მთავარი,სიახლეები

ადვოკატი 6 წლის ბიჭის დაღუპვის საქმეზე: სხვის ნაცვლად სხვა ზის ციხეში

03.11.2018 • 1967
ადვოკატი 6 წლის ბიჭის დაღუპვის საქმეზე: სხვის ნაცვლად სხვა ზის ციხეში

დღეს ბათუმის საქალაქო სასამართლომ განიხილა ქედის მუნიციპალიტეტის სოფელ დანდალოს ჭინკაძეების უბანში ტრაგიკული შემთხვევის მონაწილეების – სამი პირის აღკვეთი ღონისძიების საქმე. სამივე პირმა სასამართლოს შესთავაზა 5-5 ათასი ლარის გირაო, მაგრამ სასამართლომ არ გაიზიარა მხარის მოთხოვნა და დაკავებულები პატიმრობაში დატოვა. 31 ოქტომბერს კარიერზე აფეთქების შედეგად 6 წილის ბიჭი დაიღუპა.

დაკავებულების ადვოკატი, ვაჟა ხახუტაიშვილი ამბობს, რომ აფეთქების შედეგად დაღუპული ბავშვის საქმეზე „სხვის ნაცვლად ციხეში სხვა ზის“, რადგან აფეთქებაზე უფლებამოსილება ჰქონდათ არა დაკავებულ მუშებს, არამედ კომპანია „დინამიტი ლ.დ.“-ს.

„ესენი [დაკავებულები] იყვნენ კომპანია „ალბაირაქის“ მუშები. მათ ევალებოდათ ასაფეთქებელი მასალების შეზიდვა და განლაგება ობიექტზე. ამიტომ მათ მოამზადეს ეს ყველაფერი – შეზიდეს ასაფეთქებელი მასალები, რაც სჭირდებოდათ და კომპანიის ხელმძღვანელის მითითებით განალაგეს. აფეთქება მოხდა ქართული კომპანია „დინამიტ ლ.დ.“-ს მიერ. დაკავებულებს არც აფეთქების განათლება ჰქონდათ, არც ვალდებულება და არც აუფეთქებიათ. ამის მიუხედავად დააკავეს ისინი. მუშებმა დღეს მოსამართლეს უთხრეს, რომ ისინი კომპანია „დინამიტ ლ. დ-ს“ და კომპანია „ალბაირაქის“ ზედამხედველების დავალებით მოქმედებდნენ“.

ქედაში აფეთქების შედეგად 6 წლის ბავშვის დაღუპვის ფაქტზე დაკავებულია თურქეთის სამი მოქალაქე. მათ ბრალი წარდგენილი აქვთ სისხლის სამართლის კოდექსის 244-ე მუხლით, რაც გულისხმობს 2-დან 5-წლამდე პატიმრობას და უფრო მსუბუქ სასჯელებსაც ითვალისწინებს.

„არ შეიძლება ესენი [მუშები] სისხლის სამართლის კოდექსის 244-ე მუხლის სუბიექტები იყვნენ, ესენი შეიძლება მიაყოლო ვიღაცას თანამონაწილედ. ხელშეკრულებით აფეთქების უფლებამოსილება ჰქონდა კომპანია „დინამიტ ლ. დ.“-ს. დამოუკიდებლად ამათი პასუხისგებაში მიცემა რა ვიცი… 40 წელია ამ საქმეს ვემსახურები და მაშინ არაფერი მცოდნია“, – აცხადებს ადვოკატი ვაჟა ხახუტაიშვილი.

კომპანია „დინამიტი ლ.დ“-ს ორი დამფუძნებელი ჰყავს – ლევან ბოლქვაძე და დავით ბერიძე, ხოლო კომპანია „ალბაირაქის“ 100-ვე პროცენტის მფლობელი თურქეთის მოქალაქე სინან ალბაირაქია.

პროკურატურა არ გამორიცხავს, რომ 6 წლის ბიჭის დაღუპვის საქმეზე სამუშაოს მწარმოებელ კომპანიებში პასუხისმგებელი პირების პასუხისმგებლობის საკითხიც დადგეს.

ქედის მუიციპალიტეტის სოფელ ჭინკაძეებიდან ქვას ბათუმის ზღვისპირა ზოლის გამაგრებით სამუშაოებისთვის ეზიდებიან.

ოფიციალური ინფორმაციით, ქედაში ქვის მოპოვების უფლება შპს “სტრუიკ გრუპ ჯორჯიას” ლიცენზიის გარეშე საქართველოს მთავრობის 2018 წლის 10 აპრილს განკარგულების საფუძველზე მისცეს. განკარგულებაში წერია, რომ „სახელმწიფო მნიშვნელობის ინფრასტრუქტურული პროექტის – ბათუმის ნაპირსამაგრი კონსტრუქციის მშენებლობის პროექტის შეუფერხებლად განხორციელების მიზნით შპს “სტრუიკ გრუპ ჯორჯია” ერთი წლის ვადით გათავისუფლდეს სასარგებლო წიაღისეულის ლიცენზიის მოპოვებისგან და მიეცეს უფლება მოიპოვოს 165 000 მეტრ კუბი ანდეზიტ-პორფირიტი/ანდეზიტო-ბაზალტი ხელვაჩაურისა და ქედის მუნიციპალიტეტებში“.

ამავე განკარგულებაში, რომელსაც ხელს აწერს ყოფილი პრემიერი გიორგი კვირიკაშვილი, წერია, რომ სამუშაოებზე „ზედამხედველობა განახორციელოს წიაღისეულის ეროვნულმა სააგენტომ“.

კომპანია „დინამიტი ლ.დ“ და კომპანია „ალბაირაქი“ სწორედ შპს “სტრუიკ გრუპ ჯორჯიას” ქვეკონტრაქტორები არიან. პროექტის საერთო ღირებულება 30 მილიონი ლარია.

დამატებითი ინფორმაცია პროექტის შესახებ: 

ნაპირდაცვა თუ ბათუმის სანაპიროს ეკოლოგიური დასახიჩრება – რა შემთხვევაში ემუქრება წარეცხვა ძველ ბულვარს

 

 

გადაბეჭდვის წესი


ასევე: