ბათუმში ახლა პირველი საათია


ბათუმში ახლა პირველი საათია – ყოველ შემთხვევაში ამ დროს უჩვენებს ერას მოედანზე დამონტაჟებული საათის ისრები. ქალაქში, სადაც ტურისტის მოსაზიდად ბიუჯეტიდან მილიონობით ლარს ხარჯავენ, ტურისტულ ადგილებში დამონტაჟებული საათები გაუმართავია. ბათუმის მერია, რომელიც ქალაქის მართვაზეა პასუხისმგებელი, ტურისტულ ადგილებში საათების გამართვასაც კი ვერ უზრუნველყოფს.

კითხვაზე – უხერხული ხომ არ არის ბათუმში ტურისტების თავშეყრის ადგილებზე დამონტაჟებული საათის ისრები არარეალურ დროს რომ უჩვენებს? – აჭარის ტურიზმის დეპარტამენტის საზოგადეობასთან ურთერთობის სამსახურის ხელმძღვანელი, მერი ემირიძე პასუხობს, რომ უხერხულია და მის შესახებ ტურიზმის დეპარტამენტში არ იცოდნენ: „ჩვენი კომპეტენცია არ არის, თუმცა შეგვიძლია რეკომენდაცია მივცეთ მერიას ამაზე.“

გაჩერებულ საათებთან დაკავშირებით განცხადება დღეს, ევროპის მოედანზე ენმ-ის ბათუმის ქალთა ორგანიზაციის თავმჯდომარემ მანანა ილურიძემ გააკეთა. მისი შეფასებით, ქალაქში საათების დროის გაჩერებას სიმბოლური დატვირთვაც აქვს.

„ბათუმელები“ მერიასაც დაუკავშირდა. პრესსამსახურის ინფორმაციით, საათების გამართვის უზრუნველყოფა ევალება კომპანიას, რომელთანაც მერიას ხელშეკრულება აქვს გაფორმებული. რატომ ვერ ახერხებს ეს კომპანია მოვალეობის შესრულებას და ვისი კომპეტენციაა ნაკისრი ვალდებულებების შესრულებაზე კონტროლი? – ამ კითხვებზე პასუხები “ბათუმელებს” ჯერჯერობით არ მიუღია.

საათი ევროპის მოედანზე

გაჩერებული საათი ევროპის მოედანზე

საათი გორგილაძისა და ბარათაშვილის ქუჩების კვეთაში

გაჩერებული საათი გორგილაძისა და ბარათაშვილის ქუჩების კვეთაში

ნეტგაზეთის მასალების სხვა გამოცემებში გადაბეჭდვის წესი
ავტორი