წინასაარჩევნოდ, უფრო ზუსტად, მეორე ტურის წინ, აჭარაში ზურაბ პატარაძე დაბრუნდა. აჭარის მთავრობის ყოფილი თავმჯდომარე და ახლა უკვე საქართველოს სრულუფლებიანი ელჩი აზერბაიჯანში, მოქალაქეებს ხვდება ბათუმსა და ქობულეთში. „ნაციონალური მოძრაობის“ წევრები სოციალურ ქსელში წერენ, რომ ზურაბ პატარაძე „ქართულმა ოცნებამ“ კონკრეტულად „ქობულეთში სამუშაოდ“ ჩამოიყვანა.
„მხოლოდ ქობულეთში არა, აჭარის ყველა მუნიციპალიტეტში მექნება შეხვედრები,“ – გვითხრა ზურაბ პატარაძემ. მისი თქმით, იგი საკუთარი სურვილით მართავს შეხვედრებს და მმართველ პოლიტიკურ ძალას არ ჩამოუყვანია.
„მე ამის უფლება მაქვს, კანონს არ ვარღვევ… შვებულება ავიღე და აქ წამოვედი, ჩემს ხალხს მინდა შევხვდე. არავის უთხოვია ჩამოსვლა, ეს იყო ჩემი გადაწყვეტილება, ჩემი სურვილია ხალხს შევხვდე. მოსახლეობას ვხვდები სხვადასხვა თემაზე სასაუბროდ და მე არ ვმალავ, რომ მაქვს სიმპათიები „ქართული ოცნების“ მიმართ. მე ვთქვი და ახლაც ვიმეორებ, რომ ვარ ამ გუნდის წევრი,“ – აღნიშნა ზურაბ პატარაძემ „ბათუმელებთან“.
ვინ უწევს ორგანიზებას ზურაბ პატარაძესთან შეხვედრებს? – აჭარის მთავრობის ყოფილმა თავმჯდომარემ კონკრეტული პირები არ დაგვისახელა, თუმცა დასძინა, რომ ადმინისტრაციული რესურსის გამოყენებასთან არ გვაქვს საქმე.
რატომ გაუჩნდა ელჩს ამომრჩეველთან შეხვედრის სურვილი ახლა, მეორე ტურის წინ? – ზურაბ პატარაძემ გვიპასუხა, რომ ამომრჩეველს კი არა, მოსახლეობას ხვდება და მსგავსი შეხვედრები არჩევნების შემდეგაც ექნება. მან გვითხრა, რომ ეკონომიკური ურთიერთობების გაღრმავება საქართველო-აზერბაიჯანს შორის მისი მოვალეობაა, როგორც ელჩის და ამ კუთხითაც იმუშავებს მოსახლეობასთან შეხვედრის დროს.
როდემდე აქვს შვებულება ზურაბ პატარაძეს, დარჩება თუ არა იგი რეგიონში არჩევნების მეორე ტურამდე?
„რამდენიმე დღეში მე ისევ დავბრუნდები აზერბაიჯანში, რადგან შეხვედრები მაქვს დანიშნული, მერე ისევ ჩამოვალ. გიმეორებთ, რომ მოსახლეობასთან შეხვედრები და ახლო ურთიერთობა არჩევნების შემდეგაც მექნება,“ – გვითხრა ზურაბ პატარაძემ.
ზურაბ პატარაძემ აჭარის მთავრობის თავმჯდომარის პოსტი 2018 წლის 4 ივლისს დატოვა, 29 აგვისტოს იგი აზერბაიჯანში ელჩად დანიშნეს.
