Batumelebi | როგორ შეიცვლის იერსახეს საგარეო საქმეთა სამინისტროს ყოფილი შენობა ბათუმში როგორ შეიცვლის იერსახეს საგარეო საქმეთა სამინისტროს ყოფილი შენობა ბათუმში – Batumelebi
RU | GE  

როგორ შეიცვლის იერსახეს საგარეო საქმეთა სამინისტროს ყოფილი შენობა ბათუმში

საგარეო საქმეთა სამინისტროს ყოფილ შენობას ბათუმში, მემედ აბაშიძის N40-ში, ბიზნესმენი რუსლან კაკაბაძე არემონტებს. შენობა, რომელსაც კულტურული მემკვიდრეობის ძეგლის სტატუსი აქვს, მან აჭარის ფინანსთა ეკონომიკის სამინისტროს მიერ გამოცხადებულ ელექტრონულ აუქციონზე 1 მილიონ 755 ათას ლარად  და პირობით იყიდა.

1128 კვ/მ მიწის ნაკვეთისა და 664,8 კვ/მ შენობის საწყისი გასაყიდი ფასი 1 მილიონ 720 ათასი ლარი იყო, ბიჯი – 35 ათასი ლარი. ქონება ერთი ბიჯით გაიყიდა.

პროექტის რენდერი

აჭარის კულტურული მემკვიდრეობის სააგენტოსთან უკვე შეთანხმებული პროექტის რენდერის [ვიზუალური მასალა] მიხედვით მესაკუთრე ძეგლის პირვანდელი სახით აღდგენას არ გეგმავს. შენობას შესასვლელში შუშის ფოიე ემატება, სადაც ე.წ. ზამთრის ბაღის მსგავსი სივრცე მოეწყობა და ფუნქციურად  კაფეს დატვირთვა ექნება. გარდა ამისა, მინით შეიფუთება ფასადის ნაწილი მემედ აბაშიძის ქუჩის მხრიდან, საერთო ჯამში კი, შენობის მასშტაბები ორი სართულით გაიზრდება.

შენობის მესაკუთრის, რუსლან კაკაბაძის თქმით, ამ დროისთვის მას მოლაპარაკებები აქვს ერთ-ერთ ცნობილ ბრენდთან: „ ვგეგმავ ბრენდის შემოყვანას, ჯერ მოლაპარაკებების პროცესში ვართ, ამიტომ ვერ დავასახელებ“.

ამ დროისთვის მშენებლობის ადგილზე  გამოკრული არ არის საინფორმაციო ბანერი. რუსლან კაკაბაძის განმარტებით, არსებული ბანერი დაზიანდა და ახალ ბანერს ამზადებენ, რომელსაც  სამშენებლო მოედანზე დამონტაჟებულ ბილბორდზე უახლოეს საათებში გამოაკრავენ.

რა პირობით გაასხვისა აჭარის მთავრობამ ქონება, წაიკითხეთ აქ:

„საგარეოს შენობა“ 1 მილიონ 755 ათას ლარად რუსლან კაკაბაძემ იყიდა

ნეტგაზეთის მასალების სხვა გამოცემებში გადაბეჭდვის წესი
ავტორი