Batumelebi

ბათუმში, ე.წ. ოცნების ქალაქის დასახლებაში მოსახლეობის ნაწილს ელექტროენერგია 26 სექტემბრის საღამოს 11:30 საათის შემდეგ არ მიეწოდება. ადგილზე მცხოვრებთა თქმით, ცეცხლი წუხელ ტრანსფორმატორს გაუჩნდა.

„ენერგო-პრო ჯორჯიას“ პრესსამსახურში „ბათუმელებს“ უთხრეს, რომ ელექტროენერგიის გარეშე ამ დროისთვის მხოლოდ ათი აბონენტია დარჩენილი. „ოცნების ქალაქში“ კი ამბობენ, რომ შუქი მთლიან დასახლებას არ მიეწოდება.

„ოცნების ქალაქთან“ „ენერგო-პროს“ ოფიციალურად რამდენიმე აბონენტი ჰყავს დარეგისტრირებული, დასახლებაში მცხოვრებლებს კი იმ ტრანსფორმატოროდან გვაქვს შუქი გადაყვანილი, სადაც ცეცხლი გაჩნდა,“ – გვითხრეს „ოცნების ქალაქში“.

„ავარიული დაზიანება იყო სატრანსფორმატორო პუნქტში. მზადაა შესაბამისი მასალები და დენის მიწოდება მაქსიმუმ, დღის 4 საათამდე აღდგება“, – აღნიშნეს „ენერგო-პრო ჯორჯიაში“.

საქართველოს ფინანსთა სამინისტროს ინფორმაციით, საგამოძიებო სამსახურმა ყალბი დოკუმენტების გამოყენებით, დიდი ოდენობით სახელმწიფო ქონების მოტყუებით დაუფლების ფაქტზე  ერთი მეწარმე პასუხისგებაში მისცა.

„გამოძიებით დადგინდა, რომ დანაშაულში მხილებულ პირს, ერთ-ერთი ინდივიდუალური საწარმოს ხელმძღვანელს, 2018 წელს, სამეგრელო-ზემო სვანეთის რეგიონის ორ მუნიციპალიტეტში,  სკოლამდელი აღზრდის გაერთიანებაში  შემავალი საბავშვო ბაღებისთვის სხვადასხვა სახის პროდუქტი, მათ შორის კარაქი უნდა მიეწოდებინა.

ბრალდებულმა, უკანონო მატერიალური სარგებლის მიღების მიზნით, გაყალბებული დოკუმენტებისა და კარაქის შესაფუთი მასალის გამოყენებით, საბავშვო ბაღებში  კარაქის ნაცვლად   იაფფასიანი სპრედი შეიტანა და მოტყუებით დაეუფლა სახელმწიფოს კუთვნილ დიდი ოდენობით თანხას,“-ნათქვამია საგამოძიებო სამსახურის განცხადებაში.

ოფიციალური ინფორმაციით, საქმეზე გრძელდება გამოძიება საქართველოს სისხლის სამართლის კოდექსის 180-ე მუხლის მესამე და 210-ე მუხლის პირველი ნაწილებით, რაც სასჯელის სახით ითვალისწინებს თავისუფლების აღკვეთას 6-დან 9 წლამდე ვადით.

საქართველოს ფინანსთა სამინისტროს საგამოძიებო სამსახურის ინფორმაციით,  მიმდინარე წლის განმავლობაში, გატარებული ოპერატიულ-სამძებრო ღონისძიებებისა და საგამოძიებო მოქმედებების შედეგად, მეწარმე სუბიექტების მხრიდან საგადასახადო ვალდებულებებისგან თავის არიდების მიზნით თვალთმაქცური გარიგებით, ქონების გადამალვის 28  ფაქტი გამოვლინდა.

„გამოძიების პროცესში მოპოვებული უტყუარი მტკიცებულებების საფუძველზე დადგინდა, რომ ზემოხსენებული მეწარმე სუბიექტები, რომლებსაც ჩატარებული საგადასახადო შემოწმებებისა და ინვენტარიზაციის შედეგად, ბიუჯეტის სასარგებლოდ ერიცხებოდათ დიდი ოდენობით თანხები, საგადასახადო ვალდებულებისგან თავის არიდების მიზნით, თვალთმაქცური და მოჩვენებითი გარიგების გზით, სისტემატურად ახორციელებდნენ მათზე რიცხული ქონების ოჯახის წევრებისა და ახლობლების სახელზე ფიქტიურად რეგისტრირებულ საწარმოებზე გასხვისებას. აღნიშნული ქმედების შედეგად, საგადასახადო ორგანოები  ვეღარ ახდენდნენ ბიუჯეტის სასარგებლოდ დარიცხული გადასახადების და ჯარიმების იძულების წესით ამოღებას,“ – აცხადებენ საგამოძიებო სამსახურში.

საგამოძიებო სამსახურის თანამშრომლებმა, აღნიშნული დანაშაულებრივი ქმედების ბრალდებით, საქართველოს სისხლის სამართლის კოდექსის 205¹ მუხლით 28 მეწარმე სუბიექტი პასუხისგებაში მისცა.

ბათუმში, აბუსერიძისა და აღმაშენებლის ქუჩების კვეთაში, წრიულთან მდებარე კაფეში ხანძარი გაჩნდა. ადგილზე მისულმა მეხანძრეებმა ცეცხლის ჩაქრობა რამდენიმე წუთში მოახერხეს.

ცეცხლი კაფეს სამზარეულოში, სავარაუდოდ, გაზქურას გაუჩნდა. დამწვარია საყოფაცხოვრებო ტექნიკა და ინვენტარი. შემთხვევის ადგილზე მეხანძრეები და პოლიციელები ამ წუთებშიც მუშაობენ.

სწრაფი კვების ობიექტში, რომელიც აბუსერიძის ქუჩაზე, ორსართულიანი სახლის პირველ სართულზეა განთავსებული, ხანძარი დღეს, 27 სექტემბერს, დაახლოებით დილის 9 საათზე გაჩნდა.

ლოიდ ოჰონლონი 26 წლის ავსტრალიელია, რომელმაც ქართული ხალხური სიმღერები პირველად მშობლიურ ქალაქ მელბურნში მოისმინა და გადაწყვიტა, რომ ქვეყანა, სადაც ეს მრავალხმიანი სიმღერები დაიბადა, აუცილებლად უნდა ენახა. ასე აღმოჩნდა საქართველოში. ბოლო ერთი წელია ლოიდი საქართველოში, ქედაში, სოფელ მერისში ცხოვრობს და ქართულადაც საუბრობს:

„ჩემს ქალაქში, მელბურნში ათი ქართველი ცხოვრობს, გავიცანით ცოლ-ქმარი, სოსო ჟორდანია და ნინო ციციშვილი, ორივე მელბურნის უნივერსიტეტში კითხულობს ლექციებს, სოსო ნოე ჟორდანიას ნათესავია. მათგან ვიცოდით ქართული ფოლკლორის შესახებ, მაგრამ მერე ჩემმა ძმამ უნივერსიტეტის ვორქშოპებზე ცოცხლად მოისმინა ქართული ხალხური სიმღერები, მოვიდა სახლში და მიყვებოდა, თუ რა საოცარ კონცერტზე იყო. მახსოვს, ცდილობდა ემღერა ერთ ხმაში, მაგრამ ასე მაშინ ვერაფერს მივხვდი, მერე მეც დავესწარი კონცერტებს და მივხვდი, რომ უნდა მემოგზაურა აუცილებლად ქვეყანაში, სადაც ამ სიმღერებს მღეროდნენ.

პროფესიით მებაღე ვარ, მაგრამ სიმღერა მიყვარს და გამომდის. აღმოჩნდა, რომ მელბურნში ავსტრალიელებისა და ქართველებისგან შემდგარი ქართული ხალხური სიმღერების სამი გუნდია, მათ დავუკავშირდი, მალე პოლიფონიური მუსიკის სიმპოზიუმი დაიგეგმა, რომლის ფარგლებშიც საქართველოში წამოვედი მუსიკით დაინტერესებულ მეგობრებთან ერთად 2014 წლის ოქტომბერში, მაშინ აქ ერთი კვირით დავრჩით“ – ყვება ლოიდი.

პირველად ბათუმში ჩამოვიდა, მერე მთიანი აჭარის ტურისას მერისი მოინახულა და ჯემალ თურმანიძის საოჯახო სასტუმროში დარჩა. ეს ოჯახი გარდა სასტუმრო მომსახურებისა, მუსიკით დაინტერესებულ ტურისტებს ფოლკლორის გაკვეთილებსაც სთავაზობს და ხალხურ სიმღერებსა და ცეკვებს ასწავლის. ლოიდისთვის ეს სასიამოვნო აღმოჩენა იყო. აქ მოისმინა პირველად მერისული სიმღერები და „ჩაღმა ჩაყრილო ვენახო“ მალე მის საყვარელ სიმღერად იქცა.

საქართველოში 2014 წლის შემდეგ ორჯერ ჩამოვიდა. ჯემალ თურმანიძის ოჯახში, აჭარის სოფელ მერისში, სადაც უკვე ერთი წელია ცხოვრობს, საკუთარ შვილად თვლიან. სწავლობს ცეკვებს, სიმღერებს და მერისის ფოლკლორულ ანსამბლთან ერთად „ქედელობაზეც“ აპირებს სიმღერას.

„აქ ჩემთვის ყველაფერი საინტერესოა“ – ყვება ლოიდი, „ოჯახის ყოველდღიური საქმიანობა, სასოფლო-სამეურნეო სამუშაოები, ხან სიმინდს ვტეხთ, ხან არაყს ვხდით ერთად, ბოსტანში და ყანაშიც ერთად ვმუშაობთ, ყოველთვის მეუბნებიან, რომ სტუმარი ვარ და არ არის საჭირო შრომა ჩემთვის, მაგრამ როგორ?!

საკუთარი ბოსტანი რომ გაქვს და ყანა, ეს მელბურნში წარმოუდგენელია, იქ ყველა სუპერმარკეტში ყიდულობს ყველაფერს, აქ ყველაფერი, რაც გჭირდება ეზოშივე გაქვს“ – ამბობს ლოიდი და ავსტრალიურ ცხოვრებაზეც ყვება: „ახალი ქვეყანა გვაქვს, ავსტრალიაში  სხვადასხვა კონტინენტიდან ჩამოსული ადამიანები ცხოვრობენ, ჩემი წინაპრები ავსტრალიაში ირლანდიიდან ჩამოვიდნენ. ტრადიციებიც დაგვიგროვდა, ჩვენი ტრადიციული კერძი მაგალითად ნივრით, მარილითა და წითელი ღვინით შეზავებული კენგურუს მწვადია. ავსტრალიაში კენგურუს ბევრი ფერმაა. ყველაზე იაფი ავსტრალიაში კენგურუს ხორცია“.

ლოიდის საქართველოში ხშირი სტუმრობის მიზეზი მარტო მუსიკა არ არის, ქართველი შეყვარებული ჰყავს, რომელიც თბილისში გაიცნო. ამბობს, რომ მისი სამომავლო გეგმები ორ ქვეყანას: ავსტრალიასა და საქართველოს უკავშირდება, რადგან გოგო, რომელიც უყვარს საქართველოში ცხოვრობს, მისი მშობლები და მეგობრები კი ავსტრალიაში.

ოქტომბრის ბოლოს ავსტრალიიდან 25 კაციანი ჯგუფი ჩამოდის, ლოიდის მსგავსად მათაც ქართული ხალხური სიმღერები უნდა შეისწავლონ ჯემალ თურმანიძის ოჯახში, სოფელ მერისში. სანამ ლოიდის მეგობრები მერისში ჩამოვლენ, 26 წლის ავსტრალიელი ახალ სიმღერებს სწავლობს და ხანდახან კუბურ სიმღერებსაც მღერის აჭარის მთებში.

ბათუმის მერია იმ შენობების რეაბილიტაციას იწყებს, რომლებსაც კულტურული მემკვიდრეობის უძრავი ძეგლის სტატუსი აქვთ. ამ ეტაპზე ხუთი შენობის რეაბილიტაციაა დაგეგმილი. სარეაბილიტაციო ძეგლების ნუსხა ბათუმის მერიას აჭარის კულტურის სამინისტრომ გადასცა. მერიაში ამბობენ, რომ პროექტები, რომელთა მიხედვითაც ძეგლებზე სამუშაოები უნდა ჩატარდეს, სამინისტრომ შეისყიდა.

„ჩვენ გადმოგვცეს ძეგლების ჩამონათვალი [პროექტებთან ერთად], რომელთა რეაბილიტაციას პრიორიტეტების მიხედვით ეტაპობრივად განვახორციელებთ. პირველ ეტაპზე ის სახლი შეირჩა, რომელიც ბათუმში, ზუბალაშვილის N38-ში მდებარეობს,“ – გვითხრეს მერიის ა(ა)იპ საქალაქო ინფრასტრუქტურისა და კეთილმოწყობის სამმართველოს პრესსამსახურში.

სარეაბილიტაციო ძეგლების ნუსხა:

საქალაქო ინფრასტრუქტურისა და კეთილმოწყობის სამმართველომ ბათუმში, ზუბალაშვილის ქ. N38-ში, მდებარე შენობის რესტავრაცია-რეაბილიტაციის სამუშაოების შესყიდვაზე ტენდერი მიმდინარე წლის სექტემბერში გამოაცხადა თანხით – 601 956 ლარი. მომსახურებას სამმართველოს შპს „იუკონი და კომპანია“ 487 ათას 576 ლარად სთავაზობს. კომპანია ჯერ გამარჯვებულად არ გამოცხადებულა.

საქალაქო ინფრასტრუქტურისა და კეთილმოწყობის სამმართველო დამატებით 10 ათას 726 ლარს გადაიხდის შენობის რესტავრაცია-რეაბილიტაციის სამუშაოების საავტორო ზედამხედველობაზე, რისთვისაც ხელშეკრულებას ტენდერის გარეშე ა(ა)იპ „ძეგლებისა და ღირსშესანიშნავი ადგილების საკითხების საერთაშორისო საბჭოს საქართველოს ეროვნულ კავშირთან“ გააფორმებს. სწორედ ეს კავშირია პროექტის ავტორი, რომლითაც შენობას რეაბილიტაცია ჩაუტარდება.

„პროექტის მიზანია შენობის რეაბილიტაცია-რესტავრაცია და მისი მხატვრულ-არქიტექტურული იერსახის აღდგენით და თავდაპირველი სახის დაბრუნებით. სარესტავრაციო სამუშაოები უნდა ჩატარდეს კულტურული მემკვიდრეობის ძეგლისთვის მისაღები მეთოდოლოგიის გათვალისწინებით.

მიუხედავად იმისა, რომ ისტორიული შენობა უმძიმეს ფიზიკურ მდგომარეობაშია, მას მხატვრული გამომსახველობა არ დაუკარგავს. ისტორიული ფასეულობა განაპირობებს სარეაბილიტაციო სამუშაოებისას რესტავრაციის მეთოდის გამოყენების აუცილებლობას,“ – აღნიშნულია სატენდერო დოკუმენტაციაში.

შენობის სარეაბილიტაციო სამუშაოები ტენდერში გამარჯვებულთან ხელშეკრულების დადებიდან 240 დღეში უნდა დასრულდეს.

დოკუმენტების მიხედვით: „XIX საუკუნის ბოლოს აგებული სახლი დაბალ ცოკოლზე აღმართული L-ის ფორმის ერთსართულიანი შენობაა და ქუჩის პერიმეტრული განაშენიანების ნაწილს წარმოადგენს. ფასადი შელესილია, თეთრად არის შეღებილი და ხუთი მართკუთხა ფორმის ფანჯრით ნაწევრდება. მის მარჯვენა კიდელში ლითონის მოაჯირით მოზღუდული ვერანდაა, რომელიც წინკარის ფუნქციას ასრულებს“:

სარეაბილიტაციო შენობა რამდენიმე მოქალაქის კერძო მფლობელობაშია. საჯარო რეესტრის მონაცემებით, ეს სახლი ამხანაგობა „ქ.ბათუმი,ზუბალაშვილის 38“-ის საკუთრებაა.

მთავარი ფოტო: ბათუმში, ზუბალაშვილის ქ. N38-ში მდებარე შენობა, რომელიც კულტურული მემკვიდრეობის ძეგლია. ფოტო სატენდერო დოკუმენტებიდან

„გაურკვეველია, საკონსტიტუციო სასამართლოს მოთხოვნა სარჩელის ელექტრონული ვერსიის აუცილებლობასთან დაკავშირებით. სად ვნახო კომპიუტერი? იქნებ არც ერთი ადვოკატი არ იღებს საქმეს? მაშინ არ მაქვს სასამართლოსთვის მიმართვის უფლება სამართლიანობისთვის?“ – კითხულობს ბათუმის ციხეში მყოფი პატიმარი, ლეონიდე მიქაბერიძე.

რამდენიმე დღის წინ საკონსტიტუციო სასამართლომ მის სარჩელზე ხარვეზი დაადგინა  – სასამართლომ პატიმარს წარმომადგენლის დანიშვნა და სარჩელის ელექტრონული ვერსია მოსთხოვა.

„ბათუმელებისთვის“ გამოგზავნილ წერილში პატიმარი წერს, რომ მას ფიზიკურად არ აქვს კომპიუტერულ სისტემასთან წვდომის შესაძლებლობა. პატიმარს ხარვეზი სარჩელის სააპლიკაციო ფორმის შევსების კუთხითაც დაუდგინეს.

„გარდა ამისა, ვინაიდან ზოგიერთ პუნქტში არ იყო საკმარისი ადგილი შესავსებად, ფორმას დავურთე დამატებითი გვერდები, რომლებზეც გადავიტანე კონკრეტული პუნქტის სათაურები. შესაბამისად, ჩემთვის გაუგებარია საკონსტიტუციო სასამართლოს მიერ დადგენილი ხარვეზის მიზეზი,“ – წერს პატიმარი.

ლეონიდე მიქაბერიძე 2014 წლიდან იხდის სასჯელს ბათუმის მე-3 დაწესებულებაში. 2017 წლის 14 აგვისტოს მას ბრალი სისხლის სამართლის კოდექსის 378-ე მუხლითაც წაუყენეს, რაც გულისხმობს პენიტენციური დაწესებულების საქმიანობისთვის ხელის შეშლას ან ამ საქმიანობის დეზორგანიზაციას. განსაკუთრებით მძიმე დანაშაულისთვის მსჯავრდებული პირის მიერ ამ მუხლის დარღვევა 10-დან 12 წლამდე თავისუფლების აღკვეთას ითვალისწინებს. ლეონიდე ამ მუხლით გასამართლებული ჯერ არ არის.

სასჯელის ფორმას, ანუ 10-დან 12 წლამდე პატიმრობის არაკონსტიტუციურად მიჩნევას ითხოვს პატიმარი საკონსტიტუციო სასამართლოში, თუმცა მისი სარჩელი ჯერ წარმოებაში არ მიუღიათ.

რა უნდა გააკეთოს პატიმარმა, როცა მას სარჩელის შეტანა სურს სასამართლოში, მაგრამ კომპიუტერთან წვდომა არ აქვს, ან როგორ უნდა დაიქირავოს ადვოკატი? – საკონსტიტუციო სასამართლოს პირველადი სტრუქტურული ერთეულის ხელმძღვანელი, ლიანა ბაგაშვილი განმარტავს, რომ მან პატიმარს წერილი კანონის მოთხოვნების შესაბამისად გაუგზავნა და გამონაკლისი პატიმარი ვერ იქნებოდა.

„არსებობენ არასამთავრობო ორგანიზაციები, რომლებიც მუშაობენ პატიმრების თემებზე… კანონის მოთხოვნაა, რომ უნდა არსებობდეს ელექტრონული ვერსია, რომელიც ხელით შევსებული ვერსიის იდენტური უნდა იყოს. სავალდებულოა ისიც, რომ უნდა ჰყავდეს წარმომადგენელი. შესაბამისად, თუკი ხარვეზი არ გამოსწორდება, ეს სარჩელი რეგისტრაციიდან მოიხსნება,“ – გვითხრა ლიანა ბაგაშვილმა.

„საპატიმრო დაწესებულებაში პატიმარს უნდა ჰქონდეს შესაბამისი კომპიუტერული მოწყობილობის გამოყენების შესაძლებლობა. პატიმარს ასევე უნდა მისცენ შესაძლებლობა, ამობეჭდოს სარჩელი და მას დისკიც დაურთოს. თუ ამის საშუალება არ ეძლევა, მას ადმინისტრაციასთან დავის შესაძლებლობა უნდა ჰქონდეს,“ – მიიჩნევს გიორგი გოცირიძე, „ახალგაზრდა იურისტთა ასოციაციის“ იურისტი.

იურისტის თქმით, კონსტიტუციით არის გარანტირებული სასამართლოსთვის მიმართვის უფლება.

„შესაბამისად, ციხის ადმინისტრაციას შეუძლია მხოლოდ უსაფრთხოების ზომები დაადგინოს, მაგალითად, ის, რომ პატიმარს სარჩელის მომზადების დროს შესაძლოა ინტერნეტთან წვდომის უფლება არ ჰქონდეს,“ – დასძენს გიორგი გოცირიძე.

საია-ს იურისტისთვის სამართლიანია კანონის დათქმა, რომლის მიხედვითაც პატიმარს აუცილებლად უნდა ჰყავდეს წარმომადგენელი.

„საკონსტიტუციო სამართალწარმოება სპეციფიკურია, აქ განიხილება რთული სამართლებრივი საკითხები. ჩვეულებრივ სასამართლოს პირველ ინსტანციაში ფაქტობრივი გარემოებებია მთავარი და ფაქტები პატიმარმა უკეთ იცის, ვიდრე მისმა ადვოკატმა, მაგრამ საკონსტიტუციო სასამართლო წმინდა სამართლებრივ საკითხებს განიხილავს. შესაბამისად, კანონმდებელმა დააწესა მოთხოვნა, რომ პატიმარი იურისტით იყოს წარმოდგენილი მსგავს დავებში,“ – გვითხრა გიორგი გოცირიძემ.

ლეონიდე მიქაბერიძის ინტერესებს საკონსტიტუციო სასამართლოში სავარაუდოდ „ახალგაზრდა იურისტთა ასოციაცია“ დაიცავს.

ციხიდან გამოგზავნილ წერილში ლეონიდე მიქაბერიძე კიდევ ერთი პრობლემის შესახებ ყვება – ხანგრძლივი პაემნის უფლებით სარგებლობა. მან სასჯელაღსრულების სამინისტროს წინააღმდეგ საქმე სასამართლოს სამივე ინსტანციაში მოიგო. ციხის ადმინისტრაცია მას ხანგრძლივი პაემნით სარგებლობის უფლებას იმ მოტივით არ აძლევდა, რომ მას ბრალდებულის სტატუსიც ჰქონდა. კანონის მიხედვით კი, ბრალდებულს ხანგრძლივი პაემნით სარგებლობის უფლება არ აქვს. უზენაეს სასამართლოში დავა პატიმარსა და სამინისტროს შორის 2016 წლის ბოლოს დასრულდა.

ლეონიდე მიქაბერიძემ ხანგრძლივი პაემნის უფლება მიიღო, თუმცა მას სურდა მეუღლეს, დედას და შვილს ერთდროულად შეხვედროდა.

„ხანგრძლივ პაემანზე ერთდროულად შეიძლება იმყოფებოდეს ერთი სრულწლოვანი პირი, რომელსაც დაწესებულებაში არსებული ინფრასტრუქტურის გათვალისწინებით, შეიძლება თან ახლდეს ერთზე მეტი არასრულწლოვანი პირი,“ – სასჯელაღსრულების მინისტრის 2014 წლის ამ ბრძანებასაც ასაჩივრებს პატიმარი. მისი მტკიცებით, ბათუმის ციხის ინფრასტრუქტურა იძლევა ოჯახის რამდენიმე წევრთან ერთდროულად შეხვედრის შესაძლებლობას.

პატიმრის სარჩელი ხანგრძლივი პაემნის სარგებლობის უფლებაზე ბათუმის საქალაქო სასამართლომ წარმოებაში არ მიიღო. მოსამართლე ჯუმბერ ბეჟანიძის შეფასებით: „მოცემული სარჩელის ფარგლებში, სადავოდ გამხდარი N3 პატიმრობის და განსაკუთრებული რისკის თავისუფლების აღკვეთის დაწესებულების ადმინისტრაციის ქმედება [მოქმედება, უმოქმედობა] შესაძლოა გასაჩივრდეს ზოგადი წესით ადმინისტრაციულ ორგანოში [დეპარტამენტის დირექტორთან].“

„სარჩელის ტექსტი გავაგზავნე პარლამენტის წევრებთან, არასამთავრობო ორგანიზაციებთან, სახალხო დამცველთან. მიუხედავად იმისა, რომ სადავოდ ქცეული საკითხი ეხება არა კონკრეტულად ერთ მსჯავრდებულ ლეონიდე მიქაბერიძეს, არამედ ყველა მსჯავრდებულს, რომელთა უკან დგას მათი ოჯახის წევრები, ათიათასობით ადამიანი, ყველამ იგნორირება გაუკეთა ჩემს განცხადებას და არც ერთს ელემენტარულად პასუხიც კი არ მოუწერია… აჭარის უმაღლესი საბჭოს ადამიანის უფლებათა დაცვის კომიტეტის თავმჯდომარე დამპირდა, რომ კომიტეტი განიხილავდა ამ საკითხს, მაგრამ ჯერჯერობით არც მაგ მხრივ არის პროგრესი“.

ბოლოს ლეონიდე მიქაბერიძეს უმაღლესი საბჭოს წევრი ცოტნე ანანიძე 22 აგვისტოს შეხვდა. მაშინ დეპუტატმა თქვა, რომ ხანგრძლივი პაემნის საკითხზე კომიტეტი იმსჯელებდა.

„ჯერ კომიტეტში საკითხი არ განგვიხილავს, კონსულტაციები მიდის… საჭიროების შემთხვევაში, მე შემიძლია მივმართო სასჯელაღსრულების ადმინისტრაციას დამატებითი პაემნის უფლებით სარგებლობის შესახებ. ჩემი შეფასებით, ბრძანება არ არის ბუნდოვანი, მაგრამ შესაძლოა ჩვენ გვქონდეს წინადადება მეტი ჰუმანიზაციისკენ,“ – გვითხრა დღეს, 26 სექტემბერს, ცოტნე ანანიძემ.

საქართველოს ჯანდაცვის სამინისტროს ცნობით, დევნილთა საკითხების შემსწავლელმა კომისიამ ბათუმში, ახალაშენებულ კორპუსებში, 164 იძულებით გადაადგილებული ოჯახისთვის ბინების გადაცემის საკითხზე მუშაობა დაიწყო. კომისიის სხდომას საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრის მოადგილე გრიგოლ გიორგაძე ესწრებოდა.

სამინისტროს ცნობით, გაფართოებული კომისიის შემადგენლობაში სამინისტროს თანამშრომლებთან ერთად, სახალხო დამცველის აპარატის, აჭარის მთავრობის, აფხაზეთის მთავრობისა და ვეტერანების საქმეთა სახელმწიფო სამსახურის წარმომადგენლებიც შედიან.

სამინისტროს ინფორმაციით, ბინის მიღების მოთხოვნით, განაცხადი ბათუმში რეგისტრირებულმა 142-მა დევნილმა ოჯახმა შეავსო. ოჯახები მონიტორინგის ჯგუფებმა ადგილზე შეისწავლეს, რის შემდეგაც მოკვლეული მასალა განსახილველად დევნილთა საკითხების შემსწავლელ კომისიას გადაეცა. კომისიის მუშაობის შედეგად, გამოვლინდებიან ის დევნილი ოჯახები, რომლებსაც ბათუმში ახალაშენებულ კორპუსებში ბინები გადაეცემათ.

სამინისტროსა და აჭარის ავტონომიური რესპუბლიკის მთავრობის ერთობლივი პროექტის ფარგლებში, ბათუმში, ორი 16-სართულიანი კორპუსი აშენდა. ახალაშენებულ კორპუსებში საცხოვრებელი ფართობი 164 დევნილ ოჯახს გადაეცემა.

საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა სამინისტროს მონაცემებით, ბათუმში სულ 1453 დევნილი ოჯახი ცხოვრობს [4495 ადამიანი]. ამათგან 498 ოჯახს ფულადი კომპენსაცია აქვს უკვე მიღებული, 722 ოჯახს – საცხოვრებელი ფართობი.

ამავე თემაზე: 

ყოფილი პროკურორი – ავთანდილ კილაძე, რომლის თანამდებობიდან გათავისუფლების მოთხოვნით ბათუმში შიმშილობის აქციებსაც აწყობდნენ, ახლა სამხარაულის სახელობის ექსპერტიზის ეროვნული ბიუროს აჭარის რეგიონულ დეპარტამენტს ხელმძღვანელობს. ავთანდილ კილაძის მოადგილე სიმონ გოგილაშვილია – ისიც ყოფილი პროკურორი. ინფორმაცია ექსპერტიზის ბიუროს ახალ უფროსებზე ბიუროს ინტერნეტგვერდზეა გამოქვეყნებული.

ბოლო თანამდებობრივი დეკლარაცია ავთანდილ კილაძეს 2012 წელს აქვს შევსებული. ამ დროს იგი ბათუმის რაიონული პროკურორი იყო. ავთანდილ კილაძე პროკურატურაში სხვადასხვა პოზიციაზე 2004 წლიდან მუშაობდა.

2012 წლის ბოლოს ბათუმელმა ადვოკატებმა ავთანდილ კილაძის წინააღმდეგ საპროტესტო აქცია გამართეს. „ავთანდილ კილაძე საგამოძიებო განყოფილების უფროსად დანიშნეს,“ – აცხადებდნენ მაშინ ადვოკატები.

„თუ ქვეყანაში გვყავს პოლიტიკური დევნილები, თუ ქვეყანაში გვყავს უკანონო პატიმრები და ამ ხელისუფლებას სამართლიანობის აღდგენაზე  აქვს პრეტენზია, არ შეიძლება მსგავსი გადაწყვეტილების მიღება. ავთანდილ კილაძე ერთ-ერთი მათგანია, ვინც ამ ყველაფერში იღებდა მონაწილეობას წლების განმავლობაში. ის ბათუმის პროკურორად 7 წელი მუშაობდა“, – ამბობდნენ სასამართლოსთან შეკრებილი ადვოკატები. ისინი ავთანდილ კილაძის წინააღმდეგ გამოძიების დაწყებასაც ითხოვდნენ – კანონსაწინააღმდეგო საქმიანობის გამოვლენის მოთხოვნით.

ხელისუფლების შეცვლის და ადვოკატების პროტესტის მიუხედავად, ავთანდილ კილაძე პროკურატურის საგამოძიებო განყოფილების უფროსად მაინც დანიშნეს. საპროტესტო აქციები 2013 წლის მარტში განახლდა. რამდენიმე ყოფილი პატიმარი პროკურატურის წინ ავთანდილ კილაძის თანამდებობიდან წასვლის მოთხოვნით შიმშილობდა კიდეც.

2013 წელს და შემდეგ წლებშიც თანამდებობრივი დეკლარაცია ავთანდილ კილაძეს აღარ შეუვსია. ადვოკატ რამინ პაპიძის თქმით, საპროტესტო ტალღის შემდეგ კილაძე საგამოძიებო განყოფილების უფროსის თანამდებობას ჩამოაშორეს, თუმცა პროკურატურაში მაინც დატოვეს.

„ის იყო ზურაბ ადეიშვილის და იმავდროულად ზაქარია ქუცნაშვილის თანაკურსელი, შესაბამისად, ორივე ხელისუფლებასთან გამონახა საერთო ენა. ახლა, როგორც ჩანს, კარგი ურთიერთობების გამო დაასაქმეს ექსპერტიზის ბიუროში. მე ვფიქრობ, კომფორტული გარემო შეუქმნეს,“ – ამბობს ადვოკატი რამინ პაპიძე.

სამხარაულის სახელობის ექსპერტიზის ბიუროს დასკვნა, როგორც ობიექტური და დასაბუთებული კვლევის შედეგი, ხშირად გადამწყვეტი ფაქტორია სისხლის სამართლის დავებში. არსებობს თუ არა ეჭვის გაჩენის საფრთხე სამხარაულის ექსპერტიზის ბიუროს მიუკერძოებლობის კუთხით? – „ბათუმელები“ დამოუკიდებელ იურისტებს ესაუბრა.

„ამან შეიძლება გამოიწვიოს გარკვეული უხერხულობა,“ – ამბობს გიორგი ხიმშიაშვილი, საია-ს აჭარის ფილიალის ყოფილი უფროსი და ამჟამად კომპანია „იურიდიული მრჩევლის“ ხელმძღვანელი. მას მიაჩნია, რომ სახელმწიფო ინსტიტუტმა უნდა გამორიცხოს ყველა კითხვა და საეჭვო გარემოება.

„როდესაც დაცვის მხარე ექსპერტიზის მიერ მომზადებულ დასკვნაში ამოიკითხავს ყოფილი პროკურორის სახელსა და გვარს, შესაძლებელია, მას გაუჩნდეს უნდობლობის განცდა და მისი განწყობა გახდეს ნეგატიური. უწყებამ, რომელსაც ხელმძღვანელობს ყოფილი პროკურორი, შესაძლოა, დაცვის მხარის თვალში ვერ ისარგებლოს ინსტიტუციურად ნდობის მაღალი ხარისხით. მხარე დაინტერესებულია სამართლებრივი შედეგის მიღებით და ამას ის იღებს, მათ შორის, სამხარაულის ეროვნული ბიუროს დასკვნის საფუძველზე. რა თქმა უნდა, დასკვნის მომზადებაზე ექსპერტი მუშაობს, მაგრამ როცა იცი, რომ მისი უშუალო ზედამხედველი არის ყოფილი პროკურორი, ეს შესაძლოა მხარეში იწვევდეს განცდას, რომ ვიღაც ჩაერია დამოუკიდებელი ექსპერტის მიერ მომზადებულ დასკვნაში“, – აღნიშნავს გიორგი ხიმშიაშვილი.

ედიშერ მახარაძე, ადვოკატი: „არ ვიცი, რატომ იყო საჭირო ყოფილი პროკურორების ექსპერტიზის ბიუროში გადაყვანა… ჩემი აზრით, ექსპერტებს თავიანთი საქმე აქვთ და ვერ ვხედავ პრობლემას, თუკი ხელმძღვანელი ავთანდილ კილაძე იქნება. ექსპერტიზას უშუალოდ ექსპერტი ატარებს და მისი ხელმძღვანელი ობიექტური შედეგის დადებაზე გავლენას ვერ მოახდენს.“

რამინ პაპიძე, ადვოკატი: „რისკი არსებობს, რადგან ავთანდილ კილაძე ცნობილი პროკურორი იყო, რისკი არსებობს მიუკერძოებლობის კუთხით. კანონის დარღვევა არაა ყოფილი პროკურორის დანიშვნა, მაგრამ რატომ? დავიჯერო, სისტემის შიგნით სხვა არავინაა ისეთი, ვისი დაწინაურებაც იქნებოდა მნიშვნელოვანი? მე მაინც ვფიქრობ, რომ ამ საქმის მცოდნე უნდა დაენიშნათ ბიუროს ხელმძღვანელად“.

საკადრო პოლიტიკის კუთხით პრობლემას ხედავს გიორგი ხიმშიაშვილიც, „იურიდიული მრჩევლის“ ხელმძღვანელი:

„საჯარო სექტორის ინსტიტუციური განვითარება მოითხოვს პროფესიონალ კადრებს. ეს კადრები უნდა იყვნენ, როგორც ქვედა რგოლში, ასევე მენეჯმენტში. ისინი უნდა გეგმავდნენ ორგანიზაციულ განვითარებას, კომუნიკაციას საზოგადოებასთან… საჯარო სექტორის ინსტიტუციური განვითარებისთვის სასიცოცხლოდ აუცილებელია, როგორც პროფესიული კადრების მოზიდვა, ისე შიდა უწყებაში დასაქმებული კადრების დაწინაურება, მათ უნდა ჰქონდეთ საფეხურზე ასვლის შესაძლებლობა. მენეჯმენტის რგოლი არ უნდა იყოს პოლიტიკური მოტივაციის მქონე ფუნქციის მატარებელი,“ – ამბობს გიორგი ხიმშიაშვილი.

რა მოხდება იმ შემთხვევაში, თუკი ავთანდილ კილაძის წინააღმდეგ დაიწყება გამოძიება და საქმეს კონკრეტულ შემთხვევაში ექსპერტიზის დასკვნა დასჭირდება?

„გამოძიება ავთანდილ კილაძის წინააღმდეგ თავის დროზე არ დაუწყიათ და ახლა ვინ დაიწყებს? გამოძიება რომ დაიწყონ, ნათია შალიკაშვილის საქმე ეყოფა მარტო – 7 თვის ფეხმძიმე ქალს ყაჩაღობა დააბრალეს, როცა ამ ქალს საბანკო ანგარიშზე 8 ათასი დოლარი ჰქონდა. რეალურად ავთანდილ კილაძე ბევრ საქმეში არც ჩანდა, მას გავლენა ჰქონდა სხვა პროკურორებზე,“ – გვითხრა ადვოკატმა რამინ პაპიძემ.

ავთანდილ კილაძეს სამხარაულის ექსპერტიზის ბიუროს ინტერნეტგვერდზე საკონტაქტო ინფორმაციაში მხოლოდ ელექტრონული ფოსტა აქვს მითითებული. „ბათუმელებმა“ მასთან დაკავშირება მითითებულ მისამართზე სცადა, თუმცა ამ დრომდე პასუხი არ მიგვიღია.

ლევან სამხარაულის სახელობის სასამართლო ექსპერტიზის ეროვნული ბიუროს ვებგვერდიდან:„სსიპ „ლევან სამხარაულის სახელობის – სასამართლო ექსპერტიზის ეროვნული ბიურო“ 2004 წლის 4 ნოემბერს ჩამოყალიბდა. ექსპერტიზის ბიურო წარმოადგენს სახელმწიფო საექსპერტო დაწესებულებას, საჯარო სამართლის იურიდიულ პირს და მისი საქმიანობა რეგულირდება საქართველოს მთავრობის შესაბამისი დადგენილებით დამტკიცებული დებულებით და სხვა ნორმატიული აქტების საფუძველზე.ბიუროს მომსახურებით სარგებლობენ, როგორც სახელმწიფო და საბიუჯეტო ორგანიზაციები, ასევე კერძო სტრუქტურები, კომერციული და არაკომერციული დაწესებულებები და სხვა იურიდიული თუ ფიზიკური პირები. ბიუროში მოქმედებს საექსპერტო მომსახურების ფიქსირებული გადასახადი, რომელიც დამტკიცებულია საქართველოს მთავრობის შესაბამისი დადგენილებით“.

_____________

მთავარ ფოტოზე: ავთანდილ კილაძე 2013 წლის საპროტესტო აქციის დროს. ფოტო „ბათუმელების“ არქივიდან. 

ბათუმის ბაზარში ყველი რომ მხოლოდ მაცივრებიდან უნდა გაყიდულიყო, ორი წლის წინ გადაწყდა. როგორც 2016 წელს სავაჭრო ცენტრის ადმინისტრაცია “ბათუმელებთან” ამბობდა, ამ სექციაში ცვლილებების მიზანი სექციის ევროსტანდარტების დონეზე მოწყობა იყო. როგორც ბათუმის ბაზარში მოვაჭრეები  ამბობენ, მაცივრებმა არ გაამართლა.

ბათუმის აგრარულ ბაზარში 2016 წელს ცვლილებები ყველისა და ხორცის სექციებს შეეხო, რომელთა რეკონსტრუქციის პროექტი შვეიცარიის განვითარებისა და თანამშრომლობის სააგენტოს (SDC) მიერ დაფინანსებული „მცირე კავკასიის ალიანსების პროგრამის“ ფასილიტაციით მიმდინარეობდა. ყველის სექცია აღიჭურა 40 ახალი დახლ-მაცივრით, ხელსაბანი ონკანებითა და უჟანგავი ინვენტარით. რძის პროდუქტების სექციისთვის მოეწყო 4 სასაწყობო ოთახი, ლაბორატორია, გასახდელი ოთახები, სველი წერტილები, სასადილო, სამრეცხაო და სასტერილიზაციო.

როგორც მოვაჭრეები ამბობენ, ქართული ყველის შემადგენლობიდან გამომდინარე, მაცივრები მალევე დაიჟანგა და ზოგიერთი გაფუჭდა კიდეც. მათივე თქმით, ყველის სექციაში სპეციფიკური სუნიც ამის გამო იგრძნობა.

აქ ზოგიერთი მაცივარი ხის ფეხებზე დგას ან სულაც გამორთულია. როგორც ერთ-ერთმა მოვაჭრემ გვითხრა, იყო შემთხვევა, როცა ადამიანს დენმა დაარტყა, თუმცა ახალგაზრდა მამაკაცი დროულად მოაშორეს მაცივარს და არავინ დაშავებულა.

ხორცის სექცია ბათუმის აგრარულ ბაზარში:

ამავე თემაზე:

ბათუმის პორტში მდგარი ტვირთმზიდი გემის „ალიქან კარტალის“ ეკიპაჟი გემთმფლობელისგან კუთვნილ ხელფასს ელოდება. რვა თვეა მეზღვაურები უხელფასოდ მუშაობენ. გემზე საქართველოს სამი, ინდოეთის სამი და უკრაინის ერთი მოქალაქე იმყოფება. 7-კაციანი ეკიპაჟის შემადგენლობისთვის გემთმფლობელს დაახლოებით 32 ათასი დოლარი აქვს გადასახდელი. მეზღვაურები კუთვნილ ხელფასს ამ დრომდე უშედეგოდ ელოდებიან. გემთმფლობელმა დავალიანების დასაფარად ვადა თვის ბოლომდე ითხოვა.

„იანვარში ავედი გემზე სტამბოლში. მშრალი ტვირთის გადასაზიდი გემია, 1400 ტონას იტევს, შავ ზღვაზე უნდა გვემუშავა. წამოვედით სტამბოლიდან, სხვადასხვა პორტში შევდიოდით, გემი სარემონტო იყო, ავარიულ მდგომარეობაში, აგვისტოს დასაწყისში ძლივს ჩამოვაღწიეთ ბათუმამდე. ერთი თვე „მელკიმორიასთან“ გვყავდა გაჩერებული. შტორმის დროს ბაგირები გაგვიწყდა. საშიშროება იყო, გემი ჩაძირულიყო, მაგრამ სამაშველო მოგვეხმარა და პორტში გადმოგვიყვანეს, გემი გადავარჩინეთ,“ – ამბობს გემის კაპიტანი თამაზ გოგიტიძე „ბათუმელებთან“ საუბრისას.

გოგიტიძე გვიყვება, რომ თავდაპირველი მოლაპარაკებით, როცა გემი სტამბოლიდან წამოიყვანეს, „ალიქან კარტალს“ შავ ზღვაზე მშრალი ტვირთი უნდა ეზიდა. გემი ავარიულ მდგომარეობაში იყო, მის შესაკეთებლად საჭირო თანხა კი გემთმფლობელმა არ გადაიხადა.

თამაზ გოგიტიძის თქმით, ბათუმის პორტში 24 საათით გემის გაჩერების ფასი დაახლოებით 500 დოლარია. კაპიტანი ამბობს, რომ ბათუმის ნავსადგურში მათი მდგომარეობა გაითვალისწინეს და ეს თანხა მინიმუმამდე შეამცირეს. გემთმფლობელს მეზღვაურთა ხელფასების გარდა ნავსადგურში დგომის თანხის გადახდაც მოუწევს.

სანამ გემთმფლობელი მეზღვაურებს ანაზღაურებას არ გადაუხდის, კაპიტანს უფლება არ აქვს, გემი დატოვოს. გემი არ დაუტოვებიათ ეკიპაჟის არც სხვა წევრებს. თამაზ გოგიტიძის თქმით, მათი მდგომარეობის შესახებ ინფორმირებულია საზღვაო ტრანსპორტის სააგენტო, რომელმაც ეკიპაჟს სათანადო დახმარება აღმოუჩინა. სააგენტო ეკიპაჟს ეხმარება სამართლებრივ საკითხებშიც, რაც შეეხება ეკიპაჟის კვებას და სხვა საჭიროებებს, მათ დახმარებას მეზღვაურთა პროფკავშირები უწევს.

საზღვაო ტრანსპორტის სააგენტოს დირექტორის მოადგილის, ივანე აბაშიძის თქმით, როცა გემი საქართველოს ტერიტორიულ წყლებში შემოვიდა, იმდენად გაუმართავ მდგომარეობაში იყო, რომ მისთვის დროშის მინიჭების საკითხი არც განუხილავთ. დღეის მდგომარეობით გემს არ შეუძლია თავისუფალი ნაოსნობა.

„ჩვენ ყველანაირად უზრუნველვყოფთ, რომ გემი უსაფრთხოდ იყოს. გემს არ აქვს დროშა, მასზე არიან მეზღვაურები. გემის მფლობელი თურქეთის მოქალაქეა, რომელმაც ოცდღიანი ვადა ითხოვა პრობლემების მოსაგვარებლად. საზღვაო ტრანსპორტის სააგენტოს მედიატორის როლი აქვს. ვუზრუნველყოფთ იმას, რომ გემთმფლობელი კავშირზე იყოს და არ აიცილოს პასუხისმგებლობა. ველოდებით თვის ბოლოს,“ – უთხრა „ბათუმელებს“ ივანე აბაშიძემ.

„ცუდი ბიჭია ეგ, ციხეში იჯდა“ – „უძინართა მზეში“ ამბობს ამას მოხუცი, გახსოვთ? ხშირად ხდება ხოლმე ასე ცხოვრებაშიც, ნასამართლობის გამო შენზე როცა მიუთითებენ“, – გვეუბნება ყოფილი პატიმარი, გ. მ.

საპატიმროში ერთი წელი გაატარა წვრილმანი ხულიგნობისა და ქუჩაში ჩხუბის გამო. სტიგმა, რაც საზოგადოებაში ყოფილ პატიმრებზე არსებობს, გ. მ. – საც არაერთხელ შეხებია:

გ.მ.: „მეგობრის ქორწილში გავიცანი ერთხელ გოგო, მომეწონა ძალიან, რაღაცებს ვუყვებოდით ერთმანეთს, მერე ჩემი მეგობარი მოგვიახლოვდა და ამ გოგოს უთხრა, რომ უახლოესი მეგობრები ვიყავით ბავშვობიდანვე და ყველგან ერთად დავდიოდით. მხოლოდ ერთ ადგილას არ წამიყვანა თავისთანო – ჩემი მეგობარი ამბობდა, მივხვდი, ციხეს რომ გულისხმობდა და ფეხს ფეხზე ვაჭერდი, გაჩუმდი-მეთქი, მაგრამ ის გოგო ჩააცივდა, სად არ წაგიყვანაო. ჩემი მეგობარი იძულებული გახდა ეთქვა, ციხეს რომ გულისხმობდა. არ ესიამოვნა ამ გოგოს, რა თქმა უნდა. არ გაგვიწყვეტია ურთიერთობა, მაგრამ მხოლოდ ნაცნობებად დავრჩით, მეტი არაფერი,“ – ამბობს ყოფილი პატიმარი.

37 წლის გ.მ. ზუგდიდში ცხოვრობს, ხელოსანია – კერძო შეკვეთით სარემონტო სამუშაოებს ასრულებს. ასე ოჯახის ერთადერთ წევრს, ასაკოვან მამას ეხმარება და საკუთარ თავსაც ინახავს. დედა ცოტა ხნის წინ გარდაეცვალა და ზუგდიდის ერთ-ერთ სოფელში მამასთან ერთად მარტო დარჩა. რემონტის შეკვეთები ხშირად არ აქვს, საქმე არასტაბილურია. ოჯახს თხილის მეურნეობაც აქვს, მაგრამ თუ ყოველწლიურად ტონა-ნახევარ თხილს კრეფდნენ, წელს მოსავალი მხოლოდ 300 კილოგრამი იყო, შარშან კი საერთოდ ვერ დაკრიფეს – ფაროსანამ გაანადგურა.

„დემოკრატიის ინსტიტუტის“ შესახებ გ.მ-მ მეგობრებისგან შეიტყო. არ ეგონა, რომ რეალურად დაეხმარებოდა ვინმე, თუმცა ამაში ყოფილი პატიმრების გაძლიერების პროექტში ჩართვის შემდეგ დარწმუნდა. პროგრამის ფარგლებში მას სარემონტო სამუშაოებისთვის აუცილებელი ხელსაწყოები და იარაღები შეუძინეს.

გ.მ. „ყოფილი პატიმრების, პატიმართა ოჯახებისა და პრობაციონერების გაძლიერების პროექტის“ სხვა ღონისძიებებშიცაა ჩართული. ყოველთვის ვერ იცლის, მაგრამ ოკაცეს კანიონისა და პრომეთეს მღვიმის მოსანახულებლად ექსკურსიაზე იყო ჯგუფთან ერთად 6 სექტემბერს. ლაშქრობა ყოფილი პატიმრების გაძლიერების პროექტის ფარგლებში მოეწყო.

„ყოფილმა პატიმრებმა ერთმანეთი გავიცანით ექსკურსიაზე, ზოგს ადრეც ვიცნობდი, სხვა გარემოში ვნახეთ ერთმანეთი, ამას დიდი მნიშვნელობა აქვს, სასიამოვნოა და სასარგებლოა ასეთი გასვლები,“- ამბობს ყოფილი პატიმარი.

„ყოფილი პატიმრების, პატიმართა ოჯახებისა და პრობაციონერების მხარდაჭერის“ პროგრამას „დემოკრატიის ინსტიტუტი“ პარტნიორ ორგანიზაციებთან: „თანაზიართან“, „აფხაზინტერკონტთან“ და „გურიის ახალგაზრდულ რესურსცენტრთან“ ერთად ახორციელებს. პროგრამა მოქმედებს დასავლეთ საქართველოს ოთხ რეგიონში: აჭარაში, გურიაში, იმერეთსა და სამეგრელო – ზემო სვანეთში.

________________________

მასალა მომზადებულია პროექტის – „ყოფილი პატიმრების, პატიმართა ოჯახებისა და პრობაციონერების მხარდაჭერის პროგრამა“  ფარგლებში.
პროექტს ახორციელებს ა(ა)იპ „დემოკრატიის ინსტიტუტი“ და დაფინანსებულია ევროკავშირის მიერ.
მასალაში გამოთქმული მოსაზრებები ავტორისეულია და შესაძლოა არ გამოხატავდეს დონორი ორგანიზაციის თვალსაზრისს.

გადაჭარბებული ხმაურის კონტროლი ბათუმის მერიამ მიმდინარე წლის პირველ ივლისს დაიწყო. პირველი ივლისიდან დღემდე ხმაურის დონის მონიტორინგის განყოფილების ცხელ ხაზზე 330-მდე შეტყობინება შევიდა.

„ამ დროისათვის 51 იურიდიული პირია დაჯარიმებული და არც ერთი კერძო პირი. 500 ლარით დაჯარიმებული გვყავს დაახლოებით 14 ორგანიზაცია, დანარჩენი არის 1000-ლარიანი ჯარიმები. ჩვენ გამოვწერეთ საჯარიმო ქვითარი და მიმდინარეობს პროცესი. ჩვენი მიზანი არ არის აუცილებლად დაჯარიმება, პირველი ეტაპია გაფრთხილება და დაჯარიმება ხდება მას შემდეგ, როცა არ ითვალისწინებენ გაფრთხილებას,“ – უთხრა „ბათუმელებს“ ა(ა)იპ მუნიციპალური სერვისების სააგენტოს ხმაურის დონის მონიტორინგის განყოფილების უფროსმა, თემურ ხოზრევანიძემ.

გადაჭარბებული ხმაურისთვის ფიზიკური პირი 150 ლარით ჯარიმდება, იურიდიული პირი კი – 500 ლარით. განმეორების შემთხვევაში ჯარიმის ოდენობა ორმაგდება.

თემურ ხოზრევანიძე ამბობს, რომ მოქალაქეები ხმაურის დონის მონიტორინგის განყოფილებას არა მხოლოდ კაფე-ბარების ხმამაღალი მუსიკის გამო მიმართავენ, არამედ სხვა შემთხვევებშიც: გათბობა-გაგრილების სისტემის ხმაური, სამშენებლო სამუშაოებით გამოწვეული ხმაური და ა.შ.

„კაფე-ბარებსა და ღამის კლუბებში რატომღაც ჰგონიათ, რომ ვისაც უფრო ხმამაღლა ექნება აწეული, იმასთან შედის კლიენტი. ეს განსაკუთრებით ეხება ღამის კლუბებს, რომლებიც ერთმანეთს ეჯიბრებიან.

გვირეკავენ გათბობა-გაგრილების სიტემის ხმაურით გამოწვეულ პრობლემებზეც. სეზონის დასრულების შემდეგ უფრო კაზინოებსა და სასტუმროებს უჩივის ხალხი და ხშირად საფუძვლიანია მათი პრეტენზიები.

ძალიან ხშირად უჩივიან დიდ სამშენებლო კომპანიებს, რომლებსაც არა აქვთ უფლება დილის რვა საათზე ადრე დაიწყონ მუშაობა და საღამოს 11 საათის შემდეგ იმუშაონ. „ორბი ჯგუფის“ მშენებლობებთან იყო რამდენიმე გამოძახება,  „ალიანსი ჯგუფის“ მშენებლობასთან, სადაც გაფრთხილება მივეცით და გაითვალისწინეს, ასევე სასტუმრო „ეიფორიასთან“, ყოფილ „ლეოგრანდთან“, უჩივიან: „გუდვილს“, კარფურს“, ყოფილ სასტუმრო „ლეოგრანდს“.  არის ისეთი შემთხვევებიც, როცა გვირეკავენ მეზობელს ძაღლი ჰყავს, ყეფს და რამე გვიშველეთო. ეს ჩვენს კომპეტენციას სცდება, თუმცა ვცდილობთ, ასეთი კერძო შემთხვევებიც არ დავტოვოთ უპასუხოდ, მაგრამ ეს უკვე კერძო დავაა და სხვა სამსახურები უნდა ჩაერთონ“, – ამბობს თემურ ხოზრევანიძე.

ხმაურის დონის მონიტორინგის განყოფილების ცხელი ხაზი 24 საათის განმავლობაში მუშაობს. გამოძახების დროს ადგილზე გადის სამსახურის თანამშრომელი, რომელიც ადგილზე ხმის საზომი აპარატურით ამოწმებს ხმაურის დონეს.

თემურ ხოზრევანიძე ამბობს, რომ ყველაზე რთული პიროტექნიკით გამოწვეული ხმაურის კონტროლია, რადგან ძირითად შემთხვევებში ვერ დგინდება, ვინ იყენებს პიროტექნიკას:

„ტექნიკური რეგლამენტის თანახმად უნდა დაფიქსირდეს შემთხვევა, დასურათდეს, კოორდინატები გაიზომოს და ა.შ. მხოლოდ ერთი კაფე-ბარი დავაჯარიმეთ პიროტქნიკის გამოყენების გამო და ერთიც – გავაფრთხილეთ. ღამის 11 საათამდე აქვთ სროლის უფლება, შემდეგ უკვე დარღვევაა. როცა, მაგალითად, კერძო პირი ისვრის პიროტექნიკას, თუ არ შეგხვდა, ძალიან ძნელია პოვნა“.

გადაჭარბებულ ხმაურზე ჯარიმები ბათუმის მერიამ პირველი ივლისიდან აამოქმედა, ანუ მას შემდეგ, რაც მერიაში ხმის დონის მონიტორინგის ჯგუფში შეიქმნა. მანამდე კი გადაჭარბებულ ხმაურზე რეაგირება საპატრულო პოლიციას ევალებოდა.

გადაჭარბებული ხმაურის შემთხვევაში მოქალაქეებს შეუძლიათ დარეკონ ცხელ ხაზზე: 598 85 15 20.  

დღეს, 25 სექტემბერს, 18:00 საათიდან ამინდის გაუარესების გამო, შავ ზღვაში მოსალოდნელია 4-5-ბალიანი შტორმი. გაფრთხილებას საგანგებო სიტუაციების მართვის სამსახური ავრცელებს.

უწყების ინფორმაციით, ტალღების სიმაღლე 3.5-4 მეტრს მიაღწევს, რის გამოც ზღვაში შესვლა იკრძალება.