Batumelebi

აჭარის ჯანდაცვის სამინისტროს მონაცემებით, 2018 წელს აჭარაში 62 ტყუპი ბავშვი დაიბადა, სულ 126 ბავშვი, 60 ბიჭი და 66 გოგო. 126 ტყუპიდან ორ შემთხვევაში დაიბადა სამ-სამი ბავშვი. 2017 წლის მონაცემებით კი, აჭარაში ტყუპი ბავშვი 74 -ჯერ გაჩნდა, აქედან სამ-სამი ბავშვი ოთხჯერ.

აჭარის ჯანდაცვის სამინისტრო სპეციალური პროგრამის ფარგლებში ტყუპების მშობლებს ორ ბავშვზე ერთჯერადად 2000 ლარს ჩუქნის, სამი ბავშვის შემთხვევაში კი – 3000 ლარს.

დახმარების თანხა ირიცხება მშობლის [დედის ან მამის] საბანკო ანგარიშზე.

ერთჯერადი დახმარების მისაღებად ტყუპების მშობლებმა აჭარის ჯანმრთელობისა და სოციალური დაცვის სამინისტროს უნდა წარუდგინონ განცხადება, ცნობა ჯანმრთელობის მდგომარეობის შესახებ – ფორმა №IV-100ა, მშობლების პირადობის მოწმობების [ან სხვა დოკუმენტის, რომლითაც შესაძლებელია პირის იდენტიფიკაცია] ასლები, ახალშობილების დაბადების მოწმობების ასლები, საბანკო რეკვიზიტები.

ქვეპროგრამით გათვალისწინებული მომსახურებით სარგებლობენ საქართველოს მოქალაქეები, რომლებიც 2018 წლის პირველი იანვრის მდგომარეობითა და მატერიალური დახმარების გაცემის პერიოდისათვის უწყვეტად რეგისტრირებულნი არიან აჭარის ავტონომიური რესპუბლიკის ტერიტორიაზე.

2019 წლის ბიუჯეტის პროექტში მთავრობამ ამ პროგრამისთვის 150 000 ლარი გაითვალისწინა.

საქართველოს ყოფილი პრეზიდენტი, მიხეილ სააკაშვილი აღმოსავლეთის ქვეყნებიდან შემოსულ ტურისტებს დისკრიმინაციულ კონტექსტში მოიხსენიებს და ამბობს, რომ „ჩვენ“, ანუ საქართველოს არ სჭირდება „გაძვალტყავებული, ბოდიში და ჯღანები რომ შემოდიან, თავისი ძეხვი რომ მოაქვთ და კონსერვი… ჩვენ არ გვჭირდება ბანგლადეშელები“…

რა მიმართულებით ვითარდება საქართველოში ტურიზმი და რა ტიპის მომხმარებელზე არსებობს სწორება? უნდა მიმართავდეს თუ არა ქვეყანა ტურისტების სეგრეგაციას და არსებობს თუ არა რასიზმი ქართულ ტურიზმში? „ბათუმელებთან“ ამ თემაზე ტურიზმის სპეციალისტი მაია სიდამონიძე საუბრობს.

• ქალბატონო მაია, საქართველოს მოქალაქეებიც არ ვართ ალბათ მდიდარი ტურისტები ბევრი ქვეყნისთვის და ჩვენც ვცდილობთ ვიმოგზაუროთ ნაკლები დანახარჯებით. როგორი რეაქცია გვექნებოდა, თუკი ჩვენ ასე მოგვიხსენებდა ვინმე და რას უნდა ველოდოთ სხვებისგან?   

ნამდვილად არასასიამოვნო იქნებოდა, თუკი ჩვენი მისამართითაც მსგავს რაიმეს იტყოდა ვინმე. ზოგადად, ტურიზმი ერთ-ერთი სწრაფად განვითარებადი ინდუსტრიაა საქართველოში და აქედან გამომდინარე მნიშვნელოვანია, რომ გაგვაჩნდეს ამ სფეროში სწორი მიმართულება და სტრატეგია.

ვფიქრობ, განვითარების ეტაპიც სხვაა დღესდღეობით და გამოწვევებიც სხვა. ჩვენ დღეს არ გვაქვს იმის ფუფუნება, რომ ხელი დავადოთ კონკრეტულ ბაზრებს ქვეყნებისა და ეროვნების მიხედვით შევზღუდოთ. თუმცა უნდა გაგვაჩნდეს მიმართულება. აქცენტი ტურისტულ პროდუქტებზე უნდა გაკეთდეს და ამაზე უნდა იყოს ორიენტირებული ქვეყანა – სახელმწიფო და კერძო სექტორიც.

რა თქმა უნდა, სამომავლოდ ბაზრების დივერსიფიკაცია მნიშვნელოვანია და რაც უფრო მეტ ბაზარზე შევალთ და სწორ სეგმენტს მოვიზიდავთ, მით უფრო კარგი იქნება იმისათვის, რომ არ ვიყოთ კონკრეტულ ბაზრებზე დამოკიდებული, როგორც დღეს ვართ, როცა შემოსული ტურისტების 70 პროცენტი ოთხ მეზობელ ქვეყანაზე მოდის. აქცენტი უნდა გვქონდეს მაღალმხარჯველიან ვიზიტორებზეც, ვისაც აინტერესებს ჩვენი კულტურა, ისტორია, კულინარია და აქ სწორედ ამ ავთენტურობის მისაღებად ჩამოვლენ. თუმცა ეროვნების და ქვეყნების მიხედვით სეგრეგაცია  ნამდვილად არ უნდა ხდებოდეს.

• დამოკიდებულება, რომ არ მოგვწონს აღმოსავლეთის ქვეყნებიდან შემოსული ტურისტები და სწორება გვაქვს მხოლოდ ევროპის ქვეყნებზე, ეს რასისტული განწყობების ბრალია, თუ მოლოდინი, რომ ევროპელი უფრო მეტს დახარჯავს?

მსგავსი დამოკიდებულება მინახავს, მომისმენია, როგორც რიგითი მოქალაქეების მხრიდან, ასევე პოლიტიკოსებისგანაც და არ ვიცი რა არის ამის მოტივაცია, ნამდვილად ვერ დავარქმევ სახელს. პოლიტიკოსების შემთხვევაში, ალბათ, გარკვეულ ელექტორატზე ხდება ზემოქმედება, თუმცა არც ერთ ქვეყანაში, არც ერთ საზღვარზე არ ხდება ტურისტების კვოტირება ეროვნების მიხედვით. ვფიქრობ, საჯარო პირებისგან ამ ტიპის განცხადებები (გაძვალტყავებული, ჯღანი და ა.შ) არაეთიკურია, ტურიზმის სფერო ძალიან სენსიტიურია ამ ტიპის განცხადებების მიმართ.

• მსმენია პრეტენზიები, რომ ზოგიერთი ქვეყნიდან შემოსული ტურისტები არ შედიან კაფე-ბარებში, რომ თავიანთი საკვები მოაქვთ და რა მოგება აქვს ამით ქვეყანას? რა უნდა შესთავაზოს ამ კატეგორიის ტურისტს ბაზარმა?

მეც გამიგია მსგავსი განცხადებები, როგორც ტურისტული სერვისების მფლობელებისგან, ასევე კერძო სექტორის წარმომადგენლების მხრიდან, მაგრამ ყველა ეროვნებას თავისი სამომხმარებლო სახასიათო ქცევა აქვს და თუ ჩვენთვის ამ ტიპის ქცევა მიუღებელია, ამაზე შეგვიძლია გვქონდეს ადეკვატური წესები კონკრეტულ დაწესებულებებში. თუმცა, ამ ქვეყნებიდან ტურისტების შემოყვანაზე ბევრი პროვაიდერი მუშაობს და თუ მიწოდება არსებობს, ესე იგი მოთხოვნაც შესაბამისია.

თუ გვინდა, რომ ტურისტმა ბევრი დახარჯოს, ამისთვის შესაბამისი სერვისიც უნდა შევთავაზოთ.

როცა ქვეყნის შიგნით ინფრასტრუქტურა არ არის განვითარებული, არც შესაბამისი მომსახურება გვაქვს, როგორ უნდა მოიზიდო მდიდარი ტურისტი? ელემენტარული პრობლემებია მომსახურების სფეროში, კვების ობიექტებში, რაში ვახარჯინებთ ფულს ტურისტს ეს ხომ უნდა ვიცოდეთ. პირველ რიგში, ქვეყნის შიგნით უნდა ვიმუშაოთ და აქ დავახვედროთ შესაბამისი სერვისი ტურისტებს.

ენაც მეტი უნდა ვიცოდეთ, გაღიმებაც უნდა შეგვეძლოს და ბევრი რამ ამ მიმართულებით არის დასახვეწი.

• არის კიდევ ასეთი პრეტენზიები, რომ პოსტსაბჭოთა ქვეყნებიდან ჩამოსული ტურისტები, მაგალითად, რუსები, უკრაინელები, სომხები თუ აზერბაიჯანელები ყიდულობენ ბინებს და ამით სასტუმროები კარგავენ მომხმარებელს.

საერთოდ, მსოფლიოში ტენდენცია იქეთ მიდის, რომ ტურისტული სააგენტოები ნელ-ნელა ქრება. ევროპის ზოგიერთ ქვეყანაში უკვე აღარ არსებობს მსგავსი სერვისი, რადგან ადამიანები თვითონ გეგმავენ მოგზაურობას, თვითონ ჯავშნიან ყველაფერს და სწორედ ამიტომ გვჭირდება სწორი მიმართულებები. ეს მიდგომები არის კულტურული ავთენტურობა, უნიკალურობა, რაზეც უნდა გაკეთდეს უფრო მეტი აქცენტი.

ვფიქრობ, არ აქვს დიდი მნიშვნელობა ტურისტი ქართულ რესტორანში შეჭამს თუ თურქულში, ეს ქვეყნის ბიუჯეტზე მაინც აისახება. ყველა ეროვნების ტურისტს აქვს კულტურული მახასიათებელი, თუმცა ჩვენ უნდა შევთავაზოთ ის, რაც არის უნიკალური და ეს ნამდვილად შეგვიძლია შევთავაზოთ. სწორედ ამიტომ უნდა ვიყოთ უფრო ტოლერანტულები ტურიზმის სფეროშიც.

ჩვენ  ხშირად გვაღიზიანებს ის, რომ ბაზარი გახდა კონკურენტული, მაგრამ თუ შევძლებთ გავუწიოთ სხვებს კონკურენცია მომსახურებაში, ხარისხში, დარწმუნებული ვარ, მომხმარებელს არცერთი მიმართულება არ დაკარგავს.

___________________

მთავარი ფოტო: მაია სიდამონიძე. ფოტო აღებულია რესპონდენტის ფეისბუქვერდიდან მისივე ნებართვით.

ბათუმის ელექტროენერგიის მომარაგების კუთხით შექმნილი პრობლემის გამო დღემდე ვერ ხერხდება ახალი ობიექტების ქსელზე მიერთება. მიზეზია გადამცემი ხაზი „ერგე-1“, რომლის რეაბილიტაციას „ენერგო-პრო ჯორჯია“ ვერ ახერხებს. ხაზის გაორჯაჭვიანებას ის მოსახლეობა ეწინააღმდეგება, რომელთა საცხოვრებელ სახლებთან და საკარმიდამო ნაკვეთებშიც გადის ეს ხაზი. კომპანია და სახელმწიფო კი არ ითვალისწინებენ ამ ადამიანების ინტერესებს და, შესაბამისად, არც კომპენსაციის გაცემაზე საუბრობენ და არც ხაზის კერძო ნაკვეთებიდან გადატანაზე.

„იმის გათვალისწინებით, რომ მნიშვნელოვნად გაიზარდა ქალაქ ბათუმის ელექტროენერგიის მოხმარება და მისი პიკური დატვირთვა მიუახლოვდა 110 კვ ძაბვის ელექტროგადამცემი ხაზის მაქსიმალურ გამტარუნარიანობას, საქართველოს ენერგეტიკისა და წყალმომარაგების მარეგულირებელი ეროვნული კომისიის [სემეკი] გადაწყვეტილებით, „ერგე-1“ ხაზის რეაბილიტაციის დასრულებამდე შეჩერებული იქნა გამანაწილებელ ქსელზე ახალი მომხმარებლების მიერთება [გარდა დაბალი სიმძლავრის ფარგლებში მოთხოვნილი მიერთებებისა]“ – მოგვწერეს „ენერგო-პრო ჯორჯიადან“.

„არანაირი მოძრაობები არ არის დაწყებული მიერთებაზე. როგორც ვიცი, „ენერგო-პრომ“ დაიწყო გარკვეული სამუშაოები – ანძების დამონტაჟება სახელმწიფო ნაკვეთებზე, თუმცა, ამ პროცესს რა გაგრძელება მოჰყვება, ჯერ ვერ გეტყვით. კომისია ფიქრობს, რომ ვიდრე არ დაიწყება ამ ხაზის რეაბილიტაცია, გადაავადებს მიერთებებს, რადგან არ ვიცით რეალურად ზაფხულში რა სიტუაცია იქნება. თუ ვნახავთ, რომ ქსელი კეთდება და რეაბილიტაციას ხელი არ ეშლება, მაშინ ნებას დავრთავთ, რომ  მიაერთოს ახალი მომხმარებლები ქსელზე“, – გვითხრა გოჩა შონიამ, სემეკის წევრმა.

„როგორც კომპანიისთვის ცნობილია, დაახლოებით 15-20 ოჯახი ეწინააღმდეგება 110 კვ ძაბვის ელგადამცემი ხაზი ,,ერგე-1“-ის სარეაბილიტაციო-სარეკონსტრუქციო სამუშაოების ჩატარებას. ასევე, მოსახლეობას გაეგზავნა საინფორმაციო წერილები, ექსპერტიზის დასკვნასთან ერთად, რომელიც ჩაიბარა მათმა უმეტესმა ნაწილმა,“ – აცხადებენ „ენერგო-პროში“.

კომპანიას „ბათუმელებმა“ ჰკითხა, დაიწყო თუ არა ქსელის სარეაბილიტაციო სამუშაოები [სახელმწიფოს კუთვნილ ნაკვეთებზე], თუმცა პასუხი ვერ მივიღეთ. „ენერგო-პრო ჯორჯია“ არც იმ მონაცემს ასაჯაროებს, თუ რამდენი ობიექტი ითხოვს დღეს ბათუმში ქსელზე მიერთებას.

სემეკში აცხადებენ, რომ მოხმარებული ენერგიის მოცულობის ზრდა დაბლა წევს ტარიფს. სემეკს უკვე მიმართეს გაზმომარაგების კომპანიებმა ტარიფის გაზრდაზე, ამიტომ კომისიის წევრს ვკითხეთ, ხომ არ მიუმართავთ ანალოგიური მოთხოვნით ელექტროენერგიის მიმწოდებლებს.

„რაც შეეხება ელექტროენერგეტიკის სექტორში მოქმედი კომპანიების – სს „თელასისა“ და სს „ენერგო-პრო ჯორჯიას“ ტარიფებს, აღნიშნული კომპანიებისთვის ტარიფები დადგენილია სამწლიან სატარიფო პერიოდზე 2020 წლის 31 დეკემბრის ჩათვლით. ამ კომპანიებს სემეკისთვის არ მოუმართავთ და ამ მიმართულებით საჯარო ადმინისტრაციული წარმოებები არ მიმდინარეობს. შესაბამისად, ელექტროენერგიის ტარიფების ცვლილება არ განიხილება. რაც შეეხება გაზის ტარიფს, ვადა გვაქვს – ტრანსპორტირების ტარიფი, შემდეგ განაწილების კომპონენტი უნდა ვნახოთ, ინვესტიციები, ამასთან ბიუჯეტში როგორი კურსი იქნება ჩადებული… როცა მიწოდების ნაწილში ვითვლით ფასს, მაშინ ვიღებთ იმ ტარიფს, რაც ბიუჯეტის დამტკიცების დროს ჩაიდება… თუ გაყიდვების მოცულობა გაიზრდება, ეს ტარიფს დაბლა წევს, ამიტომ ყველა კომპონენტი დეტალურად უნდა განვიხილოთ. გადაწყვეტილებას სემეკი წლის ბოლომდე მიიღებს“, – განაცხადა „ბათუმელებთან“ გოჩა შონიამ.

მიუხედავად დადგენილი ტარიფისა, კომპანიას უფლება აქვს მიმართოს კომისიას ტარიფის გადახედვაზე. „კანონმდებლობა არ უკრძალავს ტარიფის გადახედვაზე მოგვმართოს კომპანიამ, მაგრამ კომისია შეისწავლის და თუ დარწმუნდა, რომ კომპანიას რეალურად აქვს ფინანსური პრობლემა, მხოლოდ ამ შემთხვევაში განიხილავს მის განაცხადს, წინააღმდეგ შემთხვევაში დატოვებს განუხილველად,“- ამბობს გოჩა შონია.

ხომ არ შეიქნება პრობლემები ბათუმის ელექტროენერგიით მომარაგების კუთხით ზამთარში? – „ენერგო-პრო ჯორჯიაში“ აცხადებენ, რომ „ქალაქ ბათუმში არსებულ გამანაწილებელ ქსელში განხორციელდა მნიშვნელოვანი ტექნიკური სამუშაოები და, შესაბამისად, ზამთრის სეზონთან დაკავშირებით ქალაქის საიმედო ელმომარაგებას საფრთხე არ ემუქრება“.

 

 

ტაქსების რეფორმასთან დაკავშირებით „საქართველოს ალიანსი უსაფრთხო გზებისთვის“ გამგეობის თავმჯდომარემ, ეკა ლალიაშვილმა განაცხადა, რომ „ტაქსის მძღოლი არ უნდა იყოს ნასამართლევი და საშიში საზოგადოებისთვის”.

განცხადებას პატიმრებისა და ყოფილი პატიმრების საკითხებზე მომუშავე 24 არასამთავრობო ორგანიზაცია ეხმაურება. აღნიშნული ორგანიზაციები პენიტენციური და პრობაციის სისტემის რეფორმის ალიანსში არიან გაერთიანებული. პატიმართა საკითხებზე მომუშავე არასამთავრობო ორგანიზაციის წარმომადგენლები ეკა ლალიაშვილის განცხადებას დისკრიმინაციულად მიიჩნევენ. მათი აზრით, მსგავსი განცხადებები აძლიერებს სტიგმას ყოფილი პატიმრების მიმართ, მაშინ, როცა კვლევების მიხედვით, დასაქმება უჭირთ არამხოლოდ ყოფილ პატიმრებს, არამედ მათი ოჯახის წევრებსაც კი.

ეკა ლალიაშვილის განცხადებას ეხმაურება დემოკრატიის ინსტიტუტიც, რომელიც წელიწადნახევარზე მეტია ყოფილი პატიმრების გაძლიერების პროექტს ახორციელებს.

„როდესაც ქვეყანაში სახელმწიფოს ინიციატივითა და ევროკავშირის მხარდაჭერით ხორციელდება პროგრამები, რომელთა მთავარი მიზანი კანონთან კონფლიქტში მყოფი პირების საზოგადოებაში სრულყოფილი ინტეგრაციის, დასაქმების ხელშეწყობაა, მიგვაჩნია, რომ მსგავსი შინაარსისა და ყოველგვარ არგუმენტს/დასაბუთებას მოკლებული განცხადებები საფრთხის შემცველია და აძლიერებს ნასამართლევი პირების მიმართ საზოგადოებაში სტიგმატური და არასწორი დამოკიდებულების ჩამოყალიბებას. მსგავსი შეფასებებით საზოგადოებასა და დამსაქმებელს პირდაპირ მივანიშნებთ, რომ ნასამართლევი პირი არის საშიში და მათი დასაქმება საფრთხის შემცველია. ეს, ჩვენი შეფასებით, არის არასწორი და დისკრიმინაციული დამოკიდებულება”, – ნათქვამია განცხადებაში.

დემოკრატიის ინსტიტუტის, ყოფილი პატიმრების გაძლიერების პროექტის კოორდინატორი, ნინო ხაჩიძე აცხადებს, რომ ყოფილი პატიმრების რეაბილიტაციაზე ორიენტირებულ ამ პროექტში ჩართულ ბენეფიციართა უმრავლესობა სწორედ ტაქსით მომსახურების სფეროშია დასაქმებული.

„ბათუმელებთან“ ეკა ლალიაშვილიმა განმარტა, რომ არასამთავრობო ორგანიზაციების მიერ დისკრიმინაციულად შეფასებულ მის განცხადებაში, ის მძიმე და განსაკუთრებულად მძიმე მუხლებისთვის ნასამართლევ პირებს გულისხმობდა, თუმცა საჯაროდ გამოქვეყნებულ განცხადებაში ეს არ იყო დაკონკრეტებული. „ბათუმელების“ კითხვაზე, ეყრდნობოდა თუ არა მისი განცხადება ყოფილი პატიმრების შესახებ რაიმე კვლევას ან ყოფილ პატიმართა საკითხებზე მომუშავე რომელიმე ორგანიზაციისგან, დანაშაულის პრევენციის ცენტრისგან გამოთხოვილ სტატისტიკას, ეკა ლალიაშვილი პასუხობს, რომ ყოფილ პატიმრებთან დაკავშირებული რაიმე ტიპის კვლევა არც ორგანიზაციას „საქართველოს ალიანსი უსაფრთხო გზებისთვის“ უწარმოებია და არც არავისგან გამოუთხოვიათ სტატისტიკა.

„ევროპის ქვეყნებში მოქმედებს ეს მოდელი და აქაც მსგავსი რეფორმის გატარებას ვგეგმავთ. ჯერ არაფერია გადაწყვეტილი ზუსტად, საკითხი დამუშავების პროცესშია, თუმცა განვმარტავ წინასწარ, რომ ტაქსის მძღოლობისას შეზღუდვა შეეხება მხოლოდ მძიმე და განსაკუთრებულად მძიმე დანაშაულისთვის ნასამართლევ პირებს“, – აცხადებს ეკა ლალიაშვილი.

ნინო ხაჩიძე მბობს, რომ თუნდაც მძიმე და განსაკუთრებულად მძიმე დანაშაულის გამო ნასამართლევი ყოფილი პატიმრების მიმართ აკრძალვის შემთხვევაშიც, საკითხი მაინც ექვემდებარება განხილვას:

„თუ ადამიანმა რამდენიმე წელი გაატარა საპატიმროში, გამოისყიდა დანაშაული და რეაბილიტაცია გაიარა წარმატებით, გამოდის, რომ ის მაინც საშიშია საზოგადოებისთვის? ეს ნიშნავს, რომ ყველა სარეაბილიტაციო პროგრამა, სახელმწიფოსა თუ არასამთავრობოების მიერ განხორციელებული,~ ყველა რესურსი, რაც ყოფილი პატიმრების რესოციალიზაციაზე, დასაქმების ხელშეწყობაზე იხარჯება, ამაოა და უმნიშვნელო.

ეს რომ ყოფილიყო სტატისტიკაზე, კვლევებზე დაფუძნებული განცხადება, რომელიც აჩვენებდა, რომ დანაშაულის ჩამდენ ტაქსის მძღოლთა დიდი ნაწილი წარსულში ნასამართლევი იყო მძიმე დანაშაულისთვის, გასაგები იქნებოდა განცხადების საფუძველი, მაგრამ მინიმუმ სასჯელაღსრულების სამინისტროსგანაც თუ არ მიგიღია კონსულტაციები, მსგავსი განცხადებები ყოფილ პატიმართა პრობლემების მიმართ ზედაპირული მიდგომის მანიშნებელია და ძალიან საშიში და საზიანოა ყოფილი პატიმრებისთვის. მათ სტიგმის გამაღრმავებელი ასეთი განცხადებების გარეშეც საკმაოდ ბევრი პრობლემა აქვთ და უჭირთ რესოციალიზაცია, დასაქმება“, – ამბობს ნინო ხაჩიძე.

პენიტენციური და პრობაციის სისტემის რეფორმის ალიანსში აცხადებენ, რომ მტკიცებულებების და კვლევის გარეშე მსგავსი განცხადებები ნაადრევია და რჩება შთაბეჭდილება, რომ განცხადების ავტორს არ ჰქონია შეხება ყოფილი პატიმრების სარეაბილიტაციო საკითხებთან. ალიანსში მიიჩნევენ, რომ სწორედ ამიტომ საჭიროა პატიმართა საკითხებზე მომუშავე არასამთავრობო ორგანიზაციებთან მჭიდრო კავშირი, მოლაპარაკებები და შეთანხმებები კონსენსუსის მისაღწევად.

ყოფილ პატიმართა საკითხებზე მომუშავე, ალიანსში შემავალი არასამთავრობო ორგანიზაციები მზაობას გამოხატავენ, ჩაერთონ ტაქსების რეფორმის პროცესში და კონსულტაციები გაუწიონ დაინტერესებულ პირებსა და ორგანიზაციებს, რათა ტაქსების სფეროს რეფორმა არ მოხდეს მოწყვლადი ჯგუფების უსაფუძვლო დისკრიმინაციის ხარჯზე.

მასალა მომზადებულია პროექტის – „ყოფილი პატიმრების, პატიმართა ოჯახებისა და პრობაციონერების მხარდაჭერის პროგრამა“  ფარგლებში.
პროექტს ახორციელებს ა(ა)იპ „დემოკრატიის ინსტიტუტი“ და დაფინანსებულია ევროკავშირის მიერ.
მასალაში გამოთქმული მოსაზრებები ავტორისეულია და შესაძლოა არ გამოხატავდეს დონორი ორგანიზაციის თვალსაზრისს.

ბათუმის თოჯინებისა და მოზარდ მაყურებელთა თეატრში საერთაშორისო ფესტივალი „ოქროს მანდარინი“ დაიწყო, რომელიც 7 ნოემბრამდე გაგრძელდება.

ფესტივალში მონაწილეობენ ბავშვთა მუსიკალური თეატრი ,,ოქროს გასაღები“ (დნეპრი), მოზარდ მაყურებელთა მუსიკალური თეატრი ,,ფანტაზია“ (კიევი), სანიმუშო თეატრი „როსინკა“ (მუკაჩევო), ბათუმის მოსწავლე ახალგაზრდობის თეატრალური დასი და სტუდია,„ლიმპოპო“.

„პროექტის მიზანი უკრაინასა და საქართველოს შორის შემოქმედებითი კავშირების გაღრმავება და რეგიონში კულტურული ცხოვრების გამრავალფეროვნება“.

 

იუსტიციის სამინისტროსა და სახელმწიფო სერვისების განვითარების სააგენტოს ინიციატივით, საქართველოში ყოველ ახალდაქორწინებულ წყვილს, საზეიმო ცერემონიის ფარგლებში, „ვეფხისტყაოსანს“ გადასცემენ, როგორც „სიყვარულის, ერთგულებისა და თანასწორობის სიმბოლოს“.

„ვეფხისტყაოსნის“ სასაჩუქრე ეგზემპლარი გაფორმებულია ცნობილი ქართველი მხატვრის სერგო ქობულაძის ილუსტრაციებით, რომელთა ასლები გიორგი ჩუბინაშვილის სახელობის ქართული ხელოვნების ისტორიისა და ძეგლთა დაცვის კვლევის ეროვნული ცენტრის ფოტოფიქსაციის ლაბორატორიაში ინახება,“ – აღნიშნულია იუსტიციის სამინისტროს მიერ გავრცელებულ ინფორმაციაში.

აქვე ვკითხულობთ, რომ იუსტიციის მინისტრ თეა წულუკიანის ინიციატივით, სახელმწიფო სერვისების განვითარების სააგენტო ქორწინების რეგისტრაციის ახალ სტანდარტს ნერგავს. დღეიდან საქართველოში მოქმედ ყველა საქორწინო სახლში, ასევე გასვლითი ქორწინებისას, რეგისტრატორებს დახვეწილი და ერთიანი სტანდარტით შექმნილი სამოსი ეცმევათ.

იუსტიციის სამინისტროს ცნობით, ქორწინების საზეიმო ცერემონიალისას რეგისტრატორებისთვის განკუთვნილი ტანისამოსის ესკიზების ავტორი ქართველი დიზაინერი მაკა ჯაფარიძეა.

ასევე, იუსტიციის სამინსიტროს ინფორმაციით, მალე სახელმწიფო სერვისების განვითარების სააგენტო ქორწინების მსურველ წყვილებს შესთავაზებს კიდევ ერთ სერვისს – საქართველოში საზეიმო ვითარებაში ქორწინების რეგისტრაციის მსურველ პირს ქორწინების თარიღის წინასწარ დაჯავშნა დისტანციურად, სახლიდან გაუსვლელად შეეძლება ნებისმიერი ადგილიდან. წყვილი სასურველ თარიღს, ქორწინების სახლს, სივრცესა თუ დარბაზს სააგენტოს ქორწინების სახლში წინასწარ გამოცხადების გარეშე შეარჩევს ვებგვერდზე – www.sda.gov.ge.

_______

მთავარი ფოტო: იუსტიციის სამინისტრო 

ფინანსთა სამინისტროს საგამოძიებო სამსახურის ცნობით, საგამოძიებო სამსახურის თანამშრომლებმა სხვისი სასაქონლო ნიშნის მართლსაწინააღმდეგო გამოყენების ფაქტი გამოავლინეს.

გამოძიებით დადგინდა, რომ სარეცხი საშუალებების რეალიზატორი ერთ-ერთი კომპანიის ხელმძღვანელი, უკანონო მატერიალური სარგებლის მიღების მიზნით, თბილისში, კუსტარულად მოწყობილ საამქროში, სხვისი სასაქონლო ნიშნის მართლსაწინააღმდეგო გამოყენების გზით ახორციელებდა „ფეირის“ სამარკო ნიშნით იაფფასიანი სარეცხი საშუალების ჩამოსხმას და საქართველოს მასშტაბით, როგორც ბრენდირებული სარეცხი საშუალების რეალიზაციას.

საგამოძიებო მოქმედებების შედეგად ამოღებულია სხვისი სასაქონლო ნიშნის გამოყენებით დამზადებული 8 943 ბოთლი „ფეირი“ და დიდი ოდენობით შესაფუთი მასალა – ბოთლები და ეტიკეტები.

გამოძიება მიმდინარეობს საქართველოს სისხლის სამართლის კოდექსის 196-ე მუხლის პირველი ნაწილით, რაც სასჯელის სახით ითვალისწინებს თავისუფლების აღკვეთას 2 წლამდე ვადით.

 

ქობულეთის მუნიციპალიტეტში, სოფელ კვირიკეში მცხოვრებ 33 წლის გიორგი ცეცხლაძეს რამდენიმე დღის წინ ავთვისებიანი სიმსივნის დიაგნოზი დაუსვეს. გიორგი, რომელიც სოფელში დედასთან ერთად ცხოვრობს და ოჯახის რჩენას აქამდე თურქეთში, სეზონურ სამუშაოზე მიღებული ანაზღაურებით ახერხებდა, ახლა დიდი გამოწვევის წინაშე დგას. იგი ცდილობს თანხა შეაგროვოს და თურქეთში ჩაიტაროს გამოკვლევები.

გიორგი ცეცხლაძე ამბობს, რომ დაახლოებით თვენახევრის წინ, კისერზე დაჩირქების გამო ბათუმის რესპუბლიკურ საავადმყოფოს მიმართა. იგი ამ საავადმყოფოს ქირურგს არასწორ მკურნალობაში ადანაშაულებს:

„ჩვეულებრივმა ქირურგმა ხელი არ მოკიდა და გამიშვეს ჩირქოვან ქირურგთან. რომ ნახა ჩირქი იყო, გათეთრებული იყო ადგილი, მითხრა, 650 ლარი უნდა, რომ დაწვე საავადმყოფოში, ერთი კვირა აქ იქნები და გაგიკეთებ ოპერაციასო, ან 170 ლარი უნდა, სითხეს გამოვიღებ, დრენაჟს ჩაგისვამ და გადახვევის შემდეგ თავისუფალი იქნები, არ იქნება პრობლემაო. გადავიხადე 170 ლარი. ჭრილობა გაყინა და გახსნა, ძალიან ბევრი ჩირქი გამოვიდა. მეორე დღეს კიდევ მივედი, გახსნა, საფენი შემიცვლა და გამომიშვა. მესამე დღეს უკვე დამეწყო ხელების ტკივილი, სახსრების ტეხვა და სიცხე მომცა. რომ ჩავედი ბათუმში, ვუთხარი, რომ ტკივილი და სიცხე მქონდა. არაფერი არ არისო, მითხრა, დამატებით გამაყუჩებელი დამინიშნა და გამომიშვა, ანტიბიოტიკები ადრე ჰქონდა დანიშნული. ტკივილი აღარ გაჩერდა, იმატა და იმატა. მე-12 დღეს ჩემმა ახლობელმა ანალიზები ამაღებინა და გადააგზავნა თბილისში. ამ ექიმსაც ვუთხარი, რომ ანალიზები თბილისში გადავაგზავნე. ამაზე მითხრა კარგი, ჭრილობა უკვე კარგად არის და ახლა სხვა ექიმთან უნდა გაგიშვათო. იმ ექიმმა კი მითხრა, ჭრილობაზე ხელი არავის მოაკიდებინო, პირდაპირ წადი თბილისშიო“, – ყვება გიორგი.

თბილისში, თოდუას კლინიკაში, რამდენიმე დღის წინ გიორგის დიაგნოზი დაუსვეს. მას ავთვისებიანი სიმსივნე აღმოაჩნდა. გიორგი ამბობს, რომ ბათუმის რესპუბლიკურ საავადმყოფოში ჩატარებული ჩირქგროვის გაკვეთიდან თვენახევრის შემდეგაც კი მას ჭრილობიდან ჩირქი სდის.

„მე არ ვადანაშაულებ ამ ექიმს იმაში, რომ სიმსივნე დამმართა, მაგრამ მისი დაუდევრობის გამო მე მდგომარეობა გამირთულდა. გადახვეული მაქვს ყელი, ჩირქი მოდის თვენახევარია. რატომ არის ასე, თუ სწორად გაკეთდა ყველაფერი, რატომ გართულდა ჩემი მდგომარეობა სამ დღეში, რატომ მოდის ჩირქი თვენახევრის შემდეგაც? რატომ არ გამიშვა სხვა ექიმთან დროზე?

ჩემი აზრით, ეს იმიტომ მოხდა, რომ თანხა ოფიციალურად არ გადახდილა. მე ვფიქრობ, ის 170 ლარი, უბრალოდ, ჯიბეში ჩაიდო და რომ ნახა, რთულად იყო საქმე, ბიოფსია ვერ მოითხოვა, რადგან ანკეტა არ იყო ჩემზე გახსნილი. პირადობა რომ გამომართვა, გარეთ გავიდა ზუსტად ერთი წუთით და მალევე დაბრუნდა და დამიბრუნა. მესამე დღეს, ტკივილი რომ დამეწყო, მას შემდეგაც არ გამიშვა სხვა ექიმთან, არ გაუკეთებია არც ანალიზი, არც ბიოფსია. თბილისიდან რომ ჩამოვედი, დავურეკე: ასეა მდგომარეობა და ღებულობთ თქვენ თავზე თუ არა, მპატრონობთ თუ არა-მეთქი – პირდაპირ ასე ვუთხარი ტელეფონში. მითხრა, მე რაც გასაკეთებელი მქონდა, ყველაფერი გავაკეთეო. ისე გაჭრა ყელზე ჩირქოვანი ადგილი,  ანალიზი არ აუღია“.

გიორგი მიიჩნევს, რომ ასეთ შემთხვევაში ექიმი პაციენტის მდგომარეობაზე პასუხისმგებელია. იგი ამბობს, რომ გამოკვლევების ჩატარება თურქეთში უნდა, თუმცა ამისათვის საკმარისი თანხა არ აქვს. გიორგი ამბობს, რომ ექიმისგან არ ითხოვს მთლიანად დაფინანსებას, მაგრამ  მიიჩნევს, რომ გარკვეული მატერიალური პასუხისმგებლობა ასეთ შემთხვევაში ექიმმა თავის თავზე უნდა აიღოს.

„ახალგაზრდა ადამიანი ვარ, ბევრი შემთხვევა ყოფილა ჩემს ახლობლებში, რომ აქ დასმული დიაგნოზი არ დასტურდება თურქეთში. სანამ ვიცოცხლებ, ვიფიქრებ, რომ მე რომ თურქეთში წავსულიყავი, იქნებ ეს დიაგნოზი არ ყოფილიყო…. ამიტომ მინდა, რომ წავიდე.“

ბათუმის რესპუბლიკური საავადმყოფოს ქირურგი ეთერ იფშირაძე ამბობს, რომ გიორგი რთული მდგომარეობა ესმის, მაგრამ მისი მიზეზით პაციენტის მდგომარეობა არ გართულებულა:

„გიორგი ცეცხლაძე მოვიდა კისერზე დაჩირქებული პროცესით და ჩვენების შესაბამისად ჩაუტარდა ამბულატორიული ჩარევა – გაკვეთა-დრენირება. ამას არაფრით არ შეიძლება ან პროვოცირება მოეხდინა იმ დაავადების, რომელიც ამ წუთას მას აქვს და არც მის წარმოქმნაში არ მიუძღვის არანაირი წვლილი. პირიქით, ჩემი ჩარევა იყო ჩვენება იმისთვის, რომ არ განვითარებულიყო სეფსისი. ყველა კოლეგა დამეთანხმება ამაში. თუ ეჭვი აქვს, რომ ჩემს ჩარევას შეეძლო ეს გამოეწვია, მიმართოს უნდა შესაბამის უწყებას – რეგულაციების სამსახურს [სამედიცინო საქმიანობის რეგულირების სააგენტო], რომელიც გამოავლენს თუ რა მოხდა, რა იყო და ა.შ. არ ვიცი მას ამის სურვილი აქვს თუ არა, პირდაპირი წესით გადმოდის შანტაჟზე.

ჩირქგროვა სადაც არის, იქ არ კეთდება ბიოფსია. გიორგი ნამყოფი იყო ჰემატოლოგთან ჩემამდე ერთი თვით ადრე. იმ ანალიზში, რომელიც ჩემთან გაუკეთდა – სისხლის კლინიკური ანალიზი, აბსოლუტურად არანაირი ცვლილება არ არის, რომელიც მიანიშნებს ჰემატოლოგიურ პათოლოგიაზე.  ამას სჭირდება კიდევ დამატებითი კვლევები, რომელიც მას ერთი თვის განმავლობაში უტარდებოდა ქალაქ თბილისში.

მე მესმის გიორგის აღელვების, მისი განცდების, ეს სერიოზული პათოლოგიაა, რა თქმა უნდა, მაგრამ ის, რომ ამ ჩარევას შეეძლო ამ დაავადების პროვოცირება, არასწორია. დღეში მინიმუმ ხუთი პაციენტი მყავს, რომელთაც უვითარდებათ მსგავსი ჩირქგროვები სხვადასხვა ადგილზე, იმიტომ რომ იმუნიტეტი დაქვეითებული აქვთ და მე ვაკეთებ ჩარევას. ეს არანაირი უკუჩვენება არ არის, პირიქით, სეფსისი რომ არ განვითარდეს, უნდა გაიკვეთოს და გამოშვებული უნდა იქნას ჩირქი“, – ამბობს ეთერ იფშირაძე „ბათუმელებთან“. იგი ამბობს, რომ ამ საქმის კურსშია საავადმყოფოს დირექტორიც და ჯანდაცვის მინისტრიც.

იგი მისი მხრიდან გიორგის მკურნალობის დაფინანსების საკითხს შეუძლებლად მიიჩნევს: „ასეთი რამ არ ხდება ბუნებაში. საქართველოს ჯანდაცვის სისტემა აფინანსებს ამ დაავადებას, მაგრამ მას უნდა თურქეთში წასვლა“.

ეთერ იფშირაძე ასევე აღნიშნავს, რომ პაციენტის ისტორიაში დევს გიორგის მიერ თანხის გადახდის დამადასტურებელი ჩეკიც.

რაც შეეხება იმას, თუ რატომ სდის გიორგის ჩირქი ამ დრომდე ჭრილობიდან, ქირურგი ამბობს, რომ ამაში უცნაური არაფერია: „სადაც არის ჩირქი, უნდა გამოვიდეს. მყავს პაციენტები, რომელთაც უკეთებენ ჯირკვლებზე ოპერაციას თბილისში, გზადაგზა ხდება ასეთი დაჩირქებები სხეულის სხვადასხვა მიდამოებში, რომელსაც ვუკეთებ მე ოპერაციას“.

გიორგი კი ამბობს, რომ რესპუბლიკურ საავადმყოფოში გახსნილი მისი ავადმყოფობის ისტორია აქამდე მას არ უნახავს და ამბობს, რომ სამედიცინო საქმიანობის რეგულირების სააგენტოსაც მიმართავს. ახლა იგი საჭირო კვლევებისთვის თანხის შეგროვებას ცდილობს და ყველას, ვისაც მისი დახმარება შეუძლია, თანადგომას სთხოვს.

_________

მთავარ ფოტოზე: გიორგი ცეცხლაძე. კადრი ნიკოლოზ ცეზარიშვილის მიერ მომზადებული ვიდეოსიუჟეტიდან.

დღეს, 3 ნოემბერს, ბათუმში „ქართული ოცნების“ ოფისთან ხალხმრავლობაა. შენობის შესასვლელში შეკრებილები თავიანთ რიგს ელოდებიან. ადგილზე „ბათუმელების“ გამოჩენამ მათი გაღიზიანება გამოწვია: „ოცნების კოორდინატორები ვართ. რა გინდათ, რატომ გვეკითხებით… რა არ გვაქვს უფლება?“

ბათუმის შტაბის ხელმძღვანელის, უმაღლესი საბჭოს დეპუტატ ირაკლი ჭეიშვილის ინფორმაციით, შტაბში პარტიის კორდინატორებთან გასაუბრება, პირველი ტურის შედეგების გაანალიზებისა და გადახალისების პროცესი მიდის. ჭეიშვილი არ გამორიცხავს, რომ პარტიას ბათუმში, საპრეზიდენტო არჩევნების მეორე ტურზე, რამდენიმე ახალი კორდინატორიც ჰყავდეს.

ამავე თემაზე:

„ამომრჩეველი არის ნაწყენი“ – ჭეიშვილი მეორე ტურში „ოცნების“ გეგმებზე ბათუმში

See more

„ძველ ბათუმში გასეირნება ცუდ ხასიათზე არ მაყენებს“, – ასე მოკლედ უპასუხა ბათუმის მერიის ქალაქგანვითარებისა და ურბანული პოლიტიკის სამსახურის უფროსმა მირიან მეტრეველმა კითხვას, განაშენიანების თვალსაზრისით ბათუმში რომელი უბანი მოსწონს. მისი სამსახური მერიაში შესულ სამშენებლო პროექტებს განიხილავს და ურჩევს მერს გასცეს თუ არა მშენებლობის ნებართვა.

რას უფრო დიდ მნიშვნელობას ანიჭებენ გადაწყვეტილების მიღებისას ბათუმის მერიის ქალაქგანვითარებისა და ურბანული პოლიტიკის სამსახურის ხელმძღვანელი და მისი გუნდი გადაწყვეტილების მიღებისას, მოსწონთ თუ არა სამშენებლო პროექტები, რომლებსაც თავად ამტკიცებენ? თემაზე „ბათუმელების“ კითხვებს მირიან მეტრეველი პასუხობს.

ბატონო მირიან, თუ გქონიათ შემთხვევა, როცა პროექტი ყველა დადგენილ მოთხოვნას აკმაყოფილებს, მაგრამ არ უხდება ქუჩის განაშენიანებას. ასეთ შემთხვევაში რა გადაწყვეტილებას იღებთ?

მთავარია, პროექტი კანონმდებლობის ჩარჩოში იყოს მოქცეული. არ იყოს სამეზობლო დარღვევა, საჩივარი და ასე შემდეგ…  არის ჩვენთან უბნები, სადაც ბევრი შენობა ძალიან ახლოსაა ერთმანეთთან, არ ვამბობ მხოლოდ მრავალბინიანი სახლების მშენებლობაზე, ვგულისხმობ სხვადასხვა ტიპის მშენებლობას. ეს პრობლემა არ უნდა იყოს, რომ შემდეგ არ მოჰყვეს გასაჩივრება…

ეს არის ქალაქმშენებლობითი მოთხოვნები და უნდა დაკმაყოფილდეს, ამიტომ ამას განსაკუთრებულ ყურადღებას ვაქცევთ. ვიზუალურ მხარეს და გემოვნებას რაც შეეხება, რამდენჯერმე მითქვამს, რომ დოკუმენტაცია რაც შემოდის… დღეს იმდენად ისწავლეს კომპიუტერული გრაფიკა მთელ მსოფლიოში და ჩვენც ავუწყვეთ ფეხი ასე თუ ისე, რომ ის ბათუმის დონეს აკმაყოფილებს. პროექტები მეტნაკლებად, რაღაც დონეზე, ასიდან ნახევარი მისაღებია.

როცა ამბობთ რომ მისაღებია, ისევ რეგულაციებს გულისხმობთ, თუ მოგწონთ თქვენ პირადად?

გემოვნებით რომ მივუდგეთ? – ვერ მივუდგებით. მე შეიძლება ისეთი რაღაცა მომწონდეს, რასაც დღეს, პირობითად ვამბობ, ბათუმში ბევრი ვერ გააკეთებს და რა გამოდის უარი უნდა ვუთხრათ?

უმეტესობა პროექტებისა, რაზეც თანხმობა გაქვთ მიცემული, მოგწონთ თქვენ პირადად, როგორც ბათუმის მერიის მთავარ არქიტექტორს?

დოკუმენტაცია თვითონ, რაც შემოდის დისკზე, მისაღებია.

ზოგი მოგვწონს, ზოგი მისაღებია.

იმას მეუბნებით, რომ მიგიციათ თანხმობა ისეთ პროექტებზე, რომლებიც თქვენთვის იყო მისაღები და არა მოსაწონი, ასეა?

ყოფილა ასეთი შემთხვევებიც. შეიძლება ნახევარიც იყოს, რატომ გიკვირთ. შემოქმედი ადამიანისთვის არქიტექტურის სამსახურში ყოფნა… ჩვენ რა მოცემულობაც გვაქვს ბათუმში და, ზოგადად, საქართველოში, მთლად მასე ვერ ვიტყოდი. ჩვენთან მთავარია იყოს მისაღები კანონმდებლობის შესაბამისი არქიტექტურა. რაც შეეხება იმას, თუ მე როგორ მინდოდა, ამაზე შენიშვნები გვაქვს და საკმაოდ გემოვნებიანი თანამშრომლებიც გვყავს, უბრალოდ, ზედმეტად მაღალ მატერიებზე საუბარი ყველასთან არ შეიძლება. ჯერ იმ დონეზე არ ვართ, რომ დეტალებში დავუწყოთ ხალხს პრეტენზიების გამოცხადება და უარი მივწეროთ. მისაღები მე მგონი ნეგატიურს არ ნიშნავს. მისაღები ნიშნავს, რომ დადებითია.

როდესაც მოდის დიდბიუჯეტიანი კომპანია, რომელსაც უნდა სასტუმროს აშენება, არც მას ელაპარაკებით, როგორც თქვენ ამბობთ მაღალ მატერიებზე?

ისევ ვამბობ, რომ მისაღები, ჩემი აზრით, ნიშნავს, რომ ბათუმისთვის მისაღებია. ვერ ვხდები რა განსხვავებაა მისაღებსა და კიდევ უფრო კარგს შორის. ყველა ფულიანი და პასუხისმგებლიანი მშენებლები თვითონაც უნდა ცდილობდეს, რომ კარგი შენობა დაუტოვოს ქალაქს ასი წლის მანძილზე მინიმუმ. მათ აქვთ მზაობა, რომ კარგი პროექტი გააკეთონ.

თქვენ საუბრობდით ასევე იმაზე, რომ ხშირად არ შენდება იმ ვიზუალისა და ხარისხის შენობები, რაც არის მერიასთან შეთანხმებული და რაც პროექტის რენდერზე ჩანს.

ეს პრობლემა არის, ვერ გავექცევით. ჩვენ კანონმდებლობით გვევალება ვაკონტროლოთ შეთანხმებული პროექტის შესაბამისობა მშენებლობასთან. მაგრამ პროექტში წარმოდგენილი მასალა და ფერი თუ შესაბამისი ხარისხის არ იქნება… ჩვენი კლიმატური პირობებიდან გამომდინარე ფერს იცვლის [მასალა], ირეცხება, მოაჯირებიდან ჟანგი ჩადის, შავდება. ეს ყველამ ვიცით. ჩვენ ვფიქრობდით, რომ შეგვექმნა რაღაც სტანდარტი, მაგრამ ამ ეტაპზე ასეთი ცვლილება რეგულაციებში არ შესულა. მაგის დროც მოვა ალბათ.

 

 

 

 

 

დღეს, „ბათუმის რესპუბლიკური საავადმყოფოს“ ეზოში ექიმებმა მორგი საპროტესტო აქცია გამართეს. აქციის მონაწილეები უკვე საქართველოს მთავრობისგან ითხოვენ პასუხს ამ საავადმყოფოს ახალ შენობაზე, რომლის აპარატურისა და ინვენტარის შესაძენად  თანხა მომავალი წლის ბიუჯეტში ისევ არ არის გათვალისწინებული.

ექიმი ბენო ჭელიძე, რომელიც საპროტესტო აქციის ერთ-ერთი ორგანიზატორია, აცხადებს, რომ ისინი ამ აქციით ცდილობენ საქართველოს ხელისუფლების, უფრო კი ბიძინა ივანიშვილის ყურადღების მიპყრობას.

„ამ შენობაზე „ევექსს“ აქვს თვალი დადგმული, ყველაფერს აკეთებენ იმისთვის, რომ გაკოტრდეს ჩვენი საავადმყოფო და მერე ჩაიგდოს ხელში ამ დაინტერესებულმა კომპანიამ. ეს ასე რომ არ იყოს, მაშინ საავადმყოფოს აღჭურვისთვის ბიუჯეტში ფულს ჩადებდნენ, მაგრამ ამას არ აკეთებენ“, – აცხადებს ბენო ჭელიძე.

ამ ექიმის თქმით, აქციაზე 50-100 პირი იმყოფება და პრობლემის გამოსწორებისთვის ისინი საქართველოს მთავრობას  პირველ დეკემბრამდე აძლევენ ვადას.

ბათუმში, რესპუბლიკური საავადმყოფოს ტერიტორიაზე, ახალი კლინიკის მშენებლობა 2018 წლის 18 მაისს უნდა დასრულებულიყო. შემდეგ ეს ვადა 31 აგვისტომდე გადაწიეს. კლინიკის მშენებლობა ამ დრომდე გრძელდება. დღემდე აჭარის ბიუჯეტში ახალი კლინიკის აპარატურის შესაძენად, რაც დაახლოებით 20 მილიონი აშშ დოლარი დაჯდება, გათვალისწინებული არ არის.

აქ დასაქმებული ექიმების ერთი ჯგუფი შიშობს, რომ რესპუბლიკური საავადმყოფო ხელისუფლებამ შეიძლება კერძო კომპანიაზე გაასხვისოს.

რესპუბლიკური საავადმყოფოსთან დაკავშირებით ხელისუფლების პოზიციაზე დღეს „ბათუმელებთან“ საქართველოს ჯანდაცვის მინისტრმა დავით სერგეენკომ ისაუბრა. მინისტრის თქმით, საავადმყოფოს გაყიდვა არ იგეგმება.

დღეს, 3 ნოემბერს, ბათუმის რესპუბლიკური საავადმყოფოს მომავალზე “ბათუმელებთან” კომენტარი საქართველოს ჯანდაცვის მინისტრმა, დავით სერგეენკომ გააკეთა. მან აღნიშნა, რომ რესპუბლიკური საავადმყოფოს გაყიდვა არ იგეგმება და არსებობს კონკრეტული გეგმა ამ საავადმყოფოსთან დაკავშირებით.

• ბატონო დავით, დღეს ბათუმში რესპუბლიკური საავადმყოფოს ექიმების მესამე აქცია იმართება. ექიმები ითხოვენ, რომ საავადმყოფოს ახალი შენობა დასრულდეს, საავადმყოფო ამოქმედდეს, თუმცა ისინი ამბობენ, რომ თანხა ამისათვის აჭარის ბიუჯეტში არ არის გათვალისწინებული. ასევე, არის ეჭვი იმაზეც, რომ მთავრობას სურს ბათუმის რესპუბლიკური საავადმყოფო გაყიდოს. არსებობს რაიმე გადაწყვეტილება ამ თემაზე? 

ბათუმის რესპუბლიკური საავადმყოფოს შესახებ არსებობს კონკრეტული გეგმა, რომელიც მიღებული და მოწონებულია. ეს გეგმა გაჟღერებული მაქვს ბათუმში, მაგრამ კიდევ ერთხელ მინდა გავაჟღერო, რომ ბათუმის რესპუბლიკური საავადმყოფოს გასხვისება არ მოიაზრება. ბათუმის რესპუბლიკური საავადმყოფო არის ჯანდაცვის ობიექტი, რომელიც გარკვეულ პროექტში მიიღებს მონაწილეობას.

ეს პროექტი ამუშავდება უკვე მომავალი წლის დასაწყისიდან და ამ პროექტის მიხედვით, საქართველოში უნდა შეიქმნას რამდენიმე სანიმუშო, ეტალონური კლინიკა, რომელიც იქნება სახელმწიფოს მართვაში, სახელმწიფოს საკუთრებაში. ეს კლინიკები იქნება: თბილისის რესპუბლიკური საავადმყოფო; საჩხერის სამედიცინო ცენტრი; ზუგდიდის რუხის კლინიკა, რომლის მშენებლობა ასევე სრულდება და ბათუმის რესპუბლიკური საავადმყოფო. მინიმუმ ეს ოთხი კლინიკა იქნება მოქცეული ერთიან კონცეფციაში და იქნება სახელმწიფო საკუთრებაში. ეს პროექტი ცალსახად ამას მოიაზრებს.

შინაარსობრივად ეს ეტალონურობა გამოიხატება იმაში, რომ სახელმწიფო აკეთებს ინვესტიციას, იმისათვის, რომ თვისობრივი ეტალონები შექმნას ფასი-ხარისხის შეფარდების, საუნივერსიტეტო განათლების შესაძლებლობით და მაღალი ხარისხის სერვისების. ბათუმის რესპუბლიკური მოიაზრება ამ დიდ და ძალიან კარგ პროექტში, ასე რომ შიში ან მოლოდინი იმაზე, რომ საავადმყოფო გასხვისდება, ცალსახად არ უნდა იყოს. ბათუმის რესპუბლიკურის შესანიშნავი კოლექტივი მუშაობდა და დღემდე მუშაობს ძველ შენობაში, მათ ჩვენ ვუშენებთ ახალ შენობას.

რაც შეეხება ბიუჯეტს, ჩვენ კონსულტანტებთან ერთად უკვე ვასრულებთ ამ სამუშაოს.

• თუმცა თანხა გათვალისწინებული უნდა ყოფილიყო აჭარის ბიუჯეტში. ექიმები ამბობენ, რომ ეს ასე არ არის და აქედან მოდის ეჭვიც.  

არ არის ეჭვის საფუძველი. ბათუმის რესპუბლიკური საავადმყოფოს მშენებლობის დასრულება არის აჭარის ბიუჯეტის საკითხი. რაც შეეხება მის აღჭურვას, ეს იქნება ერთიანი პროექტი, მინიმუმ იმ ოთხი კლინიკის, რომელზეც მოგახსენეთ, ეს უკვე ცენტრალური ბიუჯეტიდან განხორციელდება. ცენტრალური ბიუჯეტში მოაზრებულია რამდენიმე პროგრამა ინფრასტრუქტურის და აღჭურვის. თუმცა, როგორც კი ჩვენ ამ პროექტს დავასრულებთ (როგორც გითხარით ეს იქნება წლის დასასრულს, თუმცა შეიძლება იანვარში გადავიდეს), გვეცოდინება ზუსტი ბიუჯეტი, მათ შორის ბათუმის რესპუბლიკური საავადმყოფოს აღჭურვის. ეს არის ცენტრალური ბიუჯეტი, პლუს დონორების დაფინანსება, არა კერძო მესაკუთრეების, არა მეწილეების, არამედ გარკვეული დონორული დაფინანსება.

• რომელ დონორებზეა საუბარი? 

ჩვენ გვაქვს მოლაპარაკება რამდენიმე სამთავრობო ორგანიზაციასთან, რომლებიც გვეხმარებიან გარკვეული გრანტებით და მათი დახმარებით უამრავი პროექტი გავაკეთეთ. მე არ მინდა ვიჩქარო და ნედლი ვერსია გამოვიტანო. ჩვენ რომ გვეჩქარა, ვერც საყოველთაო დაზღვევას გავაკეთებდით და ვერც ვერაფერს, ამიტომ უნდა გვქონდეს საშუალება, რომ აჭარის მთავრობასთან თანამშრომლობით მივიყვანოთ, გავწეროთ ეს ყველაფერი. კონცეფციის და გეგმის დონეზე გიდასტურებთ ცალსახად, რომ ბათუმის რესპუბლიკური საავადმყოფო მოიაზრება აი, ამ სანიმუშო კლინიკების ქსელში, რომელიც იქნება სახელმწიფო საკუთრებაში. მისი განკერძოება არ განიხილება.

• აჭარის მთავრობასთან გქონდათ საუბარი, რატომ ვერ მოხვდა ბიუჯეტში ამ საავადმყოფოს მშენებლობის თანხის გათვალისწინება? 

აჭარის მთავრობასთან სულ მაქვს კომუნიკაცია ამ დიდი კონცეფციის თემაზე და, რა თქმა უნდა, ისინი საქმის კურსში არიან. ასეც იყო მოაზრებული, რომ მშენებლობის დასრულების ბიუჯეტი უნდა ყოფილიყო მათთან, რაც შეეხება აღჭურვას, ეს მოხდება ქვეყნის ბიუჯეტიდან.

______

შეგახსენებთ, რომ ბათუმში, რესპუბლიკური საავადმყოფოს ტერიტორიაზე ახალი კლინიკის მშენებლობა 2018 წლის 18 მაისს უნდა დასრულებულიყო, შემდგომ ახალ ვადად 31 აგვისტო იქნა დასახელებული, თუმცა მშენებლობა ამ დრომდე არ დასრულებულა.

ამავე თემაზე: 

იყიდება თუ არა ბათუმის რესპუბლიკური საავადმყოფო

See more

 

აჭარის უმაღლესმა საარჩევნო კომისიამ [ უსკო] ინსტიტუციური განვითარებისა და საზოგადოებასთან ურთიერთობის დეპარტამენტის, ინსტიტუციური განვითარების განყოფილების უფროსის შესარჩევად კონკურსი გამოაცხადა. თანამდებობრივი სარგო 1800 ლარია.

კონკურსანტს უნდა ჰქონდეს ბაკალავრის ხარისხი, საარჩევნო სისტემაში, გრანტების მოძიების სფეროში ან საერთაშორისო და ადგილობრივ დონორებთან მუშაობის არანაკლებ ორწლიანი გამოცდილება.

აუცილებელი მოთხოვნაა ასევე, საარჩევნო მოხელის სერტიფიკატის ფლობა.

კონკურსი სამ ეტაპიანია, პირველი ეტაპი განაცხადების გადარჩევას, მეორე წერით დავალებას, მესამე ეტაპი კი საკონკურსო კომისიასთან გასაუბრებას გულისხმობს.

განაცხადების მიღების ბოლო ვადა  10 ნოემბერია.

 

აჭარის  განათლების, კულტურისა და სპორტის სამინისტრომ „სტუდენტთა  დახმარების“ პროგრამის  ფარგლებში   კონკურსი განმეორებით გამოაცხადა.

სამინისტროს ინფორმაციით კონკურსში მონაწილეობის მიღება შეუძლიათ სტუდენტებს, რომლებიც ერთიანი ეროვნული გამოცდების შედეგად 2015, 2016 და 2017 წელს ჩაირიცხნენ აკადემიური უმაღლესი განათლების პირველი და მეორე საფეხურის აკრედიტებულ საგანმანათლებლო პროგრამებზე; ბოლო ექვსი წლის განმავლობაში სწავლობდნენ და სრული ზოგადი განათლების დამადასტურებელი დოკუმენტი მიიღეს აჭარის ადმინისტრაციულ ტერიტორიაზე არსებულ ზოგადსაგანმანათლებლო დაწესებულებებში;

ასევე, უმაღლეს სასწავლებლებში სწავლის ბოლო სემესტრის აკადემიური მოსწრების საშუალო არითმერტიკული ტოლია ან მეტი 71%-სა.

პროგრამა ითვალისწინებს შემდეგი კატეგორიის სტუდენტების დაფინანსებას:

სტუდენტი უნდა იყოს მაღალმთიანი აჭარიდან, მრავალშვილიანი ოჯახის წევრი, დედით ან მამით ობოლი, უდედმამო; სოციალურად დაუცველი [100 000 ქულა ან ნაკლები.]

კონკურსში მონაწილეობის მსურველებმა განცხადებები და პროგრამით გათვალისწინებული დოკუმენტები უნდა წარადგინონ სამინისტროში შემდეგ მისამართზე: ქ. ბათუმი, ლადო გუდიაშვილის ქ. N4 ტელ: 24 53 78.

კონკურსი 2018 წლის 15 ნოემბრამდე გაგრძელდება. [ 14 ნოემბრის ჩათვლით]

რაც შეეხება იმ კონკურსანტებს, რომლებიც დარეგისტრირდნენ 2018 წლის 1 აგვისტოდან 24 აგვისტოს ჩათვლით პერიოდში პროგრამაში მონაწილეობისათვის და აკმაყოფილებენ პროგრამით დადგენილ კრიტერიუმებს, მაგრამ ვერ მოიპოვეს დაფინანსება მათი განცხადებები ავტომატურად ჩაითვლება დამატებით გამოცხადებულ კონკურსში რეგისტრირებულად.