ ხარისხის დასადგენად?

ლაბორატორიაში შესაძლებელია შემოწმდეს სილა, ხრეში, ღორღი, ცემენტი და ბეტონი. გვაქვს ასევე ტექნიკური განყოფილება, სადაც შესაძლებელია ელექტროშემდუღებელი მასალების შემოწმება თანამედროვე ტექნოლოგიებით. შემოწმების დროს დგინდება, შედუღებულ მასალებს გააჩნია თუ არა ბზარი, დაცულია თუ არა შედუღების სტანდარტი და ა.შ. ჩვენ გაგვაჩნია ICO-ს საერთაშორისო სერტიფიკატი და იმის მიხედვით ვამოწმებთ სტანდარტებს.

ის მასალები, რომლებიც შემოწმდა, აკმაყოფილებს ICO-ს მოთხოვნებს?

ვინც ბეტონს აწვდის, ის ყოველთვის ცდილობს, რომ მისი მასალის მარკიანობა იყოს უმაღლესი. უმეტეს შემთხვევაში კარგი ბეტონი მზადდება.

ბეტონის გარდა სხვა რა მასალები მოწმდება და ამ შემთხვევაში როგორია ხარისხი?

გვაქვს მესამე განყოფილება, სადაც მიწის, სახლის აზომვითი მასალები მოწმდება. შარშან ფოთში გაკეთდა წყლის გაყვანილობა და ის მილები გავტესტეთ.

ბათუმში იყო არა ერთი შემთხვევა, როცა მშენებლობაზე სახლის კედელი და აივანი ჩამოინგრა. ამ შემთხვევებთან დაკავშირებით თუ მოუმართავს მშენებელს ან ბინის მომავალ მეპატრონეს, რომ სამშენებლო მასალის ხარისხი დაედგინათ?

როცა სახლის რაღაც ნაწილი ინგრევა, ამ შემთხვევაში ზედამხედველობამ უნდა მიიღოს ზომები. თუმცა, მე არ მახსენდება, რომ შენობის ნგრევის შემდეგ მოემართა ვინმეს ლაბორატორიისთვის. მშენებლებს დოკუმენტაციით მოეთხოვებათ ხარისხიანი მასალების გამოყენება და მათი დოკუმენტაცია ალბათ აკმაყოფილებს მოთხოვნებს. ვისაც აინტერესებს, ისინი მოდიან. ახალ ბულვარში მიმდინარეობს დიდი პროექტის მშენებლობა და იმათ ვუმოწმებთ ბეტონს. ძირითადად ადგილზე დამზადებული მასალებით მიმდინარეობს მშენებლობა.

მერია ან სხვა რომელიმე უწყება თუ მოგმართავთ მასალების ხარისხის დასადგენად, როცა საბიუჯეტო თანხით ხორციელდება რაიმე მშენებლობა. ვთქვათ, ქუჩების მოპირკეთების დროს თუ შეამოწმეს ფილების ხარისხი ან სხვა მასალები?

ხელვაჩაურიდან მოგვმართეს ერთხელ ხარისხის დადგენაზე, გზების დაგების დროს, სხვა შემთხვევა არ მახსენდება. როცა მერია ტენდერს აცხადებს, მოთხოვნებში აქვს ჩადებული რა ხარისხის მასალები უნდა გამოიყენოს სამუშაოს შემსრულებელმა. ფილების დაგების დროს იყო შემსრულებელი მოსული ხარისხის დადგენაზე, თუმცა რა შედეგი დაიდო, ზეპირად არ მახსოვს.

მოქალაქეები საუბრობენ იმაზეც, რომ სამშენებლო მასალები ძირითადად ეკოლოგიურად არ არის უსაფრთხო და არის რადიაციულად დაბინძურებული. ამ მიმართულებით თუ გამოკვლეულა სამშენებლო მასალები ლაბორატორიაში და როგორია შედეგი?

სამშენებლო მასალებში, ბუნებრივია, მარტო ბეტონი არ შედის, არის არმატურაც და სხვა მასალებიც. არმატურა არ შეგვიმოწმებია, არც საღებავს ვამოწმებთ, ყველაზე მეტად ბეტონის ხარისხის შესამოწმებლად მოგვმართავენ, იყო მომართვა ბლოკებზეც, იშვიათად მოგვმართავენ ცემენტზე. ამიტომ, მთლიანობაში, ეკოლოგიურად რამდენად სუფთა მასალითაა აგებული სახლი, ამაზე ინფორმაცია არ გვაქვს.

ამ ორ წელიწადში რა შემოსავალი მიიღო ლაბორატორიამ?

დაახლოებით 50 ათასი ლარი.

რამაზ ხალვაში: რატომ უნდა ამირჩიონ უნივერსიტეტის რექტორად

სწავლა უცხოეთში, საჯარო ლექციები და კონფერენციები – აჭარის განათლების სამინისტროს კონკურსი

სამინისტრო აფინანსებს:

– სწავლას საზღვარგარეთ;
– სამეცნიერო ღონისძიებებში მონაწილეობას;
– კვალიფიკაციის ამაღლებას;
– კონფერენციის მოწყობას;
– საზაფხულო სკოლის ორგანიზებას;
– საჯარო ლექციებს.

სწავლა საზღვარგარეთ – ქვეპროგრამის ფარგლებში დაფინანსდება საზღვარგარეთ აკრედიტებულ უმაღლეს საგანმანათლებლო დაწესებულებებში სწავლა. ქვეპროგრამაში მონაწილეობის უფლება აქვს აჭარის ავტონომიური რესპუბლიკის ადმინისტრაციულ ტერიტორიაზე მცხოვრებ საქართველოს მოქალაქეს, რომელიც ჩაირიცხება საბაკალავრო, სამაგისტრო და სადოქტორო პროგრამებზე ევროკავშირის წევრი ქვეყნების, ამერიკის შეერთებული შტატების ან კანადის უმაღლეს საგანმანათლებლო დაწესებულებებში.

ქვეპროგრამის მონაწილე სწავლებასთან დაკავშირებული ხარჯების დაფინანსების მიზნით სამინისტროდან მიიღებს ფინანსურ დახმარებას არაუმეტეს 12500 ლარის ოდენობით. აღნიშნული დახმარება გაიცემა 2015-2016 სასწავლო წლის შემოდგომის სემესტრის ხარჯების დაფარვის მიზნით.

ქვეპროგრამის ბენეფიციარებს გამოავლენს კომისია ღია კონკურსის საფუძველზე.

სამინისტროში საბუთების მიღება იწარმოებს 2015 წლის 2 მარტიდან 2015 წლის პირველ ივლისამდე.

სამეცნიერო ღონისძიებებში მონაწილეობა – ქვეპროგრამაში მონაწილეობის უფლება აქვს აჭარის ავტონომიური რესპუბლიკის ტერიტორიაზე მოქმედ აკრედიტებულ უმაღლეს საგანმანათლებლო და სამეცნიერო-კვლევით დაწესებულებებში მომუშავე – აკადემიური ხარისხის (მაგისტრი, დოქტორი) ან სამეცნიერო წოდების (მეცნიერებათა კანდიდატი, მეცნიერებათა დოქტორი) მქონე მოქალაქეებს. აგრეთვე იმ მაგისტრანტებსა და დოქტორანტებს, რომლებიც განაცხადის წარდგენის პერიოდში სწავლობენ აჭარის ავტონომიური რესპუბლიკის ტერიტორიაზე მოქმედ აკრედიტებულ უმაღლეს საგანმანათლებლო დაწესებულებებში. ქვეპროგრამის მონაწილე სამეცნიერო ღონისძიებაში მონაწილეობასთან დაკავშირებული ხარჯების დაფინანსების მიზნით მიიღებს ფინანსურ დახმარებას არაუმეტეს 2500 ლარის ოდენობით. ქვეპროგრამის ბენეფიციარებს გამოავლენს კომისია.

საბუთების მიღება იწარმოებს 2015 წლის 2 მარტიდან 2015 წლის პირველ მაისამდე 2015 წლის ივნის – ნოემბრის თვეში გამართულ სამეცნიერო ღონისძიებებში მონაწილეობის მისაღებად.

კვალიფიკაციის ამაღლება – დაფინანსდება მეცნიერთა სტაჟირება ევროკავშირის წევრი ქვეყნების, ამერიკის შეერთებული შტატების ან კანადის წამყვან უნივერსიტეტებში, სამეცნიერო-კვლევით და ხელოვნების ცენტრებში. ქვეპროგრამაში მონაწილეობის უფლება აქვს აჭარის ავტონომიური რესპუბლიკის ადმინისტრაციულ ტერიტორიაზე რეგისტრირებულ 45 წლამდე ასაკის საქართველოს მოქალაქეს, რომელიც არის დამამთავრებელი კურსის დოქტორანტი, ან აქვს დოქტორის აკადემიური (მასთან გათანაბრებული) ხარისხი. ქვეპროგრამის მონაწილე დაფინანსების მიზნით მიიღებს ფინანსურ დახმარებას 5000 ლარის ოდენობით. ბენეფიციარებს გამოავლენს კომისია ღია კონკურსის საფუძველზე.

საბუთების მიღება იწარმოებს ორ ეტაპად: 2015 წლის 2 მარტიდან 2015 წლის პირველ მაისამდე და 2015 წლის პირველი ივლისიდან 2015 წლის პირველ აგვისტომდე.

საზაფხულო სკოლა – ქვეპროგრამის ფარგლებში აჭარის ავტონომიური რესპუბლიკის განათლების, კულტურისა და სპორტის სამინისტრო დააფინანსებს საზაფხულო სკოლის მოწყობას. კონკურსში მონაწილეობის მიღება შეუძლია აჭარის ტერიტორიაზე რეგისტრირებულ საჯარო სამართლის იურიდიულ პირს; კერძო სამართლის არასამეწარმეო იურიდიულ პირს; აჭარაში რეგისტრირებულ საქართველოს მოქალაქეს.

სამინისტროდან მოთხოვნილი თანხა ერთი საზაფხულო სკოლის დაფინანსებისათვის არ უნდა აღემატებოდეს 10 000 ლარს. ქვეპროგრამის ბენეფიციარებს გამოავლენს კომისია.

საბუთების მიღება იწარმოებს 2015 წლის 2 მარტიდან 2015 წლის 1 ივნისამდე ივლის-ნოემბრის თვეში გამართული საზაფხულო სკოლის დაფინანსების მოსაპოვებლად.

კონფერენციის მოწყობა – კონკურსის ფარგლებში დაფინანსების მიღება შეუძლიათ აჭარის ავტონომიური რესპუბლიკის ტერიტორიაზე რეგისტრირებულ საჯარო სამართლის იურიდიულ პირებს და კერძო სამართლის არასამეწარმეო (არაკომერციული) იურიდიულ პირებს. აგრეთვე აჭარის ავტონომიურ რესპუბლიკაში რეგისტრირებულ საქართველოს მოქალაქეს. სამინისტროდან მოთხოვნილი თანხა ერთი კონფერენციისათვის არ უნდა აღემატებოდეს 20 000 ლარს. ქვეპროგრამის ბენეფიციარებს გამოავლენს კომისია ღია კონკურსის საფუძველზე.

საბუთების მიღება იწარმოებს 2015 წლის 2 მარტიდან 2015 წლის პირველ ივლისამდე 2015 წლის პირველი სექტემბრიდან 2016 წლის 20 მაისამდე გასამართი კონფერენციის მოწყობისათვის დაფინანსების მოსაპოვებლად.

საჯარო ლექციები – სამინისტრო დააფინანსებს საჯარო ლექციების ორგანიზებას. ლექციები გაიმართება სხვადასხვა აუდიტორიისათვის: სტუდენტები, ლექტორები, მასწავლებლები და საზოგადოების სხვადასხვა წარმომადგენლები. საჯარო ლექციის თემატიკა შეიძლება მოიცავდეს როგორც ზოგადი, ასევე პროფესიული და უმაღლესი განათლების ასპექტებს.

კონკურსში მონაწილეობის მიღება შეუძლიათ აჭარის ავტონომიური რესპუბლიკის ტერიტორიაზე რეგისტრირებულ (იურიდიული მისამართი) საჯარო სამართლის იურიდიულ პირებს; კერძო სამართლის არასამეწარმეო (არაკომერციული) იურიდიულ პირებს და აჭარის ავტონომიურ რესპუბლიკაში რეგისტრირებულ საქართველოს მოქალაქეებს.

სამინისტროდან მოთხოვნილი თანხა ერთი საჯარო ლექციისათვის არ უნდა აღემატებოდეს 2500 ლარს.
კონკურსში მონაწილოების მისაღებად სამინისტროში საბუთების მიღება იწარმოებს ორ ეტაპად: 2015 წლის 10 თებერვლიდან 25 მარტის ჩათვლით, იმ ღონისძიებების დასაფინანსებლად, რომლებიც ჩატარდება 2015 წლის პირველი აპრილიდან 2015 წლის 20 ივნისამდე და 2015 წლის პირველი ივლისიდან პირველ აგვისტომდე, იმ ღონისძიებების დასაფინანსებლად, რომლებიც ჩატარდება 2015 წლის 20 აგვისტოდან 10 დეკემბრამდე.

სამინისტროს ინფორმაციით, 2014 წელს „უმაღლესი განათლების ხელშეწყობის“ ქვეპროგრამის ფარგლებში საზღვარგარეთ სწავლის კომპონენტში დაფინანსდა 4 სტუდენტი; სამეცნიერო ღონისძიებების კომპონენტში – 4 აპლიკანტი; კონფერენციის მოწყობის კომპონენტში – 3 კონფერენცია და საჯარო ლექციების კომპონენტში – 10 ლექცია.

დამატებითი ინფორმაცია და კონკურსში მონაწილეობის პირობები იხილეთ აჭარის განათლების სამინისტროს ვებგვერდზე.

როგორ გეგმავს მერია უკანონო გარევაჭრობის აღკვეთას

ბატონო თენგიზ, ბათუმის მერია ინტერნეტის საშუალებით იკვლევს საზოგადოებრივ აზრს უკანონო გარევაჭრობასთან დაკავშირებით. ნიშნავს თუ არა ეს, რომ მერია აპირებს გაამკაცროს უკანონო გარევაჭრობასთან დაკავშირებული ზომები?

კანონქვემდებარე ნორმატიული აქტებითა და კანონებით ქალაქში გარევაჭრობა უნდა იყოს აღკვეთილი. ეს მაღაზიებისთვისაა დასაშვები მხოლოდ იმ შემთხვევაში, თუ მერიის შესაბამისი განყოფილება გასცემს ნებართვას. რაც შეეხება გარემოვაჭრეებს, რომლებიც თვითნებურად დებენ დახლებს ქუჩებში და ტროტუარებზე, მათზე ნებართვა არ გაიცემა, ისინი არიან უკანონო გარემოვაჭრეები და მათი ამ ქუჩებიდან გაყვანა მოხდება. ჩვენ რეიდები ჩავატარეთ და გარევაჭრობა აღვკვეთეთ. განყოფილებაში, რომელიც გარევაჭრობას აკონტროლებს, სულ ათი კაცია და ათი კაცით ერთდროულად ბათუმის მონიტორინგი რთული იქნება, მაგრამ ის ადგილები, რომლებიც გადატვირთულია უკანონო გარემოვაჭრეების მიერ, მაგალითად, წერეთლის ქუჩა და მისი მიმდებარე ტერიტორია, გათავისუფლდება გარევაჭრობისაგან.

ეს არის ყველაზე პრობლემური ადგილები ქალაქში?

დიახ, და კიდევ ლერმონტოვისა და ჭავჭავაძის ქუჩების კვეთა.

რას ითვალისწინებს კანონი უკანონო გარევაჭრობის შემთხვევაში?

ჯარიმას, მაგრამ ყველამ ვიცით, რომ ადამიანები, რომლებიც ქუჩაში, უკანონოდ ვაჭრობენ, არიან გაჭირვებული და პირდაპირ ჯარიმის გამოწერას ვერიდებით, ჯერ ვაფრთხილებთ სიტყვიერად, შემდეგ წერილს გადავცემთ და თუ ძალიან შეგვეწინააღმდეგენ, მაშინ ვაჯარიმებთ.

რამდენია ჯარიმა?

სხვადასხვა მუხლია, ადმინისტრაციულ სამართალდარღვევათა კოდექსით. ერთია უკანონო გარევაჭრობა, რაც ითვალისწინებს ჯარიმას 20-იდან 50 ლარამდე, მაგრამ თუ მანქანის ან ფეხით სავალი ნაწილია დაკავებული, იქ უკვე 500 ლარია ჯარიმა. 500-ლარიანი ჯარიმის გამოწერა ძალიან რთული საქმეა გაჭირვებული ადამიანისთვის და ამიტომ ჩვენ მაინც ვცდილობთ 50 ლარზე მეტით არ დავაჯარიმოთ.

რას სთავაზობთ, სად უნდა წავიდნენ ეს ადამიანები?

მერიას აქვს მოლაპარაკება ახალ ავტოსადგურ „მეტროსთან“, რომელიც ბონი-ბარცხანის გადასასვლელზე მდებარეობს. დავათვალიერეთ ტერიტორია. ეს არის ფართო ადგილი, პარკირებით, კარგი მისასვლელით, მოასფალტებული და მოპირკეთებული. ბაზარია შიგნით გაკეთებული, თანამედროვე სტანდარტებით, დახლები უკვე აწყვია, შუქი და წყალიც მიყვანილია. მომავალ კვირას ხელმძღვანელი უნდა შევახვედროთ წერეთლის ქუჩაზე გარემოვაჭრეებს. გვინდა, გარემოვაჭრეებმა თავიდანვე თადარიგი დაიჭირონ ბაზრის მეპატრონეებთან, რადგან მერე ისე არ მოხდეს, რომ თქვან – „ჩვენ არ ვიცოდით“, „დაგვასწრეს“, „დახლი არ შეგვხვდა“ და ა.შ. ავტოსადგურის ხელმძღვანელობა გვპირდება, რომ ერთი წლის მანძილზე არ გადაახდევინებს ქირას გარემოვაჭრეებს და შემდეგ უკვე ჩვენ ამაში ვეღარ ჩავერევით. ეს პროცესი უმტკივნეულოდ უნდა განხორციელდეს, უკანონო გარემოვაჭრეების ინტერესებიც უნდა იყოს დაცული და ქალაქისაც.

როგორ შეხვდნენ მოვაჭრეები ამ შეთავაზებას?

წერეთლის ქუჩიდან წავიყვანე უფრო აქტიური გარემოვაჭრეები იქ და მოეწონათ ძალიან. ჩვენც მოგვწონს ის ადგილი. იქ არის დიდი ტერიტორია და თუ ჩვენ ამ ადგილს დავტვირთავთ, „მეტროს“ ადმინისტრაცია გვპირდება, ამ ადგილზე ახალ ბაზარსაც ააშენებს. ვფიქრობ, ეს იქნება ყველასთვის კარგი გამოსავალი და ეს არ იქნება მტკივნეული, რადგან ჩვენ ამას ეტაპობრივად განვახორციელებთ. რა თქმა უნდა, იქნება იმ კატეგორიის ხალხიც, რომელიც ამის წინააღმდეგი წავა, მაგრამ დარწმუნებული ვარ, რომ შედეგი გვექნება. ვეღარ მოიცდის ქალაქი. ტერიტორიები კეთილმოსაწყობია, ასფალტი დასაგებია ყოფილი კალიევის, ახლანდელი ბერიძის ქუჩაზე, ტროტუარები გასაკეთებელია, მერია ამის გამო სამუშაოებს ვერ ატარებს.

უკანონო გარევაჭრობასთან ბრძოლის თემა ბათუმისთვის ახალი არ არის. წინა ხელისუფლებასაც ჰქონდა ამის მცდელობა, პერიოდულად ახერხებდა კიდეც, მაგრამ მოვაჭრეები ისევ უბრუნდებოდნენ ქუჩას. ახალ პოლიტიკას რა შედეგი ექნება თქვენი ვარაუდით და რა დროში შეიძლება ეს გაიწელოს?

მე ვფიქრობ, საზღვაო სეზონამდე ეს ყველაფერი უნდა მოგვარდეს. ისე ვართ ჩვენ მომართული ამ თემასთან დაკავშირებით, რომ არ შეიძლება ეს პროცესი ძალიან გაიწელოს. ბევრი განცხადება შემოდის, გარემოვაჭრეებს ადგილზე მცხოვრებლებიც უპირისპირდებიან. ჩვენ შედეგზე ვართ ორიენტირებული, ზოგს ძალით შეიძლება დასჭირდეს გაყვანა, ზოგი მისი ნებით წავა, მაგრამ საბოლოოდ შედეგამდე უნდა მივიდეთ. წერეთლის ქუჩა უნდა გაიწმინდოს, მოეწყოს ტროტუარები, ახალი ფილები დაიგოს და იმუშაობს უნდა ჩვენმა სამსახურმა, რომ არ მოხდეს თავიდან დახლების დადება და უკანონო გარევაჭრობა.

გაქვთ მონაცემები, ბათუმში რამდენი ადამიანი ვაჭრობს უკანონოდ?

დაახლოებით 200 გაფრთხილება ამოვწერეთ ბოლო კვირის განმავლობაში, ოღონდ ეს არიან ის ადამიანები, ვინც ჩვენ მოგვაწოდა მონაცემები – სახელი, გვარი და პასპორტი, თუმცა არის ხალხი, რომელიც არც სახელსა და გვარს გვეუბნება და არც გაფრთხილებას იბარებს. რა თქმა უნდა, ბევრია ასეთი მოვაჭრე, მაგრამ ჩვენ ვცდილობთ აქტივისტები დავარწმუნოთ, რომ ჩვენი შეთავაზებული ადგილი კარგია, სოფლებისკენ, თბილისისკენ, ქუთაისისკენ მიმავალი სამარშრუტო ტაქსები გადადიან იქ და ის ტერიტორია კარგად დაიტვირთება, ხალხმრავალი გახდება და ბაზარიც იმუშავებს.

სასამართლომ შს სამინისტრო დაავალდებულა „ბათუმელებს“ საჯარო ინფორმაცია მისცეს

შს სამინისტროში თანამდებობის პირებზე გაცემული პრემიების ოდენობას, მიმღების სახელის, გვარისა და თანამდებობის მითითებით, რედაქციის ჟურნალისტი 2013 წლის 25 ნოემბრიდან ითხოვდა, თუმცა სამინისტრო არ გასცემდა.

შინაგან საქმეთა სამინისტრო ასევე სასამართლომ დაავალდებულა გადაიხადოს 50 ლარი მოსარჩელის ანუ გაზეთ „ბათუმელების“ სასარგებლოდ. ეს თანხა ბაჟის ნაწილია, რომელიც მოსარჩელემ სასამართლოში სარჩელის შეტანის დროს გადაიხადა. ასეთი გადაწყვეტილება თბილისის საქალაქო სასამართლოს მოსამართლე ნანა ჭიჭილეიშვილმა მიიღო. გაზეთ „ბათუმელების“ ინტერესებს სასამართლოში ახალგაზრდა იურისტთა ასოციაცია იცავდა. ადამიანის უფლებათა ევროპული კონვენცია, საქართველოს კონსტიტუცია, ზოგადი ადმინისტრაციული კოდექსი, „პერსონალურ მონაცემთა დაცვის შესახებ“ საქართველოს კანონი, „საჯარო სამსახურში ინტერესთა შეუთავსებლობისა და კორუფციის შესახებ საქართველოს კანონი“ – ეს იმ კანონების ჩამონათვალია, რომლითაც სასამართლომ იხელმძღვანელა გადაწყვეტილების მიღებისას.

რედაქციას ასევე აინტერესებდა ინფორმაცია სამინისტროს ბალანსზე რიცხული სტრუქტურული ქვედანაყოფებისა და მაღალი თანამდებობის პირთა სარგებლობაში არსებული ავტომანქანების შეკეთებისთვის რა თანხა დაიხარჯა. სამინისტროს განმარტებით, უწყება მოკლებულია შესაძლებლობას გასცეს დოკუმენტაცია სარემონტო სამუშაოების შესახებ, ვინაიდან სამინისტროს ბალანსზე არსებული მანქანები შესაძლოა გამოყენებულ იქნეს ოპერატიულ სამძებრო ღონისძიებებში და სახელმწიფო უსაფრთხოებასთან დაკავშირებულ შემთხვევაში, შესაბამისად ამ ინფორმაციის გაცემაზე არ ვრცელდება ზოგადი ადმინისტრაციული კოდექსი. სამინისტროს ეს პოზიცია სასამართლომ გაიზიარა.

მალხაზ ნაკაშიძე: რატომ უნდა ამირჩიონ უნივერსიტეტის რექტორად

დისკუსია და ვიდეორგოლები მზადდება „თავისუფალ ჟურნალისტთა სახლის“ პროექტის – „ახალგაზრდებში დემოკრატიული იდეების პოპულარიზაცია“- ფარგლებში. პროექტი ხორციელდება „დემოკრატიის მხარდამჭერი ნაციონალური ფონდის“ (NED) მხარდაჭერით;

ვინ მიიღებს ბინას ქედაში

ქედის მუნიციპალიტეტის გამგებლის, დავით დუმბაძის თქმით, ქედაში 14 ბინაა თავისუფალი, ორი – ყოფილ ეკომიგრანტთა სახლში და 12 – ახალგარემონტებულ შენობაში.

გამგებლის თქმით, კომისია აღნიშნულ ფართობში სოფელ ჯალაბაშვილებში მცხოვრები პირველ კატეგორიას მიკუთნვებული 13 და სოფელ პირველ მაისში მცხოვრები ერთი ოჯახის შესახლებაზე მსჯელობს. დავით დუმბაძემ აღნიშნა, რომ ეკომიგრანტებთან დაკავშირებით შესწავლილ მასალას მუნიციპალიტეტი განსახილველად სამთავრობო კომისიას გადაუგზავნის. სტიქიის შედეგად დაზარალებული რომელი ოჯახი მიიღებს ბინას სახელმწიფოსგან სიმბოლურ ფასად, ამას საბოლოოდ სწორედ სამთავრობო კომისია გადაწყვეტს.

„ჩვენ შესწავლილ მასალას გადავუგზავნით განსახილველად. ვფიქრობთ, ამ ეტაპზე ერთი სოფლის პრობლემა მოვაგვაროთ “ – ამბობს დავით დუმბაძე.

სოფელ ჯალაბაშვილებში მცხოვრებ, პირველ კატეგორიას მიკუთვნებულ 14 ოჯახს სახელმწიფომ სახლის ადგილმონაცვლეობისთვის 2010 წელს ფულადი დახმარება გაუწია, რისთვისაც ბიუჯეტიდან 57 000 ლარი დაიხარჯა. ფულად დახმარებასთან ერთად ადგილობრივ ხელისუფლებას დაზარალებული ოჯახებისთვის უსაფრთხო ტერიტორია უნდა გამოეყო, რაც ვერ განხორციელდა. სტიქიის შედეგად დაზარალებული 14 ოჯახიდან სახლის ადგილმონაცვლეობისთვის საჭირო ფართობის გამონახვა მხოლოდ ერთმა ოჯახმა შეძლო, დანარჩენი 13 ოჯახი კი, დღემდე დამეწყრილ და სიცოცხლისთვის საშიშ სახლში აგრძელებს ცხოვრებას.

დავით დუმბაძის თქმით, იმ შემთხვევაში, თუ ჯალაბაშვილებში მცხოვრები ოჯახები საცხოვრებელი ბინით დაკმაყოფილდებიან, ისინი მზად არიან 2010 წელს მიღებული ფულადი დახმარება სახელმწიფოს დაუბრუნონ.

მუნიციპალიტეტის გამგებლის თქმით, სტიქიის შედეგად დაზარალებული ოჯახების პრობლემის მოგვარებისთვის ქედაში მინიმუმ 48-ბინიანი კორპუსის აშენებაა საჭირო.

ნაპირსამაგრ სამუშაოებს მთავრობა დააფინანსებს

სამივე მათგანზე დასკვნები ინფრასტრუქტურისა და გარემოს დაცვის სამინისტროებმა მოამზადეს. მთვარობის ინფორმაციით, ნაპირსამაგრი სამუშაოები დაახლოებით 400 ათასი ლარი დაჯდება. აქედან ქობულეთის მუნიციპალიტეტი გამოყოფს 240 000 ლარს, ხოლო დანარჩენი – 160 000 გამოიყოფა მთავრობის თავმჯდომარის სარეზერვო ფონდიდან.

ასევე, მთავრობის ინფორმაციით, რაც შეეხება ნაპირსამაგრ სამუშაოებს, საკურორტო ზონის შესანარჩუნებლად, საჭიროა დაახლოებით 5 მლნ ლარი იმისთვის, რომ 200 ათასი კუბ/მ ფრაქციის ჩაყრა მოხდეს შესაბამის ადგილებში, რომელიც სავარაუდოდ, გათვალისწინებული იქნება შემდეგი წლის ბიუჯეტში.

ბათუმის საფეხბურთო სტადიონის საპროექტო წინადადებების განხილვა

ბათუმის საფეხბურთო სტადიონის საპროექტო წინადადებების განხილვა | 04-03-2015

სამინისტროს ინფორმაციით, კომპანიების მიერ წარმოდგენილი პროექტები საჯარო განხილვისთვის გამოიფინება, რის შემდეგაც სპეციალური კომისია, არასამთავრობო ორგანიზაციების მონაწილეობით, პროექტების განხილვა – შეფასების პროცესს დაიწყებს.

აჭარის ფინანსთა და ეკონომიკის სამინისტრომ ქ. ბათუმში, ლეონიძის ქ. №15-ში მდებარე მიწის ნაკვეთზე 20 000 მაყურებელზე გათვლილი სტადიონის საპროექტო-სახარჯთაღრიცხვო დოკუმენტაციის შედგენაზე კონკურსი იანვარში გამოაცხადა. შესყიდვის სავარაუდო ღირებულება არაუმეტეს 650 000 ლარს შეადგენს, რომლის გადახდაც აჭარის რესპუბლიკური ბიუჯეტიდან მოხდება.

მარტის აფიშა ბათუმში

6 მარტი – “TECH HOUSE PARTY” რესტორანი „VOX“

დასაწყისი: 21:00 საათზე.

ბილეთის ფასი: 10 ლარი.

მისამართი: ანგისის ქ. №2.

ბილეთების შესაძენად დარეკეთ: +995 593 66 17 42 (სოფო).

ასაკობრივი შეზღუდვა: ბიჭი +21, გოგო +18.

7 მარტი – ბათუმის ცირკში „კომედი ქლაბ“-ის სრული შემადგენლობა

დასაწყისი: 15:00, 18:00;

ბილეთის ფასი: 10, 12 ლარი;

მისამართი: ბარათაშვილის ქ. №6;

ტელ: +995 599 68 02 23.

8 მარტი – ჯგუფი “ფრანი”, რესტორანი „ალექსანდრია“

დასაწყისი: 20:00 საათზე

ბილეთის ფასი: 50-70ლარი (ფასში შედის სუფრა).

ტელ: (0422) 571 070378

8 მარტი – ქალთა საერთაშორისო დღე რესტორანში „გაუდი“, მხიარული პროგრამა, სიურპრიზები, ცოცხალი მუსიკა.

ბილეთის ფასი: 100 ლარი (მენიუ 4 პერსონაზე).

მისამართი: ლ. ასათიანის №1

მუსიკალური ფესტივალი ,,ბათუმური ზამთარი“

8 მარტი – ,,,The Beatles“-ს საღამო. ზაზა მარჯანიშვილის ბენდი, ჯგუფი ,,ბლიცი“

დასაწყისი: 19:00 საათზე.

10 მარტი – ეკა რომალე ჯიჯეიშვილის საღამო

დასაწყისი: 19:00 სთ.

11 მარტი, ლევან წულუკიძის საღამო

დასაწყისი: 19:00 საათზე.

12 მარტი – მუსიკალური საღამო, ათინა და ბექა

დასაწყისი: 19:00 საათზე.

14 მარტი – ანსამბლი ,,მეტეხი“ და ჯგუფი ,,ლაბირინთი“

დასაწყისი: 19:00 სთ.

მისამართი: ბათუმის ხელოვნების ცენტრი, ოდისეი დიმიტრიადის ქ. №1

აბონემენტის ფასი: 15 ლარი

ბილეთის ფასი: 5, 7 და 10 ლარი

ტელ: 0422 27-62-40

დელფინარიუმი – მხოლოდ შაბათი-კვირას. დასაწყისი: 17:00 საათზე.

საცურაო აუზი ბათუმი პლაზაში, ყოველდღე 07:00 – 23:00, ხოლო შაბათ-კვირას 09:00 სთ-დან – 21:00 სთ-მდე, ტელ: 0422 294401/02

ცხენებით გასეირნება, ყოველდღე, ორშაბათის გარდა 10:00-18:00 საათამდე.

მისამართი: აეროპორტის გზატკეცილი # 253 ( ვეტერინარული კლინიკის უკან);

მუზეუმები

„ძმები ნობელების ტექნოლოგიური მუზეუმი“ – ყოველდღე, გარდა ორშაბათისა, 10:00 – 18:00 საათამდე. მისამართი: თამარ მეფის დასახლება

„ხარიტონ ახვლედიანის სახელმწიფო მუზეუმი“ – ყოველდღე, 10:00–18:00 საათამდე, მისამართი: ხარიტონ ახვლედიანის #4, ბათუმი 6010

„აჭარის ხელოვნების მუზეუმი“– ყოველდღე, გარდა ორშაბათისა, 10:00–18:00 საათამდე, მისამართი: გორგილაძის ქუჩა #8

„ბათუმის არქეოლოგიური მუზეუმი“ – ყოველდღე, გარდა ორშაბათისა, 10:00–18:00 საათამდე, მისამართი: ჭავჭავაძის ქუჩა # 77

ცოცხალი მუსიკა და DJ

DJ ბენდი, რესტორანში „ქლაუდ“, სასტუმრო „რედისონი“– ყოველ პარასკევს, შაბათს და კვირას 23:00-03:00 საათამდე.

საქსაფონი რესტორანში „გაუდი“ – ყოველ პარასკევს და შაბათს, 19:00 საათდან. მისამართი: ლ.ასათიანის#1 რუსთაველის და ჯაფარიძის კვეთა

ცოცხალი მუსიკა რესტორანში „SKY VOX“ – ყოველდღე, 19:30 საათიდან,

მისამართი: ბათუმი, ანგისა 21/22-ე სართული

ლუკა ზაქარიაძე და ჯგუფი „პიკასო“ პიაცაზე – ყოველ პარასკევს, 21:00 საათიდან.

ცოცხალი მუსიკა რესტორანში „ყირამალა“ – ყოველდღე 20:00 საათიდან.

მისამართი: ხიმშიაშვილის ქუჩა, არდაგანის ტბასთან

ცოცხალი მუსიკა რესტორანში „მეგრულ–ლაზური“– ყოველდღე 19:30 საათიდან. მისამართი: თბილისის გზატკეცილი #16

ცოცხალი მუსიკა რესტორანში „არტ ბულვარი“ – ყოველდღე, 20:00 საათიდან. მისამართი: ძველი ბულვარი, შერატონის მიმდებარე ტერიტორია

ცოცხალი მუსიკა რესტორანში „VIA VENETO“ (პრეზიდენტ პლაზა) კარაოკე ბარში – ყოველდღე 20:00 საათიდან.

მისამართი: ბარათაშვილი #17

ცოცხალი მუსიკა რესტორანში „ვილაჯიო ლაუნჯი“ – ყოველდღე, 18:00 საათიდან. მისამართი: გორგილაძის #88

ცოცხალი მუსიკა, ბენდი ზამთრის ბაღში ,,ბაკურიანი“ – ყოველდღე, 20:00 საათიდან. მისამართი: ნინოშვილის #11

ცოცხალი მუსიკა და საქსაფონის ჰანგები რესტორანში “ძველი ბულვარი“, ყოველდღე 13:00-16:00 საათზე.

მისამართი: ნინოშვილის ქ. #23.

ტელ: 577242006, 577909120

ჯგუფი „Asea Sool“ რესტორანში „მიუნჰენი“– ყოველდღე შაბათს, 21:00 საათიდან. მისამართი: ქუთაისის/კოსტავას ქ. #8/5;

ტელ: 04222 227284/+995 577 299320/ 599 289955/ 599 508083

პიანისტი ლადო ყატაშვილი რესტორან „ლოფტ“-ში – ყოველდღე, შაბათ-კვირის გარდა, 20:00-დან 23:00 საათამდე.

მისამართი: მელაშვილის #1/3.

ტელ: 0422225790/0422225792

მუნიციპალიტეტი ნაპირგამაგრებითი სამუშაოებისთვის თანხას მთავრობას სთხოვს

გამგებლის მოადგილის ინფორმაციით, სამუშაოებისთვის დაახლოებით ნახევარი მილიონი ლარია საჭირო: “ჩემი ინფორმაციით მთავრობის თავმჯდომარემ უკვე მოაწერა დოკუმენტს ხელი, თანხის ჩამორიცხვის შემდეგ ტენდერს გამოვაცხადებთ, გაზაფხულზე კი უკვე ნაპირგამაგრებითი სამუშაოებსი ჩატარებას დავიწყებთ”.

როდის და რა ოდენობის თანხის გადარიცხვას აპირებს აჭარის მთავრობა ქობულეთის მუნიციპალიტეტისთვის? – ამ კითხვაზე პასუხს აჭარის მთავრობისგან ველოდებით.

შეგახსენებთ, რომ დღეს ნაციონალური მოძრაობის წევრმა, რევაზ ხარაზმა ქობულეთის გამგეობა უმოქმედობაში დაადანაშაულა, რადგან მუნიციპალიტეტში ნაპირგამაგრებითი სამუშაოები არ მიმდინარეობას, რამაც შესაძლოა ტურისტულ სეზონს შეუშალოს ხელი.

სამი მცირეწლოვანი დაზიანებულ სახლში

ენვერ ხიმშიაშვილი მეუღლესთან, დასთან და ბავშვებთან ერთად საუკუნის წინ აშენებულ სახლში ცხოვრობს. სახლში, სადაც მცირეწლოვანი ბავშვები იზრდებიან, დიასახლისის თქმით, წვიმის დროს წყალი ჩამოდის, ქარსა და თოვლში კი სახლი დეფორმაციას განიცდის.

„სახლი რომ ძველი და მწყობრიდან გამოსულია, თქვენც ხედავთ. აი, შეხედეთ კედლებს შორის რამხელა ღრიჭოებია“, – მაჩვენებს დიასახლისი ნინო მიქელაძე.

როგორც ენვერ ხიმშიაშვილი გვიყვება სახლი, სადაც ამ დროისთვის ექვსი ადამიანი ცხოვრობს, ორი საუკუნის წინ გაკეთებულ საძირკველსაა დაშენებული, საცხოვრებელი სახლის ისტორია კი საუკუნეზე მეტს ხანს ითვლის.

„გარდა იმისა, რომ სახლის კედლები ძველი და დამპალია, ავარიულია ორი საუკუნის წინ ნაშენები საძირკველიც. როგორც ჩემთვის ცნობილია, საძირკველზე, სადაც ახლა ჩვენი საცხოვრებელი დგას, საუკუნეების წინ გაცილებით დიდი ზომის სახლი იყო, სახლი ჩამოიშალა და იმავე საძირკვლის ნაწილზე კვლავ სახლი დაუშენებიათ, არ ვიცი რამდენად ექვემდებარება გამაგრებას. არაერთხელ ვითხოვე დახმარება, მპირდებოდნენ დაგეხმარებით, ბინას მოგცემთო, ვერანაირი დახმარება რომ ვერ მივიღე, ბოლოს გამგეობას ვთხოვე სახურავით დამხმარებოდნენ. ამასაც დღემდე ველოდები“, – ამბობს ენვერ ხიმშიაშვილი.

ხიმშიაშვილების პრობლემა მხოლოდ ძველი სახლი არ არის, ენვერის ცოლი ნინო მიქელაძე ავადაა და მუდმივი მკურნალობა სჭირდება, ავად არის ენვერი და მისი და – მზიაც.

„სამი ბავშვი მყავს, სამივე მცირეწლოვანია, ზრდასრულებს კი ფიზიკური მუშაობა არ შეგვიძლია. მე ჯანმრთელობის პრობლემა მაქვს, ფიზიკურად ვერ ვიმუშავებ. თუ ფიზიკურად არ იმუშავებს, ოჯახს როგორ არჩენს გლეხი კაცი? ცოლიც ავად არის და ჩემი დაც, სოციალურად დაუცველი ოჯახი ვართ, სახელმწიფო კი მეხმარება და შემწეობას მაძლევს, რისი მადლობელიც ვარ, მაგრამ ჩვენი მთავარი პრობლემა საცხოვრებელი სახლია“, – ამბობს ენვერი.

შუახევის მუნიციპალიტეტის გამგეობის ჯანდაცვის სამსახურის უფროსი ზაზა ზოიძე ამბობს, რომ სოციალურად დაუცველ ხიმშიაშვილების ოჯახს გამგეობა სახურავით ეხმარება.

„ჩვენ ამ ოჯახს სახურავით ვეხმარებით, ამის შესახებ ინფორმირებულები არიან, მათ გადაეცემათ 70 ცალი თუნუქის სახურავი, ნებისმიერ დროს შეუძლიათ წაიღონ. გარდა ამ ოჯახისა, მუნიციპალიტეტში მოქმედი „სიღარიბის ზღვარს ქვემოთ მყოფი მოსახლეობის საცხოვრებელი სახლებისთვის თუნუქის ფურცლების შეძენის მიზნობრივი პროგრამის“ ფარგლებში სახურავით დახმარებას შუახევის მუნიციპალიტეტში მცხოვრები, სიღარიბის ზღვარს ქვემოთ მყოფი, 45 ოჯახი მიიღებს“, – განაცხადა ზაზა ზოიძემ.

სახურავით დახმარების მოთხოვნით შუახევის მუნიციპალიტეტის გამგეობაში სულ 92 განაცხადია შესული. ზაზა ზოიძის თქმით, გამგეობაში არსებულმა ზარალის შემსწავლელმა კომისიამ ყველა განმცხადებლის საცხოვრებელი სახლი ადგილზე შეისწავლა.

ნაციონალური მოძრაობის წევრი ქობულეთის გამგეობას უმოქმედობაში ადანაშაულებს

რევაზ ხარაზი ამბობს, რომ აღნიშნული გარემოება ტურისტული სეზონის ჩავარდნისა და ასწლოვან ხეების განადგურების საფრთხეს ქმნის. მისი თქმით, 2014 წელს ქობულეთში, თამარ მეგის გამზირზე სანაპირო შტორმა მიიტაცა, ხელისუფლებამ კი მოშლილი ჯებირი არ გააკეთა.

რევაზ ხარაზი ამბობს, რომ ის თანხა, რაც წინა წლებში გამოყო ხელისუფლებამ სანაპირო ზოლის გასამაგრებლად, არასაკმარისია.

“ბათუმელები” ქობულეთის მუნიციპალიტეტის პრესსამსახურს უკვე დაუკავშირდა. მუნიციპალიტეტიდან კომენტარის მიღების შემდეგ “ბათუმელები” გამგეობის პოზიციასაც გაგაცნობთ.

რა შემთხვევაში ჩატარდება უმაღლესი საბჭოს ვადამდელი არჩევნები

ბატონო გიორგი, კანონმდებლობის შესაბამისად რა შემთხვევაში შეიძლება დადგეს დღის წესრიგში აჭარის უმაღლესი საბჭოს დათხოვნის საკითხი?

კანონმდებლობით აჭარის უმაღლესი საბჭოს დათხოვნის საფუძველი შეიძლება გახდეს უმაღლესი საბჭოს ქმედება, რაც საფრთხეს უქმნის ქვეყნის სუვერენიტეტსა და მთლიანობას. ასევე, როცა ის თავის მოვალეობას ვერ ასრულებს, არის უუნარო და გადაწყვეტილებას ვერ იღებს; ბიუჯეტს ვერ ამტკიცებს, ან ვერ იღებს საკანონმდებლო აქტებს და თუ კი ის გადააყენებს აჭარის მთავრობის თავმჯდომარეს და შემდეგ ორჯერ არ დაამტკიცებს პრეზიდენტის მიერ წარდგენილ კანდიდატურას – ასეთ შემთხვევაში პარლამენტის თანხმობით პრეზიდენტს აქვს უფლება, აჭარის უმაღლესი საბჭო დაითხოვოს.

გარდა იმისა, რაც თქვენ ჩამოთვალეთ, რა ჩაითვლება უმაღლესი საბჭოს ფუნქციის ვერ შესრულებად, შეიძლება თუ არა უმაღლეს საბჭოში დღეს არსებული რეალობა გახდეს მისი დათხოვნის საფუძველი?

საკადრო ცვლილებასთან დაკავშირებული გადაწყვეტილება უკვე მიიღო უმაღლესმა საბჭომ, გადააყენა ვიცე-სპიკერი და ერთ-ერთი კომისიის თავმჯდომარე. ეს არ მიუთითებს იმაზე, რომ უმაღლესი საბჭო უუნაროა. შეიძლება ეს საკითხი დადგეს, თუ უმაღლესი საბჭო ვერ დაამტკიცებს ბიუჯეტს. ის, რომ კანონს არ იღებს, თავისთავად არ მიუთითებს იმაზე, რომ უმაღლესი საბჭო ვერ ასრულებს მისთვის დაკისრებულ მოვალეობას. გამომდინარე აქედან, დღეს შექმნილი ვითარება უმაღლესი საბჭოს დათხოვნის საფუძველი ვერ გახდება.

რაც შეეხება თავმჯდომარის გადაყენებასთან დაკავშირებულ პროცედურას?

უმაღლესი საბჭოს თავმჯდომარის გადაყენებას საბჭოს 21 წევრიდან ნახევარზე მეტმა უნდა დაუჭიროს მხარი, თუ კვორუმი არ შედგა, საკითხი ვერ გავა, თოთხმეტი წევრი მაინც უნდა ესწრებოდეს სხდომას, რომ კვორუმი შედგეს და ნახევარზე მეტმა უნდა დაუჭიროს გადაწყვეტილებას მხარი.

ანუ, თუ სხდომაზე მხოლოდ ის თერთმეტი ადამიანი მივა, რომლებმაც ცოტა ხნის წინ ვიცე-სპიკერის გადაყენებას დაუჭირეს მხარი, საკითხი ჩავარდება?

დიახ, ასეა.

ახალი თავმჯდომარის ვერ არჩევის შემთხვევაში უმაღლეს საბჭოს რა ვადით შეიძლება უხელმძღვანელოს უხუცესმა წევრმა?

სანამ ახალ თავმჯდომარეს არ აირჩევენ, მანამდე უხუცესი წევრი გაუძღვება სხდომებს.

შესაძლებელია თუ არა ასეთ ვითარებაში უმაღლესი საბჭოს 11-მა წევრმა (ვინც თავმჯდომარის მოადგილე და კომისიის თავმჯდომარე გადააყენა) შეიტანოს იმ ხასიათის ცვლილებები ავტონომიური რესპუბლიკის შესახებ კანონში და რეგლამენტში, რითაც პროცესებს მის სასიკეთოდ წარმართავს?

ცვლილების დამტკიცებას ორი მესამედის მხარდაჭერა სჭირდება, ამიტომ არა მგონია მოახერხონ, თანაც აჭარის კონსტიტუცია საქართველოს პარლამენტმა უნდა დაამტკიცოს.

“ავტობანის გამო აგრობარათებს ვერ ვიყენებთ”

„სახელმწიფო დახვნის ვაუჩერს გვაძლევს და ვერ ვიყენებთ. შარშან გზის მშენებელი ჩინური კომპანიის წარმომადგენლებმა გარანტია მოგვცეს, რომ ღობეს აღადგენდნენ და სიმინდიც დავთესეთ. თუმცა, 30-ზე მეტ ოჯახს 21 დღის ამოსული სიმინდის ყანა საქონელმა გადაგვიჭამა. ეს მეორედ მოხდა. შარშანწინდელი ზარალი, 1 კვადრატულ მეტრზე 27 თეთრი, აგვინაზღაურეს, ესეც, გზა რომ გადავკეტეთ მერე. გასული წლისას კი, დღემდე ვითხოვთ. თუ ყურადღებას არ მოგვაქცევენ, გზას ისევ გადავკეტავთ“, – ამბობს „ბათუმელებთან“ ხუცუბნელი მალხაზ ცეცხლაძე.

ქობულეთის ასაქცევი გზის მშენებლობა საქართველოს საავტომობილო გზების დეპარტამენტის ზედამხედველობის ქვეშ მიმდინარეობს. დეპარტამენტის ტერიტორიული ორგანოს – აჭარის საავტომობილო გზების დირექციის დირექტორის ზურაბ სიხარულიძის განცხადებით, კომპენსაციის საკითხი გადაწყვეტილია და მოსახლეობა მას უახლოეს დღეებში მიიღებს: „პირადად შევხვდი მაგ ხალხს, შევპირდი და საკითხი ფაქტობრივად მოგვარებულია. პატარა ტექნიკური დეტალია დარჩენილი და ერთ კვირაში მიიღებენ კომპენსაციას“.

დაზარალებულები ამბობენ, რომ მათ კომპენსაციის მიღებას იანვრის ბოლოსთვის დაჰპირდნენ: „ადრე, გზა როცა გადავკეტეთ, ნახევარ საათში მოიტანეს ფული და დაგვირიგეს. ამჯერად რატომ ყოვნდება, არ ვიცით. ხარჯი გავწიეთ, დავზარალდით და იმ 27 თეთრსაც გვამათხოვრებენ“.

თანხის გაცემა, როგორც დირექციის ხელმძღვანელი აცხადებს, „მთელი პროცესია… თანხის გაცემას უნდა დასაბუთება, შესათანხმებელი იყო ჯერ დეპარტამენტში, შემდეგ მთავრობამ განიხილა, შესათანხმებელი იყო აზიის ბანკთანაც (დონორი ორგანიზაცია, რომელიც გზის მშენებლობას აფინანსებს – ავტ.), მშენებელ კომპანიასთან. ასე მივაღწიეთ იმას, რომ მიიღებენ თანხას“.

დირექციის ინფორმაციით, კომპენსაციას 32-მდე ოჯახი მიიღებს, რისთვისაც მთლიანობაში 42 ათასამდე ლარია გათვალისწინებული.

კომპენსაციასთან ერთად მოსახლეობა მეორე საკითხსაც აყენებს, რომელიც აუცილებლად უნდა მოგვარდეს.

„კომპენსაცია რომც მოგვცენ, წელს ნაკვეთებით მაინც ვერ ვისარგებლებთ, თუ ღობე არ გაკეთდა. სულ ნახევარ კილომეტრამდე მონაკვეთია შესაღობი. ვეუბნებით კომპანიის წარმომადგენლებს, მოსახლეობაც გამოვალთ, დაგეხმარებით შეღობვაშიო, მაგრამ დაგვპირდებიან და არაფერი. მთავრობა ამ დახვნის ვაუჩერებს რომ გვირიგებს, ხომ უნდა ვისარგებლოთ. გვესმის, დღეს მძიმე ეკონომიკური მდგომარეობაა, მაგრამ რაც დააშავა კომპანიამ, თავად უნდა გამოასწოროს. აპრილამდე ღობე თუ არ გაკეთდა, გამოდის, ვერ დავხნავთ მიწას“, _ ამბობს მალხაზ ცეცხლაძე.

მოსახლეობის თქმით, ღობე ორი წლის წინ უნდა გაკეთებულიყო. დღეს კი, უკვე გაყვანილი გზის გასწვრივ რკინის მოაჯირებიც რომ გაკეთდეს, შემოსაღობი მანძილი საგრძნობლად შემცირდება: „ქობულეთის მუნიციპალიტეტის გამგეობაში შარშან ნოემბერში შეტანილ განცხადებაზე, აგერ ახლა, 9 თებერვალს გვიპასუხეს. ქონების მართვისა და აგრალურ საკითხთა კომისიამ განიხილა საკითხი და ეს „წარმოადგენს კერძო სამართლებრივ დავას და კომისიას მიზანშეწონილად მიაჩნია იმოქმედოთ კანონის შესაბამისადო“. გაქვთ უფლება და იდავეთო – ეს რომ მოგვწერონ პასუხად, ამისთვის ავირჩიეთ ეს ხალხი და ამისთვის ვუხდით ხელფასს?“.

ზურაბ სიხარულიძის განცხადებით, ყველაფერი თავის დროზე კომისიამ შეამოწმა: „იყო სოფლის გამგებელიც, საკრებულოს დეპუტატიც, მოსახლეობაც და მოხდა აზომვა, დათვლა… ეს ღობეებიც აღდგება, ალბათ. ასე იყო ჩოლოქშიც და შეიღობა. სადაც ყანები ჰქონდათ, გადასასვლელებიც მოეწყო“.

კონკრეტულად როდის მოაგვარებს პრობლემას მშენებარე კომპანია? – ამ კითხვაზე, დაპირების მიუხედავად, საქართველოს საავტომობილო გზების დეპარტამენტიდან პასუხი ვერ მივიღეთ.

ავტობანის მშენებლობა სოფელ ხუცუბანში. ფოტო: თედო ჯორბენაძე

“ჟილინის არხის” მშენებელი კომპანია ბათუმის მერიას სასამართლოში უჩივლებს

ე.წ. “ჟილინის არხის” რეკონსტრუქციას მერიასთან დადებული ხელშეკრულების პირობების შესაბამისად ტენდერში გამარჯვებული კომპანია “GM HIDRO” აწარმოებდა. მერიის საფინანსო-საბიუჯეტო პოლიტიკის სამსახურში “ბათუმელებს” უთხრეს, რომ კომპანიას ფინანსური პრობლემები ჰქონდა, რის გამოც სამუშაოები წინასწარ შეთანხმებულ გეგმა-გრაფიკს ჩამორჩა. ამ ინფორმაციას კომპანიაშიც ადასტურებენ, თუმცა კომპანიის დირექტორის, უჩა ფუტკარაძის ინფორმაციით, შპს GM HIDRO -ს სამუშაოების შეთანხმების ვადაში დასრულების შესაძლებლობა აქვს.
კომპანია მერიის წინააღმდეგ სარჩელს ამზადებს. “გვაქვს უნარი საქმე ბოლომდე მივიყვანოთ, ამის დასადასტურებლად მოვიწვიეთ სამხარაულის ექსპერტიზის ბიურო, რის შემდეგაც მივმართავთ სასამართლოს. ჩვენი იურისტი ამბობს, რომ საქმეს მოიგებს”, _ ამბობს კომპანიის დირექტორი.

რაც შეეხება სამუშაოს შეფერხების მიზეზებს, “ჟილინის არხის” სარეკონსტრუქციო სამუშაოები მერიამ ე.წ. უავანსო პროექტით შეისყიდა. რაც იმას ნიშნავს, რომ კომპანიას არხის რეკონსტრუქცია რამდენიმე ეტაპად უნდა განეხორციელებინა, თითოეული ეტაპის მიღება-ჩაბარების გაფორმებისა და შესაბამისი ექსპერტიზის დასკვნის წარდგენის შემდეგ კი, მერია კომპანიას უკვე შესრულებული, ანუ ჩაბარებული სამუშაოს ღირებულების ოდენობის თანხას გადაურიცხავდა. ხელშეკრულების თანახმად, კომპანიას პირველივე ეტაპზე მილიონზე მეტი ლარის სამუშაოს შესრულების ანგარიში უნდა წარედგინა, თუმცა სამუშაოები წინასწარ გაწერილ გეგმა-გრაფიკს ჩამორჩა: `ლარის კურსი აიწია, ამას დაემატა უამინდობაც, იმ კოკისპირული წვიმის დროს ჩვენ, ფაქტობრივად, ვერ ვიმუშავეთ. ჩამორჩენის მიზეზებზე მერიას წერილობით ვატყობინებდით.”

ის, რომ კომპანიამ სამუშაოები არხში მინიმალური ნალექის დაფიქსირების დროს უნდა განახორციელოს, ხელშეკრულებაშიც წერია: `ჟილინის არხზე საამშენებლო სამუშაოები უნდა ჩატარდეს წლის მინიმალური ნალექის დროს, როდესაც საჭირო წყალქცევითი სამუშაოები შედარებით ადვილი შესასრულებელი იქნება. არხზე საამშენებლო სამუშაოები უნდა განხორციელდეს (ქანობის მიმართულებიდან გამომდინარე) ქვემოდან ზემოთ. რადგან ზღვის სანაპირო ზოლთან არსებული ახლად აშენებული წყალგამტარი ნაგებობა აკმაყოფილებს პროექტით მოთხოვნილ პირობებს, იგი უცვლელადაა ჩართული ახალ საპროექტო სისტემაში. არხის მშენებლობა განხორციელდება მხოლოდ ამ ნაგებობიდან ზემოთ”.
სპეციალისტები განმარტავენ, რომ განსხვავებით ბათუმის შიგა სანიაღვრე ქსელებისგან, ჟილინის არხის წყალგამტარში წყალი მუდმივად გაედინება როგორც წლის მაქსიმალური, ასევე მინიმალური ნალექის პერიოდში. განსხვავება მხოლოდ არხში გამდინარე წყლის ოდენობაშია.

ნალექების მაქსიმალური პერიოდისათვის არხში გამდინარე წყლის რაოდენობამ, ზღვაში მიერთების წინ, შეიძლება მიაღწიოს 10 000 ლ/წმ. ხოლო მინიმალური ნალექების დროს (გვალვის პერიოდში) 50ლ/წმ-დე მცირდება – ნათქვამია ხელშეკრულებაში.
არხის რეკონსტრუქციასთან დაკავშირებული ხელშეკრულება მერიამ უკვე მეორედ ჩაშალა. შპს GM HID0O”-ის დირექტორის თქმით, პრობლემა სამუშაოს სირთულესთან დაკავშირებული არ არის. “ჩვენ უკვე შესრულებული გვქონდა პირველი ეტაპის სამუშაოების 30 პროცენტი, დავხარჯეთ 200 000 ლარი, მზად გვქონდა ფილებიც, რაც იქ უნდა დაგვეგო. პირველი ეტაპის ჩაბარების თარიღის თხუთმეტი დღით გადადებას ვითხოვდით. რაც ჩვენთვის გადამწყვეტი იქნებოდა.”

როგორც ჩანს, კომპანიის წერილობითი ახსნა-განმარტებები საკმარისი არ აღმოჩნდა და ბათუმის მერიაში ხელშეკრულების შეწყვეტის გადაწყვეტილება მიიღეს. მშენებელი კომპანია 250 000 ლარით დაჯარიმდა და მიეცა დისკვალიფიკაცია, რაც იმას ნიშნავს, რომ შპს GM HID0O” ერთი წლის განმავლობაში სახელმწიფო სტრუქტურების მიერ გამოცხადებულ ტენდერებში მონაწილეობას ვეღარ მიიღებს.
ვიდრე კომპანია სარჩელს ამზადებს, მერია სამუშაოების გასაგრძელებლად ახალი კომპანიის შესარჩევად გამარტივებული ტენდერის გამოცხადებას უახლოეს დღეებში გეგმავს. ახალი კომპანიის გამარტივებული წესით შერჩევაზე მერიამ აჭარის მთავრობის თავმჯდომარისგან თანხმობა უკვე მიიღო.

„ჟილინის არხის“ რეკონსტრუქციის დასრულების შემდეგ ძლიერი წვიმის დროს ბათუმის ქუჩები აღარ დაიტბორება. ახალმა სისტემამ სანიაღვრე არხებთან დაკავშირებული პრობლემები უნდა მოხსნას.

მოუწესრიგებელი ქუჩა მთავარი სამმართველოს გვერდით

ხელოვნების უნივერსიტეტში ერეკლე სიგუას ფოტოგამოფენა გაიხსნა

ერეკლე სიგუას ფოტოგამოფენა ხელოვნების უნივერსიტეტში

ქალთა უფლებების მხარდამჭერ აქციას ბათუმიც შეუერთდება

აქციის სლოგანებია: „მეტი ქალი პარლამენტში“, „მხარი დაუჭირე ქალების გაძლიერებას!“, „მხარი დაუჭირე ქალების პოლიტიკაში ჩართულობას!“, „ჩვენ გვჭირდება მეტი ქალი პოლიტიკაში!“

„ჩვენ ვართ საქართველოს მოსახლეობის 53%, მაგრამ პარლამენტში 12%-ით ვართ წარმოდგენილი. 59 გამგებლიდან მხოლოდ ორია ქალი. ქვეყნის არც ერთი მერი და არც ერთი გუბერნატორი ქალი არ არის. დღეს საქართველოში ქალის ხმა არ ისმის. 25 წელია ქვეყანამ აღიდგინა დამოუკიდებლობა, მაგრამ ქალთა პოლიტიკური მონაწილეობის კუთხით პროგრესისთვის არ მიგვიღწევია. ჩვენი უფლებები უწინდებურად ირღვევა. 2014 წლის ქალთა მკვლელობებმა გვიჩვენა, რომ საქართველოში ჩვენი სიცოცხლის უფლებაც კი არ არის დაცული.

დღეს ქართულ პოლიტიკას აკლია ქალების ხედვა, გამოცდილება და უნარები. პოლიტიკის სფეროში ქალების სიმბოლური, მცირე რაოდენობა, არ გვაძლევს საშუალებას სრულად გამოვავლინოთ და გამოვიყენოთ ჩვენი პოტენციალი. საზოგადოებისა და კაცობრიობის განვითარების პროცესში ჩვენი უნიკალური წვლილი დაკნინებული ან სრულიად დაკარგულია. ქალები იმ საკითხების გადაწყვეტაშიც კი ვერ მონაწილეობენ, რომელიც უშუალოდ და მხოლოდ მათ ეხებათ. პარლამენტი არ უზრუნველყოფს ქალების წარმომადგენლობას და შესაბამისად არ იცავს მათ ინტერესებს. საქართველოში არ გვაქვს წარმომადგენლობითი დემოკრატია. ჩვენ, ქალები, უგულებელყოფილნი ვართ პოლიტიკურ ცხოვრებაში და ამას აღარ შევეგუებით“ – ნათქვამია აქციის მხარდამჭერთა განცხადებაში.

თბილისში მსვლელობა ვარდების მოედნიდან დაიწყება და გაგრძელდება ყოფილი პარლამენტის შენობამდე, სადაც „ქალთა მოძრაობის” წევრები წარმოადგენენ, თუ როგორ ხედავენ ისინი ქალთა გააქტიურებას პოლიტიკაში. აქციას ბათუმიც შეუეთდება. ქალთა უფლებების მხარდამჭერები ბათუმში ვარდების სკვერში შეიკრიბებიან.

რვა მარტს აქცია თბილისში, გუდიაშვილის სკვერში დასრულდება, სადაც სხვადასხვა სფეროში დასაქმებული ქალების მიერ შექმნილი პროდუქციის გამოფენა-გაყიდვა გაიმართება.

დეპუტატების ფრაქციიდან გარიცხვაზე „ქართულ ოცნებას“ არ უმსჯელია

მას შემდეგ, რაც „ქართული ოცნების“ წევრებმა – სვეტლანა კუდბამ და ჯემალ ფუტკარაძემ „ნაციონალური მოძრაობის“ წევრებთან ერთად ხმა მისცეს უმაღლესი საბჭოს თავმჯდომარის მოადგილის დავით ბაციკაძის და საფინანსო-საბიუჯეტო კომისიის თავმჯდომარის ალექსანდრე ჩიტიშვილის თანამდებობიდან გადაყენებას, ფრაქცია „ქართულ ოცნებაში“ განაცხადეს, რომ ამ დეპუტატების ჯერ ფრაქციიდან, შემდეგ კი პარტიიდან გარიცხვის საკითხიც განიხილებოდა.

ფრაქცია „ქართულ ოცნებას“ დეპუტატების ფრაქციაში დარჩენა-არდარჩენის საკითხზე 23 თებერვალს უნდა ესმჯელა, თუმცა ეს საკითხი ფრაქციას დღემდე არ განუხილავს.

„საღი აზროვნების შემთხვევაში ფრაქციაში უნდა დავრჩეთ, მაგრამ არა მგონია, დაგვტოვონ“ – თქვა სვეტლანა კუდბამ „ბათუმელებთან“ საუბარში.

დეპუტატი ამბობს, რომ მას ფრაქციაში დარჩენის სურვილი აქვს: „რა თქმა უნდა მინდა, რომ რაღაც ცვლილებები შევიტანო და ახალი ხედვა შევთავაზო პარტიას. რა არის ამაში ცუდი?“ – ამბობს ის.

მისი თქმით, კოლეგების წინასწარგანწყობა მის მიმართ არ არის მტრული, „მაგრამ გულში რა აქვთ, ამას ვერ გავიგებ. თუმცა, პარტიაში ყოფნისას პარტიულ დისციპლინას უნდა დაემორჩილო, თავისუფლება კი არასდროს არ არის ცუდი“.

საჩუქარი 64 დედას ქედაში

ფასიანი საჩუქარი ქედაში მცხოვრებ 64 ქალს გადაეცა. საჩუქრების გადაცემის შემდეგ ქედის კულტურის ცენტრის ორგანიზებით დედისა და ქალთა დღისადმი მიძღვნილი ღონისძიება გაიმართა.

საჩუქრების გადაცემა დედებისთვის ქედის მუნიციპალიტეტის გამგეობის განათლების, კულტურის, სპორტის, ტურიზმის, ახალგაზრდულ საკითხთა და ძეგლთა დაცვის სამსახურის 2015 წლის მიზნობრივი პროგრამის ფარგლებში განხორციელდა. საჩუქრების შესაძენად ადგილობრივი ბიუჯეტიდან 1 400 ლარი გამოიყო.

გახდება თუ არა ჯემალ ფუტკარაძე ვიცე-სპიკერი?

„ქალბატონმა სვეტლანამ დააყენა წინადადება, რომ თავმჯდომარის მოადგილის თანამდებობაზე ფრაქცია „ქართული ოცნების“ სახელით ჯემალ ფუტკარაძის კანდიდატურა წამოეყენებინათ და ჩვენც დავუჭერდით მხარს, მაგრამ „ქართული ოცნება“ დღეს უმაღლეს საბჭოში ვერანაირ გადაწყვეტილებას ვერ იღებს. სულ მოლოდინის რეჟიმში არიან და რას ელოდებიან არ ვიცი“ – განაცხადა მედეა ვასაძემ.

მისი თქმით, ფრაქცია „ქართული ოცნება“ ფაქტობრივად პარალიზებულია და გადაწყვეტილებების მიღება უჭირს: „ვაკანსიების საკითხი სხდომაზე აუცილებლად გავა, რადგან საფინანსო-საბიუჯეტო კომისიასაც სჭირდება თავმჯდომარე“ – აღნიშნა მედეა ვასაძემ.

მისივე თქმით, ხვალ კანდიდატების წარდგენის ბოლო ვადაა: „თვითონ წამოაყენონ კანდიდატურა და ჩვენ შევხედავთ. რეგლამენტის მიხედვით მათ ამისთვის ათდღიანი ვადა ჰქონდათ. კანდიდატების წარდგენის ბოლო ვადა არის ხვალ“.

ბიუროს სხდომაზე ორი კომისიის – საფინანსო-საბიუჯეტო და თვითმმართველობისა და აგრარულ საკითხთა გაერთიანების საკითხიც დაისვა, თუმცა, როგორც მედეა ვასაძე ამბობს, ეს საკითხი ჩავარდა.

ბიუროს სხდომაზე საბიუჯეტო საკითხებიც განიხილეს.

თავისუფლების აღკვეთის დაწესებულებებში 300-მდე ქალია

2015 წლის იანვარში მსჯავრდებული იყო 13 არასრულწლოვანი, რომელთაგან 11 ვაჟი იყო, ხოლო 2 გოგონა.

მიმდინარე წლის იანვრის თვეში პირობით მსჯავრდებულთა რესოციალიზაციაში ჩართული იყო 60 სრულწლოვანი ქალი [საზოგადოებრივ-კულტურულ საქმიანობაში] ხოლო სისხლისსამართლებრივ პასუხისმგებლობას განარიდეს 5 არასრულწლოვანი ქალი.

2015 წლის იანვრის თვეში, პრობაციის ეროვნული სააგენტოს ხელშეწყობით თბილისის, შიდა ქართლის, მცხეთა-მთიანეთის, ქვემო ქართლის, კახეთის, სამცხე-ჯავახეთის, იმერეთის, გურიის, სამეგრელო ზ/სვანეთის, რაჭა-ლეჩხუმისა და ქ/სვანეთისა და აჭარის რეგიონებში განხორციელებული საგანმანათლებლო პროგრამების, საზოგადოებრივ-კულტურული საქმიანობის, სარეაბილიტაციო და სამკურნალო პროგრამების, განრიდებულთა შეფასებისა და დასაქმების ღონისძიებები სულ 709 პირობით მსჯავრდებულისთვის მოქმედებდა.

საქართველოს პრეზიდენტმა დედის დღესთან დაკავშირებით 2 მარტს 8 მსჯავრდებული ქალი შეიწყალა

პერსონალური მონაცემები – საჯარო და კერძო დაწესებულებებს შეამოწმებენ

ინსპექტირების წესის მიხედვით, ინსპექტირება შეიძლება ემსახურებოდეს რომელიმე ან რამდენიმე ამოცანის გადაწყვეტას, მაგალითად, პერსონალურ მონაცემთა დამუშავების საფუძვლის/საფუძვლების არსებობის დადგენას; პერსონალურ მონაცემთა დაცვისათვის მიღებული პროცედურებისა და ორგანიზაციული და ტექნიკური ზომების „პერსონალურ მონაცემთა დაცვის შესახებ“ საქართველოს კანონით განსაზღვრულ მოთხოვნებთან შესაბამისობის შემოწმებას; პერსონალურ მონაცემთა სხვა სახელმწიფოსა და საერთაშორისო ორგანიზაციისათვის გადაცემის კანონიერების შემოწმებას; ბიომეტრიულ მონაცემთა დამუშავების, ვიდეოთვალთვალის განხორციელების კანონით განსაზღვრულ მოთხოვნებთან შესაბამისობის შემოწმებას და სხვ.

დაწესებულებების შემოწმების მიზნით ხდება გეგმიური ინსპექტირება, თემატური ინსპექტირება ან არაგეგმიური (მიზნობრივი) ინსპექტირება. არაგეგმიური ინსპექტირება არის „პერსონალურ მონაცემთა დაცვის შესახებ“ საქართველოს კანონის სავარაუდო დარღვევის ფაქტის საფუძველზე დაწყებული შემოწმება, რომელიც ხორციელდება ერთეული ან რამდენიმე ორგანიზაციის მიმართ.

თუ ინსპექტორი, კონკრეტული საქმის გარემოებებიდან გამომდინარე, სხვაგვარად არ გადაწყვეტს, ინსპექტირებას ატარებს პერსონალურ მონაცემთა დაცვის ინსპექტორის აპარატის ინსპექტირების დეპარტამენტის თანამშრომელი ან თანამშრომელთა ჯგუფი.

გამონაკლის შემთხვევებში, ინსპექტირების ჯგუფში გარე პირის შეყვანა ხორციელდება ინსპექტორის გადაწყვეტილებით, როდესაც ინსპექტირება მოითხოვს ისეთ ცოდნას, გამოცდილებას ან უნარ–ჩვევებს, რომელიც პერსონალურ მონაცემთა დაცვის ინსპექტორის აპარატში არ მოიპოვება და მათ გარეშე ინსპექტირების წინაშე დასმული ამოცანის/ამოცანების გადაჭრა ობიექტურად შეუძლებელია. გარე პირის ინსპექტირების ჯგუფში მუშაობის წესი და პირობები განისაზღვრება მასთან დადებული ხელშეკრულებით.

თუ ინსპექტირების შედეგად აღმოჩენილია „პერსონალურ მონაცემთა დაცვის შესახებ“ საქართველოს კანონის დარღვევა/დარღვევები, ინსპექტორი, მათი მასშტაბისა და ხასიათის გათვალისწინებით, უფლებამოსილია მიიღოს კონკრეტული გადაწყვეტილებები. მათ შორის:

მოითხოვოს დარღვევისა და მონაცემთა დამუშავებასთან დაკავშირებული ნაკლოვანებების მითითებული ფორმით და მითითებულ ვადაში გამოსწორება; მონაცემთა დამუშავების დროებით ან სამუდამოდ შეწყვეტა; მონაცემთა დამუშავების შეწყვეტა, მათი დაბლოკვა, წაშლა განადგურება ან დეპერსონალიზაცია, თუ მიიჩნევს, რომ მონაცემების დამუშავება ხორციელდება კანონის საწინააღმდეგოდ; ასევე მოითხოვოს მონაცემთა სხვა სახელმწიფოსა და საერთაშორისო ორგანიზაციისათვის გადაცემის შეწყვეტა, თუ მათი გადაცემა ხორციელდება კანონის მოთხოვნათა დარღვევით; ადმინისტრაციული სამართალდარღვევის გამოვლენის შემთხვევაში, შეადგინოს ადმინისტრაციული სამართალდარღვევის ოქმი და შესაბამისად მონაცემთა დამმუშავებელს ან უფლებამოსილ პირს დააკისროს ადმინისტრაციული პასუხისმგებლობა კანონით დადგენილი წესით.

ინსპექტირების პროცესი შეიძლება მოიცავდეს შემდეგი საშუალებების გამოყენებას: ინფორმაციის ან დოკუმენტის გამოთხოვა; შეხვედრა ორგანიზაციის მენეჯმენტთან; ადგილზე შემოწმება; ზეპირი განხილვა; განმეორებითი ინსპექტირება.

ინსპექტირებაში ჩართული ნებისმიერი პირი ვალდებულია დაიცავს ინსპექტირების პროცესში მიღებული დოკუმენტების, მტკიცებულების, გადაწყვეტილების, მონაწილე მხარეთა ვინაობისა და სხვა ინფორმაციის კონფიდენციალობა, თუ კანონით სხვა რამ არ არის დადგენილი.

ინსპექტირების ფარგლებში განხორციელებული ყველა ქმედება, ინსპექტირების დეპარტამენტის გადაწყვეტილებით, შესაძლებელია ჩაიწეროს აუდიოჩაწერის ტექნიკური საშუალებების გამოყენებით.

ინსპექტირების პროცესში დანაშაულის ნიშნების აღმოჩენის შემთხვევაში, ინსპექტირებაში მონაწილე აპარატის თანამშრომელი დაუყოვნებლივ აცნობებს ინსპექტორს, რომელიც თავის მხრივ ვალდებულია შეატყობინოს უფლებამოსილ სახელმწიფო ორგანოს.

თამარ ქალდანი [პერსონალურ მონაცემთა დაცვის მდგომარეობის პირველი ანგარიშის წარდგენა]

ომში დაღუპულთა ოჯახებს ათას ლარს გადასცემენ

აჭარის ჯანდაცვის მინისტრი, დღეს აგვისტოს ომში დაღუპული ედნარ დიასამიძის მეუღლეს და ორ შვილს მოინახულებს. ათასლარიან საჩუქარს აჭარაში 22 ოჯახი მიიღებს.

აღნიშნული თანხა დაღუპულთა ოჯახებს პირად ანგარიშზე ჩაერიცხებათ.

ყვავილები დედის დღეს ბათუმის ქუჩებში

ბევრი მათგანი ფოტოობიეტივში მოხვედრას ერიდება: „ვინმე მნახავს და დამცინებს, ქუჩაში ვზივარ“.

დღეს ბათუმის ქუჩებში რამდენიმე სკოლის მოსწავლეც ყიდის ყვავილებს, ისინი ამბობენ, რომ სოციალურად დაუცველი ოჯახებიდან არიან.

ერთ-ერთმა ქალმა დღეს გასაყიდი ყვავილები სამ შვილს გაუნაწილა და სხვადასხვა ადგილზე დააყენა: „ასე უფრო მეტს გავყიდით“. ქალმა „ბათუმელებს“ უთხრა, რომ მატერიალურად უჭირს და მთავრობის დახმარების იმედი არ აქვს.

ანი სკოლის მოსწავლეა, ის დედას ეხმარება

„ისე გადაიღე არავინ მიცნოს“

ემინე დიასამიძე სოფლიდან ყვავილების გასაყიდად ჩამოვიდა

ბატონი გურამი ყვავილებს მეუღლისთვის ყიდულობს

იამზე ცისკარაძე

ბათუმში 80 ქალი შესაძლოა უმუშევარი დარჩეს

სამკერვალო ფაბრიკა რომელიც შპს „ბათუმიტექსს“ ეკუთვნის, „მარკ სპენსერის“ და სხვა ფირმების მამაკაცის პერანგებს ორი წელია კერავს. როგორც ფაბრიკის პროფკავშირების თავმჯდომარე ჩიტო ანთაძე „ბათუმელებთან“ საუბარში აცხადებს, დამკვეთს პერანგების განყოფილება სხვა ქვეყანაში გადააქვს:

„მამაკაცის პერანგები ამ ფაბრიკაში უკვე მეორე წელია იკერება. ინჟინერი ვარ და მკერავები მე თვითონ გადავამზადე, ძალიან კარგი სპეციალისტები გვყავს და დამკვეთიც კმაყოფილი იყო ნამუშევრით, თუმცა ეს განყოფილება ორი წლის წინ ბულგარეთიდან გადმოიტანეს და როგორც ჩანს, ახლაც იქ უნდათ გადატანა“- გვეუბნება ჩიტო ანთაძე.

პროფკავშირების თავმჯდომარის თქმით, ფაბრიკის ადმინისტრაცია თანამშრომლების შენარჩუნებას ცდილობს, თუმცა საბოლოო გადაწყვეტილება ცნობილი არ არის. ჩიტო ანთაძე ამბობს, რომ ის შეეცდება არ დაირღვეს დასაქმებულთა უფლებები.

„ბევრი წევრი არ მყავს, მაგრამ ჩემი ვალდებულებაა მათი უფლებები დავიცვა. კანონის მიხედვით, როცა სამკერვალო უბნის ლიკვიდაცია ხდება, დასაქმებულებს წინასწარ ორი თვის ხელფასი უნდა მიეცეს. ადმინისტრაცია ცდილობს, რომ კარგი მკერვები შეინარჩუნოს, მაგრამ ვინ წავა და ვინ არა, ამაზე გადაწყვეტილება ჯერ მიღებული არ არის“.

პროფკავშირების თავმჯდომარის თქმით ფაბრიკაში 580 ქალია დასაქმებული, აქედან 80 ქალი მამაკაცის პერანგების განყოფილებაში მუშაობს, მათ ორწლიანი კონტრაქტი აქვთ გაფორმებული. მკერავები ანაზღაურებას გამომუშავებით იღებენ, მათი საშუალო ხელფასი 300 ლარია.

შესაძლო ცვლილებები მასწავლებლებისთვის ახალდამტკიცებულ რეგულაციებში

მასწავლებლის მხრიდან დისციპლინურ გადაცდომად მიიჩნევა: „მასწავლებლის პროფესიული ეთიკის კოდექსის“ დარღვევა; საჯარო სკოლის შინაგანაწესის, წესდების შეუსრულებლობა; სკოლის ან მის მიმდებარე ტერიტორიაზე ალკოჰოლის, ნარკოტიკული ან სხვა ტოქსიკური საშუალებების მიღება, ასევე სკოლის ტერიტორიაზე თამბაქოს მოხმარება და ა.შ. ხოლო დისციპლინური სახდელის ფორმებად შენიშვნა; საყვედური; სასტიკი საყვედური და სამსახურიდან გათავისუფლება განისაზღვრა.

პედაგოგთა და მეცნიერთა თავისუფალი პროფკავშირის პრეზიდენტი მაია კობახიძე ამბობს, რომ პედაგოგთა პროფესიული კავშირი მთლიანობაში არ ეწინააღმდეგება მასწავლებელთა მიმართ დისციპლინური წარმოების გარკვეულ რეგულაციებში მოქცევას, რადგან „იგი დირექტორს უზღუდავს დისციპლინურ სახდელებთან დაკავშირებით გადაწყვეტილების ერთპიროვნულად მიღების უფლებას“. თუმცა, ამავე დროს მიიჩნევს, რომ რეგულაციებში არსებობს ხარვეზები, რომლებიც აუცილებლად უნდა გამოსწორდეს.

მაია კობახიძის თქმით, ყველაზე დიდი უკმაყოფილება დებულების იმ ნაწილმა გამოიწვია, რომელიც პედაგოგის სკოლის გარეთ ჩადენილ ქმედებას არეგულირებს: „მე-3 მუხლის მე-6 პუნქტის თანახმად, „დაუშვებელია მასწავლებლისთვის დისციპლინური სახდელის დაკისრება იმ ქმედებისთვის, რომელიც მან ჩაიდინა სკოლისგან თავისუფალ დროს, ან სკოლის ტერიტორიის გარეთ“, – რასაც ჩვენც ვეთანხმებით. მაგრამ ამას აქვს გაგრძელება – „გარდა იმ შემთხვევებისა, როდესაც სკოლას აქვს დასაბუთებული ინტერესი“: ეს ტერმინი ბუნდოვანია და იგი დასაბუთებას მოითხოვს, ვინაიდან სკოლის გარე ტერიტორიად შეიძლება ჩაითვალოს მხოლოდ ის შემთხვევა, როდესაც სკოლის გარეთ მასწავლებელი სამსახურებრივ მოვალეობას აგრძელებს, სხვა შემთხვევაში მასწავლებლის დისციპლინური დევნა ადამიანის ფუნდამენტური უფლებების დარღვევაა, ეს შესაძლოა მის პირად ცხოვრებას შეეხოს“, – ამბობს ის.

მაია კობახიძე მიიჩნევს, რომ სიტყვები „დასაბუთებული ინტერესი“ ბუნდოვანია და მან შესაძლოა დამსაქმებელს ან სხვა დაინტერესებულ პირს ინტერპრეტირების საშუალება მისცეს, რის გამოც ეს ნაწილი ან უნდა ამოიღონ დებულებიდან, ან უნდა განიმარტოს, თუ რა შეიძლება ჩაითვალოს სკოლის გარეთ დისციპლინურ დარღვევად. „ბრძანებაში განსაზღვრულია დისციპლინური გადაცდომები და იქვე არის შინაგანაწესის მოთხოვნების დარღვევა, ამდენად ეს უფრო ფართო ცნებაა და სკოლის გარეთ სკოლის შინაგანაწესის დარღვევა არ უნდა ჩაითვალოს დისციპლინურ გადაცდომად“, – ამბობს ის.

პროფკავშირის რეკომენდაციით, ზოგადად, ეს ბრძანება კერძო სკოლებსაც უნდა შეეხოს, რადგან ისინი სახელმწიფოს მხრიდან ვაუჩერულ დაფინანსებას იღებენ და, შესაბამისად, საერთო სტანდარტებსაც უნდა აკმაყოფილებდნენ.

მასწავლებლის მიმართ დისციპლინური წარმოება მას შემდეგ დაიწყება, თუ მასწავლებლის წინააღმდეგ საჩივარი შევა სკოლაშივე არსებულ დისციპლინურ კომიტეტში. ბათუმის საჯარო სკოლებში ასეთი შემთხვევა ჯერ არ დაფიქსირებულა.

ბათუმის #7 საჯარო სკოლის მასწავლებელი თინა კვიტაიშვილი მიიჩნევს, რომ დისციპლინურ გადაცდომებთან დაკავშირებული რეგულაციების ზოგიერთი ნაწილი ზედმეტად მკაცრია და ეთანხმება პროფკავშირების რეკომენდაციას „დასაბუთებული ინტერესის“ განმარტებასთან დაკავშირებით: „ეს ნაწილი ნამდვილად გაუგებარია და შესაძლოა გარკვეული სირთულეებიც შექმნას. მართალია, არსებობს ზემდგომი ორგანო, სადაც შეიძლება კომიტეტის გადაწყვეტილება გაასაჩივრო, მაგრამ ეს კიდევ ზედმეტ უსიამოვნებებთან არის დაკავშირებული. კარგი იქნება, თუ თავიდანვე ავიშორებთ ამას და განმარტავენ, თუ რა იგულისხმება „დასაბუთებულ ინტერესში“. სკოლის გარეთ პირად ცხოვრებას არ უნდა ეხებოდეს ეს დებულება. ფაქტობრივად, კუთხეში მიგვაყენეს და ეს არის“.

ბრძანებიდან ტერმინის – „დასაბუთებული ინტერესის“ ამოღების მომხრეა ბათუმის #8 საჯარო სკოლის მასწავლებელი ლალი ქორიძეც, რომელიც მიიჩნევს, რომ ეს ნაწილი შესაძლოა დამსაქმებლის მიერ ბოროტად იქნეს გამოყენებული, თუკი მას რაიმე პირადი ინტერესი აქვს კონკრეტული პედაგოგის მიმართ. `მაშინ, როცა დაკონკრეტებულია მასწავლებლის მიერ გადაცდომები სკოლასა და სკოლის გარეთ, ასევე უნდა დააკონკრეტონ რას ნიშნავს ეს `დასაბუთებული ინტერესი~ სკოლაში თუ მის საზღვრებს გარეთ“, – ამბობს ის.

საქართველოს განათლების მინისტრის მოადგილის, ლია გიგაურის თქმით, არც ერთი დოკუმენტი არ არის დოგმა და განხილვის შედეგად შესაძლებელია გარკვეული ცვლილებები ამ დოკუმენტშიც შევიდეს.

პედაგოგთა და მეცნიერთა პროფკავშირი მათ მიერ შედგენილ რეკომენდაციებს განათლების სამინისტროს რამდენიმე დღეში წერილობითი სახითაც წარუდგენს.

მარინა გიორგაძე: რატომ უნდა ამირჩიონ უნივერსიტეტის რექტორად

ბათუმის მერის კომენტარი მურმან დუმბაძის ბიუროს სავარაუდო გასახლებაზე

„რა იგეგმება მე არ ვიცი, მაგრამ კანონის მოთხოვნა თუ იქნება, კანონი უნდა დავიცვათ. ჯერჯერობით ამ საკითხით ნამდვილად არ დავინტერესებულვარ. ბათუმში არ ვარ და როცა ჩამოვალ, ამ საკითხით აუცილებლად დავინტერესდები“.

როგორც გიორგი ერმაკოვი ამბობს, მურმან დუმბაძის ბიუროს მერიიდან გასახლებაზე მერის განკარგულება არ ყოფილა.

ბათუმის მაჟორიტარის საქართველოს პარლამენტში და პარლამენტის ვიცე-სპიკერის მურმან დუმბაძის და ბათუმის მაჟორიტარის აჭარის უმაღლეს საბჭოში აკაკი ძნელაძის ბიუროები ბათუმის მერიის შენობაში, 2012 წლის საპარლამენტო არჩევნების შემდეგ განთავსდა.

მერიის შენობაში იყო განთავსებული წინა მოწვევის პარლამენტის მაჟორიტარების ბიუროებიც.